ببكي عليهو كل ما اشوفو!!!!!!

الراديو ............ الرادي.!!
الزمن الجميل
الرفقة الحنينة
أخبار
معلومات
ثقافة
أشعار
غُنا


بالحجار
لا كهربة ولا قطوعات
لا برمجة ولا قنوات
تسمع ولا تشوف
( ودي المتعة هنا !!)

الرفقة الجميلة
أخبار من اي مكان
والحجار من الدكان
يا حليلك وحليل أيامك
بقيت من الماضي
واحزني عليك
كل ما اشوفك ببكي عليك
هجروك الناس ونسوك
واتنكروا ليك ...
قالوا زمنك فات وغنايك مات
ولا شنو ؟؟؟؟؟؟؟

الأخت رشا
لا نملك إلا ان نقول حضارات سادت ثم بادت
مع خالص الود

لوووووووووووووولز

غايتو يا رشا لقيتك حنينه خلاص

يا حبيب الكل
كيف حالك
حضارات كانت نعمة وليست نقمة
الراديو كان متسيد في كل البيوت
ليهو هيبة
أنت ما بتقفلو إلا لمن تجي تنوم قليل فيهو البزعجك
شكرا ع مرورك


مناااااااال
كيفك يا جميل
طبعا حنينة وكلي طيبة
ودمعتي قرييييييييبة
بس ما قلتي لي أنت حصل عندك علاقة مع الرادي ...آي.الرادي
ولا ما حصل تعارف يعني من الناس البعدو.؟

يا سلاااااااااااام
فعلا الراديو فيه برامج حلوة شديد
والغريبة هناك سر عجيب في هذا الجهاز الجميل
طبعا في الزمن ده نادرا ما نسمع الراديو،، إلا في "العربية"
ياخي مرات الواحد بيكون ما عايز ينزل من "العربية" لما يكون في موضوع حلو
انا غايتو مرات بالرسيفر بفتح قائمة الإذاعات وبستمع مسافة كدا ومرات بلقى نفسي
ما قادر ارجع لقائمة القنوات التلفزيونية
وبتكيف لإذاعة أم درمان شديد

هيه دي حال الدنيا يا رشا أختي،

الوالد الله يرحمه ويغفر ليه كان عندو راديو أو (رادي)
شبيه للراديو فوق الصورة.. موجتين.. واحدة للصوت
والثانية يضبط بيها مؤشر المحطة.. بتذكر كان بيشتغل ببطارية
كبيرة أعتقد من نوع فيلبس أو إيفريدي ..
وكان معلق فوق في رف في الحيطة.
الصوت مثل (القنبلة) من ما قمنا لقيناها شغال ولا قطع يوم
مع إنه مرة وقع من فوق على الأرض وإنكسر من الجنبة لكن
إستمر شغال.
لكن تعالي شوفي راديوهات الزمن دا.. شيء ترانزيستر
وحاجات كدا حساسة أقل حاجة تأثر فيهو يقوم يقطع
وأحسن تشتري غيرو.
والله أيام يا زمان.

أخي / معتز
تحياتي
هذا الجهاز البسيط
مثّل في حياة الناس الكثير
فهو لم يكن للتسلية فقط
بل كان يمثل الأرتباط بالعالم الخارجي
من نقل للأخبار وخلافه
حتى أخبار الخرطوم ما كانت الناس بتعرفها إلا من خلاله
ناهيك عن أخبار العالم
ملاء الفراغات في كل البيوت والأماكن العامة
التصق بي كل فرد
واصبح الصديق للكل
كان في زمانه الملك
لك التقدير ومشكور ع المرور



أخي/ عزيز
كانت الحميمية ما بيننا وهذا الرادي
كان بمثل شي مهم في البيت
ما يصبح الصباح إلا وأول حاجة تفتح الرادي
عشان تعرف الدنيا فيها شنو
وبعدها برامج الصباح
مرورا بنشرة الساعة عشرة
كان أماتنا بنتظرن نشرة عشرة وتمانية بالليل
عشان يسمعن الوفيات دي كانت النشرة المحلية أهم شي
الرادي كان بملاء الأركان
وزي رادي والدك الكبير ده
كان صاحب هيبة لازم يختوهو فوق تربيزة عالية
قمة العظمة
والله زمان وفات............ تقديري ع مرورك

صباح الخير يارشا , وتسلمي على البوست الجميل ..


زمان الأغنيه الشهيره كانت بتقول : بريد الزول الحماني الرادي :-) يعني من شدة مالرادي مهم ممكن أقيس بيهو درجة المحبوب :-)

حاليا عندي رادي سغنوني كده ماببدلو بي كنوز الدنيا , ورغم انو متطور شويه ومعاهو منبه لكن بضبط المنبه على الرادي بحيث انو

يصحيني الرادي بدل صوت جرس التنبيه المزعج وبعكر مزاج باقي اليوم :-) وأيام دراستي كان الرادي بزاكر معاي ويمتحن معاي

ويونسني ويحكي لي الأخبار :-) لا لا ياخ الرادي ده ماممكن نستغنى عنو ..

_
وتاني

تحياتي / د/ نبراس
صدقيني سعدت بطلتك البهية
تسلمي يا رب
يا سلام نبراس
منو البقول ما عندو ذكريات مع الرادي
بالذات الناس مواليد السبعينات وانزلي
تعرفي الواحدة يكون عندها خطيب أو حبيب بعيد
طبعا وسيلة التواصل إما الجوابات
أو ما يطلبه المستمعون
هي تهدي ليهو اغنيه وهو يهدي ليها
وعلي حسب عاد الأغنية بتقول شنو
كل واحد يعرف الشعور الحاصل
وبعد الأغنية يا بكاء
يا فرحة

لك الود دكتورة


الأخ / ود الصايم
فاكهة المنبر
ملك المختصر
أنت ما اظنك حضرت زمن الروادي
سغيير وجاهل
مشكور ع الغشوة

أبدا والله يا رشا .. لكن الـ دي عندها سببين
الأول ما بقدر أقولو .. والتاني إني هسي شغال في إذاعة

Quote: أبدا والله يا رشا

ود الصايم يا كبير

فضل يا عريس .. إزيكـ ياخ

والله زمن ياخ
الرادي كان وسيله تعليميه تثقيفيه ترفيهيه دا طبعا اضافه لشكل جهاز الراديو ذاتو وكمية الحنيه الفيهو
برضو نوعية البرامج والمسلسلات والحوارات ... الخ
هسي الموضوع بقي خرجمه وونسه فارغه واغاني هابطه وعدم الموضوع عندهم عاملين منو موضوع
خاصه الاذاعات الجديده الطلعت دي .. زي الرابعه ومانجو ومش عارف ايه
يمكن الاذاعه الوحيده الممكن يسمعها الزول هسي ويستمتع بيها ويستفيد منها هي اذاعة البيت السوداني ام درمان اف ام 100


تحياتي

اولا بالتبادي يا رشا
الصفارة تييييييت بتاعة مع الصباح ساعة اللقمات والاطفال حول امهاتهم
يا ولد اقفل الرادي ناس ام درمان لسع نامييييين حاكونا نحن نقوم من الدغش
وبعد شوية ياتيك صوت الشيخ عوض بابكر الله يرحمه صوت يدخل الطمانينة في النفس
او صوت الشيخ صديق احمد حمدون له الرحمة .... لكن صوت الشيخ صديق احمد حمدون
سمح في آذان فطور رمضان
.
.
ثم نفحات الصباح
ومع نسمات الصباح تدغدغ الاذان ليلى المغربي بذلك الصوت الذي يدخلك في غيبوبة النشوة
يا ولد ودي الرادي دا للناس البدو الطوب قالوا دايرين اسمعوا نفحات الصباح
وشيل ليهن معاك العكارة دي اتريقوا بيها
.
.
مسلسل نصت نهار
الهمباتة
نحن الهمباتة معروفين غير حق الرجال ماعندنا تعيين
ما بنسرقوا سرقة بنشيلوا حمرة عين
.
.
عشا البايتات اسمي ان ودرت قول قسم الله
ما بهمي العدو كان كتر كان قلا
.
.
كان حرت صناديدا نقابل الجلة ما في كلام
وكان بردت نجيبو محلب وهدام
.
.
وعندما تغني ام كلتوم تكورك فيك حبوبتك يا ولد اقفل اقفل المصريين
.
.
الدهباية
.
.
في الجزيرة نزرع قطنا نزرع نتيرب نحقق املنا
داك المزارع شايل تيرابو ازرع وارقع سرابو
.
.
ربووووووووووع السودان
من ام در لربوع سوداننا نحييك وانت كل امالنا
.
.
ودعناك خلاااس يا ربوع نعودلك تاني بعد اسبوع
.
.
لسااااااان العرب
يقدمه فرااااااااج الطيب
يقول الشاعر العبسي
وهذا البرنامج رغم انه ممتع ولكن في نص المتعة دي الناس تنوم والراديو اصبح باااح
اصبح عند الحرامي اسمع منو نفحات الصباح وابيعوا
.
.
يوم الجمعة وفي لحظة الغسيل والصابون والظهرة والموية مدفقة في نص الحوش
تاتيك صالة العرض
.
.
نشرة تمانية
بصوت فيصل عبدالله والصمت الحاضرين لسماع اخبار الوفيات
.
.
ويقام الماتم ببري المحس
.
.
يا رشا يا كحيل غيثني ( اغنية بعد نشرة الميتين طوالي ) ما عارف ليه
عشان الناس تنسى احزانا
والعجب العجيب يوم الرادي اكون شغال موسيقي عسكرية بس
تررن تررن
ترنن تررن
بعد قليل بيان هام فترقبوه
.
.
الحكومة انقلبت
اسويها الله في الليام الشينة دي
.
.
لا بديل للرادي الا الرادي
ولا بديل للسكة الحديد الا السكة الحديد
شكرا يا رشا لهذه المتعة الصباحية

متضامن مع ود الصايم !!

ازيك تاني يارشا , بوست سمح مابتفات :-)


أها ياستي , انا من مواليد التمانينات وانتي طالعه :-) لكن وحات الرادي مابكسفك , مابيناتنا ههههههه

نفسي أفهم ليه الواحده مهما تحاول تكون (مستنيره) مما تجي للعمر بتتخلف ؟؟ هههههه ماعلينا ..

أها قلت ليك والله صوت الرادي الصباح بأخبارو الثقيله وصوت المذيع الرخيم أحيانا كثيره واصوات الشعارات

المألوفه للبرامج اليوميه خصوصا في السودان وأذاعة أمدرمان بالتحديد , بتذكرني بكباية الشاي باللبن المعد للتو يشهد على

كده البوخ المتصاعد , والبسكويت الجاي في السكه ولازم يتزامن مجيئه مع الشاي قبل يبرد , وتحيات الصباح الطيبه

هنا وهناك في بيت سوداني بيشبه كل البيوت , ويوم سوداني بيبتدئ بالتلتله :-) ياسلام ياخ و وين الأيام دي هسا ؟؟

عشان كده بحتفظ براديني الصغنوني هسا لعله يجيب لي بعض نسمات تلك الأيام البعيده ..


كتر خيرك يارشا على راديك السمح هههههه

رشا ... سلامات
الرادي القديم حنين على ناس كتار وايامه كانت جميلة
الناس حلوة وطيبة ومامستعجلة كل شيء بالمهلة
اها نهديك صورة رادي قديم جدا جدا جدا الان ومعاهو كمان عضو المنبر جمال السنوسي

Quote: بتذكرني بكباية الشاي باللبن المعد للتو يشهد على كده البوخ المتصاعد , والبسكويت الجاي في السكه ولازم يتزامن مجيئه مع الشاي قبل يبرد , وتحيات الصباح الطيبه هنا وهناك في بيت سوداني بيشبه كل البيوت , ويوم سوداني بيبتدئ بالتلتله :-) ياسلام ياخ و وين الأيام دي هسا ؟؟ عشان كده بحتفظ براديني الصغنوني هسا لعله يجيب لي بعض نسمات تلك الأيام البعيده ..

الرد 14


والله فعلا
الزول نسى الراديو شدددددددددددديد
نسينا حاجات كتيره مع الزحمه الحاصله
نسينا قعدت النجيله
نسينا ريحة الجواب الجاى بالبريد
نسينا نزور الجار والقريب




تحياتى رشويه

ياود الصايم الفيك إتعرفت
الأول ما بتقولو طبعا لأنك أكيد خايف من الشبيحة
والتاني قلت شغال في إذاعة بتقدم مسابقات أكيد
ودي بتكون حصريا لناس البورد بعدين رادي العربية ده
ولا رادي ولاشي الرادي لو ما ختيتو جمبك في التربيزة
ولا عندو طعم ولا شي



الأخ / فضل
سلام
شاكرة لمرورك

نوفل/ ســــــــــلام
على قولك أصبحت الأذاعات عندنا حاجة جايطة
بعدين نسيت حاجة المذيعات فيها بتكلمن ما بي لهجتنا
ويـــــــــــــــن إذاعة امدرمان كانت قيمة ومعنى
وليها طعم خاص والله شكلّت وجدان إنسان السودان
شكر جدًا حار لمرورك



أخوي ود الجزيرة
ود البوش..سلام وتحية
أهلنا في الأقاليم بالذات كانت علاقتهم بالرادي قوية
بمشي معاهم الحواشة ديل أنتو طبعاً غايتو نحن ما عندنا حواشات
وتلقى البنايين وهم شغالين الرادي شغال قمة الأنسجام
وأنت لو رسلت جواب الأذاعة لبرنامج ما يطلبه المستمعون
ويكون بكرة البرنامج الليلة ديك ما بتنوم
وشفت كان كيف برنامج الحقيبة( حقيبة الفن ،،،المبارك إبراهيم)
ويوم الجمعة برنامج الحان تقديم ______معتصم فضل
وقبل أخبار تسعة ونص____لســــــــــان العرب __فراج الطيب
بالله نعد شنو ونحسب شنو آخر مرة سمعت رادي من سنين
كـــــــــــــلو كان في الزمن الجميـــــــــــــــــــــــــل...........لك تقديري


الأخ/ علي
سلام
ما قلت حاجة !!
تكون من ناس هسه
تشكر ع المرور


ازيك يا دكتورة
بالجد أنتي زولة رائعة طال ما بتحبي الرادي
كدي بدل راديك السغنوني الحديث ده
فتشي علي رادي قديم ولو كان من السبعينيات يكون مبالغة
أنتي حاولي انشا الله تعملي اعلان في الجرايد
بس المشكلة في الزمن ده تسمعي بيهو شنو؟
وليك الود


تحياتي أخ /وليد
لكن الرادي ده ما تحفة يا ريت لو عندي زيو
أعدت لينا ذكريات ما بتنمحي
وتحية للزميل /جمال


رانيا كيفك
اول شي ابشرك مجهزة ليك كيمان من الكلام الما مفهوم
بكرة من الصباح تلقيهو في البوست تبعك وده امتحان عديل لقدراتك
حتى بعد داك ع حسب النتيجة أعلن صحبتي ليك
بعدين النسألك انتي من ناس الرادي ولا الراديو يعني راديك المعاك ده
ياهو ود عم الفلاش والسي دي .؟...الليلة رانيا زعلت ________كدي لي بكرة
سعيدة

Quote: رشا ... سلامات الرادي القديم حنين على ناس كتار وايامه كانت جميلة الناس حلوة وطيبة ومامستعجلة كل شيء بالمهلة اها نهديك صورة رادي قديم جدا جدا جدا الان ومعاهو كمان عضو المنبر جمال السنوسي

Quote: تحياتي أخ /وليد لكن الرادي ده ما تحفة يا ريت لو عندي زيو أعدت لينا ذكريات ما بتنمحي وتحية للزميل /جمال

الأخت رشا

سلام

صورة زميلنا وأخونا جمال السنوسي في منزل شقيقي عز الدين بمدينة جدة

والراديو الظاهر في الصورة دي شغال بصورة ممتازة رغم أنه قديم جدا.

أتابع بانتظام من إذاعة أمدرمان م برنامج حقيبة الفن الذي يقدمه الموسوعة

عوض بابكر كل يوم جمعة فقط .

يعني مازول راديو بالحيل.

خالص التحايا

تحياتي/ أخي عماد
( مازول رادي بلحيل)
الرادي يا عماد أصبح شي من الماضي
كان في زمانو يمتلكنا هو ويتسيد كل بيت
هسه تسمع شنو في الرادي
تقديري لمرورك