يحي العظام وهي رميم ..شروق ابو الناس تاااني جاتكم..معقولة يا أماسي بحري؟

أمبارح وعبر قناة النيل الأزرق قدموا برنامج متعلق بي أماسي بحري التجهيزات والإستعدادات والترشيحات للفنانين و و . ويبدو إنو أماسي بحري ثار حولها كتير من الجدل ويبدو إنها أعلنت فشلها المبكر مقارنة بي أماسي أمدر واماسي الخرطوم ويكفي إنو ناس بحري ما لقوا مكان يقيموا فيهو الفعاليات وبعد جهد جهيد توصلوا لي إنو أفضل مكان هو حدائق عبود !!!
المستغرب في الموضوع إنو صفوت الجيلي الفنان الناشئ والمبتدئ هو واحد من دعامات اللجنة المنظمة ناهي وأمر يحدد منو يشارك ومنو ما يشارك يعني ممكن عااادي صفوت الجيلي يقول لي محمود ما تجي تغني لأنو غنيت في أماسي أم در!!!
ده كلّو ما علينا بس إستوقفتني حتة خلتني أعرف إنو أماسي بحري كتبت شهادة وفاتها من بددددري ..
عرض رئيس اللجنة ورقة في التلفزيون بأسماء المشاركين في الليالي وبدا يتحدث عن كيفية إنتقاء هذه المجموعة من الفنانين وإنو إختاروهم بي معايير دقييييقة جداً ومن خلال قاعدتهم الجماهيرية العريضة ووجودهم في الساحة الفنية وأعمالهم التي فرضت نفسها وأصواتهم القوية والأداء المتميز و و و و ..
فجأة كده قووووم يا إسم شروق أبو الناس أظهر لي ضمن أسماء الفنانين المشاركين في ليالي بحري !!!!!!!
شروووق أبو الناس تااااااااني ؟؟؟؟
نحن ما صدقنا إنو بروف معز عمر بخيت وأستاذ الموصلي قنعوا من خيراً فيها وساعدونا بالسكات والموية الباردة بعد ما رفعوا الراية البيضا وبعد ما قنعت شروق ذااات نفسها من خيراً في روحا وتفرغت لي دعايات البسكويت والصابون والشعيرية (فشلت في الوصول لي دعايات الإتصالات وشاي الغزالتين ومحلات الأثاث ).
معقولة يا رئيس اللجنة المنظمة بعد كلامك عن القاعدة الجماهيرية والصوت الجميل والأعمال ذائعة الصيت تقوم تفضح نفسك بالسرعة دي وإنت مضمن إسم شروق أبو الناس ضمن قائمة برنامج الليالي؟
كدي تعال برااااحة كده يا عزيز الفاضل وقول لي على ياتو أساس إخترت شروق ابو الناس ؟
قاعدتها الجماهيرية ؟ كضباً كااااضب..
صوتها الجميل ..؟؟ كضاااب كضاااب يا البعيو يمين كضاب..
حضورها المتميز ؟؟؟ لا حوووولا لا قوووولا ..
بالله عليك تختار شروق ابو الناس وترفض إختيار ياسر إبراهيم (ياسر بورتسودان) ؟؟؟
وتقول لي الصوت الجميل والادء المتميز ؟؟
يبدو إنو شروق ولممرة التانية ح تحاول تقتحم الساحة الفنية عن طريق الواسطة ..
وطالما إختارت شروق ابو الناس فرض نفسها وادائها الباهت على أذن المستمع السوداني عبر بوابات الواسطة فلن تجد شروق ابو الناس مكاناً في الساحة الفنية !!
ما بقول إني ظلمت شروق ابو الناس بتعبير "واسطة" ده لأنو وببساطة كل الحاجات اللي قالها السيد رئيس اللجنة غير منطبقة على شروق فما هي الفلسفة في إختيارها ومنو اللي رشحها ومنو اللي أثنى عليها ؟؟؟

تخريمة :
يا بنات بحري ..قالوا بتحبو ..مرة حبونا ..

ومنو القال ليك هي ماتت يافاروق..
كانت استراحة محارب كما يقولون..

الفاروق

سلام و تحية و أظهر و بان عليك الأمان

كدي تعال برااااحة كده يا عزيز الفاضل وقول لي على ياتو أساس إخترت شروق ابو الناس ؟
قاعدتها الجماهيرية ؟ كضباً كااااضب..
صوتها الجميل ..؟؟ كضاااب كضاااب يا البعيو يمين كضاب..
حضورها المتميز ؟؟؟ لا حوووولا لا قوووولا ..
بالله عليك تختار شروق ابو الناس وترفض إختيار ياسر إبراهيم (ياسر بورتسودان) ؟؟؟
وتقول لي الصوت الجميل والادء المتميز ؟؟
يبدو إنو شروق ولممرة التانية ح تحاول تقتحم الساحة الفنية عن طريق الواسطة ..
وطالما إختارت شروق ابو الناس فرض نفسها وادائها الباهت على أذن المستمع السوداني عبر بوابات الواسطة فلن تجد شروق ابو الناس مكاناً في الساحة الفنية !!
ما بقول إني ظلمت شروق ابو الناس بتعبير "واسطة" ده لأنو وببساطة كل الحاجات اللي قالها السيد رئيس اللجنة غير منطبقة على شروق فما هي الفلسفة في إختيارها ومنو اللي رشحها ومنو اللي أثنى عليها ؟؟؟

كل شيء في الدنيا ممكن يمشي بالواسطة
إلا الفن : لا يمكن إعتلاء قمته أو حتى الجلوس في حوشه أو المتاوقة من شباكه إلا بالحنجرة و الأداء.
فلتحاول مرة أخرى شروق ، فستجد نفسها مرة أخرى أن صوتها عبارة عن Vibration يحركها في رجة و ضجة إلى خارج حلبة الفن.
الفن هو المجال الوحيد الذي لا تشفع فيه شفاعة و لا واسطة.

أبصم بالعشرين يا مورينيو!!








_
تصدق يا مؤمن .. أنا قايل أماسي بحري دي فنانة جديدة!!

وأنا بطني طمّت من تونة الوابل

دياب يا أيمن :

Quote: كانت استراحة محارب كما يقولون..

هيي لكن المحارب ده ما أستراح شدييد لكن !!والله المحارب ده كان كمل جميلو وإستشهد لينا يكون ما قصر ..

Quote: فستجد نفسها مرة أخرى أن صوتها عبارة عن Vibration يحركها في رجة و ضجة إلى خارج حلبة الفن. الفن هو المجال الوحيد الذي لا تشفع فيه شفاعة و لا واسطة.

والله يا ابو جهينة جملتك دي بعدها مفروض نقفل البوست فقد إستوفى كل أغراضه وجبت لينا الخلاصة ..
شوفت الهزة دي ياها زاااتا الانا بتكلم عليها !! والشفاعة والواسطة دي الانا بعنيها ..

الصايم ديييمة :
ياخ والله فعلاً إسم فنانات :)
اسة لو عملو الأماسي دي في بيتكم أبو سطوح داك بدل عبود ما أحسن ليهم ..
يا صايم انت ود بحري فلازم تقيف وقفة قوية في موضوع شروق ده ..:)

يا إيمو ..
والله إنت زووولي تب ..الما بدورو تخلي ليهو التونة ..
متحجج ساااي طلعت ..بتاعت التونة ديك أفراح عصام ما شروق ..
شروووق دي تخلي ليها الحمام ممكن عشان دعاية الصابون :)

غايتو أنا ماعارف ليكم أماسي بحري
أو أماسي ودربيعة
أو أماسي كاب الجداد
لكن البعرفو والله بعد آخر زيارة لي للسودان قررت أكون { فنان }
بعني حضرت حفلة واحد عريس في الخرطوم والفنان كان بـ 6 مليون
6 مليون دقشة واحدة
الآن حفظت أكثر من 10 أغاني
وكل ما يطلب مني الأبناء الخروج لزيارة أقاربهم فإنني أكون سعيد بذلك
حيث يخلو لي المنزل وأبدأ في عمل بروفات لزوم الشغل الجديد
فقد وصلت لقناعة تامة بان صوتي أجمل بكثر من أخونا ابو ستة مليون
بس ياريت لو القى لي أورغان مستعمل

يا سيد انت ما سمعته بي :-
لكل شئ اذا ما تم نقصان؟!


اها لو ما شاركت النقصان يجي من وين؟





ملحوظة :-
في اعتقادي انو ما يسمى باليالي دي اصلاً ما مسؤلية
وزير الثقافة ولا حاجة وعلى هذا الاساس يبقي النضم
عن صفوت الجيلي وعضويتو للجنة ده كلو كلام هبتلي زي
ما كل شي هبتلي وفي وسط الجوطة اهو الاحوال بتمشي كده
ده يا عمر .



بالمناسبة خلينا في المهم في شاب اسمو نجدي نديم سمعتو ؟

الشليق عمر الفاروق مالك على ناس بحري ما سمعت في بحري سر الهوى وغير بحري ما لي دواء ، وفي شمبات حليل مجلسنا ، وفي ربوع بحري لاقيتو ، والعيلفون جنة عدن شوفت معالم يسعدن ، وكدراوية ،وما كنت رايق وهاني في صفاء وتأمين في الخوجلاب يا قلبي المني شالك مين ، دي كلها بحري يا عمر .

أولاً انا لا اوافقك الراي في كينونت الأخ الفنان صفوت الجيلي وكونه يكون في اللجنة المنظمة فأنا أرى أن الفنان صفوت فنان مجتهد ووصل لهذه المكانة بعد فترة طويلة من ممارسة الفن وله اعمال فنية جميلة ووجدت إستحسان لدى عدد مقدر من الناس وهو لم يرتقي لعتبة الفن عن طريق الواسطة أو الغناء الهابط المبتزل فصفوت فنان مترع الإبداع وانا لا اقول ذلك لأنني تربطني معه صداقة ولكن لقد عرفت صفوت منذ اكثر من إثنى عشر سنة واعرف انه مجتهد ويسير بخطى ثابته منذ ان عرفته وإلى الآن بالرغم من أن دراسة الهندسة أخذت منه الكثير وجعلته يبطء في اللحاق بركب من سبقوه أو من أتو من بعده .
أما عن مشاركةالأخت الفنانة شروق أبو الناس فانا لا اقدر أن افتي فيها لانني سمعت امس جزء من الحلقة التي بثت على قناة النيل الأزرق ولكن قد يكون للجنة المنظمة نظرى اخرى في ذلك .
وبعدين ياخ مش بحري دي والله لو عملوالأماسي دي في ميدان عقرب برضوا حا يطلع حلوة وجميلة ، أها رأيك شنو ،

هسة تلقاك تقول هو ده زاتو مالو ومال الفن ... هههههههههههه

ود الفاروق والله مشتاقون اظهر وبان عليك الأمان ..
تحياتي : ياسر العيلفون

يافاروق والله كلامك عديل الا في حتة الشعبية
عليك الله لاقاك فنان ماعندو جمهور وشعبية
والله كان غنيت انت او ابوحراز الفوق دا
بتلقوا ليكم جمهور مايدي الدرب

** الأُستاذ عمر الفاروق..
** ســلام..

##السؤال المحيرنى ؟؟ ماهى الحكمه من إقامة هذه الأماسى المآسى ؟؟

** البيدفعوهو لهذه الأماسى ولجانها من المال المنهوب من محمد احمد ,, مايحفرو بيهو خيران للأمطار او ينضفوا الخيران الموجوده أصلاً وإتقفلت نتيجةً للإهمال وعدم النضافه ,,, والخريف على الأبواب ,, ولى حينتظروا لما تصب الأمطار ويقولوا ليك الخريف جا فجاتن !!!!!!!!!!!
(ودام الود بين الجميع ,, حتى ينصلح حال البلد المايل)
(ابو محمد فؤاد) - الماكيكى..

معنا .. لإيصال وجهة نظر عمر الفاروق!!

نابري يا حبوب:

Quote: في اعتقادي انو ما يسمى باليالي دي اصلاً ما مسؤلية وزير الثقافة ولا حاجة وعلى هذا الاساس يبقي النضم عن صفوت الجيلي وعضويتو للجنة ده كلو كلام هبتلي زي ما كل شي هبتلي وفي وسط الجوطة اهو الاحوال بتمشي كده ده يا عمر .

المشكلة إنو الليالي دي حالياً بيتعاملوا معاها على إنها زيها زي مهرجانات الثقافة الأول والثاني والثالث مع إنو في الليالي دي الفنان بيتقاضى 10 مليون يعني زيها زي العداد حق العرس واعتقد إنو ممكن عااادي يستغلوا الليالي دي ويحولوها لي عرس جماعي وكل يوم يشوفو العرسان الفي بحري ويلموهم ويجي الفنان يغني لأنو بالجد الليالي حاليا بتشبه بيت العرس (ناقصا سرويس العشا )..
بالنسبة للنقصان فصدقني شروق نقصااان زاتو ما بتنقص ..شروق ح تجي تغني ليهم ليلة خميس حقت عبد الرب إدريس ديك ومعاها فرمالة البروف معز ومعاهم عيش معاي الحب ديك والباقي تتمو حركة يدين ورموش وتتخارج وبكرة تلاقي صحفي ح يكتب شروق ابو الناس تدهش الحضور بصوتها الملائكي ..