أهالي بري يتظاهرون الآن و يهتفون: موية موية

خرج أهالي بري اليوم هاتفين : موية موية

نسبة للقطوعات المتكررة للمياه هناك رغم إنتظامهم في دفع فاتورة المياه

تحوّل الهتاف للحظات بأن:الشعب يريد إسقاط النظام

و تم حرق عدد من اللساتك في الشارع

الشرطة تحاصر المكان

نقوم بتوثيق الحدث

و سنقوم بمدكم بالصور و الفيديوهات بعد رفعها مباشرة على الإنترنت

فوق الى ان يسقط الانقاذ

Quote: الشعب يريد إسقاط النظام

هكذا يتسول المواطـن من اجل الماء في عاصمة البلاد!!
حكومة ليها 20 سنة ما قادرة توصل المياه!!
انا متأكد انو الفرج بعد شهـر 7 القادم وستزول
هذه الحكومة بعد موعد اعلان دولة الجنوب.

Quote: تحوّل الهتاف للحظات بأن:الشعب يريد إسقاط النظام

ياداااااااب وقعت لي حكاية بنات الرّكشات

يا زول ولا يهمِّك الفيديو بجيبو ليك أنا دة
لو طلّعت لي مِنُّو عبارة "إسقا ط النِّظام" باكر بقلب معاكم
تمام

عمرو الكِضِب ما بقدِّمكم للنّاس ولا لي قِدّام

تظاهُرة ليلية ومحدودة لشباب بري: "دايرين Water ولاّ نجوطا - و الشّعب يُريد موية الشّراب"



أقرأ فوق
لحدي ما يجيك الفيديو يا البتكتب بإسم شباب لأجل "التّزوير"

إضغط لمُشاهدة فيديو الإحتجاجات



قال إسقاط النظام قال


بعدين ياخ مراسلاتكم الحربيّات ديل ما لقيتو ليهم غير ركشات؟

Quote: الشعب يريد إسقاط النظام

التحية لاهل بري ..

Quote: إضغط لمُشاهدة فيديو الإحتجاجات

الأخ علاء الدين شكراً على الفيديو
الذي يوضح ثورة العطشى ..
أنت بقيت معانا ولا شنو ؟

أيوة معاكم في الحق
ضِدّكم في الغلط

و غلطكم كتيييييييييييييييير

زي التّزوير في هثتافات الغلابة العايزين موية
عملتوهو "نِظام"

و أوّلاًو أخيراً
مع الشّعب
و إرادته أيّاً كانت

عموماً الموية جات في بُرِّي ولم أُغادر الموقع لحدي ما الموية كبّت في مواسير البيوت
و النّاس رجعت بيوتا مبسوطة
وتوتة توتة إنتهت الحدّوتة

تصبحون على خير

Quote: عموماً الموية جات في بُرِّي ولم أُغادر الموقع لحدي ما الموية كبّت في مواسير البيوت

احي انا قلت لي كبت شووووووووو؟
يعني الموية ما كان ممكن تكب في مواسير البيوت بدون ما الناس تحتاج تتظاهر لا سيما و النيل على بعد امتار؟
عالم ما بتجي الا بالضغط

Quote: يعني الموية ما كان ممكن تكب في مواسير البيوت بدون ما الناس تحتاج تتظاهر لا سيما و النيل على بعد امتار؟ عالم ما بتجي الا بالضغط

شكراً الأخ الصاوي لقد كفيت ..
دمت بالف خير ..

الشعب يريد إسقاط النظام

Quote: عموماً الموية جات في بُرِّي ولم أُغادر الموقع لحدي ما الموية كبّت في مواسير البيوت و النّاس رجعت بيوتا مبسوطة وتوتة توتة إنتهت الحدّوتة

الأخ علاء الدين والله حقو نرشحوكا لوالى الخرطوم

عليك الله بالمرة كده تلب معاك كبرى المنشية وأهلنا فى دار السلام والمايقوما برضو دايرين موية

وشعارات الثورات دائماً ما تبدأ هكذا يا علاء ياخوى

ياكافى البلا انت ياخوى ماشفته كيف تتطورت الشعارات من الشعب يريد حرية فى سوريا الى الشعب يريد اسقاط النظام

صدقنى يا أخى اذا كان هناك شعب لابد أن ينتفض فهو الشعب السودانى

يا علاء ياخوى نحن فى السودان ياكافى البلا لا موية ولا مدارس ولا مستشفيات وعطالة بالالاف

وغلاء طاحن وفقر مدقع

والله الواحد لما يشوف التوانسة والسوريين وكيف بلدهم نضيفة وهم لابسين تمام وشحمانين ويتذكر أهلنا فى السودان

الغبش ماشين زى الأشباح يستغرب الناس دى ساكته على شنو؟

وتأكد يا أخى بأن المياه لا تتوفر حتى فى العاصمة مابلك بالاقاليم

وأنا برضو من انصار اصلاح النظام ، لكن البيقنع الديك شنو؟

طالما انتو شايفين كل شى تمام التمام والشعب مبسوط ومافى زول تعبان يبقى كيفن عاد الحال ينصلح

فلنبدأ يا علاء اولاً بالاعتراف بأن هناك مشكلة ولا يمكن حلها بالتخدير أو الالتفاف حولها

وأيضاً ياعلاء الارهاب والتخويف والتعذيب لن يجدى ولن يرهب كل الشعب

والمسألة لما توصل لدرجة معينة لن ينفع معها أى شئ الا التغيير

والشعب لن يتحرك لأن الأحزاب تريده أن يتحرك ولن يركن لأنه خائف من قسوة وعنف النظام

الشعب أكبر من كل ذلك وله دوافعه وتوقيته وطرائقة

وهو كالسيل العارم وكالطوفان والسونامى عندما يتحرك لن تستطيع أى قوة ان تقف أمامه

عليكم ان تعجلوا بالحلول الحقيقية والعمل على فهم متتطلبات الجماهير

أحذروا ثورة الجياع والعطشى يا علاء احذروها

فهؤلاء ليس لديهم ما يخافون عليه

على العموم اشكرك على وقفتك مع أهلنا فى البرارى حتى تأكدت بوصول المياه عبر الحنفيات

ولو كان المسئولين زيك كده ما كان حايكون فى مشكلة من أصلو