متين أشوف الخرطوم؟

إغتربت مع الرعيل الأول من المغتربين فى السبعينات فى زمن النميرى (الحلو) وكنا وقتها نحسب أن النظام قد أصبح طارداً لأبنائه ولا يحقق آمال وطوحات الشباب ، كنا نحسبه زمن قهر وقمع ومنع للحريات ودكتاتورية سدنة مايو ، كنا نحسب أن الأرض قد ضاقت بنا بما رحبت ، والسودانى لا تحد طوحاته الحدود السياسية ولا الجغرافية ، فهاجر الناس الوطن زرافات زرافات

كانت بدايات الغربة محققة للآمال فحضرنا الطفرة السعودية الأولى فى عهد المغفور له الملك الصالح خالد بن العزيز الذى كان مجلسه مفتوح على مصراعيه للقاصى والدانى

وإمتدت سنوات غربتنا لعشرات السنين حتى جعلنا من السعودية موطنا لنا ومما شجعنا على البقاء تفهم المجتمع السعودى لعاداتنا وتقاليدنا ، حتى تجرأت يوماً على (الجيب) التابع للشرطة والذى كان فى حملة لمطاردة (ستات الكسرة) فقد رأيت العسكرى يحمل (طبق الكسرة) بالكامل ويضعه فى الجيب ، وإذا بست الكسرة تجرى مهرولة فى (زنقات) بنى مالك (زنقة زنقة) ، فاتجهت صوب الجيب ، وقال لى العسكرى (إيش تبغى؟) فقلت له ياخ أنا سودانى ونحن لا نعيش إلا بالكسرة ، تماما كما تفعلون أنتم مع (الكبسة) ، فقال لى بذوق شديد (إنت تعرف الحرمة دى) فقلت له لا والله ولكنى أقصد الكسرة لأن العيال فى إنتظارى للغداء ،

تصوروا ماذا فعل العسكرى؟؟؟؟

أعطانى الطبق كاملاً ، وقال لى كلم الحرمة دى تانى ما تقعد هنا ،

ثم إنتظرتها لأكثر من نصف ساعة ، وأعدت لها الطبق مصدر رزقها وإشتريت كسرتى منها وإنصرفت ، وبعدها لم أرى حملات شرطية لستات الكسرة

نعم ، لقد ساهمنا نحن الغلابة فى نقل الصورة الجميلة للسودانى ، حتى خربت مؤخراً ببلاوى لا يعلمها إلا الله

على العموم ، ما يحز فى نفسى حقيقة ، أننى رغم الثلاثين الطوال إلا أننى لا أملك مترا واحدا فى بلد المليون ميل ، وما يحز فى نفسى لا أدرى متين أشوف الخرطوم لأختم حياتى هانئاً بين بنى جلدتى بدون منغصات سياسية ولا معيشية ولا مرمطة لمن جاوز سنه الخمسين

وذكرت المنلوج السودان

أحى متين أشوف الخرطوم

قالوا لى فى الخرطوم البت تسوق عربية
قالوا لى فى الخرطوم جنينة البلدية

لا لا

لالا يا قروية

إنتى يا قروية بالكرم معروفة
فى نصايص الليل تقوم تعشى ضيوفا

أحى متين الخرطوم؟

وليه فتح الجراح
بالله ياهشام ما تعمل
فينا خير وقارن من
خلال البوست بين عسكريتين

آيه رآيك ؟؟؟؟


هشو تحياتي يا جميل الذوق.






...............................حجر.

أخى المناضل الرفاعى حجر

أشكرك على المبادرة فى الحضور للبوست ، وكما تعلم فإنى أميل لسرد الأوضاع الإجتماعية أكثر من النواحى السياسية وللإجابة عن سؤالك فإنى أقول أنه لا توجد مقارنة بين عهد النميرى وعهد البشير

فى عهد البشير أحيل كل شىء للصالح العام (وهو صالح الجبهة الإسلامية وليس صالح السودان) فانتهى بذلك تماما ما يعرف بالسودان ، وأصبح الجيش والشرطة والخدمةالمدنية (جبهجية) وبقية الشعب (كرور) ليس إلا ، وقد أزعجتنى كلمات قالها مستشار الرئيس ووزير الخارجية السابق مصطفى عثمان فى قناة الحوار فى الإسبوع الماضى عندما سأله المذيع عن إمكانية خروج الشعب لتغيير النظام فرد المستشار أن الشعب السودانى لن يخرج لأنه (مرتاح) مع الحكومة فلماذا يخرج؟؟؟؟

فيا أخى الرفاعى نحن مرتاحون حد (الخنوع) وحد (الرضوخ) وحد (الإستسلام) لقضاء الله ولأمر الله والحاكم بأمر الله ،

كما أنى أستغرب يا أخى أننى ومنذ العام 89 وحتى اليوم لم أجلس فى مجلس سودانى قط إلا ووجدت الجميع يسب ويسخط فى سلسبيل هؤلاء ولم أجد لهم مادحين ومؤيدين ، فهل لدى الشعب السودانى إزدواجية أم نحن ننافق ونداهن ولسان حالنا يقول من أجل أبنائى؟

وهذه النقطة يمكنك أن تشرحها لى لو وجدت لها تفسيرا

ولك خالص تحياتى

هشم يا رائع

و نحن بدورنا نقول : متى تعود لنا الخرطوم ؟؟

Quote: أحى متين أشوف الخرطوم قالوا لى فى الخرطوم البت تسوق عربية قالوا لى فى الخرطوم جنينة البلدية لا لا لالا يا قروية إنتى يا قروية بالكرم معروفة فى نصايص الليل تقوم تعشى ضيوفا أحى متين الخرطوم؟

الله إجازي محنك يا هشام


عشان زي الكلام الفوق ده و عيرو
أخوك ريط الشنط و توكل على الدايم
و رجع عشان إعيش فى الخرتوم
مادام المسألة ما فيها فايدة مش احسن
نرجع و احنا على ارجلنا بدلا عن
الرجوع بكرسى متحرك أو تابوت

الوجيه إبن برى البار ماضى أبوالعزائم

ونعم القرار الذى إتخذته للعودة

ولسان حالى يقول:

إمتى أرجع لأمدر وأزورها

Quote: ما يحز فى نفسى حقيقة ، أننى رغم الثلاثين الطوال إلا أننى لا أملك مترا واحدا فى بلد المليون ميل

الأخ العزيز هشام
سلام ..

شئ محزن يكون واحد أمدرماني أصيل مايكون عندو شبر واحد فيها
يكفي أنك ابن أستاذ الأجيال العم المرحوم الأستاذ القدير شيخ الدين
جبريل الذي جاب أرجاء الوطن وتخرج على يديه أجيال وأجيال ....
يكفي أنو عمكم المرحوم جاويش شرطة المرور المحبوب لدى الجميع ...
العم/ أحمد جبريل وصينية مكي ودعروسة خير شاهد على ذلك ...
يكفي أنك دافع ضريبة منذ اغترابكم يتم الاستفادة منها في شتى
الأشياء الضرورية في الوطن ...اليس ذلكم بجواز سفر ليتم منحكم قطعة
أرض في ( جمهورية أمدرمان) .......
أتمنى أن تطرق كل السبل والوسائل ليتم منحك قطعة أرض لأنها حق مشروع
لك ولأسرتك ...

ولي عودة ...

الحبيب رضا

أشكرك على الإضافة الجميلة وزيارتك نورت المنبر كما عودتنى دائما بقلمك الرقيق وحسك الصادق وحبك الأمدرمانى العميق

مصير الحى يلاقى يا رضا وضرورى ضرورى نتلاقى فى رحاب السودان بعد أن يتعافى مما آل إليه

محبك هشام

حبيبنا هشام

ح تشوفها ان شاء الله بس لا ح تلاقي جنينة بلدية ولا حديقة حيوانات

وح تشوف القروية سايقة عربية وبنت الخرطوم راكبه ركشة والدبلة زاتها تمشي تقيسها لووولز

يعني المنلوج ح يكون عكس عكاس

تصدق المنلوج ده شفتو في سبعيناتك الاغتربت فيها انت بس في تلك الايام كان زاتو مازال طفل يمشي
ولمن قالوا ياربي متين اشوف الخرطوم قلت ومال انتو وين بحكم وجودي في قلب الخرطوم مما ادخل بعض السرور لمشاهدي التلفزيون

تحياتي

زاتوووو

لا لا الليلة ياقروية
انت ياقروية يا السمنتك بلدية
طوريتك الملوية ..زراعتك المطرية
وبين بنات الناس انت بس حوريّيّة

يا الله متين اشوف الخرطوم
وقالوا لي في الخرطوم البت
بتمشي للكوفير

يا الله متين اشوف الكوفير


لا لا الليلة ياقروية

انت ياقروية ما تغرك المدنية
إنت ما منسية والله انت غنية
بزراعتك المطرية وبهايمك المسقية


أحيي متين اشوف الخرطوم
يا ربي متين اشوف الخرطوم

قالوا لى في الخرطوم جنينة البلدية
وقالوا لي في الخرطوم الفُسحة بالعربية

يا ربي متين اشوف الخرطوم

قالو لى فى الخرطوم البت بتختار عريسه
وكمان كان دارت الدبله تمشى تقيسه ..

أشكرك على التوثيق الظريف يا رضا يا راقى

الزول زاتو

ياخ والله مشتاقين

يعنى الأمور إتشقلبت

يا ربى ده من شنو؟؟؟؟

من الذى تلاعب فى تركيبتنا الإجتماعية وجعل واطيها عاليها وجاب عاليها سافلها؟

الله يجازى الكان السبب

ده كلام عجيب

عميدنا الخرطومى الأنيق يوسف

لا بد لليل أن ينجلى

أبوصهيب ياصاحبي من لدن الغربه

لولا المشقة ساد الناس كلهمو.... الجود يفقر والإقدام قتال

ألحق الخطة الإسكانيه سرييييع ...وقدم في صندوق الاسكان والتعمير ولا تحقرن من الواطات شيئا إنشاء الله في صقع نقع

خالص التحايا للأسره فردا فردا

الغالى أمير فتحى

تحياتى لك وللآسرة الجميلة

الظاهر أنى حا أعمل ليك توكيل

ودمت يا ملك

Quote: الظاهر أنى حا أعمل ليك توكيل

يلا سريع ...ودخل الرفاعي حجر واسطه لي ناس السفاره لعمل التوكيل سريع وبالعدم علاء الدين صلاح ...لوول

لوووووووووووووووووووول

علاء الدين ممكن ، لكن الرفاعى حجر حا يغتس حجرى


لوووووووووووووووووووووووول

الحقيقة ياهشو ما بعرف امير فتحي دا منو ؟؟؟ لكن مما تفخر به انك لا تملك من تراب الدنيا شيئ ذلك يعلي من قدرك , ولعل ما جرى في القنصلية من رفع لأسعار الوادي الاخضر جراء الدعاية الكبيرة والكذب والاقبال للمغتربين غير العارفين للمنطقة وسوءها في كل شيئ هو السبب الاكيد والواسطة لعبت وفي النهاية ممارسات لا علاقة لها بالخطط الإسكانية والاخلاق وذلك لب ما قامت به الانقاذ إفساد الانسان السوداني .
وتلك اقول فيها لا ازدواجية ولا شيزوفرينيا سودانية هي شيزوفرنينا الاعلام السوداني الذي اسست عليه الانقاذ كل كذبها وخداعها للعالم , كم ازعل عندما يحدثني هؤلاء الاعراب عن شريعة حكومتنا وليس حكومة الشريعة وعندما تصدمهم بألا شريعة ولا يحزنون يتافجأ من تحادثه بذلك الخديعة اكبر من الواقع ومن سمع ليس من رأي يا هشو .






اتمنى لك مديد العمر والعافية ويعوضك في الارض ابماء ناجحون ومشرفون هم مفخرتك حفظهم الباري وإياك .




......................................................................حجر.

أخى الرفاعى

أمير فتحى ، هو أحد أبنائنا السودانيين الدناقلة الشرفاء ، وقد كان لى شرف جوار شقيقته فى إسكان الشرفية وزوجها عبد العظيم بلال إبن عم المرحوم محمد عثمان بلال ، وكانوا فى مقام أهلى ، وكان لى أيضاً شرف زمالة هذا الشاب فى مجموعة أجواء ، وأخيرا طاب للرجل المقام فى السودان بمحض إختياره وكان فى هذا القرار أكثر شجاعة من كثيرين

لك ولأمير فتحى التحايا العطرة

وكان الله فى عون السودان يا أخى

وتانى التحية ليك يا أمير

الان قد عرفت الرجل وكنت اخمن ان هو , حقيقي بعرفه كويس واكلت معهم القراصة

وملوحة زي ما هي , والتقيت امير مرات ومرات ورغم الوداعة البائنة في مُحياه

إلا انه وللأسف متهم بالانقاذ تخيل ؟!! على كل حال ياامير نحترم مزاحك الان ونرده

لك في آُخريات لك المودة وتقديري وامتناني لكم والبركة فيكم في وفاة الوالد.









...............................................................حجر.

Quote: الان قد عرفت الرجل وكنت اخمن ان هو , حقيقي بعرفه كويس واكلت معهم القراصة وملوحة

انت ياكافى علاقتك غذائية


العزيز هشام ود ابوى شيخ الدين

اريتك عافية والولاد ..سيحضر معى
الرفاعى حجر وسنقضى على الاخضر
واليابس.ونعوض ايام باب السلام
بتاع النبيل ابوعبيدة شيخ الدين


(باب السلام)لغير الناطقين بها باب
خاص بمطعم الفاو بتاع شقيق هشام
تاكل وتحلى وممكن تشيل مصاريف حيب
وتتوكل من الباب الخلفى


تلك اخلاق الخرطوم حقت ولاد شيخ الدين
جبريل....
تحياتى ياهشام لصاحب السلام ابو الجراح
والولاد


برجع ليك اكان ربنا هون بخصوص الخرطوم


طبعا كنت جاى مع الولاد من غير ميعاد لكن
مع ظهور (الافة)الرفاعى يجب اخطاركم قبل
وقت كافى من تاريخ الزحف (الاستثنائى)لتطوير
علاقات الرفاعى الغذائية

وشكرا

اناغير مسئول عن اى نقص تموينى خاص باسرتك
مع حضور الرفاعى

أخوى الحبيب معاوية شيخ الدين

ياخ نحن لاقينك وين؟؟؟

بس ضرورى تجى ، والرزق على الله

صدقنى يا معاوية أنا أتعامل معك على أساس معاوية شيخ الدين ، وإنت عارف ابوى أولادو كتار وإنت لا شك واحد منهم

أخوك هشام عبيد الصائم

يازول
السلام عليكم

Quote: وأصبح الجيش والشرطة والخدمةالمدنية (جبهجية) وبقية الشعب (كرور) ليس إلا

والله كلامك ده ما صاح..... انوا الشعب السوداني اصبح كرور .....

Quote: الان قد عرفت الرجل وكنت اخمن ان هو , حقيقي بعرفه كويس واكلت معهم القراصة وملوحة زي ما هي , والتقيت امير مرات ومرات ورغم الوداعة البائنة في مُحياه إلا انه وللأسف متهم بالانقاذ تخيل ؟!! على كل حال ياامير نحترم مزاحك الان ونرده لك في آُخريات لك المودة وتقديري وامتناني لكم والبركة فيكم في وفاة الوالد.

رفاعي حجر ...معقوله بس تاكلو (تركينا) وتدو زولكم ...هاهاهاها



جزاك الله خير على التعزيه في وفاة الوالد وماتفقد عزيز يارب

الأخ مدثر صديق

حاشا للشعب السودانى أن يكون كرور ، ولكن هم يحسبونه كذلك ، وسيأتى اليوم الذي سيعرفون فيه الشعب السودانى على حقيقته كأعظم الشعوب فى الوطن العربى ، هذا يا أخى شعب أكتوبر 64 ، والذى كان معلم الشعوب الذى يعرف كيف يسقط الأنظمة الديكتاتورية وهو شعب الإنتفاضة وهو الشعب الصبور الشعب الواعى الشعب الذى إذا تحرك لن توقفه الآلة العسكرية

أنا سودانى يا مدثر أتيت من صلب هذا الشعب الأبى وإنى والله أعرفه وأقدره حق تقديره ، ولا نامت أعين الذين يظنون أن هذا المارد لا يثور ولا يفهم ولا يتحرك ، هم يظنون أنهم قد إنتصروا على الشعب ولكن هذا فى أحلامهم فقط وصدقنى سيأتى اليوم الذى يستعيد فيه الشعب سلطته ونأمل أن نعيش لنرى هذا اليوم قبل أن تعود للشعب السودانى فرحته ويصبح صبحه الجديدويغنى من جديد أمتى يا أمة الأمجاد والماضى التليد

ولك العتبى يا سيدى

Quote: فى زمن النميرى (الحلو) وكنا وقتها نحسب أن النظام قد أصبح طارداً لأبنائه ولا يحقق آمال وطوحات الشباب ، كنا نحسبه زمن قهر وقمع ومنع للحريات ودكتاتورية سدنة مايو ، كنا نحسب أن الأرض قد ضاقت بنا بما رحبت ، والسودانى لا تحد طوحاته الحدود السياسية ولا الجغرافية

العزيز يا زول
سلام عليكم ومشتاقين فترة طويلة ما قابلناكـ ولا شوفناكـ

المقتبس اعلاه رجعني لبوست كتبته من قبل عن أحداثيات الزمن الجميل الذي يعتبره البعض في الماضي ولكنهم يكتشفون في لحظة أتية ان الزمن الجميل هو ذات اللحظة التي سخطوا فيها عليها الزمن ذات يوم

اليكـ الرابط أين يقع مخطط الزمن الجميل !! توجد أسئلة

الأخ صديق رحمة

مشتاقين ياخ

وصلت الفكرة وقد إطلعت على البوست وأرجو أن أضيف أن أيام السودان الجميلة لم تأتى بعد ولكنها حتماً ستأتى

تحياتى يا همام

هشام

الاخ هشام تحياتي لك وللاخت درية

ربنا يسهل امركم وتمشوا السودان بالف خير

وترجعوا بسلامة الله وعليك الله يا هشام سلام خاص

لي حاجة امنه وعبد المنعم محمد الطيب


في امان الله

أختى الدبلوماسية حيات حسين

شكرا للمداخلة وتحياتك موصولة لهم جميعا ، ربنا يحفظكم ونأمل أن تسمح لنا الظروف بالتلاقى مرات ومرات

هشام والأسرة

شكراً هشام يا زول ونأسف لسحب هذه المداخلة لانها نزلت عن طريق الخطا في هذا البوست ...


الواحد يقرأ في بوست ويرد في بوست (وجهٌ ضاحكـ)

تسلم يا صديق يا إبن كسلا البار

الأخ/ هشام

تحياتي

Quote: متين أشوف الخرطوم؟

شوفت الخرطوم سهلة، المشكلة فيما بعدها؟

مرة من المرات إنتابني شعور جارف مثل شعوركم هذا، فتحللت من أم الوليدات وقررت أن أسافر للسودان وحدي عبر البحر

سفرة رخيصة وخالية من كل إلتزاماتنا كمغتربين، وسميتها سفرة تفتيحة، فجبت الأرض من سواكن وبورتسودان، وكسلا والقضارف

ومدنى والحصاحيصا وفي كل منها أقضي أكثر من يومين ثلاثة، وبعدين ختمتها بأم در،وأحيائهاالفتيحاب، أم بدات، المهندسين، الموردة

ولم أرجع إلا بثمن السفرة التفتيحة بقطعة أرض بالبستان، وبأسلوب أهل العاصمة شئ كاش وشئ مقايضة وشئ بعدين.... ومن يومها

الطريق صار سالك والجود بالموجود، فخذ نصيحة مجرب وتوكل بالله، وأعزم، ولا تباوي ..... عليك بسفرة تفتيحة.....

يا جمال النيل والخرطوم بالليل...


لا زالت عندي من اجمل المدن...التي زرتها في حياتي...
وازدانت جمالا علي جمال...في السنين الاخيرة...يمكنك ان تبصر جمالها اذا اغمضت
عينيك عن كوشة السياسة...وجردت كل انسان من قناعه الذي يرتديه
طوعا , كرها ام اضطرارا...فليل من ليالي الخرطوم مع صديق
بنواحي المقرن...او شاطيء الفتيحاب...او توتي...مع نقرشة عود
علي الضفاف...اوجمعة في جنائن شمبات او الجيلي...يعدل عندي
سنين عددا من ليالي الاغتراب ..

امنياتي ان تتحقق امانيك يا هشام.

الحبيب نزار حسين

آخ يا نزار فقد فتحت على جروحى

ما أجمل الخرطوم وناس الخرطوم وشوارع الخرطوم

تحياتى يا جميل

أخوى حماد الطاهر

هذه فعلا سفرة تفتيحة ، سأعمل جاهداً على تطبيق واحدة مثلها

تحياتى يا أخى

هشام
سلام ، وشوق ..
الخرطوم حلوة بي ناسها .. وببساطة مجتمعها . وأجمل ما فيها لياليها .. فالنشاط الثقافي والفني والاجتماعي ، والجلسات الحلوة ، وقفشات الناس وهم يمارسون حياتهم اليومية ، كلها تمثل جمالا لا يقاوم .
ولتعيش حياة هانئة في الخرطوم فأنت لست محتاجا إلا لبيت ، ومصدر دخل معقول ، وياريت تكون في عربية ..
تعال ياخ عشان نتونس بيك شوية ..
التقيت الأخ الأستاذ عوض الطريفي في اجازته الأخيرة في مناسبة حزن على فقيدنا محمد نور الشيخ دفع الله ، وقلت له : اها ما خلاص شبعت من الغربة وراجع السودان ؟ ردّ بطرافته المعهودة : باقي لي شوية جدادات آكلهم وارجع .

Quote: باقي لي شوية جدادات آكلهم وارجع

يا ود قاسم...

عندنا بلدياتنا...هسي بقي رسميا اسمو (الجداد لا)
وهو لا زال في السعودية...ففي عودته الاولي...وصل
الي اهله بالليل...وانت عارف اهل القري لا عندهم
جزارة ولا سوق...ولا محل فول وطعمية...فارادوا ان يحتفلوا بي..
جيتو...بأعز ما عندهم في ذلك الليل...
وهو قاعد في الحوش وسطهم...سمع مساكك الولد لي الديك...
وقولة كاااااااااااااك...عرف انو عشاه جداد...
قام قالهم بصوت عااالي....(الجداد لا) ومن اليوم داك بقي اسمه...علي الجداد لا...

الحبيب نزار حسين

الجداد لا

ده ألذ إسم

الراجل كره الجداد شديد

معاهو حق

الحبيب ود قاسم

والله ليك وحشة كبيرة

إنت من الشجعان القلائل الذين إتخذوا قرار العودة

هل تنصح بذلك؟؟؟؟

تحياتى

أخى ود قاسم

أنت من الشجعان القلائل الذين إتخذوا قرار العودة الطوعية للوطن

ياريت تحكى لينا أكتر