الحاصل في ليبيا حيرنا !!! يعني نسكت علي ناس الانقاذ؟؟؟؟

كل الدلالات تشير الي تواطؤ غربي في هدم بنية البترول و تدمير الاسلحة
يعني بعدما امريكا و الغرب يحاسبو النظام الجديد أو يصلوا لي حل مع القذافي هم يكونوا دايرين الاتي
1. عايزين تكلفتهم في الحرب بالمليم
2. اعادة بناء كل ما دمر و حيجوكم مقاوالين و مستشارين و اليات و و و كلو بي تمنوا
3.اعادة بناء الجيش الليبي . هنا في سؤال جيش القذافي الكمل فيهو دم قلب الشعب اليبي نفعوا بي شنو؟
4. اعادة توزيع و ترتيب تجارة النفط الليبة
5. التأثير مبكرا علي ثقافة التغيير في الادارة السياسية و ده بنعكس في التعليم و الاعلام و حاجات كتيرة.

كلامي ده بالواضح انا اسع هرشتا عديل
يعني ناس الانقاذ زفت
بس هل ممكن البلد تتحمل مثل الحاصل في ليبيا
ما تقولوا لي ده الدايرنو ناس الانقاذ
كلامكم صاح هو بخدمهم
بس انا بقول بكمل وضوح ناس الانقاذ بي عفنهم ده و لا الفوضي و التمزيق و الموت البي الالاف
يعني بعد ده نحس ناس البشير يتنازلوا
ابوه
يا ناس المعارضة اتلموا كلكم في الانتخابات الجاية في مرشح واحد يهزم الكيزان و يكون شعاروا تهديم الدولة الشمولية و قيام ديمقراطية ليبرالية
انا مغترب و شبعان و ناس الانقاذ رفدوني و طلعوا زيتي بس التغيير ما علي حساب نهر دم من شريان الشباب
لو العاجيز الزي الضاربين المكيفات في الخليج ماشين انا زاتي و الله امشي
و نموت نحنا العاجيز
بس البحرش ما بكاتل
انهزامي خواف متردد اي حاجة بس بدون دم يتم التغيير
و يا جماعة تنظيم الناس و المعارضة ممكن يحقن الدماء
يعني الناس ديل بي دمويتهم دي بنكسروا لمن الناس تتلما ضدهم
دي راي و الما عاجبو اليمشي السودان يعارض من هناك