Post: #1
Title: العتامنة قريتي التي أحببت
Author: عبدالله ود البوش
Date: 02-28-2011, 01:19 PM
قرية العتامنة محلية الحصاحيصا
هذه القرية الرائعة روعة اهلها لم تحظى باي اهتمام من سنة التخديرة ليومنا العلينا دا
وسوف ادق على هذا الكيبورد ولايمل متني لحدي ما نشوف آخرتا شنو
هذه القرية لم يمر عليها زائر حتى كان ضهبان ساهي الا وخرج منها مبسوطا يبعبع شبعا غصبا عنو
والله العظيم ناس العتامنة ديل ما تخليهن اكرموك على الطلاق اضاربوك عديل كدا
الغريبة هذه الشهادة يعرفها كل من جلس على كرسي حكم هذه القرية من ضباط اداريين لمحافظين
لشنو لشنو داك ولكن مافي مسئول واحد قام بالواجب نحوهم حسبما هو مطلوب
الاخوة شباب هذه القرية بالله عليكم مدوني بالصور اللازمة عن هذه القرية على هذا الاميل المايل
[email protected]
في هذا البوست سوف نحكي ذكريات جميلة عن اهل هذه القرية الرائعة
حواشاتنا وترعنا وكناراتنا والعوم سداري
كوبري عبيد ودكان حاج بشرى
الجامع والفكي عثمان وود ربيح والبنايين
البيارة والمدرسة وود الجسير
العد واللنداية
السكلي والردحي
وسيرة خالي العبيد والحفلة في مبروكة قبل ما نصل عثمان فرح
بالاضافة للمطالبة بحقوقنا المشروعة وان دعا داعي الفدا العكاز المضبب والسكين
|
Post: #2
Title: Re: العتامنة قريتي التي أحببت
Author: عبدالله ود البوش
Date: 02-28-2011, 01:30 PM
Parent: #1
ولا اعفى نفسي واهل القرية نفسهم من المسئولية
ابسط الاشياء غير متوفرة
مانعة صواقع العفينة دي يا عوذ بالله مافيها
والحلة دي فيها جنس صواقع وجنس مطر زي ما قال ود الباع جملو
لمن اسكر في انداية قوز الرهيد انا هردام مطر العتامنة
الخريف الفات دا وقعت صاقعة زي الصاروخ في الحلة القدامة ورمدتنا رماد
شالت نوراة حلتنا في سنها شالت حسين ود خالي الجيلي ربنا يرحمه ويغفر له
ولكنه ترك قصة في قلوبنا لا يمحوها الزمن
.
.
مانعة صواعق بس يا اخوانا
ومن الان اكلف بها المهندس الصادق سعد للقيام بهذه المهمة
وبعدين نشوف الحاجات التانية عشان حاجات حلتنا تبقى كويسة
|
Post: #3
Title: Re: العتامنة قريتي التي أحببت
Author: عبدالله ود البوش
Date: 02-28-2011, 02:11 PM
Parent: #2
يا عمر محمد الامين
منك ومن الفيش وتكس ارجع
بوستنا دا زي بيت الطهور تغمت للعريس ولا تقع في ود اب تشة
ولا مكان بربندي حمارك اولاد الطهور بتختفو قبل ما تجي من الضحوة
|
Post: #4
Title: Re: العتامنة قريتي التي أحببت
Author: عبدالله ود البوش
Date: 02-28-2011, 02:18 PM
Parent: #3
مدرسة ابتدائية واحدة في الصقيعة ساهي لايوجد اخو بنية استر عورتها
الاخ يوسف سعد ات خريج هذه المدرسة
.
.
.
الدكتور فتح الرحمن محمد الامين ات خريج هذه المدرسة
احمد بوشني برضو خريج هذه المدرسة
امنة السني خريجة هذه المدرسة
والله سوف اسككن سك
تقروا ساهي وتلبدو
والله يا ود الجسير كنت شعلة هذه المدرسة وسوف احكي لكم لاحقا حكاياته مع المدرسين
|
Post: #5
Title: Re: العتامنة قريتي التي أحببت
Author: عبدالله ود البوش
Date: 02-28-2011, 06:29 PM
Parent: #4
سوف احكي لكم عن جابنو واولادا السبعة وال###### الضكر
|
Post: #6
Title: Re: العتامنة قريتي التي أحببت
Author: عبدالله ود البوش
Date: 02-28-2011, 06:32 PM
Parent: #5
نسيت انو المكنة العجمية دي بشخت ساهي
المشختة دي الكلـــب الضكر الكلــب الواحد دا مو نبذ
مكنة عميكة
|
Post: #7
Title: Re: العتامنة قريتي التي أحببت
Author: عبدالله ود البوش
Date: 02-28-2011, 06:34 PM
Parent: #6
ود عراك شاهد عيان على وقوع انداية حميرا التي اودت بحياتها لها الرحمة والمغفرة يا رب يا كريم
والغريبة العوضة الوقعت فوقا اسما الجنة
|
Post: #8
Title: Re: العتامنة قريتي التي أحببت
Author: عبدالله ود البوش
Date: 03-02-2011, 07:53 AM
Parent: #7
في اواخر ستينات القرن الماضي كان البوليص يجوب القرى
لقتل الكلاب الضالة وهذه كانت من المهمات الروتينة للبوليص
وفي اوقات محددة غالبا في بداية الصيف واجازة المدارس
عشان الشفع بحومو بكتير والكلاب السعرانة ما تعضيهم
وقبل فترة كافية ناس البوليص بجيبوا خطاب لشيخ الحلة
لتنفيذ المهمة وكذلك لتحديد اماكن الكلاب الضالة
مشى شيخ علي رحمة الله عليه ومعه نفر كريم لعمنا علي ود بله الله يرحمو
وقالوا ليهو كلابك ديل كتار يا اخوي خلي البوليص اكتل منهن اتنين تلاتة
عمي علي ود بله زعل وارغى وازبد وخاطبهم بلهجة حادة
على الطلاق اتو ناس حاسدين ساهي
انا غير جابنو واولادا السبعة وال###### الضكر عندي كلاب
.
.
لاحظ عزيزي القارئ بين مهمة البوليص زمان وهسع
عاش عبود
|
Post: #9
Title: Re: العتامنة قريتي التي أحببت
Author: عبدالله ود البوش
Date: 03-02-2011, 08:27 AM
Parent: #8
في بداية هذا الخيت سوف ندردش بالقصص والحكاوي
والتوثيق بجي براه لاحقا
ولحدي ما نتحصل على الصور وتاريخ القرية والموز والرغيف
سوف احكي لكم حكاوي ممتعة
ممتعة دي لناس حلتنا وما جاورها
لانها سوف تكون بلغة اهلنا الغبش
|
Post: #10
Title: Re: العتامنة قريتي التي أحببت
Author: عبدالله ود البوش
Date: 03-02-2011, 08:37 AM
Parent: #9
العرس وملاح الرز
.
.
طوالي العرس مربوط بالسلات وملاح الرز
هنالك عرس ما زال عالق بذاكرتي وهو عرس خالي العبيد
تتخيلوا انا حضرت عرس عمي العيس لوووووووول
لوووووول دي لناس حلتنا بس لانو عمي العيس بت بتو ذاتو حبوبة عووووك القبر القبر من الكبر
يا ربي عرس خالي العبيد كان متين
بالمناسبة ناس العتامنة ويلك وسهر ليلك كان اكتشفوا انك كضبت عليهن مرة واحة
والله تاني كان تشوف ليك حلة تانية تتونس فيها
والله انا مرة كنت بهزر مع طفل صغير وقتها هو مصعب ود يوسف وكانو عمرو في ستة سبعة سنة
ذهبت لهم بالعزازي في زيارة قصيرة فسألك والده ات يا يوسف معاك كم موظف بالفرع
قام قال لي نحن كلنا ستة بس
اها شب مصعب قال لي واتو كم
طبعا الاجابة للطفل لازم تكون فيها اثارة
قلت ليهو نحن اكتر من ناس ابوك نحن عشرة
وتمر الايام ويحضر مع والده لفرعنا بابوقوتة وقبل ما تسلم يا الشفع اشوفو ليك
ااشر على الموظفين واحد فيهن
وفجاة قال لي كضااااااااب سبعة بس
عشان كدي لازم اكون حريص ودقيق فيني في التوثيق
|
Post: #11
Title: Re: العتامنة قريتي التي أحببت
Author: عبدالله ود البوش
Date: 03-02-2011, 08:42 AM
Parent: #10
اهم حاجة يوم العيد من الصباح القيمات بدقيق الفيني
بس الحمام مشكلة
العيد جاكن لبرودو
اصل عرس ولا عيد
الحمام ضيف وهو في حمام حمام قال طبعا زمان عشان ما ازعل الشباب
الكنار من الصباح الناس تتدرعو والواحد ما بشيل النتعلات الجداد عشان ما اغتسن في الطين
الكنار لك لك لك شين احسن تمش حفيان ساي وتجي تغسل كرعيك في البيت
ود عراك اليوم داك بطفش بالخلا ساي ما بحب البس الهموم الجداد
كان لبس الهدوم الجداد بشوف روحو لويطي لويطي كااااااااااااااك يا ود عراك
اها نرجع لموضوع الجبنة
عرس خالي العبيد
|
Post: #12
Title: Re: العتامنة قريتي التي أحببت
Author: عبدالله ود البوش
Date: 03-02-2011, 09:03 AM
Parent: #11
عشان اكون صادق مع القاري الكريم
في هذه اللحظات اتذكرت اني ولا حضرت سيرة خالي العبيد ولا حاجة
لاني اتذكرت اني كنت راكب مع ناس الحلة وماشي من العتامنة لعثمان فرح
يعني كيف اكون كنت في السيرة والعروس هي خالتي بلالة من العتامنة
والعريس من عثمان فرح والسيرة بتجي من اهل العريس ونحن اهل العروس
ايواااا معناها نحن كنا مشين نحضر العقد ... امكن
واللخبتني الغنوة الكنت حافظا
جينا السيرة لي وجينا نبارك لي العبيد عريس ان شاء الله نضوق حلو
وكنت قائل حلو دا هو الحلو الكستر
اهم حاجة في العرس
السلات
ملاح الرز
والحلو
خلاس معناها كانت سيرة من حلتنا لاهل العريس للعقد دا معناهو انا ما حضرت السيرة الجات من هناك
امكن نمت ... وفاتت علي
العربية كانت عربية خالي امحمد ود العبيد البدوروها بالمنفلة ديك فر فر فر
والسواق ود شندي
وود شندي دا زول كان صارم جدا وطوالي صار وشي وكان جات ضحكة ببقصا بقص ونص وشو صارو واضحك بالنص
التاني المقبوص
مسك الكنار وهو ممسكا بالدركسون وايدوهو عروقا مشحطا وترتجف مع الدركسون مقاوما دقداق الكنار
وفي الطريق المطرة الزيفة وانا اعد غي الكباري عشان اعرف الكبار كم لمن اكبر واسوق
عربية اعد الكباري عشان احصل عثمان فرح
وكنت محتار في ود شندي دا بعرف الحلول ديل كلهن كيف كان ما بحسب الكباري
وفي مبروك استحال السير قدما مطرة شديدة خلاس
ولحسن الحظ لقينا حفلة مدورة بمبارك ود الصالح
بس للاسف اغنية واحدة والتانية كانت يا حمامة مع السلامة
|
Post: #13
Title: Re: العتامنة قريتي التي أحببت
Author: عبدالله ود البوش
Date: 03-02-2011, 09:19 AM
Parent: #12
ناس زمان كانوا حنان
والبقر بسرح مع الضان
.
.
الحلة كلها تحضر العرس
والحلة كلها تحضر القيلة
|
Post: #14
Title: Re: العتامنة قريتي التي أحببت
Author: عبدالله ود البوش
Date: 03-02-2011, 10:11 AM
Parent: #13
شليل وينو اكلو الدودو
شليل وين راح شالو التمساح
.
.
الفات فات في دينو سبعة لفات في دينو
الجبة وقعت في البير والهول ضرب التلفون
.
.
عمي تية تية قنانيطو مية
دا عنقريب القد
.
.
سيك وسكنا وسقطو كلتنا وديك وجدادة في بحر مكادا
دي حبوباتكن ناس سوسن ديل ما بعرفنها
الا من بتول ولي فوق
.
القاشيت
الشعيرية
صورة الاستديو وماسك الزهور
وحاو هششششششششش
|
Post: #15
Title: Re: العتامنة قريتي التي أحببت
Author: عبدالله ود البوش
Date: 03-02-2011, 10:22 AM
Parent: #14
حاجة حبيبة الله يرحمها
بقيت زي ناس الحقيبة
.
.
دهنكلي ... دهنكلي ... ونق اتامنة
هكذا تبدا حاجة حبيبة رحتها من ام كوراك والى العتامنة وام جريس مرورا بام بوشة الصديق
دهنكلي دهكنلي بالرطانة معناها انا قايمة على العتامنة
وترفع طشها الكبير فوق راسها تحمل فيهو الفول المدمس والتسالي واللقيمات والطعمية بالشطة
حاجة حبيبة لايوجد معها منافس لانها بتبيع بالتش
البيع بالتش يا عزيزي القاري هو البيع بالمقايضة يعني تديك فوق تديها عيش او ويكة او عدس
هذه المقايضة تجعلنا نسرق العيش من بيوتنا وجري لحاجة حبيبة
حاجة حبيبة بتشي ؟ لانو مرا ما بتش
آي بتش لكن بالعيش بس كل فترة واخرى تحدد السلعة التي ترغب فيها
|
Post: #16
Title: Re: العتامنة قريتي التي أحببت
Author: عبدالله ود البوش
Date: 03-02-2011, 10:25 AM
Parent: #15
يا الصادق سعد ويا شباب الحلة
سوف اتوقف حتى وصول الصور منكم
وسوف ابيع لكم الحكي بالتش بالصور
صوروا لي الحلة كلها وبعدها نشوف اخرتا
|
Post: #17
Title: Re: العتامنة قريتي التي أحببت
Author: عبدالله ود البوش
Date: 03-02-2011, 02:08 PM
Parent: #16
Quote: السلام عليكم
يا زول واصل الحكاية
انا الان فى الجنوب وان شاءالله اول سفره للحلة سوف احضر لك الصور
الان واصل الحكاية |
دا الصادق سعد المتنكلين عليهو الاتكال على الله
جاب الاميل دا وجاء جاري
بصراحة البوست دا توثيقي برا صور ما ببقى
|
Post: #18
Title: Re: العتامنة قريتي التي أحببت
Author: عبدالله ود البوش
Date: 03-02-2011, 02:15 PM
Parent: #17
اخونا عبدالقوي مكاوي اثارو الشجن واتصل مشجونا مشكورا
شجن حاجة حبيبة دهنكلي دهنكلي ونق ام بوشة
عبدالقوي دا من ابوعشر لكن اهلو ناس حاج الصديق بام بوشة عبدالباقي
ام بوشة دي انا قريت فيها الابتدائي واكيد سوف ناتي للذكريات بها
((( فندي خلعتني جرادة )))
كان عندنا استاذ اسمو حسن نصر اصولوا مصرية ولا مصري عديل ما عارف
قالوا لمن كان جاي ام بوشة مشى السوق الشعبي وقال
فين اتوبيس امي بوشة
|
Post: #19
Title: Re: العتامنة قريتي التي أحببت
Author: عبدالله ود البوش
Date: 03-02-2011, 02:25 PM
Parent: #18
بلولة ود علوبة احرف لاعب وست لاقاني
احرف من ود الجسير ذاتو
بلولة دا بلتق الامثال من عندو
يعني دق حبلا ونجر اخدر
من اهم امثالو
كترت البعابص تجيب الخرا اليابس
من عاشر قوما اربعين يوما صار زي الزفت
البتوريك بياض سنها بتوريك بياض وركا
.
.
اما ود عراك فهذا شئ آخر وعجيب وسوف احكي لكم كثيرا
عن قصص ود عراك وبلولة ود علوبة
|
Post: #20
Title: Re: العتامنة قريتي التي أحببت
Author: عبدالله ود البوش
Date: 03-02-2011, 02:29 PM
Parent: #19
اسمحك
اتمرك
والبقرة ودوها الزريبة
.
.
اسمحك .... تسمحن ساهي
اتمرك يعني تتمرن ساهي
والمقولة شهيرة عندما دخلت بقرة خالتي حسنة الزريبة في حين
عبلة وامنة يجهزن انفسهن لحفلة عوض الجيد ود حسب الرسول
.
اها خمن وصرن اسمحك ... اتمرك والبقرة ودوها الزريبة
|
Post: #21
Title: Re: العتامنة قريتي التي أحببت
Author: عبدالله ود البوش
Date: 03-02-2011, 02:37 PM
Parent: #20
جدي امحمد ود ابكور زول مزواج خلاس حتى موته يرحمه الله تزوج اكثر من عشر زوجات
سوف احاول عدهن ان استطعت لذلك سبيلا :
امنة بت الصديق ... ام خالي علي
صفية بت عبدالمولى ... ام امي
حليمة بت عبدالمولى ... ام خالي يوسف
فاطنة بت ود اب علي ... ام خالي مضوي
فاطنة بت احمد .... ام خالي احمد
عشة بت مصطفى ... ام خالي ود عبكون ولكنها لم تلد من جدي امحمد
النسيم بت المقدم ام خالي عبدالباقي
.
.
ديل سبعة
بعد اتصل على امي عشان اوثق للباقيات الصالحات
|
Post: #22
Title: Re: العتامنة قريتي التي أحببت
Author: ismeil abbas
Date: 03-02-2011, 03:46 PM
Parent: #21
أحكى وفى الحكى راحة..
أهل الجزيرة جميعهم طيبين وناس كرم وبحتفلوا بالناس وبقيموهم.
نحن ناس بندر ساى..لما نجيهم بوقفونا تك شاى باللبن..الواحد لحدى ما يضارى من البراد.
أجمل ذكرياتى الشبابية بها..أسافر لأهل الجزيرة ولا لأحلى منطقة فى العالم.لآن جمال الأماكن بناسه.
وثق لقريتك الجميلة التى رأيتها بعينيك وأحببتها لحبك لها وأتمنى زيارتها.
تسلم اخى ودالبوش وتقديرى وأحترامى.
|
Post: #23
Title: Re: العتامنة قريتي التي أحببت
Author: عبدالله ود البوش
Date: 03-02-2011, 04:06 PM
Parent: #22
سماعين الكلس
غايتو اصلو ما شايف عليك بندرية
بتعرف تضبح الشائل صاح ؟
بتعزم على المافيشة .. صاح ؟
بتعرف المخلوفة والمعدولة صاح ؟
بتلعب الصقرية وتصرف الحصحاصة صاح ؟
.
.
وتيب
|
Post: #24
Title: Re: العتامنة قريتي التي أحببت
Author: طه إبراهيم عبد الله
Date: 03-02-2011, 04:24 PM
Parent: #23
سلام أبو حسن
رأيت امحمد ود العبيد مرة واحدة في حياتي
زارنا في بيتنا صلة للأرحام
وبي نفس اللوري
وإذا لم تخني الذاكرة فإن لود العبيد تجربة في غرب السودان ( ربما الفاشر )
هل هذا صحيح ؟
..
متابعين ولي عودة إذا الكريم هوّن
|
Post: #25
Title: Re: العتامنة قريتي التي أحببت
Author: عبدالله ود البوش
Date: 03-02-2011, 06:33 PM
Parent: #24
حبيبنا وقريبنا طه ابراهيم
خالي امحمد ود العبيد اياهو ذاتو الانت قاصدو
وفعلا هو زول غرب وتزوج من كادقلي خالتنا دادايا وجاب منها بت وولدين
واحد مات قريب دا الله يرحمو
لكن عربية السيرة ما كانت لوري اللوري دا كان بعد عربية السيرة
عربية السيرة كانت بدري شوية بعد الكارو ام حصانين
حصل يا طه شفت ليك حصانة نتاية في الجزيرة ... ما اظن
خالي امحمد ود العبيد كانت عندو حصانة
حصانة كدا صاح لانها اصلا نادرة عشان كدا حتى الاسم ما متأكد منو
يا زول لو حكيت ليك قصص الحصانة دي
مع كترة الحصين في الحلة ووجودها وحدها اسكت ساهي
الكترابة بتقوم علي
اخير اخليها من المسكوت عليه
|
Post: #26
Title: Re: العتامنة قريتي التي أحببت
Author: طه إبراهيم عبد الله
Date: 03-02-2011, 07:32 PM
Parent: #25
Quote: خالي امحمد ود العبيد اياهو ذاتو الانت قاصدو
وفعلا هو زول غرب وتزوج من كادقلي خالتنا دادايا وجاب منها بت وولدين
واحد مات قريب دا الله يرحمو
لكن عربية السيرة ما كانت لوري اللوري دا كان بعد عربية السيرة |
طيب يا ود البوش
كويس إنو اللوري الأنا شوفتو طلع ما عربية السيرة
عشان ما تطلعني ود حجتك ونديدك
وعلى كل كان سؤالي عن امحمد ود العبيد لأنو أنا عندي
ولع واهتمام خاص بأمثاله فهو صاحب تجربة غير تقليدية
بالنسبة لأعراف المجتمع الذي ينتمي إليه
وهو كاسر قيد ومتجاوز لأعراف وتقاليد ومفاهيم واعتقادات راسخة
وبعبارة أخرى هو مبادر صاحب مبادرة اجتماعية ذات بعد إنساني
جديرة بالتمعن فيها .. إلخ
هل ستكتب عن امحمد ود العبيد ؟
هل تستطيع أن تتجاوز معرفتك القريبة به ، وبالظروف التي أحاطت به
وبسلوكه لتنظر في العمق الإنساني لتجربته ؟
وهو عندي شخصياً بطل ،
لأنه نظر خارج الأسوار ووجد أن العالم أوسع وأرحب فانطلق خارج الأسوار،
ولم يتنازل عما رغب فيه ، لذلك هو بطل .
تحياتي ومودتي
|
Post: #27
Title: Re: العتامنة قريتي التي أحببت
Author: saif massad ali
Date: 03-02-2011, 09:42 PM
Parent: #26
صاحب البوست سلام
يعني كلامك ده شيل حال عديل
اولاد المرحومة حاجة بتول بت امحمد اللمين بنو مدرسة معيجنة مصطفي بنات
الشبابيك والابواب عملن محمد البشير مصطفي وعبدالرحمن البشير النقير كمان ساعد
كتير واستضاف الناس عندو في بيتو ايام الصولة والجولة
امانة ما اتلومو كان مابنو مدارس فوق العتامنة
وبصد ليك يازول
|
Post: #29
Title: Re: العتامنة قريتي التي أحببت
Author: عبدالله ود البوش
Date: 03-03-2011, 01:59 PM
Parent: #27
ود عوج الدرب
سلام وتحيايا
Quote: امانة ما اتلومو كان مابنو مدارس فوق العتامنة
|
والله اخوالي محمد البشير والنقير موضع فخر واعزاز
واصلن ما قصروا مع اهلهم ناس العتامنة
ودائما اعمالهم في الخفاء بقصد الاجر
وخالي محمد البشير تبرع بكل ابواب وشبابيك المسجد القائم
لكن الحاصل الان في المدرسة تصحرت في الفترة الاخيرة كما تصحرت جيوب اخوالي
بفعل التصحر الانقاذي
|
Post: #28
Title: Re: العتامنة قريتي التي أحببت
Author: عبدالله ود البوش
Date: 03-03-2011, 01:52 PM
Parent: #26
Quote: وهو عندي شخصياً بطل ،
|
طه اخوي
خالي امحمد ود العبيد فعلا شخصية مثيرة للجدل
وكاني اراك عرفته بعمق شديد ومعرفتك به ظهر انها عميقة
وهو فعلا شخصية تحتاج الوقوف عندها كثيرا
جاب اثنى حصان لاول مرة بالمنطقة
اول من عمل الكارو بحصانين
كان عنده اول دكان كل شئ تحت سقف واحد من لالول دبلان ابرة منقاش وحتى الزير
وترك كل ذلك وهجة فت هجة واحدة ورجع بزوجة من جبال النوبة اسمها دادايا
خالي فارس يندر امثاله ولكنه اليوم صار عزيز قوم زل
تابه معاي يا طه
البوست دا بجيب محن المنطقة كلها
|
Post: #30
Title: Re: العتامنة قريتي التي أحببت
Author: عبدالله ود البوش
Date: 03-03-2011, 02:45 PM
Parent: #28
اخونا عبدالله محمد سعد نتمنى ان يكون بخير في ليبيا
.
.
اخونا فضل الله ود فضل المولى ( قسر بسيت ) نتمنى ان يجمعنا الله به
اخونا بكري عبدالله ابراهيم محمد نتمنى ان نعثر عليه
|
Post: #31
Title: Re: العتامنة قريتي التي أحببت
Author: عبدالله ود البوش
Date: 03-03-2011, 02:49 PM
Parent: #30
ادناه تلفون اخونا عبدالله محمد سعدفي ليبيا
توجد صعوبة في الاتصالات في ليبيا ولكن نرجو تكرار الاتصال ربما يستجيب
القدر والحاجات تبقى كويسة
00218922570728
|
Post: #32
Title: Re: العتامنة قريتي التي أحببت
Author: الامين موسى البشاري
Date: 03-03-2011, 03:35 PM
Parent: #31
عبد الله ود البوش يا صاحب
احكي يا اخوي وشكراً لأنك صرت صوتاً للعتامنه
لينا زماااان من حكيك الطاعم دا
تحاياي
|
Post: #33
Title: Re: العتامنة قريتي التي أحببت
Author: عبدالله ود البوش
Date: 03-03-2011, 03:44 PM
Parent: #32
اللمين يا ممتاز
مشتاقين عديل كدا
.
.
خلاس بقيت كويس
قالوا لي كان راميك جمل
|
Post: #34
Title: Re: العتامنة قريتي التي أحببت
Author: عبد الباقي الجيلي
Date: 03-03-2011, 03:50 PM
Parent: #32
آ العوض أخوي .. وينك إت آزول؟ الشئ ليك زمنا بعيد غاتس تب!!!
آي والله أخوي حديسك سمح بالحيل ..!!
ونحن إضنيننا مفتوحات للآخر .. باقي نحن ناس الجزيرة ديل .. كبودنا محروقات حرق .. وبطوننا مليااااانة مغايس .. الله يفتح إضنين المسعولين .. يفتح ريسنن المُكان ديل!!!!
قول آخوي .. قول ...
صح لسانك .. على قول ناس الخليج
ولا فض فوك .. على قول ناس سيبويه
و الله يعدل ختوتك .. على قول أهل العوض!!!!
|
Post: #35
Title: Re: العتامنة قريتي التي أحببت
Author: طه إبراهيم عبد الله
Date: 03-03-2011, 05:56 PM
Parent: #34
عبد الباقي الجيلي
تحية طيبة
..
نجومي الدروة
هل ما زالت في الذاكرة ؟
|
Post: #36
Title: Re: العتامنة قريتي التي أحببت
Author: عبد الباقي الجيلي
Date: 03-03-2011, 06:20 PM
Parent: #35
أخي طه
تحيات نديات بطعم فول عمك الأغبش .. ونكهة أشجار اللبخ المحيطة بالميادين الستة في الخريف .. ولون مباني حنتوب الأصفر الزاهي ...
سعدت بتحيتك التي أرجعتني لزمن زاهٍ حتماً لن يعود ...
ولو زرت حنتوب بعد ثورة التعليم العالي .. لسكبت دمعاً سخيناً وكفى!!!
|
Post: #37
Title: Re: العتامنة قريتي التي أحببت
Author: نورالدين بابكر بدري
Date: 03-03-2011, 07:44 PM
Parent: #36
ود البوش سلام
ناس العتامنة أجدع ناس
من صديق الدراسة يوسف سعد
إلي
أبو أمنة في سوق العيش
ياخي لو سمحت أخبار يوسف سعد شنو
عنوانه - تلفون 0بريد
من ناس العيس كا في نفس الفتر أحمد طيب العيس
وشخص آخر كان يغني لزنقار بصورة ممتازة (نسيت إسمو)
لهم جميعاً التحايا العطرة
ولك أنت أخي ولي سردك الممتع
محسوبك من الزبيرات ريفي طابي
كسرة -
دحين العتامة ماها ريفي طابت عبد المحمود ؟
|
Post: #38
Title: Re: العتامنة قريتي التي أحببت
Author: نورالدين بابكر بدري
Date: 03-03-2011, 07:46 PM
Parent: #37
إتذكرت الفنان كان إسمو بابكر على بابكر
|
Post: #44
Title: Re: العتامنة قريتي التي أحببت
Author: عبدالله ود البوش
Date: 03-05-2011, 09:28 AM
Parent: #37
اخونا الممتاز نورالدين بابكر بدري
اهلنا الطيبين ناس الزبيرات
| Quote: دحين العتامة ماها ريفي طابت عبد المحمود ؟ |
بالحيل اياها
لكن طابت ذاتا في الزمن الشين دا بقت ريفي الذاكرين
ظاهر عليك درست في طابت الجنوبية
اخوك يوسف سعد الان مدير البنك الاسلامي السوداني فرع المناقل
ارجع واقرأ قصة مصعب ( مصعب دا ولد صاحبك يوسف سعد )
ادناه تلفوناته :
موبايل 00249912413555
تلفون البنك 00249517872025
البيت بيتك يا نورالدين والونسة معاك تحلا
ونس
|
Post: #39
Title: Re: العتامنة قريتي التي أحببت
Author: طه إبراهيم عبد الله
Date: 03-03-2011, 08:03 PM
Parent: #36
عبد الباقي الجيلي
لحنتوب شجن يعلمه الله
..
النظارة بقت قعر كباية ، مش كدا ؟ أم أن ذاكرتي بقت عايزة نظارة ؟
..
غايتو ود البوش لو بقى (لعيم ) بطردنا من البوست
وبما إنو أصلو كريم حا يعمل ما شايف
ناس العتامنة في شنو والمتداخلين في شنو
..
قال داير حوش يستر عورة المدرسة .. دحين يا ود الشيخ حنتوب كان عندها حوش ؟
|
Post: #40
Title: Re: العتامنة قريتي التي أحببت
Author: نورالدين بابكر بدري
Date: 03-04-2011, 11:13 AM
Parent: #39
فوق
من أجل العتامنة ورفاق الزمن الجميل
|
Post: #41
Title: Re: العتامنة قريتي التي أحببت
Author: طه إبراهيم عبد الله
Date: 03-04-2011, 11:58 AM
Parent: #40
العزيز نورالدين بابكر بدري
زول الزبيرات
سلام وحب كتير لناس الزبيرات
..
ود البوش قال البوست دا حا يجيب محن المنطقة كلها وزاغ تاني ما شفناهو
وعبد الباقي ود الشيخ قال نحن ممغوسييييين شديييييد
أها المغسة الخلت مدرسة العتامنة قاعدة في الصقيعة دي دايرين نفتها هنا دا
وبالله عليك يا نور الدين كلمنا ولو شوية عن الزبيرات :
الإنسان البسيط .. المزارع .. الكان مستور الحال .. ماذا جرى له ؟
الإنسان البسيط .. صاحب كنتين الحلة .. أو الجزار .. ( الله يرحمك يا ود فنجور ) .. ماذا جرى لكل هؤلاء ؟
وماذا فعلت الرأسمالية الطفيلية الجديدة بأناس مثل حاج الجيلي ود الكمن عليه الرحمة والمغفرة ( كان لا يعرف
سواقين البصات من المساعدية ) ؟
شفت المحن دي
مودتي واحترامي
|
Post: #45
Title: Re: العتامنة قريتي التي أحببت
Author: عبدالله ود البوش
Date: 03-05-2011, 09:36 AM
Parent: #41
| Quote: ود الكمن عليه الرحمة والمغفرة |
الله يرحمه يا طه
فقد كانت سمعته الطيبة في كل المنطقة
.
.
طه بالله واصل معنا في هذا الحكي
يبدو انك حديثك ذو شجون
فخلينا نستمع بهذا الشجن
والحكاية امكن تجيب ليها شجون وكلام دقاق وامكن تجيب ليها سجون
تقديري واحترامي الذي تعلم
|
Post: #42
Title: Re: العتامنة قريتي التي أحببت
Author: عبدالله ود البوش
Date: 03-05-2011, 09:12 AM
Parent: #39
حبيبنا طه ابراهيم عبدالله
وجودك هنا شرف ومصدر فخر
Quote: غايتو ود البوش لو بقى (لعيم ) بطردنا من البوست
|
Quote: والله العظيم ناس العتامنة ديل ما تخليهن اكرموك على الطلاق اضاربوك عديل كدا
|
|
Post: #43
Title: Re: العتامنة قريتي التي أحببت
Author: عبدالله ود البوش
Date: 03-05-2011, 09:19 AM
Parent: #34
عبدالباقي يا دفعة (الا شوية) يا رائع يا جميل
دائما مرورك عليل
الغتسة كانت ستة شهور في السودان بعيدا عن التكنولوجية
كنت شغال طين ببني لي في حيطة للعيال
خليك داب وردة
تحياتي وتقديري
|
Post: #46
Title: Re: العتامنة قريتي التي أحببت
Author: طه إبراهيم عبد الله
Date: 03-05-2011, 10:12 AM
Parent: #43
أبو حسن
| Quote: والحكاية امكن تجيب ليها شجون وكلام دقاق وامكن تجيب ليها سجون |
يلا شجن شجن .. سجن سجن
الشجن متلبسنا والسجن ما بخوفنا
لكن القصة فيها مغسة شديدة بالحيل
والوجعة وجعة أرض وقلع زندية وإيد ملوية
ما العتامنة بس .. بل ألف عتامنة وعتامنة
ملصوها من هدوما وكفتوها في جضوما
وشالو موية عيونا
..
وبي مهل يا أبو حسن ، بي مهل
|
Post: #47
Title: Re: العتامنة قريتي التي أحببت
Author: طه إبراهيم عبد الله
Date: 03-05-2011, 10:32 AM
Parent: #46
شوية شجن ليه علاقة بما سلف
..
سنة 2001 م رجعت البلد في إجازة بعد غياب سنوات
وكانت بنتي البكر لم تتجاوز عامها الأول
لما دخلنا البيت ( في الجزيرة ) الوالدة وأخواتي قابلونا في نص الحوش الكبير داك
وبعد السلام مباشرة
أمي دنقرت للواطة وشختت أصبعها في التراب ومسحتو للشافعة تحت نخيرتا
وقالت ليها شُمي التراب دا وأكرفي الهواء دا
..
فيما بعد وأنا جالس مستأنس إلى والدتي قلت لها :
شنو حكاية الترابة ديك ؟
قالت : عشان تحب البلد وما تغباها ريحة بلدها وتعرف التراب دا حقها وحق أبوها وجدها
قلت ليها : طيب انا لمن كنت صغير عملت معاي كدا ؟
قالت لا إنت صرتك مدفونة في الحوش دا
|
Post: #48
Title: Re: العتامنة قريتي التي أحببت
Author: معاذ الهادي
Date: 03-05-2011, 10:40 AM
Parent: #47
ياخ نحن حبينا العتامنة دي
عشان اتا منها
|
Post: #49
Title: Re: العتامنة قريتي التي أحببت
Author: عبدالله ود البوش
Date: 03-05-2011, 10:53 AM
Parent: #48
Quote: ياخ نحن حبينا العتامنة دي
عشان اتا منها |
والله يا دكتور معاذ لو خليت العالم دا كلو يحب العتامنة لم اوفيها حقها
ياخي الحلة لو اتنفست هواها بس يكفيني
احبها واحب هجيرها
احبها وسط نفحات الصفحات وعمالها يضربون الطوب والرادي فوق الحوض
احبها نصت نهار وعرقنا اخرت جراء فنجان جبنى حار ينزل الحمى ووجع الراس
احبها واحب كل من يحبها
.
.
يا دكتور ادعوك لعمل اسبوع علاجي بهذه القرية
وسوف تعرف اهلي هناك والله يا معاذ تشوف العجب العجاب
.
الكلمات تعجز عن شكرك
والقلوب شواهد وانا احبك في الله ولله
|
Post: #50
Title: Re: العتامنة قريتي التي أحببت
Author: عبدالله ود البوش
Date: 03-05-2011, 11:03 AM
Parent: #49
طه الحبيب
Quote: أمي دنقرت للواطة وشختت أصبعها في التراب ومسحتو للشافعة تحت نخيرتا
وقالت ليها شُمي التراب دا وأكرفي الهواء دا
|
بالله يا اخوانا تمعنوا في هذه اللوحة الرائعة جيدا
.
.
اماتنا سقننا حب ارضنا بنخريناوصرنا نتنفسه وان انقطع متنا
واصل يا طه واصل هذا الابداع والبيت بيتك
|
Post: #51
Title: Re: العتامنة قريتي التي أحببت
Author: طه إبراهيم عبد الله
Date: 03-05-2011, 11:25 AM
Parent: #50
نجي يا أبو حسن لموضوع البوست الأساس
وبدل مدرسة العتامنة بس خلينا نقول عن كل العتامين
الحقوقها رايحة ومهضومة
ما كل الناس أهل وكل الناس صحاب
وطالما أن هذا المنبر منبر عام ومقروء
دعنا يا أخي نتحدث عن كل القرى المهملة
وعن كل النجوع المنسية
وليت من يطالع هذا البوست من الأعضاء
أن يشارك بكلمة لأجل العتامين المظلومة
|
Post: #52
Title: Re: العتامنة قريتي التي أحببت
Author: طه إبراهيم عبد الله
Date: 03-05-2011, 11:38 AM
Parent: #51
مدارسنا عريانة
مشافينا مريضة وخربانة
نقاط الغيار والشفخانات أصبحت مساكن للوطواط
بالله كم قرية في الجزيرة ينطبق على مرافقها الوصف أعلاه ؟ كم ؟
..
هذه المرافق على طول الجزيرة وعرضها بناها الناس من حر مالهم ،
بقنطار القطن
وشوال الفول
وأردب العيش والقمح
الناس قعدت في الواطة دقت الطوب وعجنت طين المونة
والناس دفعت زاد عيالها وكِساهم وحق دواهم
عشان تبني فصل أو أوضة للتمرجي
فما معنى الجبايات والضرائب التي تؤخذ عنوة جهاراً نهاراً
إن لم تدعم هذه المرافق
|
Post: #53
Title: Re: العتامنة قريتي التي أحببت
Author: طه إبراهيم عبد الله
Date: 03-05-2011, 12:02 PM
Parent: #52
والقول لمحمد طه القدال في وصف الحال :
أنا كنت متغطي ،
ومتدفي ،
العمة ملوية ،
والشال على كتفي ..
سودان وكان ما كان
سودان علي كيفك
السكة ساعة إيد
والأرض مروية
وقول القدال الطالع من مكامن الروح
قول مشروح
كيف انهار اقتصاد الاكتفاء الذاتي في الجزيرة ؟ وأصبحت بناها الاجتماعية مهددة بالتفكك والضياع ؟
رجوت وما زلت أترجى الأخ نور الدين بدري عندما تكرم بالتداخل هنا
أن يحدثنا قليلا عن نماذج حقيقية لأناس كانوا متغطين ومتعشين ومتدفين
كيف أصابهم العري والجوع وبرد الغربة
|
Post: #54
Title: Re: العتامنة قريتي التي أحببت
Author: نورالدين بابكر بدري
Date: 03-05-2011, 02:13 PM
Parent: #53
Quote: العزيز نورالدين بابكر بدري
زول الزبيرات
سلام وحب كتير لناس الزبيرات
..
ود البوش قال البوست دا حا يجيب محن المنطقة كلها وزاغ تاني ما شفناهو
وعبد الباقي ود الشيخ قال نحن ممغوسييييين شديييييد
أها المغسة الخلت مدرسة العتامنة قاعدة في الصقيعة دي دايرين نفتها هنا دا
وبالله عليك يا نور الدين كلمنا ولو شوية عن الزبيرات :
الإنسان البسيط .. المزارع .. الكان مستور الحال .. ماذا جرى له ؟
الإنسان البسيط .. صاحب كنتين الحلة .. أو الجزار .. ( الله يرحمك يا ود فنجور ) .. ماذا جرى لكل هؤلاء ؟
وماذا فعلت الرأسمالية الطفيلية الجديدة بأناس مثل حاج الجيلي ود الكمن عليه الرحمة والمغفرة ( كان لا يعرف
سواقين البصات من المساعدية ) ؟
شفت المحن دي
مودتي واحترامي |
إسم بالله يا طــــــه ، وماك طالبني حليفة
الجزية مقارنة بالزمن ما قبل 89 مافضل فيها شئ غير حبنا وولائنا ليها
يا تتخيل ود الكم بس صولجانو وزخمو داك لم يبقى من ثروته غير عدة أفدنه ( حواشة)
لا فينكهة لي دكان الحة الفيهو العنقريب والسباتة حقة الصلا
ولا نكه ليوم السوق
ولا في يوم صرف
ولا في موية مكسورة لا من الترعة ولا أبعشرين
ولا قمح يمسكو مويتو بالليل ولا النهار
ولا قطن نجيب ليهو لقاط
وحس تركتر ولا د 7 ( المخسوس )
لا ملح حكومة -
ياخي حت السمبر رحل
البقر الزمان القدام كل خشم بيت - مافي
ياخي مالك - - ياخي خلينا
وبجي للتفاصيل لاحقاً
|
Post: #55
Title: Re: العتامنة قريتي التي أحببت
Author: طه إبراهيم عبد الله
Date: 03-05-2011, 06:52 PM
Parent: #54
| Quote: وبجي للتفاصيل لاحقاً |
أيوا يا نور الدين
وما تنسى من زمن الفوادين الأربعتاشر حقنة ديك
مروراً بالكينين والكلوركوين وعصر الفانسيدار
والفشل والكانسرات
كلووو كلوووو
فتّو هنا فت
تعرف العتامنة الواحدة دي بتكون مساهمة في مركز التجارة العالمية في نيويورك
( قبل ما المطرة توقعو ) على قول خالي مبارك ودي حا نجي ليها برضو
المهم ود البوش ما إصر لينا
|
Post: #56
Title: Re: العتامنة قريتي التي أحببت
Author: أحمد الصديق
Date: 03-05-2011, 08:06 PM
Parent: #55
يا ود البوش
لك التحية وللعتامنة
مالك تنكأ جراحنا؟؟
متابعة من أول سطر،،
واصل .. و دعنا نحن
يعضنا الندم على حال
تمت إزالته عمداً...
واصل وأغشى معاك المكاتب والقناطر.
وأضبح من وارد كردفان من الأغنام لكل ضيوفك،،
خاصة في الخريف.
تحيتي يا عبدالله.
|
Post: #58
Title: Re: العتامنة قريتي التي أحببت
Author: عبدالله ود البوش
Date: 03-06-2011, 11:20 AM
Parent: #56
الاخ أحمد الصديق
يا زول سلام وشوق
وين يا ناس اتوا
ياخ بكري قالوا معرس حبشية في منفوحة
ارمي جبداتك اقبض لينا البلبوط دا
.
.
متوكل ود الجمو كان مشرك للسمك جنب كبري عبيد
خلا النو اخوه جنب الجبادة ومشى اقبض ليهو جرادة جرادتين اشرك بيهن
وقال للنو لمن تغتس كورك لي
اها متوكل بس نزل من دبة الترعة ترتر لتحت
النو اكورك ليهو : تكل تكل ( يقصد متوكل كان صغير وعجمي ) عطست
فووو طلع دبة الترعة وجا نازل للحيف ولقاها ما غتست
قال ليهو اعتس دينك
|
Post: #57
Title: Re: العتامنة قريتي التي أحببت
Author: عبدالله ود البوش
Date: 03-06-2011, 11:12 AM
Parent: #55
أخي طه
تحياتي
Quote: أيوا يا نور الدين
وما تنسى من زمن الفوادين الأربعتاشر حقنة ديك
مروراً بالكينين والكلوركوين وعصر الفانسيدار
والفشل والكانسرات
كلووو كلوووو
فتّو هنا فت
|
دفعنا التمن ارواحنا واجسادنا عشان خاطر اقتصاد السودان يبقى كويس
وفعلا بقينا الحاجات كويسة
والان داسوا علينا ورمونا هنا
ومن هنا تنطلق الثورة للمطالبة بحقوقنا
معتمد الحصاحيصا
الكلام ليك
ولنا عودة
|
Post: #59
Title: Re: العتامنة قريتي التي أحببت
Author: طه إبراهيم عبد الله
Date: 03-06-2011, 08:55 PM
Parent: #57
Quote: ومن هنا تنطلق الثورة للمطالبة بحقوقنا
معتمد الحصاحيصا
الكلام ليك |
وماذا يملك المعتمد ؟
الخلل في النظام بأكمله
وبعبارة أخرى العربة أمام الحصان
فالأموال التي تجبى من المواطنين بصورة مباشرة بمختلف المسميات
يجب أن تنفق كذلك وبصورة مباشرة على المرافق والخدمات
ولكن الذي يحدث أن هذه الأموال تنفق على تسيير دولاب العمل الذي هو
شأن الدولة المباشر فلماذا يدفع المواطن في العتامنة وغيرها رواتب
المدرسين والممرضين والعاملين بالمرافق المختلفة ؟
..
|
Post: #60
Title: Re: العتامنة قريتي التي أحببت
Author: طه إبراهيم عبد الله
Date: 03-06-2011, 09:08 PM
Parent: #59
تأمل معي هذه الصورة الكاريكاتورية
في صيف 1994م الشهير بصيف العبور
ومسيرات الفتح المبين وغيره من الفتوحات
إلتقيت في سوق الهدى بالأستاذ صلاح دفع الله ( مدير مدرسة أساس )
كان راكب كارو حصان ويجلس إلى جوار صاحب الكارو
وعلى الكارو عدة شولات قمح
قلت ليه على سبيل الهظار :
شنو يا صلاح بقيت تاجر عيش ؟
ضحك وقال لي : يا زول تاجر شنو علي الطلاق دي رواتب المعلمين استلمتها من المجلس
بعد شكل وبالختف كمان ..
زي الحال دا يوم لا كان لا حصل
فمن أين جاءت شوالات القمح ؟
|
Post: #61
Title: Re: العتامنة قريتي التي أحببت
Author: نورالدين بابكر بدري
Date: 03-08-2011, 08:33 PM
Parent: #60
Quote: وماذا يملك المعتمد ؟
الخلل في النظام بأكمله
وبعبارة أخرى العربة أمام الحصان
فالأموال التي تجبى من المواطنين بصورة مباشرة بمختلف المسميات
يجب أن تنفق كذلك وبصورة مباشرة على المرافق والخدمات
ولكن الذي يحدث أن هذه الأموال تنفق على تسيير دولاب العمل الذي هو
شأن الدولة المباشر فلماذا يدفع المواطن في العتامنة وغيرها رواتب
المدرسين والممرضين والعاملين بالمرافق المختلفة ؟
.. |
أومن على ما جاء في المقتبس أعلاه في مداخلة طــه
طبعاً الموضوع ليست في المعتمد أو الوالي
قضيتنا مرتبطةبنظام كامل تتجلى فيه علاقات الإنتاج الجائرة التي خلقت الفوارق الطبقية
الكبيرة وأنتجت رأسمالية طفيلية أفقت الريف والفقراء أكثر مما كانوا
أو قل لي لله درك كيف يكون مشروع الجزيرة وسكانه بهذا الفقر والعوز وهم باستطاعتهم
أن يفروا لأنفسهم قوت عامهم من مجهودم الزراعي وثروتهم الحيوانية
لكننا صبحنا في ظل هذا النظام في بدايته ننتج لنعول الحكومة ونظامها
وفي آخرها ليس لدنا ما ننتهة بسبب سياسة التجفيف ولإفقار المبرمج
بحكم أن النظام ليست لدية رصيد جماهيري في الإقليم
أخيراً
كيف يستقيم الظل والعود أعوج ، ولابد لنا من تكاتف الجهود لكنس هذا النظام
والحقوق لا تستجدى بل تنتزع إنتزاعاً
دمتم
|
Post: #62
Title: Re: العتامنة قريتي التي أحببت
Author: عبدالله ود البوش
Date: 03-09-2011, 09:09 AM
Parent: #61
Quote: والحقوق لا تستجدى بل تنتزع إنتزاعاً
|
هذا هو هدف البوست
وخلاله ندندن
|
Post: #63
Title: Re: العتامنة قريتي التي أحببت
Author: عبدالله ود البوش
Date: 03-09-2011, 09:17 AM
Parent: #62
معتمد الحصاحيصا
المهندس عبدالرحمن مصطفى
ياخي اخد ليك شقة على القرى التعبانة دي ولاتعتمد على التقارير الجاهزة
دي اصلها بيست اند كوبي من زمن علي الهداب
.
.
.
الكفتة تهدد امريكا للمرة الاخيرة
كانت نكتة ولكن الان اصبحت اي قرية صغيرة في العالم يمكنها ان تهدد اي حاكم
ان لم يقم بواجبه نحوها
انتم موظفي دولة لخدمة الشعب فان عجزتم اتركوا الموضع لشخص اخر يقدر على ذلك
وحتى الدولة ان عجزت فان الكفتة لها راى اخر وكذلك العتامنة
|
Post: #64
Title: Re: العتامنة قريتي التي أحببت
Author: عبدالله ود البوش
Date: 03-13-2011, 08:29 PM
Parent: #63
.
|
|