Post: #1
Title: مليانواي-رقراق- أجمل من رأتها مدينتي.
Author: خالد الحاج
Date: 10-24-2004, 04:26 PM
Parent: #0
مليانواي-أشعة الشمس المطلة من بين أوراق شجرة القرنفل- هذا هو إسمها!! هل يمكنني أن أناديها "رقراق"؟؟ كانت كلما شرحت معني إسمها يضحك البعض لغرابة المعني وأسرح أنا!!
سألتني : لما لا يضحكك الإسم ؟ لأنه جميل المعني نسميكي "رقراق" في لغتنا العامية، ,أشرح المعني..تضحك هي هذه المرة يا لله كم هي جميلة!! هاتان النونتان وذاك السن المخلوف..هي قاتلتي لا محالة. أسمعتي من قبل بمن كان ضحية لإبتسامة؟ .
تهز رأسها بصورة لا إرادية فينساب ذاك الليل الطويل وتطول همومي. جميل هذا العطر الذي ترتدينه ما إسمه؟ تذكر الإسم وتنطقه بلهجة حلوة وصوت ذو بحة ملائكية وكأنها تقضم ثمرة كومثرة . قاتلتي أنتي لا محالة.
أغني كلما رأيتها دون وعي مني : ما تبقي رقراق أبقي يا ضل يا شموس...آه لو رئاك مصطفي
إذن كان ليغني يومآ دون ألم. لاتينية الأب غجرية الأم ، خلاسية، -مجدولة من شعر أغنية، وكل أقوالي أمام الله- تسألني فأنا أشاركها غربة اللسان : كيف تفهم هذه اللغة العجيبة "الهولندية" ؟
هذه ليست لغة إنها هجين مشوه لأكثر من لغة.
ARBEIDSOMSTANDIGHEDEN "بيئة العمل" عنوان المحاضرة
يبدأ المحاضر في سرد الموضوع بلغة إنجليزية بلكنة جرمانية واضحة ، يا له من عنوان كئيب وأسوأ ما فيه أنه جعلها تنتبه بكلياتها، لم يتبقي شي من تلك الإبتسامة ذات القوة الثلاثية للإبادة ،إختفت النونات كما خسوف القمر، تبقت هزة الرأس اللا إرادية والليل المنسدل..يومان وينتهي الكورس وترجع إلي موطنها!! ميت أنا لا محالة. أسبوع؟؟؟
إذن هذا ما عناه هاشم ميرغني أسبوع تمام!!.
نقوم بجولة في المدينة أتقمص دور المرشد السياحي.. نلتقي "علي الشايقي" الحمد لله أخيرآ هناك من سيشهد مأساتي!! يبادرنا بالسلام ويسأل : "دي منو المشطبة دي" سألتك بالله يا علي تسلم عليها وتنتبه؟؟؟ يسلم أراه يتقصد الإمساك بيدها مدة.."الشايقي لئيم" تبتسم هي!! أخيرآ سيتجرع الملعون كأس السم..يلتفت إليّ بادايآ أثر الإبتسامة علي وجهه البائس كمن أصيب بلكمة علي يد "مايك تايسون" يتلعثم يهمس : "المصيبة دي جبتها من وين" ؟؟ أسأله أها رايك شنو؟ أراه
يهز رأسه لا يجد الكلمات المناسبة، يرضي ذلك غروري لست واهمآ إذن. أسمعه بعد لأي :
دي قنبلة . أستأذنه فيتركنا نمضي في سبيلنا علي مضض ..الحمد لله "عارفو لايوق" تراني أتبسم مع حبل أفكاري تبتسم بدورها أتعثر أنا في خطواتي. ميت أنا لا محالة.
ينقضي الأسبوع كأسرع أسابيع حياتي البائسة..جاءت متأخرة خمس عشرة أعوام وثلاثة أطفال وزوجة.
......وسافرت...... أجمل من رأتها مدينتي. أذكر أني قلت لها ذلك فنظرت إلي بحياد وتبسمت.
|
Post: #2
Title: Re: مليانواي-رقراق- أجمل من رأتها مدينتي.
Author: Raja
Date: 10-24-2004, 05:22 PM
Parent: #1
خالد يا غالي..
ياااااااه..
كل ده شايلو في نفسك وساكت المدة دي كلها..؟
تعرف حاجة..؟ انا كنت قايلة ده الإسم الاخترتو للبيبي الجديد الجاي..
برضو فكرة  ..
|
Post: #3
Title: Re: مليانواي-رقراق- أجمل من رأتها مدينتي.
Author: خالد الحاج
Date: 10-25-2004, 00:00 AM
Parent: #2
| Quote: تعرف حاجة..؟ انا كنت قايلة ده الإسم الاخترتو للبيبي الجديد الجاي.. |
والله يا رجاء فكرة..
الله يدينا خيرك.
|
Post: #4
Title: Re: مليانواي-رقراق- أجمل من رأتها مدينتي.
Author: khider
Date: 10-25-2004, 00:19 AM
Parent: #3
ياكارثه ده كنت داسيهو ويين
ووين التشطيبه اسه !!
we zijn er
|
Post: #5
Title: Re: مليانواي-رقراق- أجمل من رأتها مدينتي.
Author: طلال عفيفي
Date: 10-25-2004, 00:29 AM
Parent: #4
خالد ..
أنا وقعت في غرامها ..
............
............
تقول أنها جاءت متأخره ؟
البنات كده , ما عندهم مواعيد .
لك الله .
...
طلال
|
Post: #6
Title: Re: مليانواي-رقراق- أجمل من رأتها مدينتي.
Author: ودقاسم
Date: 10-25-2004, 00:31 AM
Parent: #1
خالد
أريتك تبقى طيب
أنا وأبوساندرا توائم ، وأنت توأمنا الثالث ..
| Quote: فنظرت إلي بحياد وتبسمت |
كل ده يا خالد وتتكلم عن الحياد ؟ ومال الانجياز كيف ؟
|
Post: #7
Title: Re: مليانواي-رقراق- أجمل من رأتها مدينتي.
Author: خالد الحاج
Date: 10-25-2004, 02:09 AM
Parent: #6
خدر..
حليل أخوك يا طارق...يا زول بس الشكية لله..
وزولتك كان قريبة تكون قاعدة في "كافي" في بيونس أيرس
تطير عيشتي.
العزيز طلال..
يا عفيفي يا أخوي الشي ماها سودانية..
وتشكر للدعوة الحلوة أخوك أحوج ما يكون ليها.
ود قاسم..
يا زول أنا وإنت وأبو ساندرا ؟
.....
........
نبكي بس يا ود قاسم يا أخوي.
تعرف تذكرت :
يا بنت عشرين والأيام مقبلة
ماذا تريدين من موعود 43
والله ما بذيدها شهر.
|
Post: #8
Title: Re: مليانواي-رقراق- أجمل من رأتها مدينتي.
Author: مراويد
Date: 10-25-2004, 03:32 AM
Parent: #1
غايتو وقعة الرجال والنسوان الكبار خلاص
بنبرشوا فى الواطه عديل كده .. وما بنسترو، بى عين قويه وبعد خمس عشرة أعوام وثلاثة أطفال وزوجة
لكن يا صاحب رغم انى ما بريد الامور النص نص المرقرقه دى، شهيتنى فى المتسسله بين القرنفل دى، وجاتنى صورة البنت فى رواية جورجى امادو "قابرييلا.. قرنفل و قرفه".... وانا كنت قايل حرم سجيمان وحدها المظلومه كل يوم ناطى يوصف فى البنيات،لكن واضح ان الداء منتشر، ياخى المره الجايه لما يدقشك رقراق زى ده اتذكر اخوك واتوصي بيهو لسه شباب، بى تراب الكرين لا زوجه لا اطفال!!!!
رجويه
هو الشايلو صاحبنا ده جواهو هين؟؟ الله يستر ما ينكت الباقى، عاينى صاحبو الخفيف التانى جا ناطى كمان، داك عرفناهو معرس 15 سنه وعندو تلاته، ده مالو سنه ما قفلا و ما جاب ترب!!!!؟
واحد صاحبنا "اخينا" قال المشكله فى البنات البجو طالعين ليك من اللفه فجأه ديل!!!
احذروا اللفه
|
Post: #9
Title: Re: مليانواي-رقراق- أجمل من رأتها مدينتي.
Author: Rawia
Date: 10-25-2004, 06:07 AM
Parent: #8
مراويد
دي اسمها تفاريح ............ تفاريح ساكت
خالد الحاج منور
وانا لو من اماني مــــــــــــــــابسمي بتي كدا ولو شنو داك
اسم البيبي قال
|
Post: #10
Title: Re: مليانواي-رقراق- أجمل من رأتها مدينتي.
Author: عصام عبد الحفيظ
Date: 10-25-2004, 08:28 AM
خالد كفايةكدة
حتى الرد وقف فى حلق الكى بورد
كده حاول تقول كلام تانى
سلام
|
Post: #11
Title: Re: مليانواي-رقراق- أجمل من رأتها مدينتي.
Author: Raja
Date: 10-25-2004, 08:38 AM
Parent: #8
لووووووووووول يا مراويد ..
قلت لي صاحبو جا ناطي..
تعرف اتذكرتا النكتة بتاعت العريس العرًس بالصورة.. ويوم العرس كل ما يشوف "الجكس النقاوة" يقول ليهم انتو كنتو وين زمن الصورة..
وبالمناسبة الموضوع ده وموضوع سيجيمان ينفعو بوست في السلك.. يعني لو الرجال قاعدين يبصبصو ويتحسرو كده.. يا ربي النسوان صابرات لييه..؟
يعني لو الواحدة مثلا شافت "انتونيو بانديراس" او "توم كروز" ولا "أحمد عز".. ما حتكتب شعر ..؟
جاتنا نيلة في حظنا الهباب..
|
Post: #12
Title: Re: مليانواي-رقراق- أجمل من رأتها مدينتي.
Author: Amin Elsayed
Date: 10-25-2004, 08:45 AM
Parent: #1
خالد
أكيد بتشبه بت ضـلعتي الاثيوبية
|
Post: #13
Title: Re: مليانواي-رقراق- أجمل من رأتها مدينتي.
Author: خالد الحاج
Date: 10-25-2004, 01:55 PM
Parent: #12
شنو يا أخونا يعني ما نمش الشغل ولا كيف؟
مراويد..
نحنا البينا هين أهو بيقولوا خرف
كعب فراق النونو..أما صاحبي فخليه
بياخدوا منو غسيل عدة.
راوية..
قلتي لي إسمها شنو؟؟
بعدين ما تخافي أنا بتي ما بسميها مليانواي لسببين
السبب الأول أنا لما أزهج من العيال قاعد أشتمهم يا أولاد ال ...
وزولتي تبرا من الشتيمة.
السبب التاني الإسم صعب علي أهلي الشايقية بيعوجوه ليها..
عصام عبد الحفيظ..
يا زول مالك نعل ما إتلومنا فيك يطير الكي بورد
أريتك تبقي طيب.
رجاء..
قلتي بقيتي السماوي..
يعلم الله بكي البنات كعب بعدين توم كروز كان فيهو فايدة
ما كان طلقوا كل يومين. جاتكم نيلة
أمين السيد..
ألعب غيرها..جماعتك سمحين ما عندنا فيهم قول لكن
شن جاب يا صاحبي..
|
Post: #14
Title: Re: مليانواي-رقراق- أجمل من رأتها مدينتي.
Author: lana mahdi
Date: 10-25-2004, 02:02 PM
Parent: #1
خالد الحاج
يااااااااااااااااااااه
وينك يا ود العم ؟؟افتقدناك كثيرا
وامانى كيف و الاولاد؟؟
كل عام و انت بالف خير
|
Post: #15
Title: Re: مليانواي-رقراق- أجمل من رأتها مدينتي.
Author: خالد الحاج
Date: 10-25-2004, 03:54 PM
Parent: #14
لنا مهدي..
سلامات يا بت العم..
كل سنة وإنتي طيبة..
شكرآ للطفك..وتحية صادقة للأخ يعقوب.
|
Post: #16
Title: Re: مليانواي-رقراق- أجمل من رأتها مدينتي.
Author: خضر حسين خليل
Date: 10-25-2004, 04:05 PM
Parent: #1
الجميل خالد
ازيك ورمضان كريم
فسحه مجانيه جميله
ولكن الاتتفق بانها ليست اجمل من خرطومنا بأي حاله
|
Post: #17
Title: Re: مليانواي-رقراق- أجمل من رأتها مدينتي.
Author: خالد الحاج
Date: 12-31-2004, 03:45 AM
Parent: #16
خضر حسين
صديقي اللدود
في الجرد السنوي إكتشفت أنك تطلبني رد.
متأخر !!اها؟؟ كل سنة وإنت طيب
وفرصة نرفع البوست ده.
|
|