Post: #2
Title: Re: باب السنط (عقد الجلاد) أغنية جديدة
Author: tabaldy
Date: 02-12-2004, 06:41 PM
Parent: #1
يا خالد فرتق لينك الحفظ ولا شوف ليهو حل . دي نزلت في ياتو شريط ؟
شكراً ليك يا زول
أبنوسي
|
Post: #3
Title: Re: باب السنط (عقد الجلاد) أغنية جديدة
Author: خالد الحاج
Date: 02-12-2004, 06:45 PM
Parent: #2
أهلين تبلدي..
كدي جرب كده
|
Post: #4
Title: Re: باب السنط (عقد الجلاد) أغنية جديدة
Author: Alia awadelkareem
Date: 02-12-2004, 07:00 PM
Parent: #3
واللة يا خالد ان ذاتي بضم صوتى لتبلدى وانا ما قادرة اسمع اي حاجة من البتنزلوها دي
|
Post: #5
Title: Re: باب السنط (عقد الجلاد) أغنية جديدة
Author: خالد الحاج
Date: 02-12-2004, 07:07 PM
Parent: #4
إزيك يا عالية..
الما مسموعة الغنية ولا لنك التنزيل ما شغال ؟؟أنا عدلت لنك التنزيل
عموما للسماع محتاجة لي برنامج Real Player الأغنية مشفرة عليه
أرجو التوضيح لو ما سامعين قولوا لي
|
Post: #6
Title: Re: باب السنط (عقد الجلاد) أغنية جديدة
Author: ودالعباسية
Date: 02-12-2004, 07:39 PM
Parent: #1
شكرا الاخ خالد
الشريط الجديد جميل وفيه شغل خاصة مسدار ابو السرة
مع تحياتى
|
Post: #12
Title: Re: باب السنط (عقد الجلاد) أغنية جديدة
Author: خالد الحاج
Date: 02-12-2004, 08:26 PM
Parent: #6
ود العباسية..
الله يديك العافية..
والسمعتو أنا من الشريط حقيقي رائع
|
Post: #7
Title: Re: باب السنط (عقد الجلاد) أغنية جديدة
Author: ملكة سبأ
Date: 02-12-2004, 07:54 PM
Parent: #1
ود باب السنط والدكة والنفاج
والحوش الوسيع للساكنين افواج
واللمة التى ربت جنا المحتاج
والنار الدغش والريكة جنب الصاج
والشاي البلبن برادو لابس تاج
صينيتو الدهب ترقش كبابى زجاج
والسكسك المنضوم حول الجبينة نجوم
والفنجرية تقوم تقهوج الحجاج
طق طرق يابن القهوة كيف ومزاج
خلي النعدل الراس ونحصل الترماى
الله ... ياخالد ابا ... الله الله
لو تعرف الكلمات دى بتسافر بى لياتو مكان ولياتو ناس
وتدخلنى بياتو حوش
تسلم ياخال ولمن اجى اقول الكلام دا حرف حرف
الاغنية كلمات محجوب شريف ، الحان حمزة سليمان ، توزيع طارق جويلى
وهى بشريط عقد الجلاد الاخير باسم (مسدار ابو السرة)
|
Post: #8
Title: Re: باب السنط (عقد الجلاد) أغنية جديدة
Author: خالد الحاج
Date: 02-12-2004, 08:07 PM
Parent: #7
الله يديكي العافية يا الملكي ..
والقلوب عند بعضيها كنت بكتب في القصيدة
وعندي فيما يبدو غلطة واحدة (الريكة) ويظهر إني محتاج أجازة في البركل بسرعة.
والتحية لي أستاذنا محجوب شريف الله لا حرمنا من نفحاتو.
|
Post: #9
Title: Re: باب السنط (عقد الجلاد) أغنية جديدة
Author: almohndis
Date: 02-12-2004, 08:11 PM
Parent: #1
|
Post: #10
Title: Re: باب السنط (عقد الجلاد) أغنية جديدة
Author: خالد الحاج
Date: 02-12-2004, 08:24 PM
Parent: #9
يا مهندس..سلامات...
يا زول يا زين..
غايتوا يا ناس الخرطوم جنب النيل وعطشانين
معاكم محجوب شريف وعقد الجلاد والسمندل
وتجوا تشكرونا نحنا ناس (الدياسبورا) علي نزيل الغنا..
محبتي لكم جميعا
|
Post: #11
Title: Re: باب السنط (عقد الجلاد) أغنية جديدة
Author: طارق اسماعيل
Date: 02-12-2004, 08:25 PM
Parent: #9
احييك ياخالد الحاج
وكل سنة وانت طيب والسنة الجاية كلنا في السودان
والسودان ينعم في ظل ديمقراطية ودولة القانون
وربنا يوفقك في غربتك
ودائما عهدناك جميل تقدم الجميل
|
Post: #13
Title: Re: باب السنط (عقد الجلاد) أغنية جديدة
Author: waleedi399
Date: 02-12-2004, 09:14 PM
Parent: #1
ممتازة جميلة رائعة يا خالد "باب السنط"
انشاء الله تعود الايام دي رغم البساطه
باب السنط والنفاج رموز المحبة والتلاقي والصدر الرحب
تابع خالد الحاج ابداعاتك وابداعات المبدعين ولك التحية
وليد
|
Post: #14
Title: Re: باب السنط (عقد الجلاد) أغنية جديدة
Author: waleedi399
Date: 02-12-2004, 09:14 PM
Parent: #1
ممتازة جميلة رائعة يا خالد "باب السنط"
انشاء الله تعود الايام دي رغم البساطه
باب السنط والنفاج رموز المحبة والتلاقي والصدر الرحب
تابع خالد الحاج ابداعاتك وابداعات المبدعين ولك التحية
وليد
|
Post: #15
Title: Re: باب السنط (عقد الجلاد) أغنية جديدة
Author: ابو مهند
Date: 02-12-2004, 09:26 PM
Parent: #1
معقولةبس يا خالد,المثل بيقول الزاد لو ماكفى ناس البيت يحرم على الجيران,ونحن نسمع عند الغرباء في انتظار الشريط والا بشتكيك لي ود خطاب
|
Post: #16
Title: Re: باب السنط (عقد الجلاد) أغنية جديدة
Author: خالد الحاج
Date: 02-12-2004, 09:42 PM
Parent: #15
العزيز طارق..
تشكر للكلام الطيب ..
وآمين يا طارق آمين..
وليد 399
تقول شنو ليتها تعود...
طبعا خالك عاش الأيام دي بحق وحقيقة..
أبو مهند..
الشكية فوق كم داير تفتني مع عزيز
عموما الشريط أنا ما عندي كل ما أمتلكه
عدد ثلاثة أغاني أهداهم لي أخونا حمزة سليمان
الله يديهو العافية .
|
Post: #17
Title: Re: باب السنط (عقد الجلاد) أغنية جديدة
Author: Wad Ballal
Date: 02-12-2004, 11:39 PM
Parent: #16
الاخ ابوالخلد
يديك انشاالله الف عافيه...... قول امين
you always brightn up my days when i am missing sudan
and you always put me back through sweet nice memories which i wish will come back again inshallah
|
Post: #18
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 00:19 AM
Parent: #17
ويديك العافية يا ود بلال
ويحقق أمانيك وتستعيد كل جميل من ذكرياتك
|
Post: #19
Title: Re: باب السنط (عقد الجلاد) أغنية جديدة
Author: unixo
Date: 02-13-2004, 00:55 AM
Parent: #1
يا خالد الحاج
الله يفتحها عليك جهة ما تقبل
|
Post: #20
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 01:47 AM
Parent: #19
unixo
ويديك العافية يا إبن عمي شقيش ما تقبل..
|
Post: #21
Title: Re: باب السنط (عقد الجلاد) أغنية جديدة
Author: Rawia
Date: 02-13-2004, 02:59 AM
Parent: #1
خــــــــــــــالد اخوي
بلقيـــــــــــــــــــــــس يا ملكه يا ستهم كلهم
وحمزه سليمـــــــــــان يا رائع
والموهوبين جدا اصدقائى عقد الجلاد
مــــــــــا عندي البقولو بعد كلام محجوب شريف الشيوعي الفذ الفلته الرائع وراقى
وتسلموا كلكم
|
Post: #22
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 03:10 AM
Parent: #21
وتسلمي يا راوية..
كان ينقصه توقيعك ليذيد رونقا وبهاء
وخاصة بعد عودتك من الحج تقبل الله منك.
حجا مبرورا وسعيا مشكورا.
الله يديكي العافية حاجة راوية
|
Post: #24
Title: Re: باب السنط (عقد الجلاد) أغنية جديدة
Author: Mandela
Date: 02-13-2004, 03:18 AM
Parent: #21
لا تعليق..
|
Post: #26
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 03:25 AM
Parent: #24
أكتر من كده داير تقول شنو يا مانديلة
الله يديك العافية.
|
Post: #23
Title: Re: باب السنط (عقد الجلاد) أغنية جديدة
Author: WaD OmI
Date: 02-13-2004, 03:12 AM
Parent: #1
يـــــــــــأ خالدالحاج يا خالـــــــــــــد الحاج
ده قندول العيش الفنقل الريكـــــــــــــــــــــــــــه
نوف
|
Post: #25
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 03:22 AM
Parent: #23
نوف..
سلامات..
ما شاء الله يا بت أختي ما عندك عوجة
كنت متخيل الكلمات زي (الدكة والريكة النفاج) إلا ملكة سبأ
من جيلكم تكون علي دراية بيها لعشقها الكبير بالكلمات التراثية
ولا أملك إلا أن أحييك..
وأهديك الغنية كمان.
|
Post: #31
Title: Re: باب السنط (عقد الجلاد) أغنية جديدة
Author: WaD OmI
Date: 02-13-2004, 06:08 AM
Parent: #25
تسلم يا اخوي يا خالد الحاج يديك العافيه
الغريبه دي الاغنيه الوحيده لعقد الجلاد الما سمعتها
مسؤال من الخير جبتها من وين؟؟؟؟؟؟؟؟؟؟؟
دايما
نوف
|
Post: #27
Title: Re: باب السنط (عقد الجلاد) أغنية جديدة
Author: Raja
Date: 02-13-2004, 03:26 AM
Parent: #1
خالد...
يااااااه يادوووب الغنية اشتغلت..
خليني استمخ بيها اتناشر مرة وبعدين أعلق..
|
Post: #28
Title: Re: باب السنط (عقد الجلاد) أغنية جديدة
Author: kamalabas
Date: 02-13-2004, 03:29 AM
Parent: #1
دائماأختيارك في الصميم ياخالد كلمات روعة الحان
بهجة أداء جميل ..
|
Post: #29
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 03:38 AM
Parent: #28
رجاء..
تاخدي راحتك بالكامل..
بيتك ومطرحك..
وخلي بالك من الكسرة في الغنية
وقولي لي حمزة الله يديك العافية.
كمال عباس..
الله يديك العافية
تصدق لي أسة أكون سامعا زي 150 مرة
وكل مرة بحس إنها المرة الأولي..
|
Post: #30
Title: Re: باب السنط (عقد الجلاد) أغنية جديدة
Author: Mandela
Date: 02-13-2004, 04:00 AM
Parent: #29
طيب الواحد سمع و جا....
اها دايرين ترجمات:
الريكة..الدكة...
طبعا المسألة دي حتعمل خط واضح بين العجايز و الشباب....لكن في النهاية العمر أحساس..
و لا شنو يا خال...؟
|
Post: #32
Title: Re: باب السنط (عقد الجلاد) أغنية جديدة
Author: HAMZA SULIMAN
Date: 02-13-2004, 06:49 AM
Parent: #30
يا مانديلا
يا الحبيب
معقول ما عارف الريكه والدكه
اتلومته والله
اشرح هذه الكلمات وبجيك راجع
باب السنط
الدكه
النفاج
الريكه
الصاج
الطرماج
لك محبتى الخاصه
|
Post: #33
Title: Re: باب السنط (عقد الجلاد) أغنية جديدة
Author: Alia awadelkareem
Date: 02-13-2004, 11:25 AM
Parent: #1
العزيز خالد
سلامات تسلم البطن الجابتك
استمتعت جدا بلاغنية وبرنامج الريل بلاير طلع ريل
شكرا تانى
|
Post: #34
Title: Re: باب السنط (عقد الجلاد) أغنية جديدة
Author: anwar abu gaidaa
Date: 02-13-2004, 11:49 AM
Parent: #33
يا ود الحاج الله اديك العافيه
لقد ابكيتنى ثانية؟؟
الصيف المنصرم ذهبنا انا وام غيداء فى اجازة
الى بلدنا وكان ان رجعت الى ميسى وحوشى الوسيع عقد الجلاد
تقالدنا وتحاننا وغنينا كما لم نغنى من قبل
وكانت هذه الاغنيه التى اغرورقت عيناى منها دموعا وحنانا
انها ممتلئه بكل ما هو نبيل
وحمزه صديقنا الفنان هو احد مراكز القوى اللحنيه فى عقد الجلاد
وله قدر فى مزج ما هو تاريخى بالحديث
حتى يكسبه لون عصرى
وله فىرائعة المرحوم صلاح احمد ابراهيم ما شين ودشن برهان كبير
ليك الود وكثير المحبه
وكتر من المكاواه؟؟؟
|
Post: #35
Title: Re: باب السنط (عقد الجلاد) أغنية جديدة
Author: mustadam
Date: 02-13-2004, 12:00 PM
Parent: #1
العزيز خالد شكرا لقد أشرقت عيون أهلي عند سماعنا للأغنية ( من 50 إلى 5 سنوات , فتأمل) بالحب الدافق لعقد الجلاد , الفرقة التي ساهمت وما زالت في ترقية وتطوير الذوق السوداني بعيدا عن الغث الفاسد المفسد!
رحم الله البروفسور علي المك فقد استدعى الأنسان الفذ محجوب شريف( وبالمناسبة هو أكبر من التأطير الإيدولوجى ) المناخ الذي قدم للسودان رجال أفذاذ مثل علي المك في هذه المرثية الفرحه!
شكرا مرة أخرى منا جميعا !
مصطفى آدم
|
Post: #36
Title: Re: باب السنط (عقد الجلاد) أغنية جديدة
Author: الجندرية
Date: 02-13-2004, 12:08 PM
Parent: #35
لا لا الليلة عاد نويتوا علينا
الله يحضرنا يوم باكر بالطريقة دي
خالد يا ود امي
لنك الحفظ دا ما شغال
شوف ليها حل
|
Post: #37
Title: Re: باب السنط (عقد الجلاد) أغنية جديدة
Author: omer ibrahim
Date: 02-13-2004, 12:32 PM
Parent: #35
خالد الحاج سيد المسيد و القبة برضو
هو الشريط دا مرقا في هولندا؟ لا حولا ولا قوة الا بالله.
المعني يعني جا طاير بي فوقنا وما ركا
مرة واحد صاحبي قال
اقسم بالله العظيم - دا قسم عديييل - واخد بال حضرتك؟
اقسم بالله العظيم مافي غني بوقف لي شعرة جلدي غير غني عقدالجلاد.
انا ماسمعتها لسة الغنية دي لسة -علاكين- للضمان كدي اول ما قريت الفينا مشهودة دي مسكتني ليك ام هلا هلا.
اخوك تحت تحت كدة مااا سودااااني ... انت قايل شنو؟
المهم..
اجمل حاجة في الدنيا انو الواحد ما يكون بعرف يكتب كلام جميل زي ناس القدال و محجوب شريف و البورداب ناس تماضر والطيب ريمو و قرمبوز و نجلاء و الفاضلابي و الجماعة ديل .. عارف لية؟؟؟
عشان يتخلع بالشعر السمح متل خلعتي الهسع دي.
________________
________________
الفينا مشهودة ... و جوة الغنية دي بالذاااات ... دايرين يقتلونا الناس ديل ولا شنو
عليك الله عقد الجلاد دي ما بالغت؟؟؟
عمر
|
Post: #38
Title: Re: باب السنط (عقد الجلاد) أغنية جديدة
Author: Tumadir
Date: 02-13-2004, 12:46 PM
Parent: #37
دى اغنيه من سنط..
وشجن..
ياهو حالكم يا عقد الجلاد..ما بطلع منكم مومن..من غير دماعو يهتفن
|
Post: #40
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 01:01 PM
Parent: #37
مانديلا ..
أها يا مانديلا حمزة ختاها ليك في حوشك
وذاد ليك الجرعة أبقي مارق وخالك يمتنع مؤقتا.
حمزة سليمان..
هلا بالناس الحلا..
واللحن رائع يا حمزة، الله يديك العافية..
وبعد ده كلو منتظر لجنة نصوص تجيز ليك غناك
كدي شوف الناس دي بتقول في شنو..
عالية..
الحمد لله..أها بعد كدة نومي قفا وأسمعي.
أنور عبد الرحمن..
أيوة أبكي شوية ما قاعد تبكي فينا عمرك كلو
يعني فرد بكية بتسوي ليك شنو..
الله يديك العافية لتزرع فينا الفرح البقي ضنين.
مستدام..
صدقت والله محجوب شريف ثروة قومية لا تؤطر
ولا تقبل التقسيم..ورحم الله ود المك فقد كان يعرف قدر الرجال.
الجندرية..
أضغطي هنا في إسمك وقولي لي الله يرحم والديك.
جندرية
عمر أبراهيم..
يا أخي إنت زول حلو
وبيني وبينك خالك من أمس (شعرت جلدو مكلّبة)../
|
Post: #39
Title: Re: باب السنط (عقد الجلاد) أغنية جديدة
Author: الجندرية
Date: 02-13-2004, 12:55 PM
Parent: #1
احي اتذكرت النفاجات
في يوم وقفة عيد الحب دي
بالله تدخل /ي حلتنا من اول بيت لحدي ما تصل / ي البحر تاني ما تشوف /ي الشارع
نفاجات بس
ياربي ما تسد لينا نفاج
ويا خالد انا منتظرة اللنك عشان امشي اعمل غداء الجمعة
|
Post: #41
Title: Re: باب السنط (عقد الجلاد) أغنية جديدة
Author: samo
Date: 02-13-2004, 01:16 PM
Parent: #1
( الصاج ..اللمه ...شاي اللبن .. الحوش الوسيع ..)
معانى بسيطه وحنينه... لحد البكاء
الفينا مشهوده ..عارفانا المكارم .. انحنا بنقودا ..الحاره بنخوضا
معانى .. جميله وقويه
شكرا ليك ..
وشكرا لعقد الجلاد..
|
Post: #42
Title: Re: باب السنط (عقد الجلاد) أغنية جديدة
Author: samo
Date: 02-13-2004, 01:16 PM
Parent: #1
( الصاج ..اللمه ...شاي اللبن .. الحوش الوسيع ..)
معانى بسيطه وحنينه... لحد البكاء
الفينا مشهوده ..عارفانا المكارم .. انحنا بنقودا ..الحاره بنخوضا
معانى .. جميله وقويه
شكرا ليك ..
وشكرا لعقد الجلاد..
|
Post: #43
Title: Re: باب السنط (عقد الجلاد) أغنية جديدة
Author: الجندرية
Date: 02-13-2004, 01:17 PM
Parent: #1
ربي يرحم والديك يا خالد
ويرحم امواتنا جميعاً
ويعدلها عليك شقيق ما تقبل
|
Post: #44
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 01:35 PM
Parent: #43
تماضر..
إزيك يا بت الشيخ..
هي أغنية..
للمحبة برضو..
وللعشم في باكر أحلي
وللحنين ..
وليكي هدية يا تماضر الفرح النبيل.
سامو...
يديك العافية..
جندرية..
ويرحمك ووالديك..
وينعم عليكم بي هداوة بال ومحبة.
|
Post: #45
Title: Re: باب السنط (عقد الجلاد) أغنية جديدة
Author: معتز تروتسكى
Date: 02-13-2004, 02:32 PM
Parent: #1
خالص التحايا
الزول السمح خالدماعارفين نجازيك كيف الا نكتلك.. اصبتنا فى مقتل لانو عقد الجلاد ديل جايين من البعدالعاشرعموماابقىليناوصلةونحنى البلدالبعيددى ربنا يديك العافية وماتنسى تسلم على الوليدات
وسلامات وعوافى..
|
Post: #46
Title: Re: باب السنط (عقد الجلاد) أغنية جديدة
Author: Mandela
Date: 02-13-2004, 03:28 PM
Parent: #45
كويس....
باب السنط...
باب من خشب السنط في الغالب بكون قصير كده و بكون بين الحيشان بعني ده بدخلك من بيت لي بيت و هم في الغالي بكونو أهل أو اسرة واحدة,,ده أنا عارفو كويس لانو في زيلراتنا حوش جدنا كل ما أجي مارق الشارع أفتح الباب ألقى نفسي في حوش جديد و ناس قاعده تشرب شاي الصباح...يهجموا علي طلاق تقعد تشرب شاي باللقيمات...انا بشرب شاي الصباح زي ستة مرات كده حى اصل الشارع...و في الرجعه تكون الحليفة على صينية الفطور...
النفاج..شباك صغير كذلك بين البيوت...
الصاج...الصاج
الطرماج...يا ربي tram؟؟؟؟؟ أيوا الطرماي زي ما قالو أهلنا...
يا خوانا نحنا صحي أولاد مغتربين لكن ما للدرجة دي....؟؟؟!؟!؟
|
Post: #47
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 07:39 PM
Parent: #46
العزيز معتز..
يكفيني كلاامك الطيب ده يا معتز
ولك تحايا الأسرة هنا ..
مانديلا..
ماشي كويس لكن باب السنط ممكن يكون باب كبير وما يميزه أنه لا قفل له يعني متاكا وهو دليل علي أن البيت مفتوح للضيوف علي الدوام.
الصاج : هو الصاج أو (الدوكة) في رواية أخري
النفاج : شباك صغير في المطبخ أو التكل في الغالب ولكن المقصود هنا فتحة في السور بين منزلين
دليل علي أنو الحالة واحدة والجار أهل.
الطرماج : الترماي ورغم إنو خالك ما حضر الترماي إلا أني شاهدت قضبان السكة حديد التي كان يسير عليها وأظنها دفنت أسه بكميات من الأسفلت..ويبقي أثره ظاهر في كبري أمدرمان القديم.
ويلا شوف الباقي...
|
Post: #48
Title: Re: باب السنط (عقد الجلاد) أغنية جديدة
Author: Abir Abdulla
Date: 02-13-2004, 09:06 PM
Parent: #1
الاخ خالد امتعتنا باختياراتك..شكرا لك
|
Post: #49
Title: Re: باب السنط (عقد الجلاد) أغنية جديدة
Author: خالد الحاج
Date: 02-13-2004, 09:31 PM
Parent: #48
وشكرا ليك يا عبير
تسلمي .
|
Post: #50
Title: Re: باب السنط (عقد الجلاد) أغنية جديدة
Author: أحمد أمين
Date: 02-13-2004, 09:39 PM
Parent: #49
خالد الاغنية
جميلة
وشكرا لك
|
Post: #51
Title: Re: باب السنط (عقد الجلاد) أغنية جديدة
Author: WaD OmI
Date: 02-14-2004, 07:12 AM
Parent: #1
يا خالـــــــــــــد الحاج
تعال نعمل دروس خصوصيه لتعليم اللغه السودانيه الاصيله والحصه بي ميه دولار ( عشان اولاد المغتربين يا منديلا)
نفيد ونستفيد
نوف
|
Post: #52
Title: Re: باب السنط (عقد الجلاد) أغنية جديدة
Author: HAMZA SULIMAN
Date: 02-14-2004, 01:24 PM
Parent: #51
انا مع نوف فى اقتراحه
يا مانديلا
باب السنط انت ما عارفه
اقرأ رد خالد
وبعدين ما شرحت لينا
الدكه
يا خالد الصاج ما ياهو الودكه
لكن لهم علاقه مع بعض
كدى شوف الدوه شنو وبجيك راجع
كدى نشوف نوف
|
Post: #53
Title: Re: باب السنط (عقد الجلاد) أغنية جديدة
Author: خالد الحاج
Date: 02-14-2004, 01:31 PM
Parent: #52
العزيز حمزة..
صباحتك ورود..
الدوكة : تعني صاج يا حمزة بلغة بعض أهل الشمال
والودكة هي (الطايوق)وناس البندر بقولو مخ
وعندك كمان (المعراكة) وهي قطعة القماش لمسح الصاج
وعندك كمان (القرقريبة) وهي لبسط العجين علي الصاج.
ومنتظرين مانديلا للدكة والريكة..
|
Post: #54
Title: Re: باب السنط (عقد الجلاد) أغنية جديدة
Author: HAMZA SULIMAN
Date: 02-14-2004, 02:09 PM
Parent: #53
تعرف يا خالد
انا اتلخبطت على اللغه
معليش
انت صاح
وما ح اقول ليك انا كنت فاكر شنو
لك التحيه
لكن الدكه بعرفها
|
Post: #55
Title: Re: باب السنط (عقد الجلاد) أغنية جديدة
Author: WaD OmI
Date: 02-15-2004, 00:59 AM
Parent: #1
والله يا حمزه سليمان كان ما بتعرف المعراكه والقرقريبه تبقى عووووووووووووووجه
وحالتي انا كنته دايره اخليك مساعد لخالد الحج في الدروس الخصوصيه لتعليم اللغه السودانيه ..............
لكن بعد ده الا اعمل ليك انترفيو
نوف
|
Post: #56
Title: Re: باب السنط (عقد الجلاد) أغنية جديدة
Author: Mandela
Date: 02-15-2004, 10:25 AM
Parent: #55
يا حمزة انت عامل فيها الممتحن و انت زاتك سطحت...
أها الريكة دي ...طبق من السعف توضع به الكسرة ....من الصاج للريكة للمستهلك..
و الله الدكة دي أبت عدييييل
|
Post: #57
Title: Re: باب السنط (عقد الجلاد) أغنية جديدة
Author: HAMZA SULIMAN
Date: 02-15-2004, 01:18 PM
Parent: #56
يا نوف
حصل لى لبس شويه كدى فى كلمه
قالها خالد
وفهمتها غلط
وهسى كان عملنا ليك انترفيو انتى
ح تلخبطى
قلت لى الدكه ما عارفها يا الحبيب مانديلا
كدى شوف نوف
وبجيك راجع
|
Post: #58
Title: Re: باب السنط (عقد الجلاد) أغنية جديدة
Author: nazar hussien
Date: 02-15-2004, 04:42 PM
Parent: #57
الدكة:حفرة دخان الطلح والشاف والكليت يا حمزة...الكليت شنو؟
كل سنة وانت طيب...يا حمزة...قدر ما اتشابيت في ارفف محلات الكاسيت
كان في المطارات او الخرطوم عموم ما لقيت شريط نزار الماحي...
يا اخي ما ترسلو لي وتريحني من شحتفة الروح...
|
Post: #59
Title: Re: باب السنط (عقد الجلاد) أغنية جديدة
Author: خالد الحاج
Date: 02-15-2004, 05:19 PM
Parent: #58
أما الريكة يا نزار
تنسج من السعف وهي مستديرة
وأصغر حجما من الطبق البيغطو بيه صينية الأكل
وبيشيلوا بيها قناديل الزرة شامية ولا فتريتة
(قندول فلان فندر الريكة) مثل.
والله أعلم.
|
Post: #60
Title: Re: باب السنط (عقد الجلاد) أغنية جديدة
Author: nazar hussien
Date: 02-15-2004, 05:41 PM
Parent: #59
خالد الحاج
نسيت اهنيك انت والاسرة بالعيد فكل سنة وانتم بالف خير وعافية
والسهو جا من الغنية ما مني انا... يا اخي الكلام لما يكون جميل
ومفرداته اصيلة...يجبر الملحن والمغني علي الابداع....ولله درك يا حمزة...
اما قناديل عيش الريف فهي القنقر عندنا...والريكة كذلك احيانا تقوم مقام الهبابة....وفندر دي حمزة ما بعرفها.....
|
Post: #61
Title: Re: باب السنط (عقد الجلاد) أغنية جديدة
Author: خالد الحاج
Date: 02-16-2004, 00:40 AM
Parent: #60
وإنت طيب يا نزار..
وتتحقق أمانيك..
رسالة إلي حمزة سليمان وأنور عبد الرحمن من أستراليا..
Quote: حباااابك وليد الحاج كيفنك يا وليدى ولعلك طيب والوليدات تمرات الفؤاد لعلهم عوافى ومبسوطين دحين يا وليدى حمزه ودسليمان بيعرف اللدايات ولا الخماره ولا البصاره وال ام شعوفة ولاالطقطاقه المهم الكلام حلو لكن نحنا بقينا بعيدين ومانا فايقين للوليدات المن صلبنا وما عارفين الا البسيط بس انا وليدى بيعرف العصيده والشرموط بس ما بيعرف // تر كدى/// التاء بالضمه//حليننا من الزمن الخلا الناس طاشه وفى بلاد الله الواسعه مشتته وما اظن اجى زمن يخلى انور وحمزه والنو وشمت اتلمو ونحنا ننبسط ونضحك ونبكى من غناهم بس دحين يا جنيي انور ما من الحلاوين؟ ومعاك بلغو سلامى وقول ليهو الشوق لسماع صوتك كتلنى عديل كدى وسلا م ليك يا وليد الحاج واتمنى اللمه فى ضل النيمه ونسمع فى حقيبه الفن وام در يا ربوع سودانا
وفتك عافيه
هنداوى الضقالى
استراليا ميلبورن |
|
Post: #62
Title: Re: باب السنط (عقد الجلاد) أغنية جديدة
Author: WaD OmI
Date: 02-16-2004, 06:51 AM
Parent: #1
اصلـــــــــــــــــــــي اصلي والله يا ود الحاج بالحيل
حصل خير يا حمزه يا اخوي اللخبطه حاااااااااصله والله لكن طول بالك خليهو سلبه بس ...
بمناسبة سلبه دي عارف سلبه معناها شنو مانديلا السؤال ده ليك برضو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
نوف
|
Post: #63
Title: Re: باب السنط (عقد الجلاد) أغنية جديدة
Author: nazar hussien
Date: 02-16-2004, 08:50 AM
Parent: #62
معقول يا نوف نحن بعدنا من ذاتنا لي درجة السلبة...بعد شوية
بالطريقة دي حا نسأل عن القراصة والكسرة والتكل واللدايات والكمشة والمفراك والعنقريب والآشميق او العشميق بقراءة حفص...
طولوا بالكم سلبة واتربطوا بالباقي
|
Post: #64
Title: Re: باب السنط (عقد الجلاد) أغنية جديدة
Author: Giwey
Date: 02-16-2004, 07:52 PM
Parent: #63
الرائع ابدا خالد الحاج
شكرا هلى هذا الجمال
محجوب شريف وعلى المك مرثيا
واداء جلادى انيق كالعهد به
وانا الان فى المتعة اخطو
ولك الود من قبل ومن بعد
عبد الرحمن قوى
|
Post: #65
Title: Re: باب السنط (عقد الجلاد) أغنية جديدة
Author: تراث
Date: 02-17-2004, 01:47 AM
Parent: #64
شكراً ياخالد ياجميل
اولاً نريد ان نعرف مصدر حصولك على ألأغنية . هل هو من السهرة التلفزيونية التي تمت مع (عقد الجلاد) في عيد الفطر السابق . ام من شريطهم الأخير الذي لم يصلنا بعد .
عرفنا ان كاتب الكلمات هم محجوب شريف ، ولكن لم نعرف من هو الملحن ، ومن هو الموزع اذا كان غير الملحن ؟
واضح ان القصيدة مقطعة ، اي ان الأغنية اختارت مقاطع من قصيدة اطول ، هل يسعفنا احدكم بنص القصيدة كاملة .
وللذين حصلوا على شريط عقد الجلاد الجديد ارجو ألا تبخلوا علينا ببعض اغنياته ، وخاصة منها مسدار ابو السرة ، حتى نستطيع الحصول عليه .
اكرر شكري للعزيز اللذيذ خالد .
|
Post: #66
Title: Re: باب السنط (عقد الجلاد) أغنية جديدة
Author: Ehab Eltayeb
Date: 02-17-2004, 03:54 AM
Parent: #1
الخال العزيز:
نشكرك علي الاغنية الجميلة ..
ودمت بذوقك السليم وكتر لينا من عقدالجلاد..
ثم تحول الموضوع الي مطارحة تراثية بين الاخوةالافاضل.
مع تحياتى...
|
Post: #67
Title: Re: باب السنط (عقد الجلاد) أغنية جديدة
Author: خالد الحاج
Date: 02-17-2004, 04:08 AM
Parent: #66
العزيز عبد الرحمن قوي..
سلامات وحمدا لله علي السلامة ليك زمن مسجل غياب..
والله يديك العافية..
تراث الجميل..
الأغنية يا تراث أرسلها لي ضمن ثلاثة أغنيات
الأستاذ حمزة سليمان..
الكلمات : محجوب شريف
اللحن : حمزة سليمان
وشارك في الأداء بعد غيبة الأستاذ أنور عبد الرحمن
أما مسدار أبو السرة فطول بالك جاي في السكة..
كفارة ليك وحمدا لله علي السلامة..قالوا متألم شوية.
إيهاب الطيب..
سلامات يا زول يا زين..
قلنا نفتحها مدرسة للمستشرقيين
وبيني وبينك لو قريت الرسالة الفوق المرسلها أخونا هنداوي الضقالي
من أستراليا وفهمت الكلمات الفيها ألحق خالك والله فيها حاجات أنا ما عرفتها..
|
Post: #68
Title: Re: باب السنط (عقد الجلاد) أغنية جديدة
Author: Raja
Date: 02-17-2004, 05:49 PM
Parent: #1
الغالي خالد..
أها جيت راجعة.. وزي ما قلت ليك اني حأسمعها خمسين مرة بس.. لقيت روحي سمعتها اكتر من خمسمية مرة..
الجميل في مجموعة "عقد الجلاد" - عبر أي جيل - ان هناك لمسة سحرية تلازمها حتى ولو تغير الأشخاص..
قد تكون "الاستايل الخاص" في اختيار الكلمات..؟ ربما..
قد تكون "الروح" الخاصة بالألحان.. ربما..
قد يكون عثمان النو.. ربما، تميل للأكيد..
قد يكون شمت.. ربما، يميل للأكيد..
قد تكون حوا المنصوري.. ربما، تميل للأكيد..
قد تكون..
قد تكون..
المهم ان هذا السر هو الذي يجعل من هذه المجموعة "لا مثيل لها"..
التحية للشاعر الرائع الأستاذ مجوب شريف.. والتحية للفنان الرقيق حمزة سليمان.. والتحية لباب السنط الذي أدخلنا لعوالم جميلة..
وشكرا ليك يا حامل المسك المنبري..
|
Post: #69
Title: Re: باب السنط (عقد الجلاد) أغنية جديدة
Author: falcon
Date: 02-17-2004, 08:10 PM
Parent: #1
عزيزي خالد
تسلم و تشكر علي الاغنية
التي عبرت بنا الي ازمان كادت ان تندثر من الذاكرة الخربه اصلاً
ياربي دي حقيبة جديدة و لا شنو
مرة ثانية شكرا علي الاختيار
|
Post: #70
Title: Re: باب السنط (عقد الجلاد) أغنية جديدة
Author: mohammed alfadla
Date: 02-27-2004, 02:38 AM
Parent: #1
(الهي ،هولاء عبادك قد أجتمعوا علي ليقتلوني فأغفر لهم........
الحلاج في المشنقة
|
|