شكوي عاجلة للجندريات ومنهم (والشكية لبيدن قوية)..

سمعت عن الغيرة وعايشتها فترة من حياتي ، شيئ جميل في حدود المعقول طبعا
لكن لما تكون الحالة كحالت زوجتي فالأمر يحتاج إلي مشورة (سجيمان وأبو حراز يمتنعون)..
زوجتنا المصون لا تعرف الغيرة وطبعا الموضوع في صورته العادية جميل منو الما بيتمني زوجة ما غيورة؟؟
بس ما للدرجة دي!! أنا عندي حالة متأخرة والواجعني في الموضوع بجيني إحساس بأنها ترسل لي رسالة
(يا عجوز إنت قطرك صفر)..
أموت أنا في إيمان بنورة مذيعة قناة الجزيرة.. ولما تذيع نشرة الأخبار تتحول المآسي التي تنقلها وأخبار الحروب إلي معزوفة جميلة وسمفونية لبتهوفن أو موتزارت !! لا يهم صبرا شاتيلا أو الفلوجة المهم إيمان تذيع !!
ويدور حوار طريف هنا أحيانا (من طرف واحد كأغلب حواراتنا في البورد).. حول الموضوع تعرفي يا حاجة (ده إسم الدلع)..
لو يخلوها تذيع وهي واقفة كان الواحد أتفشي أنا عندي إحساس إنها قصيرة . ويكون الرد : أوه... طبعا أوه دي عند حرمنا المصون إختصار لي (يا راجل ما تخجل إنت قايل إيمان بتعاين للزيك)..
أتقصدها أحيانا أقول (أضيق ليها أخلاقها) -هواية يعني ما كل زول عندو هواية-.. تعرفي يا حاجة.. الشي دي (إيمان بنورة) مبالغة أسة في ذمتك أنا ما مظلوم ترد : عاجبني إنت يا راغب علامة ترميها زي البنية.
في الويك إند الفات مشينا السوق الدنيا هنا بدت تصيّف والناس قاشرة وطبعا الهدوم بتقل مع سخانة الجو وأنا كعادة كل السودانيين كاسح قدام وهي ومعاها (البطان) العيال وراي.. فجأة تجرني ليك من لياقة القميص لامن داير أقع علي قفاي
وقالت وكل البراءة في عينيها : يا خالد عليك الله عاين شوف البت دي سمحة كيف ؟؟؟ بيني وبينكم البت سمحة..سمحة جد .لكن المصيبة في محمد ولد دي يسووا ليها شنو..والأمر من كده البنيات تجي الشافعة .. يا بابا عندك شعرة بيضا هنا أقلعها؟
أقلعيها يا بتي وعادة ما تتدخل الحاجة هنا : والله بالطريقة دي إنت حا تصلع..نان يا مصيبة المابيصلع بي شنو كان ساعي لي راجل (ده تعبير شايقي ولا علاقة له بالإساءة للعنصر النسائي)..
كيف الشورة يا جماعة.

كيفك ياخال
عااااااادي جدا والله تلقاها جوة مهرية هري بس عاملة تقيلة
كدي شغل ليك شريط لهاشم مرغني واعمل فيها سرحان

حليلك يا علي يا ود أختي
والله هاشم ميرغني إلا يدفرها عشان تزعل
خالك ممكون أسة بدال تقول لي عرس تقول لي عادي عادي في عينك

غايتو اماني دي بعد البوست ده اتاكدت تمام انها ح تدخل بيك الجنة
ولوج كمان

تعرف يا علاء خالتك أماني بتحب تحضر قناة إسمها (المنار) بتاعة الكيزان اللبنانين
مرة جابوا واحد مطموس قال شنو (زوجتك في الدنيا زوجتك في الآخرة) قامت خالتك
قالت لي أها وين ليك زوغة مافي.. قلت ليها سجم خشمك أنا غايتو بالبسوي فيهو ده جهنم عدييييل
وشايلك في ضهري دبري حالك..

قال لوج قال

Quote: والله هاشم ميرغني إلا يدفرها عشان تزعل

خالد الرايع
دوما
لا تشكي للجندريات
احسن ليك
انا بررررررررررررررررة

فتحي البحيري قالوا البيعضي الدبيب
شيل شيلتك أنا هين..

لا تشكي للجندريات
احسن ليك
انا بررررررررررررررررة
بعد شنوا انت بره خالد قال ليك البعضي الدبيب مالو
جاتك اصغر دبيه في البورد
.
.
.
.
بجيك راجعه شيل شيلتك

خالد الحاج
أحمد الله الاداك متل اماني دي...وتسكت سااااي
كمان جاي تشتكي؟؟
الشكية لاب ايدآ قوية

وبعدين قلت ساعي ليك شنو؟؟
اماني بقت يسعوها؟؟؟

استني الم ليك الجندريات وأجي
الكع حيحصل قريييييب

قال ساعي قال....

حنينة..
أها قمنا للسواطة؟؟
ما قلنا ده تعبير شايقي
بعدين أنا العندي مغلباني دايرة تلمي علي الجندريات
شكيتك لي الله.

الأخ / خالد لك ودى ،
أنت مسألتك ساهلة لكن سمعت قصة الزول الأصلو ما بغير على مرتو ، والحكاية دى مجننيناها شديد ؟؟ قامت قالت الليلة دى الا تخليوهو اغير ، عندهم جار (شوطين) أسمو عبدالله ، قالت ليهو يا عبدالله انا دايرك فى خدمه ممكن ؟؟ عبدالله قال ليها جدا ، قامت قبل ميعاد حضور زوجها من العمل ، جابت عبدالله ودخلتو فى دولاب هدومها ، لمن جاء الراجل عملت معاهو شكله من دون سبب ، وقالت ليهو أنت من ماعرستنى ما اشتريت لى توب ولا فستان ولا ..... الراجل قام أستغرب وزعل وراح فاتح الودولاب ، يا مره انت مجنونه أنا هسه قبل كم يوم ما أشتريت ليك أمكن كم توب وفستان ، وبدأ أعد وأحسب واحد ... أتنين وثلاثه ...يا (عبدالله) زح شويه أربعة ... خمسه .....
حقو تعمل Exchange مع زولنا ده.

تاج السر حسن..
يا زول نحن دوالايب ما معانا لالالا يا أخي ما للدرجة دي
ما تقول لي راجي البص والله أخنقك لامن طفطس

يا خالد ما تخاف انا بكون راجى لى (تكسى).

والله ياخال بس كنت حاني عليك عشان كده مانصحتك
لكن مادام الجماعة دايرات يلمن الباقيات انا في صفك تب ومد رجلك اليمين تلقاني طابي واحدة يدي اليمين ( ولا هي بلفحوها بوين ؟ )

علي عثمان..
أيوة كده إتعدل

خالد..
انتو عاينو لناس ايمان بنورة ونانسي عجرم واليسا..
وخلونا نحن نعاين في .....
خليهو سااااااكت..
انتبه انو نحنا بناخد الرجالة على أد عقلهم..

لوووووووووووووووووووووول

والتقيل يكسب..

خالد الحبيب
تحياتي

كويس انو المدام بتقول ليك شوف البت دي سمحة كبف
دا بيعني انو عندها روح رياضية

Quote: أموت أنا في إيمان بنورة مذيعة قناة الجزيرة.. ولما تذيع نشرة الأخبار تتحول المآسي التي تنقلها وأخبار الحروب إلي معزوفة جميلة وسمفونية لبتهوفن أو موتزارت !! لا يهم صبرا شاتيلا أو الفلوجة المهم إيمان تذيع !!

ايمان بنورة ؟؟
عندي صديق عزيز معانا هنا في البورد
كان مرة بعاين في الجزيرة وجات ايمان بنورة
وبدا يبحلق واندمج معاها للآخر
زوجتو كانت بتصور في المشهد ومغيوظة جدا
مشت المطبخ
سخنت الملعقة وجات وضعتها ليهو على يدو لمن نط
اها قام بعد كدا اعدم كل الملاعق الحديدة في المطبخ

sympatico
الجميل..
تعرف نوع الأخبار دي هنا مرفوضة تماما
دي نوع من السادية..
ولو جابت ليها تش تيش أخوك يا دوب قطرو صفر
كان عندك أخبار أحلي مني دي أقعد معانا
وكان ياهو التش تيش يا زول قشة ما تعتر ليك علي قول أسعد
قال تش تيش

خالد الحاج..
راغب علامة..؟؟!!! راغب علامة ده منو ..؟
انحنا بنعاين لناس على مستوى لعيبة مانشستر ونابولي وروما وريال مدريد..
وكان لابد من الفنانين.. انريكو ايجليسياس مالو.. عيبو لي.. السمح ود الـ ااااااخ

لووووووووووووووول
وبالمناسبة حجوج بتاعتنا بقت زاتها تعرف.. وتناديني لما يجيبو الناس الحلوة دي..

تعرفي يا رجاء
ناس مانشستر ونابولي ديل أخير منهم حمد والديبة بي فلسهم وقجتهم الطايرة دي
ديل مصايب ..القانون عندنا هنا البينفصل من زوجتو بتشيل نص العدة وهي عدة نصاح ملاييين
يا رجاء وبعد ده العين طايرة (قوليت) زوجتو السابقة مرقت منو بي خمسة مليون يرو
وهو فرحان بالتسجيل الجديدة بنية زي الفس فس..( ريكارد) زوجتو السابقة طلعت منو بي حسبة
تجي سبعة مليون وإياكي و ناس التنس (بورس بيكر) عندو زوجة أمريكية مرقت منو بي 15 مليون دولار
برضو تقولي لي صلاح كرار.. أخير نحنا بي فلسنا ده

رجاء..
أها تعاينوا في منو ما تقولي لي راغب علامة
ما قال عنكم ما قال وقال وقال وقال وقال وقال وقااااااااال
والتقيل يا رجا بيشرب شنو..

انت عارف المشكلة الرئيسية في مناداتك ليها يا حاجة
ياخي بالغت في زول بقول لمرتو يا حاجة؟
قايتو انتو الرجال السودانيين ديل عاوزين ليكم أدفانس كورس
مش في الجندر لكن في الرومانسية
قال حاجة ده اسم الدلع قال

ندا أمين.. أهليييين بالرومانسية
يا ندا الناس لما تبقي حنان وحلوين الكلام بيبقي
بالإحساس وخالك زول حساس محمد حساس..
قال رومانسية قال ..
أصبري ما تستعجلي علي رزقك طارق أخوي بعد خمستاشر يوم
من عرسو بقي يغسل العدة.
رومانسيا
روما
روم
رم
ر
ررررررر

صدقا لى كلامك دا بتذكر لما مشيت لندن يا خالد واتصلت بيك هناك ولقيتك مساهر بره لغايه وقت متاخر اتحميت واتدميت وقلت ليك ما عندنا رجال بساهروا بره لغايه حسه وقلت ليك بكلم امانى
وفعلا لما قلت ليها بهدوء وبراحه قعدت تضحك وقالت لى عادى

وتانى مره برضو قعدت احرش فيها وما نفع.... لما قامت علينا مهيره اختك وورتنا شغل النسابه وبرضو امانى كانت بتضحك ولا هماها

امانى ملاك


بمناسبه الصيف فى ناس ما دايرين ليهم الجيه هنا عشان كدا

يا خال حاصل الحاصل ؟؟

جاى تشتكى كمان

ما تحمد لله انو اداك شريكة حياة ذى دة ؟؟؟؟؟؟؟؟

وهاك النص دة هدية لامانى واولاد امانى ... انت لا

Quote: شكرا - مرغني الماحي مشتاقة لي كل التفاصيل المعاي و الذكريات الماتعة كل الاماسي الكنت فيها بيك صارت فارعة طولنا قامة الحب سوي ما جاي اقول اه يا هوي شكرا لكل القلنا عن باكر سوي شكرا لكل خاطر سقي الحاضر روي شكرا لخط الاستواء الحرر كلامك ساعة يكون زي النسيم لطف مسامك واندلق صدقك عميم شكرا مناجاتك وكت همسك حميم شوفي كيف بيناتنا ازهرت الجروح وشوفيني كيفن يوم نهلتك ابتهلتي صبيني من حُقِك نفوح عابق عطر غيمة ودعاش ختيني فيك جواي نبوح قاصدين زمن وردة وفراش كان نلحق العمر البروح قبال ملاقاة الرشاش ياخيمة في الزمن النزوح ياواضحة في الزمن الطشاش

محمد هنوف..
أقول ليك شنو شكرا علي القصيدة
وبنتلاقي في الزمن الفلاني
وبتقول خالي قال..

راوية أختي..

تعرفي وأنا في لندن والناس بتحتفل بي رأس السنة وبدأ العد التنازلي
قمت قلت أديها تلفون لزوم رمانسية وكده ضربت تلفون يا راوية
والجرس يشيل ويدق رفعت السماعة وبكل حنية (وبي نهرة معاي منو؟)..
(شنو نايمة).. أي والله ملاك

لاحولاااااااااااااا
الماسنجر وقطعوهو ديل اللماهن بسرعة كده شنو ؟؟؟

خالد الحاج

نفس الاحساس

بس بختلف معاك انا معجب بشيرين ابو عاقلة

ولقدام قشة ما تعتر ليك

salam
wallhi ya akhwana ana mosjela men zaman fe al board da wa bajy bagra wa b3yen bs , laken bel jed keda konta mstgraba fe khaled aba al motjed3 fe al bord wa al((( 7aja))) still very cool
a raja intow ag3dow 3aynow wa n7na bnakhtkm 3ly gador 3golkom
ya zol a7med allh 3ndak malk , bs inta gader
wa domtom
noon

نون..
أولآ ألف مرحب بيكي..
والإسم جميل بحق..
تعرفي يا نون في الأول بيجيك إنطباع إني مجدع
لكن صدقيني الحاجة بتعرف تقريبا كل الجنس اللطيف في البورد
وكمان بتتونس معاهم ولما بقت لي في رقبتي والكمبيوتر بقي
في غضب الله سويناهم إتنين وبقي عندنا( نت وورك) أها كل واحد
فينا حاضن كمبيوتر. وبقت لغة مشتركة بينا ونقطة تلاقي..
أما الجنس الخشن فبرضو بتتونس معاهم.. تمبس ، عادل إسحق، عثمان تراث،طارق أبوعبيدة، عزيز خطاب.
وتبدأ يومها بقراية موضوعات سجيمان وبتحب أم الخير جدا وشفقانة عليها من الزول الكلو إضنين
وتقول لي سمح الله الأداني راجل قيافة زيك أسي كان بقيت لي زي سجيمان كنت أسوي شنو

أسعد أبراهيم..
شيرين أبو عاقلة .
أتاريك دفعة..أها نعل ما فيها تش تيش

والله عرفت ليك اماني ، وذكرتني جارتنا وراجلها(عجزوحسي) ممصوخ وبريد البنات -الكلام دا زمان قبال الفضائيات- ولمن تجيهم مرة اقول ليها الرسول عليك يا ست البنات غطيني بتوبك النعاين للمرة السمحة دي وهي تضحك وتغطيه بتوبه وهو يعاين ويبلحط ويضحكوا الاتنين . والغريبة احبو بعض موت .

Nada Amin wrote:

Quote: قايتو انتو الرجال السودانيين ديل عاوزين ليكم أدفانس كورس مش في الجندر لكن في الرومانسية

بالله يا خالد لمن الكورس يبدأ أدينا خبر

علي الحلاوي..

كييييييف ده كلامك
وعيناك ألفة كمان يا زول
إنت قايل خالك هين أنا رومانسي مخضرم

Quote: وذكرتني جارتنا وراجلها(عجزوحسي) ممصوخ وبريد البنات

عشة بت فاطنة..
أسة ده شكرك لي ممصوخ يا بكري يا بكريييييي ألحقني دي شتيمة وقف عشة دي
والله يا عاشة نحن لسة شباب يادوب فتنا الأربعين بي شوية يعني كان قعدت تسوي في شيتا دي
أمنة ما إتلومت فوقها

ندى

انتى فى كلمه حاجه ولا حكايه هو ماشى قدام وهى والاولاد وراء?
عارفه انا لو راجلى عمل لى كده حأعمل شنو؟ اسيبو ماشى واركب تاكسى ارجع البيت
قال حاجه قال

الخال العذيذ خالد

معليش ما دايره احرش ليك المدام, انت تحمد الله انو بقت بارده وماكسرت ليك التلفذون
مرتك ده ماممكن تكون جعليه, ولا شنو يا رجويه؟
لكن عجبتنى بناخدهم على قد عقلهم ده

وبالمناسبه ده احكى ليكم القصه ده, اصلى الليله فتحت للمذاكره عشان عندى بكره امتحان سواقه, دعواتكم معاى

اها فى راجل كل مره يقول لمرتو انا عايذ اتزوج تقول ليهو عليك الله انت البتدورك منو, شوف صلعتك وشناتك ده, غيرى انا المسكينه مافى واحده بتدورك
اها الراجل كل يوم يقول ليها كده وهى ولا هاميها وتقول ليهو عرس كان داير تعرس لكن مافى واحده بتدورك

فى يوم من الايام سافر الرجل بره ورجع وفى ايدو حسناء جميله تبدو من شكلها والحنه ورائحتها انها عروس جديده, الراجل دق الباب واول ما فتحت المرا الباب وشافت الفتاه معاهو الا اطلقت صرخه وقالت ليهو عملتها ياراجل واغمى عليها
الراجل بعد ما شممها بصل وكلونيا واللاذى منو وبعد مافاقت قال ليها ياوليه استهدى بالله, ده مرت صحبى وموصينى اسلمها لذوجها, اهى المره بدت فى الضحك ومن ا اليوم داك بطلت تقول ليهو انت البدورك منو


يلا فى امان الله

لا اله الا الله

تعرف ياخال ..
عندي عمي .. كان لما يجي من البلد .. عندو غرام مع برنامج مشوار المساء
يكون قاعد كويس .. من ما فلانه القصيرونة ديك يجيبوها ..
لا صلاة مغرب
لا بيتكلم مع زول
وتلقاهو يوزع في البسمات .. وانا متابعو ليك..
مرات اجي قاطع قدام التلفزيون واخد لي وقفه .. وحيات خوتك بينزل من السرير عديل كده .. عشان ما يضيع ليهو لقطه
اها بعد ما البرنامج ينتهي يناديني
ياولد
تعال شيل صندوقكم ده

الاغنية دي اماني ماليك اي علاقة بيها

والله بالغت يا علاء..
أسة كل ما أجي أرد علي زول خالتك تنط لي في حلقي
أقيف خلينا نسمع الغنية وتقول شوف بيقول شنو
كريمة يا بنية وملسا وبالنية... نية في عينك
الحاجة بتقول ليك شكرا يا أصيل.يالما بتشبه الراجل المجنون

Quote: الراجل بعد ما شممها بصل وكلونيا واللاذى منو وبعد مافاقت قال ليها ياوليه استهدى بالله, ده مرت صحبى وموصينى اسلمها لذوجها, اهى المره بدت فى الضحك ومن ا اليوم داك بطلت تقول ليهو انت البدورك منو

بت الأحفاد..
أتاريكي مصيبة يا بت أخوي والله ضحكتيني أها نبقي في جنس ده
من الأول ما تنعدلوا.

الاستاذ خالد الحاج

والله انت في نعمة ، حسب مراحل سيجمان في الزواج مرحلة الغيرة دي عندها ملامح كده النسوان بعرفوها براااهم

بمناسبة ايمان بنورة ، الوالد ( ابوي) معجب جدا بمذيعة الجزيرة ليلى الشايب ، كلما نجي نقعد في الاكل والاخبار تكون شغالة يقول والله المذيعة دي ممتازة خلاص وبنفهم منها انه قاصد امتياز السماحة عديل ..

وبعدين والله ابدعت في كلمة ( ياحاجة) دي في اعتقادي قمة الرومانسية

اها نانسي عجرم كيف معاكم .. لووووول

يا خال
كيفك ؟
تعرف
يبدو انها من النوع البيتحاوم جوّه الشوارع الجوّانيه لقلب الحبيب .
و اكيد هي كل ما تاخد ليها مشوار طاعم بي هناك بتلقاها قاعده جوّاك ، عشان كدا مطّامنه و ضاربه الطناش من جنس هضربات الريده الخفيفه اليوماتي دي .
بختك يا خال
والادّاك الرحيق انشالله بس يجدعنا بي لون نفس الورده .
و
سلام حتي مطلع الامر

عاصم الحزين..
عاصم يا عاصم..
دي حالة يا عاصم بتجي بعد دردرة (ومجاهدات) الكلمة دي قاعدة تلبش خالك
لكن بيني وبينك الله يديك بنية سمحة وسمرية تونسك بالزين وإنت بتستاهل كل الخير
ويا عاصم خالك مبسوط يحمد الله.
لكن كدي أديني أضانك .... الخرطوم يا عاصم الخرطوم .. والباقي بتمو ليك
في المسنجر أصلي كايس ليك لي زمن.

العزيزة مايا

Quote: وبعدين والله ابدعت في كلمة ( ياحاجة) دي في اعتقادي قمة الرومانسية

دي محولة لي ندا أمين العزيزة

Quote: بمناسبة ايمان بنورة ، الوالد ( ابوي) معجب جدا بمذيعة الجزيرة ليلى الشايب ، كلما نجي نقعد في الاكل والاخبار تكون شغالة يقول والله المذيعة دي ممتازة خلاص وبنفهم منها انه قاصد امتياز السماحة عديل ..

أبوكي حريف الله يديه الصحة العافية و شنو عزال
سلمي لي عليه وقولي ليه شوف إيمان بنورة يا دفعة دي ممتازة جدا جدأ

شقيقي خالد
والله ما عجبنى ليك
!!!!!!!!!!!!
لاكين اخيتى شاطرة وواثقة من روحها
ويا خالد
فى مسلسل سورى اسمو
يوميات جميل و هناء
جميل ايمن زيدان و هناء نورمان اسعد
جميل روحو مرقت يثير غيرة هناء كيف ؟؟؟
وشاور الاصحاب
والجيران
وهات يا تكتيك و تخطيط
لاكين هناء
صااااااااااااامدة
وبقول لى هناء حقتنا الفى هولندا
عجبتينى و الله
وعجبنى ليك يا خالد

سجمك يا خالد دى اسمها( قنعه)

قنعانة من مواقفك لانها ما بتفوت طرف اللسان البتلغلغ بيه ومسند الكنبة الراقد فيه وعين الله البتعاين بيها.

العزيز خالد..
بالمناسبة اسمك دا علي لساني كل دقيقة بنادي وبلعلع.. وبكورك بيه ..حتي بالليل بهذئ بيه .." دي اديها بخرة للمدام" عشان تدور ليك فرمالة غيرة يحلك منها الحلا بله ..بله دا منو الله اعلم ..اها نواصل ليك مسلسل اسم خالد ..فاسمك يطابق اسم ابني الحبيب ..المشاغب جدا ..والذي ربطني مع كرسي الكمبيوتر دون ان اشعر ..ولم يحلني الا الأستاذ زوجنا الذي يغيييييييييير من البورد وقعدته " الإغماءة" حيث لا تحس بأحد ولا تنطق ببنث شفه حينما تنادي لانك ببساطة لا تسمع شيئاَ !!..ولم ينقذني من هذه الغيرة التي تهدد مستقبلي فيه الا العزيز سجيمان الذي عرفته ببوستاته ومن ديك وعييك " بالله اطبعي لي معاك كتابات سي جي ..او الليلة سي جي ما عنده حاجة" دا كلامه ..ومن ديك ما سألوني تاني شفت الدفعات دي حربية كيف!!

Quote: العزيز خالد.. بالمناسبة اسمك دا علي لساني كل دقيقة بنادي وبلعلع.. وبكورك بيه ..حتي بالليل بهذئ بيه

عوووووك شاهدين يا جماعة

ربنا يخليهو ليكي يابنت النيل..
وبارك الله في سجيمان مهدي الخواطر وجالب البسمة الهنية أحبه والله أنا يا بت العم
أما زحمة الكمبوتر فالكمبيوتر شوفولو ا عروسة ودي المرحلة التانية
تحياتي لزوجك الكريم.

بت الشيخ العزيزة بحق..

Quote: قنعانة من مواقفك لانها ما بتفوت طرف اللسان البتلغلغ بيه ومسند الكنبة الراقد فيه وعين الله البتعاين بيها.

تعرفي يا تماضر ده شكر سمح يعلم الله..
وأسأل الله أن أنو ما أنوم وغل في نفسي تجاه زول
المصريين يا بت العم قالوا (الكفن ما لوش جيوب)..

لكن أسة برضو ما وريتني أسوي شنو مع المصيبة حقتي دي

لنا مهدي العزيزة..
بالله ده كلام في زول يشمت في أخوه
يعقوب.. يا يعقوب أمسك الزولة دي مني أنا ما ناقص

قيل :
التسوى كريت بالعرس...تلقى فى غيرتا

وقيل : المره بحاربوها بى عدم الshopping
وقيل : الصقر كان وقع...كتر البوستات عيب
ايضا : الشعراء يتبعهم الغيم

عاصم كويس ما قابلناك زمان كان غتست حجرنا بالكلام العجيب البتقول فيهو ده، خف علينا شويه ترمومتر القلب وصل فوق خالص
بعدين يا خالد فى زول عاوز يناقش موضوع زى ده ويعنونو للجندريات...فعلا قلة عقل رجال
مافى زول(ه) تجى تقول لى stereotyping ولا sexism و لا عباس اب حنك

خالد الحاج لووووووول يا ود امي عاد ما خاتية عليك اماني بتدور توديني الظبطية ؟!! اها باكر كان حصل تطهروا العتان

أماني ياثقة سلامات
اى (شنبكة انكبة) زيادة رسل لى بجاي لو ماعندكم (كمش)
لووووول بس ياخال لزوم (غرف) العشاء وكدا

الملكي..
قولي آمين يا بت أختي..

يديك راجلآ يدقك صباح وعشية
يحميكي النوم وعشاه كمونية
وتبيتي القوي وتعيشي بس بالنية
يلفتك بالبنية يناديكي هو يا بنية

قال كمشة قال

عشة بت فاطنة..
عتان؟؟ يعلم الله تور عدييل
يا زولة نومي قفا والله نحن ما بنبقي بلاكي
والشكوة مسحوبة..

عصام جبر الله..

Quote: وقيل : المره بحاربوها بى عدم الshopping وقيل : الصقر كان وقع...كتر البوستات عيب

وقيل الفي البر عوام..
والله يا عصام ليك يوم ويعلم الله أنا صاريها ليك
وبجيب معاي ناس المديدة حرقتني طارق أبو عبيدة
وشلة الأنس والملدوغيين في الأرض وبندييك يومين الفرح
وبنبدا معاك مع غسيل العدا وفي الساعة ديك يا جميل
يحلك عباس أب حنك مننا

خالد

إلهام تقرا وتضحك .. ونادتني قرينا الباقي كله سوا..

وقالت ليك قول لأماني أدينا معاك حبة..

ولكم الشكر، وسلامنا لكل من معكم، وسنلتقي قريبا بإذن الله..

ياسر

العزيز ياسر الشريف..
والله يا ياسر جيتكم دي بقينا نحلم بيها
وفضلنا منتظرين الشهر الفات بيجي بكرة وبعد بكرة
دايرنا نبرمج ونتونس أظهروا وليكم الأمان يشيلكم الراس
قبل البيت والله..
سلامي لإلهام والعيال.. وتحيات أماني موصولة

العزيز خالد الحاج،

سلامات

الرجاء تعديل كلمة منهم فى العنوان الى "منهن"!

وتحياتى للاستاذة امانى (برضو قال حاجة قال) وقول ليها واصلى فى تنفيذ المخطط الجهنمى (اكيد هى حاتفهم)!

العزيزة ندا علي..

Quote: وقول ليها واصلى فى تنفيذ المخطط الجهنمى (اكيد هى حاتفهم)!

والله يا ندا كان قاصدة جهنمي دي نسبة لي (جهنم) نومي قفا زولتك ما محتاجة يوصوها

أما العنوان فما بيتعدل للأسف لكن بننتبه في الجايات
نحن نهرب من جندرية نقع في يدك الشكية لله.

الاخ خالد
تحياتي واحتراماتي
اقول وما فينا من زعل انت قلت داير الشوره
هي طبعاً عايشتك وعرفتك وثقة دي نابعه من
انه مافي مراه بتتحملك وبتقبل بيك غيره
عشان كده خاته في بطنها بطيخه صيفي فعلق
وعلق عمرك كله علق واهو المقلب حصل عليها
فما هاميها دايراها تجي منك وهي قاعده علي
الهبشه فنصيحه اقبض قبيضك واحمد سيدك

الأخت مها..
سلامات وإحترامات..
حامدو سيدي يعلم الله.
لكن المشورة عندك..
أما حكاية المقلب دي وراجيها تجي مني والله جديدة
إنتي كدي نسألك ليه بترجوها تجي مننا نحنا؟؟

الاخ خالد الحاج
تحياتي واحتراماتي
كدي النسالك انتوا لي خليتوا بنات
الدنيا دي كلها واخترتونا؟

خالد الحاج وأماني الحاجة سلاااااااااااام
أنا برضو عندي أماني لكن أمانيني مابتغير لما أتمتع به أنا من شنا عشان كدا أحب على كيفي إيمان بنورة وريما صالحة ومنتهى الرمحي

عليكم الله ياناس القطرو صفر منو الله يكون في عونك ياجكس

نقابي عجووووووز..
يا زول إنت بالذات سيرة القطر دي ما تجيبها
يعلم الله قطرك (بتاع الفحم الحجري) صفر زماااااااااان

بدر السمح..
سلام..
عندي ليك إقتراح يا بدر..
رايك شنو نجتمع أنا وإنت وعثمان تراث
ونكون جمعية نسميها جمعية النضال ضد (الأماني) السندسية
ونغني سوا ..مهما فيك أنا طولت صابر يا سنين عمري الشقية

الأخ خالد الحاج ،

تحيه طيبه،

Quote: زوجتنا المصون لا تعرف الغيرة وطبعا الموضوع في صورته العادية جميل منو الما بيتمني زوجة ما غيورة؟؟ بس ما للدرجة دي!! أنا عندي حالة متأخرة والواجعني في الموضوع بجيني إحساس بأنها ترسل لي رسالة (يا عجوز إنت قطرك صفر)..

أرجو أن تشكر زوجتك عنى لأنها تعاملت معك بمنتهى الصراحه و الصدق. لذا يا عزيزى و لأنك طلبت النصح، لا أدرى أنته زعلان ليية فكلامها موضوعى وواضح .

أما مسألة (الممسلات) فهى من أعراض (المراهقة) الثانيه، فلاتخاف أو ترتبك يا أخى ، و أنصحك فى هذا الوقت بالتركيز على الأهتمام بأكمال أوراق الضمان الأجتماعى، و طبعا الضمان الصحى و مراجعة الطبيب بصوره أكثر أنتظاما، و ياريت حبه أسبريمن يوميا مع كل حبوبك الصباحيه، هذا طبعا ان لم تكن لديك قرحه.

كما ارجوا الأهتمام ب...و لا كفاك لغايه هنا، أنته فاكر النصائح دى مجانا.

لك و لزوجتك الود.

الأخت العزيزة روضة..

Quote: أنصحك فى هذا الوقت بالتركيز على الأهتمام بأكمال أوراق الضمان الأجتماعى، و طبعا الضمان الصحى و مراجعة الطبيب بصوره أكثر أنتظاما، و ياريت حبه أسبريمن يوميا مع كل حبوبك الصباحيه، هذا طبعا ان لم تكن لديك قرحه.

لكن يا روضة ما قضيتي علي بالضربة القاضية
والله أخوكي شديد ولضيض لا ضغط لا سكري ولا قرحة أمسكي الخشب
قال حبوبك الصباحية قال والله بالغتي

Quote: طارق أخوي بعد خمستاشر يوم من عرسو بقي يغسل العدة.

اسة الكاشف دة في زول سألك منو

Quote: اسة الكاشف دة في زول سألك منو

خدر أخوي ..يعلم الله شفقان عليك من المشاوير
وغسيل العدة..وإتلومت أنا يا خدر كايس ليك الحلول
وتاري ليك.

قلت لي ياخـال (كبع) صباح وعشيي
ماكفاية علينا الفيهو اسع دا

قال كمونية قال قال
احلى البيتزا ولا الكمونية ؟

Quote: ربنا يخليهو ليكي يا بت يا نيل

اركز ياخال اركز
وإتعلم من الحكم الفوق دي
يامانـي حاجزة ليك جنبي هنا تعالى قوااام

اتشلت انا ياخال
صاراها ليك ..
وانت ماشفت (إستراتيجيات) الدفاع الجنبك دي كيف ؟
ولا ماسمعت بالبحر البكو في صرتو ؟؟

Quote: وانت ماشفت (إستراتيجيات) الدفاع الجنبك دي كيف ؟ ولا ماسمعت بالبحر البكو في صرتو ؟؟

الملكي...
شقي البيقع في يدك
قلتي لي الكي في الصرة لا حولة ولا قوة إلا بالله
يا زولة إنتي شنو؟؟ جولدمائير
أما حكاية يا بت يا نيل دي ما تمسكيها لي خالك
إنتي أقعدي بحتي كده لامن تلدغي يعني الواحد ما يغلط
وبعدين خالك كبر وده علي قول أختنا روضا خرّف
النمش نبلع الحبة

السبت بكرة انا و الاولاد معاكم بي هناك شيل شيلتك

ايوااااا يا خال

عامل فيها ايمن زيدان فى هناء وجميل

ما شفت البقت عليه شنو فى الاخر

اخير لييييييييييييك

ويا امانى زى ما قالت ليك الملكة

مكانك محجووووز بس تعالى جاى طوالى

خدر..
(أنا في إنتظارك يا طارق علي نااااااري) ترم ترم تررررررم

دريمس ..

والله المسلسلة دي ما شفتها
لكن أهو الحاجة جاياكم في الأجازة
أخدوا ليكم كورس مجاني..

الشاب خالد والله امبارح حلمته ليك حلمه الله يستر

الجماعة ديل كلهم ضدك .. ويدوك في الكلام الحار.. والله يا (عمو) خالد ما ليهم حق....

انا رأيي تتخذ موقف .. وتزعل... وتكشف الوجه الجعلي.. وتقول "العندي حل يقول، الماعنده (قشه ما تعتر ليك)"... يا أسعد.. عجبتني العبارة، اتبنيتها خلاص...


بنت الحسين

بت الحسين شكرا يا زوق

ويا خالد جيتك تاني

تصدق ما خايف عليك من الحاجة

لكن خايف عليك بالجد من "عمنا" بشاشا حين يعلم اعجابك بهذه "العربية"

وغايتو ربك يستر وما يشوف البوست وكان شافو ما يدخل يقراهو

تعرف امس كنا بسمع في الاخبار بالجزيرة وكانت ايمان بالنورة متألقة كالعادة

" الحاجة" بتاعتي قالت لي امشي قول لصاحبك ايمان في التلفزيون

بقلبي قلت ليها "صاحبي" ولا عاوزة توزعيني من التلفزيون

وبعدين تعرف البتعمل فيهو دة انت " العديل ود أدم"

وتاني قشة ما تعتر ليك