باسم البنيات الببارن ضي عفافن.....

باسم البنيات الببارن ضي عفافن
في زمان الوجعة والخوف
يكتب النيل عرضحالك للشمس
شان تصطفيك
آهة من
غبن الوليدات المطاريد
في المطارات
البتسرق من عيونن
سمرة الضحكة
وتهد خيل الهروب
من لهفة بيك
دمعة من
عرق الغلابا الراحلة
مابين المقابر والرغيف
حزمة تعب
مشرورة فوق قلبا بريدك ومشتهيك
غصة رحيل ضي النجيمات
من مدارك
ليلة العيد الّنست
من حرقة الاحزان
ملامح ضحكة الفقرا
ورحيل الضحكة ليك
قطرة من
كبة دموع عاشقك
وكت بهق الحديث برقع
بياض روعة اصالتك
وانكتم صوت المغنين
من وجع حرن الغنا
الكتبوهو فيك
واخوفنا من
وجع الجفاف الفي شوارعك
هم
اذا ماطال غياب الغيمة
من نبض الفصول
الجاية من الغيب عليك

عبد الله جعفر

يا أستاذ خالد
بالله لو بتعرف درب عبد الله جعفر دا .. بلغو التحيات النواضر ..
وقول ليه .. غيابك طال
ونحن في اشتياق لي شوفتك

تحية لك يا أبا الوليد .. شايل مفتاح مخزن الابداع وحايم

أهل العوض الزول الجميل..
توصل تحاياك ..وعبد الله محزون محزون ..محزون..

باشمهندس

(حزمة تعب
مشرورة فوق قلبا بريدك ومشتهيك
غصة رحيل ضي النجيمات
من مدارك )

بالله شوف النضم دة يا خالد ...
الله يديك و يديهو ألف عافية

أبو حهينة العزيز..
ويديك العافية..
نحن يا أباجهينة بلا جنس الكلام ده المصبرنا شنو علي وجع المصارين؟؟
الزول نديان حنية وبهجة وإبداااااع...يديهو العافية..
ويديك ألف عافية..

بالله يا خالد الحاج

عبد الله جعفر ده مش جنا علينا

مش حرام زول زى ده، يضيع مننا فى غفلة من روح المحبة

والسلام عليه يوم يغيب، ويوم يعود، والسلام عليه وهو ساكن جوانا

ولسه عندنا أمل

أبوذر..
كيف يضيع مننا؟؟ وكيف نسيب صناع الفرح يهجوا؟؟
نشتاق ليهو "شوق الأرض لبل الريق...شوق الزعلان للنسمة لما الصدر يضيق"
والزول داخرنو لي الليلة وبكرة.
وتسلم يا مطر الخير..

بوست احرار ... التحية لعبد الله جعفر علي كلماته وعليهو هو نفسه
ولاهل العوض وابو جهينة والمطر وفي البداية والنهاية لخالد الحاج
علي البوست وعلي زواره وعلي انا زاتي

أساسي العزيز...
وليك ألف سلام وتحية..
وعارفك ما بتقدر تقاوم الجمال..

خالد
أخذت نفسا عميقا من هذا العطر ،، فلناثره أطيب تحية ،،
والتحية لك ولأهل العوض ، وأبي جهينة والمطر وأنا وبس ..

ود قاسم الحبيب..
والتحية لكل زول هبشو الحنين..
التحية لي كل زول وجعو الحرف..
وليك إنت "بس" كل الطيوب

خالد الحاج...
كلام اكثر من رائع، لا استطيع ان اقول اكثر مما قلت...

تسلمي يا ميادة..
وهل هنالك ما هو أكثر من الروعة؟؟
يديكي العافية.

التحية لكم
اخي خالد
والتحية لى اخوانا
عبدالله حعفر الذى
طال غيابه

خالد الغالي...




يااااه من الجمال..

لك مليون تحية.. ولعبدالله المثل..

عرفت ان روحه الجميلة تعافي ما يظهر هنا من قبح.. ولكن ارجو ان تصل اليه كلماتي هذه:

لا يُحارب القبح إلا بمزيد من الجمال..

المهندس..
شنو كايسك والله أنا يا عثمان..
أبقي مارق..وتشكر للطلة..


رجاء..
15 يوم يا مفترية..ما تقولي لي الكمبيوتر عطلان
عندي أخبار مفرحة..

الاخ/ خالد

Quote: واخوفنا من وجع الجفاف الفي شوارعك هم

كلام صعب الحيل والتحيه للمبدع عبداللع جعفر وليك يا باشمهندس
تحياتى

الاخ الاستاذ خالد..
القصيدة حلوة..شكرأ لك.
وانت وين غيبت كده؟

بلدي يا حبوب..
ألف شكر ليك..يا زول يا جميل.


الصادق..
وينك إنت يا أخي مسجل غياب
والله ليك وحشة..ما تقطع أخبارك كده يا أخي..
تحياتنا للأسرة..

الأخ العزيز خالد
شكرا لك يا جالب الجمال!
أشعار الأستاذ عبد الله جعفر لها موسيقي خاصة جدا!
لك وله ولكل زوار البوست التحيات العطرة
إيمان

جميل يا خالد الحاج
أنت و إختيارك و شاعرك و كلامه
حاجة سمممممحة كلو كلو
قاعدة في الصفحة التانية تسوي شنو؟؟

يا خالد

ياخي انا الكلام المدهش...بتعبني تعب شديد....بوستك دا من عنوانو عرفتو وقدر ما اتدرقت منو لقيتو يفازعني في المنام....

البنيات الببارن ضي عفافن....البنيات الببارن ضي عفافن....ويا سارية الجبل...ليلي كلو ينوس بي عنوان بوستك...هسي قريتو وغرقت...

زي غرق الدراويش... وخايف من الشرقة....عبدالله جعفر دا مش تبلغو تحياتنا واشواقنا.....غايتو علي كيفك تبلغوا شنو....

وشكرن ليك ما بتكفي يا خالد....شكرن بالنون ما بالتنوين....بس كدس دا...عشان عبدالله جعفر....

يا خالد القصيدة حلوة