Post: #1
Title: يمة نستني ،، يا يوم الأمهات
Author: أبو ساندرا
Date: 03-21-2011, 06:56 AM
قطعت المسافة من المطار إلى البيت في لحظات ، شوقآ لها ..
وطويت المسافات طي ،،
دفرت الباب وماعارف أي بعض مني ولج اول ، اقدامي ، عيوني ، أم قلبي
|
Post: #2
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 07:00 AM
Parent: #1
تنويه
------
ما أظن تحيتي لها هذه سوف تؤثر سلبآ على الحشود و المواكب
التي سوف التحق بها لاحقآ
فالحين امي ، يويا ،، وبعدين مواكب
|
Post: #3
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 07:05 AM
Parent: #2
تلك الطويلة الوسيمة البيضاء ام شعر طوال وعيون داعجة وكفل
وشلوخ مطارق تزين خدها وعسل
يسيل من روحها وتعبر عنه ضحكتها المميزة
وجدتها وشعرها الليل الطويل تحول إلى بياض ثلجي
والذي كان يرج الكون يادوبك يقعدها كما تشتهي
كانت تنقض شعرها وتعيد تسريحتو ،، وقفت متأملآ ومتعبدآ
|
Post: #4
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 07:19 AM
Parent: #3
يمة ، ناديتها ،،
مالت بجذعها ناحية الصوت وقالت بصوتها ذلك الفخيم : إت منو ؟ حرامي ؟
لا يمة انا عبدالرحمن ، ازرق ( كانت تنادي با زرق حتى لاتضطر لنطق اسم نسيبها زوج شقيقتي عبدالرحمن)
ولما رأيتها تجوس في ذاكرتها تبحث عن خيط يوصلها ويريحني ،،
طفقت اقدم الدلالات : ولدك يمة ،، ابو البنات ،، ابو التومات ..
بصوت خافت وكأنها خجلة استحت من نسيانها ،، قالت : والله ماعرفتك لكن تعال لي اسالمك ....
حضنتها وبكيت .
|
Post: #5
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 08:32 AM
Parent: #4
ومن بين النهنهات والدموع ، انتشلتني بسؤالها الذي فتح كوة امل في روحي :
انت جيت متين ؟
|
Post: #6
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 08:43 AM
Parent: #5
بسؤالها الذي فتح كوة امل في روحي
انت جيت متين ؟
فرحت وفي سري قلت الحاجة دي أبدآ ما بتترك استهبالها ،، هسع ما كانت عاملة رايحة ،،
قلت متعجلآ وبإختصار كأني أريد الإمساك بتك اللحظة ،،جيت هسع من المطار ،، هدومي ماغيرتها ،،
واولادك خليتهم كيف ؟
اولادك !؟ الحاجة دي عارفاني مابتاع اولاد ، بقت تعمل حركات الكيزان
وتشمل الأسرة كلها بمافيهم العروس ذاتها ب : اولادك ..
قلت بناتي وامهن كويسات وبيسلمن عليك
|
Post: #7
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 09:00 AM
Parent: #6
الله يسلمن ،،،
اها وما لاقيت عبدالرحمن ولدي ؟
|
Post: #9
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 09:08 AM
Parent: #7
سؤالها رجعني للوجع الذي لم يغادرني أصلآ
تلفت وجدت الذين كانوا معي ، إنشغلوا بحالهم
وكأنهم يعرفوا حالتها
لم اجد بقربي من يسندني وافك فيه حاءات حيرتي و وجعي
فجأءة نادت:
يا بدرية يا مجيد ،،
خفوا لها طلبت منهم طلبات ومارست دلعها المعهود ،،
بالمناسبة مجيد وبدرية اشقائي وقاعدين معاها في البيت ..
الله امي دي حقارة واللا شنو ؟
ماهو عارفة وبتنادي كمان وبالأمارة مرة دلعت بدرية ب : يا بدور ومرة دلعت مجيد ب : يا عنتر ...
طيب مجلياني انا ليه ؟ انا ود الشغالة وما عارف؟
|
Post: #8
Title: Re: يمة نستني ،، يا يوم الأمهات
Author: عاطف عمر
Date: 03-21-2011, 09:05 AM
Parent: #1
أستحلفك بكل غال وعزيز
لا تتوقف عن الحكي يا بركوتة
فما أعذب طعم الدموع حين تقترن بسبب الوجود
وما أحلى ضعفنا حين نبذله بكبرياء بين يدي حبنا الأكبر
______________________
حكي طاعم وشائق وصادق
|
Post: #10
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 09:17 AM
Parent: #8
عاطف عمر :
| Quote: حكي طاعم وشائق وصادق |
والله الذي لا إله إلا هو
كنت عارفك ح تجيي
بل كنت عارفك ح تجيي الأول
ح اواصل يا صديقي العزيز
فطلبك أمر
كما انا ذاتي عندي رغبة اواصل عشان عارف ان انعتاقي من اسر ذلك الحزن الضاري
ما ح يتحقق إلا بالكتابة والدخول في عمق الجرح
بس انت قوس لي جزعك كي اشد عليه وتر حزني وانوح
ف
Quote: فما أعذب طعم الدموع حين تقترن بسبب الوجود
وما أحلى ضعفنا حين نبذله بكبرياء بين يدي حبنا الأكبر |
|
Post: #11
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 09:23 AM
Parent: #10
بيني وبين نفسي
وهسع بيني وبينكم
كنت بفتش لي على سبب اداري به زعلتي وتقصيري وحزني ،،
في سري ثم في العلن جهرآ قلت : دين الغربة ودين الكان السبب ، ودين الدقن الشيطانية ...
كان واضح انها حفظت مجيد وبدرية لأنهم لم يغادروها وتسربت انا من بين تشققات ذاكرتها ،،
و كما إتنين مابيتلقن للنعامة ، الخفة والطيران أو الجري والطيران ،،
كمان انا ماممكن اتغرب بالسنين وعايز اكون حاضرآ في ذاكرتها
|
Post: #12
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 09:30 AM
Parent: #11
وبينا انا في تلك الحالة مر شيقي محمد احمد ( ازهري )
سألتها ممتحنآ ذاكرتها : ده ماناديتي معاهم ليه ؟
وأردفت بسؤال أخر : ده منو يمة ؟
قالت : شن خبرني بيهو ما بعرفو ، بيكون من جنون الحلة المطلوقين ديل .
تبسمت بخبث فضحك أزهري بصدق
وقال : بطل حركات ياود بركات ،،،
و واصلت معابثتي معه كمخرج مؤقت من الحالة التي اعترتني وكتمتها ،، انت برضك جلوك ؟
اتنين مابتلقن يا زعيم ،،
ابوالزهور كان عائد من اغتراب طال و استطال في السعودية
|
Post: #13
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 09:41 AM
Parent: #12
أزهري ابوالنقاش فهم حالتي فتصرف بكرم غير معهود فيه فيما غبر من ايام قبل ان يتسعود ،،
وقال : اهم حاجة يا عبد انها بتتذكرنا كلنا لمن تقوم للدعاء قبل الفجر كعادتها القديمة ،،
لكنها بتشمل في الدعاء منعم وحسن وسعاد وكأنهم لم يرحلوا ،،
واكتر حاجة بتدعي ليك انت يا عبد ،، طوالي يا رب أحفظ البنات وابوهن أو أحفظ ابوالبنات وبناتو
|
Post: #14
Title: Re: يمة نستني ،، يا يوم الأمهات
Author: أبو ساندرا
Date: 03-21-2011, 10:48 AM
Parent: #13
لمن بدرية لاحظتني متكهرب وعيوني طالعة من محاجرها
وتخرج مني حاجة كده بت عم التمتمة والهمهمة : بالجد يا زعيم ؟
اكدت بدرية وقالت :
سبحان الله ،، على المصلاية يعود لها جزء كبير من ذاكرتها ،،
والذكريات البعيدة حاضرة في عقلها ،، ومرات بتتذكر التومات ،،
في سري قلت : والله امي دي ست الدقق وبتاعت حركات ،، هسع التومات ديل في زول بيتذكرهن؟
|
Post: #15
Title: Re: يمة نستني ،، يا يوم الأمهات
Author: امير طمبل
Date: 03-21-2011, 11:21 AM
Parent: #14
أحن إلى خبز أمي وقهوة أمي ولمسة أمي
وتكبر فيّ الطفولة يوماً بعد يومي
وأعشق عمري لأني اذا مت أخجل من دمع أمي
عزيزنا
أبو ساندرا
( والله امي دي ست الدقق وبتاعت حركات )
التحية لكل أمهاتنا في كل بقاع الدنيا
تحية من القلب الي أمي (نورة) البيضاء أم شلوخ مطارق السمحة في اي شي
ذهبت لها في شهر فبراير قالدتها و نسيت كل الحولها بما فيهم بناتي سماح و سماهر و سارة وحتي الكتكوت محمد وقعت بيها في سريرها المتين ارتميت في حضنها
بوسات كمية في جبينها ساعدتني طرحتها في تجفيف دموعنا ...وهي تردد أمير أمير امير
بركة الجيتني طيب و سالم بركة الشفتك عافية منك عافية منك عافية منك وراضية عليك
يا جناي ...لحظات تكررت معاي لسنوات طوال و بنفس طريقتك و في سري ملعون ابوالغربة
****
تربطني بالست الوالدة علاقة طيبة جدا دون بقية الاخوان يمكن لاني الحتالة
تتكلم معي دون قيود و بدون اي تردد خلاف صفوت شقيقي الذي يعيش معها اكثر مني
يحسدني لحبها الشديد لي و احسده لوجودها الدائم معها.
الكلام عنها يطول و يطول ربنا يطول في عمرها يا رب
عموما اكيد للحديث بقية ...
المعايش جبارة
صديقي و ابني (مصطفي)أنيسي في غربتي
مواعيد عودته من المدرسة اوشكت
ساعود لك صديقي (بركوتا)
كن بخير
|
Post: #16
Title: Re: يمة نستني ،، يا يوم الأمهات
Author: lana mahdi
Date: 03-21-2011, 11:37 AM
Parent: #14
الله يسامحك يا أبو ساندرا
بكيتني يا حبيب
أكتر شيء بيخوفني أن يهرم أمي وأبوي
واكتر شيء بيخوفني أن يصاب أحد ممن أحبهم بسوء
لا أتخيل الحياة وقتها حتكون كيف...
الله يلعن الغربة الكربة
الله يلعنها مليون مرة
كان الزمن زين كنتا في حضن الحجة ما فارقتها سنّة
الله يلعن الغربة
ربنا يطول عمرها يا رب العالمين
|
Post: #17
Title: Re: يمة نستني ،، يا يوم الأمهات
Author: Sharif Nasirladeen
Date: 03-21-2011, 12:28 PM
Parent: #16
يا سلام يا أبوساندرا على هذا السرد الجميل
واصل و كلنا مستمتعين
|
Post: #18
Title: Re: يمة نستني ،، يا يوم الأمهات
Author: عاطف عمر
Date: 03-21-2011, 05:12 PM
Parent: #1
أمي الله يسلمك
|
Post: #19
Title: Re: يمة نستني ،، يا يوم الأمهات
Author: أبو ساندرا
Date: 03-22-2011, 07:48 AM
Parent: #18
أمير طمبل :
| Quote: تربطني بالست الوالدة علاقة طيبة جدا دون بقية الاخوان يمكن لاني الحتالة |
أتاريك ،، يا صاحبي ؟
وانا من زمان بقول صاحبي ده كده مالو
عارف ، الحاتلين ديل مظلومين جدآ بسبب انهم بيحظوا بخلاصة المحبة
والأمهات بيفكن فيهم أخرهن من محبة وحنية مما يستقطب إنفعالات البكور
لمن اشوفك بتدلع في ام مصطفى ، ام البنات الوسيمات ، كنت بهمس في نفسي
وبقول : الولد ده لازم حتالة ومتعود على كده من امو وعايز يفكها في مرتو
ومن حقك يا صاحب ف مرات الزوجة بتصير ام وأخت ومرات بتصير بنت ومرات بتبالغ
وبتكون حفيدة ذاتو ،، وبعرف واحد صاحبي موبؤ كان بحول مرتو إلى جكس ويقول
ليها : أمشي أقيفي جمب إجزخانة الغالي على ناحية دي باريس
ويمشي يخطفها ،، قال امتع لحظاتو معاها لمن يكون عامل ليها بالنسبة ل ( عبيد ختف )
فلتنهنأ يا صديقي بخلاصة المحبة ،، ولخالتنا نورة النوارة كل الحب وخالص الدعاء
بدوام الصحة وتمام السعادة
وإن عدتم ، عدنا يالحبيب
|
Post: #20
Title: Re: يمة نستني ،، يا يوم الأمهات
Author: عاطف عمر
Date: 03-23-2011, 07:53 AM
Parent: #19
يديكي لى طول العمر
في الدنيا يوم ما يألمك
أمي الله يسلمك
|
Post: #21
Title: Re: يمة نستني ،، يا يوم الأمهات
Author: امير طمبل
Date: 03-23-2011, 10:45 AM
Parent: #20
Quote: وبعرف واحد صاحبي موبؤ كان بحول مرتو إلى جكس ويقول
ليها : أمشي أقيفي جمب إجزخانة الغالي على ناحية دي باريس
ويمشي يخطفها ،، قال امتع لحظاتو معاها لمن يكون عامل ليها بالنسبة ل ( عبيد ختف )[/B] |
ههههههههههههه
مووووووبالغة لكن
خلينا نعرج شوية يا بركوتا من مسار البوست
عندي قريبي شديد يحب النساء لدرجة يصعب علي وصفها في كلمات
لانني مهما حاولت ان اوصف ليك بجميع مفردات اللغة العربية متأكد
جدا انني سيحالفني الفشل .الشاهد علي الامر بانه قام بفتح بوتيك
خاص فقط بالملابس النسائية حتي يكون قريب منهن.
بالرغم من أوضاعه المالية الممتازة جدا الا ان الزول تاخر في اكمال نصف دينه
بعد الحاح شديد من الست والدته الله يطول في عمرها قرر قريبنا ان يدخل القفص
الذهبي ..تمت مراسم الزواج بكل تفاصيلها من حنة و قيدومات و صبحيات الخ
أقترحت له ان يستأجر في الحي الهادي (المغتربين)في بحري الجميلة.
زولنا اخذ عروسته الجميلة و ذهب بها الي الشقة الفخمة الما خمج ديك
صاحبنا قضي يوما جميلا مع المدام ....
القصة الجميلة في الموضوع الزول نسي تماما بانه اصبح زوج بعد كل هذه السنين
زولنا الله يسلمك اخد ليهو (دش) دافي جدا مع برودة الجو في شهر ديسمبر صاحبنا
طلع الجزلان العامر بالورق فئة الخمسين الف طلع ليهو خمسة ستة ورقات نظام
(الغمتة) وكده صاحبنا طوالي مشي علي الباب سالته العروسة وين ماشي صاحبنا
قام أتذكر انو اصبح راجل مره وعاد الي مكانه راجعا
تقول لي برضو (عبيد ختف)
لما حكي لي قصتو دي قلت ليهو وحات ربي دي ما لاقتني في روتانا سينما
ولي عودة مرة اخري حول موضوع (الحتالة)
تحياتي
طمبلاوي
|
Post: #22
Title: Re: يمة نستني ،، يا يوم الأمهات
Author: أبو ساندرا
Date: 03-29-2011, 08:17 AM
Parent: #21
الأميرة / لنا مهدي :
| Quote: ربنا يطول عمرها يا رب العالمين |
دموعك غالية يا لنا ،، واحساسك نبيل
رغبتنا الدائمة ان نرى احبابنا الأعزاء وبالأخص الوالدين والابناء
في اتم صحة واكمل عافية واحسن حال
ودوام الحال من المحال
مع حرقتي وحزني ، تمكنت بفضل نصائح وملاحظات من اعزاء في الفيسبوك
ان ارى الجانب الأخر من الحالة وان انظر إلى نصف الكوب المليان
فامي بحالة خرفها نسيت كثير من تفاصيلي انا تحديدآ بسبب طول الغياب
ولكنها متواصلة مع أخوتي الذين معها في البيت
كما انها يقظة في حالة الدعاء في صلاة الفجر
والغريب انها بتصلي الفجر فقط ، ومجلية باقي الصلوات
ودعائها المنتظم ، يشملني ، و الغريب جدآ ، انه مركز علي انا بالذات
وقد يكون السبب خوفها علي لماتعرضت له بعد إنقلاب الكيزان
يطول عمرها وعمرك يا لنا وعمر اعزائنا الاحباب
والرفاق
|
Post: #23
Title: Re: يمة نستني ،، يا يوم الأمهات
Author: dardiri satti
Date: 03-29-2011, 01:57 PM
Parent: #22
Quote:
دين الغربة ودين الكان السبب ، ودين الدقن الشيطانية ... |
أبو ساندرا
تحياتي
|
Post: #24
Title: Re: يمة نستني ،، يا يوم الأمهات
Author: dardiri satti
Date: 03-29-2011, 01:57 PM
Parent: #22
Quote:
دين الغربة ودين الكان السبب ، ودين الدقن الشيطانية ... |
أبو ساندرا
تحياتي
|
Post: #25
Title: Re: يمة نستني ،، يا يوم الأمهات
Author: أبو ساندرا
Date: 03-31-2011, 09:42 AM
Parent: #24
شارف ابو نصر:
Quote: يا سلام يا أبوساندرا على هذا السرد الجميل
واصل و كلنا مستمتعين |
شكرآ يا صديقي
كان نفسي اواصل ، إلا طارئي شغلني
أكرر شكري وإعتزازي
خاصة وإنك من قلائل لا يكون في فهم ماء
عندما يكون الكلام ، شهادة و موقف
|
Post: #26
Title: Re: يمة نستني ،، يا يوم الأمهات
Author: أبو ساندرا
Date: 03-31-2011, 09:46 AM
Parent: #25
درديري ساتي
أهلآ بك صديقي ،، الدوحة نورت
وعليك الله اعفي لي ، انا اليومين ديل يشغلني طاريئ مستوعب كل وقتي وتركيزي
حتمآ ح نلتقي
|
|