Post: #1
Title: البشير قال: نقلا عن العربيه ...حار من نارو
Author: محمد مصطفي مجذوب
Date: 03-09-2011, 03:52 PM
قبال كام ثانيه كدي قالت مذيعة العربيه
انو البشير قال لطنطاوي في مصر ( ان هناك مخطط صهيوني لتقسيم السودان لخمسه دويلات ومصر لثلاث كيانات)
عشان انا ما قادر اعرف الفرق شنو بين الكيانات والدويلات ..داير لي واحد بتاع علوم سياسه يوزن لي الحكايه ده
واسرائيل هي دحين ما ياها اسرائيل القامت جاريه لي واشنطن عشان تخارج خسني مبارك واولادو ...بتين قعدت تخطط لي كيانات مصر ده ؟ من زمان .. يعني خبر بايت ..واللا معلومات جديده لنج جابوها اولاد العطا
وياربي دحين ميدان التحرير ده واحد من الكيانات دي واللا كيف
كمان انا ما فاهم اكان البشير قاصد انو اسرائيل دايره تقسم السودان لي خمسه دول ... فيهم بالجنوب ... واللا خمسه تانيات؟
نان من زمان كنا بنبح ونقول في شنو؟
|
Post: #2
Title: Re: البشير قال: نقلا عن العربيه ...حار من نارو
Author: محمد مصطفي مجذوب
Date: 03-09-2011, 04:07 PM
Parent: #1
يا مسلمين
مافيكم فهامات سياسيه تورينا الحاصل شنو؟
|
Post: #3
Title: Re: البشير قال: نقلا عن العربيه ...حار من نارو
Author: Alshafea Ibrahim
Date: 03-09-2011, 04:22 PM
Parent: #2
سلام يا بروف
والله أنا شخصيا ما قادر استوعب زيارة الزول ده من أصلو ..لمصر
بلد هايصة ، وكل يوم مسيرات ومظاهرات ، بل وصبحية وجوده حدثت فتنة بين الأقباط والمسلمين مات فيها من مات وجرح من جرح ..
رئيس عسكري (مكلف) لكم شهر ، وما عندو ومجلسه ساعة فضاء عشان يستقبل زولنا ده ، وكمان لغاية هسع القصر الرئاسي ما تنظف من آثار مبارك ، وناس المراسم ربما يكون لم يتم تعينهم ... ورئيس الوزراء الجديد الأخير ما أعتقد تكون في اولياته لقاء البشير أو غيرو ... وما اظن في شارع فاضي يمشي فيهو الزول ده بسهولة ...
ناس بترتب في وضع جديد لشعب جديد - وكمان مع الزيارة والعجلة والشفقة فيها تصريح وتهديد من اسرائيل ؟ طيب يا شاطر ما انت وحكومتك وافقتم طوعا على تقسيم السودان ، لما التباكي؟ حلال لأقليم وحرام لآخر ؟ هل وقعت مصر معكم اتفاقية تقسيم السودان؟
فعلا سياسة طرشان اقصد كيزان
مودتي
الشفيع ابراهيم
|
Post: #5
Title: Re: البشير قال: نقلا عن العربيه ...حار من نارو
Author: محمد مصطفي مجذوب
Date: 03-09-2011, 08:50 PM
Parent: #4
Quote: سلام يا بروف
والله أنا شخصيا ما قادر استوعب زيارة الزول ده من أصلو ..لمصر
بلد هايصة ، وكل يوم مسيرات ومظاهرات ، بل وصبحية وجوده حدثت فتنة بين الأقباط والمسلمين مات فيها من مات وجرح من جرح ..
رئيس عسكري (مكلف) لكم شهر ، وما عندو ومجلسه ساعة فضاء عشان يستقبل زولنا ده ، وكمان لغاية هسع القصر الرئاسي ما تنظف من آثار مبارك ، وناس المراسم ربما يكون لم يتم تعينهم ... ورئيس الوزراء الجديد الأخير ما أعتقد تكون في اولياته لقاء البشير أو غيرو ... وما اظن في شارع فاضي يمشي فيهو الزول ده بسهولة ...
ناس بترتب في وضع جديد لشعب جديد - وكمان مع الزيارة والعجلة والشفقة فيها تصريح وتهديد من اسرائيل ؟ طيب يا شاطر ما انت وحكومتك وافقتم طوعا على تقسيم السودان ، لما التباكي؟ حلال لأقليم وحرام لآخر ؟ هل وقعت مصر معكم اتفاقية تقسيم السودان؟
فعلا سياسة طرشان اقصد كيزان
مودتي |
استاذ الشفيع
ليك وحشه والله
تسلم وتسلم ايامك
عارف انا لمن سمعت الخبر اول مره
قلت رئيسنا ماشي يعزي في الشهداء ...
ويمكن بالمره كدي ماشي يشوف اهل ولدنا السوداني الدهستو عربيه الامريكان الله يرحمو رحمه واسعه ويغفر ليهو ويصبر اهلو واخوانه .. يجيب لي اولادو حقهم .. بس يا زول ما سمعناهو قال شي .. قلت لا ما مكن . سفيرنا في القاهره زولا مجامل من مستشفي لي مستشفي و من بيت بكا لي بيت بكا ما بكون قصر واللا فايدة السفاره شنو؟
قلت يا زول .. زولك سمع عمرو موسي قال .. داير يتخارج من الجامعه العربيه .. قام رئيسنا ساق معاهو كرتي عشان يتوسط ليهو ...
بس لقيت حكاية الجامعة العربيه ما لافقه مع كرتي .. وانا ظني انو كرتي طموح وبكون قافل علي الامم المتحده ذاتا... الجامعه العربيه شفع الدول العربيه ديل كل يوم واحدين ناطين بي فيس بوك وبي تويتر وهاك يا نبيح لامن يقصرو عمر رؤساهم .. فالجامعه دي نقتا كتيره وما بتملي عين كرتي
تاني يا زول قلت يمكن ماشي يطالب بي حسني .. اصلوا في تار بايت والملطوش داك غار اهلنا في ابا في صمه خشومهم .. والجماعه حاولو يجيبو خبرو في اديس .. لكن عمر الشقي بقي
برضو لقيت الحكايه ما راكبه ...عشان المصاوره اغلبهم صعايده ... والصعيدي عمرو ما يكبر مخو والبقول بغم طال الزمن واللا قصر بطخو
فدحين هم ماسكين في حسني وجماعتو مسكه جد وحالفين إلا يتاوهو هو ووليداتو
قلت يا زول ده خلاص زولك ماشي يجيب لينا حلايب .. وعندنا باقي حساب بايت في قصة حلفا البعناها بخمستاشر مليون دولار بس.. وناس عبود من خيابتهم يخربهم ما بعرفوا سمسره ولا دفن الليل اب كراعا بره
بس الزول طلع تفتيحه ... وقالوا قال لي طنطاوي تعال يا زول نعمل اندماج ..
وطبعا البشير عندو سينيورتي Seniority اقدميه علي طنطاوي ... والناس تحت .. تحت كدي قالوا طنطاوي ده اصلوا اهلو من ناس بربر.. واكيد ما بكسر يي خاتر رئيسنا خصوصا هو زولا جعلي وحليفة الطلاق في طرف لسانو
بس لي هسع الحكايه ممخولاني
اها شن قولك؟
|
|