Post: #1
Title: ولدك كان كبر عرس ليهو
Author: عبدالله ود البوش
Date: 03-09-2011, 02:33 PM
Parent: #0
مكالمات يومية عادية
كيفك يا فريد وكيف احوالكم واخوانك كيف كويسين ؟
بالله اهتم بحسن شديد الايام دي عشان الامتحانات قربت
خلي عمتك فاطنة تذاكر معاهو القرامر كل يوم
كدي اديني عمتك فاطنة دي انكلمها
بابا دقيقة قبل ما اديك عمتي فاطنة داير اقول حاجة
وتحرك الى غرفة فاضية وكك الباب قفل
اها خير آ ولدي خير ان شاء الله
خير يا بابابا ما تقلق - عارف عندي الضغط وعندي نفسيات
ياخ انا داير اعرس
وووووووو .... ات يا فريد وليدي لاسع بتقول بابا
اول حاجة خلي بابا دي وبعدين نشوق حكاية العرس دي
.
.
اتصلت على اريج وقلت ليها انا داير اعرس لاخوك فريد
ضحكت بسخرية شديدة وقالت لي بلهجة سعودية
تعرس لي الورع دا ؟
فريد رجل مسئول وهو في اولى جامعة يدرس الهندسة
يا ربي الرياضيات سخنت بيهو داير ابرد بالعرس ولا الحكاية شنو
عزيزي القارئ اعرس ليهو ولا ما اعرس ليهو
بصراحة الموضوع جادي وداير اعمل تصويت
وانتظر نتيجة الاستفتاء يا فريد ولدي
ات وحظك وخليك ديمقراطي
|
Post: #2
Title: Re: ولدك كان كبر عرس ليهو
Author: عبدالله ود البوش
Date: 03-09-2011, 02:50 PM
Parent: #1
قوليها داير اقرا وخلاس ريحنا
ياخي في واحد طلق مرتو لمن سالوا لشنو مطلقا
قال داير اقرا
|
Post: #3
Title: Re: ولدك كان كبر عرس ليهو
Author: محمد مصطفي مجذوب
Date: 03-09-2011, 03:21 PM
Parent: #1
يا زول هوي ... اكان كبر ولدك خاويهو
عرس ليهو ..الدنيا ما معروفه وربنا يكفيهو شر اولاد الحرام وبنات الحرام وشر الدين والعين
قول آمين
يا عبدالله اخوي
والله انت سعيد ... الولدك عارف مدكن وين
وحات خوتك .. نحن ناس اروبا ديل مصيبتنا مصيبه
انا جد ..جد ويسألني الله.. يوم الموقف العظيم .. بفتش لي في عروس بالفتاشه لي ولدي دكتور مازن .. ولدا بالحيل سداي ورضاي ود حلال لا مسك سجاره ولا قعد في خماره
وحاتي عندك رقوهو اول امبارح القريبه دي لي استاذ مساعد في جامعة Yale .. وهو يا دوبك ..بسم الله ما شاء الله ..ثلاثه وثلاثين سنه ما قفلها
اقول ليهو يازول بنات اهلك ... يقولن للقمر قوم ونقعد مطرحك ...
يقوم يقول لي لآ...لآ DNA وما عارف ايه .. وقارب ولا تلصق.... وكلام كبار .. كبار ناس نحن ناس غتي ماعونك ديل ما نافع معاهو
نقول ليهو سمح انت بقيت بروفسير كبير والبنات قدامك علي قفا من يشيل.. شي طالبات ..وشي باحثات ..وشيتن بنعرفو ..وشيتن ما سمعنا بيهو سمع
يقول لينا لآ ...لآ ديل كلهن سويديات وامريكيات وانجليزيات وخد وهات وانا ما داير لي خواجيه ....وانا ما عندي فرصه امشي اطقس هنا وهناك
انا والله الليله الصباح ده كنت مفكر اكتب استغاثه واختها في البورد
فدحين يا عبدالله اخوي اكان انت واللا اي زولا ود حلال .. واللا بت حلال من ناس حوش البكري ديل عندو لينا دباره ...أن شاء الله في بلاد الواغ الواغ
اكسبوا فينا الاجر وباصوا لينا ترشيحات علي الميل بتاعي [email protected] , واللا اصلوا اخوك ساكن في اسكايب سكنه ....تعالوا لي بي هناك ..ونحن بنقوم بباقي الواجب ينوبكم فينا ثواب ...نحن خلاص كبرنا وبندور نشوف جديدو قبال ما يجينا هادم اللذات
ويا بخت من جمع راسين في الحلال
شن قولك يا بلده؟؟
|
Post: #4
Title: Re: ولدك كان كبر عرس ليهو
Author: عبدالله ود البوش
Date: 03-10-2011, 08:02 AM
Parent: #3
ابو مازن يل لذيد
سلام وتحايا شديدة خلاس
.
.
ذكرتني اخونا احمد عبدالباقي في صلاة الجمعة قام سائل يطلب حق الله
والامام لم يكمل دعاء الجمعة
قام عليهو اخونا احمد عبدالباقي وقال ليهو
يا زول هوي اقعد اسع نحن بنشحد في ربنا ادينا
اصبر شوية خلي بعد الله ادينا وبعدين نديك
اسع نديك من وين يعني اصبر اصبر
.
.
وبصراحة ات مشكلتك معقدة شوية
انا ولدي مجهز كديستو
بس داير الموافقة والتحويل
هو من زمان انتاق للعرس الجنا فحل طالع لجدو امحمد ود ابكور
قبل تلاتة سنة مشى اجازة السودان عجبتو بت خالتو والله انا ذاتي عجبتني
اها قام اتصل علي قال داير اخطبا قامت امو الله يرحما مسك منو التلفون
وقالت ليهو يا شافع امش العب مع الشفع ديلك
وقالت لي اتو الاتنين ما عندكم شغلة كدي رسل قروش للسقف
فريد دا اصلا صاحبي من صغير واصلووووو ما بزعل عليهو
لكن كمان خايف عليهو اتجهجه في الدراسة
عشان كدا جيت استشير اعمامو وعماتو
.
.
وات يا ابو مازن ولدك دا بمواصافتو دي يعزل عزل ما تخاف عليهو
شكرا جزيل اخي محمد مصطفى
ترمة
ولدك دا كان عرس عبر هذا البوست حقي برا من الطرفين لووووووول
الله اعشيك
|
Post: #5
Title: Re: ولدك كان كبر عرس ليهو
Author: ابو جهينة
Date: 03-10-2011, 08:17 AM
Parent: #4
ود البوش سلام
عزيزي القارئ اعرس ليهو ولا ما اعرس ليهو
بصراحة الموضوع جادي وداير اعمل تصويت
وانتظر نتيجة الاستفتاء يا فريد ولدي
ات وحظك وخليك ديمقراطي
كلام أريج صاح ، الرياضيات سخنت بيهو.
أشتري ليهو جزمة رياضة ماركة أديداس و حبل حق النط و قول ليهو كلما تجيهو فكرة العرس يفتح كتاب مادة بيحبها
و تحياتي لهم
|
Post: #6
Title: Re: ولدك كان كبر عرس ليهو
Author: عبدالله ود البوش
Date: 03-10-2011, 08:25 AM
Parent: #5
ابو جهينة ياريس
سلام وشوق
Quote: كلما تجيهو فكرة العرس يفتح كتاب مادة بيحبها
|
بطريقتو دي ياريس ما شايفو بحب مادة اكتر من الفي قلبو
.
.
كنت معزوم عرس سعودي
العريس شافع في اولى ثانوي
قلت لابوه ليش عرست للولد وهو صغير
قال لي امو هي الاجبرتني على العرس دا
انا قلت ليها لسع الولد صغير وغير مسئول
فقالت لي خلي الولد يوسع صدرو وبع اكبر اعرس
تخيل يا ريس
اوسع صدرو
|
Post: #7
Title: Re: ولدك كان كبر عرس ليهو
Author: rummana
Date: 03-10-2011, 08:42 AM
Parent: #6
عبدالله ود البوش
تحياتي
لو تم العشرين وهو انسان جاد "شديد" عرس ليه.. بشرط لا أطفال قبل التخرج والتخرج ما يتأخر ولا سنة
اذا ما تم العشرين، قول ليه يكمل الواحد عشرين في الأول :)
إذا فيه شبهة طرطشة شوية.. أقنع العروسة بالانتظار لانها حتقدر تقنعه أكتر منك
وإذا بقبل النصيحة وبسمع الكلام اخطب ليه وقول ليه العرس يوم التخرج
أها.. فصرت معاك؟
|
Post: #9
Title: Re: ولدك كان كبر عرس ليهو
Author: عبدالله ود البوش
Date: 03-10-2011, 08:53 AM
Parent: #7
rummana
سلام تعظيم سلام
والله كلامك ممتاز خلاس
اولك يا بادي من العشرين قسر بسييييت ( عشرين علا سبعة شهور )
ولكنه بصراحة وللامانة هو انسان مسئول وجاد ودغري ودربو عديييييييل
ماعندو لف ولا دوران ولا زوغلان ولا حتى حركات الشباب العادية دي ماعندي
الاماكن التي يتواجد فيها
البيت
الجامعة
الجامع
ومسافة الطريق للحتة الماشي ليها وجاي منها
والله يا رمانة قولي ماشاء الله مرات ارسلو من بيتنا في جبرة لامدرمان
اجي راجع اقول ليهو ما لقيت مالك جيت راجع
اقول لي قول ماشاء الله
بصراحة زول يصعب ارفض ليهو طلب
بس انا نقطة ضعفي اولادي اموت ولا ارض طلب لواحد منهم
وفي نفس الوقت اخاف على ضياع مستقبلو
لان الزواج قد يدخله في حتات ضيقة ولايستطيع معها مواصلة الدراسة
وكلو وووووب وزاد وجدو
|
Post: #8
Title: Re: ولدك كان كبر عرس ليهو
Author: عثمان رضوان
Date: 03-10-2011, 08:45 AM
Parent: #6
الأخ عبدالله
تحياتي
في رايي لو البت مُقنعة
لا تتردد
عرس ليه وربنا يوفقه ويحفظه وينجحه.
|
Post: #10
Title: Re: ولدك كان كبر عرس ليهو
Author: Saifelyazal Elmaki
Date: 03-10-2011, 09:21 AM
Parent: #8
ود البوش وضيوفه
تحياتي
مع احترامي لآراء الجميع
منو البقبل يعرس لبنتو راجل لسه بياخد مصروفو من ابوه
كان لقيتو عرس لولدك سااااااااااااااي
لو ولدك شغال وبيدرس يعني من عرق جبينو
اتوكل على الله وشوف بنت الحلال لكن كان مصروفو من عندك
أرجع لكلام ابو جهينه
|
Post: #12
Title: Re: ولدك كان كبر عرس ليهو
Author: عبدالله ود البوش
Date: 03-10-2011, 09:40 AM
Parent: #10
Saifelyazal Elmaki
تحياتي وسلامي
كما احترمت رأينا فايضا رأيك على العين والراس
Quote: منو البقبل يعرس لبنتو راجل لسه بياخد مصروفو من ابوه
|
معك حق ولكن هنا الحالة خاصة جدا
البنت امها خالة الولد شقيقة امو المتوفية وتعتبر امه حاليا
وابوها ايضا خاله ود خال امو
يعني زيتنا في بيتنا والوضع كلو على بعضو بيت واحد
ورأيك ورأي ابو جهينة موضوع في الحساب
شكري وتقديري
|
Post: #13
Title: Re: ولدك كان كبر عرس ليهو
Author: محمد مصطفي مجذوب
Date: 03-10-2011, 09:41 AM
Parent: #10
يا ود البوش
Quote: وبصراحة ات مشكلتك معقدة شوية
انا ولدي مجهز كديستو
بس داير الموافقة والتحويل |
يعني شنو بتكاوي فينا ..
سمح فيها شنو اكان كلمت الوليد يطقس ويشوف لي اخوه كديسه تاني
مين عارف يمكن نعمل ليهم العرس سواء والكوشه نوع الدبل كبينه
عموما انا رفعت امري لي الله وشحدت ود البكري في الكلام جاد وليك ...يا بكري ابوبكر وجماعو: ما تقعدوا تسو... كلها دفس ورفس سياسه اكان يستر معانا ويقوم بالواجب
وانت يا ودعمي سيبك من المغرضين ناس سيف المكي وجهينه وباقي الجماعه ديل ... ناسQuote: منو البقبل يعرس لبنتو راجل لسه بياخد مصروفو من ابوه
كان لقيتو عرس لولدك سااااااااااااااي
لو ولدك شغال وبيدرس يعني من عرق جبينو
اتوكل على الله وشوف بنت الحلال لكن كان مصروفو من عندك
أرجع لكلام ابو جهينه |
اصلو اليدو في المويه ما زي اليدو في النار
عموما يا زول .. نحن ولاد جعل .. وحرم ما تقول شي ..
شقة شهر العسل .. في لندن ...واللا القاهره ... واللا دبي علينا
وغمد وافتح حساب لكشف الحنه وادينا رقمو .. وربنا يتم ليهو علي خير
|
Post: #11
Title: Re: ولدك كان كبر عرس ليهو
Author: عبدالله ود البوش
Date: 03-10-2011, 09:33 AM
Parent: #8
Quote: في رايي لو البت مُقنعة
|
الولد والبت اولادي
والاتنين بحبو بعض وانا بحبهم الاتنين
وابو البت وامها اخواني
يعني كلنا كدا بيت واحد
بل قول اوضة واحدة تشيلنا كلنا
اي واحد من الفوق ديل ممكن اتنفس في خشم التاني وما اقول ليهو زح مني شنو
بس كل الموضوع
التوقيت
الدراسة
التخريج
والجنا ممتاز وداير احصن نفسو
شكرا يا عثمان ورايك واضح وصريح
|
Post: #14
Title: Re: ولدك كان كبر عرس ليهو
Author: Saifelyazal Elmaki
Date: 03-10-2011, 09:51 AM
Parent: #11
حبيبنا ود البوش
Quote: البنت امها خالة الولد شقيقة امو المتوفية وتعتبر امه حاليا
وابوها ايضا خاله ود خال امو
يعني زيتنا في بيتنا والوضع كلو على بعضو بيت واحد |
لا كان كده اتوكل على الله ساي
وعرس ليهو تب
بس الزواج مسألة ما ساهلة ومهما كانت البنت وقربها
بتكون في حياة مستقلة وانت أدرى في تفاصيل بين الأزواج
بتكون خاصة شديد
ربنا يوفق ويسعدهم
|
Post: #15
Title: Re: ولدك كان كبر عرس ليهو
Author: حماد الطاهر عبدالله
Date: 03-10-2011, 10:01 AM
Parent: #11
الأخ/ عبدالله البوش
تحياتي
| Quote: أقنع العروسة بالانتظار لانها حتقدر تقنعه أكتر منك |
- أوافق بشدة على رأي Rummana
- ومن واقع تجربتي مع إبني محمد، حينما كان بالصف الثاني هندسة كهرباء، ومحاولته إجبارنا على تزويجه،
إذ وقفنا مع والدته أم محمد (حفظها الله) ومتعنا جميعا بالصحة والعافية، ألف أحمر، وخاطبناه بالجوال
وقلنا له ( مافي مفاهمة في هذا الموضوع قبل التخرج)، فتعنت، وتكهرب، وتمرد، نق للسماء،إلا أن خالته
والمتواجدة معه بالخرطوم، قد إستخدمت دهاء ( النساء) وأقنعت العروس بإستحالة الزواج قبل التخرج ...
فوافقت وأقنعته، فجاءنا معتذرا عن تعنته.... وسارت الأمور...
|
Post: #16
Title: Re: ولدك كان كبر عرس ليهو
Author: عبدالله ود البوش
Date: 03-10-2011, 12:41 PM
Parent: #15
| Quote: ومن واقع تجربتي مع إبني محمد، حينما كان بالصف الثاني هندسة كهرباء، ومحاولته إجبارنا على تزويجه، |
شكرا اخي حماد على اهدائي هذه التجربة الجاهزة
.
.
ولكن يا حماد انا ما عايزو اتنازل بالدهاء ولا بالضغط
انا عايز اعرف من تجارب الناس
ممكن اكون الزوج كويس ولا ما كويس مع الدراسة
لو تأكدت بانه افيد واصلح لن اتردد في تزويجه اليوم قبل بكرة
لكن لو الزواج بغتس حجر قرايتو
اكون سجم امك آ خالد ....
.
يا حماد لقاء خريجي جامعة السودان تم تأجيله وهذا للمعلومية
دائما مرورك جميل يا رائع
مع تحياتي للعيال
وشكرا
|
Post: #17
Title: Re: ولدك كان كبر عرس ليهو
Author: ismeil abbas
Date: 03-10-2011, 03:42 PM
Quote: مع احترامي لآراء الجميع
منو البقبل يعرس لبنتو راجل لسه بياخد مصروفو من ابوه
كان لقيتو عرس لولدك سااااااااااااااي
لو ولدك شغال وبيدرس يعني من عرق جبينو
اتوكل على الله وشوف بنت الحلال لكن كان مصروفو من عندك
أرجع لكلام ابو جهينه |
كلام اخونا سيف اليزل وابوجهينة أمسك فيهو كويس حتى بعد مداخلتك يا عبدالله مافى مبرر للأستعجال..نعم الزواج المبكر نعمة كبيرة بس الواحد يكون قادر يفتح بيت بماله عشان مافى زول يعيرو..فى البداية ألأمور بتمشى لكن بعد فترة بتحصل متغيرات ويبقى الكلام الكعب إنت ما معرس بقروش أبوك وكان عرستنى بحقك ماكان إتكلمت معاى كلام حار وكده..
وتبدأ ألأجاويد....تأسيس أسرة سليمة سعيدة يعتمد على عوامل اهمها.الحب.ألأحترام.القدرة الأهلية والمادية.
تقديرى وأحترامى....
|
Post: #18
Title: Re: ولدك كان كبر عرس ليهو
Author: الامين موسى البشاري
Date: 03-10-2011, 03:58 PM
Parent: #17
عبد الله ود البوش
ســـلام.. واريت الابهات كلهم زيك 
غايتو عرس للولد ساكت وما تسمع لي كلام ناس البندر دا
العرس استقرار وتحصين للولد وللبت والبتاكلو انتوا بياكلو معاكم
الموضوع بس تتأكد من رغبة الولد والبت وتشترط عليهم اكمال التعليم
عرس عرسك ساكت آآآآآآآآآآآزول
تحاياي
|
Post: #21
Title: Re: ولدك كان كبر عرس ليهو
Author: عبدالله ود البوش
Date: 03-13-2011, 08:07 PM
Parent: #18
البشاري صديقي العريس
والله رايك من راي ولكني طرحت الامر لاعمام وعمات الولد هنا في المنبر
وشكلو الكلام ما في صالحو
|
Post: #19
Title: Re: ولدك كان كبر عرس ليهو
Author: نادية عثمان
Date: 03-10-2011, 03:59 PM
Parent: #17
عبدوش ؟
واله ياهو الفضل !!
إنت الولد ده متييين بقى للعرس ؟!
هو أبوه لسة عريس ( وش مدغمس) !!
خلي لي أنا برجع ليك رأسو ماتقلق سمح؟
|
Post: #22
Title: Re: ولدك كان كبر عرس ليهو
Author: عبدالله ود البوش
Date: 03-13-2011, 08:10 PM
Parent: #19
ندوش سيدة الاعمال التي باعت شقتها وما طلعت لينا حق الدعاية
.
.
رقمو معاك كلمي ولفي لي راسو مرة واحة
|
Post: #20
Title: Re: ولدك كان كبر عرس ليهو
Author: عبدالله ود البوش
Date: 03-13-2011, 08:05 PM
Parent: #17
الاخ العزيز اسماعيل
انت تعتبر من اعمامو الذين نشاورهم في امره
وعليه كلامك له وقعه الخاص
تحياتي
|
Post: #23
Title: Re: ولدك كان كبر عرس ليهو
Author: عبدالله ود البوش
Date: 03-13-2011, 08:14 PM
Parent: #20
وعليه فالامر واضح هنا ومن الرسائل من خارج المنبر
رجحت كفة تأجيل العرس الى بعد التخرج
اشكركم جميعا من كتب ومن ابرق ومن هاتف
والعاقبة عنكم في المسرات
والله اصبرك يا فريد ولدي
لكنه وعد مني كان غلبك الصبر كلمني والله العظيم اصبحك عريس تلحس وتتكشم
هيييييييييييييييييع ابوك يا فريد
|
Post: #24
Title: Re: ولدك كان كبر عرس ليهو
Author: طه إبراهيم عبد الله
Date: 03-13-2011, 09:56 PM
Parent: #23
NOOOOO حمراء كدا زي الشطة
|
Post: #25
Title: Re: ولدك كان كبر عرس ليهو
Author: عبدالله ود البوش
Date: 03-14-2011, 08:45 AM
Parent: #24
[QUOTE]NOOOOO حمراء كدا زي الشطة |
طيب اها يا طه اخوي ورينا رايك شنو
اتفاوض معانا
فاوضني بلا زعل ياخي فاوضني بلا زعل
وقول انا عندي حل
.
.
يا حليلو الجنيه اب جمل
|