اشهر الاكاذيب السياسية السودانية على الاطلاق!!

رائحة المسك التي كانت تفوح من الجثث في تسيعينات القرن الماضي.

قيل أن إحدى الاخوات المجاهدات في تلك الفترة و اثناء انهماكها في تقطيع البصل لاعداد زاد المجاهد، جرحت اصبعها.
و ردد بعدها افراد الجماعة مع القسم أن ذاك الدم الذي سال من اصبع الأخت المجاهدة فاحت منه رائحة المسك!!
بصل و مسك و دماء...فتخيل.

والقرود المحاربة..المجاهدة

يازول حمد الله سلامة

سلامات يا معاوية
كذبة القرود التي فجرت الالغام لتحمي المجاهدين ، هي الفائزة معنا هذه الليلة بجائزة اكثر الكذبات اثارة للدهشة.
انا من ناحيتي كنت معجبا جدا بجراءة الشخص الذي اطلق هذه الكذبة الفريدة و بثقته الكبيرة في أن اعلام
الانقاذ و خطباءها لن يترددوا و لو للحظة في اعادة اطلاق كذبته هذه مرات و مرات حتى صدقها بعضهم.

والشهيد الدي بعد عرس استشهاده
يأتي يسعى على قدمين
يكون أخد اجازة من الجنة ولا قد السلك؟
ديل يحيروا الكدب نفسه
ثورة الإنقاد ما ثورة كيزان بعد شوية
أمش القصر رئيس وأنا كوبر حبيس
وبعدها عيييييييك الصراخ والنبيشة والكضب
ويا دكتور كعك الحرب دي جديدة جابوها هم
بهاء/طوكيو

Quote: والشهيد الدي بعد عرس استشهاده يأتي يسعى على قدمين يكون أخد اجازة من الجنة ولا قد السلك؟

دي قوية يا بهاء .
ادب الكذب الكيزاني بالتأكيد مليئ بمثل هذه القصص الخيالية.

ليس لديهم بيوت أشباح علي الاطلاق .... بل لا يوجد معتقل سياسي واحد
وبعد سنوات يعترف بها رأس الدولة نفسه ... وبالطبع لم تحدثه
نفسه لحظة اعترافه ....... بأن المؤمن لا يكذب!


تحياتي يا دكتور ....... وبوست جميل .... حتي لا ننسي!

حين قُتِل رفيق صباي "عثمان بشير ابوعاقلة" ... بعد كل دراما موته ... أراد الكيزان إضافة دراما تسليم الجثمان لأهله ... بقدومهم مع الجثمان فى "بوكسى" كاشف مكتظ بالمحجبات اللاتى يشققن حزن الفضاء بزغاريد فرح مصطنع ... ما كان من والده إلاّ أن استلم الجثمان وطردهن ببكوكسيهن ... يهشّ عليهن بعصاه ... علّهن يزغردن فى حزنٍ آخر ...

لا زلت اذكره واذكر تفـاهة تلك الزغاريد ... وألعن الزمن التعيس ... وأبكى ..










... المهم ...

صـــرح قادة كبار في المؤتمر الوطني بأنهـم.... متأكدون .... من أن :..................

شعـب جنوب الســودان سيختـار الــ وحــدة ........

Quote: والشهيد الدي بعد عرس استشهاده يأتي يسعى على قدمين يكون أخد اجازة من الجنة ولا قد السلك؟ ديل يحيروا الكدب نفسه ثورة الإنقاد ما ثورة كيزان بعد شوية أمش القصر رئيس وأنا كوبر حبيس وبعدها عيييييييك الصراخ والنبيشة والكضب ويا دكتور كعك الحرب دي جديدة جابوها هم بهاء/طوكيو

و الله يا بهاء كنت عايزة أقول السجن و القصر .. كذب من أول يوم.. و استمر عشرون عاماً..

تحياتي يا دكتور سيف..

سيف تحياتى
يا سيف يا ف ط ي س دى العوجه

حتى الشجر كان بنادى المجاهدين,,هنا متمرد تعال اقتله
الا شجر نبات البفرة فانه طعام الاخوة الجنوبيون,,
ههههههها فى النهاية قسموا البلد ,,لا احترام لميثاق الذين ماتوا

يادكتور مشتاقون,,,

Quote: حكومه الخرطوم تحترم اراده و خيار الشعب المصري

Quote: عبرت الحكومة عن بالغ انزعاجها وقلقها من تفاقم العنف ضد المدنيين في ليبيا ...

سيف
مسكاقمي..

Quote: اشهر الاكاذيب السياسية السودانية على الاطلاق!! رائحة المسك التي كانت تفوح من الجثث في تسيعينات القرن الماضي

الأخ سيف النصر
تحيــة طيبـة
رائحة المسك حالة نفسية.. يعني ممكن الانسان يتوهم انه فعلا شم رائحة مسك أو فــل وياسمين.. لكن..
أشهر الاكاذيب هي الكذبة اللي أطلقها الشيخ الهمزة اللمزة لما قال انه أحد ضحايا حادث تحطم الطائرة العسكرية من الجنوبيين أشهر اسلامه قبل ما يسلم الروح وصلى عليه مع الضحايا المسلمين .. هدف الكذبة لازال غامض بالنسبة لي...

يا سيف النصـر,

ياخي ... نحنـا لو ما جينـا... كان الدولار حصّـل (20) عشرين جنيـه ......

هي لله هي لله

تحياتى يا اخ سيف

Quote: لا لدنيا قد عملنا

أشهرها برضو يا دكتور :
وكلفت شاب عمره:
مجدي تاجر عملة وأركانجلو الطالب المسكين
والكذبة الكبرى :
على الطلاق جندي أمم واحد ما يدخل وباطن الأرض خير من ظاهرها
أتاريهم بعمقوا في ساس البيوت ، ونحن المساكين قايلين باطن زي حقنا يعني موت

والكبيرة شديد لمن كبر فيها اللفة:
القتلى في دارفور 10 ألف بس يا حسرة
ياخ الزول دا كذبه بعرفو براهو
بهاء

لا لدنيا قد عملنا

ولا تنسى يا دكتور سيف الأورنيك المرضي الذي تحرك بموجبه العميد عمر حسن (وفتئذٍ)
من الجنوب إلى الخرطوم لتنفيذ الانقلاب المشئوم..
حكاها البشير وهو يبتسم وبدون خجل مع إنها في النهاية كذبة وهو الرئيس..

سلام يا دكتور ..

إنت ماشي بعييد ليه ؟؟

طيب يا ريت تشوف لينا معاك أشهر الأكاذيب السياسية في سودانيز أون لاين !!

يعني على سبيل المثال :

1 ) الطيارة الأستولوا عليها ناس العدل و المساواة من قاعدة وادي سيدنا عند الهجوم على أم درمان و
لحدي هسة ما ( ركت ) .

2 ) تصريح ياسر عرمان عند سقوط طائرة قرنق ..

2 ) الشهيد المدفون في مقابر سوق ليبيا ..

4 ) خبر الزول بتاع المجر عن قروش الحجاج ..

5 ) إختطاف جثمان الخاتم عدلان ( يرحمه الله )

6 )
7 )

الـخخخخخخخخ

** د. سيف ..
** مساءك خير..
## هى لله ,, هى لله ,, لا للسلطه ولا للجاه..
## بقت هى للسلطه والجاه والفساد ونهب المال العام وشراء الفيلل فى إى مكان بالعالم والتباهى بمُثنى وثلاث ورُباع..
(اللهم أنقذنا ممن أتوا لإنقاذنا)


@@ من تجليات التوجه الحضارى فى تجهيز الطيور والحبارى:-
**1/ منسق لجان شعبيه طلب من والى ولايه /5.000.000) مليون جنيه لشراء شرموط وبصل لتجهيز زاد المجاهد ,, دُفعت فوراً وكاش وبدون إى مستندات وتعقيدات ماليه ,, نفس الوالى جاهو مـدير الشرطه عايزين (300.000) جنيه لإصلاح عربات الشرطه ,, قال ليهو مافى ميزانيه للبند دا..
**2/ منسق آخر لقو القروش الكانت عندو فارقه (250.000) جنيه سألوهو منها ,, قال ليهم :- أكتبوها أشترينا بيها دكـــوه..
**3/ نافذ آخر حضر الإمارات شحن حمولة طائرتين مواد بناء وأثاث للبيت ولم يشحن الرمل والماء ..

** ونحنا نقول العمارات بتتبنى كيف بالسرعه دى فى الخرطوم ,, وآخرون لايزالون فى غيبوبة هى لله ..

سلام سيف النصر وضيوفه

عصام دهب

Quote: سلام يا دكتور .. إنت ماشي بعييد ليه ؟؟

وإنت يا عصام ذاتك ماشي بعيد مالك ما تجيب البوست بتاعك داك طالما عندك وقت ترد ولا يعني ما بنستاهل منك وقت


أنا كنت قايلك اليومين ما فاضي للبورد لكن طالما جيت بجاي جيب البوست داك لأني لسه مستني منك رد


مع تحياتي

عاصم فقيري


جرى التعديل بسبب تصحيح كلمة البوست والتي كتبت بالخطأ بسوت

مابنسلم اى مطلوب وبنحوم الواطة كلها

اكبر كذبة حكومية

لا يوجد تعذيب في السودان ولا يوجد اي معتقا سياسي

بيوت الاشباح اشاعة مغرضة

سلام يا عاصم ..

Quote: وإنت يا عصام ذاتك ماشي بعيد مالك ما تجيب البسوت بتاعك داك طالما عندك وقت ترد ولا يعني ما بنستاهل منك وقت

قلت لك يا عاصم سأعود و أرد عليك ..

و الرد عليك قطعاً يختلف عما ورد في هذه المداخلة لجهة التركيز ..

دخلت المكتب قادماً من مكة قبل خمس دقائق من تلك المداخلة ..

و ريثما أبداً في إنجاز ما لدي من أعمال قلت أديها ( غشوة ) ..

أما أنت فلازماك جية عديييل كدة ..

و سأرد عليك ت إن شاء الله ـ حتى و لو بالدرب العدييل فأنتظر .. فلست أنا من يزوغ ..

سلام يادكتور :سيف النصر
في الواقع فان الاكاذيب كثيرة هذا ان لم اقل ان اغلب التصريحات كاذبة ......ولكن من أكثر الاكاذيب طرافة تلك التي سمعتها من احدهم حينما قال بان الناس قد راؤا في منامهم،أن الشهبد في الجنة ،.وبجانبه بنات الحور.الي هنا فالامر طبيعي، ويستمرون في الحكى ثم يحكون عن بطولاته الجنسية معهن وكيف انه في غمرة الكذبة يذكر وبلا حياء (مستصحباً باطنياً ان ليس في الدين حرج) بانه قد راءه يجامع بنت الحور .فقلت في نفسي سبحان الله ، نحن نعرف ان الانسان يحلتم بالفتاة التي يحبها او يتمناها ،بيدا اني لم اسمع بانسان يحتلم لغيره. فقلت جائز خصوصاً لما عرفت انهم ممن ياسرون علي انفسهم(وجوه ضاحكة)

أمريكــا ... روسيـا قـد دنـا عـذابهــا .....

Quote: ليس لديهم بيوت أشباح علي الاطلاق .... بل لا يوجد معتقل سياسي واحد وبعد سنوات يعترف بها رأس الدولة نفسه

سلامات يا عاطف
هذه من الكذبات التي تشترك فيها جميع الانظمة القمعية ، و لكن كما قلت أن يأتي ذلك من اصحاب المرجعية الدينية
التي تحرم الكذب فهذا هو الغريب في الأمر .

Quote: لا زلت اذكره واذكر تفـاهة تلك الزغاريد ... وألعن الزمن التعيس ... وأبكى

سلام يا تبارك
قيل ليس من رأى كمن سمع، و أنت قد رأيت .

تحياتي مولانا احمد الشايقي

Quote: شعـب جنوب الســودان سيختـار الــ وحــدة

هكذا صرحوا و هم يعملون من أجل الانفصال، هذا كذب مع سبق الاصرار و الترصد.

Quote: و الله يا بهاء كنت عايزة أقول السجن و القصر .. كذب من أول يوم.. و استمر عشرون عاماً..

شكرا يا سناء.

...

نشرت صحيفة جبهجية اسلاموية "تصريح" الطبيب الكندي الذي عالج رأس الترابي بعد حادثة "أتوا" الشهيرة :
"لم أشاهد، طوال حياتي العملية، دماغاً مثل هذا!" أو نحو ذلك...




....

نأكل مما نزرع

ونلبس مما نصنع

Quote: يا سيف يا ف ط ي س دى العوجه

يا موسى مشتاقين
الكلام ده قالوه بعد ما راحت السكرة و جاءت الفكرة.

الجماعه كانو محركين ميتافيزيقيا شديده لكن الكذبه الخالعاني التغطيه بتاعت الاغتيالات قالوا الزبير محمد صالح مابعرف يعوم والطيب سيخه سباح ماهر وفجاءه اليد مره عاديه ومره مربوطه غايتو جنس كذب

Quote: حتى الشجر كان بنادى المجاهدين,,هنا متمرد تعال اقتله الا شجر نبات البفرة فانه طعام الاخوة الجنوبيون,, ههههههها فى النهاية قسموا البلد ,,لا احترام لميثاق الذين ماتوا

بالرغم من اشتراك الشجر و القرود و كافة قوى الطبيعة في الحرب الا أن الجماعة لم يستطيعوا حسمها بالطريقة التي
رسموها و خططوا لها.
تحياتي يا ابوقوتة.

Quote: انا من ناحيتي كنت معجبا جدا بجراءة الشخص الذي اطلق هذه الكذبة الفريدة و بثقته الكبيرة في أن اعلام.

هذا الشخص الجرئ هو الدكتور الزبير بشير طه
و هذه الفكرة الشيطاينية هي من بنات افكاره في التوجيه المعنوي
تلك المجلات الدورية التي توزع للمغلفين في ادغال الجنوب الذين لم يقرأو جريدة او اي اشئ مكتوب لاكثر من ثلاثة شهور و عندما تأتيهم هذه المجلات الدورية فهي في المقام الاول مادة للقراءة قبل محتواها السيكولوجي.
بالطبع القصة حدثت في بحر الغزال للمجلة التي توزع في الاستوائية و كذا العكس للمجلة التي توزع في بحر العزال فأن الحدث كان في اعالي النيل

Quote: حكومه الخرطوم تحترم اراده و خيار الشعب المصري --------------------------------------------------------------------------- عبرت الحكومة عن بالغ انزعاجها وقلقها من تفاقم العنف ضد المدنيين في ليبيا

شكرا يا مدحت.

Quote: أشهر الاكاذيب هي الكذبة اللي أطلقها الشيخ الهمزة اللمزة لما قال انه أحد ضحايا حادث تحطم الطائرة العسكرية من الجنوبيين أشهر اسلامه قبل ما يسلم الروح وصلى عليه مع الضحايا المسلمين .. هدف الكذبة لازال غامض بالنسبة لي...

سلامات يا رمانة
في الحقيقة الجو الذي ساد عقب سقوط طائرة الزبير كان جوا سرياليا و مشحون بالاضطراب و التصريحات العشوائية
و الروايات المتضاربة. و من ضمن الاحداث الغريبة في تلك الفترة كانت مسألة موت اروك طون اروك على الاسلام
و الاصرار على دفنه في مقابر الصحافة بعد الصلاة عليه ضد رغبة اهله و ذويه، الذين كما اذكر قاموا بعمل قداس له
في إحدى الكنائس. الرجل فارق الدنيا عن طريقين اسلامي و مسيحي.
غايتو ما عارف الترابي كان قصدو شنو!!

Quote: هي لله هي لله

يا خال حمزاوي
دي فعلا كذبة الكذبات التي تفوقت على ما عداها.

سلامات سيف

"لن يحدث تغيير في السودان إلا عبر صناديق الاقتراع"!

"انتخبوا القوي الأمين"

اللتنين ديل ما عارف تصنيفن، أكاذيب ولا نكات، لكن أرح

Quote: لم أشاهد، طوال حياتي العملية، دماغاً مثل هذا

العبارة لم تكن هكذا (إنت ذاتك كذاب)
الدكتور قال لم أشاهد طوال حياتي دماغا مثل هذا إلأ عند رجل يدعى وليد الطيب قسم السيد"

بمناسبة القرود والمسك دي عندنا واحد قريبنا كان في السوق وفلس. قام اتلم على الجماعة ديل وبعد شوية مشى الجنوب. من شتارتو وقلة تدريبو يومو الوصل ناشتو ليك طلقة بالخطأ في
جابوهو رقد في السلاح الطبي. أها لمن أهلنا يمشوا يشوفوهو يقعد يبكي ويقول ليهم باللاهي أنا ما كنت قررررّبت أموت. في هذه الأثناء يدخل بعض الكيزان . الزول يقوم فرترب ينط من سريرو ويكبر.
الآن ملياردير.

Quote: هي لله هي لله

دي الكذبة المركزية التي تناسلت منها كل الاكاذيب
شكرا يادكتور

Quote: لا لدنيا قد عملنا

سلامات يا دكتور محمد بابكر
واحد من شعارات الاسلام السياسي المستهلكة و قد اثبت الكيزان عمليا مفارقته للحقيقة.

Quote: حكاها البشير وهو يبتسم وبدون خجل مع إنها في النهاية كذبة وهو الرئيس..

كلامهم عن أنهم مختلفون لا معنى له إذن .
شكرا يا نصر الدين.

تحياتى يا اخ سيف


د. على فضل توفى نتيجة لمرض الملاريا






المسمار الفى الرأس ده كان اشاعة بس

Quote: طيب يا ريت تشوف لينا معاك أشهر الأكاذيب السياسية في سودانيز أون لاين !!

يا عصام كيفك و العيال
يا خوي اقول ليك السودان تقول لي سودانيزاونلاين؟
على العموم كذب الكيزان انا و انت عارفينو كويس من زمان و ما دايرلو شيل ضو.
و برضو انا و انت عارفين كيف كنا بنخوض معاركنا معاهم بشرف و صدق و للا كيف يا مولانا؟

يا أبوالسيوف ازيك ياخ
عايز أشارك ياخ

حكي أحد المجاهدين إنهم كان متحركين من مكان لآخر وعطشانين عطش شديد
المهم فجأة تجمعت سحابة وسحابة أخري وأخري ثم صبت
المبالغة طبعاً مافي الكلام ده
المبالغة انو المطرة كانت بتصب خلفهم مباشرةً عشان ما يخرب ليهم الطريق وبالتالي
العربات تتعطل وتوحل وبالتالي كان الواحد بيمد يدو لي ورا ويملأ زمزميتو
ويشرب .


ـــ
دي من قصص الكرامات (باب ـ المجاهدين)

Quote: 1/ منسق لجان شعبيه طلب من والى ولايه /5.000.000) مليون جنيه لشراء شرموط وبصل لتجهيز زاد المجاهد ,, دُفعت فوراً وكاش وبدون إى مستندات وتعقيدات ماليه ,, نفس الوالى جاهو مـدير الشرطه عايزين (300.000) جنيه لإصلاح عربات الشرطه ,, قال ليهو مافى ميزانيه للبند دا..

سلام استاذنا ابو محمد
شوف بالله ترتيب الاولويات ده كيف؟
و بنود الصرف الوهمية التي تفوح منها رائحة الفساد لا المسك.

انت مالك مدخل نفسك في الدرب الطويل؟
فتش صدقهم حتلاقيهو بسيط وما محتاج تعب يمكن كمان ما تلقي نهائي

مساهمة من عندي في هذا البوست الاحصائي:

اين جثة شهيد: محمد عبد الرحمن بتاع يوم 30 يناير

" مرتب المعلم سيكون اعلي مرتب في السودان"

من اقوال الرئيس عمر البشير

كشفت شرطة ولاية الخرطوم، عن إعتزامها مقاضاة قناة الـ (بي. بي. سي)، التي نشرت معلومات كاذبة أضرت بأمن الدولة، وعملت على خلق الفتنة والبلبلة. وقال مصدر مطلع لـ «الرأي العام» أمس، إن المظاهرات التي وقعت قبل يومين لم تشهد أية حالات وفاة أو إصابات تذكر، وأكد أن الشرطة لم تخف أية معلومات، وأنها عودت الإعلام على الإدلاء بأية معلومة عن أي حدث في السابق، وأضاف أن الغرض من مثل هذه الشائعات خلق فتنة، وقال إنه يقف خلفها أصحاب أجندة فشلوا على أرض الواقع وسعوا لإستغلال بعض المواقع الإلكترونية.
ونوه إلى أن قناة الـ (بي. بي. سي) هي التي أعلنت عن وفاة الطالب، ومن ثم قامت بقية المواقع بنقل الخبر الذي لا أساس له من الصحة، وأوضح أن شرطة ولاية الخرطوم ستقوم بمقاضاة كل من يسعى لنشر معلومات كاذبة تضر بأمن الدولة وتخلق بلبلة داخل المجتمع

د. سيف ازيك ياخ

ياها دي غايتو - في نظري - الـ :

Quote: اشهر الاكاذيب السياسية السودانية على الاطلاق!!

الاحرجتنا في المحافل الدولية :

Quote: أمريكــا ... روسيـا قـد دنـا عـذابهــا .....

فرفع الخواجة حاجبيه في شكل 88 و ردد : Both!!!?






--------

قيل - و العهدة على الراوي - واحد من المجاهدين غمر كدا و قام ليك يهتف : اني لاجد ريح الجنة .. الحمد لله
واحد صحاهو قال ليو - وكان لسه ( الشهيد الحي ) ما فتح عيونو - كدي ( يا شيخنا ) فتح عيونك دي .. يا اخوي دي ريحة الكفر المحروق دا


بالمناسبة :
انتو ريحة الجنة دي كيفناها!؟

Quote: اكبر كذبة حكومية لا يوجد تعذيب في السودان ولا يوجد اي معتقا سياسي بيوت الاشباح اشاعة مغرضة

و كانوا مستميتين في انكار هذه البشاعات بطريقة غريبة فلما اختلفوا تبادلوا الاتهامات حولها.
شكرا يا دكتورة نجاة.

Quote: أمريكــا ... روسيـا قـد دنـا عـذابهــا .....

حدث ذلك حينما دعوا السفير البريطاني لإحدى حفلاتهم في الخرطوم
وبجواره من يترجم له الأشعار والكلمات ...
وحينما ترجمت له ..(أمريكــا ... روسيـا قـد دنـا عـذابهــا .....)
فما كان منه الا أن أطلق ضحكة لعنان السماء عن هذه الكذبة قائلاً
BOTH OF THEM .....

Quote: .فقلت في نفسي سبحان الله ، نحن نعرف ان الانسان يحلتم بالفتاة التي يحبها او يتمناها ،بيدا اني لم اسمع بانسان يحتلم لغيره.

الله اكبر
هسه دي ذاتها ما معجزة يا ابو العناكب.

Quote: "لم أشاهد، طوال حياتي العملية، دماغاً مثل هذا!" أو نحو ذلك...

مرحب يا فردة
عبارة تصلح لرواية من روايات ماركيز.

شعارهم العالى : فلناكل مما نزرع .. ولنلبس مما نصنع


_____________

لو اصرو عليهو كان نكون هسه حايمين امفكو فى الشوارع


سلام يا سيف ..

بإختصار لم اتصالح مع الاخوان أو الكيزان في يوم من الايام

ما اريد قولة ان كثير من الكيزان لا يكذبون فقط لكن يتجاوزن سؤ الظن بهم
لكن هناك بعض الاشياء التي ادهشتني في حياتي اخيرا
لا اخلط الكيمان لكن اقول لمن قال ان شم المسك حالة نفسية فقط
اقول ايضا لانك لم تجرب الامر فاصمت
اولا و أنا داخل للمدينة المنورة علي ساكنها أفضل الصلاة و أتم التسليم و مع اسرتي و مجموعة من السودانين شممنا رائحة زكية و بكا الناس و حتي الاطفال فهل هذه حالة نفسية
ما ذهبت لزيارة سيدنا حمزة في اخر رمضان من كل عام إلا و شممت الرائحة الزكية
قبل ثلاث سنوات و في غمرة انشغال الوهابية بحراسة مراقد الصحابة الاجلاء الاخريين وجدت فرصة و اخذت و اخذت حفنة من تراب مرقد السيد فاطمة بنت اسد رضي الله عنها و في المرقد ايضا سيدنا ابا سعيد الخدري رضي الله عنه و سيدنا سعد بن معاذ و و الله ما شممته في ذلك التراب اتمني شمه كل يوم
بالرغم من معارضتي و مواقفي التي يعلمها كثيرين من اعضاء هذا المنبر لكن راي حول الشباب الذين حاربوا في الجنوب
ان كل واحد فيهم يؤخذ بنيته
يعني المشا لي الجهاد بنية الجهاد فيقني انه مجاهد
بالواضح ما نخلط الكيمان
كان سودان واحد
كنا ننظر للحل في السلم
كان الدفاع عن الوطن ضريبة و قد دفع كثير من الشباب ارواحهم تحت اي مسمي ثمنا لهذا المفهموم
فالنتحدث عن كذب الاخوان او الكيزان السياسي و لنبتعد عن مثل هذه الاشياء التي تمس حرمات احياء و اموات كثيرين

Quote: نأكل مما نزرع ونلبس مما نصنع

سلام يا معاوية
إن لم نلبس من ما نصنع فلنلبس من ما تصنع الصين فهم قد سخرهم الله لنا .