اعتذار - عله يليق - للجسورة مواهب ابراهيم و للاحباء عمر عشاري و حمور زيادة

الجسورة مناهل :

انفعلت في البوست الفتحتيهو - البوست اتحذف - كتبت كلام بصورة تعسفية، انا حالياً شايفو ما كان لائق، و كان عسفا،ً و حشفاً و سوء كيل .. كان مفروض اراعي فروقات الاحساس، انا بعيد و انت يدك في النار، انتو في خضم المعركة، و انا بعيد وعندي خيارات اصدق او اكذب الخبر .. عندي خيارات اعمل ساين اوت و انسى كل القريتو، و انفعلت بيهو .. عندي خيار ارجع للبيت سالماً و انغمس في حياة تانية.
كلامي كان منتهى الانانية و العسف و التنظير ...
اسف جداً يا ستي على اي كلمة كتبتها بدم بارد هنا .. و نادم عليها ( حذف البوست ما بعني اني ما كتبتها، كتبتها يعني فكرت فيها، ودي بس تتطلب اعتذار .. الكتابة مسئولية و الكلمة كالرمح لا يمكن استعادتها بعد اطلاقها.. و الله لو كان هناك ثمة طريقة لفعلت )

ارجو صادقاً ان تقبلي اعتذاري
و لك انحناءة تليق

عمر عشاري
سي سي من الكلام الفوق يخصك تماماً .. سامحونا .. و تباً لزين الهاربين اذ استهلك العبارة و فقدها معناها " الآن فهمتكم "

ختيت ليك الوش حيث لا يجدي، طمعان في تفهمك المعتاد

محبة اكيدة


حمور زيادة :

يا سيدي زحمتك هنا لانو ما لقيت منك رد و خالك خذلني كالعادة

خليني اسرد ليك الوقائع الاستدعت الزحمة هنا( حسب ما رايتها ) :

المذكرة التفسيرية حول " الفجيعة " ما كان قداما اسم و ما كان موجهة لعمر عشاري بدليل انو بعد الخط اتعنون لعمر ...

يبقى الفهمتو اني المعني بها في المقام الاول .. بعد داك للمتابع

راجعت مداخلتي - قبل الحذف طبعاً - و حذفت ما ظنيت انو السبب

يا سيدي لك العتبى حتى ترضى ..

و تاكدوا ثلاثتكم من عظيم المحبة

الجسورة ...مناهل ابراهيم وليس مواهب ...ياقيقا


صراحة كنت مندهش لتلك المداخلة............الغريبة كتبت ليك والبوست اتحذف يا صديقى


نتقابل بعدين ..

سلام

تحياتى لك ولهم.. مناهل.. حمور... عمر

Quote: صراحة كنت مندهش لتلك المداخلة............الغريبة كتبت ليك والبوست اتحذف يا صديقى

ما قريتا يا ابو السا
هببت شنو؟ .. اعترف سريع؟ ( الوشوش - لحظ ملاسي الكويس - ابت تشتغل معاي )

المفارقة : انو اول مداخلة لي في البوست نصحت العزيزة مناهل ما لم انتصح بيهو مايسلف!! " انو ما تكتب منفعلة "





--------

خليك عميغ ياخ ... ما اهو جوة كتبتها صاح!؟
نتلاقى بعدين نسوي المسألة دي بالدرب عديل

يا عمك

Quote:

محتار مالك!؟

انا هنا بعتذر عن الكلام غير اللائق .. اللائق في محلو ( و لّ برضو بدورلو اعتذار كمان!؟ )
بعتذر عن بلادة الاحساس ..
بعتذر عن سوء التوقيت .. و الكلام حيث ابلغ السكات
بعتذر عن عجزي و قدرتي - يا للهول!! - على التطاول على الناس القادرة
بعتذر عن الذهول دا
بعتذر عن الفرصة الضيعتها على نفسي بشبال - من صلعة الخال - لو كان نقطت الناس بسكاتي



-------

انت دا ما بتقدر تسكت!؟
مداخلتك و سؤالك التعسفي هم الخلوني افكر
صحي انا : بقيت رمادي!؟

يا عزيزي ليس في الامر الوان ...
القصة اني لبست لي روب واعظين .. و خطبت في المكان و الزمان الخطأ
بحاول اتسق مع نفسي
رمادي .. رمادي
هوو كيرز!؟
و زي ما قالت بهناك ذاتو يا رمادي انت!؟
انا بنوم معاي ضميري ما انتو ديل
اضربوا البوهية العاوزنها .. كل زول يختار اللون البناسب شعرو و شعورو
و هاك شبال مني محبة ساااااااااي
شكرااااااان يا عمك
آخرتا كوم تراب يا فردة ... و كل شاة معلقة من رقبتا بعدين

ما دام الكلام دا في جزئية محددة تمام يا عمكـ
أنا قايلكـ اعتذرت من الكلام الوصفتكـ فيهو بالرمادي!
هنيئا لكـ بالرماية يا قيقا
وزي ما قلت الواحد في النهاية معلق من اتساقو يا حبيب!

شكرا ياخ!
شكرا على الشبال!
كلامكـ القلتو فوق تحت الخط دا بعبّر عني تماما!

Quote: هنيئا لكـ بالرماية يا قيقا

يباركو ليك السمح يا عمك

هاك الرمادية دي ( جمال انعم - كوز يمني )

Quote: نحن هنا لا تجمعنا كراهية صالح ونظامه، وإنما يجمعنا الحب: حب الحياة، حب الحرية والخير والحق والجمال، نحن «فدائيو المحبة، نحب المحبة ونعادي العداوة» بحسب بديع الزمان النورسي، نعادي العداوة ذاتها، وليس الأعداء، تراهن ثورات التغيير على تفوقها الأخلاقي، وعلى الثوار أن يكونوا سادة أنفسهم، يسيرون منتصرين على ضعفهم ورذائلهم وأحقادهم وأطماعهم الصغيرة، متسامين فوق كل المطامح التي تعيق السير وتوهن العزم،وتشتت القوة، لتتركز الطاقة على الهدف الكبير، يجب ألا نتماهى مع أدواء القهر وألا يكون نضالنا فعلا انتقاميا يُخرج أسوأ ما فينا بحيث نتساوى والقهر الذي نجابهه، لنحارب الأفكار الشريرة داخلنا كي ننتصر في معركتنا ضد الشرور التي تتسيد الواقع. البلطجي الذي يحمل الهراوة بيد، وصورة الرئيس بالأخرى، يماهي ويماثل بينهما تماما، يبدو الرئيس الهراوة الكبيرة، تحضر صورته أداة جريمة، سلاحاً قاتلاً، دافعاً ومحرضاً، وقائداً رئيس، نحن هنا في مواجهة هذه الهراوة التي تلاحقنا منذ ثلاثة وثلاثين سنة، نحن هنا ضد حكم البلطجة. شهداؤنا يسقطون برصاص الأمن وقنابل موالية للحاكم، شبابنا في مواجهة مفتوحة مع بلاطجة الرئيس، وما سلبه من شعبه يستخدمه في ضربه. الأخ الرئيس، تعرف من يؤجر البلاطجة ويؤويهم، ويدفع لهم، باسم من يهتفون، وصورة من يرفعون، هم صورة حكمك، هم بعض مشاهد الخزي الأخيرة، اللواذ بالبلاطجة عقاب يليق بحاكم مقيت مطرود، سبقته إساءته إلى نفسه بما لا يدع متسعا للإساءة. نحن نعيش، نتنفس حرية، نعانق السماء، نقف على مشارف الصباح، نحتضن الوطن ملء القلب، نرسمه بالدم القاني والأرض غناء أيوبي راعف فتان «وهبناك الدم الغالي وهل يغلى عليك دم». شهداؤنا الأبرار، قسماً لن نعود، لن نخون دمائكم، لن نخذل تضحياتكم، لن نجلس مع الشيطان على مائدة حوار، حسم الخيار، والمتقدمون ما عادوا ينظرون خلفهم، ما عادوا يبالون بمن ينتظر أو ينظر من بعيد.

بدل صالح بالبشير
اشبع مفردة ( بلطجي ) باسوا ما تحتمل و ما تقيف عند ( مغتصب )!!

Quote: كلامكـ القلتو فوق تحت الخط دا بعبّر عني تماما!

و كلام جمال انعم الكوز اليمني دا بمثلني انا دا تماماً برضو ..

التوقيع :

قيقا الرمادي

والله يا قيقا داير أقول ليكـ بعبّر عني!
لكن عشان ما نكتر في التعابير ح أضطر
أقول ليكـ قوم لف!!

Quote: اعتذار - عله يليق - للجسورة مواهب ابراهيم و للاحباء عمر عشاري و حمور زيادة

أصالة عن نفسي و نيابة عن الجسوره مواهب إبراهيم و الأحباء عمر عشاري و حمور زياده نرفض اعتذارك جملة و تفصيلا و نهديك رائعة وردي (اعتذارك ما بفيدك ودموعك ما بتعيدك العملتو كان بايدك) و بنفس أصالتي المذكوره و نيابتي عن المذكورين أدعوك إلي وقفه صادقه مع النفس حبذا لو صاحبتها وقفه من الكتابه في هذا المكان لعدد غير محدد من السنين !!
و شكرا ...

يا قيقا ياخ انا ما زعلت من كلامك ولا شي.
قول بسم الله.
كلامي عشاري فهمو انو رأيي اتغير فيو و انت فهمتو نفس الفهم .. يبقى انا الكنت غلطان في التعبير عشان كده كان لازم اشرح كلامي.
وانا الكنت منتظر عشاري يجي لو قال لأ كلامي ما كان كده في الاول كنت اعتذرت ليو.


بالنسبة لمناهل فانا اعتقد يا قيقراوي اعتذارك غلط و هي لا تستحق منك اعتذار.
مناهل لم تشتم مرتكبي الجريمة عشان نقول زعلانة. هداك في بوست معنون باسم البشير مسميهو القواد.
زي ده ممكن نقول كلام زول زعلان و بيشتم مرتكب الجريمة و المسئول عنو.
لكن مناهل قذفت عرض ميت بمطاعنة و تلميحات زول واعي هو بيقول في شنو. و اساءت لأحياء ما عندهم علاقة بالجريمة دي.
ما كلام غضب ولا شي.
ولو فرضنا انو عنوان البوست كان غاضب فمناهل ظلت ليوم كامل تعيد و تكرر نفس المطاعنة القبيحة.
بل زادت عليها انو المعترضين عليها هم الناس "الوصلتم الرسالة حقتا" في اشارة انهم امنجية.
ما فعلته مناهل ابراهيم لا اسم له سوى "قلة أدب".
تبقى مناضلة .. تبقى زعلانة لصفية .. تبقى ما تبقى.
هذا لا يغير من الحقيقة شيئاً.
انا كل العربي الصرفتو في الموضوع ده بس بخطأ اني قايل مناهل زولة كويسة.
لكن اصرارا و طريقتا في الرد على الناس خلتني اعرف اني انا الكنت فاهما غلط.
واصبحت مناهل عندي زي مجموعة من الزملاء هنا دي طريقتم و ده فهمهم .. فاصبحت لا اهتم ان طلع منهم العيب.
لأنه بيشبهم و لأنه طريقتم.
لذلك لا اتوقع ان اتداخل معها مرة اخرى لائما لو كتبت اي حاجة تانية زي دي.
لأنو الزول الزي ده لا بينفع معاهو الكلام لا بيستحقو.


لكن خلعني امين طبعا هسه.
غايتو اتوقع بس انو امين ما عارف الموضوع و ما قرا البوست.
لأني - اعترف- و انا بكتب في بوست مناهل و بقرا في ردود الناس كنت منتظر أمين يجي.
قلت مافي زول حيجي يكتب بتجرد من فرضية "مناضلة فهي على صواب" و فرضية " حكومة فأي شي يشتما مباح" إلا أمين.
فما فهمت هزارو هنا قاصد بيو شنو الا انو ما يكون عارف القصة شنو.

Quote: لكن خلعني امين طبعا هسه. غايتو اتوقع بس انو امين ما عارف الموضوع و ما قرا البوست. لأني - اعترف- و انا بكتب في بوست مناهل و بقرا في ردود الناس كنت منتظر أمين يجي. قلت مافي زول حيجي يكتب بتجرد من فرضية "مناضلة فهي على صواب" و فرضية " حكومة فأي شي يشتما مباح" إلا أمين. فما فهمت هزارو هنا قاصد بيو شنو الا انو ما يكون عارف القصة شنو.

سئيلي الله يا حمور أنا ما فاهم التكتح : لقيت أستاذ فتحي مقنطر رقبتو : شتو و مشيت !!

سلامات ياقيقراوي

Quote: التوقيع : قيقا الرمادي

حاشاك ماك رمادي ! ولاك صاحب موقف مائع أو مهادن !
عرفناك - ومن حيث المبدأ - تقف ضد حكومة الانقاذ- وضد الشمولية والإقصاء وضد ممارسات الإنقاذ !! وعرفناك واقفا مع الديموقراطيةوالحريات والعيش الكريم !
والرمادي لايستطيع أن يعلن موقفا مبدئيا من هذه القضايا ...والأسوأ من الرمادي هو من يخفي كوزنته تحت ستار الإستقلالية وإدعاء
الحياد وخدمة أجندة النظام عبرموقعه هذا فتراه مخذلا ومبررا أو متفرغا للهجوم علي خصوم الانقاذ من دون أن يكرس جهدا قليلا للتصدي للأنقاذ! . ..تراه يمارس التذاكي ومحاولةزر الرماد في الاعين متجاهلا أن للناس عقول.....

......

قيقرا يا عمك
تكتب ثم تشرح ما كتبت ثم تعتذر ثم تشرح اعتذارك ثم تكتب تاني ثم ... إييييييك

Quote: سئيلي الله يا حمور أنا ما فاهم التكتح : لقيت أستاذ فتحي مقنطر رقبتو : شتو و مشيت !!

القصة يا أمين انو "الجسورة" مناهل ابراهيم فتحت بوست سمتو : أوقفوا اغتصاب النساء يا أولاد حاج نور.
لما سألوها ليه حاج نور بالذات قالت البيعرف الكيزان حيفهم ليه حاج نور.
واي زول اعترض عليها و قال ليها تخصيصك لحاج نور اشارة واضحة لا يمكن تجاهلها و ده عيب منك صرفت ليو أمنجي طوالي.
وظلت طوال بوستها تؤكد انو الكتبتو ده رسالة لناس الامن و هم حيفهموها.

جوها قالو ليها ياخ حاج نور ده عندو قريبتو عضوة منبر.
قالو ليها حاج نور اولادو المباشرين بيسألو عن علاقة ابوهم بالكلام ده.
وظلت هي على جسارتها تكرر يا أولاد حاج نور و تقول لأي زول بيعارضا شكلو رسالتي وصلتكم يا أولاد حاج نور.

اها صاحبنا قيقا كان من الناس الاعترضو على كلاما ده.
وهسه بعد شاف فيديو صفية جايي يديها عذر الغضب.
وانا لا اتفق معاو نهائي.
و ود الصايم مغبون طبعا من وصفو من قبل بالرمادية و لما ادان كلام مناهل طبعا دخل معاي و غيري في زمرة البيجو في الهايفة و يتصدرو لأنو القضية أهم من غلط مناهل.
عاطف مكاوي تلقاهو في بوست ياسر طيفور بيقول في كلام قريب من ده انو الناس حتخلي الموضوع و تجي تمسك لياسر في العنوان حق أمير المؤمنين.
في بوست "الجسورة" مناهل كان في مها عبد الله مصممة انو ليه الناس زعلانين لحاج نور كأنو شرفو أهم من شرف صفية.
خلط غريب كأنو طالما الحكومة بتغتصب النساء يبقى من حقنا نقع في عرض اي زول حي ميت . و كأنو يا تقول لمناهل عيب او تدين الاغتصاب ما ممكن تدين الاتنين.

صاحبنا عمر عشاري بقى كان شايف انو نقاش عنوان البوست اخد زمن بينما الناس من الافضل تناقش القضية.
وانا كنت مصمم انو بوست مناهل ما فيو قضية.
قضية صفية في عنها بوستات كتيرة جدا بينما بوست مناهل مافيو غير عنوانو.
مناهل حتى ما كتبت شي غير العنوان.
وظلت بس ترد على المتداخلين بهتاف.
المعاها تديو هتاف ضد الكيزان.
الضدها تصرف ليو أمنجي و يتخارج.

قرفان يا أمين.
قرفي على الحصل لصفية تمدد ليشمل كتابات مناهل.
لأنو المغتصبين جو من عقلية زي حقت مناهل دي.
هو ضدي فهو مستباح ولا حرمة له.
هو ضدي فحلال فيه كل شيء.
بس للصدفة مناهل في صفي. بينما بتوع الامن على الضفة الاخرى.
لكن هل ده سبب كافي يخليني الغي ضميري و اقول ما مشكلة خليني أعدي ليها؟
عموما زي ما قلت لقيقا تاني حاعدي ليها مش لأني موافقا.
لأ .. لأني خلاص فهمتها.
زيها زي ناس قليلة أدب كتير هنا بتعتبر دفاعا عن الحكومة او معارضتا ليها سبب كافي لقلة الادب.
فما حازعل تاني لأنو الضرب في الميت حرام.

Quote: قيقرا يا عمك تكتب ثم تشرح ما كتبت ثم تعتذر ثم تشرح اعتذارك ثم تكتب تاني ثم ... إييييييك

يا البشري ياخي شايفك طوالي بالي أستاذ فتحي ده : كفايه عليه بكري بالله !!!








-----------
يا اخوانا بالجد عايز زول يشرح لي الحاصل شنو هنا !!

Quote: قيقرا يا عمك تكتب ثم تشرح ما كتبت ثم تعتذر ثم تشرح اعتذارك ثم تكتب تاني ثم ... إييييييك

يا البشري ياخي شايفك طوالي بالي أستاذ فتحي ده : كفايه عليه بكري بالله !!!








-----------
يا اخوانا بالجد عايز زول يشرح لي الحاصل شنو هنا !!

كمال عباس يا عمكـ .. وحسب تصنيف خدر لي بالرمادي
أها كلامكـ الفوق دا بنطبق علي ولّ كيف الكــلام؟





_
بروف أمين .. ول وافقت على كلام حمور دا تبقى رمادي وتقيف معانا في الصف طوالي!!

يا ود الصايم الكلام كان ياهو كده وله انا نسيت حاجة او زدت حاجة ؟
ذكرني عليك النبي باقي اخوك الكبر دخلو.



ــــــــ
كمال عباس زاتو كان معانا في الكبسيبة لكنو زاغ باحترافية.
جا قال بعيدا عن العنوان و الاشارة لحاج نور رحمه الله و كب كلامو.
خت اعتراضو بطريقة راقية خلتني احسدو.

سلامات ياحمور

Quote: كمال عباس زاتو كان معانا في الكبسيبة لكنو زاغ باحترافية. جا قال بعيدا عن العنوان و الاشارة لحاج نور رحمه الله و كب كلامو. خت اعتراضو بطريقة راقية خلتني احسدو.

وإنت مابتفوت عليك حاجة كلو كلو ?
يا حمور الأوضاع دي ماشة في إتجاه خطير ولو ماتم تدارك كوارث جهاز الامن أخشي أن يتعدي الموضوع حدة وحرة الأخت مناهل لما هو أسوأ :- الدم والقتل والثأرات فالمرارة والأحساس بالذل والقهر والمهانة سيقود لنتائج خطيرة.. قلت في بوست مناهل :-
(ماحدث من إنتهاك لإنسانية البشر والتعدي علي حرمة الجسد الإنساني والإذلال والتعذيب قد يفرز أكثر من هذا الخطاب الحاد والملتهب فالعنف سيولد عنفا مضادا والوحشية قد تقود للإنتقام ولممارسة حق الدفاع عن النفس ما دامت البلاد تنحدر نحو الهوة بهذه السرعة الرهيبة بلا قانون ولا ضابط ..... الموضوع خطير ويحتاج لوقفة جادة ومواجهة صارمة تعيد الأمور لنصابها والإ فسينفجر الوضع بشكل لايمكن التحكم فيه...)
.....

يا قيقا حقو نشيل نص لقب العميق من الدكتور و نلصقو ليك لأن عموقيتك ماشه زايدة.

اسه المشكلة في كلام مناهل ده بس انها شتمت زول ميت دون مراعاة لأهلو و حبايبو؟ و لا انها اصلآ قالت كلام غلط؟ يعنى بتفرق شنو لو كان زيد او عبيد لواطى أو لم يكن في سياق الصراع السياسي ده؟
-------------
نصف العميق قيقا: لو زعلان من أى جهة تانية نحنا ذنبنا ايه؟ رد على الايميلات و لو بنصف ابتسامه

متعكم الله بالمتعة ...












... المهم ....

أول مرة أشوف ود أخت أفهم من خالو....!!!!

الناس بقولو الود خال ... غايتو دي جلت المرة دي


أخونا حمور و الله إنت كــــدا

سلامات ياود الصائم

Quote: كمال عباس يا عمكـ .. وحسب تصنيف خدر لي بالرمادي أها كلامكـ الفوق دا بنطبق علي ولّ كيف الكــلام؟

الإجابة محولة للأخ خدر بهولندا ! كدي أول حاجة نثبت تصنيف خدر بعدها
نشوف موقع ود الصا يم من كلامي الفوق دا ! ...بالجد لاأميل لإختزال طرح عام في شخص معين ...

سلام يا حمور

Quote: خلط غريب كأنو طالما الحكومة بتغتصب النساء يبقى من حقنا نقع في عرض اي زول حي ميت . و كأنو يا تقول لمناهل عيب او تدين الاغتصاب ما ممكن تدين الاتنين

شفت البوست و دخلتو مره لكن ما تابعتو : ما بقدر أحكم علي منو قال شنو بدون ما أقرا الكلام حرفيا ، لكن للضمان كده عنوان الأخت مواهب أقل ما يقال عنو إنو يفتقد للباقه و الحس السليم ...
و خليني بالمناسبه التعيسه دي اعبر عن وجهة نظري في موضوع المعارضه و الحكومه في المنبر ده و في خارجه : بالنسبه لي القصه أصلا ما معارضه ولا موالاه : المساله كلها مرتبطه بالاخلاق و مدي فهمي للاخلاق : اعارض الأنقاذ لانو أراها بلا أخلاق و اعارض بعض منسوبي المعارضه لاني أراهم بلا أخلاق : و لا اهتم إذا صنفت إنو رمادي زي الصايم أم بنفسجي زي البشري !!
all this been said : لا أري مبرر و لا سبب و لا منطق لموالاة الحكومه بحجة تفاهة المعارضه !!

Quote: بالنسبه لي القصه أصلا ما معارضه ولا موالاه : المساله كلها مرتبطه بالاخلاق و مدي فهمي للاخلاق : اعارض الأنقاذ لانو أراها بلا أخلاق و اعارض بعض منسوبي المعارضه لاني أراهم بلا أخلاق

كلام زيي العسل يا امين و اتفق معاو تماما و يعبر عني.

Quote: لا أري مبرر و لا سبب و لا منطق لموالاة الحكومه بحجة تفاهة المعارضه !!

دي طبعا حجة لما اسمعا بقرب تجيني جلطة.
لأنو في مساحة واسعة تسع اي زول بين "التنظيمات المعارضة" و الحكومة.
ممكن تشيل ملايين البشر.
يعني ازهج من الحزب الشيوعي و اشوفو ######## لسلوك منسوبيه ممكن تكون مفهومة.
اقنع من حزب الامة و اشوفو ابن ستين في سعبين لسلوك انصاره ممكن تكون مفهومة.
لكن هل المعارض ده كان معارض عشان حزب الامة او الشيوعي او الاتحادي او اي حزب ؟
اقتنعت ياخ انو ديل كعبين انفض يدك من التنظيمات المعارضة و اقرا عليهم الفاتحة.
و خليك معارض من منازلهم .. او معارض قطاع خاص.
ليه الا تكون تبع منظومة او تكون تبع الحكومة ؟
دي فرضية غريبة جدا.
وهي نفس فرضية الحكومة بتاعة بتعارض فانت شيوعي.
لازم تكون بتعارض لأنك تابع لمنظومة .. و المنظومة دي لازم تكون ضد الاتجاه الاسلامي ما ضد اي شي تاني.
لاحظ انو صفية نفسها تم استجوابا - و ربما اغتصابا - لأنها شيوعية.
فطالما هي معارضة فهي شيوعية.
ولأنها شيوعية فهي لازم تكون كافرة و بتبول واقفة و منفتحه جنسيا.
فلما قالت ما عندها تجارب جنسية ما صدقوها. مش الشيوعييات مطاليق و بينومو مع الزملا ؟ كيف ما تكوني زيهم.

فقصة زول يقول بقيت مع الحكومة عشان المعارضة ########ة ده زول كايس ليو حاجة يبرر بيها ساي.
ذكرني الهادي بشرى .. لما ساب المعارضة و جا من المطار يقول : اقول لأهل الانقاذ اعدو لي سيفا و مركبا اقاتل معكم.
وتكلم في المؤتمر عن سوء و خبال التجمع الوطني.
لكنه لم يذكر بحرف قضايا الحريات و التعذيب و الانقلاب العسكري و غيرها من الاشياء التي كان يعارضها في الحكومة حين كان في التجمع.
نفس ما يفعله من يقول كنت معارض و بقيت حكومة عشان المعارضة كعبة.
طيب اكتشفت سوء رفاق المعارضة .. فهل صلحت الحكومة ؟
دي - غالبا - الواحد بيعمل منها رايح.












ــــــــــــــــ
يا كمال عباس ..
والله قصة الغباين دي اظنها رقدت و بقت و من الصعب تداركا بعد ده.
انها الثأرات ي يا صديق للأسف.

كمال يا عمكـ .. لكـ التحية بأضعاف أمثالها
لكن زغت برضو بصورة دبلوماسية زي ما قال حمور!

قال الصايم :

Quote: بروف أمين .. ول وافقت على كلام حمور دا تبقى رمادي وتقيف معانا في الصف طوالي!!

و قال أبوالحسين الوهمي :

Quote: أول مرة أشوف ود أخت أفهم من خالو....!!!! الناس بقولو الود خال ... غايتو دي جلت المرة دي

و أقول بعد أن أحمدك ربي و أستعينك :
ما عارف يا الصايم لو كلامي و رايي طابق كلام حمور ولا لا ، لكن - و الكلام موجه لابوالحسين الوهمي - هذا الحمور محتاج ملايين السنين العاديه منها و الضوئيه عشان يصل مرحلة الفهم و العماقه الأنا فيها دي : هذا الحمور لا يسوي شعرة في صلعتي ، و أحسن تقفل الموضوع ده هنا عشان ما تجيب ليه زيادة اساءه !!!

مناهل وعمر وحمور وقيقا، عليكم الحب ورحمة الله وبركاته..
____
دكتور أمين يسِمّك!

Quote: بالنسبه لي القصه أصلا ما معارضه ولا موالاه : المساله كلها مرتبطه بالاخلاق و مدي فهمي للاخلاق : اعارض الأنقاذ لانو أراها بلا أخلاق و اعارض بعض منسوبي المعارضه لاني أراهم بلا أخلاق

يا حمور ما مشكلة الكلام نصيا .. الكلام على الفكرة نفسها!!

Quote: يا حمور ما مشكلة الكلام نصيا .. الكلام على الفكرة نفسها!!

أو بالأصح المعايير الثابتة!

موضوع المعارضه ده محتاج ليهو نقاش براهو و في وقت مناسب ما تكون الناس مشحونة كده, و لا رايكم شنو؟ للعميقين و خاتفين تلاته الوان

و ما بقصد وضع الاحزاب و كده, انما فكرة و مبدأ و مبعث ان تعارض شئ, امين اتكلم عن الأخلاق مثلآ ... هل في حاجات تانيه؟

ياخي أنا رادي هنا لبوست بهناك !!!

Quote: موضوع المعارضه ده محتاج ليهو نقاش براهو و في وقت مناسب ما تكون الناس مشحونة كده, و لا رايكم شنو؟ للعميقين و خاتفين تلاته الوان و ما بقصد وضع الاحزاب و كده, انما فكرة و مبدأ و مبعث ان تعارض شئ, امين اتكلم عن الأخلاق مثلآ ... هل في حاجات تانيه؟

جبر الله يا عمكـ
الأخلاق هي البتضع للناس استاندر تمش بيهو لباقي القضايا!
هي الأساس وهي مربط الفرس وهي البتخلي الناس تحدد مواقفا!
أما بالنسبة للوقت .. فهل تقترح إنو يكون بعد ما نغيّر النظام مثلا؟


بالنسبة لقصة الناس مشحونة وكـدا .. فبتخيل لي الناس
مفروض تنتهز الفرصة دي لتحييد الناس وتخلي الناس في صفّكـ
بالضرب على أوتار أخلاقهم .. مش تشوف الغلط عينكـ ليهو
وتقول ما مشكلة في سبيل إزاحة النظام .. طيب لمن تصل
إنت أنا أضمن كيف إنكـ ما ح تغض طرفكـ تاني من الغلط؟

يا عمك ياخ انا طلبت شهادتك في الكلام نصياً عشان ما اكون حكيت لأمين شي تداخلت فيو مشاعري او افكاري الخاصة فحرفتو عن ما حصل.

لكن بالنسبة للفكرة فهي بالنسبة لي كما قلت فوق :

اللذين اغتصبوا صفية أتوا من ذات العقلية التي تتحدث بها مناهل ابراهيم .. هو خصمي فهو مستباح لا حرمة له.

و انا لا يمكن ان احتفي بعقلية كهذه قط.

التلخيص دا يا حمور أبلغ من تلتمية مقال طالعين من راسكـ الماكن دا!!

أكيد يا عصام اسباب المعارضة ( على المطلق ) متفاوته.
في معارضة لاسباب ايدلوجية .. في نظام حكم ماركسي طبيعي ان يكون الاسلامي مثلا معارضا هدفه "تغيير كلي لطريقة الحكم ".
في معارضة ديموقراطية داخل المنظومة .. يعني لو فاز حزب الامة مثلا بالانتخابات فالحزب الاتحادي سيكون معارض و يتصيد له الاخطاء ( لا يصنعها و لا يتصيدها بما يخل بالدولة نفسها ) حتى يسقطه في الانتخابات القادمة .. لكنه ( المفروض) انه لن يعمل على انقلاب عسكري او ثورة شعبية تطيح به.
في معارضة اخلاقية .. دي زي حقتنا نحن ناس قريعتي راحت الما منضويه لاحزاب او هياكل .. نحن ضد ما هو سيء. ما هو سيء من جانب الدولة بيكون منعكس عليك و عليّ و على أمين عشان كده كراهيتو بتكون أشد و الوقفة ضدو اعنف.
واكيد في تقسيمات اخرى - ربما أدق - ممكن انت تجيبا او تزيدا.

كتب الاخ حمور

Quote: في مساحة واسعة تسع اي زول بين "التنظيمات المعارضة" و الحكومة. ممكن تشيل ملايين البشر. يعني ازهج من الحزب الشيوعي و اشوفو ######## لسلوك منسوبيه ممكن تكون مفهومة. اقنع من حزب الامة و اشوفو ابن ستين في سعبين لسلوك انصاره ممكن تكون مفهومة. لكن هل المعارض ده كان معارض عشان حزب الامة او الشيوعي او الاتحادي او اي حزب ؟ اقتنعت ياخ انو ديل كعبين انفض يدك من التنظيمات المعارضة و اقرا عليهم الفاتحة. و خليك معارض من منازلهم .. او معارض قطاع خاص. ليه الا تكون تبع منظومة او تكون تبع الحكومة ؟ دي فرضية غريبة جدا.

وفي ناس بتبني رأي في المعارضة مش لموقف من الاحزاب اللي في السودان
وإنما لموقف من من بعض الافراد المعارضيين -في الاسفير واللي لا يمثلوا في واقع الأمر الإ أنفسهم ! ياأخي كون قناعتك ورؤيتك مما يحدث في وطنك إنطلاقا من مبدأ ومن إحساس بما يجري في الواقع العملي لا من كتابات النت .... المعارضة قبل أن تكون كيانات ومواعين فهي موقف ورؤية مبدأ !!
00
نعم هناك كتابات بعض الأفراد المعارضيين تضرس ومليانة شتارة وهناك بعضهم ممن يضر بقضية المعارضة ويخدم الحكومة من دون وعي !! وهناك صاحب الأسلوب الجارح والمنفر الخ ولكن كل موقف من هذا يحسب علي صاحبه ولن يجعل عاقل يتواطئ بالصمت أو يؤيد أو يداهن حكومة تدمر وطن وشعب !!
00 وبذات القدر لا أعتقد أن إسفاف وكوارث كتابات بعض منسوبي الانقاذ بالمنبر هي التي دفعت حمور ليعارض الانقاذ ! فحمور عارض الانقاذ لنهجها وخطها ولممارسات قمة السلطة ولفظائعها الماثلة للعيان بأرض الوطن ! .. ولو أفترضنا أن كل كوادر المؤتمر الوطني بالمنبر كانوا ملائكة في التعامل والطرح والأسلوب فهذا لن يغير رأي كمال عباس في الإنقاذ مادام منهج الانقاذ معطوب ورؤيتها شمولية وإقصائية وممارستها شائهة وقيادتها تقتل وتعذب وتمزق في نسيج الوطن وتهين وتذل إنسانه !
.......

معليش يا كمال
لكن غضّ طرف المعارضة عن مساوئ المحسوبين عليها
يتساوى عندي بغض طرف النظام عن تصرفات منسوبيه!!

مش مفروض المعيار يكون ثابت؟
ولّ بتغير على حسب الكفة؟

كتب ود الصايم

Quote: معليش يا كمال لكن غضّ طرف المعارضة عن مساوئ المحسوبين عليها يتساوى عندي بغض طرف النظام عن تصرفات منسوبيه!! مش مفروض المعيار يكون ثابت؟ ولّ بتغير على حسب الكفة؟

إن كنت تتحدث علي مستوي ما يحصل في المنبر فدعني أقول:-
إن التجاوز والغلط والتجريح يظل خطأ بغض النظر عن اللون السياسي لقائله أو والدين والعرق والجهوية ! فإنتماء فرد للإنقاذ ليس مسوغا للتعدي عليه وإنتماء شخص ما للمعارضة لايعطيه حصانة ضد النقد والمحاسبة والعكس صحيح أيضا !
........ ولكن ما أقوله وحمور هنا ينادي بضرورة أن الا نربط معارضتنا للإنقاذ بموقفنا من بعض الافراد هنا قلت في هذا:-

Quote: ياأخي كون قناعتك ورؤيتك مما يحدث في وطنك إنطلاقا من مبدأ ومن إحساس بما يجري في الواقع العملي لا من كتابات النت .... المعارضة قبل أن تكون كيانات ومواعين فهي موقف ورؤية مبدأ !!

وقال حمور

Quote: مساحة واسعة تسع اي زول بين "التنظيمات المعارضة" و الحكومة. ممكن تشيل ملايين البشر. يعني ازهج من الحزب الشيوعي و اشوفو ######## لسلوك منسوبيه ممكن تكون مفهومة. اقنع من حزب الامة و اشوفو ابن ستين في سعبين لسلوك انصاره ممكن تكون مفهومة. لكن هل المعارض ده كان معارض عشان حزب الامة او الشيوعي او الاتحادي او اي حزب ؟ اقتنعت ياخ انو ديل كعبين انفض يدك من التنظيمات المعارضة و اقرا عليهم الفاتحة. و خليك معارض من منازلهم .. او معارض قطاع خاص. ليه الا تكون تبع منظومة او تكون تبع الحكومة ؟

.........

Quote: طيب لمن تصل إنت أنا أضمن كيف إنكـ ما ح تغض طرفكـ تاني من الغلط؟

و دي مرتبطة برضو بمداخلة صديقنا كمال عباس الشحمانة ..
فكرة تصل انت النحن بنقولا في البورد ده فيها عدم دقة .. عدم دقة ما مضر لما يكون الكلام زي حق ود الصايم هنا لعصام .. لكنو مضر لما يصبح موقف عنيف من المعارضة كفعل خشية من وصول "انت " كزول محدد انت بتناقرو و تكرهو.
سقوط نظام الانقاذ ما حيجيب عمر فضل المولى مثلا من حزب الامة رئيس وزراء .. و لا ماشي يجيب عصام جبر الله كعضو في مجلس السيادة ممثلا للحزب الشيوعي.
ففكره سقوط المعارض اخلاقيا في البورد ليست مبررا للتخوف من حكومة المعارضة.
وده بيقودني لحته تانية حارقاني ليها زمن لمن نتكلم عن ثورية الشعب السوداني.
احضروني يا عصام و يا كمال عشان انا حاجوط الدنيا و احفتح على نفسي بلاوي.
اعتقد ان اكبر اخطاء الثورات السودانية ( اكتوبر و ابريل ) انها كانت هبات شعبية للغضب تنتهي بتسليم السلطة لهياكل قائمة و الذهاب الى البيوت و الاكتفاء بعد ذلك بالزهج و الغضب من هذه الهياكل حتى نسمع اول بيان عسكري قضى عليها.
فكرة ان هناك اخرين سرقوا ثورات السودان هي الجزء الاصغر من اننا ضيعنا ثورات السودان بفهم ان ما علينا هو ان نسقط حكومة و خلاص.
وهذا يقدح تماما في فكرة الثورة لأن جزء اصيل منها هو تغيير مجتمعي يجعل الشعب فاعلا اصيلا في الرقابة على السلطة.
قامت ثورة ابريل و حدث ما اعتبره انا انقلاب عسكري ترضوي للشعب.
ثم حدثت انتخابات حزبية لم تحسن ادارة الوطن.
لم يتحرك الشارع لمراقبة مكتبساته بل اكتفى بالتفرج على المكايدات السياسية.
يتفرج و يتحسر. كأنه لا دور له.
لذلك يوم جاءت الانقاذ راهن عليها.
اقول هذا ربما متأثرا بالتجارب الثورية الحالية تونس و مصر.
تونس ما زال الشارع يضغط.
مصر غدا ستكون هناك مليونية لاسقاط حكومة شفيق و المطالبة بسرعة محاكمة الفساد و ربما المطالبة بطرد مبارك خارج مصر من باب ان تطمئن قلوبهم.
بينما في ثورة ابريل حين جاء وفد المحامين السودانيين لمصر مطالبا بتسليم نميري و فشل لم يهتم الشعب و لم يحاول الضغط على الحكومة بأي شكل لتحقيق هذا المطلب و لا هدد بمقاطعة المصالح المصرية باعتبارها معادية للثورة.
بكل بساطة فرح الناس ان نميري ذهب.
هل كانت الاحكام على عمر محمد الطيب مرضية لهم ؟ لم يقولوا.
هل اهتموا بمحاكمة نميري ؟ ( كشعب لا كنخبة ) لا اظن.

اذن مسألة ان عصام جبر الله ( مثلا و ليتحمل التمثيل به ) كعب في البورد ثم قمنا بثورة و جاء عصام جبرالله وزيرا للخارجية مثلا.
ما الذي يجعل هذا التعيين قدرا علينا ان نرضخ له ؟
لماذا لا نرفض نحن الذين اسقطنا حكومة كاملة تعيين وزير بحجة انه غير مناسب اخلاقيا ؟
فكرة ان دور الناس ينحصر في الخروج للشارع و الهتاف بفروع النيم حتى تسقط الحكومة ثم خلاص دي فكرة غلط و هي ما اضاع السودان اكثر من مرة.

والله يا حمور إنت الليلة متجلّي عديل كـدا!

شنو يا عمك انت من امس شابكني كتابتك المره دي سمحة و انت هسه متجلي و بتاع.
انا زمان كنت قاعد أبعّر وله شنو ؟

يعني لازم تحرجونا يعني؟

..
.

Quote: كمال يا عمكـ .. لكـ التحية بأضعاف أمثالها لكن زغت برضو بصورة دبلوماسية زي ما قال حمور!

لم تكن صورة دبلوماسية بل بطريقة رمادية.. بائنة..


--------

يعنى ركب القشاش بتاع خدر ..

( القشاش دا بعرفو ناس مصر وحمور )

يا ود الصايم كمال عباس ليس من الذين يبررون الخطأ .. دي شهادة من قراءة ما يكتب عادة.
لكنو - ويظهر انو عشاري كده برضو - من انصار نظرية " بغض النظر".
وهي نظرية انا اختلف معها و اظن انت برضو.
وهي نظرية تقوم على ان الموضوع المطروح للنقاش اهم من الماعون الذي طرحه فيه صاحب الموضوع.
لذلك افان خطأ صاحب الطرح يجب ان لا يشوش على الموضوع الاصلي.
وهي نظرية تبدو اقل شخصنة طبعا و تعتمد الموضوعية.
لكن عيبها عندي ان الموضوع - غالبا - ليس حكرا على بوست معين او شخص محدد.
لذلك فان ما الكيفية التي يطرح بها صاحب البوست القضية هي الاولى بالنقاش داخل بوسته .. بينما يمكنني ان اطرح رؤيتي الاخرى في بوست اخر او في بوست خاص.
فقضية صفية مثلا يمكن ان تطرحها تراجي - كما فعلت - من منظور ان صفية اغتصبت لأنها من دارفور .. يمكن ان تطرحها اماني الجندرية انها استمرار للعنف ضد المرأة .. يمكن ان يتناولها عصام جبر الله انها استهداف للشيوعيين لأن صفية سئلت عن علاقتها بالحزب الشيوعي .. يمكن ان يتناولها محمد هشام الجزولي على انها استهداف للطلاب.
كلها مواعين.
ويمكن ان يتم تداولها بموضوعية في بوست قرفنا او بوست علي عجب او تناولها بصورة خاطئة و سيئة في بوست مناهل.
بالنسبة لي لا يمكن ان ادخل بوست اصل عنوانه سيء و طريقة طرحة مسيئة و اقول بغض النظر عن هذا فان نظرتي انا الموضوعية للقضية الاصلية كذا و كذا و كذا.
فإما ان ادخل و اقول لصاحب الطرح ان ما يقوله خطأ و سيء.. او اكبر اللفة و اطرح رأيي الموضوعي في مكان آخر.

لكن لا يمكن يا ود الصايم اتهام كمال عباس انه يحابي خطأ المعارض.
هذه تمهة لم اشاهدها في كمال.

ــــــــ

يا صالح ..
احنا مش بتوع قشاش .. احنا بتوع المكيف.

ماف أي اتهام بالمحاباة يا حمور
وإنما استغراب من دخولو للبوست
وإدارة حوار في أرض غير صالحة للنقاش!

Quote: وإنما استغراب من دخولو للبوست وإدارة حوار في أرض غير صالحة للنقاش!

أو بالإصح إبداء الرأي في بوست غير جدير بالنقاش!

دفاعا عن كمال عباس ( ربما لأعفيه من الكتابة على الكيبورد حرف حرف ) اقول انو قال رأيو في عنوان البوست بشكل ذكي ..
فترحمه على حاج نور و اشارتو الواضحة انو العنوان له دلالة ما بيؤكد اعتراضو.

لكن هو من انصار نظرية "بغض النظر" كما قلت.
لذلك قام بلصق مداخلتو التي لم تكتب خصيصا لذلك البوست.
فكانه استخسر ان يكون هناك بوست معنون لقضية صفية و لا يقول فيه رأيه.
و اختلافنا مع نظرية " بغض النظر " اظنو شي مقبول و وارد.
بدليل اني انا و عشاري قربنا نتماعط لولا اني ما عندي شعر.

تحية مرة ثانية ياحمور

Quote: احضروني يا عصام و يا كمال عشان انا حاجوط الدنيا و احفتح على نفسي بلاوي. اعتقد ان اكبر اخطاء الثورات السودانية ( اكتوبر و ابريل ) انها كانت هبات شعبية للغضب تنتهي بتسليم السلطة لهياكل قائمة و الذهاب الى البيوت و الاكتفاء بعد ذلك بالزهج و الغضب من هذه الهياكل حتى نسمع اول بيان عسكري قضى عليها. فكرة ان هناك اخرين سرقوا ثورات السودان هي الجزء الاصغر من اننا ضيعنا ثورات السودان بفهم ان ما علينا هو ان نسقط حكومة و خلاص. وهذا يقدح تماما في فكرة الثورة لأن جزء اصيل منها هو تغيير مجتمعي يجعل الشعب فاعلا اصيلا في الرقابة على السلطة. قامت ثورة ابريل و حدث ما اعتبره انا انقلاب عسكري ترضوي للشعب. ثم حدثت انتخابات حزبية لم تحسن ادارة الوطن. لم يتحرك الشارع لمراقبة مكتبساته بل اكتفى بالتفرج على المكايدات السياسية يتفرج و يتحسر. كأنه لا دور له.

نقطة رائعة ومحفزة إتفق مع بعضا منها واأختلف مع الاخر
الإختلاف-
خرج الشعب السوداني ثائرا علي بعض قرارات الحكومة الديموقراطية في ديسمبر 88 وأجبرها علي التراجع عن تلك القرارات
-- إنتفضت منظمات المجتمع المدني النقابات والقوات المسلحة وأجبروا رئيس الوزراء الصادق المهدي علي القيام بعملية إصلاحات وتبني إتفاق الميرغني - قرنق في مارس 89 وتكونت حكومة قومية لإنفاذ هذا المشروع ! - في النظم السياسية المستقرة تترك الحكومة لتكمل دورتها وتطبق برنامجها ويعالج خللها من خلال البرلمان والذي يحق له سحب الثقة عنها ومن خلال الجهازالقضائي لو حدث تجاوز دستوري ومن خلال رقابة الصحافة والإعلام وأدوات الضغط - الاضرابات وفي حال إكتمال الدورة الإنتخابية ستعود الكرة للشعب ليمارسه خياره وإختياره من جديد !!
- الإتفاق :- نحتاج فعلا لدور جماهيري فعال وضاغط يصحح الاخطاء أولا بأول بدلا عن السلبية والفرجة والارتخاء ونحتاج لدور أكبر لمنظمات المجتمع المدني ولقواعد الاحزاب يمكن من الحراك السياسي داخل الاحزاب وتداول القيادة وإشاعة قيم الديموقراطية داخل أوعية الاحزاب ولتواصل الاجيال وضخ دماء جديدة في المؤسسات الحزبية القائمة أو حتي قيام أحزاب جديدة ...... نحتاج لإشاعة قيم الديموقراطية والتسامح والتعائش والتنوير في المجتمع وتجاوز التكلس والجمود والتبعية الخ .... هذه خطوط عريضة لرؤية لاتسمح طبيعة بوست قيقراوي للتفصيل فيها فالراجل قال غلطان وعاوز يعتزر ! ولسة ماوضح لي الغلط كان شنو والصاح شنو ?
...... وبالمناسبة ياحمور تجربة البرلماني الشعبي الثوري - الاسبوعي في مصر ستغني العمل السياسي وتمتن دور الشعوب في الرقابة وصنع القرار وحماية مكتسبات الثورة ومتابعة المطالب وأكيد سيستفيد الشعب السوداني
في المستقبل منها !!

ياجماعه ممكن توعدوني إنو البوست ده يكون شغال لحدي بكره

كان معاي ناس يادوب طلعوا ...ونعسان جدا


وحتى ذلك الوقت

فالتعلم ياقيقراوي انه لاشئ يستوجب الإعتذار ...والله المحبه التي أحملها لك ولراسي الحربه حمور وود الصايم الذين يجيدون التهديف ويجهلون مكان المرمى ...محبة أكبر من أن يعكرها نقاش أو إختلاف في وجهات النظر ، أنا ببساطه أثق في حمور كما أثق فيك وفي محمد ود الصايم ...ولن يقلل من هذه الثقه إختلاف عادي في وجهات النظر

أنا لم أعلم إلا الآن أن بوست مناهل قد تم حذفه وآخر عهدي به مداخلة الفجيعه ولم أقرأ رد حمور عليها

ولكني يمكن ان اواصل غدا من النظريه التي جعلني حمور من انصارها ( بغض النظر ) بسبب موقفي من بوست مناهل ، أما أنا فلن أجعل من أي شخص نصيرا لأي نظريه فلازال الأمر عندي مجرد بوست إختلفت حوله الآراء لايجعلني في مكان من يقيم النظريات ويصنف أنصارها

_____________________

في هذا الجو المحتشد بالتصنيف والتلوين والمع والضد وتدبيج النظريات
أخشى ما أخشاه أن يصيب ذلك الإختلاف العادي في مقتل

ذلك الإختلاف الذي لامؤامرة تقف وراءه

الإختلاف في وجهات النظر ...بتاع الناس الذين يثقون في نوايا بعضهم البعض

_______________________

كمال عباس

بعض الآراء التي أوردتها ...عبرت عني بما يفوق مقدراتي في التعبير
شكرا لك

أظن أنهم وبما أنهم يجهلون مكان المرمي فكتيره عليهم قصة إجادة التهديف دي

ربما قصدت أنهم يجيدون المراوغه ( بتاعت الكوره طبعا )

Quote: خرج الشعب السوداني ثائرا علي بعض قرارات الحكومة الديموقراطية في ديسمبر 88 وأجبرها علي التراجع عن تلك القرارات -- إنتفضت منظمات المجتمع المدني النقابات والقوات المسلحة وأجبروا رئيس الوزراء الصادق المهدي علي القيام بعملية إصلاحات وتبني إتفاق الميرغني - قرنق في مارس 89 وتكونت حكومة قومية لإنفاذ هذا المشروع ! - في النظم السياسية المستقرة تترك الحكومة لتكمل دورتها وتطبق برنامجها ويعالج خللها من خلال البرلمان والذي يحق له سحب الثقة عنها ومن خلال الجهازالقضائي لو حدث تجاوز دستوري ومن خلال رقابة الصحافة والإعلام وأدوات الضغط - الاضرابات وفي حال إكتمال الدورة الإنتخابية ستعود الكرة للشعب ليمارسه خياره وإختياره من جديد !!

حبابك يا كمال ..
لا اريد التبخيس .. و اكيد انت لا تحتاج مني لتبرير ما سأورده لكن الهواء المفتوح الذي نتناقش فيه جلاّب قراءات لا تملك ان تمنعها.
فقط يا صديقي هل هذه القرارات كانت قرارات اصلاح سياسي مطلوب ام قرارات معاشية لحظية ؟
اي ثورة هي كالزلزال لها توابع. فهل كان ذلك الخروج توابع صغيرة هنا و هناك ضد بعض قرارات ام من أجل مراقبة و تحقيق مكتسبات الثورة ؟
انا لا اعرف هذه الثورات التي تتكلم عنها ( ليس نفياً لحدوثها ) لكني اشك انها كانت من اجل الهدف الصحيح.

بالنسبة لانتفاضات الفئات و النخب فلا انكر ضغها على الحكومة الديموقراطية من أجل مكاسب هنا و هناك اخرها اتفاقية الميرغني - قرنق.
لكني اتحدث عن الضغط المدعوم من الشعب الذي حقق الانتفاضة.
اذكر الى حد جيد اجتماع البرلمان الذي حاصره الكيزان هاتفين " شريعة شريعة وله نموت ".
هذا كان ضغط نخبة سياسية لها توجه معين.
أين كان الشارع من هذه الجلسة و ما يجري فيها ؟
لم يكن مهتما. هو اسقط نميري و البقية للسادة الحكام.

انا طبعا لا اعني ان الضغط ينبغي ان يكون على كل ما يفعله الصادق في حكومته لأنه ببساطة منتخب.
لكن الخطأ بدأ من الفترة الانتقالية لذلك قامت الحكومة المنتخبة على خلل.
فقد حرص المجلس العسكري على القول انه لن يجري تغيرات انما سيسلم السلطة كما هي.
وهذا في حد ذاته كان خطأ.
فكيف تحدث اصلاحات سياسية بعد انتخابات قامت على النظم السياسية المختلة ؟
كان من الواجب ان يواصل الشارع ضغطه و معه النخب من اجل اصلاح سياسي و اقتصادي و اجتماعي تحت رعاية المجلس العسكري ( ربما في معية مجلس سيادي تكنوقراطي ) لإعداد البيئة المناسبة للتجربة الديموقراطية لتزدهر.
خذ عندك مثالا تعويضات ال المهدي.
هي من ناحية من حقهم. لكن ان ينالوها تحت حكم حزب الامة خلل كبير. هذا شيء كان يمكن حله قبل الانتخابات. هذا مثال لقضايا الثارات و التعويضات.
قضية قوانين سبتمبر و الشريعة و علاقة الدين و الدولة كان ينبغي حلها في الفترة الانتقالية بمتابعة و ضغط الشعب.

شعبنا اضاع الفرصة.
ثم نحن اليوم نصر على اننا معلمي الشعوب الثورات. لو تعلم منا الشعوب لضاعوا. كنت اسمع الغزالي حرب يقول نريد سوار الذهب مصري و انا اقول سجمكم يا الغبيان.

ــــــــــــــــ
يا عشاري ليس في الامر زعل او تسديات تخطئ او تصيب.
هذا تحاور على جمب الجميل فيه ان عنوان البوست لا يغري كثيرين بالدخول و هم غالبا لا يعلمون ما نقول هنا.
واطراف الحوار اصدقاء و يكنون لبعضهم المودة و الاحترام.
فما فيو زعل او تصنيف.
وجعلك من انصار نظرية " بغض النظر " ليس حكما بل قراءة. يمكنك ان تعترض عليها بسهولة و نتناقش حولها بدون زعل.
منتظرك بكره من سيرفر دال.

كتب الاخ حمور :

Quote: فقد حرص المجلس العسكري على القول انه لن يجري تغيرات انما سيسلم السلطة كما هي. وهذا في حد ذاته كان خطأ. فكيف تحدث اصلاحات سياسية بعد انتخابات قامت على النظم السياسية المختلة ؟ كان من الواجب ان يواصل الشارع ضغطه و معه النخب من اجل اصلاح سياسي و اقتصادي و اجتماعي تحت رعاية المجلس العسكري ( ربما في معية مجلس سيادي تكنوقراطي ) لإعداد البيئة المناسبة للتجربة الديموقراطية لتزدهر خذ عندك مثالا تعويضات ال المهدي. هي من ناحية من حقهم. لكن ان ينالوها تحت حكم حزب الامة خلل كبير. هذا شيء كان يمكن حله قبل الانتخابات. هذا مثال لقضايا الثارات و التعويضات. قضية قوانين سبتمبر و الشريعة و علاقة الدين و الدولة كان ينبغي حلها في الفترة الانتقالية بمتابعة و ضغط الشعب.

لا أستطيع أن أختلف معك في حديثك هذا لأنه يشكل قناعة عندي ... قناعة مفادها أن شعارات الإنتفاضة لم تنفذ ومطالب الجماهير قد أجهضت وإن الجماهير والقوي السياسية لم تحمي مكتسبا تها ولم تتابع مطالبها وإن كانت هناك شذرات إيجابية مثل إنتفاضة السكر 88 والضغط الجماهيري والفئوي الذي قاد لتبني إتفاقية الميرغني -قرنق 89 ولكن يجب أن نقر بأن الرقابة والمتابعة كان يجب تتم خلال الفترة الإنتقالية ! - بالمناسبة كان هناك إتجاه في 6 أبريل 86 لمواصلة الانتفاضة حتي تتحقق المطالب ولكن تم إحتواء هذا الاتجاه بدعوي إمكانية متابعة المطالب عبرالاحزاب وعموما وكما قلت فإن ( تجربة البرلماني الشعبي الثوري - الاسبوعي في مصر ستغني العمل السياسي وتمتن دور الشعوب في الرقابة وصنع القرار وحماية مكتسبات الثورة ومتابعة المطالب وأكيد سيستفيد الشعب السوداني في المستقبل منها !! ) ..... كتب الاخ ود الصايم

Quote: ماف أي اتهام بالمحاباة يا حمور وإنما استغراب من دخولو للبوست وإدارة حوار في أرض غير صالحة للنقاش!

علاوة علي ماتفضل به الاخ حمور مشكورا أقول أني وصفت خطاب الاخت المعنية بأنه ( حاد و ملتهب ) فلست ممن يجاملون في قضايا المبدأ وبالامس القريب دخلت في بوست للاخ خالد عبيد أرتكب فيه خطأ كبير أعترضت عليه وأنتقدته فيه ! أما الحوار في في ذلك البوست فكان خوفا من أن تقود ممارسات جهاز الامن لما هو أخطر من كلام مناهل: -( ماحدث من إنتهاك لإنسانية البشر والتعدي علي حرمة الجسد الإنساني والإذلال والتعذيب قد يفرز أكثر من هذا الخطاب الحاد والملتهب فالعنف سيولد عنفا مضادا والوحشية قد تقود للإنتقام ولممارسة حق الدفاع عن النفس ما دامت البلاد تنحدر نحو الهوة بهذه السرعة الرهيبة بلا قانون ولا ضابط ..... الموضوع خطير ويحتاج لوقفة جادة ومواجهة صارمة تعيد الأمور لنصابها والإ فسينفجر الوضع بشكل لايمكن التحكم فيه...) .........
... شكرا عزيزي عمر عشاري

Quote: كمال عباس بعض الآراء التي أوردتها ...عبرت عني بما يفوق مقدراتي في التعبير شكرا لك

أتابع ماتكتب وأثمن مواقفك القوية ورؤيتك المستقلة وأسلوبك الهادي وإنحيازك المعلن لقضايا الديموقراطية والحريات العامة وأشيد
بإحترامك لمحاوريك ... علمت من خلال هذا المنبر بأنك إبن دكتور عشاري المثقف الوطني والأكاديمي الضليع وكنت متابعا -وأنا طالب يومها- لجهده الكبير في مجال حقوق الانسان وجرائم الحرب هو وسليمان بلدو - مذبحة الضعين - والواقع أن موقف السيد
مبارك الفاضل من من كتاب مذبحة الضعين ومن المشاركين في ندوة أمبو ومن شعارات الانتفاضة - هو ما جعلني لا أثق حتي اليوم في مبارك الفاضل ! ........... تحياتي وتقديري

Quote: تجربة البرلماني الشعبي الثوري - الاسبوعي في مصر ستغني العمل السياسي وتمتن دور الشعوب في الرقابة وصنع القرار وحماية مكتسبات الثورة ومتابعة المطالب وأكيد سيستفيد الشعب السوداني في المستقبل منها !!

تعرف يا كمال ..
لو كان لي ان الخص ما قامت و تقوم به الجماهير المصرية اليوم فانه كالاتي :
لقد استطاعو الاطاحة بمشروع التوريث و هو في تقديري اخطر ما كان يواجه مصر لأن مبارك رجل في ازرل العمر ( مالم يعش كوالده الذي يقال انه توفي عن 102 سنة في حادث دراجة بخارية ) .. و اقصى مبارك عن سدة الحكم .. و قذف بمجموعة من قادة الفساد و العسف الى السجون.
لكن الجماهير فشلت حتى الان في الاطاحة بحكومة الانقاذ الاخيرة التي اقامها مبارك و هناك شيء غير مريح في القضاء على اثار النظام.
لكن ضغط الجماهير الذي لا يتوقف ان لم يحقق هذه المكاسب فانه على الاقل سيحتوي الورم السرطاني فلا يتمدد. فحكومة شفيق اليوم محاصرة بهذه المليونيات ( يوم الثلاثاء كان هناك مليونية و غدا مليونية اخرى - تعداد مصر يجعل الكلام عن المليونيات لعب عيال عادي ).
فهي ان لم تصلح لا تقدر ان تفسد.
وقد ادى الضغط الى اخراج وزراء لم يكن عندهم الكرامة للاستقالة. مثل عائشة عبد الهادي التي نالت منصبها بتقبيل يد سوزان مبارك على الملأ و حافظت عليه بالزغاريد لمبارك ( هذه احداث حقيقية لا مبالغات ).
واليوم يتزايد الضغط لاقصاء كل الحكومة بلا ترقيع و يتم الضغط لاقصاء اعوان النظام في الصحف القومية ( هناك ثورة في روزاليوسف و مثلها في الاهرام بل ان صحفيي الاهرام كونوا لجنة حراسة امسكت بمدير مكتب اسامة سرايا يخرج كراتين من الاهرام بتحفظوا عليها ).
انها ثورة تعرف ما تريد و تتقدم باصرار.
لم تفرح يوم التنحي و تحتفل و ترجع الى البيت و الا لكانت وجدت عمر سليمان حاكما عليها.
أكره أن اقول هذا لكن الاعتراف بالحق واجب .. المصريون رغم انهم لا سابق خبرات لهم يقومون بتحقيق ثورة حقيقية.
واظن - بحسب المتابعة عن بعد - ان التونسيين يفعلون ذلك.
والجميل ان كل من اعرفهم من الشباب الذي يجتمع و يقرر و يخرج ويرفع مطالبه ليسوا منظمين سياسياً.
فحتى من يؤمن منهم بالدولة العلمانية ( و اغلبهم بين ذلك و بين من لا اعرف له رأياً ) ليس منضويا تحت حزب.
واظن ضعف الاحزاب كان عاملا مهما جعلها تحاول الجري خلف مطالب الشباب لكن القطار تجاوزها.
فاي اتفاق يجريه اليوم سيد البدوي مع النظام لا يعني شيئا. حتى لشباب حزب الوفد.

دعني ادعي انه حين يتحرر شبابنا من سيطرة الاحزاب ( ليس من الضرورة ان يعني التخلص المعاداة لكن فقط الايمان ان مصلحة الوطن لا يحتكرها الامام او السيد او اللجنة المركزية ) و تكون القوة الضاربة هي الشعب الذي يعرف ما يريد و يؤمن انه لا يقوم بثورته فقط ليسلم السلطة الى آخر بل ليخلق هو الهياكل التي تحكمه حينها يمكن ان تنجح الثورة.
هذه قراءة قياساً على الواقع المصري لكن الثورات لا تستنسخ.
بدليل الثورة الليبية التي هي اشبه بثورات التحرير تسقط مدن و تستولي على دبابات و تقيم اذاعة.
لكني من واقع العيش بجانب و في قلب التجربة المصرية معجب بها.
واتمنى ان ارى صنواً لها في وطني بحسب الظروف و المعطيات الوطنية الداخلية.
وهذا يستصحب ان لا نحاول ان يكون الامر مجرد كوبي اند بيست.
صفية بوعزيزي جديد و ميدان ابو جنزير هو التحرير.
الاستنساخ هو مجرد محاولة غير اصيلة و تقليد لموضة لن يقنع احداً.
رجل الشارع لا يتم اخراجه .. رجل الشارع يخرج حين يرى أملاً.
ولا اظن الأمل قائم طالما رجل الشارع يظن ان الثورة تعني الاطاحة بالانقاذ لتسليم البلد لاحزاب فاشلة.
فهو حتى ان لم يدعم الانقاذ سيستخسر خروجه ليعطي السلطة للصادق و الميرغني.
لابد اولا من توعية الشعب ان الثورة لا تعني استبدال شخص بشخص و العودة الى البيت.
الثورة تعني انتزاع السلطة و هدم نظام قائم و بناء نظام جديد.
ان قدم الصادق المهدي نفسه بما يناسب هذا النظام دفعنا اليه الامانة و راقبناه.
فان اساء ضيقنا عليه و حذرناه و الا اسقطناه قبل نهاية مدته. و اظن هناك وسائل ديموقراطية كثيرة لاجبار رئيس وزراء او جمهورية منتخب للاستقالة قبل نهاية مدته.
المشكلة ان يتم ذلك بعيدا عن التقوقعات الحزبية التي ترى ان الحكم ما دام في الحزب الاتحادي الديموقراطي فهو سيء لابد ان يؤخذ منهم باي شكل لياتينا نحن الوطني الاتحادي. طيب ما هو الفرق بينكما ؟ لا تجد فرقا في برنامج انما هي فروق اشخاص.

انا نضمت كتير و اظني طلعت من الموضوع.
بكره ود الصايم يجي يقول لي سحرناك.
فلأتوقف هنا.
و السلام.

و بما اننا بنثرثر يا كمال عاين بوست صاحبنا ناظم ده

حقيقة ما حدث في شارع ال60 اليوم الخميس.. الصور لاحقاً

لحدي هسه شكروهو عمر صديق و فرانكلي رغم اني اظن انهم ما بيعرفوهو ..
و شكك فيه صابر أتير و اكيد البقية تأتي.

و ناظم شاب صادق لا شأن له بالحكومة من قريب او بعيد.
يلا شوف في البوست ده كيف انو الناس لمن مرقت الشارع كان مطلبا خدمي محدد..
ورغم انو البوليس ضربم و فك فيهم بمبان الا انو مطلبم لم يتغير.
بل حاولوا يشرحوا للبوليس طلبم.
واللطيف انهم طلبوا نائب الدايرة .. تخيل اذا كان سكان شارع الستين مفتكرين انو نائب الدائرة دورو يشرف على اشارة مرور يبقى سكان الاطراف فاهمين شنو.
ولم يعتبروا ضرب البوليس لهم مشكلة .. و اعتبروا هتاف البعض "التغيير .. التغيير " مشكلة تقتضي تسليمهم للأمن.
يعني عادي انو البوليس يضربم لو فهم انهم مظاهرة.
و التغيير نداء سيء لأنو طلبم هو اشارة مرور ما اكتر. ما انو التغيير يضمن ليهم ما يضربوا.
واعتقال الامن للشباب اليقول التغيير عادي و يتم على أيديهم .. مافي فهم انو الشباب ديل ما ارتكبو خطأ و لا انو القبض عليهم مهمة البوليس و ليس الامن.

مثل هؤلاء يا كمال غالبا ستراهم ان نجحت ثورة يحملون فروع النيم و يهتفون امام الكاميرات.
ثم يعودون الى منازلهم و قد غبروا أقدامهم في سبيل الوطن و خلاص.

حين يصير هم المواطن فتحات يوتيرن و اشارة مرور مقابل ان لا يكون له رأي ولا يخرج عن المسار يسهل السيطرة عليه.

يا كمال تابعوا ثورة مصر اليوم فربما كانت الجزء الثاني من الثورة.
هناك دعوات تنتشر الان ( السادسة صباحا بتوقيت القاهرة ) للاعتصام في ميدان التحرير حتى تحقق المطالب برحيل حكومة أحمد شفيق.
لا اعرف بعد هل هي دعوات فردية ام تم الاتفاق عليها من كل لجان شباب 25 يناير الذين كانوا مجتمعين أمس.
لكنها دعوات تصل عبر الموبايل و الفيس بوك منذ حوالي نصف ساعة و تتزايد بشدة.
ربما كان اليوم يوم ثورة جديد في مصر للحفاظ على المكتسبات.

يا الله !! اتراهم سيبهرونني هؤلاء الفتية ؟

يا سلام
شله مثقافتيه
وكلام كبار كبارلناس عايشه خارج نطاق جحيم سودان الانقاذ
الارسال علي موجات عاليه الذبذبه
يقدمون الاعتذارات لبعضهم البعض
ويقوم حمور زياده باستثناء مناهل من ان يعتذر لها
مع انها الانسان الوحيد البستحق الاعتذار له لانها واطيه جمره الانقاذ

الموت لا يبرئ الناس عما اقترفوا .
فهتلر يظل هتلر وبول بوت يظل بول بوت وستالين هو ستالين
وصحائفهم السوداء سيحفظها التاريخ رضي اقرباء الدم ام طقوا راسهم في الحيطه .
-------------------------------------------
اي كلام يقوله كمال عباس
حيه ميته ببصم عليه بالعشره

Quote: ويقوم حمور زياده باستثناء مناهل من ان يعتذر لها مع انها الانسان الوحيد البستحق الاعتذار له لانها واطيه جمره الانقاذ الموت لا يبرئ الناس عما اقترفوا . فهتلر يظل هتلر وبول بوت يظل بول بوت وستالين هو ستالين وصحائفهم السوداء سيحفظها التاريخ رضي اقرباء الدم ام طقوا راسهم في الحيطه .

مع تحفظي على انها تستحق الاعتذار لأنها واطية جمرة الانقاذ دي لأنها بتحسسني انها غلطتنا نحن .. لكن ما مشكلة لو كان الاعتذار لأنها واطية الجمرة.
انا رفضت الاعتذار لها يا خالتي العزيزة على الاعتراض على كلامها.
كلاما شين.
وانا لم اقل حاج نور ملاك او خلوهو مات.
انا قلت نبش عرضو بثرثرات قاع المدينة قبيح و الزج بهذه الثرثرة في قضية لا علاقة لها بها اقبح.

خلينا في الضرا ده نتصارح يا خالتي دوما.
انت فهمتي عنوان مناهل و قصدها بذكر حاج نور ؟

عشان نمشي واحدة واحدة.

Quote: خلينا في الضرا ده نتصارح يا خالتي دوما. انت فهمتي عنوان مناهل و قصدها بذكر حاج نور ؟

اولا انا اقسم بشرف الكلمه لا اعرف من هو حاج نور ولا اعرف متي مات او كيف مات .
فهمت انه هذا الرجل قد خلف ارثا غير حميد
وينعكس هذا في اخلاق من وصفتهم مناهل باولاده وهم قطعا ليس اولاده م بايلوجيا
بل بحسبان انهم تمرسوا او تربوا علي يديه او تبنوا فكره .

بصدقك يا خالتي دوما ..
لكن حالومك على انك ما وقفتي و حاولتي تفهمي ليه نحن بنقول التلميح ما كريم.

بالنسبة للشرح .
الهوا العلني ده ما محلو.

كخبير اجنبي سابق
متابع

عارف يا حمور انا غير ملمه بالواقع الاليم لحال البلاد خاصه واني خرجت قبل ان تحل الكارثه المسماه بالانقاذ .
والطريق الوحيد لنزع جمره الغضب من صدور الناس المتل مناهل والتي لو اشتعلت ستاتي علي الاخضر واليابس
هو التصحيح الشامل للحال المائل ود مهمتكم كلكم شباب السودان

وتربة أبوي ياهو القلتو ليك.
وممكن تشيلي كلامي ترسيلو لمن تثقي فيه غيري و كان قال ما ياهو انا مدين باعتذار لمناهل اجبر بكري يعلقو في سقف المنبر.

الحصل بوراك يا خالتي العزيزة هو ما ادعيته انا في التلخيص العجب ود الصايم ده :

Quote: اللذين اغتصبوا صفية أتوا من ذات العقلية التي تتحدث بها مناهل ابراهيم .. هو خصمي فهو مستباح لا حرمة له.

و انا ادعي اننا زمان ما كنا كده.
شهدت في طفولتي سياسيين على اشد الخلاف مع بعضهم يدافعون عن بعضهم البعض من التهم الكاذبة.
لكني للاسف حين كبرت أدرك زمنا نحسا.

الان فهمت الحاصل يا حمور اصدقك القول ولا تحتاج ان تحلف باي شئ
ويشهد الله من عرفت من الكيزان شخصيا كانوا رجال لافيهم شق لا طق من هذه الناحيه
وان اختلفت معهم فكريا .
و ننتظر من مناهل اعتذار عن مثل هذا السلوك وان يكون النضال بادوات شريفه.
لول اها اضفنا الهاء يا حمور

Quote: وان يكون النضال بادوات شريفه.

Quote: و ننتظر من منال اعتذار عن مثل هذا السلوك وان يكون النضال بادوات شريفه

Quote: اعتذار - عله يليق - للجسورة مواهب ابراهيم

انتو البوست ده تامينو عالي وله شنو ؟
يا جماعة اسمها مناهل .. مناهل .. مناهل.
و إن كان ولابد فالجسورة مناهل عشان مافي زول يزعل مننا.

اسه المشكلة في كلام مناهل ده بس انها شتمت زول ميت دون مراعاة لأهلو و حبايبو؟ و لا انها اصلآ قالت كلام غلط؟ يعنى بتفرق شنو لو كان زيد او عبيد لواطى أو لم يكن في سياق الصراع السياسي ده؟

عشان كده يا عصام جبرالله الحزب الشيوعى بتاعكم ده ما قامت ليه قايمة وحاتل فى الواطة من سنة 1946. ما معنى سؤالك (بتفرق شنو لو كان لواطى او لم يكن .. فى سياق الصراع السياسى)؟ بتفرق كثير جدا. انت ما عارف صراعات حزبكم الشيوعى السوداني التاريخية التى تسببت فى تنحية قيادات وتولى وترسيخ قيادات اخرى كان قلبها وكليتيها وكبدها وفشفاشها هو اللواط وشبهات اللواط؟ مع ان التاريخ يغلّب انها كلها كانت ادعاءات مصنوعة من اجل تمكين قيادات وابعاد قيادات.

يعنى لو واحد فتح بوست زى بتاع مناهل ده وكتب فى العنوان: يا (اولاد قاسم امين ..) الموقف معاك بكون كيف؟ برضو كنت حتجى تسأل "بتفرق شنو"؟ ولا حتجى تتجرس وتحدث الناس عن ثورية قاسم امين وتاريخه الناصع واناشيد محجوب شريف عنو؟ أها أسا انا بسألك الفرق شنو؟

يا سيدى حاج نور مات. واذا كانت قد اثيرت عنه اثناء حياته شبهات فهى شبهات وستظل شبهات. تماما مثلما اثارت اللجنة المركزية لحزبكم العتيد وناقشت شبهات مماثلة عن قيادات شيوعية اخرى. على الاقل فى حالة حاج نور لا نعلم ان كانت الجبهة الاسلامية ناقشتهاام لا!

وبعدين الشعب السودانى ده كان طلعتوا انتو ولاّ نزلتو عقيدتو حتظل هى ان الموت ينقل الانسان الى ذمة العدالة الكبرى والله هو الذى يحاسب عبيده ثم نذكر محاسن موتانا.. مهما كانت مواقفنا السياسية منهم قبل الموت ..

حاج نور ذهب الى عالم اخر وليس موجودا فى هذا العالم وهو فى حياته لم يدعى على احد مثلما ادعيتم عليه. كونك انت ومناهل تثيروا شبهات اللواط والكلام الفارغ فى هذا المنبر بدعوى النضال ضد الانقاذ لا يعدو ان يكون عبث طفولى وقصور نظر وضعف فى الحساسية لا اكثر لا اقل..

الانقاذ يا ها ديك قاعدة وبايتة ومقيلة، العايز يناضل ضدها يمشى يفتش دروب النضال. والنضال عنده دروب بعرفوها المناضلين الحقيقيين. اثارة الشبهات والتلميحات الفاسدة والخبيثة والقبيحة والمنحطة حول الحياة الجنسية لأناس ماتو وغادروا الدار الفانية ولا يملكون ان يدافعوا عن انفسهم لا يدخل فى باب النضال الشريف..... و بس !







---------------------------------
الاخ عصام جبرالله:
للعلم. لقد تم صرف رتبة رائد امن لى فى بوست سابق، ومقدم فى بوست آخر، وبالتالى فأنا موضوعى منتهى. يعنى ممكن تتجاهلنى

Quote: وفي ناس بتبني رأي في المعارضة مش لموقف من الاحزاب اللي في السودان وإنما لموقف من من بعض الافراد المعارضيين -في الاسفير واللي لا يمثلوا في واقع الأمر الإ أنفسهم ! ياأخي كون قناعتك ورؤيتك مما يحدث في وطنك إنطلاقا من مبدأ ومن إحساس بما يجري في الواقع العملي لا من كتابات النت .... المعارضة قبل أن تكون كيانات ومواعين فهي موقف ورؤية مبدأ !! 00 نعم هناك كتابات بعض الأفراد المعارضيين تضرس ومليانة شتارة وهناك بعضهم ممن يضر بقضية المعارضة ويخدم الحكومة من دون وعي !! وهناك صاحب الأسلوب الجارح والمنفر الخ ولكن كل موقف من هذا يحسب علي صاحبه ولن يجعل عاقل يتواطئ بالصمت أو يؤيد أو يداهن حكومة تدمر وطن وشعب !! 00 وبذات القدر لا أعتقد أن إسفاف وكوارث كتابات بعض منسوبي الانقاذ بالمنبر هي التي دفعت حمور ليعارض الانقاذ ! فحمور عارض الانقاذ لنهجها وخطها ولممارسات قمة السلطة ولفظائعها الماثلة للعيان بأرض الوطن ! .. ولو أفترضنا أن كل كوادر المؤتمر الوطني بالمنبر كانوا ملائكة في التعامل والطرح والأسلوب فهذا لن يغير رأي كمال عباس في الإنقاذ مادام منهج الانقاذ معطوب ورؤيتها شمولية وإقصائية وممارستها شائهة وقيادتها تقتل وتعذب وتمزق في نسيج الوطن وتهين وتذل إنسانه !

أستاذي كمال عباس

(تصفيق حاد)


__________________________


يا حمور والله العظيم تاني كان بعرت برضو كويس

ياخيي انت زول متسق وعميييييغ ما زي خالك

وود الصايم دة رطاني ساي ما بفهم كلامك

والتحية للخالة دوما وهي تنحاز لمكارم الأخلاق

كما عودتنا دائماً

والتحية لقريبي الرمادي ود الصايم

Quote: ياخيي انت زول متسق وعميييييغ ما زي خالك

يا دكتور كان حظ خالي من العمق أني ابن اخته.
وهذا حسبه.

أنا غايتو أذكروا محاسِن موتاكم دي ما "بتقطعني" الكبري، وتعلمون ماذا أقصد هههههه -ضحكة ترابية خبيثة-
ومن ذلك المنطلق، داير أفرِز كومي من "كم" دي، لأنو موتاي أنا بختلفوا من موتى أي إنقاذي قاتل وحقير، فموتاهم هم موتاهم، وموتانا هم موتانا، من مسقط الرأس حتى تخوم ولاية مونتانا، شفتو كيف؟ حيث لي من الموتى أقارب وأصدقاء وآخرين لا يدينون بالإسلام ولكنهم قدموا للبشرية من جلائل الأعمال التي تجعلني أذكر محاسنهم، ولكن يا سادتي وسيداتي،
الحاج نور ليس من موتاي
الزبير صالح ليس من موتاي
إبراهيم شمس الدين ليس من موتاي
ومجزوب الخليفة ليس من موتاي
___
وأدعوا الله أن يجزيهم بأعمالهم! شفتو الإنصاف ده كيف؟

Quote: لول اها اضفنا الهاء يا حمور

تستاهلي.... علشان كرهتيني حياتي بالياء....

Quote: انت فهمتي عنوان مناهل و قصدها بذكر حاج نور ؟

كثيرين ما فهمو لغاية الآن ....

حتى هي زاغت من الإجابة و قالت الكيزان فاهمين قصدها

أغرب شئ كثيرين نظرو تنظير غريب جداً في الحته دي ......

والله ياقيقراوي

بوستيك سمح عديييل

وجاب ناس سمحين

والجميل فيهو زي ماقال حمور عنو إنو بخليهو آمن من المشاهده الكثيفه التي تضر بأي حوار كما عودنا هذا المنبر

وهنا بقى يمكن ان نتناقش بهدوء ونطرح بضاعتنا

_________________

الخاله دوما

إحساسك تجاه كلام كمال عباس ده

ياهو نفس إحساسي تجاه كلامك

ببصم سااي
_______________________

عندي آراء كده بحس إني عشان اقولها داير لي زول شحم ولحم عشان أشرحها ، لأنو المنبر ده بخلي أفكارك ناقصه ، يعني في أفكار عشان تشرحها محتاج لنوع من التعبير الحركي كأن تضع يدك على كتف ود الصايم وتقول ليهو والله العظيم يامحمد أن لاشايف موقفك رمادي ولا ينبغي لي

وأنا ضد النضال بادوات غير شريفه ، ثم تدلف لموضوعك الذي يكون في بعض الأحيان لايتسق مع رؤية صديقك أو ينقص عنها

اب تتفه انا اكيد حاج نور ليس من موتاي ولا ابراهيم شمس الدين ولا الزبير ولا اي انقاذي حي ام ميت
ولا ادعو لتجميل تاريخهم بل عرضه بكل السوء الفيه وبكل امانه
لكين تفتيش سراويل الناس ليست ما يهمنا
بل يهمني كيف دفع حاج نور بخطبه الرنانه ووصفه للحور العين باعداد كبيره من الشباب الي موتهم المحقق وليرتكبوا جرائم قتل النفس التي حرم الله الا بالحق ولم يكن في قتل اهل الجنوب حق ولا يحزنون .
تهمني جرائمهم ويجب ان يوثق لها وتحويها كتب التاريخ للاجيال القادمه هذا ما قصدته وان طق اهلهم راسهم بالحجر .

تحياتي ياحمور
قبل أن أعلق علي بعضا من كلامك دعني أقول أن حوارنا هذا وعلي الرغم منه جاد ومثمر ويتناول عمق الازمة وإشكالية التغيير والياته وزمانه وضرورته الخ علي الرغم من هذا سيظل في سياق القضية الساخنة والإغتصابات والملاحقة والتعذيب والإهانة وإمتهان الكرامة - سيظل في نظر البعض في هذه اللحظة بالذات ترفا وحوار صالونات مجافي لسخونة وكتاحة والم الشارع ! فحدث الساعة -ا لإغتصابات - مؤلم ومعذب ومهين بشكل جعل من المشاعر تلتهب واللغة والتعبير يصبح حادق ومر - فالناس يا حمور تختلف في درجة التلقي والإنفعال لإعتبارات عدة منها - عامل السن والنوع ( الإنثي في رأي بصورة عامة أكثر إحساسا بإهانة وإغتصاب إختها من غيرها- و الناشط الميداني المتوقع وفي إي لحظة تعرضه للإعتقال والتعذيب يختلف عن غيره - ومن هنا أعتقد أن ردود الأفعال والإنفعالات محكومة بسياقها الظرفي وبمزاجها وقدراتها علي التحمل والتحكم في الذات والمرارات !....... فليس كل شخص له القدرة علي ضبط النفس والقاموس والأخذ في الإعتبار حساب أي مفردة تصدر عنه أو حتي إدارة حوار فكري عميق وهادئ في ساحةدفن- مقبرة - لطفل قتيل !! و كما قلت مسبقا أعتقد أن لغة مناهل الحادة إن لم يتم تدارك الامور- ستكون مجرد مقدمة لعهد تأخذ فيه الناس حقوقها بيدها وتصفي فيه الجناة بالدم والخنجر والرصاص فالظلم قد بلغ مداه والمرارات قد طفحت وبلغ السيل الزبي ودعني أعيد هذه الجزئية مرة أخري ( ماحدث من إنتهاك لإنسانية البشر والتعدي علي حرمة الجسد الإنساني والإذلال والتعذيب قد يفرز أكثر من هذا الخطاب الحاد والملتهب فالعنف سيولد عنفا مضادا والوحشية قد تقود للإنتقام ولممارسة حق الدفاع عن النفس ما دامت البلاد تنحدر نحو الهوة بهذه السرعة الرهيبة بلا قانون ولا ضابط ....فمن أراد تحجيم ردود الفعل عليه أولا مواجهة الفعل وتجفيف منبع العلة !! فكيف نتوقع ضبط تصرفات أفراد الأجهزة الأمنية مادام رئيس الجمهورية يرفض في خطاب جماهيري بالقضارف التحقيق مع شرطة وقاضي محكمة الكبجاب ويضفي علي الوحشية حصانة وعلي ا لوحوش حماية ? يأتي حديثه هذا ناسفا قرار مدير عام الشرطة ورئيس القضاء والذين أمروا بتشكيل لجان للتحقيق في حادثة جلد فتاة الفيديو ! ........... الموضوع خطير ويحتاج لوقفة جادة ومواجهة صارمة تعيد الأمور لنصابها والإ فسينفجر الوضع بشكل لايمكن التحكم فيه... )
أعود لكلامك :-

Quote: الاستنساخ هو مجرد محاولة غير اصيلة و تقليد لموضة لن يقنع احداً. رجل الشارع لا يتم اخراجه .. رجل الشارع يخرج حين يرى أملاً. ولا اظن الأمل قائم طالما رجل الشارع يظن ان الثورة تعني الاطاحة بالانقاذ لتسليم البلد لاحزاب فاشلة. فهو حتى ان لم يدعم الانقاذ سيستخسر خروجه ليعطي السلطة للصادق و الميرغني. لابد اولا من توعية الشعب ان الثورة لا تعني استبدال شخص بشخص و العودة الى البيت. الثورة تعني انتزاع السلطة و هدم نظام قائم و بناء نظام جديد. .......... دعني ادعي انه حين يتحرر شبابنا من سيطرة الاحزاب ( ليس من الضرورة ان يعني التخلص المعاداة لكن فقط الايمان ان مصلحة الوطن لا يحتكرها الامام او السيد او اللجنة المركزية ) و تكون القوة الضاربة هي الشعب الذي يعرف ما يريد و يؤمن انه لا يقوم بثورته فقط ليسلم السلطة الى آخر بل ليخلق هو الهياكل التي تحكمه حينها يمكن ان تنجح الثورة. .........

عملية الثورة والتراكم الثوري ولحظة الانفجار وكيفيته وتوقيته وتصاعد روح الإنتفاضة وحس التغيير عملية في غاية التعقيد والتركيب فالثورةالشعبية لها ميكانيزم يشبه الثورة البركانية - حيث تعتمل وتتفاعل علي مدي سنين تحت الارض والسطح الهادي حتي تحين ساعة الانفجار! فكثير جدا من الناس كان لهم رأي حول الشعب المصري - خنوع و مداهن لحكامه - سلبي ومرتضي للأمر الواقع يعمل بسياسة الخواف رب عياله ودعوني أعيش - ولايمكن أن يموت أو يضحي أو يثور ضد حاكم !
وكان للشعب المصري ومثقفيه نظرة سلبية حول الشباب -إنصرافي ومقلد للغرب - خانع ولامبالي - مهتم بالقشور ومبتعد عن قضايا المجتمع والشأن السياسي - ثم إنفجر البركان ليكتشف الناس أن الشعب المصري كان حيا وأن جذوة ناره كان متقدة تحت رماد الإنكسارات وأنه شعب معلم لم تموت فيه النخوة وقوة الارادة ولم تندثر قيمه ولم تنكسر عزته وليكتشف الشعب المصري أن شبابه هم أمله وطليعته الثورية وأنهم لم يفهموا الشباب ولم يقدروه حق قدره ! ....... لذا لست ميالا لإصدار أحكام متعجلة ضد أي شعب ولست يائسا أو محبطا بل بالعكس أثق وبقوة بحتمية الثورة والتغيير يالرغم من السلبية والمؤشرات المحبطة !!
... الثورة ياحمور تعبير عن أزمة عامة -أزمة حاكم ومحكوم وهي نتاج لإكتمال وإختمار عوامل موضوعية وذاتية وهي أيضا كم من التراكم التاريخي الذي يتخلق ويتفاعل لينتج حالة نوعية تسمي بالانفجار والثورة ! الثورة تحدث حينما تصل الأمور لسقوفها السالبة ويتساوي الاحساس بالموت والحياة وأنه ليس هناك مانخسره سوي القيود ! وحينما يخرج الشعب لايفكر وقتها بالحسابات الباردة والبدائل وإنما بالتخلص من الخطر الماثل والسلطة الجاثمة علي الصدور والثورات لا تحتاج دوما لروشتة جاهزة وقيادة معدة سلفا فالثورة تفرز قيادتها من داخلها وتصيغ مطالبها وشعاراتها من قلب الشارع ! ...نحن اليوم أمام أزمة إقتصادية وإجتماعية وسياسية ووطن يتفتت ونسيج إجتماعي يتمزق ونظام فقدمقومات البقاء ولم يتبقي له سوي القبضة الامنية أو بإختصار فنحن علي حافة هاوية وإنهيار إقتصادي وأمام عصابة أصبحت تمارس الإهانة والأستفزاز وتمريغ كرامة الناس وتدوس علي القيم والنخوة بحذاء القهر والتشفي الامني !
........

يا أب تفة .. اتحسس معاييركـ ياخ!
القصة ما قصة موتانا وموتاكم وموتو بغيظكم!
ما لا ترضاه لموتاكـ لا ترضاه لموتى الآخرين!!

ياااا معلم .. إذا كانت إنت هسي مناضل صغنتوتي كـدا
في الإسفير وكيبورضكـ بتعمل في نفس غلط الإنقاذ .. بعدين ح تعمل شنو؟


الاتساق يا جماعة!
المعايير يا جماعة!!

Quote: يا أب تفة .. اتحسس معاييركـ ياخ! القصة ما قصة موتانا وموتاكم وموتو بغيظكم! ما لا ترضاه لموتاكـ لا ترضاه لموتى الآخرين!! ياااا معلم .. إذا كانت إنت هسي مناضل صغنتوتي كـدا في الإسفير وكيبورضكـ بتعمل في نفس غلط الإنقاذ .. بعدين ح تعمل شنو؟ الاتساق يا جماعة! المعايير يا جماعة!!

والله يا قريبيي إنت بقت كلامك كتير خلاس

لكن ماشي في الخط الصاح عشان كدة أنا معاك

يا ياسر طيفور يا قريبي القصة زي ما قال حمور فوق

المشكلة الإشارة لشبهات وكلام كان يدور حول هؤلاء الناس

يعني الليلة لو جا واحد من الناس هنا وقال

حاج نور (الله يرحمو) أو أي كوز هنا كان السبب

في ضياع السودان ووأد الحريات وتصفية حسابات وووووالخ

مافي زول بجي يقول ليهو ياخي حاج نور دة مات ما تتكلم عنو

لأنو حتى من مات منهم خط تاريخاً في هذا البلد حسنا كان أو قبيحاً

وتجي تجيب دفوعاتك عن الكلام لكن التلميح بسلوك غير مثبت أو حتى

لو مثبت ليس له دخل في ضياغ الموضوع هو المشكلة

وبس

ما عاوز أبقى نضام زي ود الصايم قريبي

أول حاجه بقول للزميل عصام جبر الله انو الأخلاق فكره
والمعارضه فكره وأفكارنا لو ما بقت مختلفه وأكثر انسانيه
و اخلاقيه شن فايدة معارضتنا ... بي نغير الحكومة بي ناس يشبهوها
ونكون كأنك يا زيد ما غزيت.
الحاجة التانية السياق هو البحدد الكلمة اكان شتيمه أكان كلمة ساكت
ومن سياق العنوان الكلام واضح انو شتيمه ... و شتيمه اخلاقيه
حسب اخلاق عامة اهل السودان .. وهنا في حاجه تانيه نحنا كمعارضه اخلاقنا
المفروض حتي لو زول بي يعمل السبعه و ذمتها في خاصة نفسو ما بي نفضحو
لانو دي حاجه بي تخصو كشخص.(انا عارف انو في علاقه بين الشخصي والعام
لكن دا جدل الله يقدر الناس عليهو.. لانو حسب علمي مافي سوداني و سودانيه
ما عندو عيوب شخصيه اخلاقيه ممكن الناس تمسكها عليهو)
وعشان كدا انا بحب المجتمع السوداني عشان هو مجتمع الستره
والستره و الفضيحه متباريات... الستره في الشخصي
اما في العام ... و في حقوق الناس ... و في الأعتداء علي عرضهمو دمائهم
واموالهم فأكتبوا ما شئتم.
بالنسبة للزميله مناهل : نصحها و نقدهاوتصحيحها هو حقيقة الوقوف
معها ... و ليس التصفيق لاخطائها .. كوني جسورة يا زميلة واعترفي
باخطائك

سلام
ود الصايم
رجاء أن تقراأ كلامى بدقة و تحاورنى في كلامى انا عصام, زى ما بحاورك في كلامك انت ود الصائم لا كلام زيد أو عبيد
في موضوع الاخلاق حا أجمل الرد مع حمور لاحقآ.

Quote: أما بالنسبة للوقت .. فهل تقترح إنو يكون بعد ما نغيّر النظام مثلا؟

طبعآ لأ, بقصد بعد قضية صفيه تاخد حقها , نسيت انو الخميس راسك بكون ملخبط شويه.

Quote: بالنسبة لقصة الناس مشحونة وكـدا .. فبتخيل لي الناس مفروض تنتهز الفرصة دي لتحييد الناس وتخلي الناس في صفّكـ بالضرب على أوتار أخلاقهم .. مش تشوف الغلط عينكـ ليهو وتقول ما مشكلة في سبيل إزاحة النظام .. طيب لمن تصل إنت أنا أضمن كيف إنكـ ما ح تغض طرفكـ تاني من الغلط؟

ده كلام خترى جدآ, واحده واحده, بنتكلم عن النقاشات هنا في البورد و الانترنت عمومآ, صاح؟ هنا نحن افراد متساويين عنى أتعامل مع من احاورهم و هم الغالبية - وليس مع اعدهم خصومى السياسيين - كأنداد في الحوار, ليس هدفي أن احيدهم او اجبرهم على تبنى موقفي بل اننا جميعآ في نفس الأزمة و نحتاج بل يجب ان نتحاور كى نخرج منها, صحيح اننى منتمى لتنظيم ما, لكنى أعى ان هذا التنظيم به ازمة و عميقة جدآ, و أعى أن كل التنظيمات المعارضه بها أزمة عميقة ايضآ و هى جزء مهم في الأزمة الوطنية في الماضي و حاليآ و في المستقبل, لذا أرى من الضرورى و المهم أن نتحاور مع الاخرين لفهم هذه الأزمة و كيفية الخروج منها, أنا لست من دعاة تأجيل نقد الأحزاب المعارضة الى حين اسقاط النظام (لا صوت يعلو فوق صوت المعركه ) لأن اى حديث عن نظام ديمقراطى قادم و استقراره يتطلب وجود حركة سياسية بها حد أدنى من العافية و الا سيأتى الانقلاب مجددآ . ده لا يعنى أن يتحول الأمر لنادى تمارين ذهنية و حوارات لأنو في نفس الوقت في قضايا محتاجة انها تواجه اوضحها قصة معايش الناس و أكلهم و شرابهم, اخطرها قصة حقوقهم زى حق الحياة و حق الامن, لما يكون في ناس بتتحرق بالجملة زى في دارفور مثلآ بتصبح بعض الحوارات نوع من الترف. و برضو لازم نتحاور. المزعج في صيغة المقابله المعارضه و الحكومه الشائعه جدآ - في رأيي انها حيلة ممتازة و ناجحة تستخدمها انظمة دكتاتاتورية كثيرة مثل الانقاذ لتبرير وجودها و استمرارها - اولآ انها تدفع بعض الناس لموقع المتفرج أو الحكم , لموقع ضد مصالحه شخصيآ. أوضح أكتر, أعتقد أن هناك خطأ وقع فيه : تحت أنظمة زى دى الخيار ليس بين الحكومة و المعارضة بل بين الاستبداد و الحرية , بين أن تقبع طول حياتك تحت هذه الدكتاتورية و بين أن يكون لك الحق و الحرية ان تختار بين خيارات عديدة أو أن تطرح نفسك كبديل, ليه لأ؟ ده زى سؤال البديل منو؟ البتزلقو بوعى الدكتاتاتوريات و للاسف يتبناه البعض بغير وعى, دى كتابة في مكان تانى انقلا هنا للتشابه:

البديل ليس شخص او حزب بعينه, البديل نظام بكامله و مؤسسات و حريات و حقوق و سلام و أمن و عداله, من يأتى رئيس أو وزير هو جزء من كل و يمكن انتخاب غيره و عزله.
البديل لا يأتى من فراغ او عبر تمارين ذهنيه مهما كانت ذكيه, بل يأتى عبر العمل طويل البال و بالمراجعه النقديه للتجربه الخاصه و العامه و بالذهن المفتوح للمتغيرات و للجديد

Quote: وتخلي الناس في صفّكـ بالضرب على أوتار أخلاقهم

صحيح مفروض المحاولة و العمل الان لجمع صفوف الناس, لكن ما بالضرب على أوتار اخلاقهم او أوتار دينهم او أوتار عواطفهم او أى أوتار أخرى - أنا عارف انها دى طرق ناجحه لتجييش الناس و يمكن استخدامها لكن اعتقد انها هشة و فاشلة لو هدفنا ديمقراطية حقيقية و راسخة - بل بتعميق و ترسيخ الوعى بالحقوق و التمسك بها و الدفاع عنها و انها تكون الاساس للدولة و المجتمع, الوعى بالحريات و الديمقراطية و العدل و المؤسسات, ده الفرق بين الدول و المجتمعات القدرت عملت ده زى بعض دول أوروبا الاتعلمت من دروسها المريرة و حروبها الماتو فيها ملايين و الكلام ده ما بعيد, الحرب العالمية التانية ليها دوبك خمسة و ستين سنة, ياهم نفس الخواجات النضاف و رايقين و بيتكلمو عن محن بلداننا و يقررو فيها و عندهم مانشستر و برشلونة و بيتزا و شاكيرا و جى أل هم ذاتهم طحنو بعض و قصفو بعض و اغتصبو نسوان بعض و حرقو مدن و بشر احياء , نفسهم اتعلموا - للدقة اغلبهم حتى اللحظة و ده ممكن يتغير في ظروف تانية - اتعلموا انو مافي درب غير الديمقراطية بكل عيوبها و مشاكلها و نواقصها, و انو البديل هو الفاشية و الاستبداد و القمع سواء اتى من اليمين زى المانيا هتلر او من اليسار زى الاتحاد السوفيتى (أيوة يا سيدى الاتحاد السوفيتى , زى ما هم اتعلمو انحنا برضو بنتعلم .. أو بنحاول نتعلم). عشان كده سؤال البديل مضلل و هدقه ابقاء الوضع الحالى, و حالة الشلل و الحياد الخادع بين الحكومة و المعارضة هى ايضآ هدفها المحافظة على ما هو قائم.

Quote: طيب لمن تصل إنت أنا أضمن كيف إنكـ ما ح تغض طرفكـ تاني من الغلط؟

دى الخدعة التالية: القال منو أنا الآن عاوز اصل؟ الآن أنا كفرد أو جماعة أو تنظيم ما طارح روحى بديل, أقرا الكلام الفوق, و لحجتك دى ذاتا حقو ما تكون محايد, نقيف سوا ضد الوضع الحالى و نجيب ديمقراطية بعد تجى ديمقراطية أى زول من حقو يطرح نفسو بديل , عشان لما زيد أو عبيد يغض النظر عن شئ انت تقدر تغيرو بي صوتك, عشان تكون عندك قدرة على المحاسبة و الرقابة و التغيير, اسه بتقدر؟ و لا حتى احتمال 1% و بالعكس الآن الفاسد و القاتل هو البقعد فوق راسك و الأمثلة لا تحصي, مش في السودان بس , في الديمقراطية ممكن.
في نقطة مهمات للنقاش ده نجيها لاحقآ برضو و هى انو الديمقراطية ليست حل جاهز و وصفة سحرية , و انها جزء يؤثر و يتأثر بالصراع الحاصل جوه المجتمع المحدد.
حمور جاييك لى ردك ... و اركز لى قصة الاخلاق دى, برضو الأخ عبدالمحسن و الصديق عيدروس نتحاور لاحقآ

كتب الاخ تبلدينا

Quote: كمال يا عمكـ .. لكـ التحية بأضعاف أمثالها لكن زغت برضو بصورة دبلوماسية زي ما قال حمور! ودالصايم لم تكن صورة دبلوماسية بل بطريقة رمادية.. بائنة.. تبلدينا

أنت لست مطالب أوملزم ياتبلدينا بأن أعلق علي تصنيف الاخ خدر للاخريين ! وليس من حق أي أن أحد يفرض علي الكلام أويستنطقني في قضية ذات طابع شخصي بحت طرحها شخص آخر لإعتبارات تخصه وحده !
وقد قمت بتوضيح موقفي هذا لود الصايم بصورة هادئية لأنه أتبع أسلوبا هادئيا في الاستفسار.........
مع شكري

ازيكم يا حلوين

اعتذار - واخد بال سعادتك يا ابو حتحوت - اعتذاري للغياب
مؤشر النفسيات كان تحت الخط الاحمر .. بالاضافة لانو الجمعة صراع نوبة او كما قال تبارك
اها قلنا نجي المحكمة يوم السبت بالين صلعتنا للحلاقة ..

بالجد انتو ناس جميلين و سعدت جداً بكل الاكتب في البوست دا ..
لكن ...
زي ما قال ود القاضي، دخول الاذكياء للبوست دا بصعب على ادارتو

يا شباب القصة و ما فيها مواطن ساي ببحث عن اتساق ما في نص الدنيا الفايرة فوق راسو دي
يا كسر الله و الله بالغت معاي .. عماقة وين ياخ!؟ كلها اكلشيهات جاهزة و متضاربة في ذاكرة واحد قيقا
قال خالد مونيكا : " للغزالة قرنان يشيران تجاه العدو المطار .. في حال الحروب تتشعب لتشير في كل الاتجاهات .. انها ذاكرة التيتل .. انها ذاكرة الابتلاءات يا قريبي "
قيقا محض ذاكرة .. ذاكرة ( مغتصبة ) من تالا التجار و السمار .. و مستباحة تماماً من تالا الجنود
واحد قيقا بس ..
بعدين شوف زعمك [ الصاعق و زاعق ]* دا !؟
اسي اقتراحك دا نعتبرو ذم بما يشبه المدح و لّ كيف .. شوف رواشة زول الداير تقسم لي من عماغتو :

Quote: Re: اعتذار - عله يليق - للجسورة مواهب ابراهيم و للاحباء عمر عشاري و حمور زيادة (Re: esam gabralla) ياخي أنا رادي هنا لبوست بهناك !!! (عدل بواسطة أمين محمد سليمان on 25-02-2011, 00:41 ص)

سئلي الله رواشة تكفي بلد عدييييييييل !!
يا زول اتنازلت ليهو عن نصي من العماغة .. بطريقتو دي ياني المدعي ليهم النبوة هو و الخالة تب!
ماما دوما يا قلب .. ياخ و الله الارسال على موجة متوسطة تماماً- وقيل قصيرة من تقاصرها في التبيلغ و فضح رسالتها - يا عزيزة دي من القلب للقلب تووووووووش
شنو حسبتينا في زمرة المسغفاتية طوالي!!
بس انت اي كلام ما تفهميو طوالي بكون موجة عالية!؟

يا امين انت و ود اختك ح تضيعوني بطريقتكم دي ..
باريتك انت خربت لي علاقتي بي بكري .. باريت حمور بقيت رمادي!

يا حمور .. مافي تعديل في الموقف - موقفي انا من كل القضايا و المعارضة - ما قلنا اللائق في محلو ... و الخوة في محلها ( واخد بال سعادتك يا حبيب ألبي عشار؟ مافي اي فجائع!؟ )
الحاصل مراجعة موقفي من موقف مناهل و عشاري .. هي مراعة فروق الوقت - زي ما نادى عشاري - و فروقات الاحساس .. بالجد " الآن فهمتكم " .. اتفهم الموقف لكن ما بالضرورة اتبناهو.. و هناالمحك!
في كلام غير لائق قلتو في حق الجسورة مناهل - و لو كره الكارهون - ما بتستحقو مني، بعتذر عنو و لو اتضايق ود البشرى و مل اعتذاراتي الكتيرة .. و بفسروا لانو - و العهدة على ابو الريش - الناس بسطاء و قليلي سغافة - لحدي ما ربنا يكتب لينا كتاب و نمشي نكتب في سودان الجميع حيث حسن موسى و حسن اولئك رفيقا، بدون اي مذكرات تفسيرية .. انحنا الناس الخطيرين ديل بنفهما طايرة طبعاً.
عشان كدا جبت كلام جمال انعم الكوز اليمني :

Quote: تراهن ثورات التغيير على تفوقها الأخلاقي، وعلى الثوار أن يكونوا سادة أنفسهم، يسيرون منتصرين على ضعفهم ورذائلهم وأحقادهم وأطماعهم الصغيرة، متسامين فوق كل المطامح التي تعيق السير وتوهن العزم،وتشتت القوة، لتتركز الطاقة على الهدف الكبير، يجب ألا نتماهى مع أدواء القهر وألا يكون نضالنا فعلا انتقاميا يُخرج أسوأ ما فينا بحيث نتساوى والقهر الذي نجابهه، لنحارب الأفكار الشريرة داخلنا كي ننتصر في معركتنا ضد الشرور التي تتسيد الواقع.

ساعود لغز عودي بي موجتو المتوسط في الارسال عالي الموجة القالتو خالتو
بالجد عندي فيهو كلام كتيييير و جميل انو نتحاور فيهو



------------
* [ حبيب ألبي منصور خالد ] ... شفت كيف يا كسر الله؟
اليومين ديل مكروب و الله يا حبيب
لكن بجتهد ارد

قيقرا يا حبيب
معاذ الله اعتذاراتك الكتيرة لا بتضايقني منك لا حاجة
بالعكس كويس الإنسان ما يكابر و يراجع نفسه بين الحين والآخر - أو يقدم نقد ذاتي يا قول الزملاء
هسي شوف لولا اعتذارك في البوست دا ما كنا استمتعنا بالحوار الدائر هنا

يا حمودي وقناوي
أنا كتبت:

Quote: وأدعوا الله أن يجزيهم بأعمالهم! شفتو الإنصاف ده كيف؟

أها عليكم الله في إتساق أكتر من كده؟

شكرا ياعزيزتي دومة :-

Quote: اي كلام يقوله كمال عباس حيه ميته ببصم عليه بالعشره

ودا إحساسي أنا كمان .... ودا شعور ناس كتار تجاه كتابتك ومواقفك يادومة...ربنا يخليك ويحفظك ويسدد خطاك ......

Quote: .. تخيل اذا كان سكان شارع الستين مفتكرين انو نائب الدائرة دورو يشرف على اشارة مرور يبقى سكان الاطراف فاهمين شنو. ـــــــ حمور زيادة

كمال عباس يا صديقي الجميل

Quote: والرمادي لايستطيع أن يعلن موقفا مبدئيا من هذه القضايا ...والأسوأ من الرمادي هو من يخفي كوزنته تحت ستار الإستقلالية وإدعاء الحياد وخدمة أجندة النظام عبرموقعه هذا فتراه مخذلا ومبررا أو متفرغا للهجوم علي خصوم الانقاذ من دون أن يكرس جهدا قليلا للتصدي للأنقاذ! . ..تراه يمارس التذاكي ومحاولةزر الرماد في الاعين متجاهلا أن للناس عقول.....

تعرف ادعاء الرمادية كان سببو الكلام الزي دا ...
يا كمال اعتقد انو - في المرحلة دي على الاقل - مفروض يكون في حد ادنى من الثقة ..
كل زول عاجبو الصارو اكيد .. و كل زول شايف انو اصح، و لو ما شايف كدا ببقى فيهو خلل راسو عديل! و بكون قصر في حق نفسو رسمي و شعبي، باختيار ( أقل ) من الاحسن .. ما بتجي مش؟
بس كمان حقيقة .. الثورة دي ما ح ينجزا زول وححححححدو الله و رقبتو و لا فصيل .. و لا قروب واحد!
اها الحل كيف؟
انت سيد العارفين انو في تناقض اساسي و تناقض ثانوي ... اها انا رأي انو نوسع الـ gray area دي طالما الهدف الكبير مشترك و هم عام .. ائتلاف تحالف الرمادي دا ياهو البحقق لينا ثورة ... ليه ندفعهم دفعاً للاسود - دا باعتبار نحنا الابيض طبعاً - التركيز على البفرق و لّ البجمع؟
معركة الانوار ضد الظلام .. الحرية ضد الاستبداد .. الخير ضد الشر .. بحسمها التفوق الاخلاقي
ما دون ذلك - في الوقت الراهن - صراعات دونشكوتية في تقديري تصب في مصلحة استدامة نظام طغمة الخرطوم، و تفويت فرصة تاريخية على شعبنا الشقيانين بيهو كلنا دا

سلام يا عزيز
و شكران على الكلام الفوق دا
اسي اقوم اصدق ليك .. و احتمال كبير اسـتوسـخ الباقين في البوست دا كلهم

لو ما صلحنا الخلل الفينا لنا الرماد و الياسمين يسمنا فيها!!

يا حمور يا حبيب

Quote: انا كل العربي الصرفتو في الموضوع ده بس بخطأ اني قايل مناهل زولة كويسة.

صدقني انها زولة كويسة و جداص جدن حتى آدم همسلف عديل
و لو ما كنت مقتنع بانها بتستحق الاعتذار ما كان اعتذرت ليها - هو ذاتو رصيدنا حتّ - يا حمور كلنا بشر و خطاؤن ياخ. انت نسيت نظرية بتاعة " حق الخطأ " ديك؟
المشكلة - القادتنا انا و عشاري مشترك - للفهم الاستدعى المذكرة التفسيرية اعتقد انو نفس اللغة البتكتب بيها - على الاقل المداخلة الاقتبست انا منها دي - يا حمور ياخ تعال نترك مساحة لعبعضنا نتحرك فيها .. نخطئ و نرجع تاني ياخ .. نمارس فيها انسانيتنا و نتحرك بين الصاح الغلط بحرية كاملة. لو ما غلطنا بنكون آلهة عديل، و دي مستحيلة لزول من ( طين ) النبي المعصوم عاتبو ربو بقرآن يتلى و يتعبد به .. دا نبي و سيد الانبياء صلوات الله عليهم اجمعين و معصوم!
فما تضيق واسعة
ياخ مناهل دي اسي ما قدر بتك!؟
عجبني جداً كلام عيدروس في آخر مداخلات البوست دا ...
حاجة تانية ما تقارن حاجتين ما بتشملم هوية واحدة .. ما تقارن موقفك او موقفي بموقف مناهل و عشاري .. او هكذا اعتقد
ياخ انا بعد شفت الفديو الاخير دا بقيت اجعر ساي .. غلبني الاسويه جيت قلت اختار بوست متوازن لزول موضوعي، و للاسف كان عندي زي ي ي فكرتك دي :

Quote: قلت مافي زول حيجي يكتب بتجرد من فرضية "مناضلة فهي على صواب" و فرضية " حكومة فأي شي يشتما مباح" إلا أمين.

لقيتو ليك هايج و مهيج معاهو الناس كمان!؟

هيجني ليك معاو ..
اتخيل كتبت شنو؟

فلترق كل الدماء

تخيل؟

يا حمور نحن بشر
و اليدو في الموية ما زي اليدو في النار
المشكلة ما في الخطأ .. المشكلة في العزة بالاثم
و المشكلة - مشكلتي البعتذر عنها - مساواة الفاعل بالمنفعل .. يا حمور ما بحق لمنفعل انو يحاكم فاعل
لانو الفعل هو المحك الحقيقي ... مش وارد لو كنت انا مكانا كان سقطتي تكون اكبر!؟
كدي فكر فيها ..





--------

و لو لزيت لي رقمك بتحت باب المسنجر بكون دسيس ذاتو عشان احكي ليك الما بنكتب هنا
بالمناسبة انا كان طلبت من تيسير تطلب اذنك عشان ترسلو لي .. لكن مفيش فايدة

تحياتي قيقراوي :-

Quote: الحاصل مراجعة موقفي من موقف مناهل و عشاري .. هي مراعة فروق الوقت - زي ما نادى عشاري - و فروقات الاحساس .. بالجد " الآن فهمتكم " .. اتفهم الموقف لكن ما بالضرورة اتبناهو.. و هناالمحك!

دا كلام عميق ورائع! فأنا مثلا أختلف مع إشارة مناهل للمرحوم حاج نور وأعترض عليها ولكني لا أصدر حكم كلي علي مناهل بناء علي تلك الغلطة بل ساأحاكمها وأحكم عليها وفق الظروف الموضوعية والخاصة والجو العام وسياق إيراد الكلام واضعا في الإعتبار عامل السن والتجربة ونشاطها الميداني الصدامي الذي يضعها في قلب الحدث وحقيقة أن من أغتصبوا وعذبوا هم زملاء لها الخ
.. الناس يختلفون في حساسية التلقي ودرجة الإنفعال وفي القدرة علي التحكم وضبط المفردة فليس كل شخص له إمكانية ( حمور وكمال مثلا ) في تقليب الكلمة عدةمرات وإرجاعها للفرن حتي تستوي أو حساب نتاج الكلمة وتأثيرها وضررها ونفعها ومردودها والتعامل بعقلية شيوخ في السبعينات من العمر ! قلت في هذا :- حدث الساعة -ا لإغتصابات - مؤلم ومعذب ومهين بشكل جعل من المشاعر تلتهب واللغة والتعبير يصبح حادق ومر - فالناس يا حمور تختلف في درجة التلقي والإنفعال لإعتبارات عدة منها - عامل السن والنوع ( الإنثي في رأي بصورة عامة أكثر إحساسا بإهانة وإغتصاب إختها من غيرها- و الناشط الميداني المتوقع وفي إي لحظة تعرضه للإعتقال والتعذيب يختلف عن غيره - ومن هنا أعتقد أن ردود الأفعال والإنفعالات محكومة بسياقها الظرفي وبمزاجها وقدراتها علي التحمل والتحكم في الذات والمرارات !....... فليس كل شخص له القدرة علي ضبط النفس والقاموس والأخذ في الإعتبار حساب أي مفردة تصدر عنه )
كتب قيقراوي

Quote: انت سيد العارفين انو في تناقض اساسي و تناقض ثانوي ... اها انا رأي انو نوسع الـ gray area دي طالما الهدف الكبير مشترك و هم عام .. ائتلاف تحالف الرمادي دا ياهو البحقق لينا ثورة ... ليه ندفعهم دفعاً للاسود - دا باعتبار نحنا الابيض طبعاً - التركيز على البفرق و لّ البجمع؟ معركة الانوار ضد الظلام .. الحرية ضد الاستبداد .. الخير ضد الشر .. بحسمها التفوق الاخلاقي ما دون ذلك - في الوقت الراهن - صراعات دونشكوتية في تقديري تصب في مصلحة استدامة نظام طغمة الخرطوم، و تفويت فرصة تاريخية على شعبنا الشقيانين بيهو كلنا دا

أتفهم كلامك وإتفق جزئيا معه علي مستوي التكتيك في التعاطي مع الاخر المختلف وإتفق معه أيضا جزئيا - لناحية مبدئية وهي أحقية أي شخص في
تبني موقف والتعبير عن ذلك ......ولكن وبطبيعة الحال فإن صاحب أي موقف أو رؤية مطالب بتحمل نتاج وتبعات موقفه ومايثير ذلك من إختلاف
ونقد ومع هذا تراني أميل لنقد العقلية الرمادية - ولا أسمي شخصا بعينه - وأعني بالعقلية الرمادية هنا الموقف المائع من قضايا
الوطن المصيرية- الا أني أري أن هناك الاسوأ من هولاء :( والأسوأ من الرمادي هو من يخفي كوزنته تحت ستار الإستقلالية وإدعاء الحياد وخدمة أجندة النظام عبرموقعه هذا فتراه مخذلا ومبررا أو متفرغا للهجوم علي خصوم الانقاذ من دون أن يكرس جهدا قليلا للتصدي للأنقاذ! . ..تراه يمارس التذاكي ومحاولةزر الرماد في الاعين متجاهلا أن للناس عقول.....
)
......

Quote: والله يا حمور إنت الليلة متجلّي عديل كـدا!

حمور زيادة + كمال عباس = البارسا

ومش حتقدر تغمّض عينيك


ـــــــــ
سبب التعديل: تعديل المعادلة من ضرب إلى جمع

Quote: و لو لزيت لي رقمك بتحت باب المسنجر بكون دسيس ذاتو عشان احكي ليك الما بنكتب هنا بالمناسبة انا كان طلبت من تيسير تطلب اذنك عشان ترسلو لي .. لكن مفيش فايدة

انا قلت لتيسير تديك ليو لكن قالت لي قيقا ده "معاط" ساي خليو.

Quote: يا حمور نحن بشر و اليدو في الموية ما زي اليدو في النار المشكلة ما في الخطأ .. المشكلة في العزة بالاثم

بالضبط كده ..
المشكلة في العزة بالاثم.
انا اول ما كتبت لمناهل كتبت لائما الكلام الهي قالتو و بس.
لكن لمن استمرت على مدى يومين حايمة بالكلام ده و تدخل بوستات المعترضين ليها تصفم بالامنجية الموضوع بالنسبة لي بقى عزة بالاثم.
لأنها ما اكتفت بالكلام الفارغ و القذف .. بل تعدتو لانو البيعترض على كلاما ده يبقى امنجي.
لا نفس اللحظة لا في نفس اليوم.
لأ
تاني يوم من كتابتا ديك.
فده كلام زول مصمم و راسو كده و مقعتنع انو ده الصاح.
اها انا راس زي ده بنفض يدي منو تماما. و لا اتوقع منو خير نهائي.

يا قيقا كان عندي صاحبي في البلد زول مسلط .. لكن تعاملو مع الناس لا فيهو شق لا طق و العيبة ما تمرق منو ..
كنا ساعة نقعد قدام الدكان و نعمل فيها شباب بيفكر في مستقبلو بيقوم يوصيني وصية كاربة. بيقول لي : قلة الادب ما شكرو بيها زول.



ـــــــــــــــ

Quote: الا أني أري أن هناك الاسوأ من هولاء :( والأسوأ من الرمادي هو من يخفي كوزنته تحت ستار الإستقلالية وإدعاء الحياد وخدمة أجندة النظام عبرموقعه هذا فتراه مخذلا ومبررا أو متفرغا للهجوم علي خصوم الانقاذ من دون أن يكرس جهدا قليلا للتصدي للأنقاذ! . ..تراه يمارس التذاكي ومحاولةزر الرماد في الاعين متجاهلا أن للناس عقول.....

بعد ما مصطفى محمود قال عليّ اني رمادي و كوز خفي ما حتقنعني يا كمال انك ما قاصدني بالكلام ده.

........
صباح الخير ياحمور

Quote: بعد ما مصطفى محمود قال عليّ اني رمادي و كوز خفي ما حتقنعني يا كمال انك ما قاصدني بالكلام ده.

ودي كان معاها-روشتة التجاهل واللا دعوة المقاطعة ! كان كدة الله
يستر علينا ما يقوم يطلعنا تكفير وهجرة !
خليني إستلف عنوان بوست بلة موسي : بعض المحسوبين على المعارضة يجعلوننى أحس بالآتى ........ بعض المحسوبين على المعارضة يجعلوننى أحس بالآتى...: بنفس المرارة التي إنتابتني وأنا أشاهد هدف المدافع جمال الثعلب العكسي يتهادي في شباك الهلال ! ...

جبر الله يا عمكـ .. كلام جميل جدا وأتفق معاكـ
على نقاط كتيرة فيهو .. وبرضو عندي فيهو اختلافات!!
كلام نظري جميل ومرتب جدا لكن وضعوا على أرض الواقع صعب جدا!!

أديكـ النجيضة لحدي ما نفضي الشحن بتاعنا ونقعد براحة،
وبما إنكـ جبت سيرة الكورة وبرشلونة والريال:

لو لميت أحسن 11 لاعب في العالم وجيت دخلتهم الميدان
قدام المريخ .. المريخ ح يضربهم لأنو كل واحد شغال على نسق
براهو وستاندر خاص بيهو وفي الكورتو أوروبية والبرازيلية وعييكـ!
لكن أعمل ليهم معسكر مع بعض وأديهم شهرين .. تعال شوف المريخ ح ياخد كم!

يبقى ياخ نلم النجوم بتاعين المعارضة ديل تحت معسكر واحد تتوحد فيهو
الرؤى والمفاهيم وتتختى قواعد الناس تلتزم بيها .. يبقى تعال شوف
الحكومة ح تاخد كم!!


_
بالنسبة للتصنيف .. ما تغتي عيونكـ ساي!
ياهو التصنيف حكومة ومعارضة ورماديين .. رضيت أم أبيت!!!

بالمناسبة يا كمال يا عمكـ
خالتنا دومة دي اليومين ديل كورتا مصرّجة يسألني الله

Quote: ودي كان معاها-روشتة التجاهل واللا دعوة المقاطعة ! كان كدة الله يستر علينا ما يقوموا يطلعونا تكفير وهجرة ! خليني إستلف عنوان بوست بلة موسي : بعض المحسوبين على المعارضة يجعلوننى أحس بالآتى ........ بعض المحسوبين على المعارضة يجعلوننى أحس بالآتى...: بنفس المرارة التي إنتابتني وأنا أشاهد هدف المدافع جمال الثعلب العكسي يتهادي في شباك الهلال ! ...

صباح الخيرات يا كمال ..
للأسف ما رقوني لدرجة التجاهل.
دعواتك.
تعرف .. ممكن انت تحسب برضو ما معارضة و رمادي .. طالما ( و ده كلام حسب الاستقراء ) المعارضة "الحقة" مفهومها لدى كثيرين ان تصرخ و تكثر الضوضاء و الشتم و ان تخرج في مظاهرة اسفيرية.
فلو جادلت مؤيد بأدب و هدوء هذا لا يجدي و قد يثير التشكيك فيك ..
بل الواجب ان تشتم و تهين و تصرخ و تعمل ليك كولينق او اتنين.

هذا الكلام لا اقصد به مصطفى محمود تحديدا .. بل هو يشمل اتجاه و رأي يكاد يكون سائداً.
وستلاحظ ان هذه التصرفات تقابل بتحيات " الجسارة" و "الشجاعة" و "الكلس " .. الخ
فهي تصبح بعد قليل تصرفات مقبولة جدا و جاذبة لشباب جدد صغار ( زي بتي مناهل البنتكلم عنها هنا مثلاً ).
لماذا لا اكتب بوستا بعنوان " الكيزان اولاد القحاب اتحدى دين امكم زاتو " .. و اشوت كولينق قوي جدا من نوع " لا حوار مع الكيزان .. الموت بالدم لكلاب الامن ".
وانتظر بعد ذلك قلائد النضال و الجسارة و الكلسنة و الميرمة.

هذه سلوكيات شخصية طبعا تختلف من شخص لشخص.
هناك من هو عنيف في افكاره و طرحها .. و هناك الهادئ العقلاني.
لا اقدر ان الوم احدا على ما قسمه الله من طبع.
لكن المشكلة حين يصبح السلوك المتطرف "الغوغائي" هو النموذج للرأي السياسي المعارض.
فبمقدار ما تنال من تطرف و غوغائية ترتقي في اضواء النضال و تصبح مؤثراً و ما تقترفه من خطأ يحسب على غيرك.

تخيل ان من يقول المعارضين فعلوا و قالوا مثلا يسحب خطأ من هو مثل مصطفى محمود على كيكي.
أليست هذه مهزلة ؟
وهو معذور ( وإن كان هناك من قد يفعل ذلك قصدا بلا عذر ) ان كان مصطفى يجد الاحتفاء و كيكي تضيع مواقفه و اراءه في زحام الناس.


.

لووووول يا قيقا
تعرف كلام انكم مثقافتيه والارسال علي موجات عاليه التردد دا كلام زول لبط
نظام تقرصوا شويه او تتضايروا عشان القي لي موطء رجل معاكم .
بالجد بوست ممتع !

حمور يا حمور

Quote: بالضبط كده .. المشكلة في العزة بالاثم. انا اول ما كتبت لمناهل كتبت لائما الكلام الهي قالتو و بس. لكن لمن استمرت على مدى يومين حايمة بالكلام ده و تدخل بوستات المعترضين ليها تصفم بالامنجية الموضوع بالنسبة لي بقى عزة بالاثم. لأنها ما اكتفت بالكلام الفارغ و القذف .. بل تعدتو لانو البيعترض على كلاما ده يبقى امنجي. لا نفس اللحظة لا في نفس اليوم. لأ تاني يوم من كتابتا ديك. فده كلام زول مصمم و راسو كده و مقعتنع انو ده الصاح. اها انا راس زي ده بنفض يدي منو تماما. و لا اتوقع منو خير نهائي.

ما تحمبلهاش خالص اوي كدا يا حبيب ألبي!
غايتو اذا انا زين العابدين، شكلك انت مبارك عدييييل
حدي معاك " الآن فهمتكم " رسمي .. شفت كيف!؟

ح اعيد ليك جزء من مداخلة الصديق كمال عباس ( مع انها ما بعيدة من المداخلة دي )

Quote: دا كلام عميق ورائع! فأنا مثلا أختلف مع إشارة مناهل للمرحوم حاج نور وأعترض عليها ولكني لا أصدر حكم كلي علي مناهل بناء علي تلك الغلطة بل ساأحاكمها وأحكم عليها وفق الظروف الموضوعية والخاصة والجو العام وسياق إيراد الكلام واضعا في الإعتبار عامل السن والتجربة ونشاطها الميداني الصدامي الذي يضعها في قلب الحدث وحقيقة أن من أغتصبوا وعذبوا هم زملاء لها الخ .. الناس يختلفون في حساسية التلقي ودرجة الإنفعال وفي القدرة علي التحكم وضبط المفردة فليس كل شخص له إمكانية ( حمور وكمال مثلا ) في تقليب الكلمة عدةمرات وإرجاعها للفرن حتي تستوي أو حساب نتاج الكلمة وتأثيرها وضررها ونفعها ومردودها والتعامل بعقلية شيوخ في السبعينات من العمر ! قلت في هذا :- حدث الساعة -ا لإغتصابات - مؤلم ومعذب ومهين بشكل جعل من المشاعر تلتهب واللغة والتعبير يصبح حادق ومر - فالناس يا حمور تختلف في درجة التلقي والإنفعال لإعتبارات عدة منها - عامل السن والنوع ( الإنثي في رأي بصورة عامة أكثر إحساسا بإهانة وإغتصاب إختها من غيرها- و الناشط الميداني المتوقع وفي إي لحظة تعرضه للإعتقال والتعذيب يختلف عن غيره - ومن هنا أعتقد أن ردود الأفعال والإنفعالات محكومة بسياقها الظرفي وبمزاجها وقدراتها علي التحمل والتحكم في الذات والمرارات !....... فليس كل شخص له القدرة علي ضبط النفس والقاموس والأخذ في الإعتبار حساب أي مفردة تصدر عنه )

اها يا ماما دوما كدا كيف؟ .. مقسمة تمام؟ .. الموجة دي ظابطة معاك؟
ياخ انت تجي و تنهري اجعص مسغفاتي، يقوم و تقعدي محلو .. عندنا كم ماما دوما اصلو نحنا!؟

شوف يا حمور حجم الاذى الاتعرضن ليهو ( الشابات ) ديل - تحديداً- من كــلاب الامن :

ممكن تبيتي برة بيتكم عادي مش كدة ؟ مبارين شباب الكوندوم

يا حمور " قلة الادب " ما بتشكروا بيها .. لكنها اهون في تقديري من " فلترق كل الدماء "* دي العقلية المتماهية مع الجلاد .. دي العقلية المحتاجة اجتثاث ... الحياة حق مقدس لا ينبغي المساس به اطلاقاً
فحارب الفيل خليك من الظل.
و خفف قليلاً يا حبيب فـ " قليلة ادب " دي كتيرة منك، ياخ اسي اعتذاري دا كولوووو فوق " كلمات " اقل منها بكاتيييييير ..
ياخ ما تبقى عليها انت و الامن و كيزان البورد و رمادييه ( انا غايتو انسحبت )!! .. برضو الرحمة حلوة
بعدين ابشرك .. السمع كلمات نابية زي الجابا خدر دي، قليل ادب ما بتسوي ليهو شئ .. بل بتاذينا نحن ديل اكتر منو يا حمور ياخ!؟
ياخ انا فاتح البوست عشان اعتذر .. موقفي شنو لما يتبل فيهو المعتذر له؟
كدا ما حشرتني في ذاك الموضع من الوزة ذااااااااتو!؟


------

شاهد الله افكار زي دي تحتاج يلبسوا ليها بامبرز في نص الراس خوف الطفح ؤ كدا
كلنا كنا ملتوثين .. حالة كونو المشهد السياسي ذاتو ملتوث
بالجد - رغم توفر سوء الظن العريض، كأعرض ما يكون - ما كنت متخيل انو ننحدر للدرك دا ( مولاة و معارضة و خاتف لونين و رماديين ) .. الرماد كال حماد!!
و ين الكلام دا من دعوة المرحوم الخاتم عدلان : " نقد الاقلام .. لا صليل الحسام " او نحو ذلك، استبشاراً بنسائم تحول ديمقراطي من قبلي "نيفاشا" مفضي لدعاش محبوبتنا " الديمقراطية" ام همبريباً طااااالق !!؟؟
حليلو هو ..
حليل الراحو كلهم
و حلينا نحنا ذاتو!!

فتح الرحمن خلف الله
مواليد القيقر عام 29/8/1971 م
خريج كوستي - جملون 1978عام - 1983
--------------------------------
وعليكم السلام ورحمة الله وبركاته،،،
ردا للتحية بأحسن منها
ثم خالص الشكر والتقدير

و عليكم السلام و الرحمة اخانا محمد الحسن

Quote: وعليكم السلام ورحمة الله وبركاته،،، ردا للتحية بأحسن منها ثم خالص الشكر والتقدير

عبد الكريم حمودي ...
دا باقي الاسم .. البركة في في " قيقراوي " دي طلعتني من ورطة حبيبنا سيف النصر مين مين كدا! ... اللخ اللخ

اكتشفت اننا دفعة و لّ شنو؟
ما صاح

اخوك - طبعاص - بليد ؤ كدا بعيد عن السامعين .. عدت و دخلت الجامعة - برضو اسكول .. الا اسكولن تاني .. اوف بزنس - دخلت بعدكم بي سنة. و قيل اكتر، بسبب احداث استشهاد طارق و المقاطعة و ما جرجرا على الجامعة و الاستقرار فيها.
انا دفعة 1991م اسمياً .. بدأ العام الدراسي فعلياً 11/4/1992م

بالجد سعيد بالطلة دي
و تأكد من جزيل الشكر عليها و وافر المحبة و الاحترام

يا قيقا حاشاي ان اقصد بقلة ادب "انطلاقة " .. و الا اكون زيي زيها.
لكن لا اجد لمطاعنة رجل ميت بشائعات سلوك جنسي على رؤوس الاشهاد بلا خجله الا انه "قلة ادب ".
اديني ليها اسم تاني و انا اترك هذا فوراً.

كلام كمال ده لا اختلف معاو في الاطلاق.
دي حاجة انا مؤمن بيها برضو.
لكن لا تعني - بالنسبة لي - انها حكم ملزم لكل حالة.
مناهل ده شكل تعاملا مع الحاجات.
من زمن بوست ود الباوقة بتاع انا اوزن زيك كم و ما عارف شنو داك.
بغض النظر عن انو ود الباوقة خاتي في انو يهبشا بدون سابق معرفة فيستحق ما تكب على راسو ..
لكن شكل رد فعلها بعد كم يوم من كلام ود الباوقة ليها و التطاول و التفاخر الفي البوست لو قريتو مع بوستها ده حتعرف انها عقلية زي ما قلت ليك فوق لا تختلف عن نظرية " هو ضدي فهو يستحق ما يجري له ".

و خليني اقتبس عن الرمادي الاعظم تمبس كلمة كان قالا قبل كده في حق مناضل.
قال تمبس لوّنه الله بألوان النضال الزاهية :
ايوه صدقنا انو الزول ده مناضل و ناس الامن عذبوهو .. لكن نحن ذنبنا شنو يجي يعذبنا هنا ؟
او كما قال تمبس.

فكرة انو البورد ده محل لتفريغ الكبت و الضيق و الزهج و العقد و غيره فكرة غير سليمة.
ولا ذنب الناس الهنا انك زهجان هسه .. او انو النضال عاصرك.
دي فكرة ما سليمة.
لو اتقبلت في مداخلة ما بتتقبل في بوست.
لو اتقبلت في بوست يوم ما حتتقبل في نفس البوست تاني يوم.
لو اتقبلت في بوست واحد كم يوم ما حتتقبل في البوست التاني.
يعني ما ممكن مناهل كل ما تخش البورد تكون متعرضة لمؤثرات.
اول يوم كتبت العنوان كانت تحت تأثير الانفعال و هتفت كم كولينق و قالت لمحمد عمر الاعترض على العنوان : اشم في مداخلتك رائحة.
مشت و جات بعد كم ساعة برضو واصلت الكولينق.
غابت و جات تاني يوم شاتت كم كولينق و مشت اتهمت العوض المسلمي و محمد يوسق الزين انهم امن و انو رسالتا وصلتم.
ما تقول لي ده زول مشوش عشان الوضع على الارض عندو سيء.
طيب الوضع هناك سيء جايه كايسه شنو في البورد ؟

لو قلت لي زعلانة من كلام في البورد يمكن اقدر افهم اكتر و اعيد القراية.
لكن زعلانة من جهاز الامن و انتهاكاتو على الارض تجي تفشها على رؤوس الاشهاد بالقذف و المطاعنة و الاتهامات ؟
واسعة يا قيقا.


يا قيقا لو انت بتعزها فعلا و بتقدرا انصحا.
ما تدافع عنها.

معليش يا شباب ( الرمادي ) جاييكم و الله .. بس خلوني اقنع ( مبارك ) دا عن التنحي عن الموقف المتصلب دا ..
حمور يا حمور

Quote: مناهل ده شكل تعاملا مع الحاجات. من زمن بوست ود الباوقة بتاع انا اوزن زيك كم و ما عارف شنو داك. بغض النظر عن انو ود الباوقة خاتي في انو يهبشا بدون سابق معرفة فيستحق ما تكب على راسو .. لكن شكل رد فعلها بعد كم يوم من كلام ود الباوقة ليها و التطاول و التفاخر الفي البوست لو قريتو مع بوستها ده حتعرف انها عقلية زي ما قلت ليك فوق لا تختلف عن نظرية " هو ضدي فهو يستحق ما يجري له ". و خليني اقتبس عن الرمادي الاعظم تمبس كلمة كان قالا قبل كده في حق مناضل. قال تمبس لوّنه الله بألوان النضال الزاهية : ايوه صدقنا انو الزول ده مناضل و ناس الامن عذبوهو .. لكن نحن ذنبنا شنو يجي يعذبنا هنا ؟ او كما قال تمبس.

تعرف سردك اعلاه - سبحان الله - كأني كاتبو انا .. بالتالي اتهمك اتهام صريح بالسرقة .. سرقة افكار برضو سرقة مش!؟ ... بس احذرك بي الدغري : اعمل حسابك قلنا ليك " ذاكرة مغتصبة " ؤ كدا ... كتير من بنات افكاري بطلعن بنات حرام .. عشان كدا ما بنشر كلو ( ابيت بي تلفونك يا فسل!؟ )
جزء من الما اعتذرت عنو - و لا ح يحصل - انو بيتنا مناهل دي بحتاج فعلاً لتصحيح فكرتها و فهمالـ/ عن " الجندر "
ياخ بوستيها بتاع ود الباوقة الاول داك تشويه عديييييل لعمل ادبي لاستاذنا و شاعر الشعب محجوب شريف .. لحدي ما زميلة البورض دلوش العروش طالبت ( شاعر ) الشعب يعتذر ليهن!!؟
عشرة مقاطع للحياة عمل ما فيهو اي تحقير او حط من قدر ( نوع ) .. و حتة " انثى و لا دستة رجال " جاية بعد " لو صاح، اعز من النساوين الرجال؟ "
و شوف بعد داك الوصف للانثى دي :

تمشي وما بتطأطي
ما بين بير وشاطي
تطلع عالي واطي
نهارها مع السواقي
وليلها مع الطواقي
وعمرها للجهال

تجي تستخدما للحط من " كرامة " الرجال او أي رجل !؟
و نحن شنو طيب بالضبط كدا!!!؟؟*

بعدين انا كنت قايل الجندر فهم متجاوز. و بنظر للانسان كانسان مش ببحت تحت السراويل، بهموا النوع الاجتماعي، و بحفظ حقوق المثليين عديل .. طلعت فاهم غلط مش!؟ .. اعترف بجهلي - عشان كدي اغلبنا نحن الرماديين ديل كاشين منو - كان كدا انا و صاحب الكتاب الاخدر وااااااااحد!!

يا حمور ياخ انا ما بدافع .. بس انت مندفع زيادة حبتين ... او هكذا اعتقد

تعال نحتكم لهيئة حكماء البورد ...
كمال عباس : فصلّ في حتة السياق و التقييم الكلي ... قول واحد
ماما دوما ( حكيمة حكماء البورد ) بعد ما الموجة ظبطت معاها شهدت شهادة حق ، و طلبت بالحرف الواحد " اعتذار من مناهل عن( الخطأ) دا؟ " ... اعتقد انو كدا فيير جداً ... و لّ شنو؟
مداخلة عيدروس القلت عجبتني محتواها بالضبط الانت تفضلت بيهو دا :

Quote: يا قيقا لو انت بتعزها فعلا و بتقدرا انصحا. ما تدافع عنها.

لكن يبدو انو المشكلة مني .. انا الغبيان ما قايل نفسي قاعد ادافع عنها .. تصدق؟


اها نقلب الصفحة يا " بركة"؟ و نقرّض عند حتة " مطالبة بالاعتذار " ... و نشوف الرمادي قبل ما الرماد يكيل حماد!؟


انت يا حمور ما عفصت الرابط مش؟ .. اعترف احسن ليك .. هنا المحكمة!؟
القصة اكبر من نبز و اساءة و الفاظ نابية .. القصة يا حمور مسألة اقصاء رسمي عن المشهد السياسي .. عاوزين - و يا للهول!! بعكس اتجاه التاريخ - يرجعوهم " بطن البيت " مرة تانية .. محاولة قهر ظلامية.
هل بتقبل دا يا حمور؟
تعامل مناهل ما ( مثالي ) بل غلط بالدرب العديل - و يوجب عليها اعتذار - لكن هو رد فعل متوقع.
الحتة دي ما محتاجة منك وقفة اكتر من الحتلت فيها ديك؟
خليك من مناهل ... التعامل يكون كيف مع القهر و الاقصاء و الاسفاف دا ؟
السؤال ليكم كلكم حيث لا حياد ... الرماديين انتو اهم ناس لانكم متعرضين لنفس الهجمة من الابيض و الاسود و بتحاربو في بذاكرة تيتل في كل الاتجاهات ... شكراً يا حمور على كلمات الرمادي الاكبر تامبا .. و دا اسطع نموذج لجهل المعارضة بتحويل فنان - و العهدة علي انا دا - و ديمقراطي - و العهدة على عادل عبد العاطي - لى رمادي و اعظم كمان!!؟ خليهم يفهموا انو بنقول في شنو!؟

اها يا شباب .. اقصاء .. محاولة اقصاء .. اقصاء !!
نطلع من عنق الزجاجة دي كيف ؟





----------

ياخ امس اتذكرتك باللييل .. العربية عرضت جزء من الكتاب الاخضر( طلع انو الكتاب ما اخدر! الكاتبو سجارو اخدر ) .. آل ايه : المرأة مثل الرجل .. تاكل و تشرب ايضاً .. شوف عين عديل للكتاب في الشاشة .. لو حكوا لي ما كنت بصدق! .. المكضبني - ما بلومو طبعاً - بس يحصل على نسختو من الكتاب الاخدر برااااو

سلام ياود الصايم

Quote: بالمناسبة يا كمال يا عمكـ خالتنا دومة دي اليومين ديل كورتا مصرّجة يسألني الله

يعني عاوزنا نخت كابتن دومة في كنبة الإحتياطي وننزلها آخر ربع ساعة
! طيب نعمل شنو مع الجمهور البهتف ;" بالطول بالعرض دوما تهز الارض" ! ويا دومتنا يا مدرسة كرة وفن وهندسة !! واللا كمان عاوزننا نعمل ليها مهرجان تكريم ونلعب ناس التجاهل أساسيين عشان الجمهور يطفش!! ! تلاقها عند الغافل ! دي لمستا للكورة بي قوون واللا باص قوون ! ..... خليك من دوما ما شايف ناس الحكومة البقي تهديفم في الكشافات والمصاطب الشعبية ! و اللا تقليشات مقشرة في خط ستة !
.......

يشهد الله إني أول واحد فتحت البوست المعني
وكتبت الرد التالي:
إن كنت لا تعرفين معنى عبارة (أولاد حاج نور) فأنت غبية
وإن كنت تعرفين فأنت قليلة أدب
لما جيت أعمل إرسال اتذكرت صورتها خلف القضبان ومخاطباتها في السوق واعتقالاتها العديدة
دار في بالي إنه يمكن سيرة معاملة الأمن للبنات - بقول يمكن - صحت فيها جراحات خلتها فاقدة البوصلة
ما عاوز أقول إني عذرتها .. لكن حسيت بي إنها ما بتستحق قسوتي اللفظية دي
أغلقت الصفحة - دون إرسال - وأنا أردد في نفسي (اليدو في الكيبورد ما زي اليدو في القضبان)




فيما يخص إصرارها على الخطأ فأنا اعتدت العزة بالإثم في الأسافير ولم أعد استغربها .. كما أن هتاف الهاتفين يمثل حصانة اسفيرية

ابو حميد
اشكرك حتى تستغيث للمرة التانية
بالجد ما عارف اشكرك كيف ... تتقاصر كل الكلمات قدام بيانك الاتي نصه

Quote: يشهد الله إني أول واحد فتحت البوست المعني وكتبت الرد التالي: إن كنت لا تعرفين معنى عبارة (أولاد حاج نور) فأنت غبية وإن كنت تعرفين فأنت قليلة أدب لما جيت أعمل إرسال اتذكرت صورتها خلف القضبان ومخاطباتها في السوق واعتقالاتها العديدة دار في بالي إنه يمكن سيرة معاملة الأمن للبنات - بقول يمكن - صحت فيها جراحات خلتها فاقدة البوصلة ما عاوز أقول إني عذرتها .. لكن حسيت بي إنها ما بتستحق قسوتي اللفظية دي أغلقت الصفحة - دون إرسال - وأنا أردد في نفسي (اليدو في الكيبورد ما زي اليدو في القضبان) فيما يخص إصرارها على الخطأ فأنا اعتدت العزة بالإثم في الأسافير ولم أعد استغربها .. كما أن هتاف الهاتفين يمثل حصانة اسفيرية

لك الحب يا جميل




--------

اتكيفت منك جداً جدن لما صدحت بالحق و بليت لي الخال بهناك لما حاد عن جادة العدل و اختل ميزانو
اسمع ياخ ما تعال نتصاحب ياخ؟ ... المافي شنو!؟

الزول الجميل عشاري
شكرااااااان جميلن ياخ

Quote: عندي آراء كده بحس إني عشان اقولها داير لي زول شحم ولحم عشان أشرحها ، لأنو المنبر ده بخلي أفكارك ناقصه ، يعني في أفكار عشان تشرحها محتاج لنوع من التعبير الحركي كأن تضع يدك على كتف ود الصايم وتقول ليهو والله العظيم يامحمد أن لاشايف موقفك رمادي ولا ينبغي لي وأنا ضد النضال بادوات غير شريفه ، ثم تدلف لموضوعك الذي يكون في بعض الأحيان لايتسق مع رؤية صديقك أو ينقص عنها

ما احوجنا للحوار .. الآن الان ..
و ما احوجنا للثقة في المرحلة دي.
اتفق معاك في المقتبس الفوق دا لحد ما .. لكن النت اداة تواصل عصرية، نحن البدائيين بس!
مأسورين للقديم .. بنقارب العصر بذهنية كلاسيكية .. ما لازم تتحقق في الواقع الافتراضي دا كل شروط الواقع مش!؟
بالمقابل لسه ما بقى كمان مقابل موضوعي للواقع و ان سحب البساط في مجالات كتيرة جداً .. و دي غلطة اغلبنا، بتعاملوا معاه كانو بداية البداية و نهاية النهاية .. في اغلبو واقع مزيف .. قاعدين نظهر فيو بالصورة العاوزين نكونا مش الكايننها .. و بتداخل و تختلط لما ما نعرف نفرق بينن!!
انا غايتو متكيف من الوضع السردتو دا - بكعسك تماماً - في حالة واحدة، انو يكون الزول البعبر التعبير الحركي القلتو دا، يكون " احمد" اخوي .. غايتو لو بحكي ليك في قصة و فيها خنقة ح تتنخنق يعني ح تتخنق .. و لو فيها كف ح تاخد ألم على أفاك .. كانو ما بتعرف الكف قبل دا
انت قايلني مصر على الوش الاخدر دا لشنو - غير انو اغيظ بيهو ملاسي طبعاً - لغة الجسد مهمة ياخ! .. مرات كدا تكتب كلام، تجي تقراهو بعد كم يوم تحتار ذاتك انت كنت جادي و لّ بتهظر!؟ دا انت دا براااك .. التانين كيف؟
طويلة هي مشاورين .. حاجات كتيرة بتضيع في الترجمة ما بين الاحساس و الارسال ( الكتابة ) و الاستقبال و الاحساس ( القراءة ) .. تعست الوسائط، و عز المطلب أن ( افهموني صاح يا اخوانا )

ثورة الياسمين اثبتت انها فرصة و اداة تشبيك ناجعة و مجربة ...
لكن برضو الحوار مهم .. و التوقيت و ترتيب الاولويات على قولك اهم ..و الاهم بالنسبة لي هنا تمسكي بـ " حق الخطأ" و دي نظرية انا سمعتها من " حمور " دا همسلف!
.. فاعجبتني من النظرة الاولى، فتبنيتها خاصة انو بنات افكاري بطلعن ما شرعيات ( اوع تبستفني في دي برضو زي ما عملت في بوست علاء الدين .. بتكلم عن بنات افكار ساي )

شوف الكلام الجميل دا بالله عليك ..

Quote: وعشان كدا انا بحب المجتمع السوداني عشان هو مجتمع الستره والستره و الفضيحه متباريات... الستره في الشخصي اما في العام ... و في حقوق الناس ... و في الأعتداء علي عرضهمو دمائهم واموالهم فأكتبوا ما شئتم. بالنسبة للزميله مناهل : نصحها و نقدهاوتصحيحها هو حقيقة الوقوف معها ... و ليس التصفيق لاخطائها .. كوني جسورة يا زميلة واعترفي باخطائك

يديك العافية استاذ / عيدروس
وفيت و كفيت

و انا برضو بتشرف اني سوداني ، و قيمي قيم شعبنا دا، وصانا النبي الكريم " اذكروا محاسن موتاكم "
الميت بين يدي عزيز مقتدر ... هو احوج للترحم عليهو .. و كلنا لذات المصير.

نصيحتك الغالية هو بالضبط ماعملناه، و اختلفنا - اختلاف مقدار - في الاسلوب و التوقيت ..او هكذا اعتقد
الدور و الباقي عليها في استكمال الموجه ليها مباشرة بالسطر الاخير.

جزيل الشكر و كؤؤد المودات

Quote: اسمع ياخ ما تعال نتصاحب ياخ؟ ... المافي شنو!؟

وأنا لاقي !
الماف شنو؟

Quote: يا قيقا لو انت بتعزها فعلا و بتقدرا انصحا. ما تدافع عنها.

حمور ياصديقي العكليت

من هنا ببدأ معاك

بتذكر إنك قلت لي في البوست الإتمسح
ماتخفف الضغط عن مناهل

وشيل تلفونك أضرب ليها ناصحا

كما قلت لي إنك لو وقفت غيرك مابقيف
_______________________________________

عارف ياحمور بتعرف لمن تعضي المخده ...ده الحصل لي

لأنك ياصديقي عندك حركه مادسيسه

وأظن ان لها علاقه بشخصيتك ككاتب ، فأنت تفترض إفتراضات قد لايكون لها علاقه بالواقع مثل وضعي في قالب الذي يريد ان يخفف الضغط على مناهل وفي حقيقة الأمر أن تصرفاتنا في الحياة دوافعها مختلفه

أنا لم أفكر ولو للحظه أن أفك الضغط عن مناهل ، ودخول نصرة الأشخاص ده أنا لا أقربه أنا أدخل لأناصر الأفكار او أنتقدها

وكنت قد رفضت نصيحتك بمهاتفة مناهل لا لرفضي للفكره ، وإنما من منطلق أنه لو كان في تلفونات مفروض تنضرب فيجب ان تكون للموضوع الأهم موضوع صفيه بإعتبار أن أمر مناصحة مناهل في ذلك الوقت لم يكن من أولوياتي

وآخر ماعجبت له ياصديقي أن ذكرت لي ( إنك لو وقفت غيرك مابقيف ) ماعرفت أقول ليك في الحته دي شنو غير إنو منو القال ليك إني دايرك تقيف

عارف ياحمور أنا لولا هذا البوست الجديد لقيقا الحبيب ، لحسبتك مراوغ كبير ، لأنك الآن فقط حددت شكل النزاع بيني وبينك وهذا مالم يكن في البوست القديم الذي شارفت فيه انا على تمعيط شعري وانا أناشدك بإعادة قراءة مداخلاتي

__________________

كمال عباس أيها العزيز

ما اتيت به من تحليل أن مناهل تنطلق من مكان مختلف

لأن صفيه رفيقتها في قرفنا

ولأنها فتاة

وتأثير خطاب الميادين الجماهيري على مواقفها التي أصبحت حادة بطبيعة الحال

قسما هذا لم يكن إلا ماكنت أفكر فيه عصر اليوم وقررت أن أنتظر الليل حتى اكتبه في هذا البوست

لما وجدتك أتيت بهذا الكلام عجبت من توارد الخواطر هذا

وسعدت أيما سعاده أنني سأجد نصيرا لي أمام حمور المتعنت

Quote: الماف شنو؟

يا ابو حميد يا فردة

كل من بل - وهو على حق - الدكتور أمين خال حمور صار اخي عدييييييييل
شفت كيف!؟

الزول دا بالي صاحبي هشام ادام بهناك بغير رحمة






---------

تعرف يا مبارك ... اوبس اقصد حمور ..
تعرف كلمة " بل " دي في لغة الشماشة معناها كعب كلو كلو .. و الله جد
و زيها كتيرة من الكلمات بما فيها الاستعملا [ حسني مبارك همسلف ]* هنا دا!
لكن اتدجنت و استؤنست زي الترتيب .. و دخلت البيوت و الخطاب زي السلام عليكم .. او قولة السلام عليكم اذا بتريد .. شفت كيف؟

مذكرة تفسيرية او قول [ تلخيص اللحظة ]** :

قصدي من اللغو اعلاه انو المفردات و اللغة ماعون ... بتختلف دلالات المعاني جواه و بتتفاوت .. و بتتحرك في حيز دلالي مااااااااهل ...
و يبقى الرك على السياقات ..

ولسة بطالب باعلاء نظريتك .. " نظرية حق الخطأ " .. تقديم حسن الظن .. و حسن الفال بحوار عفي
ما نصل النهايات من ن ن ن البداية .. لو كلو زول بغلط بشطبوهو! ح يجي يوم ما نلقى زول نشطبو ذاتو! .. اها نشطب منو يوداك بعد ادمنا!؟



* دا النص الاصلي كما ورد على كيبورد حبيب ألبي حسن موسى بسودان الجميع ( واخدة بال سعادتك استاذة / منى التجاني ... ما تخربي بيتي ياخ! .. ( همسلف ) دي علامة مسجلة لحسن موسى همسلف .. الزول دا ما بعرف هزار اسي يقوم يرسمنا ياخ!؟ )
بس المقصود ما كان حمور زيادة ( و قبل الثورة المصرية ذاتو! ) .. المقصود فارس و مجالد و قاعد معانا هنا بكل الحب .. لجوز اللوز دا كل الحب .. و الله ما حبب الي من اسافيركم هذي قدر حبهم اتنين

عندي تعليق عاصرني جدا - بخصوص ثورة الشباب المصرية - خصوصاً انو لافق مع مداخلتك الهنا دي. . بس متين نصل للحتة دي؟

** د. المامون علي صالح من ( اسافي يوسف حسين الثلاثة ) او نحو ذلك

Quote: حين يصير هم المواطن فتحات يوتيرن و اشارة مرور مقابل ان لا يكون له رأي ولا يخرج عن المسار يسهل السيطرة عليه.

مع انه ده ما موضوع البوست لكن الكلام ده عجبنى يا حمور عشان كده عملت ليه كوتيشن
وشكرا
(ما تميت قراية البوست)

هوي يا مثقفين
أيي خطاب يزري بالسوداني العادي
و يعتبروا ما واعي بي قضيتو انا ما معاه
و كمان تاني دا ما ياهو واجبكم ..
الوعي دا ما بي تقدموه انتو في جبهة النضال
الثقافي/الأجتماعي السياسي
دحين يا خلو خطابكم الشين للسودانيين
ولا خلو واجبكم في الجبهة الثقافيه

" و كمان حارقني حرقه هتاف (الشعب جعان لكنو (ج ب ا ن)

لك التحيه ايها السودانية / السوداني

العزيزة سلوى

Quote: (ما تميت قراية البوست)

اها دا جنس الكلام البجيب اللوم مع عيدروس دا ذااااتو!!

اخدي راحتك خالص
و جنس الكلام دا رااااقد على ارض السودان الشغيغ داك


استاذ / عيدروس

صدقني ...
الشغلة عاوزة شغل كتير خلاس!!
و الناس ما فاضية من مناقارات دا رمادي و داك لونو باهت و بهد من اول غسلة!!؟
استغرقنا وكت طوييييييل جداً عشان نفهم بس اننا مجرد جيل انتقالي، و مفُسد تماماً
في قمة العصر دا قد شهدنا المذبحة، و الكان " مجرد واطة لمة ناس " راح بح ..
انقسمت الواطة .. و اللمة غايتو لسه في .. مويتا شنو؟ ما معروف؟ هل في غباها لسة!؟
الياسمين و الصبار و اللوتس زلزلت اقليمنا .. و دكت العروش الهربة، الهش، العويش
و عندنا الحال في ي ي حالو!!!
لنا الرماد بس


-----------

يا سلوى ياخ ممكن النص بتاع الاستاذ بتاع " نحن العلينا بنسوي " داك ؟
الصباح دا بحاول اتذكر فيو .. تصدقي!؟

أصحابي العُزاز

وخصوصا صديقي حمور

تذكرت موقف لمناهل أورده هنا وانا أعلم أنه لايُشبه موقف عنوانها محل الجدل

ولكن ربما للتعرف عليها اكثر ...ولنحلل موقفها ذلك

لو معاي قولو لي أحكي

المافِ شنو على قول قيقراوي

عشاري يا حبيب

Quote: ولكن ربما للتعرف عليها اكثر ...ولنحلل موقفها ذلك لو معاي قولو لي أحكي

لووول انت في دار قيقراوي كل شئ في .. المافي شنو يا حنين ..!؟
شوت ساي و محل ما تجي تجي او كما قال الرمادي المغرض ابو حتحوت

انا برضو عندي حكوة عندي احساس انها لافقة مع النقاش هنا ...

كرر حمور في البوست اياه كلمة " عيب " كم م م م مرة
" وعد " بتي - اليومين ديل معاي بجاي - عدنها غلوتية حلوة كدا زيها، كل مرة تسألني : انت عندك جيب؟ و انا انسى او اتناسى : ايوة ... بطريقتا الطيفة البعرفا انا ديك : لكن الكلام دا ما عييييييييييب!
صديقتاذنا عصام جبر الله و عيدروس اتواعدوا و وعدونا بـ/على نقاش محور ( الاخلاق ) و الثابت و المتحرك فيها ... اظنو " وعد " العاصفة سااااااي ...

لي وكتها خليني احاول انا دا - براوية من روايات قيقا طبعاً - سقتهم لاداء العمرة، " فادي " و هو الاكبر ( 7 سنوات ) معجب جداً بحكاية الاحرام، بس ما عارف انها " تيوبلس " و مصر يحرم، اشترينا الاحرام من الطريق، و لما بقينا على التنفيذ اضطريت لخوض مفاوضات شائكة في النقطة المذكورة .. غايتو بعد لأي وصلنا لحل وسط انو نخليها طرزان ساي و قد كان ..
شوية و اسمع ليك " عيب .. عيب " من المقعد الورا من جوز اللوز وعد & وجن، فادي ما قادر يبقي على القطعة الفوق من غير ما تقع. نهرتهن ليك اتلهن .. انتن يا صعلوقات بتعرفن العيب؟
امهم اعترضت على الكلمة بشدة .. قلت ليها كدي اديها صنة هن بناتي زي ما هن بناتك، واتلفت عليهن و قلت ليهن كدي غنن الغنية القبيل كنتن بتغنن فيها؟ .. حاولن ينكرن - لانهن ما عارفن اني كنت صاااااحي و عامل غمران ساي اتشجعن بعد اكتشفن انه لا مانع لدي - في الحقيقة في مانع لكن اسوي شنو - انطلقن :
" في نومي بتقلب .. حرامي القلوب تلّب ... اللخ اللخ "
البركة جدكن - ابوي انا - مات ساي، كان اسي طب من طولو ميت!! .. و تاني قام من موتو الاولانية و اتبرأ مني انا دا، و انتحر تاني!!
تعرف في بدايات التمنينات، و حلاوة " تلفزيون " يا دابا عرفناها .. كنا بنعزم اولاد جيرانا معانا " المسلسلا " بتاعة الساعة 8 م، اها الله يقدر واحد مفعوصة - حتى لو تمثيل ساي - تقول كلمة " حب " دي ساي في خشما بس!
يقوم على حيلو* - ماف رموت و لا حاجتين - و تسمع طق .. تسمعا في ي ي قلبك! مؤلمة خلاس و محرجة لينا نحن ديل العازمين ليها الناس!
انقر كدا خلاس؟
وسن يا معلم .. يرسلوك تجيب الكتاب من الاوضة ..
كرهنا خالد محمد خالد ذاتو!


ما يستفاد من هذا الحديث القيقارواي :

في حاجة اسمها " عيب " ؟
ثابتة في محلها " صنم " كدا يعني؟
وقع ليكم ما قصدتو من اننا " جيل انتقالي "؟
مهمتنا في تنفية و نقل " التراث " الجميل الورثناها دا حدها وين؟ عملنا شنو في الاكسرسايس دا؟
كيف التعامل معاه بدون قطيعة- زي ما بعملوا الحداثويين - و بدون جمود!؟



--------

الله يرحمو في العشرة سنة الاخير كان عايش بكلية واحدة، ما كان بتحرك كتير، الموية من تحت السرير كان بنادينا نناولا ليو.. و كنا بنتسابق بكل الحب على الشرف دا..
اسي وين الكلام دا؟
و الله فادي يقطع معاي ناشف طوالي ... اهدي جمبك!!

يا عيدروس يا شقيق الروح شايفك عزيتني بهناك ... هو ميت الليلة انت قايل؟ .. ياخ انا من 1986م يتيم و الدنيا دي تدقش فيني بدون رحمة؟
حننتك؟

شفت يا عيدروس يا فردة

Quote: ياخ انا من 1986م يتيم و الدنيا دي تدقش فيني بدون رحمة؟

بكري و لا خساهو! .. قهرني ياخ! .. قهرني عديييل!
ياخ سورة الضحى دي في جزء عمّ ياخ!

اما بعد ...
حا اواصل هنا و احاول اربط ... نسوي شنو بقينا مكينيكيا في بورض من لا بورض لهو دا؟
هو ذاتو الما عندو بورض ساوين ليهو بروض لشنو؟ .. عشان يمشي يسرق و يجيب!؟
فياقة بس!؟



-----------

يا شباب .. مناهل ، عشاري ، حمور .. وصلتكم الرسالة مش؟
الظروف ما معروفة .. شكلنا ح نحتسب دا ذاتو .. و انا بقول في الكلام دا، ما متابط شر ابداً
لكن سيد اللبن عندو حسابات بعرفا براو .. فالعفو و العافية .. و كتيييييير محبة ليكم و لضيوفكم كلهم خصوصاً الظلمتم نفسياتي و ما قدرت ارحب بيهم فرداً فرد .. فالعقيد دخلنا في زنقة .. زنقة
و ما ادراكم ما العقيد، مع العقيد مش ح تأدر تغمض عينيك
كف نف، تلقى البوست راح شمار في مرقة

محبة للجميع

ياقيقراوي

سعدت أن لك أطفال

رجل بهذا الجمال وهذا الوضوح والروح الحلوة الشفافه

لابد أن يُربي

أسمعني

شنو داير تقفل وماشي

ماقلنا ليك عندنا قصة عن مناهل

خلى البوست ده قااعد

عندنا اليوم الختامي بتاع الدورة الرياضية الثقافيه أعذبو وأجيك

حبيبنا عشاري
نسوي شنو ياخ مع سيد الفنايل دا
تكون جاكي في قيمك في امان الله .. يجي يشيل الكورة و يحيرك يخليك شايت الهواء!
متى يصل البنيان يوماً تمامه اذا كنت تبني و غيرك يهدمو!؟
قصة مناهل كان حصل القدر و دا لحق امات طه تفتح ليها بوست عدييل .. و كان لزم الامر بالتلفون .. المافي شنو؟
بلز ليك الرقم بتحت باب الماسنجر .. اتفقنا؟

لكن جنس البرطعة التحت دي انا بفوتا في ي ي ذمتك و انا مقسم قسم د. تاج السر جعفر :
انّا تواعدنا ليالي الظلم ان نبقى هجائين حتى يستفيق الحرف من حمى التآكل..

كدي شوف و تأمل براك ...

Quote: أُكرر لكَ نصيحتي التي أسديتها لكَ من قبل (ولغيرك): "اشغل نفسكَ بها، فهي أحق بهذا الزمن الذي تصرفه في العبث، ونفث أمراض قلبكَ على الآخرين" وثق أنني لا أكترث بما تحاول (أنتَ وغيرك) إثباته، فهو لا يعني لي شيئاً على الإطلاق، غالبية من تداخلوا في هذا البوست، جاءوا ليُثبتوا الأمر ذاته، فقط تختلف الأسباب والدوافع والأهواء. وهم لم يكونوا بحاجة إلى إثبات حتى يهتفوا لكَ ولاكتشافكَ، فقط هتفوا من قبل لآخرين دون الحاجة للإثبات، والأمر عندي سيّان، العقلية الدينية التي تؤمن بإله لا إثبات ولا دليل على وجوده لا تحتاج إلى دليل أو إثبات لتؤمن بأن هشام آدم سارق أو كاذب، هي إنما سايكولوجيا الحاجة؛ الحاجة لتبرير سلوك أو موقف أخلاقي لا أكثر. فأرح نفسكَ وأشغلها بها؛ فهذا خير لك لو أنك تعلم. وأخيراً أعتذر لنفسي عن منحك هذا الوقت لكتابة هذه المُداخلة؛ يجدر بكَ أن تكون ممتناً لذلك.

و ح اجي - لو لقيتو قاعد - احكي ليك انت و عيدروس حكاية بتخص موضوع الاخلاق الثابت و المتحول .. الواقع الاجتماعي / الحضاري .. الثقافي .. اللخ اللخ

محبة شديدة .. انت عارف مش؟

Quote: لابد أن يُربي

لوووووووووووول

انا داير اليربيني في رقبتي دي

تربيهم الشوارع يا اخوي .. زي ما ربتنا نحن اليتامى ديل.
هي الشوارع علمتنا ان نفيق .. ان نبر البرتقالة ان نموت فدى الرحيق

بالمناسبة - ما حقت هشام - مناسبة الفدى دي، اسي فادي سميانهو كدا .. لكن ما ظنيتو يشيل اسمو..
برضو لن اعيش في جلباب ابي ؤ كدا .. طلع مقلب .. ماسورة ساي .. من اسي مريخابي .. كان مشى في السكة دي يمد ياهو الطلع كوز

اما جوز اللوز فعهدناهم لشاعر الشعب يا فردة .. و أنعم به من معلم





-------

لما تجي حتة ( الجد ) طوالي بتنط لي صلعة امين في مقدمة الذاكرة .. اما العم دي مشترك فيها كم صلعة - ليس آخرها حمور بالطبع - و كمين كوم شعر

خلوهم براحتم .. يتحركوا بحريتم .. امكن يحققوا حلمنا - مع تمسكنا بحق الحلم و المنى بدون إلزام - على قول التونسي : هرمّنا .. لقد هرمنا في انتظار هذه اللحظة التاريخية.. امكن تجي اللحظة دي ياخ! و نفرح نحن الجد و العم ديل

بنكون في انتظارك يا حبيب

يسعدني ( بل ) و يشرفني ان اصرح انو الـ ( بل ) في الاقتباس اعلاه كلو في صلعة الخال - جراب - أمين خال حمور همسلف .. دا غير باقي الالقاب الحصل عليها في مهرجان العلف الدولي بهناك ..
فمفروض يكون ممتن. على الاقل انو علموهو ما لم يك يعلم من دينه .. و لا بالضرورة حتى .. و يا للهول!!

الباقي .. ما بخصني ..
ادى المطلوب منو ..
ما يهمني التالي :

Quote: العقلية الدينية التي تؤمن بإله لا إثبات ولا دليل على وجوده لا تحتاج إلى دليل أو إثبات لتؤمن بأن هشام آدم سارق أو كاذب، هي إنما سايكولوجيا الحاجة؛ الحاجة لتبرير سلوك أو موقف أخلاقي لا أكثر.

كلااااااام يا عوض دكام!!!

بس ...

بس كلام × كلام !!
شفتوا التبرير الفطير لامر خطير زي ( السرقة ) عدييييل!!
عقيد بس!! ( و سيرة العقيد الجابت الهواء و حذف البوست السابق )
عندي : افضل تقول سرقت عديل و رجالة كدا.. افضل من البحث عن مخارج ما بتخارجك الا على عش الدبابير دا!!

يا اخوانا سؤال بالمناسبة - دي غير مناسبة فيورباخ بتاعة هشام اللي اسي دي ما عرفناها هي شنو؟ - سؤال جاد :
السرقة عيب ؟
عند كل البشر؟ و على وسع نطاق الكرة الارضية؟ و في كل الازمان؟

اكاد اسمع الجماهير - مستغبياني - و هي تصيح : انت رايك شنو!؟
هدوا من روعكم يا شباب انا راي زيكم كدا ..
لو صبرتوا بتعذروني على السؤال ...

خلوني احكي ليكم الحكوة دي :
" واحد متحدر من منطقة اشتهرت بالهمبتة و الهمباتة*، كان سائق اللوري بتاعو، و معاهو مساعد - في بعض الراويات ترد ( مساعدي ) و المقصود مساعد حلّة و ليس شكبزوربر - اها قام اللوري اتعطل بيهم في إحدى المدن. فدخلوا على ورشة و طلبوا من صاحبهاعدة يصلحوا بيها عطل لوريهم. و قد كان، بعد خلصوا امر صاحبنا المساعدي باعادة العدة، خت الخلف - ما يعادل الروس بالخليجي - و عفص ليك الديزل. هنا صاحب الورشة جاهو جاري مفزوع و رافع يدو، وين العدة يا زول؟ .. السائق بغضب و حزم يليق التفت على المساعد و سأله مؤنباً : انت ما رجعتها!؟ .. المساعدي المسكين نزل طوالي و فتح الصندوق الشالا منو، و لم يستطع اخفاء ابتسامة النصر البادية على وجههة المتعب، المظلوم.
صاحب الورشة وصاحبنا - بعد محنتو دي نتضامن معاو نسوي شنو؟ - دخل في ذاك الموضع من الوزة ذاتو بكل العبق الاثير.
لم ينس صاحبنا السواق ان يبستفو عشان تبقى ليهو درس في المستقبل :
" اسمع يا زول، نحن ( همباتة ) السرقة بنتشرفبها! .. إلا انتو يا اولاد البنادر الظاهر ( القالو ذو اليد )** اظنو ما عندكم عيب!!؟؟ "



------

* يا عيدروس بلدنا القلتها ليك دي اشهر زول متحدر منها " الطيب ود ضحوية "
و اعتقد لو ما اخاف الكضب انو هو القائل :
إن بردن ماني البخيل صريت .. و إن حرن بكاااار ماهن صفائح زيت

في كوستي كان عندي كتاب اسمو " الهمبتة و الهمباتة في السودان "
مخطئ من يظن انو الهمبتة = السرقة
و مخطئ دبل من يظن انهم بلا اخلاق
ما بسرقوا سيد الواحدة، ما بسرقو حق الايتام، ما بسرقو من مرأة ... اللخ
الكوالتي ذاتو بتفرق*** .. رافعين السقف و القزاز في السماء .. " ألبل جداية الباجة" .. و لّ بلا! و لسبب سامي و نبيل ( بمقاييس عصرهم )
المهم ..
عندهم اخلاقم( البعرفوها هم براهم! ) .. و هم حفظة قرآن بالمناسبة و ان كنت محتار لي اسي لجنس الايمان دا :
يشهد خالقي لو يوم السؤال قريت
تامل بالله يا ايها القارئ العزيز على ألب بشاشا :
مؤمن بالخالق و يوم الحساب، و ما عاوز يعترف!؟
دي رجالة شنو دي اللمن غلط ذاتو دي !؟


** دي ما بتترسل الا على الموجة دي يا ماما دوما ( بتعرفي فيورباخ بالمناسبة؟) .. و الغلبتو يراجع حمور بحكم انو مشارك في البوست داك ؤ كدا.) ..

*** بمقاييس و مصطلحات العصر ( الكلام الميد!! ) .. عندنا في سوق تمبول تلقى الواحد فارش نفس بضاعة جارو لكن بسعر مختلف .. لو استفسرت لعد اعترافو بالحقيقة دي يقول ليك في التبرير " الكلام الميد " و يقصد Made in وين!؟


التعديل :
هاصت الشغلة .. اظنو هشام - السرو باعتع - قرا لي قصيدة لامل دنقل برضو زي ما شفا بيها حبوبتو!

Quote: على قول التونسي : هرمّنا .. لقد هرمنا في انتظار هذه اللحظة التاريخية.. امكن تجي اللحظة دي ياخ! و نفرح نحن الجد و العم ديل

ياقيقا عندما تحين هذه اللحظة التاريخية وتأتيكم القنوات الفضائية ( تتطاقش ) ونسبة لظروف الصلعات وكده إنت والأحباء حمور وامين ، حركة التونسي دي مابتقدروا تعملوها

بتاعت لقد هرمنا ...هرمنا في إنتظار هذه اللحظة التاريخية وهو يمسح على ( شعره )

لذلك أقترح عليكم التدرب على بعض الحركات الأخرى من هسه حتى لايحدث إرتباك أمام الكاميرات حينما تحين الثوره


بعض الناس ياقيقراوي قلقون من عدم وجود ميدان كميدان التحرير

ولذلك هم لايخرجون

وكاني بهم يقولون

يعني دايرننا نعتصم ليكم وين بعدين

يا عشاري ياخ افرز ما تبقى لينا انت و دجانقو ابلصعة دا ياخ!؟
ياخ ما تختني مع امين و حمور في مجموعة واحدة ياخ .. لسببين
انا صلعتي غدارة* .. و الجوز ديل الصلعة حقرت بيهم رسمي ي ي ي !!

Quote: بعض الناس ياقيقراوي قلقون من عدم وجود ميدان كميدان التحرير ولذلك هم لايخرجون

قول ليهم و لا يهمكم .. العقيد حلاها ليكم
اكيد العميد برضو بحلها

تواتر عن العقيد :
تظاهروا كما شئتم .. ولكن لا تخرجوا الى الشوارع و الميادين
ونسب اليه ايضاً - لا فض فوه - ان صدق انو طالع من بؤه :
" انا لست ديكاتوتر لاغلق الفيس بوك .. لكني ساعتقل كل من يدخل اليه. "

حسنى مبارك حكي عنو - زمنو اللسة حسنى مبارك همسلف - انو المصريين اكتشفوا انهم الاغلبية في ( الحج ) فطلبوا انو ينقلوهو عندهم. بالنسبة لطواف و كدا اقترحو - يا سبحان الله - ميدان التحرير اتسلف، و الكعبة قالو بدبروها بأي من التماثيل او الهرم.. اها صعبا ليهم بالشواطين!؟ .. نلقى شواطين منين!!؟
قالوا ليه - بصوت واحد - اها في دي بأأ استحملنا فيها يا ريس .. كلها كم يوم و كم حقر كدا و نخلص.




راجي قصة مناهل يا صديقي


--------

تواتر في الاثر انو الصلعة نوعين:
- حقارة و دي تهاجم وش لوش، وبتدخل الناس في حرج شرعي في مسألة الوضوء، ما يتفرز حد المسح ( الراس ) من الغسل ( الوجه ) ..
- غدارة .. و دي جبأانة و بتداهم بليل و من الخلف .. و دي صعب اكتشافها .. الا باحدى طريقتين يا باعترافات - مباشرة - من اصحابها . يا كمان بشمارات المحيط بتاعم .. و قلنا نعترف برانا
لذا لزم الفرز ..

ديجانغو الهنا دا ما بفرز يا عزيزي .. بقش الطربيزة كلها عشان مداخلة واحد بس. . فتأمل!!
يخش ليك البار و تشنياو .. تشنياو .. تشنياو لا يفرز بطل من خائـن .. و ينفخ مسدسو ويتخارج عاااادي .. و لا هماهو عذابنا و لا دموعنا و شقانا

والله يا المثقفين .. يا قيقا و عشاري و كمال عباس وحمور
و النعمان و عاصم فقيري و ابارو ... و طيفور .. وبت الشيخ
( يعني ننقل لستة البورد ولا شنو) ... كلكم بي نريدكم

قالوا ليهو هسه الشعب السوداني ده اديتوهو شنو
قال " الوعي.. الوعي ما أستطعنا" عليكم الله ده هسه ما
صــــــــــوفي عديل كده.

ياخي الناس في آخر موديل و الطابق الكم وأنت شابكنا
فيورباخ ... باخ باخ باخ

ما تستعجل يا عشاري ... خليها بي توسََع مكانها و تطَول زمانها
و الثورة لما تتطايب زقاقها بي يشيل مليون
وكل زول عندو ميقاتو و مساهمتو
و يا قيقا الثورة مستمرة و السارق يطلع بره
و مافي فرق بين البي يسرق بلد و البي يسرق حرف...
علا عندنا الملحد انسان و المتدين انسان
و ما بي نحاكم انسان بس بي نحاورو إلا إذا ظلم/سرق/كتل
سلام ليكم الأتنين و لي مناهل

Quote: قالوا ليهو هسه الشعب السوداني ده اديتوهو شنو قال " الوعي.. الوعي ما أستطعنا" عليكم الله ده هسه ما صــــــــــوفي عديل كده. ياخي الناس في آخر موديل و الطابق الكم وأنت شابكنا فيورباخ ... باخ باخ باخ

عيدروس اظنك سفنتي فايف ساي انت يا زول
فيورباخ دا اهم حاجة ياخ!
بي طريقتك غايتو!! .. مخييير!! .. قالو جايي في الامتحان
و الله كان عارف فيورباخ ما عارف!؟ .. عرفتو ضروري شديد يعني؟

و تواتر في اثره الجميل انو " يا امة الشيوعيين ياخ، الوضوح الفكري و النظري .. الوضوح الفكري و النظري .. وظل يكررها حتى قالوا ليته سكت... و لم! .. و اضاف الاستقامة الفكرية و السياسية .. ما تاخدوا مواقع دفاعية طوالي يا امة يرحمكم الشعب ..
حليلو هو ..
و حليلنا من بعدو
محتاجين فعلن لإصحاح الخطأ في العمل وسط جماهير البورد
اذا كان صاحبك كسر الله همسلف داير ليهو طقة في ي ي نص دقنوسو دا!! .. عندو مداخلة في بوست عصام دهب و الله رفعت ضغطي رسمي ي ي .. و نزلت مؤشر النفسيات، خلتو يتارجح في الزون بتاع الخطر، ما بين الماحق و الجنون المحض ( كان فضيت بجيبا ليو هنا دا )

خلينا من الشيوعيين ياخ .. نرجع لموضوعنا .. كدي شوف البت دي .. بت زي الورد

Quote: اكتر ما عجبني في الفيديو - صراحة كلو عاجبني ما اكضب عليكم - لكن التحولات الدراماتيكية في ( موقف ) الزولة العبرت عن انها ما شايفة ( مجانية ) و كان بدأت ( مداخلاتها ) بتأمين على حق الملهمة مواهب* ( صاحبة المنبر ) في حرية التعبير ، اها لاحظت انتهت لشنو ؟ سقطت سقطت يا كيزان سقطت سقطت يا كيزان سقطت سقطت يا كيزان شايف الانا شايفو يا بدوي ، و لا نحسبوا في مجرد ( حماسة الشباب ) ساي ؟ في شوفي انو الطغمة توها خاسرة صوت . . و ياله من صوت عزيز لو كلو واحد اوقد شمعة و تش عين الضلام بالضوء ، و فيما يليه بس ، كل حسب طاقته - قدر قدرتو - كم ح يخسر الظلام لصالح باكر ضواي ؟ ياخ انحناءة كبيرة لمواهب و شباب قرفنا لمجرد اتاحة ( منبر ) على الهواء الطلق لاطلاق زفرات حارة زي زفرات المغبونة دي دا ما مكسب غايتو بحماسي دا شايف الضوء في نهاية النفق بفضل تراكم نضالات ( لبنى / رانيا موسى ( ديسمبر 2009 ) / ناهد محمد الحسن / مواهب* ابراهيم . . و للزولة صاحبة الهتاف و لـ ( مريم الاخرى ) المصابة مع رانيا في هبة ديسمبر 09 سقطت سقطت يا كيزان سقطت سقطت يا كيزان سقطت سقطت يا كيزان رفقاً بنا يا قوارير و تحية كبيرة لشباب قرفنا ----------- السودان الجديد ما بتبني بافكار و تكيكات قديمة

-----

* اتاري الشغلة ما مجرد تصحيف ساي .. الشغلة مع سبق الاصرار و الترصد رسمي، و راسخة في اللاوعي انها مواهب يا معاوية عبيد
** اهل بيزطنا- و الدنيا فايرة مصادمة - وصلوا لشنو ؟
علمانية و لا مدنية ( نقيض العسكرية )!؟
ياخ عليك الله اسألم لي العساكر عندهم ( احوال مدنية ) برضو و لّ ساااي كدا عايشين في العصر الحجري الاول!؟ .. بعدين شايف السياسي مرفوع لمصاف الفكري و مرات بتقدم عليو عديل!!
و الله العقيد دا ما عمل فينا خير كلو كلو!

Quote: والله يا المثقفين .. يا قيقا و عشاري و كمال عباس وحمور و النعمان و عاصم فقيري و ابارو ... و طيفور .. وبت الشيخ ( يعني ننقل لستة البورد ولا شنو) ... كلكم بي نريدكم

الحمد لله!
أنا وود البشرى طلعنا ما مثقفين!!

Quote: أنا وود البشرى طلعنا ما مثقفين!!

غريب انت ياخ
امال كنت فاكر ايه؟

أنا غايتو قصة ما مثقف دي عادي عندي وهي الأساس
لكن كمان يتجاهلوا ثقافتكـ دي كوولها! زعلني ياخ!

لا من الناحية دي اطمئن اخوك متصالح مع نفسه شديد
رغم اني بعرف - الاسمو ايه دا المابعرفو دكتور امين -

Quote: أنا وود البشرى طلعنا ما مثقفين!!

فيورباخ أبوي!

Quote: فيورباخ أبوي!

طيب ما اهو انت مثقف على الأقل أثقف من دكتور امين و بالتالي أثقف من حمور و قيقرا و عشاري و كثيرين من الفي اللستة

_________________

و باي ديفولت اثقف من طلحة تنظير طبعا

حمودي يا عسل

Quote: أنا غايتو قصة ما مثقف دي عادي عندي وهي الأساس لكن كمان يتجاهلوا ثقافتكـ دي كوولها! زعلني ياخ!

و الله انت تحير رسمي!
مش اتفقنا فوق انو هوو كيرز!؟
تاني شنو نان!؟

بعدين اللستة مضروبة ذاتو
كنت عاوز اعترض زيك ..
لكن لستة فيها بت الشيخ و ابتفة .. دي سغافة شنو دي!؟
احسن ليكم الما لموكم مع امثالهم
اسي دا ما نبز لينا نحن ديل!؟
اصالة عن البروف أمين معلوف، و معلوم بالضرورة انو الاصالة دي بتشمل ود الاخت، و نيابة عن نفسي نعلن الاتي :
نطالب عيدروس باعتذار رسمي لاشانة السمعة في موضوع السغافة دا
و اعتذار تاني لجمعنا في مجموعة واحد مع المذكورين و امثالهما



--------

انتو حكاية عدم الفرز دي شنو الجاتكم دي ..
يا عشاري بعدين انا و حمور ما تلمنا في مجموعة واحد مع امين و لا حتى في موضوع الصلعة دا ..
نحن عندنا تجارب ظهور تلفزيوني* و صلعة امين اذاعية بامتياز .. ما بتنفع صورة كلو كلو .. صوت بس!

* ان كانت بتاعتي في الاخبار .. اخبار الساعة تسعة .. سنة 1981 في افتتاح كبري كوستي .. و الله جد
ابوكم مين ؟ نميييييري .. قايدكم مين؟ .. اللخ اللخ
يا حمور شفتك ياخ .. معاك كان ولدنا حسام سري هلاليبالمناسبة؟
بتعرف حسام سري هلالي يا حمودي؟
حسام هلالي بتاع " بعدالاقلاع .. و بعد الشنو كدا ما عارف داك " ياخ!
حسام ياخ اللو قلت ليهو حسام بتلفت عليك و بقول ايوة ياخ!
اها داير يحسبوك مسغف كيف؟
بالمناسبة .. الزول دا مواليد 1986م .. تصدق؟
و الله كان جابوك معاهو في حلقة واحدة تبقى زي محمود عبد العزيز مع الود النابغة داك بتاع الحساب داك؟
سالوا حوتة رايك شنو فيهو ..
انقر قال شنو؟

رهيييييييييييب!

رهيب انت دا ياخ

يا محمدالبشري ... ويا ود الصايم
أولا" أزيكم وتانيا" كان ما عارفين أنا ما صنفني زول
لكن مصنف نفسي رمادي عديل كده.
و تاني حاجه عندي بوست هنا
الإنترنت : أداة ُ جديدة ... مفاهيم جديدة
واحده من النقاط الفيهو انو الناس البتكتب في البوردات و الانترنت
دي كلها مثقفة و كده والحمدلله الانترنت جات ووسعت قصة النخبة
وبقي اي زول عندو راي عندو محل يعبر عن رأيو.

وتالتا" انا ما ذكرت الناس الفوق دي بس
انا قلت :

Quote: ( يعني ننقل لستة البورد ولا شنو)

وانتو اكيد في اللسته دي و من الناس المميزين عندي في كتابتهم
وفي اول البوست دا بالذات انا متفق مع آرائكم.
و كان شهادات الثقافة دي من عيدروس :)
(والله مثقفين ثقافة لمن فايته الحد)

ولكما العتبي ... و برييييدكم يا مثقفين

لووووووووول يا قريبي

Quote: لكن مصنف نفسي رمادي عديل كده.

زنقوك لمن بقيت على كدا؟






---------

( الكلام الميد ) .. و في رواية قيقا عن البت [ الحديقة ] لنا جعفر، قيل ( الكلام الموود )
[ تعال لي دايمن في مزاج كحلي .. الرمادي بجيب الهواء ]

لا حولا يا عيدروس انت افتكرت القصة جد
حمووودي لا يمكن يكون جاد في يوم من الأيام و يجبر المتداخل معه ايضا على عدم الجدية
قولة مثقف في البورد هنا ما حبابا ابدا زيها وزي مهندس
الواحد يحمد الله العافاه من الإبتلاء بها و نفخر بذلك
واستغرب ايما استغراب في العالم البتكسر رقبتها كسر لإدراك أن كيف تبدو مثقفاً في البورد ... *

لك التحية يا عيدروس وما مجاملة لكني معجب ومتابع لمداخلاتك على قلتها و العقلانية الفيها

_______________________________
* حركة حشر اللنك وسط الكلام حقوقها ما لقيقراوي تحديدا لكنه استهلكها لمن شكت
عليه لا غضاضة في حفظ حقوقها له

Quote: شهوة لبلاد تطالب ابناءَها باقل من الموت جيلا فجيلا وفيها من الوقت وقتٌ نخصصه للخطايا الحميمه والغلط الادمى البسيط وزحزحةِ الافتراض البطوليِّ عنّا قليلا فمسكينةٌ أُمَّةٌ حين تحتاج كلَّ البطولات من كلِّ أبنائها وتعيش الحياةَ قتيلا قتيلاً شهوةٌ لبلاد تقل الاناشيد فيها وفيها نعود الى نمنمات احتياجاتنا العابرات بلا خجل او ندم

ما عارف مصدرها و لا القائل، لكن لطشتها من عصام جبر الله في ونسة شيوعيين .. *


بنرفض نحن نموت .. عايز نعيش ياخ!
كتيرة علينا دي؟




----------

يا ابو حتحوت الحركة دي للأمانة انا لطشتها من هشام آدم همسلف .. شفت كيف!؟

يا قيقايا جنك شماته :) ، قبال تضحك وتقول "كاااااااااك" علي قولة
ود البشري أنا عندي تعريف لي كلمة رمادي دي.. و تقعيد لمن يعجبك
ويوم برشكم بيهو.
و شكرا" ليك يا ود البشري وتحايا ليك ولي ود الصائم، والجد والهزار
ما بسببو زعل لو من الناس الصادقين زيكم.
بالنسبة للقصيدة يا قيقا يا صديقي .. ياخي انا بأعتبر مطلع القصيدة
دي اصلو ما إتقال قبال كدا خاصة التشبيه بتاع النمر دا
ياخي دي بتاعة مريد البرغوثي و إسمها الشهوات
وهاك المطلع:
كسّر البرق بللوره في الأعالي

وافلت من دغله نمر طائش اللونِ

رنّت على ظهره فضةُ الليل والرغبةِ الغامضه

كأنّ الصواعقَ تعدو على جسمه وهو يعدو ويعدو ويعدو

ويعلو عن الارض

حتى لَيوشِكَ ان يشغلَ الجاذبيةَ عن شُغلِها

لحظةً

ثم يرقى الى ما يشاءُ الخَيالْ

هذه شهوتى للتى اشتهيها بخمس حواسٍ

ولكنها لا تُنالْ.

باي ديفولت * ما فاهم أية حاجة



















* تقرأ كالعادة.

Quote: يا قيقايا جنك شماته :) ، قبال تضحك وتقول "كاااااااااك" علي قولة ود البشري أنا عندي تعريف لي كلمة رمادي دي.. و تقعيد لمن يعجبك ويوم برشكم بيهو.

بالمناسبة الرواية بتاعتي اعلاه عن الحديقة لنا جعفر حقيقية. و صُك المصطلح بتاعا قبل رمادية المكان دا ..
اها بنكون راجين روايتك عن " الرمادي "؟
زي ما راجين رواية عمر عشاري عن " مناهل "
زي ما راجين [ عودة الملك ] كسر الله سالماً لربوع البوست دا


تحيات و محبات للجميع



------

يا طلحة ما ترفع من الصفراب الرشاشات المرشوشين ديل كلو كلو

Quote: ياخي دي بتاعة مريد البرغوثي و إسمها الشهوات وهاك المطلع:

عشان تعرف انك بهتني ساي بمكوارتك لي في كورجة المثقفين دي ..
يا حبيب شغالين بذاكرة سمبرية ساي هنا .. تلقط و تجيب لليتامى!

Quote: كسّر البرق بللوره في الأعالي وافلت من دغله نمر طائش اللونِ رنّت على ظهره فضةُ الليل والرغبةِ الغامضه كأنّ الصواعقَ تعدو على جسمه وهو يعدو ويعدو ويعدو ويعلو عن الارض حتى لَيوشِكَ ان يشغلَ الجاذبيةَ عن شُغلِها لحظةً ثم يرقى الى ما يشاءُ الخَيالْ هذه شهوتى للتى اشتهيها بخمس حواسٍ ولكنها لا تُنالْ.

------

عاجبـاني حتة :
شهوة ان تكون الخصومة في عزها واضحة .. غير مخدوشة بالعناق ال########

و من زمااااان . . كان نفسي اقولك من زمان ذاتو ياخ
شوف النبل دا كيف؟ .. حتى مع الخصوم!

عندو تاني واحدة جميلة لا مُشْكِلَةَ لَدَيّ .. لكن سكيتا ليو شديد في بوردي من لا بوردي لهو دا

يا قيقا إزيك ... عليك الله الزول دا ما رهييييب

شهوة ان تكون الخصومة فى عزها

واضحةغير مخدوشه بالعناق ال ج ب ان

وشوف دا كمان :
شهوة ان ارد على الهاتف المتاخر ليلا

بدون التوجس من كارثه

و لي الزي ناس صفية :
شهوة لوجود النساء اللواتى يخفن قليلاً

ولكن يقفن طويلاً بجفن الردى وهو نائم

وطرحاتهن الغيوم واقدامهن الجنان

وفى روحهن الاساور والماس لا فى المعاصم

يطرز اثوابهن العجاج الكريم

فيخدشن خوذة عصر الغزاة ويسقطن عصر الهوانم