Post: #1
Title: هاك التمام يا زميل
Author: خدر
Date: 02-09-2011, 10:17 PM
شوف يا {إبن عمي} رغم انو الحركة الانت عملتها دي ما جميلة منك , لكن كل شي بعد غيابك تم كا نريد له ان يكون , ستصل علي اللوفتهانزا الالمانية الحادية عشر و النصف من مساء الجمعة 11 فبرائر مطار الخرطوم في نعش يليق بك , حرص القائمون علي أمر ترتيب النعش ان يكون جيدا و مريحا لك في رحلتك الاخيرة للوطن.
نهار اليوم صليناعليك صلاة الجنازة في مسجد المحسنين بلاهاي , تتزكرو؟ .. طيب شفت الهوللاند إسبور ؟ تتزكر محل السمك بتاع المغاربة البنمشي ناكل فيهو كل ما نمشي لاهاي ؟ بس .. قبل ما تلف شمال من الهولند إسبور في إتجاة محلات الاسماك بي حوالي الـ 100 متر مشي علي يدك الشمال ده مسجد المحسنين, ما اظنك حا تعرف الوصف ده لانو هو اصلا مسجد صغير و واقع في شارع رئيسي في نص البلد و يبدو انو شباب لاهاي إختارهو لتسهيل وصول حشود المُعزيين , ودعوك الليلة يا خالد خلق كتيرة جدا سأحكي لك لاحقا عنهم لكن والله كل زول جا , جا لانو بحب خالد و عاوز يودع خالد , امجد ابراهيم و خالد الطاهر إستأذنوا من شغلهم عشان يجوا يودعوك و يرجعوا لشغلهم, إنشاء باكر يرفدوهم عشان ذنوبهم تبقي في رقبتك و يحاسبوك بيها , ما ممكن ياخي لكن تخرتنا حتي في الموت !! يا كافي البلا ما عندك ذنوب و كمان عندك شعر؟
|
Post: #2
Title: Re: هاك التمام يا زميل
Author: خدر
Date: 02-09-2011, 10:20 PM
Parent: #1
المهم يا سيدي ,انا للاسف ما قدرت احصل الغسول بتاعك و ما قدرت القي عليك النظرة الاخيرة زي ما بقولوا اهلنا النصاري ديل لكن شوقي بدري بّرد لي بطني. نسيت اقول ليك اني اتصلت عليهو بعد ساعات من وفاتك و كعادتو عاوز يستلم التلفون و يبدأ الونسة , قال لي حمدلله علي سلامة اخوك , سمعت انو وصل روتردام بالسلامة .. طبعا انا كنت متوتر عاوز اكلمو انك مشيت و هو يبدو انو مزاجو كان كويس لمن قربت اكذب و اقول ليهو والله ضارب اسلم عليك .. استجمعت شجاعتي و قلت ليهو يا شوقي عندي ليك خبر كعب , قال لي خير و قلت ليهو اخوك ده فات خلاص , سكت مسافة اقل من دقيقة و قال لي بعدها بي صوت صارم جدا طيب شكرا يا طارق مع السلامة.
ضرب لي تاني يوم قال لي انا حا اصل المساء, حا اجي اودع خالد , لمن وصل انا كنت في بيتك و ما قدرت استقبلوا في المطار , لكن إستقبلو الرجل الفاضل كابو. عموما يا {إبن عمي} انا فشلت اني الحق مواعيد الغسول لكن اخوك شوقي قام بالواجب . و انا في الطريق ليك ضرب شوقي و قال لي خلاص ودعتو و بوستو .. بوسة ليك و بوسة لكل إصحابوا و واحدة لي انا.. تصدق فرحت انو شوقي لحقك قبل ما تمشي !! و ماحزنت اني ما لاقيتك !! اخوك ده لو ما كان لاقاك كان حاتبقي كارثة تانية و وبيني و بينك حمدت الله اني ما لاقيتك , تصدق يا {إبن عمي} انو دمعي ماعاوز يمرق لحدي اسه !! حاسي اني ريبورت غبي حريص علي إتمام تشييعك كما يجب.
خالد انا تعبت , ماشي انوم .. باكر و بعد باكر كان الله مّد في الآجال حا اتم ليك ما فاتك و اونسك لحدي ما تصل الخرطوم اطمئن يا صديقي كل شي مّر كما نريد لك, تصبح علي الف خير يا صديقي.
|
Post: #3
Title: Re: هاك التمام يا زميل
Author: Abdel Aati
Date: 02-09-2011, 10:29 PM
Parent: #2
لتعش ذكراه العطرة ابدا
|
Post: #4
Title: Re: هاك التمام يا زميل
Author: Mohamed Elnaem
Date: 02-09-2011, 10:52 PM
Parent: #3
أصدق التعازى لك يا طارق و لكل أهله و اصدقائه و رفاقه فى الحزب الذى ناضل من أجل إصلاح الحياة به كما ناضل من اجل إصلاحها فيه .
|
Post: #7
Title: Re: هاك التمام يا زميل
Author: احمد الامين احمد
Date: 02-09-2011, 11:02 PM
Parent: #4
تحية لجسد خالد مسجيا فى ليلته الاخيرة بأرض رامبرانت قبل ان يعود غدا على اللوفتهانزا إلى أرض عزة والخليل والنيل والنخيل والتبلدى ...
أرض عندما غادرها خالد مكرها كانت مليون ميل مربع لم تسعه وهاهو يعود غدا ليقبر فى لحد ضيق لكنه يتسع سعةقلبه الذى حمل الوطن بداخله
تحية خدر وجميع من غسل وكفن خالد وحمله نيابة عنا جميعا على الاكتاف
تحية للسودانى الاصيل شوقى بدرى إلذى جاء من اقصى اوربا بالسويد ليغسل ويحنط ويكفن صديقه خالد
تحية لمن يستقبله غدا فى ليل الخرطوم البهيم ..
|
Post: #5
Title: Re: هاك التمام يا زميل
Author: Elawad
Date: 02-09-2011, 10:54 PM
Parent: #3
يا الله يا خدر هذه العبارة في ذهني منذ سمعت بخبر رحيله الفاجع. لم ألتق خالدا لكن في المرات البسيطة الري ربادلنا فيها رسائل كان يخاطبني بها. اللهم ارحمه برحمتك الواسعة و أبدله دارا خيرا من دار الأحزان هذه.
|
Post: #6
Title: Re: هاك التمام يا زميل
Author: معاوية عبيد الصائم
Date: 02-09-2011, 10:57 PM
Parent: #5
وداعا يا صــــــــــــــاحب
تمام يا طارق...
|
Post: #8
Title: Re: هاك التمام يا زميل
Author: ايوب عبدالرحيم
Date: 02-09-2011, 11:03 PM
Parent: #6
له الرحمة والمغفرة
وربنا يصبركم ياخدر
حقا فقد كبير
|
Post: #9
Title: Re: هاك التمام يا زميل
Author: ايوب عبدالرحيم
Date: 02-09-2011, 11:05 PM
Parent: #6
له الرحمة والمغفرة
وربنا يصبركم ياخدر
حقا فقد كبير
|
Post: #10
Title: Re: هاك التمام يا زميل
Author: خالد العبيد
Date: 02-09-2011, 11:18 PM
Parent: #9
وداعا خالد نظل نحبك للابد
عشت ابوالزمل
|
Post: #11
Title: Re: هاك التمام يا زميل
Author: doma
Date: 02-10-2011, 01:33 AM
Parent: #10
فات خلاص يا خدر بن عم الكل
ومن غير وداع ؟!!
منيت نفسي بونسه كاربه معاك يا خالد.
كنت عايزه احكي ليك
عن رجاء واخلاص
شق علي نفسي نعيك يا خالد
لترقد بسلام يا بن عمي .
|
Post: #12
Title: Re: هاك التمام يا زميل
Author: معاوية الزبير
Date: 02-10-2011, 01:40 AM
Parent: #11
العزاء الصادق لك يا خدر إذا كان لا بد
با زول موت شنو
دا غياب ساكت زي أي زول اغترب وراجع لي أهلو بعد زمن
انت بتصدق الكلام دا
|
Post: #13
Title: Re: هاك التمام يا زميل
Author: د.نجاة محمود
Date: 02-10-2011, 01:54 AM
Parent: #12
عندما مات والدي قلت هذا آخر مدى في الحزن لا يمكن ان يكون هناك ابعد من ذلك
موت خالد وجعني شديد يا خدر
وعرفت انه موت الاحبة دائما يوصلنا مدى الحزن
قبل يومين من سفره التقينا في الماسنجر ةابخرته باني اخيرا جمعت كل مقالات صلاح
قالي انا مسافر لكن كان اله مد في الاجال بنجي اقراهم ونناقشهم.
وسافر خالد
بعهاسمعت بمرضه من هنا لهناالى ان مات
الله يصبر اماني رفيقة الدرب
ويصبر وليداتها..
ويصبركم ويصبرنا...
ما قادرة اصدق كلو كلو انه خالد مات.
|
Post: #14
Title: Re: هاك التمام يا زميل
Author: esam gabralla
Date: 02-10-2011, 01:59 AM
Parent: #13
كلوتمام ... الا أنحنا
جيب سفه في الأول أو حا أفتح معاك الموضوع اياه الانت عارف اننا أبدآ ما ممكن نتفق فيهو, نتشاكل و نكورك و كل واحد يرزع التانى بي شتائم و نبذ و اتهامات انو ما شايف كل الحاجات ... و تنهى المكالمه بالاتفاق أن لا نعود لنقاش هذ الأمر مره أخرى ... سنوات نتفق و ننقض الاتفاق و نتشاكل و نضحك و نسف ...
جنك شكل, لن انسي شكلتك مع عثمان حامد العجيبه و انتو جايين لى تحضرو معاى عرسي! دى مصيبة شنو؟ اتنين كل واحد راسو اقوا من حجر المسن , نحنا نعرس و لا نحلحل شكلاتكم؟ اقول ليك طبعك سخن و بتنفعل ترد لى "انت شايقي و شيوعى مضروب , من مدنى و كلامك كتير, في حاجات عاوزه الحسم" هل كنت بتعنى حتى المغادره بي سرعه كده؟
تعرف ... و لا دى سيبا لحدى ما ترقد و ترتاح روحك في الضفه الأخرى ... كفاك ضجيج الايام الفاتت دى
ارتاح شويه ... محتاج انت
|
Post: #15
Title: Re: هاك التمام يا زميل
Author: محمد حيدر المشرف
Date: 02-10-2011, 03:02 AM
Parent: #14
البركه فيكم..
ابقو مبروكين عشان تكون البركه فيكم ..
ضايرو حاجاتكم السمحه من عين الموت .. اصلو نقاااد يا طارق, ونحن ما ناقصين
ابقوا عشره عليكم يا شباب .. وعلى العقاب .. سودانيات .. سودانيات
|
Post: #16
Title: Re: هاك التمام يا زميل
Author: الوليد عمر
Date: 02-10-2011, 03:23 AM
Parent: #15
.....
مر زمان طويل منذ عهدى بالدموع
حتى لظننت أن بمقلتى مصاب أو عُيِي
و ها هى ذى السايبة ، عادت تقطر من جديد
حتى قلت ليتها سكتت،
كما (سكتت المطرة) قبل صلاة العيد.
يا .. فتحك اللهم
يا منزل الغيث
و مقطر الدموع من بعد قتر،
و مفطر القلوب من بعد محبة.
يا .. فتحك اللهم.
أزاول نحيب الأصدقاء
ذات اليمين و ذات الشمال
و حزنهم باسط ذراعيه و مهيب
حزنهم الطائل الثقيل
لا يمنح القلب مجال لإلتقاط النبضات
و حالهم يقول: ليتك يا قلب تهمد بالحزن
ولا تهمد كلمات الخال.
كيف يمكن لمحب
أن يصمد أمام فقد كهذا
أمام الفجيعة و الخسارة المطلقة
أمام سيل النعوات الخرساء
تلك التى تقول الكثير
و لكنها لا تقول أى شئ.
نتهارب نحو بعضنا البعض
كدجاج مذعور عند حريق فى الحظيرة
هذه هى خطورة الفجيعة
حين تطالك فى الركيزة و (الأمينة)
حين تهز سقفك من فوق رأسك
حين تفرط خيت سبحتك
و تتركك فى السهلة
تطارد السبحلة و الحمدلة و التكبير
كيف يمكن لمحب أن يتماسك
أمام غياب المحبوب
و نحيب المحبين
و الحب غرس شديد البأس
لا ينمو بجدب
و لا يستقى بالعُكار
الحب الذى يشتريك من نفسك
بثمن بهيظ تدفعه بالذكريات
و البسمات و السمر
و ملامح الأصدقاء
فى أزمانهم الجميلة
الحب هو أن تسمح لأحدهم
بإحتلالك بالرضـــا
ليستثمر مشاعرك بالرضــا
و يرضيك.
الحزن أن تشهد خيبة الكلمات
و عجز اللغات
و قهر اللسنات و الأقلام و الكيبوردات
يا للحب و يا للحزن
الذى جمعنا بك يا خال
الموت
يا أيها العابث بأحلامنا فى اللقاء
تبا لك
.....
|
Post: #17
Title: Re: هاك التمام يا زميل
Author: omer osman
Date: 02-10-2011, 04:03 AM
Parent: #16
عيونك صايمة ورَقرَق فيها الزمن المافى ...
أحزانك صاحية ودَجّت فيها حَوافر الذكرى النصْلها حافى ...
معزور الفرح اللمْلم نفْسو وقبَّـل وشو واصبح جافى ...
لمتين يرجانا ونحنا نكابر وليلنا مشاتِر ووجعو خرافى ...
|
Post: #18
Title: Re: هاك التمام يا زميل
Author: tayseer alnworani
Date: 02-10-2011, 05:13 AM
Parent: #17
خدر ياصديقى
مرارتك هذه فجعتنى ياصديقى
براحة علينا
اللهم ارحم خالد وأغفر له واسكنه فسيح جناتك مع الصديقين والشهداء
|
Post: #19
Title: Re: هاك التمام يا زميل
Author: SHIBKA
Date: 02-10-2011, 05:25 AM
Parent: #17
الله يرحمك ياخالد
انا ما بعرفك الا من ايميلاتك كصاحب لمنتدي البركل
لكن حزن اصحابك هنا
حزنت اني ما عرفتك اكتر هناك
الله يرحمك
والبركة فيكم ياطارق وطارق وخالد وكل الاصحاب هنا وهناك
|
Post: #20
Title: Re: هاك التمام يا زميل
Author: أمين محمد سليمان
Date: 02-10-2011, 07:06 AM
Parent: #19
لا حول و لا قوة إلا بالله
|
Post: #22
Title: Re: هاك التمام يا زميل
Author: مازن فيصل هلال
Date: 02-10-2011, 07:41 AM
Parent: #20
تقبل الله خالد الحاج قبولا حسنا و غفر له ذنوبه و اسكنه فسيج جناته
------------
يا سلام ! ... و الله يالشيوعيين حتي في الاحزان جميليين و لبقين... مثل أغانيكم و أناشيدكم الخالدة
|
Post: #21
Title: Re: هاك التمام يا زميل
Author: mamkouna
Date: 02-10-2011, 07:40 AM
Parent: #19
الخال....د\ دبي \ ديسمبر 2010
شق علينا نعيٌك يا زول يا جمييييييييييييييييييييييل
|
Post: #23
Title: Re: هاك التمام يا زميل
Author: طارق صديق كانديك
Date: 02-10-2011, 08:18 AM
Parent: #21
حزن لا يحتمل .. !!
أعزيكم ونفسي .. !!
لكنه .. كان عارف قدمو المفارق .. !!!
عليك من الرحمة ما يكفيك وزيادة ياصاحب
|
Post: #24
Title: Re: هاك التمام يا زميل
Author: حمد عبد الغفار عمر
Date: 02-10-2011, 08:28 AM
Parent: #23
له الرحمة والمغفرة ولآله ولكم حسن العزاء
|
Post: #25
Title: Re: هاك التمام يا زميل
Author: حبيب نورة
Date: 02-10-2011, 08:29 AM
Parent: #23
|
Post: #26
Title: Re: هاك التمام يا زميل
Author: ممدوح أبارو
Date: 02-10-2011, 08:54 AM
Parent: #25
ياخ مالك علينا من الصباح؟
الخال.... خالد.... فينا
|
Post: #28
Title: Re: هاك التمام يا زميل
Author: abubakr salih
Date: 02-10-2011, 09:05 AM
Parent: #26
تعازى يا خدر لك و لاهله و اصدقاءه.
|
Post: #27
Title: Re: هاك التمام يا زميل
Author: walid taha
Date: 02-10-2011, 09:04 AM
Parent: #1
| Quote: لم يات رحيلك عبثاً كان تجربة وجدانية ووطنية عميقة الدلالة |
|
Post: #29
Title: Re: هاك التمام يا زميل
Author: Rabab Elkarib
Date: 02-10-2011, 09:15 AM
Parent: #27
كر يا يمة
وجع السواد يا اصحاب خالد
ربنا يصبركم
ويرحم خالد رحمة واسعة
|
Post: #30
Title: Re: هاك التمام يا زميل
Author: مني التجاني
Date: 02-10-2011, 09:46 AM
Parent: #29
ما بعـرفوا يا طارق ....
بـس ما دام هـو صـاحبآ لعثمان حامد أكـيد هـو زولآ سـمح...
ياخ الوجع ده حـدو وين؟؟
تعازي الحاره ليك يا خـدر وعـثمان وكل صـحابه.
|
Post: #31
Title: Re: هاك التمام يا زميل
Author: هواري نمر
Date: 02-10-2011, 10:02 AM
Parent: #30
Quote: البركه فيكم..
ابقو مبروكين عشان تكون البركه فيكم ..
ضايرو حاجاتكم السمحه من عين الموت .. اصلو نقاااد يا طارق, ونحن ما ناقصين
ابقوا عشره عليكم يا شباب .. وعلى العقاب .. سودانيات .. سودانيات |
وداعاً.............. الخال
وداعاً يا خالد .
|
Post: #32
Title: Re: هاك التمام يا زميل
Author: خضر حسين خليل
Date: 02-10-2011, 10:09 AM
Parent: #30
معليش ياطارق ياخ
نسوي شنو
|
Post: #33
Title: Re: هاك التمام يا زميل
Author: عزاز شامي
Date: 02-10-2011, 11:04 AM
Parent: #1
واجعني موت خالد لاكتر من سبب،
حزنك يا خدر من الاسباب،
الموت في عضمو ما كعب ، بس الكعب فيهو لما يجي قبل العدل البنكون راجينو واحنا احياء
ارتاح خالد من الانتظار الكاويانا نارو دي،
ارتاح ومشى لحياة أفضل، تأكد من كده يا خدر .. أكيد هناك أفضل .. و شالتو ملايكة سمحين و دعاءنا مصاحبو
اصبر بس، و عيد سيرتو لما الحزن يضايقك شديد
|
Post: #34
Title: Re: هاك التمام يا زميل
Author: عبدالأله زمراوي
Date: 02-10-2011, 11:36 AM
Parent: #33
يا الله على رحيل من نحبهم. العزاء للجميع يا أحباب..
|
Post: #35
Title: Re: هاك التمام يا زميل
Author: طارق جبريل
Date: 02-10-2011, 11:54 AM
Parent: #34
قولي يا الحبيب قُبال تمشي وتفوت..
قولي تاني يوم السبت من تصبح أناضم منو..
يا ود الحاج وكتين تضيق بي كنت قاعد ألقاك..
دحين يا الحبيب هسي أقبل لااااوين..
دحين ما قلتلي انا ماشي اصورلك قوقيي القماري في كروق التمُر..
باقيلك يا صديق العمر تاني بيقوقن..
شفتلك قماري بيقوقن بلا تمُر..
ما قلتلي ماشي اصورلك محَنَة البركل واجيبها لاااا عندك..
نان وكتين تمشي انت تاني أجيبلي محَني من وين..
يا خالد قولي:
متذكر صبيط ((المشرِق)) وشواويل ((التمود))..
ما قلتلي الاجازي الجايي نمشي البركل..
ما قلتلي نشيلنا كوريي ألت ((بركاوي)) ونقعد في القيفي نتونس..
يا خالد شفتلك قيفي بلا بحر..
كيفن تمشي وياكا بحرنا..
الرسول آآآآخالد قولي: قَمِحنَا وبرسيمنا بيبقى بلا موييي..
نان يا حبيب قساي مو ياكا مويتنا.. كيفن تفوتنا..
هسي (المَحَنة) الزرعناها سوا دي نخليها (تيبس)..
يا ود الحاج.. ما كتلك ((الإلتهاب))..
كتلوك يوم شالوك وغرسوك بعيد من ((أرضك))..
يا ود الحاج ماكا كتير علي الله..
بس جواي آآآآبتموت...
رحمك الله يا صديقي
تغمدك الله بواسع رحمته
إنا لله وإنا إليه راجعون
|
Post: #36
Title: Re: هاك التمام يا زميل
Author: خدر
Date: 02-12-2011, 01:29 PM
Parent: #35
جبرالله كسركم يا رفاق
واللهم اجعل صديقنا خالد من اصحاب اليمين
|
Post: #37
Title: Re: هاك التمام يا زميل
Author: خدر
Date: 02-12-2011, 02:14 PM
Parent: #36
|
Post: #38
Title: Re: هاك التمام يا زميل
Author: عبير خيرى
Date: 02-13-2011, 09:00 PM
Parent: #1
.
وجع أول:
جفن عيون أحباب للووبة جافوا النوم
قتلو السهر خمدان وجه الفراق مهجوم
في دار الكلام سكت القليب مكتوم
اتفن وجع جراح في الجوف ومابي القوم
يا سيد الديار الحر يا ود شيوخ القوم
أبكن بنات العم الخال مفارق اليوم
حملك تقيل يا خال الله يقدر المكلوم
أخوانك وراك أسياد ويبرو اللوم
يبكيك البلد حراق لي يوم قيامتو تقوم
وجع آخر:
لست ممن يؤمنون بالغياب
والموت غياب ..
أو حياة أخرى نتمناها حين يسافر إليها حبيب
مدرسة تعلمنا أدب الشوق ومعاني الوفاء
يا صديقي اعتب على خداعك لنا
فقد وعدتنا يوما بالبقاء
علت جدران الغربة
فصارت أسوأ حبس للروح
حبس للعيون .. فالدموع وضوء الروح
حبس للصوت ..
فالصراخ يجعلك تسمع
ويجعلنا نعلن إغترابك
أقالد بيك منو ؟
وجع لي بكرة:
لكل أصدقائي وأحباب الخال في سودانيات والبركل وبكل المواقع وعلى الارض ومن في السماء أعزيكم في سفر الخال إلى دار نلحقه فيها يوما وإلى ذلك الحين نستودعه الله ليكن رحيما عليه موسعا لداره هو الرحيم لا إله إلا هو ولا حول لا قوة إلا بالله.
|
|
