اكتشف عشره اخطاء فقط في الصوره من شوارع الخرطوم , و احصل على جائزه !.

مواصله لحفل افتتاح عشوائي مكلف مليارات , جاء به فواصل رقص بلا صوت,
في افتتاح بطوله افريقيا للمحليين بالسودان فبراير 2011!,
بل قل حفل كامل بلا صوت الا في مقصوره السيد الرئيس !,

وارضيه ملعب مدني الجزيره الخضراء المتصحر و المتبرقع الذي جلب لنا سخريه معلقي الجزيره الرياضيه و مشاهديهم,
وانقطاع الكهرباء و عودتها مع هدف والنهايه, فقال المذيع : لا اول مره ننقل مباراه لا نعرف نتيجتهابنهايتها !!,
تم كتابه النيجر غلط باستاد مدني في ثلاث حروف انكليزيه كامله!!!..

عفوا سرحت : موضوع المسابقه اعلاه هو:
الصوره من اجمل شوارع الخرطوم الحضاريه, العاليه التكلفه جدا ,
تعرف على الاخطاء العشره بالصوره و اكسب جائزه صيانه هويتك من سوء التعليم و الذوق و الاداره.. شكرا

د شهاب الفاتح

يا دكتور ما تعصر علينا شديد كمان!
ياخ إنت جيب حاجة واحدة صاح في الصورة وشيل الجايزة!!










_
غايتو الكتب SODAN دا بالغ بلوغ مبكر عديل كـدا!!

دا باعتبار ممكن نمشي قصة Welcome وسواد ليلكم دي!!

سلام يا دكتور شهاب,,


عشرة أخطاء فقط ؟؟؟؟

ياخ البلد كلها أخطاء وصور مقلوبة حتى تستغرب,,
إنت قول لى صورة واحدة صحيحة!! محل ما تقبل تجد
أخطاء تشيب شعر راسك فى كل مجال وكل إتجاه!!!


المصيبة الناس بقت متعايشة مع الأخطاء والصور المقلوبة ولا يهمها الموضوع كثيرا,,
أما مجال الرياضة ده قصتو يا آآآزول خلها ساكت,,قنعنا من خيرا فيهو تب,,

تحياتى,,

1-السودان مكتوبة غلط Sodan instead of Sudan
2-مرحب بالانجليزي ناقصةwelcom instead of welcome
3-يبدو ان الشارع اتجاه واحد واليافطة في الاتجاه الغلط
4-اليافطة مثبتة بالحجارة
5-المكتوب بالعربي والمكتوب بالانجليزي ما ترجمة دقيقة لانه "مرحب في السودان" هي الترجمة الصحيحة


---
غايتو دي قدرتي

دكتور شهاب
سلام ..
لا يوجد أخطاء فى الصورة
الخطأ الوحيد أن المصور أختار المكان الخطأ فقط

عزيزي رئيس البلديه : في كل شارع حفره نلعب سوبر ماريو مثلا ؟؟



عزيزي رئيس البلديه : في كل شارع حفره نلعب ام الحفر مثلا ؟؟

العزيز د/شهاب

فى الصورة اكتر من عشرة بلاوى من بلاوى السودان وليس عشرة اخطاء فقط

فالصورة تعكس اول ماتعكس مستوى العشوائية والتخبط الادارى والتنظيمى وبدون شك
اول ماتبادر لى ان النص المكتوب لم يعد ويجهز من قبل احد وبالتالى لم يراجع من قبل احد ايضاَ
فقط تم تكليف احد ادعياء التصميم بعمل اللوحة وربما امتد تكليفه بتعليقها فى المكان البشوفو مناسب
والغالب الاعم انو قبض التمن مقدماً مخصوم منه اتعاب وعمولة جالب العمل
عشان كدا ما اهتم اصلاً انها تكون مكتوبة صاح ومثبتة صاح فى المكان الصاح ..

تخطيط نهى , تنظيم تكتاك,عشوائية الف,تعليم مش ولابد,بلدية نوم,صحة ماف,مراقبة ومتابعة نو, محسوبية فل,انفصال وقع,...إلخ

والنتيجة اللوحة البيكاساوية.

حاجه مؤسفة والله
الشركة المسؤولة من الاعلان مفروض تتحاسب فوراً
لكن الشارع وعمارات القوات المسلحه سمحه

Quote: 1-السودان مكتوبة غلط Sodan instead of Sudan 2-مرحب بالانجليزي ناقصةwelcom instead of welcome 3-يبدو ان الشارع اتجاه واحد واليافطة في الاتجاه الغلط 4-اليافطة مثبتة بالحجارة 5-المكتوب بالعربي والمكتوب بالانجليزي ما ترجمة دقيقة لانه "مرحب في السودان" هي الترجمة الصحيحة

الاخ بدر الدين بس ركز على في الكتابةاللوحة فقط... حتى شكل اللوحة نفسه ما دخل في التقييم

التصميم دا رأيكم فيهو شنو؟؟؟؟؟

السوودان يرحب بضيوف البلاد
ٍ
Semantic redundancy

اكيد مصمم اللوحة واحد.... " رفيق "

Quote: التصميم دا رأيكم فيهو شنو؟؟؟؟؟

تعرف يا ابو طالب دا اقبح تصميم اشوفو في حياتي :

اولا درجة الوضوح ضعيفة جدا ( resolution )
ثانيا التصميم يفتقر الى رؤية محددة والمناسبة
ثالثا طريقة شد البنر على الفريم ( التيوب ) برضو كانت اقبح ما اللوحة
رابعا طريقة تثبيت اللوحة على الارض شابها عيب وساخة المنطقة


كلو غلط في غلط

السودان يرحب بي ضيوف البلاد بقت لي زي (المنزل يرحب بزوار البيت) ..!!

تصميم شعار الدورة الغريب دا ..!!
الزول صممو بي كرعينو ولا شنو ؟!!


الشعار عار ..!!

يا ستار ..!!

اللهم لا تؤاخذنا بما فعل السفهاء منا

4- يا دكتور اللوحة دى لو وريتنى فيها حاجة واحدة صاح عندك جائزة.

تعليقى الوحيد مصمم هـذه اللوحة شخص نرجسى.. يعنى يحب نفسـه.. يصمم ليها.. يكتب ليها ويلون ليها.

1- اولا اللوحة دى ما حيقراها زول غير السواق لأنها فى شمال الطريق وليس على يمينه.
2- مثبتة على الأرض.. والمفروض تكون فى مستوى النظـر أو أعلى.
3- الكتابة بالأبيض على خلفية صفراء دى تصعب القراية (لو فى زول مجبور يقراها).
4- الصورة ما فيها محيط يحددها.. مفروض يكون حولها خط أسـود قوى أو ما الى ذلك، ليحدد الصورة ويمنع اللون
الأصفـر من الهروب الى السماء.
5- كلمة سـودان بالحروف اللاتينية مكتوبة خطا.
6- كلمة الترجيب بالإنجليزية مكتوبة خطأ.
7- استعمال خطوط راسية عادية بدل خطوط عريضة قوية bold
8- "بطولة الامم الافريقية" غير مترجمة رغم أن أغلب الدول الأفريقية ليست عربية
9- اللون الكبدى الداكن كخلفية روح اللافتة شمار فى مرقة مع لون الأسلفت الأسـود.. وكان مفروض يكون كونتراست
مع أى لون مجاور.
10- الورق السلوفان المستعمل كقناع ما زال موجودا وكان مفروض يزال بعد الصاق اللافتة.
11- اللافتة فى منتصفها مثبتة بطوبتين من الجانبين، مما يدل على ان التلتوار قد كسر من أجل تركيب
اللافتة ولم تقم الشركة بإصلاحه بعد التركيب.. والدليل على ذلك ان التلتوار سليم خارج نطاق اللافتة.



.

Quote: غايتو الكتب SODAN دا بالغ بلوغ مبكر عديل كـدا!!

انتو ليه مصرين انه غلط ما يمكن يكون اسم السودان بعد انفصال الجنوب SODAN

غايتو أنا شايف أنو مافي غلط

اللوحة دي مزورة ..دي ما الأصلية

دا الغلط بس

Quote: مواصله لحفل افتتاح عشوائي مكلف مليارات , جاء به فواصل رقص بلا صوت, في افتتاح بطوله افريقيا للمحليين بالسودان فبراير 2011!, بل قل حفل كامل بلا صوت الا في مقصوره السيد الرئيس !, وارضيه ملعب مدني الجزيره الخضراء المتصحر و المتبرقع الذي جلب لنا سخريه معلقي الجزيره الرياضيه و مشاهديهم, وانقطاع الكهرباء و عودتها مع هدف والنهايه, فقال المذيع : لا اول مره ننقل مباراه لا نعرف نتيجتهابنهايتها !!, تم كتابه النيجر غلط باستاد مدني في ثلاث حروف انكليزيه كامله!!!.. عفوا سرحت : موضوع المسابقه اعلاه هو: الصوره من اجمل شوارع الخرطوم الحضاريه, العاليه التكلفه جدا , تعرف على الاخطاء العشره بالصوره و اكسب جائزه صيانه هويتك من سوء التعليم و الذوق و الاداره.. شكرا د شهاب الفاتح

يا دكتور
سلامات وأشواق

اللهُـمّ لا إعتراض فـي حكـمك يا رب
بالله دي حالة دي ؟
وأنا قال زعلان من دا :-
(( ( المحلّي ) داخل عطبرة (( فيديو فضيحة )) ))





عليه العوض ومنّه العوض

Quote: اللهُـمّ لا إعتراض فـي حكـمك يا رب

Quote: كيد مصمم اللوحة واحد.... " رفيق "

الضحك شرطني

تصور دا حال الفاقد التربوي في السودان او خريجي الغفلة
جامعاتنا تخرج آلاف الطلاب سنويا -

عام 2004 نويت ان اعمل محل خدمات طلاب في جامعة النيلين (النشاط)
احضرت احد الخطاطين الشباب لعمل لوحة للمحل الجديد
اعطيته الاسم المفترض للمحل الجديد بالعربي والانجليزي
وذهبت لداخل المحل حتى يكمل الكتابة
وبعد انجز المهمة قال لي يا حاج تعال شوف انا خلصت
اعجبني ألوان الكتابة الا انني صدمت عندما رأيت كلمة Center
على النظام الامريكي والاصل Centre. قد تحولت Senter
ورثيت لحال الطلاب الذين اشادوا بالالوان ونوع الخط وتفحصت في وجوههم
لارى اي انتقاد pتى حاولت ان استنطقهم ان كانوا رأوا خطأ ولم اجد اجابة،
فقلت والله حالكتم صعبة وتحنن يا اولادي.
فقلت للخطاط عليك بتصحيح الكتابة بتعديل S الى C فصعد السلم متكاسلا
وقال يا حاج اصلوا طالما مفهوم بالعربي مافي داعي للانجليزي فقلت له انا افترض
ان الجامعة فيها جنسيات مختلفة لابد ان نعكس اننا شعب نتحدث الانجليزية اكثر
من اي دولة افريقية او عربية او حتى شرق ادنوية.

سلام للجميع

من الناحية الهندسية:

1. الـ Curbstones مفككة ومرمية على الشارع عند اللوحة.
2. وجود كثبان ترابية كبيرة جداً داخل الشارع عند اللوحة.
3. موضع اللوحة خطأ.
4. الترجمة الإنكليزية للوحة بها أخطاء إملائية.
5. حجم اللوحة صغير جداً.
6. إرتفاع اللوحة منخفض جداً.
7. لا يوجد للطريق ممر خرصاني للمارة Sidewalk
8. لا يوجد للطريق فتحات تصريف لمياه الأمطار(Catch-basins) .
9. الشارع غير مخطط للفصل بين حاراته (Lanes) بخطوط بيضاء متقطعة في الداخل وخطوط صفراء عند الحواف.
10. الطريق مسطح وليس به ميلانات لتصريف مياه الأمطار.
11. يوجد على الطريق Curbstones ولكن لا يوجد له Gutters لجريان مياه الأمطار.
12. لا يوجد خط أبيض غير متقطع عند إشارة المرور لتحديد مكان توقف السيارات عن الإشارة الحمراء.
13. لا توجد مزروعات وحدائق لتجميل الشارع.
14. لا توجد للطريق لوحة باسم الشارع .
15. إنارة الشارع خطأ ومن المفترض أن تكون الإنارة في وسط الطريق.

عند إفتتاح غرفة جراحة المسالك الجديدة بسوبا نوينا عمل لوحة شرف
مكتوب فيها الحدث والتاريخ وأسماء الذين كانوا موجودين وإسم أول مريض ونوع أول عملية
المهم، كتبنا التفاصيل للخطاط، بس اللوحة الأولي ما عجبتنا كان فيها غلط في الإنجليزي وكانت وس خ انة شوية
زميلنا قال للخطاط يغيرها وكتب ليهو تحت (مع مراعاة النظافة)
لمن جاء يستلم اللوحة لقي الخطاط كاتب:
(تم بحمد الله إفتتاح غرفة عمليات جراحة المسالك بمستشفي سوبا يوم ......... الحاضرون د. عبدالرؤوف شرفي .............إلخ، مع مراعاة النظافة)!

شكرا شهاب

الخطاء الكبير في هذه الصورة انو الزول الاخذ الصورة اخذها من عربية ودي مخالفة مرورية ..









ــــــــــــــــــــــــــــــــــــــــــــــ
اما المخالفة الاكبر الممكن تودي الزول الاخذ الصورة للدروة (الاعدام) انو اخذ صورة لمباني عسكرية ونشرها في موقع عام