Post: #1
Title: مجـــــرد اقتـــــــراح ....
Author: Randa Hatim
Date: 02-02-2011, 01:05 PM
اقتراح ....
قد يظنه البعض هزليا ...
وقد يسخر منه البعض ...
ولكن بالنظر الى المثل القائل ... الارضة جربت الحجر ...
حقو نجربوا ... خسرانين شنو ؟؟؟؟؟
بالنظر لي تاريخنا ولي تفاصيل الشعب السوداني ...
بنجد اننا شعب عاطفي في المقام الاول ....
يعني من السهل جدا استثارتنا بالاتجاهين السلبي والايجابي.
وعندنا وتر كدا لما تعزف عليهو بنعمل المعجزات ....
وتر الوطن والشهامه والعزة والكرامة ....
من الاخر كدا ....
اقتراحي انو الناس تسجل ليها شريط موحد كلو اغاني حماسية وعن السودان الوطن الحر وعن عازة ...
بدون ما يحمل اي طابع حزبي يعني ما نركز على اغاني معروفة ببصمة معينة ....
واي زول عندو عربية او مسجل صغير بيتشال في الايد يطلع بيهو في كل المسيرات القادمة ...
او حتى اثناء اليوم العادي واحنا ماشين وجايين نشغلوا في العربات وتفتح القزاز عشان الصوت يصل للكل ...
دا اعتقد بيدي احساس برضو بالتعبئة الوطنية ...وما تنسوا انو الاغاني الحماسية والوطنية بتلهب المشاعر وتحرك السكون البقى ساكن فينا ....
حقوا نفكر في عمل اشياء جانبية وصغيرة زي الحاجة دي لانها بتدي احساس انو في حياة وحركة بدت تدب في الناس.
مجرد اقتراح ...
|
Post: #2
Title: Re: مجـــــرد اقتـــــــراح ....
Author: وليد محمد المبارك
Date: 02-02-2011, 01:13 PM
Parent: #1
ممتاز
واقترح اول غنية في الشريط وحا تاخد صايد كامل
تكون الملحة ( قصة ثورة )
هاشم صديق
ود اللمين
لما الليل الظالم طوّل
وفجر النور من عينّا اتحول
قلنا نعيد الماضى الأول
ماضى جدودنا الهَزَمُوا الباغى
وهدّوا قلاع الظلم الطاغى.
وف ليله وكنا حُشود بِتصارع
عهد الظلم الشبَّ حواجز
شبَّ موانع
جانا هتاف من عِند الشارع
قسماً...قسماً
لن ننهار
طريق الثورة
هُدى الاحرار.
وغضب الامه اتمدد نار
والكل يا وطنى حشود ثوار
وهزمنا الليل
هزمنا الليل.
والنور فى الآخر طل الدار
والعزة اتهادت للأحرار.
وطنى أنحا سيوف امجادك
ونحنا مواكب تفدى تُرابك
ولِسّه الشارع بِشهَد لينا
فى يوم الغضبه حصاد ماضينا
مشينا نَعَطّر حقل الثوره
بِدَم نَفْدِيبُو بلادنا الحره
وكان اكتوبر فجر الغضبه
كسرنا قيود الماضى الصَعَبه
لما مشينا مواكب صَامده
تهدر- وتغلى ... وتهتف راعده:
الرصاص لن يفنينا.
وسال الدم فى أرض الوادى
فَدينا النور بالروح يا بلادى
وكانت صفحة حكاها العالم
وفجر اكتوبر طَلّ وسَالَم
كان فى الجامعه موكب هادر
صمَّم يجلى الليل السّادر
وكان الليل السادر غادر
فجّر غدرو سموم دخان
ورُصاص من صوته صِحَا السودان
والشعب الثائر
صمّم هادر
يصرع ليلنا الداجى الطَّوَّل
وكان القرشى شهيدنا الاول
وما اتراجَعنا
حلفنا نقاوم ليلنا وسِرنَا
نذرنا الروح ومَسَكْنَا دَرِبنَا
للشمس النايرة قطعنا بحور
حلفنا نموت أو نلقى النور
وكان فى الخطوه بنلقى شهيد
بى دمه بِيِرسُم فجر العيد.
يا اكتوبر
أنِحْنا العِشنا ليالى زمان
فى قيود ومظالم وويل وهوان
كان فى صدورنا غضب بركان
وكنا بنقسم بالاوطان
نَسَطَّر اسمك يا سودان
بدمانا السّالت راويه الساحه.
وحلفنا نسير ما نْضوق الراحه
شهرنا سيوف عِصيانّا المدنى
إيد فى ايد حلفنا نقاوم
ما بنِترْراَجع وما بِنءسَاوم
بينّا وبينك تار يا ظالم
خُطانا تسير فى درب النصر
هتافنا يدَوّى يهز القصر
كسرنا حواجز ..أزِلنا موانع
صفنا واحد
عامل.وطالب..زارع وصانع
وهزمنا الليل
هزمنا الليل
والنور فى الآخر طل الدار
والعِّزه اتهادت للأحرار
يا ساحة القصر..يا حقل
ويا واحهَ بتَحَضِن روح(نَصّار)
روينا ورودك دم ثوار
وشتَلنا فضاك هتاف أحرار
خَطّينا ترابك احرف نايره
بتحكى سطور ايامنا الثايره.
وشلنا الشهدا مشينا ونهتف
وجرح النار فى قلوبنا بينزف
سَجّينا الشُهدا وجينا نقاوم
ما بنِتراجع وما بِنساوم
وفجأه ونحنا صفوف بتصمم
زغرد فجر الثوره الحالم
والنور فى الآخر طل الدار
والعزه اتهادت للأحرار
قسماً..قسماً يا اكتوبر
نحمى شعارك
ونجنى ثمارك
ونرفع راية الثوره الغاليه
عاليه ترفرف فوق الساريه
عليها شعار الثوره الأكبر
رسُمه النادر زاهى واخضر
ولِسّه بنقسم يا اكتوبر
لما يطل فى فجرنا ظالم
نحمى شعار الثوره نقاوم
نبقى صفوف تمتدّ وتهتف
لما يعود الفجر الحالم
|
Post: #3
Title: Re: مجـــــرد اقتـــــــراح ....
Author: Randa Hatim
Date: 02-02-2011, 01:24 PM
Parent: #2
يا سلام عليك يا وليد ...
وعارف المهم شنو برضو...
بيكون اتكسر ليهم الدش في ايدهم ...
يعني ....
لما المسيرة عادة تمرق بالهتافات ...
هم بيصنفوها مظاهره ما مسيرة ...
ويكون حلال جدا ضربها وقمعها ...
اما لما الناس تكون ساكته ...
وبس الاغاني الحماسية شغاله بي اعلى صوت ...
اول حاجه ما بقدروا يقولوا دي مظاهره ولازم نقمعها...
ومافي زول بجي يقول ليك مشغل مسجل عربيتك ليه .. اطفيه.
تسلم يا وليد ...
|
Post: #4
Title: Re: مجـــــرد اقتـــــــراح ....
Author: ناصر احمد الامين
Date: 02-02-2011, 02:08 PM
Parent: #3
| Quote: وبس الاغاني الحماسية شغاله بي اعلى صوت ... |
اقنعو بتاعين الامجادات والركشات في الاول !!
الليل و النهار حايمين في الشوارع، لو اتنازل نصهم عن بث الاغاني العاطفية، ساعتها حا ابشرك يا رندا بي احتمال نجاح الاقتراح.
و دا برضو اقتراح!!
و بهدي ليكم اغنية: انا سوداني انا للراحل العطبراوي
|
Post: #5
Title: Re: مجـــــرد اقتـــــــراح ....
Author: طارق جبريل
Date: 02-02-2011, 02:11 PM
Parent: #4
الارضة جربت الحجر
ازيك تاني
بهناك طنشتيني
|
Post: #11
Title: Re: مجـــــرد اقتـــــــراح ....
Author: Randa Hatim
Date: 02-03-2011, 06:30 AM
Parent: #5
معقولة اطنشك يا ود جبريل .... ابدا وحاتك ....
تابعت زيارتك للسودان واستقبال الشباب ليك في المطار والرحلة برضو ... وكان نفسي اكون معاكم ...
لكن اختك كانت داخلة ليها في بيات شتوي من جراء الصدمات والاحباط ...
تسلم ويديك العافية ...
ودعواتك ربنا يفرج همنا ...
|
Post: #6
Title: Re: مجـــــرد اقتـــــــراح ....
Author: Randa Hatim
Date: 02-02-2011, 02:13 PM
Parent: #4
برضو اقتراح جميل يا ناصر...
الناس تطبع الشريط دا وتوزعوا ليهم مجانا وتشرح ليهم الفكره ...
قول من كل 10 امجاد قبلو 4 بس ...
ومن كل 10 رقشات قبلوا 4 بس ...
مكسب برضو ...
|
Post: #7
Title: Re: مجـــــرد اقتـــــــراح ....
Author: دينا خالد
Date: 02-02-2011, 09:25 PM
Parent: #6
يعنى قصدك يا رنده الناس البتتجلد
تفتكر دا بطان ؟؟؟
والله فكرة ..
ــــــــــــ
غايتو لو عاشو الدور نبدل العناويين
وابدع (زميل البورد) عاصم البنا
و(زميل البورد) ياسر تمتام
وانجلد تحت انغامهم
اللسته
وسط زغاريد الزميلات المحمولات جوا وبحرا
فى بكاسى وعربات النظام ..
|
Post: #8
Title: Re: مجـــــرد اقتـــــــراح ....
Author: تبارك شيخ الدين جبريل
Date: 02-02-2011, 09:41 PM
Parent: #7
آآآهييي يا مريم ... الواسطة خربت دولة ...
والمدفع الرزاز طلقاتو منحدرة ... النار ولعا واتوطا فوق جمرا ... وبى كفّى بطفيها (دى بالذات لو لقيتوها بى صوت محسن خالد!)
والطاغية الأمريكان ليكم تسلّحنا ...
وجون قرنق يا عمالة ... يا طريد كمبالا ...
... المهم ...
|
Post: #9
Title: Re: مجـــــرد اقتـــــــراح ....
Author: النذير حجازي
Date: 02-03-2011, 05:42 AM
Parent: #8
Quote: برضو اقتراح جميل يا ناصر...
الناس تطبع الشريط دا وتوزعوا ليهم مجانا وتشرح ليهم الفكره ...
قول من كل 10 امجاد قبلو 4 بس ...
ومن كل 10 رقشات قبلوا 4 بس ...
مكسب برضو ... |
أقتراح ممتاز
وأقترح الناس تطبع شرائط مليونية
وتوزعها على الحافلات بالمجان
والناس البرة (الزينا دي) يتبرعوا
بالقروش، وبورداب الداخل عليهم
الطباعة والتوزيع
تحياتي يا رندا
|
Post: #12
Title: Re: مجـــــرد اقتـــــــراح ....
Author: EMU إيمو
Date: 02-03-2011, 06:49 AM
Parent: #10
Quote: وأقترح الناس تطبع شرائط مليونية
وتوزعها على الحافلات بالمجان |
وحتى لا تقطعو عيش الغلابة
أدفعوا لكل سائق ركشة أو أمجاد مبلغ المخالفة
وحيكون المرور هو الكسبان
|
Post: #13
Title: Re: مجـــــرد اقتـــــــراح ....
Author: Randa Hatim
Date: 02-03-2011, 07:08 AM
Parent: #12
سلام يا ايمو...
مخالفة شنو؟؟؟؟
زول مشغل شريط في عربيتو ... المخالفة وين هنا؟؟؟؟
وبعدين ناس الرقشات والامجاد والمواصلات العامه مافي زول طالب منهم يجو المسيرة ...
يعني لا لمة لا يحزنون ...
مجرد شريط شغال في عربية ما اظن دي بتعتبر مخالفة.
اللهم الا يعملوا ليها بند جديد في قانون المرور لعام 2011.
تحياتي ...
|
Post: #14
Title: Re: مجـــــرد اقتـــــــراح ....
Author: Randa Hatim
Date: 02-03-2011, 07:13 AM
Parent: #7
سلام يا دينا ...
Quote: غايتو لو عاشو الدور نبدل العناويين
وابدع (زميل البورد) عاصم البنا
و(زميل البورد) ياسر تمتام
وانجلد تحت انغامهم
اللسته
وسط زغاريد الزميلات المحمولات جوا وبحرا
فى بكاسى وعربات النظام .. |
؟؟؟؟؟؟
|
Post: #15
Title: Re: مجـــــرد اقتـــــــراح ....
Author: النذير حجازي
Date: 02-04-2011, 08:35 AM
Parent: #14
فووووووووووق
|
Post: #16
Title: Re: مجـــــرد اقتـــــــراح ....
Author: ناصر احمد الامين
Date: 02-04-2011, 08:44 AM
Parent: #15
ياالنذير البوست دا ما برفعوهو بي:
قول :
شريييييط
|
|