غيـــــــوم ................ مقال للمبدعة ... أسماء الشريف

أسماء الشريف
[email protected]

زمان دق الفرح بابي وعشنا مع الزمن أحباب ، لا صادفنا هم في البر ولا هل في سمانا ضباب ، وكان لينا الغرام واحة وطول السكة مافي ضباب . مرة ونحن كده ماشين مر بجوارنا ( عذاب ) ، ماكنت برتاح ليه بس حياني بي ترحاب ، ولَد فيني دهشه وخوف ، وفي لمحه سابنا وغاب ، قال لي ( الفرح ) أنسيه بسد في وشو مليون باب ، وفجأة الزمن جار بي بدون مايوضح الأسباب ، وتاه قلب الفرح مني حتي بقينا ذي أغراب ، والحاجة العجيبه كمان ، بقيت أنا والعذاب أصحاب .
كان عام 2010 بالنسبة لي عاما للأحزان فعل سيصبح عام 2011 عاما للأفراح أم سيظل إمتدادا لعام الحزن
لست أدري ! ولكن ستظل الإبتسامة رغم الدموع ويظل باب الأمل مفتوحا وإن ودعتني الأماني الجميله .
هنالك من غادر البلاد وأصطلي بنار الغربة وأصبح يشكو لهيبها وهو لا يدري بأن المصطلي بنار الغربة داخل الوطن أكتر إحتراقا ولا يجد العبارات المناسبة للشكوي .
ويامعذب انت خلاص كفا ضمد جراحاتك وقوم ، أفرد جناحات الصفاء وغادر مدارات الهموم ، أكيد ح تلقي وطن وفاء جوه خالي من الغيوم ، لا خيانه لاصد لا جفاء ، ولا حتي للأحزان قدوم ، أمسح دموعك وإبتسم ماتحصي أعداد النجوم ، لو إنت يوم صابك ألم ، ماتخلي ليل آهتك يدوم ، يمكن في بكره يكون عشم ، وطبع الزمن دايما كتوم ، رافق الأمل سيب الوهم ، يالطال سهادك أنسي نوم .
تعالوا نعيش سوا ونحلم ومعــروف الحلــم بلوش ، ننعــش ونغني لي روحنا ،مادام اصلو مافي قروش ، زمـــــــان ضيعنــــا في الآهه وفرشناها النـدامه بروش ، قعدنا برانا نتحسر لما العيش صبح قرقوش ، أرمو ا علي الكريم الهم تحسـوا الدكـوه ماكنــتوش ، أمرقوا عــلي الخلـق بـره ، وعطروا حوشكـم المرشوش ،
حلوا حياتكم الجايه واهدموا للمآسي عروش ، ولاقوا الناس وجاملوا الناس أكان تاكلوها كسره وبـوش ،عاد هي الدنيا شن فيها ، هســه ملانه بـكره فشـوش ، تعـالوا نعيـــش سـوا ونقعد نشوف دنيتنـــا واحوالـها ، نفتــح لـي كتاب الله ونعـيش قصـص الرسول قالها ، نفتـش للجميل الـراح ، نسيــب الشينه وأفعـــالها ، أكــان زغردنا للأحـزان ، بتجينا الآهـه بي عيالها ، تـعالوا نعيـش سوا ونحلم ، نجيـب الفرحه بــي حالها ، وقـدر مــانعـيـش ونتهني ، أمور الآخـره نفضالها وحال الدنيا عاد باين ، تقـول أيــوه وتقـول لا لا ، وقلب مليان وجيـب فــاضي ، أخير مـن قلبة الحاله ، وأكان بقت النفوس رايقه ، التطير الدنيا بي مالها .
أصدقاء الحرف :
تحياتي وتمنياتي لكم بعام سعيد أينما كنتم وعبر الأحرف دوما نلتقي .

بطل عباطه يا صلاح غريبه

الشارع بيغلي وانت تقول لي اسماء الشريف والحب و الهباب؟؟!!


كدي امشي ادي الفيس بوك طله وشوف الشعب غاضب كيف؟؟!!

تراجي كيفك

مش قالو يوم 30 ولا بدرتو شوية

كفاية امس مساهرين الليل كله ...... ومافي حاجة

ثم الفيس بوك

وانا خبير فيه ......

فكل الموجود فيه لا يرقى الا ان يكون .. نضال اسفيري ( مناضلي الكي بورد )

صلاح غريبة
سلااامات ياخ
عارف
محمد سعيد الصحاف ( وزير اعلاام صدام حسين )
قالو له الامريكان على مشارف بغداد
رد قائلا
لا ترددون كذب الكاذبين ترى تصيرون مثلهم
واردف قائلا
انا ألوم الجزيرة مرة اخرى لانها تسوق للامريكان قبل ان تتأكد
انتهى
هنا تمثل انت دور الصحاااف يا عمك ابسط وزير ثقافة بحالو
يلا ردد لما يقول الصحاف سابقا




قاسم المهداوى

Quote: تعالوا نعيش سوا ونحلم ومعــروف الحلــم بلوش ، ننعــش ونغني لي روحنا ،مادام اصلو مافي قروش ، زمـــــــان ضيعنــــا في الآهه وفرشناها النـدامه بروش ، قعدنا برانا نتحسر لما العيش صبح قرقوش ، أرمو ا علي الكريم الهم تحسـوا الدكـوه ماكنــتوش

العزيزة اسماء
تحية طيبة

الزمن اتغير .. والحلم بقى بالقروش
والناس ضاقت خلاس
وكلامك سمح .. بس التوقيت خزلك شوية

مزيد من التقدم
والدكوة مستحيل تبقى ما كنتوش

تراجي كيفك ...... احتراماتو

Quote: بطل عباطه يا صلاح غريبه

عباطة ليه مش بوست فاتحه انا ...

امس احترمت الاخ الموصلي عندما قال لي افتح بوستاتك براك وما تتدخل في بوستات الباقيين ( كناية على الرد في البوستات وهو حق متاح وليس حجر حريات ..... والموضوع كله عن الاشارة وطلعت بيش ... الخ )

Quote: الشارع بيغلي وانت تقول لي اسماء الشريف والحب و الهباب؟؟!!

اسماء الشريف من براعمنا الاعلامية ويجب ان نشجعها ولها عمود ثابت بجريدة الخرطوم عدد يوم الاربعاء ولها نشاطات اعلامية مكثفة في مدينة واد مدني

Quote: كدي امشي ادي الفيس بوك طله وشوف الشعب غاضب كيف؟؟!!

الفيس بوك ... وانا الخبير فيهو وساكن فيهو سكنة

شايف شوية اجتهادات ولكها لا ترقى الى مستوى ما تشيرين اليه

وفي احد استطلاعات الراي عن الحضور والمشاركة في فعاليات يوم الاحد 30 يناير
كانت النتيجة

3000 وافقوا على الحضور
1500 رافضين الحضور
15000 لم يردوا حتى الان

واعلب الموافقن على الحضور هم في الخليج ... او خارج السودان عموما

او من هم داسو اول رغبة والسلام ........

صلاح غريبة - المعجب بموهبة اسماء الشريف الاعلامية