العار يسكننا !!! تاملات في نتيجة إستفتاء الجنوب !!!

جاء في الأخبار أن نتيجة التصويت في إستفتاء انفصال الجنوب كانت ٩٨٫٨١٪ لصالح الأنفصال بينما صوت ١٫١٩٪ من اخوانا الجنوبين لصالح الوحده !!!

الذي ينظر لهذه النتيجه و لا يري فيها ظلمنا و بؤسنا و وضاعة ما فعلناه لاخواننا فليتحسس أخلاقه !!!

الذي لم ير في إنفصال الجنوب سوي إنقسام الوطن : فليتحسس أخلاقه !!!

أكتر من خمسين سنه و الجنوبيون ياكلون الظلم أكلا لما ، و لما قيض الله لهم الفرج تباكي عليهم الناس !!











----------
يوم فرح المظلوم ، لا يحزن سوي الظالم !!

الحزن الذي يبديه الشماليون علي الأنفصال - بدعاوي الوطنيه - ما هو إلا مواصله لظلم الظالم !!

لو حزن أهل الشمال علي الظلم الواقع علي الجنوب و أهله ربع حزنهم علي الأنفصال لما كان هنالك إنفصال !!

سؤال للذين حزنو لانفصال الجنوب عن الوطن : متي كان السودان وطن للجنوبيين ؟!!

دعاء و شكوي لمن لا يغفل و لا ينام :
اللهم إنا نشكو إليك ضعفنا و تفاهتنا و وضاعتنا و ظلمنا للجنوب و أهله ،
اللهم إنا نسالك أن تعين اخواننا في الجنوب بقدر ما ظلمناهم و أن تيسر لهم بقدر ما أعسرنا عليهم و أن تنصرهم بقدر ما خذلناهم ، انك علي كل شئ قدير !!

الاخ امين
تحياتي
هناك فرحة رسمية في الشمال علي كافة المستويات ابتداء من السيد
الرئيس ويريدالاعلام الرسمي ان يصور ان الجنوب كان عبئا بالفعل
تخلص الشمال منه بل هناك عجلة لتصفية كل ما هو جنوبي من دواوين الدولة
ناسين ان هناك عدة شرعية مدتها 9 اشهر
وهناك من ينادي بسرعة ابعاد سلفاكير من الرئاسة ناسين ان سلفاكير اصبح بطلا تاريخيا

ولكن المؤتمر او الحكومة بدأت تفيق بعض الشيئ وان الجنوبيون سيبادلونهم نفس المواقف
وهم في الموقف الاضعف
علي كل ليست اماني ولكن الجنوبيين يملكون ارادة حقيقية للنهوض والعالم مستعد للتعاون معهم
وغدا سيصبحون كيانا آخر في وقت لا نزال فيه نحارب بعضنا في الشمال من اجل الكرسي

سلام يا الشامي

Quote: هناك فرحة رسمية في الشمال علي كافة المستويات ابتداء من السيد الرئيس ويريدالاعلام الرسمي ان يصور ان الجنوب كان عبئا بالفعل تخلص الشمال منه بل هناك عجلة لتصفية كل ما هو جنوبي من دواوين الدولة ناسين ان هناك عدة شرعية مدتها 9 اشهر

شتان ما بين فرحنا لفرح الجنوبيين و "الفرحة الرسمية في الشمال" لذهابهم !!!
ياخي والله المغصه تشق من هكذا قاده و من هكذا شعب ذاتو : ظلم و تهميش منذ ميلاد السودان حتي انقسامه و يقولو ليك "الجنوب كان عبئا علي الشمال " !!!

حديث صادق جدا

نعم الجنوب لم يجد الا القتال والكراهية لمن فر او فرت من الموت


55 سنة لم يعرف اهل الجنوب الا الموت والحملات العسكرية ومؤخرا اصبحت جهادية


يريدون ان يدخلوا الجنان بالاغتيالات

احترا م حقيقي يا أمين لكلامك , قد نختلف هنا او هناك في بعض التفاصيل و ده عادى , لكن فعلآ الفرد الما قادر يشوف كل الصوره الحاصلة لأكتر من خمسين سنة ده تبقي عندو مشكلة في شوفو او فهمو او انسانيتو زاتا .
تقدير و سلام

سلامات أمين حاجيب ليك كلام كنته كتبتو في بوست داليا حافظ وحتلقاني متفق معاك كتير
Re: على أعتاب الإنفصال ..لعناية الأخوة الجنوبيين ..

Quote: إلي أصدقائي وليم (مدوك) و U K (يوكوي آلفريد) لا علم لي اين انتم الآن فلربما رحلتم وربما أنتم بصدد الرحيل لكني أعلم إنكم لن تختارو الإنفصال لو بقي قليل من أمل أن تجدو أبسط حقوقكم هنا، ولربما كنتم لن ترحلو رغما عن أنف الإنفصال لو أحسستم بالأمان هنا، لكم أن تعلمو أصدقائي أننا كنا (فرااجه) نشاهد انقسام وطننا (الكان حدادي مدادي) وليس لنا سوى الفرجه والإنكسار لضعفنا وقِلة حيلتنا وعجزنا أن نضمد جراج الوطن ونجعلكم تبقون بيننا،، رجاءاً لا تؤاخذونا بما فعل الساسة فينا وفيكم، رجاءاً لا تؤاخذنا بمعشر الشامتين الذين يطبلون فرحا لرحيلكم ونسأل الله أن يشفيهم، لكم فقط أن تعلمو إننا قد أحببناكم و وددنا أن نعيش معكم في وطن واحد يسعنا جميعا و لكن (ربنا يجازي اللكان السبب)، ولكم أن ترحلو الآن وإن كنا نتمنى لكم رحيلا يليق بمقامكم الغالي عندنا لا هذا الرحيل الحزين مع خالص الأماني بأن يطيب لكم المقام بوطنكم الجديد وأن تجدو فيه الحقوق التي حُرمنا وحُرمتم منها في وطننا المسروق هذا .. ولتسعدي في مرقدك يا أمي حياة (جان يول) فهنياً لك فإنك لم تشهدي رحيل أبنائك بهذه الطريقه مكرهين.

ياخ والله ليك وحشه، واللوم حاصل مني

Quote: حديث صادق جدا

سلام يا صبري و والله كتر خير الجنوب و الجنوبيين الخلونا نتفق علي حاجه !!

سلام يا عصام

Quote: الفرد الما قادر يشوف كل الصوره الحاصلة لأكتر من خمسين سنة ده تبقي عندو مشكلة في شوفو او فهمو او انسانيتو زاتا . تقدير و سلام

يا عصام أنا شايف مشكلة الجنوب مشكله أخلاقيه قبل ما تكون سياسيه ولا اجتماعيه : ياخي ما اتفقت حكومات البلاد منذ الأستقلال سوي علي ظلم الجنوب و أهله و ما اتفقنا كشعب علي شئ مثل اتفاقنا علي نسيان الجنوب و أهله !!
الجنوبيون عاشو معنا منسيين ، ما تذكرناهم إلا حين ما رحلو !!
أخشي أن نكون شعب بلا أخلاق !!

مورتا يا حبيب ، الشوق يعصر مهجتي كالبرتقاله والله !!

Quote: لكم أن تعلمو أصدقائي أننا كنا (فرااجه) نشاهد انقسام وطننا (الكان حدادي مدادي) وليس لنا سوى الفرجه والإنكسار لضعفنا وقِلة حيلتنا وعجزنا أن نضمد جراج الوطن ونجعلكم تبقون بيننا،، رجاءاً لا تؤاخذونا بما فعل الساسة فينا وفيكم، رجاءاً لا تؤاخذنا بمعشر الشامتين الذين يطبلون فرحا لرحيلكم ونسأل الله أن يشفيهم، لكم فقط أن تعلمو إننا قد أحببناكم و وددنا أن نعيش معكم في وطن واحد يسعنا جميعا

و يا ريت لو كنا فراجه ساي : مشكلتنا يا مورتا : كنا و ما زلنا : فراجه و قليلين أدب !!!
ياخي بفهم إنو الناس تتعامي عما حدث للجنوب و الجنوبين ، لكن يتعامو و يقولو ليهم كنتم عبئا علينا دي غلبتني والله !!!

امين الامين سلام..

المؤسف ان بعضنا يراهم خونة لانهم قرروا الابتعاد عن ظلمنا الرسمي والشعبي ..

يراهم مجانين لانهم اَثروا اكواخهم البسيطة عن حراسة عماراتنا الشواهق..

فضلوا ان يبداوا من الصفر على ان يكونوا صفرا كبيرا في مدننا الظالمة..

حتى بعض المتباكون على الانفصال يبكون على خريطة ستتحول معالمها لا على بشر قهرناهم وسقيناهم كاسات الجهاد والدبابين والابادة

لا يبكون على اطفال مشوا على حواف الهلاك باقدامهم حتى دول اخرى هربا من حمم ارسلناها لهم ..

باختصار عاوزين انهار وغابات وبترول الجنوب وطبيعته الخلابة بدون اخواننا الجنوبيين..

صدقت يا صديقي حين قلت..

(((سلام علي أخوانا في الجنوب إذا إنفصلو ، سلام عليهم إذا لم ينفصلو و تعسا لوطن ‎- باسم الوطن ‎- يقتل أبنائه ثم ‎- بإسم الوطن‎ - يسألهم العون حتي لا يتمزق !!)))

سلام ومتابعة..

إنه عار للأبد ولا شك

سلامات يا أمين

تعرف نظرتي للجنوب و لقضيته تغيرت بعد حدثين ..

الأول قراءتي لكتاب أبيل ألير حول نقض العهود و المواثيق ..

و الثاني عملي هناك أبان الخدمة الوطنية (واو - بحر الغزال)

فمن ناحية أحسست بالغضب لتاريخنا معهم منذ الإستقلال و إستهانتنا بهم
و من ناحية أخرى أعجبت جدا بمجتمعهم المحلي و ثقافتهم في وطنهم الأصلي ..

و لكن كانت لدي قناعة أن ما يجمعنا كاف ليؤسس حدود وطن واحد لولا تاريخنا المخزي معهم ..
هذا قبل أن تطفو للسطح نيفاشا أو مسألة الإنفصال هذه ..
ياخي في زول إتظلم زي الأفارقة و الهنود الحمر بأمريكا !!
و شوف قدروا يواصلوا مسيرتهم معا كيف رغم كل تاريخهم الصعب ..
العار ما فايتنا .. و لكن الحزن ليس بالأمر المستهجن أيضا ..

مودتي
_____________________
إنت اللابتوب ده معاك حتى في الصور
أخيرا زول مدمن أكتر مني

الأخوان حسين ، نصر و محمد قرشي : شكرا لمروركم و لحدي ما نلقي لينا فرقه مع الرجل الأبيض ..

حسين العميق ، سلام يا صاحب

Quote: المؤسف ان بعضنا يراهم خونة لانهم قرروا الابتعاد عن ظلمنا الرسمي والشعبي .. يراهم مجانين لانهم اَثروا اكواخهم البسيطة عن حراسة عماراتنا الشواهق.. فضلوا ان يبداوا من الصفر على ان يكونوا صفرا كبيرا في مدننا الظالمة.. حتى بعض المتباكون على الانفصال يبكون على خريطة ستتحول معالمها لا على بشر قهرناهم وسقيناهم كاسات الجهاد والدبابين والابادة لا يبكون على اطفال مشوا على حواف الهلاك باقدامهم حتى دول اخرى هربا من حمم ارسلناها لهم .. باختصار عاوزين انهار وغابات وبترول الجنوب وطبيعته الخلابة بدون اخواننا الجنوبيين..

ياخي كتر خيرك و أنت تعبر عني تماما !!
الناس البتتباكي علي الانفصال - بدعاوي الوطن و الوطنيه - بتنسي أو بتتناسي سبب الأنفصال ، و الانفصال سببو قديم قدم البشريه نفسها : سببو ظلم الانسان لاخيه الأنسان :
فياخي تعسا لوطن ما لقي فيه الجنوبين مستشفي ولا مدرسه و لا كرامه ...
تعسا لوطن ما لقي فيه الجنوبين غير الرصاص و الدبابات و ظلم يمشي علي قدمين !!

سلام يا نصر

Quote: إنه عار للأبد ولا شك

ياخي ٩٨٫٨١٪ دي حسني مبارك بالكضب ما بجيبها !!!
حقو نسال نفسنا النسبه دي كلها ما دايره معانا ليه ؟!! حقو نسال عملنا ليهم شنو عشان كلهم كده - بانسهم و جنهم و صغيرهم و كبيرهم - ما دايرين معانا !!
و الأجوبه موجوده واضحه و حاضره للداير يشوفها !!

عارف يا د. كتور امين انا كنت بقول فى نفس كلامك ده لواحد اخونا كده قبل كم يوم. قلت ليه انو الموضوع مخجل (بضم الميم)
اخونا ده قال لى (بما معناه):
دى وجهة نظر برضوا, لكن ليه ما تفكرى ان اخيرا الجنوبين و الشماليين صحوا للواقع. و هو ان الوحدة مستحيلة. الجنوبيين ناس عندهم حضارة و ثقافة عميقة و قديمة و حرام نفرض عليهم قوانيين و اعراف شمال السودان اللى اغلبه مسلم و عربى (او فاكر روحه عربى). و لو اسثنينا الجنوبيين من كل قانون او عرف ح يبقوا مواطنيين درجة تانية.
قمت عملت ذى ما عملتوا فى البوست ده و جبت سيرة امريكا و التعايش.
قام اخونا قال لى (بما معناه):
امريكا فرضت على كل المهاجرين اللغة الانجليزية. ما بيكون عندك جواز لو ما امتحنوك (صح الامتحان بيسيط) لكن بتكون بديت تفك الخط بالنجليزى. حتى القانون مستمد من الدين المسيحى. ما فى تعدد زوجات. حتى لو طبقنا القانون ده فى السودان الموحد. هل انتى شايفه ان من العدل فى شي انك تقولى للجنوبيين غيروا نظامكم الاجتماعى و لغاتكم و حياتكم ? ام انك عاوزه تسثنيهم من القوانيين و تبقيهم مواطنيين درجة تانية?
انتهى نقاشنا بقولى انا انى مندهشة من العنصرية الظهرت الان بعد الانفصال من ناس كتار بقولهم انهم ارتاحو من عب الجنوب
و وافق صديقى على وجهة نظرى مضيفا : اها نشوفهم هسي ح يعملوا شنو من غير العب, ان شاء الله يعمرو

أخونا و حبيبنا دكتور محمد القرشي

Quote: تعرف نظرتي للجنوب و لقضيته تغيرت بعد حدثين .. الأول قراءتي لكتاب أبيل ألير حول نقض العهود و المواثيق .. و الثاني عملي هناك أبان الخدمة الوطنية (واو - بحر الغزال) فمن ناحية أحسست بالغضب لتاريخنا معهم منذ الإستقلال و إستهانتنا بهم و من ناحية أخرى أعجبت جدا بمجتمعهم المحلي و ثقافتهم في وطنهم الأصلي .. و لكن كانت لدي قناعة أن ما يجمعنا كاف ليؤسس حدود وطن واحد لولا تاريخنا المخزي معهم .. هذا قبل أن تطفو للسطح نيفاشا أو مسألة الإنفصال هذه .. ياخي في زول إتظلم زي الأفارقة و الهنود الحمر بأمريكا !! و شوف قدروا يواصلوا مسيرتهم معا كيف رغم كل تاريخهم الصعب .. العار ما فايتنا .. و لكن الحزن ليس بالأمر المستهجن أيضا .. مودتي _____________________

يا دكتور مافي حاجه بتجمع ناس أسوياء بناس ظالمنهم ، سوي كانو من نفس عرقهم و دينهم أم لا !!
مافي شئ بجمعك مع البسلبك حقك في العيش الكريم ، مع الحكومه الما بتفتح في قريتك لا مدرسه لا مستسشفي و لمن تحتج و تتمرد الرد يجيك في شكل دانات و مدافع و دبابين !!
مافي شي بجمعك مع من يقتسمون معك الأرض و شمس الوطن الحاره و هم يتواطئون مع حكوماتهم بالصمت علي ما يحدث !!
طلعت من السودان بعد ما درست كل مراحلي التعليميه من الأبتدائي لحدي الجامعه و عمري ما سمعت و لا حسيت ساي إنو الجنوبيين ديل عندهم مشكله ، عمري ما سالت ليه كل العاملين في البيوت جنوبيين ، ليه كل أصحاب المهن الهامشيه جنوبيين ، ليه مافي جنوبيين دكاتره و مهندسين ؟! عمري ما قلت الناس ديل قصتهم شنو و لا فكرت في سر الصدفه الخلتهم مواطنيين درجه الف في سوداننا الشقيق !!
أقول هذا الكلام و أزعم إنو حال معظم الشماليين كحالي : الجنوب و الجنوبيين عاشو بيننا - منذ ميلادنا و ميلادهم - لكننا لم نرهم و لم نر مشاكلهم لم نر الظلم الواقع عليهم ، لم نرفع صوتنا - و لو مره - لنصرتهم عشان كده يا دكتور لا يجوز حزننا يوم فرحهم لانا لم نحزن أيام حزنهم !!



--------

Quote: إنت اللابتوب ده معاك حتى في الصور أخيرا زول مدمن أكتر مني

أبدا والله ، ياخي لمن اتقابلنا في القاهره أنا كنت شغال ما كان عندي اجازه و الصوره دي في الأيامات ديك صورني ليها حمور المستلب : متذكر المكان لكن ما متذكر إنو صورني ذاتو ، لكن عموما كلامك صاح :
لابتوبي ده هو عصاي أتوكأ عليه وأهش بها على الوهم الفي الاسافير ديل !!!

-----------
ياخي بالمناسبه ما عندك أي خبر من جادات ؟ الزول ده أنا قلقت عليه رسمي !!

الاخ أمين ..

الحق معك .. حين اتذكر الماضى تأخذنى الحيرة: لا اصدق ان الحرب كانت تحصد الجنوبيين بالآلاف حتى بلغ الضحايا حسب التقديرات الدولية بين مليون ومليونين .. ولم يكن ذلك يحرك ساكناً عند احد فى الشمال بل كانت الحياة تسير بصورة عادية .. ولكن الخرطوم والمدن الكبرى كانت تثور وتفور كلما جاء خبر عن قتل بضع عشرات او مئات من المسلمين فى البوسنة والهرسك .. أو اعتدى الاسرئيليون على الفلسطينيين فقتل فردين او ثلاثة .. هل هناك اعجب من هذا؟ يقتل الناس بالآلاف ومئات الآلاف داخل بلدك ولا حس ولا خبر، ويقتل خمسين فى البوسنة والهرسك فتنقلب الدنيا..!!!
الاخ محمد قرشى ..

اكتب المزيد عن تجربتك فى الجنوب ابان وجودك هناك فى الخدمة الالزامية .. كتابات شهود العيان مثلك تنير الطريق وتقدم العبر ..

Quote: لكن ليه ما تفكرى ان اخيرا الجنوبين و الشماليين صحوا للواقع. و هو ان الوحدة مستحيلة. الجنوبيين ناس عندهم حضارة و ثقافة عميقة و قديمة و حرام نفرض عليهم قوانيين و اعراف شمال السودان اللى اغلبه مسلم و عربى (او فاكر روحه عربى). و لو اسثنينا الجنوبيين من كل قانون او عرف ح يبقوا مواطنيين درجة تانية. قمت عملت ذى ما عملتوا فى البوست ده و جبت سيرة امريكا و التعايش. قام اخونا قال لى (بما معناه): امريكا فرضت على كل المهاجرين اللغة الانجليزية. ما بيكون عندك جواز لو ما امتحنوك (صح الامتحان بيسيط) لكن بتكون بديت تفك الخط بالنجليزى. حتى القانون مستمد من الدين المسيحى. ما فى تعدد زوجات. حتى لو طبقنا القانون ده فى السودان الموحد. هل انتى شايفه ان من العدل فى شي انك تقولى للجنوبيين غيروا نظامكم الاجتماعى و لغاتكم و حياتكم ? ام انك عاوزه تسثنيهم من القوانيين و تبقيهم مواطنيين درجة تانية?

اسمارت انا سلامات..

انا شايف انو موقفك انتي صحيح وانو صاحب الموقف اعلاه لا يختلف عن موقف القائليين ان الجنوب كان عبئا على الشمال وانو التخلص منه هو الحل..

لان القول ان ثقافتهم ولغتهم تقف حاجز لنكون في وطن واحد مفهوم مضاد لمعني المواطنة وسيفتح باب الانقسامات لعرقيات اخري لها ثقافتها المختلفة

او حتي اقليات لها ديانات اخرى ..

المشكلة لم تكن ثقافتهم او لغتهم المختلفة بل تعاملنا مع هذه الثقافة ونظرتنا الاستعلائية لها ولاصحباها - لم تكن فيهم بل فينا نحن وعدم تقبلنا للاخر

في دولة يتساوى فيها الجميع امام القانون..

وتدليله بامريكا لم يكن موفق فامريكا دولة علمانية لا دين لها وقوانينها علمانية والكل فيها سواسية امام القانون والفرص فيها متاحة لكل مجتهد وشروط

الحصول على جنسيتها مطبق على الكل مسيحي او مسلم او بوذي ابيض او اسود وقوانينها وضعية قد توافق او تعارض هذا الدين او ذاك

وتسن قوانينها بطريقة ديمقراطية وعبر مراحل طرح وتمحيص وتجاز بعد التاكد من عدم تعارضها مع الدستور الامريكي العلماني ..

وموضوع القوانين لم يكن مشكلة بالنسبة للمسيحين الجنوبين في القضايا التى تتعلق بدينهم لانهم محكومين بقانون الاحوال الشخصية التى يراعي

ديانة الفرد في التطبيق..

سلام..

أختنا العزيزه سمارت الذكيه ، سلام يا صديقه

Quote: دى وجهة نظر برضوا, لكن ليه ما تفكرى ان اخيرا الجنوبين و الشماليين صحوا للواقع. و هو ان الوحدة مستحيلة. الجنوبيين ناس عندهم حضارة و ثقافة عميقة و قديمة و حرام نفرض عليهم قوانيين و اعراف شمال السودان اللى اغلبه مسلم و عربى (او فاكر روحه عربى). و لو اسثنينا الجنوبيين من كل قانون او عرف ح يبقوا مواطنيين درجة تانية.

قولي لقريبك ده إنو لو الموضوع كان بالطريقه البتكلم بيها دي لما اعترضنا أصلا : الجنوبيون دفعو أكتر من كم و خمسين سنه من عمرهم مواطنين من الدرجه الألف و ماتو منهم تلاته ملايين عشان يقولو ما دايرين معانا ، لو الموضوع كان - زي ما قريبك مصورو- عباره عن مجموعتين مختلفات عرقيا و دينيا و إتفقو علي الأنفصال لما اعترضنا أصلا .
اعتراضنا ما علي النتائج : اعتراضنا علي الظلم الوصّل للنتائج !

Quote: امريكا فرضت على كل المهاجرين اللغة الانجليزية. ما بيكون عندك جواز لو ما امتحنوك (صح الامتحان بيسيط) لكن بتكون بديت تفك الخط بالنجليزى. حتى القانون مستمد من الدين المسيحى. ما فى تعدد زوجات. حتى لو طبقنا القانون ده فى السودان الموحد. هل انتى شايفه ان من العدل فى شي انك تقولى للجنوبيين غيروا نظامكم الاجتماعى و لغاتكم و حياتكم ? ام انك عاوزه تسثنيهم من القوانيين و تبقيهم مواطنيين درجة تانية? انتهى نقاشنا بقولى انا انى مندهشة من العنصرية الظهرت الان بعد الانفصال من ناس كتار بقولهم انهم ارتاحو من عب الجنوب و وافق صديقى على وجهة نظرى مضيفا : اها نشوفهم هسي ح يعملوا شنو من غير العب, ان شاء الله يعمرو

ياخي والله ليت لنا عدل كعدل أمريكا !!
يا سمارت ياخي الجنوبيين ديل مشكلتهم كانت أكبر من عادات و تقاليد و لغه : مشكلتهم في بلدهم مش ما كانو مواطنين : ما كانو بشر ذاتو !! و كلام الناس البتقول إنو الجنوب كان عبء علي الشمال ما هو إلا تاكيد لكلامي ده !!



------------
لو كنا حقا مسلمين لاغتسلنا من ظلمنا للجنوب و أهله مئات المرات : جميعهم بالتراب !!

حبيبنا عبدالمحسن ، سلام يا صاحب

Quote: الحق معك .. حين اتذكر الماضى تأخذنى الحيرة: لا اصدق ان الحرب كانت تحصد الجنوبيين بالآلاف حتى بلغ الضحايا حسب التقديرات الدولية بين مليون ومليونين .. ولم يكن ذلك يحرك ساكناً عند احد فى الشمال بل كانت الحياة تسير بصورة عادية .. ولكن الخرطوم والمدن الكبرى كانت تثور وتفور كلما جاء خبر عن قتل بضع عشرات او مئات من المسلمين فى البوسنة والهرسك .. أو اعتدى الاسرئيليون على الفلسطينيين فقتل فردين او ثلاثة .. هل هناك اعجب من هذا؟ يقتل الناس بالآلاف ومئات الآلاف داخل بلدك ولا حس ولا خبر، ويقتل خمسين فى البوسنة والهرسك فتنقلب الدنيا..!!!

يا عبدالمحسن ياخي نحن تواطئنا بصمتنا علي ما حدث لاخواننا الجنوبيين : لا أذكر علي الأطلاق أي تجاوب شعبي : لا علي المستوي العام و لا الخاص بقضية الجنوب ، بينما كنا وما - زلنا - نقوم و نقعد في قضايا غيرنا .
الجنوبيين لم يكونو يوما جزء من وجداننا ولا اهتمامنا و عندما قالو وداعا لوطن لم يكن يوما وطن : ذرفنا عليهم دموع التماسيح !!!

Quote: المشكلة لم تكن ثقافتهم او لغتهم المختلفة بل تعاملنا مع هذه الثقافة ونظرتنا الاستعلائية لها ولاصحباها - لم تكن فيهم بل فينا نحن وعدم تقبلنا للاخر في دولة يتساوى فيها الجميع امام القانون..

شكرا يا حسين