أخوي الكبير أنا هاك خدي دوس عليه كان برضيك

أخوي ساتر عرضي وسندي وتكلي في الدنيا وساتر عرضي وسندي معاوية عبيد الصايم

منو العندي غيرك عرضك عرضي والبمسك بمسيني هاك خدي مباح ليك دوس عليه كان ما برضيك برضيني

كان مرق الضفر من اللحم أنت ما بتمرق مني أعفي لي لله والرسول في الألم السببته ليك و لي نفسي في الايام الفاتو والمسامح رب العالمين ودعواتك لي ولي أم حمود ربنا يعافيها

يسلم راسك ووجهك من الدوس ، يا هى المحرية فيك وفى اخوك معاويه ، تعرف ذرية جدكم مسلم انت ومعاويه عمرها ما تخيب ، الله يرضى عليكم دنيا و اخرة .

يازول يسلم خدك ويتبارك

شكرا ليكم انتو الاتنين
الدنيا ضل ضحا كتيرا رايح وقليلا رايح

منذ تداخلي الأول معك أيقنت أنك زول بسيط يا عبدالعزيز
حتي في مشكلتك مع صديقي محي الدين كنت ثقتي تلك لم تبارح مكانها
يا أخي العزيز ماعاش من يمشي علي خد الآخر سوي أنت أو معاوية
الخلافات دي بتحصل لكن العاقل هو من يحاجج الفكرة بالفكرة
أشكر لك هذا المسلك يا أخي وكلي ثقة في معاوية قبول هذا الإعتذار
وليتنا جميعنا نمضي الي حيث ما هو أنفع وما هو أرحب .
أكون سعيداً لو شمل إعتذارك هذا صديقي محي الدين أبكر سليمان
فما ذكرته بحقه أيضاً يستحق الإعتذار .

شكراً يا حبوب

Quote: أخوي ساتر عرضي وسندي وتكلي في الدنيا وساتر عرضي وسندي معاوية عبيد الصايم منو العندي غيرك عرضك عرضي والبمسك بمسيني هاك خدي مباح ليك دوس عليه كان ما برضيك برضيني كان مرق الضفر من اللحم أنت ما بتمرق مني أعفي لي لله والرسول في الألم السببته ليك و لي نفسي في الايام الفاتو والمسامح رب العالمين ودعواتك لي ولي أم حمود ربنا يعافيها

ياخي الله يديك العافية
والله ريحتني جنس راحة
ياخي يسلم خدك ويسلم معاوية


ياخي كتر خيرك وبارك الله فيك



خالص الود

الاخ عبد العزيز حسين عبد الرحيم
اولا امنيات صادقة بعاجل الشفاء للمدام باذن الله يا قربيى
ويازول العفو والعافية لله والرسول وعفا الله عما سلف
وفى النهاية يا قريبى الصراع صراع سياسى وليس شخصى
عموما .............الف كتر الف خيرك ودا من اصلك يا حبيب
ربنا يدى ............ام حمود الصحة والعافية باذن الواحد الاحد
وما نجنيه بعد ذلك من الاعتذار يكون له أثر جميل جدا في حياتنا ،
فنكسب احترامنا لذاتنا إلى جانب احترام الاخرين لنا ، ويكون كجواز مرور لنا
لكسب محبة من يحيطون بنا ولا ننسى أيضا بأنه يبرئ
كل جرح غائر قد وقع فتشيع الألفة والتسامح بين المتصافين .



الرجاء الطلب من بكرى سحب البوست
مع ودى وشكرى لمن جعل ذلك ممكناً


التحية للوطن سودانيز اون لاين .. .قبيلة الجميع

سلامات ياعبدالعزيز
معاوية جنى عليك بإتهام في غير محله ارقك كثيرا
ولما تبين له انك برئ من الإتهام اعتذر لك
قمت انت رفضت اعتذاره ومن حقك طبعا
الحين تطالبه بقبول إعتذارك له
ياخي دي معادلة صعبة لاتشبه ناس في مقامكم
اتمنى معاوية يتقبل منك عشان تطوو الصفحة دي
فائق احترامي ليكم الاثنين

تسلموا تاني

والله بوست يخلي الواحد مايمرق منو اصلو



خالص الود

الاخ عبد العزيز ..والله بقرأ في البوست لمن بكيت ..

ياخ انت ..انسان بكل معاني الاصالة والسماحة والحنية ...ولو ناس سودانيز ديل
عرفوك وشافوك ...مباشرة لحسدونا عليك بالامارات ..

شكرا لادبك وادب خلافكم انت والجميل معاوية ...

وبالمناسبة العلاقات الجميلة يا دوب حتبدا بينكم ...ودا مكسب حقيقي ..فهنيئا لكما
بعلاقة مولودة جديدة ..ودي لحظة ميلاد ...

شكرا لكما وانتم تعلمونا ادبا جديدا ..راقيا
محبتي لكما ...
وياعزو سلامات للمدام الى ان نلتقي

بالجد احساس فخر بمعادن الناس الطيبه
شكرا صديقي معاوية شكرا اخونا عبد العزيز

لم الم بكل تفاصيل خلافكم
ولكن ما قراته الان يدل علي وعي كبير منكم الاثنين

الله يجعل البينكم عامرة دوما

Quote: عموما .............الف كتر الف خيرك ودا من اصلك يا حبيب ربنا يدى ............ام حمود الصحة والعافية باذن الواحد الاحد

الحمدلله والشكر لله



كتر خيركم





اسحب يا ريس

Quote: أخوي ساتر عرضي وسندي وتكلي في الدنيا وساتر عرضي وسندي معاوية عبيد الصايم منو العندي غيرك عرضك عرضي والبمسك بمسيني هاك خدي مباح ليك دوس عليه كان ما برضيك برضيني كان مرق الضفر من اللحم أنت ما بتمرق مني أعفي لي لله والرسول في الألم السببته ليك و لي نفسي في الايام الفاتو والمسامح رب العالمين ودعواتك لي ولي أم حمود ربنا يعافيها

جيد
وعموماً أجمل الخلافات هي التي لا تمتد للأشخاص ويبقى الأمر إختلاف وجهات نظر فقط ولا تؤدي للقطيعة
أبداً

تسلم ياعبدالعزيز وده من اصلك الطيب ...كنت عارف ان المياه حاتعود لمجاريها بينك وبين اخوك معاوية ...وانا اكتر الناس سعادة بذلك ...ياخي الاعتذار ده لايقوى عليه الا من كان قلبه مليئ بالصدق وحب الناس ...وانت كذلك ...بتذكر تماماً اتصالك بي واعتذارك رغم انك ما غلطت في حقي ...زميل لي كان معاى وكت اتصلت على قلت ليهو ده شخص مابينا الا معرفة اسفيرية حس بانه غلط في حقي فتش تلفوني وأتصل في الليل ده عشان يعتذر على ...استغرب جداً وقال كلام طيب عنك ...تسلم ياعبدالعزيز لانك تحمل قيم نادرة واتمنى ان يديم المحبة بينك وبين قريبك وصديقي ...



وربنا يستر علينا من هذه العودة ...عاملين زي الشعبي والوطني ..




ــــــــــــــــــ
يامعاوية الكلام ده مايعني تسيبو في السياسة ...رشو زي ود الباوقة ...

Quote: أعفي لي لله والرسول في الألم السببته ليك و لي نفسي في الايام الفاتو والمسامح رب العالمين

الاخــوين

عبد العزيز حســـين
ومعاوية عبيــــد

ســـــلام .. يااااخ والله كلامك دا يا عبد العزيز كنت متاكد إنك حتقولوا
حتى وإن تاخــرت كنت على يقين من ذلك والحمد لله انك لم تخيب ظني
فأنا قد عرفتك وزاملتك في العديد من المنابر وبالرغم من حدة خطابك
إلا انك انسان ســـوداني أصيل .. وطيب ولكن هي السياسة
فهنيئاً لكم أنت ومعاوية بهذا التصافي معاوية الذي عرفته وعرفته أســرته
عن لا يقل عنك خلقا وكرماً اخي عبد العزيز واتمنى ان يصلح الدهــر ما افسدته السياسة
ملعووووووووووووون ابو الســـياسة يــــااااااخ ولا تعينوا الشيطان عليكم
غايتو يا عبد العزيز كلماتك دي بتديك مؤونة كم عام من الــود

لكم كل الحب

عبدالعزيز ... والله صحي الما بعرفك يجهلك ..

يا اخوانا والله عبدالعزيز ده زول بسيط بصورة ما تتخيلوها ..

انا اول مره اشوفه ... قلته ليهو يازول مالك انت شكال كده ...

واقع فى الناس شليت بالكيبورد بتاعك ..

عبدالعزيز اخو اخوان وسيد حاااره ربنا يحفظه ويحفظ ست بيته يارب ..

ده من اصلكم الاتنين .. والله فرحتونى بالكلام السمح ده ..

للّه درّكما


إن لم تتعثّر خطوتكما


والله يا جماعة الخير

هي السياسة ذاتا

لو اتناولتوها في شكل موزون



قطع شك عندي ليكم بت لبون



أو تختاروا أغنيلكم كيف يهون



فأيهما تختارون؟


أها يا عبد العزيز وأنتم الصائمون؟



ياخي بس إن شاء الله تسلمون


بوست يتوزن بي دهب شيبون




والتحية أيضاً لضيوف البوست

المناضلون في فعل الخير تائبون آيبون


هآآآآناس ما تقولوا آمين

يازول يسلم خدك ويتبارك

شكرا ليكم انتو الاتنين

بدءاً أحيي الزميلين والأخوين على روح التصافي والإخاء التي نود أن تسود في المنبر العام،
وفي كل ربوع الوطن!
لذلك اسمحوا لي بأن أعلق على ما قاله
الأخ معاوية:

Quote: وفى النهاية يا قريبى الصراع صراع سياسى وليس شخصي!

وأقول: من الخطأ أن نفصل بين ما هو سياسي وما هو غير سياسي!
هذا السياسي، يمكن أن ينعكس على غير السياسي كله،
اجتماعياته وأخلاقياته وأي حاجة ، يدخل فيها ويعيث فيها الفساد!
فلذلك ينبغي علينا دائماً أن نؤطر خلافاتنا السياسية، بإطار مجتمعنا
وثقافته وقيمه، قيم الأخوة والترابط والتكاتف!
عندما نفصل السياسي عن الاجتماعي بهذه البساطة، سنفاجأ بأن
السياسي قضى على الأخضر واليابس!
فيجب علينا أيها الأخوة: أن لا نجعل السياسي ينفرد لوحده أبداً!
لنجعله دائماً مؤطراً بقيم مجتمعنا، والقيم الإنسانية الفاضلة!

Quote: أخوي ساتر عرضي وسندي وتكلي في الدنيا وساتر عرضي وسندي معاوية عبيد الصايم منو العندي غيرك عرضك عرضي والبمسك بمسيني هاك خدي مباح ليك دوس عليه كان ما برضيك برضيني

شكرا لقد كتبت لك ان الشخصي مكانة غير المنبر . وهاهو اليوم بشجاعة الرجال تعتذر للاخ معاوية وهو يتسامح عما اصابة فلكم الشكر الاثنين لنرتقي بحواراتناوخلافتنا .

يا لجمال هذا البوست

فله ترفع القبعات

Quote: الرجاء الطلب من بكرى سحب البوست مع ودى وشكرى لمن جعل ذلك ممكناً

التحية لكل من مر من هنا

الاخ عبد العزيز
الرجاء الطلب من بكرى سحب البوست

مع شكرى ودمت

Quote: الاخ عبد العزيز الرجاء الطلب من بكرى سحب البوست

يا معاوية بوستاتكم القديمة ما اتحذفت
وهذا البوست بكل الروح التي به مفترض يبقى
فأرجــو إنكم ما تحذفوه واتركوه نتعلم منو

الاخ عبدالعزيز في البدء تحياتي وصادق امنياتي لام حمود واتنمني لها صادقاً ان تتعافي من كل شر............
ثانياً لا اود الخوض فيما سبق ولكن الحق يقال ياعبدالعزيز الموضوع كما فهمته انا لا يتعلق بخلاف سياسي ولا يحزنون اذ ان الخلاف السياسي وارد في داخل اعضاء الحزب الواحد ولا يمكن ان يقود الي مطعانات شخصية ونبذ وشتائم بهذا القدر من الحدة، وطبيعة التداخل في المنابر الاسفيرية (علي الاقل عندي ) نادراً ما تكون من باب الاتفاق ، لذا ياعبدالعزيز الرجل العزيز الرجاء احتمال الاخر ما امكن ذلك ، ويمكنك تفنيد رأيه ما استطعت دون اللجؤ للعنف اللفظي . ارجو ان تعذرني ان كان في حروفي هذه شي من الاستاذية النصائحية .
ثالثاً اشهد انك انسان طيب ونبيل وقد مسحت من مخيلتي كل الشخصية العنيفة التي رسمتها ببوستك السابق ..........بالمقابل ياعبدالعزيز فان الاخ معاوية انسان طيب ولا يمكنه ان يحمل اي ضغينة .
اشكر لكما هذا المسلك الراقي .