عاوزين نعرس...

لو فضلنا ننتظر لما وضعنا يتحسن..الله اعلم نقدر بعد داك عليهو..
يمين تلتين الشباب هسه..الواحد فيهم لو مشى الدكان وجا راجع نفسو ينقطع

محتاجين ثورة..خصوصا فى السقط ده..
ثورة على المفاهيم البذخية والاستهلاكية القديمة والحالية فى نمط الزواج
ناس تلاتة قدور صندلية ومحلبية..تلاتة ارادب ... غدى .. تلاتة ارادب ... عشا وبرضو نسيبة السجم تقول شوية
سوزكى الشطة وقندرانى الفتة بعد ده مافى داعى ليها..

ثورة على المفاهيم البذخية والاستهلاكية القديمة والحالية فى نمط الزواج
ناس تلاتة قدور صندلية ومحلبية..تلاتة ارادب ... غدى .. تلاتة ارادب ... عشا






ماده المعزبنا ياحبيب
نعمل شنو

يا زول عرس ساي
الحبة ما بتجيك

وابعد من شلل العزابة المتخاذلين

Quote: وابعد من شلل العزابة المتخاذلين

حبابك يااشرف
تعرف المشكلة مافى العزابة..ديل مساكين..
اصحابنا العرسوا اصلو ما شجعونا على الفكرة..ماعارف حسادة منهم
ولا هم جادين وقلبهم علينا؟

Quote: يا زول عرس ساي الحبة ما بتجيك وابعد من شلل العزابة المتخاذلين

والله يامحمد عوض ياخوي أخونا أشرف السر دا عاوز يشيب ليك رأسك ساي

النجيضه أعمل رايح من الموضوع دا بتكون مرتاح البال دي نصيحه من

أخوانا السلكوا الطريق دا قالوا لم يجنوا سوي ذهاب المال وعدم راحه البال .



تحياتي لك ولضيوفك .

ياخ خليكـ رايق


وتاني جاب سِيرة البحر


ــــ

أُناشد بكري يقلع هذا الباسويرد

Quote: لو فضلنا ننتظر لما وضعنا يتحسن..الله اعلم نقدر بعد داك عليهو

محمد سلام ..
ورينا ناقصك شنو ؟
هل المشكلة مادية ولا شنو تحديداً عشان نساعدك* ؟!!









ـــــــــــــــ
*بالنصيحة

Quote: محمد سلام .. ورينا ناقصك شنو ؟ هل المشكلة مادية ولا شنو تحديداً عشان نساعدك* ؟!! ـــــــــــــــ *بالنصيحة

غايتو يا ودالقاضى لو نصيحة زول معرس مافى داعى ليها..بعدين
تعال بشر ساكت كفاية منك..
تحياتى يا ملك..وجد مداخلتك خلتنى اضحك براى زى المجنكس

المشكلة مادية ولا شنو تحديداً عشان نساعدك* ؟!!







المشكله في الاهل من الجانبين

الوليد الرشيد
هلا والله
موش احسن من بدرى..بدرى..

Quote: ياخ خليكـ رايق وتاني جاب سِيرة البحر ــــ أُناشد بكري يقلع هذا الباسويرد

ياابوحميد..سلامات
ياخى انتا الوحيد المتذكرنى كويس وفاكر البوست داك
الروقة دى الا بعد نلم فى البوردابية

نـواصل فى سيرة العرس

الحكاية بسيطة جدا..ماعارف معقدنها كده ليه عندنا..
ايوه اى حاجة طارت السما....
بس الحب موجود..وهو السبب الرئيسى لاستمرار اى حياة زوجية..مستقرة..قبل كل اموال الدنيا
نعم المراة عندنا لا تقدر بثمن..ولكن..الظروف الان وغدا..لا تسمح..الا بالقليل..
لا حوجة للضغط على كل شئ من اجل مظاهر بالية .

أصلو العرس بالفاتحة يا ناس ما حلال ؟؟ حلااااااااااااااال






قلته لي الزومة منضايقي

Quote: أصلو العرس بالفاتحة يا ناس ما حلال ؟؟ حلااااااااااااااال

دى اغنيتى المفضلة ياخى..وقبال كده طلبتها من فنان شاب فى عرس فخخه كده..واصلو
ماغناها لى..

Quote: قلته لي الزومة منضايقي

ضيق شديد الله لاوراك ليهو

تسلم يا مرتضى وشكرا على المرور

ايوة عاوزين نعرس

Quote: الله اعلم نقدر بعد داك عليهو..

نقدر على شنو ؟؟؟؟؟؟؟؟؟؟

Quote: نقدر على شنو ؟؟؟؟؟؟؟؟؟؟

غايتو عندكم اسئلة يا العزابة..
المسئولية يا جمال..ياخ..!!
قالوا الحكاية ده اصلو ما ساهلةوكل ما الزول
كان شباب..بقدر على قطع اشواط الزواج كلها بكل هدوء

بناتنا السمحات و..حبوباتنا وخالاتنا..اريتهم بعد يصحو شوية..ويفهمو الحاصل..
نوعية الراجل البغنو ليهو زى ده..بقت نادرة..زى رجل المستحيل..

Quote: عبولو من كم شهر الدخرى يا صيفى وشتاى.. يا جناى يا غيم المطر ديمه من هاك ما فتر تمساحن حجر البحر... الطامح يا بحر الرضا.. للضيوف النار وقادا والجبال والدو بيسندا..

حاليا الواحد لو قطع كبرى ابوعنجة يكون ما قصروالله.أو جاكم راجع من سوق ستة سليم و نقط ليكم كل شهر نوقطة واحدة..وستر عيالو ومرتو كفاية..
والضيوف ذاتم بقو يجو دقائق يضربو الأستيم...ويتفككو..
الوالد..لا بسند ولا حاجة..ولو جيت قلت ليهو يابا داير مساعدة عشان اعرس..
يقول ليك يا عم روح..انا لما عرستا امك دى مافى زول ادانى تعريفة..

يلا ربنا يسهل للكل..العزابة..بالذات..العندهم زوجات ان شاء الله ما يشوفو غيرهن تانى..
عموما الواحد نفسو كده..لما يكون مساهر..مع صحابو..
يضربو ليهو تلفون..ويمشى بيهو على جنبة كده ويرد..ويوسوس براحه..براحه..
ولا تجى المدام وراهو مشلهتة..وتكورك فيهو هوى مالك اتاخرتا..؟ انا ما بضرب ليك من قبيل والعشا بقا بارد..ياخ..!!
غايتو انا و اخوى الكاشف داك..بنقعد لما يجونا ناس السوراى يطرودنا..يلا قومو امشو اهلكم يا شباب..اصلو مافى زول طارينا..ولا جايب خبرنا..
نرجع نتلصق بالحيط.. ونتحككـ فيها زى الغنم..نشلت فى الحجار..ندخل بيوتنا زى الحرامية..
نتلفت يمين ..شمال..وتعاين لى لمبة الحمام..امكن ابونا يكون صاحى..ويشدنا
لمن نآمن..كنتو وين..وجيتو من ياتو داهية هسه؟

نسيت اقول ليكم
انى قبل يومين سألت المأذون بتاعنا فى الحلة عوض السيد ود الحسين
قلت ليهو هسه الواحد لو داير يجيبك تعقد ليهو بى كم..القسيمة دى؟؟
- بى 150 يا ولدى..بس لو ليك انتا بى مية الف بس..ان شاء الله
- ما بتقصر والله يا عمنا..
- طيب الورقة بتاعة الطلاق بى كم؟
- 80 الف جنيه ..
و كمان قال لى فيها 4 شهور بتدفعا ماعارف لى شنو بالضبط..
ياريت واحد فقيه كده يوضح لينا..ليه تدفع وانتا عاوز تعرس..وعاوز تطلق برضو
تدفع..

محمد اخوي

النديك النصيحة يا اخوي

كــــــده كاااااااااااااااااااك

وكدة ووب


فبالله ما تستعجل علي الامور الملحوقة دي
بعدين تندم



ما تشوف الحركات بتاعت ينادوه للعشاء عشان مايبرد وكده دي جلكسات سااااااااااي

بيكونوا دايرين يرسلوه الدكان يجيب اللبن للاولاد

اسالوا االمجربين ياخي



التعديل منعا للمبالغة

يعني أغنية زكي عبد الكريم " يا ناس العرس بالفاتحة ما حلال" بقت كلام شمار في مرقة,
وبعدبن انا شايفة فايز ود القاضي قال مستعد للمساعدة المادية, ودايرين نصيحة الناس المتزوجين قالوا ليك شنو؟؟

Quote: يعني أغنية زكي عبد الكريم " يا ناس العرس بالفاتحة ما حلال" بقت كلام شمار في مرقة, وبعدبن انا شايفة فايز ود القاضي قال مستعد للمساعدة المادية, ودايرين نصيحة الناس المتزوجين قالوا ليك شنو؟؟

اهلين يا بت السيد
وحمدالله على السلامة..
الناس المتزوجين زى اخونا بكرى ده..يعملو ليك فيها زهاجة..ومعصورين..
حسادة ساكت منهم..بالله اى واحد فيهم يجيك نضيف وريحتو سمحه..وحاضن عيالو وضاحك(ماشاء الله)
وبعد ده كلو يقولو ليك اوع تدقس

عدل
للتكرار

Quote: كــــــده كاااااااااااااااااااك وكدة زووووووووووووووووووط

صباح الحب...
يابكري عباس علي
كاااك واضحة..لكن الزو..التانية بالغت فيها يا حبيب

Quote: ياابوحميد..سلامات ياخى انتا الوحيد المتذكرنى كويس وفاكر البوست داك الروقة دى الا بعد نلم فى البوردابية

أهلين يا عريس

عايز أقول ليكـ حاجة ياخ:

كُلنا هذا الرجل

عشان كدا شغال ليكـ روِّق يا بُرعي

ـــــــ

العزوبية حرية بايخة*


*مثل لزول عايز يعرس

محمد عوض احمد

سلام

غايتو ما عارف لو نصيحتي دي بتفيدك!

لكن,

يا زول اربط نصك و كلم ناسك,

صدقني الحكاية تتم في رمشة عين,

لكن بعد داك, you are on your own

او كما يقال, تاكل نارك!


--
اوعى اكون جهجهتك!!!!!

Quote: محمد عوض احمد سلام غايتو ما عارف لو نصيحتي دي بتفيدك! لكن, يا زول اربط نصك و كلم ناسك, صدقني الحكاية تتم في رمشة عين, لكن بعد داك, you are on your own او كما يقال, تاكل نارك! -- اوعى اكون جهجهتك!!!!!

يابدر
تسلم كتير..وجيدن جيت..
ونار اكتر من العزوبية مافى..بعد ده على قولك نربط اى حاجة ونتوكل على الحى الذى لايموت
انا بعرف ناس جابو الطفل التانى ولسه بدفعو فى اقساط العفش وغرفة النوم..وامورهم ماشه
تمام التمام..

يا محمد عوض ..
جننتنا جن في البرد ده
هسي يعني نشتغل ولا نفكر في العرس ولا نسوي ............... شنو

و نلعق الجراح ..... ولا ننكأ الحزن

.............(وش مربوط فيه هلال عرس) ....

Quote: يا محمد عوض .. جننتنا جن في البرد ده هسي يعني نشتغل ولا نفكر في العرس ولا نسوي ............... شنو و نلعق الجراح ..... ولا ننكأ الحزن .............(وش مربوط فيه هلال عرس) ....

ود الحاج..حبابك يادفعة..
يازول الحق..وخليك من بكره..
اولادك هم بس بعدين البشدو حيلكـ..
وبعد العرس اى جرح تلقائيا بلتئم..اى حاجة فيك بتزيد حتى وزنك
ذاتو بزيد..

Quote: أهلين يا عريس عايز أقول ليكـ حاجة ياخ: كُلنا هذا الرجل عشان كدا شغال ليكـ روِّق يا بُرعي ـــــــ العزوبية حرية بايخة* *مثل لزول عايز يعرس

ياحمادة
برعى ده لكن ماقال الروب وتعب عديل كده..
اصبحنا نخشى الفتنة ياخ

سلام

يا محمد اخوي

انت في نعيم
كدا ناضل لينا شوية بعدين تعال للشغلانة المهببة دي



تحياتي

Quote: سلام يا محمد اخوي انت في نعيم كدا ناضل لينا شوية بعدين تعال للشغلانة المهببة دي تحياتي

مراحب يا اخى الكريم عبدالعزيز
اناضل وين..ولى شنو..وعشان منو..؟
مسألة العمل الجماعى انتهت فى السودان قبل سنين..اى زول حسه
شايت براهو..واخوك بصراحة كده ماليهو فى السياسه كتير..
انا زول عرس ساكت..

يا زول مالك مسخن كدة...
كان داير نصيحتي ...خليك كدة.... لا حصة فطور لا دفتر حضور.
خذوا الحكمة من أفواه المتزوجين...(مثل)
قيل و(العهدة علي الراوي) أن جحا سئل عن رأيه في هذا الامر عقب زواجه بمدة فقال...لعن الله الذين تزوجوا من قبلي والذين تزوجوا من بعدي...فقيل له ما ذنبهم؟ فقال( الذين تزوجوا من قبلي لم ينصحوني ..والذين تزوجوا من بعدي نصحتهم فلم يستمعوا لنصيحتي).
دحين يا خوي علشان ما تلعنا بعدين زي جحا ده ترانا اديناك النصيحة بي قولو.
(لكن تحت تحت كدة كان لميت في البوردابية ديك ... عرس ساي الحبة دي ما بتجيك).

يا زول إتوكل على الله وعرس

عشان بعدين نقول ليك الجاتك فى مالك سامحتك

Quote: مراحب يا اخى الكريم عبدالعزيز اناضل وين..ولى شنو..وعشان منو..؟ مسألة العمل الجماعى انتهت فى السودان قبل سنين..اى زول حسه شايت براهو..واخوك بصراحة كده ماليهو فى السياسه كتير.. انا زول عرس ساكت..

ياخوي محمد


الأشياء دي مترابطة...
شفت براك زيادة البنزين دي عملت شنو في كل جوانب الحياة..
كلنا مالينا في السياسة.. بس عايزين نعيش مرتاحين ومكرمين والواحد يعرف انه انسان ليهو حقوق وواجبات..

تعرف يا أخي انا للحظة هذه بشوف الشئ الحصل في تونس ده زي الحلم.. وكنت على ثقة تامة بأنهم آخر من يثور من بين شعوب العالم..

خلاص.. ما أخرمج ليك البوست ده..
بس كلام صحبي العامري ما تسمعه.. وتتورط.. وتفقد مالك عشان يقول ليك العبارة التجاملية دي...
شفت الناس الغنوا لينا أسمر جميل ديل بيدوك من طرف, بس تتخارج بيها..
ولو سوريا بعيدة.. أترك أهليك ذات مساء وترنح برا حتى تصل أهلنا الحلوين الأمهرا..
ولو وصلتنا هنا.. تعرس واحدة وتأخد أختها هوادة..



مودتي

الاخ مُحَمَّدٍ عِوَضٌ احْمَدُ

سلام كتييير

Quote: لو فضلنا ننتظر لما وضعنا يتحسن..الله اعلم نقدر بعد داك عليهو.. يمين تلتين الشباب هسه..الواحد فيهم لو مشى الدكان وجا راجع نفسو ينقطع

ياخوي و الله دي حالة اخير منها العرس عديل

الاخ بكري عباس على

Quote: ما تشوف الحركات بتاعت ينادوه للعشاء عشان مايبرد وكده دي جلكسات سااااااااااي بيكونوا دايرين يرسلوه الدكان يجيب اللبن للاولاد اسالوا االمجربين ياخي

ياخي و الله ضحكتني ضحك ..... قلت لى الما عارف يقول عدس ... اضحك الله سنك

الاخ Abdlaziz Eisa

سلامات

Quote: ولو وصلتنا هنا.. تعرس واحدة وتأخد أختها هوادة..

اها انتوا وييين يا نا الجاينكم ....... طوالى العنوان و الذي منه على الايميل
بس الناس الوراهم كوم لحم زينا كدة برضوا بدوهم الهوادة

adam alamar
حبابك آلاف..

Quote: اها انتوا وييين يا نا الجاينكم ....... طوالى العنوان و الذي منه على الايميل بس الناس الوراهم كوم لحم زينا كدة برضوا بدوهم الهوادة

طبعا فى اول البوست ده قلت الناس العندهم زوجات ان شاء الله ما يشوفوا غيرهم..
فـ شنو الله يحفظ ليك عيالك ديل وابقى عشرة على الحب الاول ياخ..

Abdlaziz Eisa
حبابك من تانى..

Quote: الأشياء دي مترابطة... شفت براك زيادة البنزين دي عملت شنو في كل جوانب الحياة.. كلنا مالينا في السياسة.. بس عايزين نعيش مرتاحين ومكرمين والواحد يعرف انه انسان ليهو حقوق وواجبات.. تعرف يا أخي انا للحظة هذه بشوف الشئ الحصل في تونس ده زي الحلم.. وكنت على ثقة تامة بأنهم آخر من يثور من بين شعوب العالم..

الاشياء مترابطة نعم..والزيادات كانت خطأ ايضا..ولكن خطوات الاحتجاج..
سيكون لها ضحايا ايضا..لدى اصدقاء (خريجين جامعيين) يخدمون فى محلات بسيطة
فى وسط السوق العربى..اصبحو يخشون من قيام اى اضطراب خوفا على بضاعتهم التى
لا تساوى الكثير..من الذى يضمن لنا فى حالة التظاهر عدم الفوضى؟

Quote: بس كلام صحبي العامري ما تسمعه.. وتتورط.. وتفقد مالك عشان يقول ليك العبارة التجاملية دي... شفت الناس الغنوا لينا أسمر جميل ديل بيدوك من طرف, بس تتخارج بيها.. ولو سوريا بعيدة.. أترك أهليك ذات مساء وترنح برا حتى تصل أهلنا الحلوين الأمهرا.. ولو وصلتنا هنا.. تعرس واحدة وتأخد أختها هوادة

والله يا عمك ايوه ديك لونهم كمان ابيض جميل ..بس طقوس السودانية الجمالية..دييييييييك
ما بقدرن عليها.. بعدين بناتنا سمحات..وانوثتهن ذاتا ممزوجة بى ضكرنة عجيبة..وصبرهن
ماليهو حد..

Quote: يا زول إتوكل على الله وعرس عشان بعدين نقول ليك الجاتك فى مالك سامحتك

الطيب العامرى
مساء النور..
هو وينو المال..؟
العندو قروش ما بسويلو بوست بعرس طوالى

Quote: يا زول مالك مسخن كدة... كان داير نصيحتي ...خليك كدة.... لا حصة فطور لا دفتر حضور. خذوا الحكمة من أفواه المتزوجين...(مثل) قيل و(العهدة علي الراوي) أن جحا سئل عن رأيه في هذا الامر عقب زواجه بمدة فقال...لعن الله الذين تزوجوا من قبلي والذين تزوجوا من بعدي...فقيل له ما ذنبهم؟ فقال( الذين تزوجوا من قبلي لم ينصحوني ..والذين تزوجوا من بعدي نصحتهم فلم يستمعوا لنصيحتي). دحين يا خوي علشان ما تلعنا بعدين زي جحا ده ترانا اديناك النصيحة بي قولو. (لكن تحت تحت كدة كان لميت في البوردابية ديك ... عرس ساي الحبة دي ما بتجيك).

ابوبكر قسومة.. سلامات يا حبوب
والله حكاية جحا عجيبة مرة واحدة...
ان شاء الله البوردابية تسمع..وتجى راجعة بس..

يا واخد القرد على ماله يروح المال ويفضل القرد على حاله
==============
في عهد وصل فيه سعر جرام الذهب إلى مبلغ كان يكفي لشراء عشرة جرامات قبل عشرين عاماً

ووصلت فيه مستويات الأجور إلى الحضيض وارتفعت فيه تكاليف المعيشة إلى السماء .....


هل ستفهم الفتاة السودانية ......... أن ما تطلبه مستحيل ؟


لماذا تمكنت الهندية والفلبينية والسيلانية والإنجليزية والأوربية والآسيوية والأفريقية من فهم هذا الواقع وبناء حياتها عليه

وفشلت السودانية في كل شيء إلا تخذيل من يريد الزواج بها

هلا يا هانى..
ومداخلة قوية بلا شك..

Quote: في عهد وصل فيه سعر جرام الذهب إلى مبلغ كان يكفي لشراء عشرة جرامات قبل عشرين عاماً ووصلت فيه مستويات الأجور إلى الحضيض وارتفعت فيه تكاليف المعيشة إلى السماء ..... هل ستفهم الفتاة السودانية ......... أن ما تطلبه مستحيل ؟

المشكلة ايضا فى الشاب السودانى..الذى يخشى ان يخطو خطوة واحدة جادة نحو البداية
يعنى ممكن تلقا زول بحب ليهو عشرة او خمسة سنوات..والبت كل يوم تحنس فيهو تعال لى ابوى
تعاااااال..وهو يقول ليها اجى بى شنو انا ماعندى..حاجة..! الشباب ذاتهم بقو بتاعين فشخرة
عاوز يعرس فى صالة..وعاوز ..وعاوز..وكمان اخيرا بقا فيها عتالة يشيلو العروس...
البعرفو انو لسه فى رجال..ولو جيت دقيت بابهم اصلو ما بشترطو عليك..المهم تكون شغال..
وعندك البستر حالك..وحال بتهم..يدوك ليها..ومعاها بوسة كمان

Quote: لماذا تمكنت الهندية والفلبينية والسيلانية والإنجليزية والأوربية والآسيوية والأفريقية من فهم هذا الواقع وبناء حياتها عليه وفشلت السودانية في كل شيء إلا تخذيل من يريد الزواج بها

هذا سؤال كبير..وفى انتظار تعليقات من بنات حواء..؟
عموما انا اتفق معاك تماما..هنا..
تحياتى وشكرا..لك على اثراء الموضوع..بهذا الطرح الجميل

خلال الفترة من 2002 إلى 2004 كنا في زيارات متواصلة للهند بغرض الدراسة ....

خلال زيارتنا لمدينة حيدر اباد في 2003 تعرّف زميلنا (م) على فتاة هندية .... ثم زار منزل أهلها ..... وتعرف عليهم وأعجب باخلاقهم .....

تزوج (م) ...... وكلّف زواجه مبلغاً لا يكفي لعزومة في مطعم في الخرطوم ...... وجلب معه بعض الهدايا للعروس (نظام شيلة) ... رفض والد العروس استلام الهدية وقال للعريس ان ذلك سيعلم البنت الجشع ووصاه بأن يحتفظ بالهدية ويعطيها للبنت على دفعات متقطعة .....

بدأ (م) حياته في شقة مؤجرة في مدينة بونا ..... وخلال سنوات امتلك منزلاً في نفس المدينة وأسس شركة لمبيعات المحركات وحقق أرباحاً جيدة ..... ورزقه الله الذرية الصالحة من حبيبته الهندية الجميلة .....

بدأ (م) بلا شيء.... وكانت زوجته خير عون له في تسيير أعماله وفي تنظيم حساباته وفي ضبط أموره كلها .....

الاخ محمد سلامات,

ما تمشي يمين وشمال تعال انا اديك عروس جاهزة باولادها كمان. ها ها ها ...

والله بوست رائع وسط هذا الكم من القرف الحاصل.

طبعا الزواج في السودان اصبح كله مظاهر في مظاهر. لو وجدت بنت الحلال القنوعه فتوكل علي الله.

اتمني لك التوفيق.

اخونا ياسر منور البوست ياحبيب

Quote: ما تمشي يمين وشمال تعال انا اديك عروس جاهزة باولادها كمان. ها ها ها

طبعا مافيها حاجة..ممكن عادى الواحد يتزوج مطلقة..بس بى عيالها دى صعبة شوية..
لأنك لن تضمن معاملتهم بشكل متساوى مع اخوانهم الجدد..لاحقا

Quote: والله بوست رائع وسط هذا الكم من القرف الحاصل. طبعا الزواج في السودان اصبح كله مظاهر في مظاهر. لو وجدت بنت الحلال القنوعه فتوكل علي الله. اتمني لك التوفيق.

طبعا الزمن ده عشان تلقا بت الحلال لازمن تبقا انتا ود حرام ومقرم..

Quote: خلال الفترة من 2002 إلى 2004 كنا في زيارات متواصلة للهند بغرض الدراسة .... خلال زيارتنا لمدينة حيدر اباد في 2003 تعرّف زميلنا (م) على فتاة هندية .... ثم زار منزل أهلها ..... وتعرف عليهم وأعجب باخلاقهم ..... تزوج (م) ...... وكلّف زواجه مبلغاً لا يكفي لعزومة في مطعم في الخرطوم ...... وجلب معه بعض الهدايا للعروس (نظام شيلة) ... رفض والد العروس استلام الهدية وقال للعريس ان ذلك سيعلم البنت الجشع ووصاه بأن يحتفظ بالهدية ويعطيها للبنت على دفعات متقطعة ..... بدأ (م) حياته في شقة مؤجرة في مدينة بونا ..... وخلال عشرة سنوات امتلك منزلاً في نفس المدينة وأسس شركة لمبيعات المحركات وحقق أرباحاً جيدة ..... ورزقه الله الذرية الصالحة من حبيبته الهندية الجميلة ..... بدأ (م) بلا شيء.... وكانت زوجته خير عون له في تسيير أعماله وفي تنظيم حساباته وفي ضبط أموره كلها .....

حكمة الاب الهندى..وجمال البنت..وشجاعة ولدنا (م)..ربنا يحفظو ويزيدو كمان..
قصة اتمنى ان تقراء بشكل جيد من حلاوتنا الوطنية..
غايتو بالطريقة دى..ح نجى الهند..ياهانى..

لماذا تمكنت الهندية والفلبينية والسيلانية والإنجليزية والأوربية والآسيوية والأفريقية من فهم هذا الواقع وبناء حياتها عليه

وفشلت السودانية في كل شيء إلا تخذيل من يريد الزواج بها
<<<<<<<<<<<<<<<<<<]
عزيزي هاني عربي
المشكلة ما في البنت السودانية لكن المشكلة في الشاب السوداني وهو الذي يريد أن يكون حفل زواجه حفل فخيم ويتحدث به الناس ومعظم الأسر السودانية تريد الشاب المستقيم والمسؤول زوجا لبنتها ودون فرض أي شروط تتعلق بالمهر وحفل الزواج ولكن الشاب هو الذي يصر على ان يكون زواجه مناسبة لا تنسي والمشكلة هي انه وبعد ان يصرف كل هذا الصرف في هذا الزواج الذي يحمل عناصر فشله منذ بدايته ينتهي بسرعة ويتم الطلاق بأسباب واهية جدا.. وعشان كدة يا هاني ما ترمي اللوم كله على البنت السودانية فمعظم البنات السودانيات قنوعات جدا و لا يبحثن عن الفشخرة والفخفخة وخاصة فيما يتعلق بالزواج .. نعم ربما تكون هناك فتيات يبحثن عن تلك الأبهة والفخفخة في العرس ولكنهن قليلات ولا يشكلن أغلبية وفي كل مجتمع أمثلة سيئة،،
أظن شباب اليوم هو الذي غير نظرة الزواج من مؤسسة تربوية ناجحة تهدف لبناء أسرة سعيدة إلى مؤسسة فاشلة تقوم على الفخفخة والفشخرة التي لا تدوم مع هذا الزمن القاسي .
والله يديك العافية

Quote: الاخ Abdlaziz Eisa سلامات Quote: ولو وصلتنا هنا.. تعرس واحدة وتأخد أختها هوادة.. اها انتوا وييين يا نا الجاينكم ....... طوالى العنوان و الذي منه على الايميل بس الناس الوراهم كوم لحم زينا كدة برضوا بدوهم الهوادة

العزيز/ adam alamar

ياخي كدا اصبر لينا شوية وخلينا نصل لحل مع حبيبنا محمد عوض ده ياخ..
الزول ده ما عايزين يفك آخره إلا على النجيضة...
الناي القصار ديل لي قدام رغم ضيافتهم لينا الجميلة...


مودتي

Quote: لاشياء مترابطة نعم..والزيادات كانت خطأ ايضا..ولكن خطوات الاحتجاج.. سيكون لها ضحايا ايضا..لدى اصدقاء (خريجين جامعيين) يخدمون فى محلات بسيطة فى وسط السوق العربى..اصبحو يخشون من قيام اى اضطراب خوفا على بضاعتهم التى لا تساوى الكثير..من الذى يضمن لنا فى حالة التظاهر عدم الفوضى؟ Quote: والله يا عمك ايوه ديك لونهم كمان ابيض جميل ..بس طقوس السودانية الجمالية..دييييييييك ما بقدرن عليها.. بعدين بناتنا سمحات..وانوثتهن ذاتا ممزوجة بى ضكرنة عجيبة..وصبرهن ماليهو حد..

عزيزي/ محمد عوض

الثورة والفوضى بينهم خيط رفيع... فأهل الغرض الخاص يزيدون الطوم ولكن همهم في الفوضى طبعا.. ويترصون لكل سانحة...
في مارس/ أبريل 1985م نطلع المظاهرات وبعض الطفيليين كسروا غرفنا ودواليبنا في الداخليات ونهبوا كل شئ..
لما الإنتفاضة نجحت نسينا الحسرة على ما فقدناه..

ياخوي الجمال ليس باللون, ولا في البياض,, الفيتشر السودانية أحلى... لكن الطقوس السودانية تغيرت في الكواليتي.. وبنات الألفية الجديدة باقي ليك بيعرفن (الكبريت.)..
ما كبريت النار!!!
انت طلعت من الشرك.. لكن اوقعت نفسك:(.وانوثتهن ذاتا ممزوجة بى ضكرنة عجيبة) أها أركز في كلامك مع أميرة وداليا..


تحياتي

كامل تضامني مع الأخ مُحَمَّدٍ عِوَضٌ احْمَدُ

وخاصة في الشتاء



ــــــــــــ
يا عمّك اسمك دة إلاّ نسختو ولصقتو
ذكّرني المصحف الشريف

Quote: كامل تضامني مع الأخ مُحَمَّدٍ عِوَضٌ احْمَدُ وخاصة في الشتاء ــــــــــــ يا عمّك اسمك دة إلاّ نسختو ولصقتو ذكّرني المصحف الشريف

الأخ العزيز \صبرى
شكرا للمساندة..وفى السقط ده اهم مصدر الحرارة ..
دفء الزوجة والابناء
الله يدينا بس
__________
طبعا حكاية اسمى دى دايرة بوست..براهو..
طبعا هو غلط..فى التشكيل..من تحت لى فوق..
ولما رسلت لى الاخ بكرى قلت النجرب حكاية قوقل دى..ونتفلهم شوية كده
ولم اتوقع ان يقبل طلبى..للأنضمام بهذه السرعة..اها بعد ده الفاس وقعت فى الراس ولا اعتقد ان هناك مجال
لتغيير الاخطاء او الاسم..لو فى طريقة كلمونا..واتوسطو لينا عند الريس

سلامات يا عبدالعزيز
غايتو اصلو ما قصرت ما اخوك..الله يديك العافية..شوف لينا النجيضةبسرعة
قبل تبرد..ونبرد احنا ذاتو

Quote: الزول ده ما عايزين يفك آخره إلا على النجيضة...

Quote: الثورة والفوضى بينهم خيط رفيع... فأهل الغرض الخاص يزيدون الطوم ولكن همهم في الفوضى طبعا.. ويترصون لكل سانحة... في مارس/ أبريل 1985م نطلع المظاهرات وبعض الطفيليين كسروا غرفنا ودواليبنا في الداخليات ونهبوا كل شئ.. لما الإنتفاضة نجحت نسينا الحسرة على ما فقدناه

يا اخى الكريم.. زمانكم غير..هذا ..
من سيطلع المظاهرات الان واغلب الشباب دفعتهم الظروف للأنضمام للشرطة او الامن نفسه؟
لو حدث شئ..فى هذه الظروف فاخشى ان تكون مواجهة..كبرى..بين فئات الشعب المؤيدة والمعارضة للنظام..

Quote: ياخوي الجمال ليس باللون, ولا في البياض,, الفيتشر السودانية أحلى... لكن الطقوس السودانية تغيرت في الكواليتي.. وبنات الألفية الجديدة باقي ليك بيعرفن (الكبريت.).. ما كبريت النار!!! انت طلعت من الشرك.. لكن اوقعت نفسك:(.وانوثتهن ذاتا ممزوجة بى ضكرنة عجيبة) أها أركز في كلامك مع أميرة وداليا.. تحياتي

الاغنية بتاعة خليل فرح .. (عزة) حتى بعد ما رددتا فى عهد الحداثة ..نانسى عجاج
انتى يا الكبرتوك البنات فاتوكـ..ياكافى البلا اصلن ما سمعن بيها..؟
الضكرنة دى شكلى دقست فيها فعلا ..دقيقة هسه بشوف
ليها مخارجة

Quote: ومعظم الأسر السودانية تريد الشاب المستقيم والمسؤول زوجا لبنتها ودون فرض أي شروط تتعلق بالمهر وحفل الزواج ولكن الشاب هو الذي يصر على ان يكون زواجه مناسبة لا تنسي والمشكلة هي انه وبعد ان يصرف كل هذا الصرف في هذا الزواج الذي يحمل عناصر فشله منذ بدايته ينتهي بسرعة ويتم الطلاق بأسباب واهية جدا

مرحب بيكى يا بت السيد
ويلا يا اخونا هانى شد حيلكـ..وتعال راجع
ويا اميرة..حقو اى واحد بصراحة كده يشوف الناس المن توبو..لا اريد القول بان المجتمع السودانى اصبح مجتمع طبقى..
لكن هناك اباء يقدمون لبناتهم..ما لا يستطيع الف زوج القيام به لهن..عشان كده احسن حاجة الزول ما يتشالق..فقران..وعدمان
يشوف شبهو..والمولى ما بقبحو..!! ..

اختنا اميرة

ازيك

Quote: المشكلة ما في البنت السودانية لكن المشكلة في الشاب السوداني وهو الذي يريد أن يكون حفل زواجه حفل فخيم ويتحدث به الناس

بس في الحتة الفوق دي انا شايف انك عكستي الاية علي حسب مشاهداتنا المتواضعة نجد ان البنت واهلها هم من يطلبوا ان يكون الزواج بمظاهر مكلفة وزي بنات الناس التانيين لانهم ما دافعين حاجة والعريس لانو هو البدفع فمن مصلحته انه الزواج يكون مبسط وباقل تكاليف حتي ولو كان يملك المال فبالتالي مافي زول عاقل ببعذق قروشو في المظاهر الكذابة


ولا رايك شنو ؟

الابن محمد عوض
ابنائى العزابة
نصيحة لكم .. مْن اراد منكم الزواج فعليه بكرة القدم .. فهى آملكم فى الحصول على " الباع " .. اى المهر !
كل المطلوب :
صلح لياقتك ..
بطل السجائر و التمباك و السهر ..
ابتعد عن الجكس و ما شابهه ..
ما ضرورى تكون بتعرف تثبت الكورة او تحاور او تشوت بين الخشبات
اللعب بالرأس .. فى اى اتجاه مقبول
ان تكون " قندف " فى لعبك .. يعنى تلعب بالكعب .. بالركبة ممكن ..
اهم حاجة .. تشوف جماعة من اصحابك يعملوا ليك دعاية .. من نوع :
يا زوووول دا منقطا .. شوتو ليها صوت .. يحاورك فى فنجان .. تقول لى " ميسى " ؟
اما اذا كان لاحدكم صديق فى صحيفة رياضية .. فقد ضمن عرس مدنكل .. و ترباس يغنى ليه .. انت المهم !!
اما اذا كان لك معرفة لاحد سماسرة اللاعبين - مكتشف لاعبين - .. فقد عرست و ضمنت الشقه و السيارة – طبعا كلو بحقو - وبارك الله فى منْ نفع و استنفع !!
كان ما مصدقينى .. ارجعوا شوفوا مباريات الفريق القومى الاخيرة .. عليكم الله انتو ما احسن من كل الذين مثلونا فى دورة حوض النيل الاخيرة بالقاهرة .. و طيب !!
عليكم بكرة القدم .. ففيها خلاصكم .. و .. أملكم فى ضم " حنانكم " الى صدوركم !!

اها .. قصرت معاكم ؟

Quote: صلح لياقتك .. بطل السجائر و التمباك و السهر .. ابتعد عن الجكس و ما شابهه .. ما ضرورى تكون بتعرف تثبت الكورة او تحاور او تشوت بين الخشبات اللعب بالرأس .. فى اى اتجاه مقبول ..

الاخ \ يوسف محمد يوسف
مرحب بيك..
بى امانه كده نصايحك سمحة بالحيل..كلو ممكن نخليهو الا السهر ده..
بعدين الكورة دى تانى الا نشتغل فى الادارة بس..خلاص..اخوك بعدده قرب
لى عمر العجب..بدينا نحسب بعد التلاتين..حليلنا..!!

Quote: يا اخى الكريم.. زمانكم غير..هذا .. من سيطلع المظاهرات الان واغلب الشباب دفعتهم الظروف للأنضمام للشرطة او الامن نفسه؟ لو حدث شئ..فى هذه الظروف فاخشى ان تكون مواجهة..كبرى..بين فئات الشعب المؤيدة والمعارضة للنظام.. Quote الاغنية بتاعة خليل فرح .. (عزة) حتى بعد ما رددتا فى عهد الحداثة ..نانسى عجاج انتى يا الكبرتوك البنات فاتوكـ..ياكافى البلا اصلن ما سمعن بيها..؟ الضكرنة دى شكلى دقست فيها فعلا ..دقيقة هسه بشوف ليها مخارجة

عزيزي/ محمد عوض


ياخوي النجيضة في الطريق.. وكل شئ يتيسر ان شاء الله..

ما عايز اتكلم كثير في السياسة عشان البوست غير...

بس شئ بسيط... التوانسة زي ما قلت لك من قبل, هم للبلة ما مصدقين بن علي راح.... ونحن عندنا رصيد تاريخي... عندنا ساس.. أهلها وأكثر..
المهم............

المكبرتة دي شئ تاني...
ياخي اخواتنا في المنبر بقينا نعمل ليهن ألف حساب..
حواء السودانية حقها محفوظ..
لكن الضكرنة دي أمسك فيها ملوص واتخارج..

لك مودتي

Abdlaziz Eisa
مساء النور..والحوار معك ممتع.. وان كان هناك بعض الاختلاف فى الرؤى السياسه
لكن الحمدلله شكلنا متفقين فى حكاية العرس دى..

Quote: المكبرتة دي شئ تاني... ياخي اخواتنا في المنبر بقينا نعمل ليهن ألف حساب.. حواء السودانية حقها محفوظ.. لكن الضكرنة دي أمسك فيها ملوص واتخارج..

قصة الكبريت عاوزة شرح..بشكل اوضح..لو كان مافيها حاجة يعنى..!
الضكرنة دى..اخوك ماسك فيها..ماعارف ليه..كل ما اتكيف شديد من موقف لأى انسانه اعرفها
طوالى اقول براى والله دى بت ضكرة خلاص..غايتو ما اظن فيها ريحة تمييز..

Quote: ورينا ناقصك شنو ؟

لميت كم سوفار?

لكن هناك اباء يقدمون لبناتهم..ما لا يستطيع الف زوج القيام به لهن..عشان كده احسن حاجة الزول ما يتشالق..فقران..وعدمان
يشوف شبهو..والمولى ما بقبحو..!
>>>>>>>>>>>>>>>>>>>>>>>>>
أظن يا محمد كلامك الفوق ده يمكن يكون في محله.. لكن أنا بعرف بنات مليونيرات وولدوهن وهن بيكلن بمعلقة ذهب وتزوجن من افقر خلق الله لأن لحب يسمو فوق المادة لأن الحب روح ومعنى والمادة تعتبر أصنام هذا العصر الذي يعبده البعض.. يعني مقولتك دي ما بتنطبق على كل بنات المليونيرات، وخاصة لمتعلمات فقد تمردن على الفخفخة والفشخرة

عزيزي بكري عباس
أظنك بتقصد شباب زمان ،اصبحت حكاويهم روايات في التاريخ المعاصر , حيث كان الشاب لا تهمه المظاهر الخداعة ويفكر فقط في بناء أسرة سعيدة يفتخر بها ولكننا نسمع أن شباب اليوم لا يفكر في الزواج ليس بسبب النقص في المادة ولكن بسبب عدم رغبته في تحمل مسؤولية اسرة ويريد حياة سهلة بدون مسؤوليات .. زانا بأكد ليك ان بنات مليونيرات يتمنين في هذه اللحظة التي اكتب فيها أن يتزوجن بأي عريس حتى ولو لم تكن معه شق تمرة.. بس المهم العريس يكون جاد ويتحمل مسؤولية التربية ومسؤولية بناء اسرة..

Quote: أظن يا محمد كلامك الفوق ده يمكن يكون في محله.. لكن أنا بعرف بنات مليونيرات وولدوهن وهن بيكلن بمعلقة ذهب وتزوجن من افقر خلق الله لأن لحب يسمو فوق المادة لأن الحب روح ومعنى والمادة تعتبر أصنام هذا العصر الذي يعبده البعض.. يعني مقولتك دي ما بتنطبق على كل بنات المليونيرات، وخاصة لمتعلمات فقد تمردن على الفخفخة والفشخرة

هلا يابت السيد..
دى حالات نادرة شديد..انا شخصيا ما شايف فيها حاجة..ولو لقيت مليونيرة متمردة بشتغل معاها اول
وبعد داك بعرسا..المشكلة بالضبط فى خوف السودانى من الزواج من امراة ثرية..خوفا من القيل..
والقال..للأسف خشية البعض للناس اصبحت اكثر من خالقهم فى عالمنا..الان..نتوقف عن القيام
بالكثير من اجل قطع تلك الالسنة الطويلة..اعرف ايضا شخصية لم يمكنها ابدا التقدم لتلك
البنت من الاسرة الثرية المعروفة..وهى نفسها لم تستطع ابدا اخبار اهلها انها
على علاقة بى زول رويحتو طالعة..لحدى ماالحب ياهو راح فى خبر كان..وتزوجت
بشكل تقليدى..من احد الكبار..

يا بنات حوا هوي الأولاد ديل ما يغشوكم.......نأكلها بي عيش حاف .....واهم حاجه نكون مع بعض..........والحب يعمل المعجزات......وابني عشك يا قماري.....كووووووولو ما نافع...ابقي بت نجييييييضه ...يجيب ليك كلو شي بالدرزن....حتي الكونتاكت لينز 2درزن الفساتين.....درزن فساتين سواريه والشوز شتويه(boots)وصيفيه وما تنسي جزم الspring...بعدين الدهب ده بقي موضع قديمه لازم يجيب ليك مجوهرات من( كارييه)وخاتم الزواج ده طبعاً حاجه تانيه.....الشنط قوشي طبعاً ....وزياره خاصه لي فكتوريا سكريت وما تكتري عليه شديد لانه لسه تكاليف شهر العسل ...أنا بقترح ليك هاواي اسبوعين والاسبوعين التانيين في االكاريبي(مش قلتو شهر )ولو جاب ليك عربيه هديه ما ترفضيها لكن اقبليها بي خجل عشان ما يقول انتي طماعه لكن ده برضه ما ح يعفيه من المؤخر يكون 100 الف دولار................ بس......ومن لم يستطع عليه بالصوم .

عبدالعزيز الفاضلابى
>
سلام..
سيد الفاضلابى(ناس بحرى) اخوكـ؟

المشكلة في الشاب السوداني وهو الذي يريد أن يكون حفل زواجه حفل فخيم









حسي يااميرة يااختي عليك النبي اي واحده لوجيت ليها ولي اهلها
وقلت ليها بديك 5مليبون ج بالقديم وبسكنك براك وبوديك شهرعسل وين ووين وخلي اهلك يجو يشوفو العريس ابوخمسه
بتقبل

المحترمة أميرة

شكراً على مداخلتك .......

يتقاسم الشاب والفتاة والمجتمع المسئولية ........ لكن كثيراً ما تكون المسئولية على الفتاة واهلها .....


في البداية وقبل الخطوبة تكون كل التسهيلات أمام الشاب ..... ويا ولدي ما عايزين حاجة ...... ويا ولدي عايزين السترة للبت


بعد الخطوبة تبدأ الآفات في الظهور نساء كبار من قريبات العروس وووووو

وعشان العادات والتقاليد


وامي قالت دي ناقصة

وخالتي قالت دي ما جابوها


وعمتي قالت دي شوية


كان الواحد حيتزوج عمتها او خالتها او امها أو أم أمها

وبعد داك يبدأ الموال

والموضوع يتفترق

Quote: لماذا تمكنت الهندية والفلبينية والسيلانية والإنجليزية والأوربية والآسيوية والأفريقية من فهم هذا الواقع وبناء حياتها عليه

المسألة مسألة ثقافة مجتمعية يجب تغييرها في كل المجتمع السوداني
وليس عند الفتاة السودانية بس


الليلة لو (فتاة) سودانية قبلت بـالزواج برجل(سوداني)
بأقل تكلفة والتزامات
مؤكد هذا الرجل وبعض من عشيرته حيطلعوا (مية) عيب واشاعة وووو
دا كان ما طلعوها ما كويسة (لا سامح الله)
بس عشان قبلت (السترة) باقل ما يمكن

Quote: الليلة لو (فتاة) سودانية قبلت بـالزواج برجل(سوداني) بأقل تكلفة والتزامات مؤكد هذا الرجل وبعض من عشيرته حيطلعوا (مية) عيب واشاعة وووو دا كان ما طلعوها ما كويسة (لا سامح الله) بس عشان قبلت (السترة) باقل ما يمكن

الاخت... ميادة كمال
مساء النور..ومرحب بيكـ
مع احترامى لـ رأيك..لكن كلام الناس ليس مبررا كافيا..للمغالاة فى امور الزواج..غايتو
نادرا جدا ما تكون هناك عشيرة بهذه التفكير..السلبى ..وبعدين الكواسه دى بتكون وين بالضبط..؟ ما كتار عرسوهن بى سعر..غالى..التقول الواحدة حسبوها بالكليو..وبرضو..طلعن.. اى كلام..وفشلو فى الاستمرارية ولو لشهور..بسيطة

سجلني معاكـ

Quote: مساء النور..والحوار معك ممتع.. وان كان هناك بعض الاختلاف فى الرؤى السياسه لكن الحمدلله شكلنا متفقين فى حكاية العرس دى.. قصة الكبريت عاوزة شرح..بشكل اوضح..لو كان مافيها حاجة يعنى..! الضكرنة دى..اخوك ماسك فيها..ماعارف ليه..كل ما اتكيف شديد من موقف لأى انسانه اعرفها طوالى اقول براى والله دى بت ضكرة خلاص..غايتو ما اظن فيها ريحة تمييز..

ياخوي مححمد

خلاص نخلي الما بتتخلى دي شوية بس...

الكبرتة دي ياخوي قصتها طويلة..
تراث ضارب في القدم السوداني..
والسودانية هي المرأة الوحيدة التي لها طقوس اثوية خاصة للزواج..

شفت ياخوي الحكاية بتبدأ بالدخان...
العروس لما جلدها يتفسخ بالنار ما يخلوها..
شئ بالطلح
وشئ بالصندل والشاف..
مسكينة العروس.. تطبخ لمدة شهر وزيادة..
والحمام بالدلكة..
يعني تتعتق بالعطر..
لو صارت بدون حمام شهرين تلقاها معطرة
وزفيرها عبير..
شفت الحكاية كيف...
خليك في المحطة دي وامسك السودانية بت بلدي دي..


نواصل....

Quote: شفت ياخوي الحكاية بتبدأ بالدخان... العروس لما جلدها يتفسخ بالنار ما يخلوها.. شئ بالطلح وشئ بالصندل والشاف.. مسكينة العروس.. تطبخ لمدة شهر وزيادة.. والحمام بالدلكة.. يعني تتعتق بالعطر.. لو صارت بدون حمام شهرين تلقاها معطرة وزفيرها عبير..

كده الواحدة تبقى ليك زى محل عطور البخيت بتاع السوق العربى تلفحك ريحتو من اول الشارع..
احناغايتو ياها الساونا..ولحدى هسه ماعارفنها شنو بالضبط..بس كل اصحابنا العرسو طلعو نضاف
شديد بعد ما عملوها..
ربنا يوعدنا..

احمد محمد بشير

Quote: سجلني معاكـ

أبشر بالخير..طوالى يازول..

مداخلتي الفوق دي ما عاجباكم ولا شنو؟

Quote: مداخلتي الفوق دي ما عاجباكم ولا شنو؟

أختنا منال الطاهر

سلام مابراك أنا قبلك تداخلت في البوست دا وصاحب البوست شكلوا عندوا خيار وفقوس ولا هببوا لي التقول أنا أبوا العروس

يا بنات حوا هوي الأولاد ديل ما يغشوكم.......نأكلها بي عيش حاف .....واهم حاجه نكون مع بعض..........والحب يعمل المعجزات......وابني عشك يا قماري.....كووووووولو ما نافع...ابقي بت نجييييييضه ...يجيب ليك كلو شي بالدرزن....حتي الكونتاكت لينز 2درزن الفساتين.....درزن فساتين سواريه والشوز شتويه(boots)وصيفيه وما تنسي جزم الspring...بعدين الدهب ده بقي موضع قديمه لازم يجيب ليك مجوهرات من( كارييه)وخاتم الزواج ده طبعاً حاجه تانيه.....الشنط قوشي طبعاً ....وزياره خاصه لي فكتوريا سكريت وما تكتري عليه شديد لانه لسه تكاليف شهر العسل ...أنا بقترح ليك هاواي اسبوعين والاسبوعين التانيين في االكاريبي(مش قلتو شهر )ولو جاب ليك عربيه هديه ما ترفضيها لكن اقبليها بي خجل عشان ما يقول انتي طماعه لكن ده برضه ما ح يعفيه من المؤخر يكون 100 الف دولار................ بس......ومن لم يستطع عليه بالصوم .
<<<<<<<<<<<<<<<<<<<<<
والله يا منال اذا البنات سمعن كلامك وطبقوه بالحرف ما في شاب كان حيهود بناحية الزواج .. انتي دايرانا نصبح بايرات ولا شنو،، وانتي ما بتسمعي المثل البقول " ضل راجل ولا ضل حيطة" ... ما تعقدي الامور وتصعب من العرس( وجه ضاحك).. وينكم يا ناس ود القاضي الوجه الضاحك نسينا نرسمه كيف في الرد).

Quote: لميت كم سوفار?

انا سألتك عشان نعرف الفضل ليك شنو ? واحد كان ببيع الموية فى دار الرياضة
وقال هو ببيع الموية كعمل اضافى عشان يلم حق العرس ,, واحد الجمهور مرة سالو , يا فلان ماقربت تلم حق العرس? أها لميت كم? صاحبنا اجاب بلسان فيه لجنة ـ والله حلاث قربت ـ لميت خمسة وعشرين جنيه,, واحد من الجمهور قال ليهو: لا والله قربت ,, فضل ليك حق التلج.
أها انت يا عوض كان الحكاية فضلت على حق التلج اعملو فى الشتاء عشان توفر حق التلج.
كلام جاد
ياخ العرس ده مافى شئ بتسهل اكتر منه ,, اسأل مجرب ,, إنت بس اتوكل ومايهمك واثقين منك ,, بس أختا الناس المجنعصين فى الفارغة .

أنا وأخوي عادل الباهي مافي زول بقرا كلامنا ....نقول الدايرين نقولو. وبعدين يا اميره يا اختي ده المفروض يحصل وما تخافي ح يجولك جارين جري .

Quote: أنا وأخوي عادل الباهي مافي زول بقرا كلامنا ....نقول الدايرين نقولو. وبعدين يا اميره يا اختي ده المفروض يحصل وما تخافي ح يجولك جارين جري .

منال سلامات

قريت كلامكم مرتين...
بس قلت ليش أرد وأزعّل الناس..
أول تعليق لي كان: في ناس عليها جنس حسادة.. تكون قبضت حفّها وتقول (.........) في الآخرين... على وزن: انا خرجت ان شاء الله بطن أمي تنسد!!

يا جماعة سيبوا الهرش ولا تخربوا السوق للناس


مودتي

Quote: أختنا منال الطاهر سلام مابراك أنا قبلك تداخلت في البوست دا وصاحب البوست شكلوا عندوا خيار وفقوس ولا هببوا لي التقول أنا أبوا العروس

العزيز/ عادل الباهي


ياخوي كلامك ما عجب العريس...
الزول قال خلاص وصل الميس تقوموا تضعوا ليهو العراقيل..
بسطوها يا جماعة وربنا يبسطها علينا..

تحياتي

محمد عوض
سلام
والله نصيحة لوجه الله
يومك البتعرس تقول انا يا ريت لو عرست من زمااااان
الشغلانة بسييييطة جدا واحلى منها ما فيش
والله صدقنى ح تندم على كل يوم قضيتو وانت عزابى
ويا اخى كلمة بابا ربنا ما يحرمك منها وبقية الشباب امييين يا رب

ده كلام زول مجرب

Quote: محمد عوض سلام والله نصيحة لوجه الله يومك البتعرس تقول انا يا ريت لو عرست من زمااااان الشغلانة بسييييطة جدا واحلى منها ما فيش والله صدقنى ح تندم على كل يوم قضيتو وانت عزابى ويا اخى كلمة بابا ربنا ما يحرمك منها وبقية الشباب امييين يا رب ده كلام زول مجرب

ود الفحل..
اهلا وسهلا..بيكـ
شايف المجربين المبسوطين.. كترو..الله يطمنكم..يارب..
والندم من هسه حاصل..ماعاوزين نلحق الاربعين..ولا الـ35 بدون عيال..الدنيا عبوسه
خلاص..بدون رفقة..

Quote: العزيز/ عادل الباهي ياخوي كلامك ما عجب العريس... الزول قال خلاص وصل الميس تقوموا تضعوا ليهو العراقيل.. بسطوها يا جماعة وربنا يبسطها علينا.. تحياتي

حبيبنا عبدالعزيز عيسي

يأخوي نحنا لاقين يبسطوا الامور ورفضنا لكن المخوفنا من الشغلانه دي بالله من يوم تقول عاوز تتزوج يشبكك جيب جيب عاوزين عاوزين حتي بيت الجداد بتاع الجيران بيطلوهوا بوماستك علي حساب العريس .

Quote: انا سألتك عشان نعرف الفضل ليك شنو ? واحد كان ببيع الموية فى دار الرياضة وقال هو ببيع الموية كعمل اضافى عشان يلم حق العرس ,, واحد الجمهور مرة سالو , يا فلان ماقربت تلم حق العرس? أها لميت كم? صاحبنا اجاب بلسان فيه لجنة ـ والله حلاث قربت ـ لميت خمسة وعشرين جنيه,, واحد من الجمهور قال ليهو: لا والله قربت ,, فضل ليك حق التلج. أها انت يا عوض كان الحكاية فضلت على حق التلج اعملو فى الشتاء عشان توفر حق التلج. كلام جاد ياخ العرس ده مافى شئ بتسهل اكتر منه ,, اسأل مجرب ,, إنت بس اتوكل ومايهمك واثقين منك ,, بس أختا الناس المجنعصين فى الفارغة

فاضلابى..أول مجرب يقول خير..ربنا يديك العافية ..
طبعا اخوك جاهز جنس جهوزية.. الديوان مظبط..البركة فى اخوى الكبير..بتاع المناسبات فى الحلة..قريبى..وبسلف الكراسى ودلاقين الصيوان..تديهو حقو بعد الكشف..ماعندو مشكلة..!

Quote: سلام مابراك أنا قبلك تداخلت في البوست دا وصاحب البوست شكلوا عندوا خيار وفقوس ولا هببوا لي التقول أنا أبوا العروس

ياريت تكون ابو العروس ياخى..انتا فايت اومحمد فى الوسامة..
ياعزيزى عادل..ورب الكعبة لم انتبه لمداخلتك.. الا بعد ان راجعت البوست هذا الصباح ..
وماعندى خيار وفقوس..اعتذر لك وللاخت منال..ولكم العتبى..يا صحاب

Quote: ياريت تكون ابو العروس ياخى..انتا فايت اومحمد فى الوسامة.. ياعزيزى عادل..ورب الكعبة لم انتبه لمداخلتك.. الا بعد ان راجعت البوست هذا الصباح .. وماعندى خيار وفقوس..اعتذر لك وللاخت منال..ولكم العتبى..يا صحاب

العزيز مُحَمَّدٍ عِوَضٌ احْمَدُ

ياحبيب ولا يهمك أنا بمزح عارف مرات الحاجه دي بتجي لا أراديه .

لكن مش المثل بيقول السعيد يشوف في أخوهوا والشقي يشوف في نفسوا فأسع أنا سعيد شفت كتير في أخواني

أحسن ليك أعمل رايح والله تتزوج قبل ماتكمل العام شنبك يشيب .

Quote: ياحبيب ولا يهمك أنا بمزح عارف مرات الحاجه دي بتجي لا أراديه . لكن مش المثل بيقول السعيد يشوف في أخوهوا والشقي يشوف في نفسوا فأسع أنا سعيد شفت كتير في أخواني أحسن ليك أعمل رايح والله تتزوج قبل ماتكمل العام شنبك يشيب

شكرا ياباهى..
أحنا حاليا راسنا بقا فول بالجبنه..قبال من نخوش فى الغريق..!
غايتو واحد صاحبنا تانى يوم من عرسو..بعيد عنك جاهو فقدان سوائل شديد..(ماعاوز اقول الكلمة ديك طبعا) ..من الخوف..بس..

Quote: مداخلتي الفوق دي ما عاجباكم ولا شنو؟

مداخلة فخمة..مافى كلام..
تعجب..واكتر كمان
تحياتى منال السر
برجع ليك تانى

اعتذر عن كلمة (بعد عشرة سنوات) الواردة بالخطا في موضوع السيد (م)

المقصود بعد سنوات وقمت بالتعديل أعلاه

شكراً جزيلاً
وأكرر الاعتذار

Quote: اعتذر عن كلمة (بعد عشرة سنوات) الواردة بالخطا في موضوع السيد (م) المقصود بعد سنوات وقمت بالتعديل أعلاه شكراً جزيلاً وأكرر الاعتذار

بل الشكر لك انت يااخى هانى..مداخلتك فتحت نافذة اخرى جادة ومهمة للنقاش..فى الموضوع
تحياتى لك.

العريس

سلام

جمعة مباركة ان شاء الله

صلينا من ساعتين وجينا بالدعاء الطيب..
وبوست المباركة محجوزباسمي من هسي..

تحياتي

Quote: العريس سلام جمعة مباركة ان شاء الله صلينا من ساعتين وجينا بالدعاء الطيب.. وبوست المباركة محجوزباسمي من هسي.. تحياتي

ياخى والله ما بتقصر..
ربنا يتقبل منكم ومن الجميع..
..وشكرا جميلا ..لكـ

Quote: : العزيز/ عادل الباهي ياخوي كلامك ما عجب العريس... الزول قال خلاص وصل الميس تقوموا تضعوا ليهو العراقيل.. بسطوها يا جماعة وربنا يبسطها علينا.. تحياتي حبيبنا عبدالعزيز عيسي يأخوي نحنا لاقين يبسطوا الامور ورفضنا لكن المخوفنا من الشغلانه دي بالله من يوم تقول عاوز تتزوج يشبكك جيب جيب عاوزين عاوزين حتي بيت الجداد بتاع الجيران بيطلوهوا بوماستك علي حساب العريس .

العزيز/ البـــــاهي



في السودان أيام العرس, والد العروس بيهجر البيت... ويمكن يكون في غياب تمام لكل الشخصيات القوية من أهل العروس.. ويترك الأمر للمزايدات من العمات والخالات... وكل واحدة بتحب تظهر بأنها الأكثر اهتماما بالعروس... ويطلقن العنان لخيالهن...

وهذه من أسوأ العادات في العرس...!!
حضور والد العروس أو رجل البيت القوي ومتابعته مراحل تزويج كريمته حتى نهاية الماسبة شئ مهم جدا...

أتمنى أن يترك الناس حكاية الحفلات وتكون اللمّة مع العفد وخلاص..

تحياتي

Quote: يا بنات حوا هوي الأولاد ديل ما يغشوكم.......نأكلها بي عيش حاف .....واهم حاجه نكون مع بعض..........والحب يعمل المعجزات......وابني عشك يا قماري.....كووووووولو ما نافع...ابقي بت نجييييييضه ...يجيب ليك كلو شي بالدرزن....حتي الكونتاكت لينز 2درزن الفساتين.....درزن فساتين سواريه والشوز شتويه(boots)وصيفيه وما تنسي جزم الspring...بعدين الدهب ده بقي موضع قديمه لازم يجيب ليك مجوهرات من( كارييه)وخاتم الزواج ده طبعاً حاجه تانيه.....الشنط قوشي طبعاً ....وزياره خاصه لي فكتوريا سكريت وما تكتري عليه شديد لانه لسه تكاليف شهر العسل ...أنا بقترح ليك هاواي اسبوعين والاسبوعين التانيين في االكاريبي(مش قلتو شهر )ولو جاب ليك عربيه هديه ما ترفضيها لكن اقبليها بي خجل عشان ما يقول انتي طماعه لكن ده برضه ما ح يعفيه من المؤخر يكون 100 الف دولار................ بس......ومن لم يستطع عليه بالصوم .

عجبتني نجضك دي يا منال...!!!!

جنس حسادة...............................

منال الطاهر


شفتي زي كلامك الفوق دا يا هو بالبطفش ناس محمد عوض من العرس

شنو يعني كارتييه وهاواي والكاريبي والكلام الكبار دا

العرس بالفاتحة يا ناس ما حلال ؟


حــــــــــــــــــــــــلال

اقلهن مهرا اكثرهن بركة


واسالوا اي عريس وعروس عاقلين عن اكتر حاجة ندموا عليها في بداية حياتهم يقولوا ليك اننا صرفنا دم قلبنا علي العرس في مظاهر فارغة وفي النهاية كلوا بعرس ابو مليار وابو مليون وبالعكس السعادة في البساطة و نعم للفرح ولا للاسراف


اخوكم بكري

احد مناصري زواج البساطة

Quote: اقلهن مهرا اكثرهن بركة واسالوا اي عريس وعروس عاقلين عن اكتر حاجة ندموا عليها في بداية حياتهم يقولوا ليك اننا صرفنا دم قلبنا علي العرس في مظاهر فارغة وفي النهاية كلوا بعرس ابو مليار وابو مليون وبالعكس السعادة في البساطة و نعم للفرح ولا للاسراف اخوكم بكري احد مناصري زواج البساطة

العزيز/ بكري


اهو ده الكلام الصحيح

معاك معاك.. حتى آخر العذاب يعرس

Quote: .....درزن فساتين سواريه والشوز شتويه(boots)

Quote: ( كارييه)

Quote: الشنط قوشي

Quote: وزياره خاصه لي فكتوريا سكريت

Quote: المؤخر يكون 100 الف دولار

يااخوانا منال دى بتكون بتهزر برضو..حاجاتا دى لو عاوز تشتريها ما اظن تلقاها فى السودان..كلها بالانجليزى..شكلها ماركات اصلية..واحنا ناس الصينى الماسورة كمان..انا غايتو اول مرة اعرف انو فى شئ اسمو كارتييه ..ارقى محلات بنعرفا فى سعد قشرة..وليبيا..
وديل ذاتهن آريت نقدر عليهن بعدين

اخونا محمد التحية ليك ولى ضيوفك الاعزاء
يا اخوي العرس بالفاتحة حلاااااااااااااال سيبك من كلام منال الطاهر دا كلام حسادة سااااى والبنات ولا بهببنوا ليها ولا حاجة لانهن ذى ما قالت اميرة بقولن ضل راجل ولا ضل حيطة
يا اخوى فى نوع جديد من انواع الزواج افتى بيهو القرضاوى زماااان والغريبة فى الوقت داك ما عجب علماء السعودية و دخل على الخط علماء الاسلام فى السودان و افتو بجوازه زواج الايثـــــــــار
لا فيهو مشى دكان ولا حتى مسئولية زاتوووووووووو

Quote: اخونا محمد التحية ليك ولى ضيوفك الاعزاء يا اخوي العرس بالفاتحة حلاااااااااااااال سيبك من كلام منال الطاهر دا كلام حسادة سااااى والبنات ولا بهببنوا ليها ولا حاجة لانهن ذى ما قالت اميرة بقولن ضل راجل ولا ضل حيطة يا اخوى فى نوع جديد من انواع الزواج افتى بيهو القرضاوى زماااان والغريبة فى الوقت داك ما عجب علماء السعودية و دخل على الخط علماء الاسلام فى السودان و افتو بجوازه زواج الايثـــــــــار لا فيهو مشى دكان ولا حتى مسئولية زاتوووووووووو

مرحب يا مجدى
عرس الفتاوى ده اصلو ما معانا طبعا..الفقرا عينة الترابى..ومن لف لفهم..بطلشوا ساكت
السودانيين.عرسهم دلوكتو للضحوية..
الأيثار والمسيار..كلو ما بينفع..نعرس ونقوم بالواجب البنقدر عليهو.. نسكنها لو قعر شدرة..على قول الاغنية..
ونديها حقها..للآخر

Quote: يا اخوي العرس بالفاتحة حلاااااااااااااال سيبك من كلام منال الطاهر دا كلام حسادة سااااى والبنات ولا بهببنوا ليها ولا حاجة لانهن ذى ما قالت اميرة بقولن ضل راجل ولا ضل حيطة يا اخوى فى نوع جديد من انواع الزواج افتى بيهو القرضاوى زماااان والغريبة فى الوقت داك ما عجب علماء السعودية و دخل على الخط علماء الاسلام فى السودان و افتو بجوازه زواج الايثـــــــــار لا فيهو مشى دكان ولا حتى مسئولية زاتوووووووووو

العزيز مجدي

سلام



ياخوي قلت كلام جميل وزين,,,

منال دي ما عارف قصدها شنو!!!..
هي قالت كلام الصعب واختفت..
ننتزرها ربما تجي وتغيره..


لا اتفق معك في الإيثار أو أي مسميات أخرى.. فالزواج واحد... أسرة واستقرار..
فتاوي الإعراب دي كلها بتصب في خانة الزنا المقنن وما علينا بيها...

تحياتي

أنا مش قلت ليكم ......اها ذي مجدي ده جا يقول ميثار وما عارفه شنو.... شفتو ديل هم ذاتهم إلانا قاصداهم ......لازم تعدموهم الدولار ووبس.....اقصد الجنيه عشان تاني لو جابو ليه سيرة العرس يقعد يتمتم.....مره واحده بس ولو قدروا عليها كويس ... محمد لك مودتي . 

Quote: أنا مش قلت ليكم ......اها ذي مجدي ده جا يقول ميثار وما عارفه شنو.... شفتو ديل هم ذاتهم إلانا قاصداهم ......لازم تعدموهم الدولار ووبس.....اقصد الجنيه عشان تاني لو جابو ليه سيرة العرس يقعد يتمتم.....مره واحده بس ولو قدروا عليها كويس ... محمد لك مودتي .

العزيزة/ منال


نحن مش تعودنا النظر للجانب المملزء من الكوب.....!!
خلاص كلام مجدي نخليه على الجنب.. فنحن أمامنا الأمر الأهم بتاع العنوان الفوق ده!!
ونقول نحن معاك يا محمد عوض حتى ترسى مراكبك..

تحياتي

Quote: ونقول نحن معاك يا محمد عوض حتى ترسى مراكبك

ياخى من اصلك والله..
تسلم..كتييييير

manal eltahir
ولكـ مودتى ايضا..ومرحبا بك من جديد

Quote: ياخى من اصلك والله.. تسلم..كتييييير

سعادتي الكبرى أن يبلغ البوست مبتغاه...

مودتي

سلامات يا عبدالعزيز..
ومساندتك لن تنسى طبعا..قلة من يستمعون لـ أنين الشباب ومشاكلهم
للأسف فى السودان الزواج لدى كثرين جدا شأن لا يجب التحدث به بشكل علنى..
وهو ليس من ضمن أولويات الأهتمام بالنسبة لهم..والمبرر الجاهز (الظروف)..(الحالية)
واغلب ابائنا تزوجو فى زمن ماكان عندهم فيهو اللضا..وكما..قال.. احد اصدقائى فى شارع الاربعين
(جمال)..

Quote: ان الاهل جعلوا الزواج الشرعى صعبا فى حين انهم عندما تزوجوا لم يكونوا يمتلكون سوى اعضائهم التناسلية..

Quote: اخونا محمد التحية ليك ولى ضيوفك الاعزاء يا اخوي العرس بالفاتحة حلاااااااااااااال سيبك من كلام منال الطاهر دا كلام حسادة سااااى والبنات ولا بهببنوا ليها ولا حاجة لانهن ذى ما قالت اميرة بقولن ضل راجل ولا ضل حيط

هذه تكفي يا أخي مجدي..

تحياتي

يلا يا شباب..اى زول يشد حيلو..ما شديد كمان لمن ينقطع ضهرو..قدر حالكـ..وبس..وخليك صامد..شوفو ده..
قبل ايام اشترى احدهم بسعر اكثر من معقول غرفة نوم مستعملة..من .... (احد الاخوة الاقباط )..حاجة حلوة.وماعاوز اكتر من بونش كده..
آها نادى خطيبتو..وقال ليها تعالى شوفيهو..زولتنا صرت وشيها..
- ماعاوزة عفش مستعمل..!!..
- اسمعى..والله اغيرك انتى ما اغير العفش..ده..!
- طيب مع السلامة..الله معاك..
المهم يومين تلاتة براها اتصلت..على اخونا(......).. الحازم..
- خلاص ياخ انا فكرت..ولقيت انو الخشب القديم اقوى..من الحسه ده..
يلا خلى النجار يجى..يظبطو..

سلام أخي محمد

هاك دي... بس رأي غير...


رجل كان يمشي في الشارع عندما سمع صوتا من خلفه: إذا تابعت ومشيت خطوة أخرى إلى الأمام سوف يسقط على رأسك حجرا وسوف تموت.

الرجل توقف. وعندها بالفعل سقط حجر كبير أمامه. استغرب الرجل وتابع سيره.
وبعد فترة أراد أن يعبر الشارع ومرة أخرى جاءه الصوت: قف إذا خطوت خطوة أخرى إلى الشارع سوف تمر سيارة مسرعة وتقتلك.

توقف الرجل وبالفعل إذا بسيارة تمر مسرعة من أمامه وأخطأته.
التفت إلى الوراء . لم يجد أحدا. ولكن سأل باستغراب: من أنت؟؟؟
سمع نفس الصوت: أنا حارسك في الحياة.
رد عليه بغضب واستهزاء : طيب أين كنت عندما تزوجت؟؟؟؟

يا مجدي الجاب الحساده هنا شنو؟ ويحسدوا منو ؟ وفي شنو؟

Quote: يا مجدي الجاب الحساده هنا شنو؟ ويحسدوا منو ؟ وفي شنو؟

غايتو رغم انو الكلام لـ مجدى..
لكن برضو ما بقدر افطك تانى انتى والباهى
سلام..يا منال..و اخونامجدى اكيد قاصد يهزر ما اكتر..

تذكرت هذه القصة التي كتبتها في 2005 في منتديات عكس الريح والتي لها علاقة بالموضوع:

http://drmoiz.com/phpBB2/viewtopic.php?t=4346&highlight=

Quote: تذكرت هذه القصة التي كتبتها في 2005 في منتديات عكس الريح والتي لها علاقة بالموضوع

Quote: -- أمي ** أيوة يا محمد -- انا داير أعرس ** وووب ووووب ووووب عرس تاني ياولد لا لا لا -- لكن يا أمي ** والله تفتح الموضوع دا تاني انا ماعافية منك -- يما ,,,, اسمعيني ** لا اسمعيني ولا غيره اسمع يا ولد ... انت ولد متين عشان تجيب سيرة العرس ؟

تحياتى هانى..وشكرا للرابط..والتحية من هنا لرواد عكس الريح الاعزاء
قصة محمد..هى من واقعنا تماما..نموذج الاباء المتسلطين موجود الى اليوم..
تحس ان بعضهم احيانا يريد من ابنائهم دفع الثمن..ثمن التربية..ومصروفات التعليم..
ناس احنا هسه شفنا منك شنو ديل..الله يعين بس

Quote: طيب أين كنت عندما تزوجت؟؟؟؟

حبابك يا عبدالعزيز..
ياخى عاوز تقلب ولا شنو..؟
ما كنت ماشى كويس..فى خطنا..

..
.
دا بوست عزابه ساااى ورايح ليهم عرس
وحق لهم .. :)

قلنا نزوركم يمكن فى توزيع كرتله ولا تخفيضات
واقترح فى هذه الايام الغاء الشبكة ( الدهب)
والمهر يتم بالاتفاق ..

-------

حليل تمبس ومعتصم
وحميدة واخيرا دكين

Quote: دا بوست عزابه ساااى ورايح ليهم عرس وحق لهم .. :) قلنا نزوركم يمكن فى توزيع كرتله ولا تخفيضات واقترح فى هذه الايام الغاء الشبكة ( الدهب) والمهر يتم بالاتفاق .. ------- حليل تمبس ومعتصم وحميدة واخيرا دكين

حباب تبلدينا
فكرتك حلوة..وياريت يشيلو حكاية الدهب مرة واحدة
ناس تمبس وحميدة ودكين..ديل عرسو؟

ما عارف السر في تمسك المراة السودانية الشديد في الكميات الكبيرة من الدهب تلقي الواحد كلها تكشكش وفرحانه زي حمار الحلب
الحكاية زينة ولا بوبار

غايتو بناتنا ديل الله يهديهن

Quote: ما عارف السر في تمسك المراة السودانية الشديد في الكميات الكبيرة من الدهب

العزيز/ بكري عباس

سلام


الدهب عند السودانية نوع من الشوو والمفاخرة عديمة الفائدة...
كمية الذهب دائما تعني لي كمية التخلف في عقلية من تلبسه هذا اذا وجد العقل في حد ذاته..

نعيش وسط ناس, تجد المرأة تقود سيارة سعرها أكثر من 200 الف دولار ولا تري ذهبا يجلجل غير خاتم الزواج أو سلسل خفيف جدا في الجيد...
نتمنى أن نصل للوقت الذي تترك فيه السودانية هذا التخلف..

تحياتي

عقلنا ولا ...........؟

Wink شاب أراد أن يخطب فنظم قصيدة واقعية ... ـ



أيا عماه
يشرفني
أمد يدي
لكي أحظى كريمتكمْ
وأن تعطوننا وعداً
أتينا الله داعينا
فإن وافقت يا عماه
دعنا نفصل المهرَ
وخير البرِّ عاجله
ونحن البرَّ راجينا

فقال:ـ

أيا ولدي
لنا الشرف
فنعم الأهل من رباك
ونعم العلم في يمناك
وإن العلم يغنينا

وأما المهر يا ولدي
فلا تسأل
لأنا نشتري رجلاً
وليس المال يعنينا

ولكن هكذا العرف
وإن العرف يا ولداه
يحميكم ويحمينا

فمليون مقدمهاAngry smile ـ
وأربعة مؤخرها
وضع في البنك
للتأمين عشرينا

وبيت باسم ابنتنا
وملبوس على البدن
من الفستان للكفن
و"مورانو" ـ

وان صعبت
فإن "البيجو" تكفينا

وأما العرس يا ولدي
ففي "الشيراتون"
فشأن صغيرتي شأن
سعادٍ بنت خالتهاPrincessـ
وهندٍ بنت عمتهاFlirt-femaleـ
وشيريناSend a kissـ

فإن وافقت
قلنا بارك الله
وقال الكل
آمينا
فقلت له :ـ
أيا عماه خللها
وضعها فوق رف البيت زيتونا

فلو بيديّ ربع المهر
كنت اليوم قارونا
أيا عماه
أنا رجل بسيط في موارده
ودخلي بضع ألاف
وزادي مثل كل الناس
أقول الحمد لله
خالقنا وبارئنا وساترنا وكافينا

فيا عماه
أنا رجل أحب بكل إحساسي
وقلبي ليس من ذهب
ترى ان كان من ذهب
أكان الحب يأتينا

ترى هل يشعر الأنسان

حين يكون خافقه
من الألماس معجونا

أيا عماه
لماذا صارت الدنيا
طريدَتنا
وقد كانت بأيدينا

لماذا نحن أصنام
وكيف يحاور الأنسان
حين يصير جبصينا(الجبس)
خلقنا نحن من روح ومن طين
نسينا روحنا حتى
غدت في جسمنا طينا

لماذا في مدينتنا
يعيش المرء للعادات مسجونا
وكيف يفكر الأنسان
حين يكون مسجونا
تطورنا
وعدنا في تخلفنا
لوقت كانت الأنثى
تباع كأنها عقد
فنخّاس ينادي هذه بكر
وآخر هذه أحلى
وثالث هذه اطول
يعود التاجر الميسور منزله
وفي يده اشترى امرأة
وفروجاً وليمونا

لماذا صارت الأنثى
تساوم في أنوثتها
فتعطوها
لمن ترضونه مالاً
وقال الله من ترضونه دينا
أيا عماه
عفواً إن تماديت
ولكني عزفت الآن عن طلبي
فلو كان الزواج بعصرنا عقلا
سأمضي العمر مجنونا


صحيح قبل أن أنسى
سؤال حز في نفسي
سعاد بنت خالتها
وهند بن عمتها
فماذا عنها شيرينا

واحد نشر في إعلانات مبوبة :مطلوب زوجة!!! تاني يوم جاله

100 جواب فيهم نفس الرد: تاخد بتاعتي؟؟

Quote: واحد نشر في إعلانات مبوبة :مطلوب زوجة!!! تاني يوم جاله 100 جواب فيهم نفس الرد: تاخد بتاعتي؟؟

]
قنعانين عديل..رجال ماعندهم عشرة..يا عمك

Quote: ]لماذا صارت الأنثى تساوم في أنوثتها فتعطوها لمن ترضونه مالاً وقال الله من ترضونه دينا أيا عماه عفواً إن تماديت ولكني عزفت الآن عن طلبي فلو كان الزواج بعصرنا عقلا سأمضي العمر مجنونا

سلام ياهانى
قلت لى اسحن يقضى باقى عمرو مجنون من يعرس ؟
كده الككـ ولا بلاش..

Quote: ما عارف السر في تمسك المراة السودانية الشديد في الكميات الكبيرة من الدهب تلقي الواحد كلها تكشكش وفرحانه زي حمار الحلب

'طبعا المكنة الجامدة يا بكرى..
يقولو ليك ياخى الدهب ده حق الراجل بعدين..لما تحصل زنقة..لكن كلو كضب
ساكت..هسه الواحد كان نطط مرتو ما بتصرف ليهو دهبا..

مطـلـوبْ عـريس مُقتَدِرْ أو مُغتَرِبْ ... عـروسـة أنيقـة جداً
اها رأيك شـــنو ههههههههههههههههههههههه
..
..


غايتو حالة (ســــعبه) خلاث
_
محمد عوض يا صاحبي الله يديك الفي مرادك يااااخ

Quote: مطـلـوبْ عـريس مُقتَدِرْ أو مُغتَرِبْ ... عـروسـة أنيقـة جداً اها رأيك شـــنو ههههههههههههههههههههههه .. .. غايتو حالة (ســــعبه) خلاث _ محمد عوض يا صاحبي الله يديك الفي مرادك يااااخ

ده حمار عيد الحب..مش كده؟
لما نجيب سيرة العرس مفروض تجيب لينا صورة حيوان تانى.. قريب للمعنى..ياخ
عموما الحاجات الورا ضهر الحمار..عندها شنكارات عجيبة

تحياتى الأخ العزيز البشارى..

Quote: قنعانين عديل..رجال ماعندهم عشرة..يا عمك

قنعانين عديل..رجال ماعندهم عشرة..يا عمك

يا أخوانا

هو البوست دا فاتحنو من متين؟

وماله تقول مكتوب بحبر سري الواحد ما لاقاه كلو كلو

مع إنو ما بخصني

Quote: يا أخوانا هو البوست دا فاتحنو من متين؟ وماله تقول مكتوب بحبر سري الواحد ما لاقاه كلو كلو مع إنو ما بخصني

Quote: Asim Fageary

Quote: Married

متين نلحق نعدل البروفايل..؟
عاصم فقيرى..حبابك الف
البوست مفتوح..من ايام السقط الشديدة ديكـ
شوية..الوطاة تدفا ويتلحس..

اخي عبد العزيز عيسي

حكاية الدهب حكاية عجيبة وفعلا انا ملاحظ انه كل مازاد الدهب قل العقل والعكس صحيح لذلك هو نوع من التخلف في نظري ولو سالت الواحدة تقول ليك دا دلالة علي قيمة المراة عند الرجل ( ياخ منطق مقلوب ) عشان كدا دائما لما تلقي الواحد عامل ليهو عملة بجيب لي مرتو دهب والعويرة تفرح تقول ليك رضوة رضوة شنو يالعويرة ؟