اقتراح لبورداب جدة .... وشكرا لكم الاحتفاء بتمبس وداليا ...

اولاً نشكركم على كامل الثقة والمسئولية التي كلفنا بها
اقتراح دفع كل عضو في الصندوق مبلغ وقدرة 300 ريال سنويا على 12 شهر
يعني بواقع شهري 25 ريال ومن حق العضو ان يقسط المبلغ اما شهري او على دفعات
حتى نسطيع تلبية متطلبات كل المناسبات من من غير اي معوقات
وسوف نعمل كشف حساب لكل واحد من الاعضاء ...
وننتظر مقتراحاتكم ومن يوافق هلى هذا الاقتراح ممكن يسجل اسمه هنا ونقبل الاعتراضات ووجهات النظر
كما نشكر التفاعل الكبير الذي قمتم به في الاحتفاء بالعرسان تمبس وداليا ...

الأخ وليد عبد اللطيف

تحية وتقدير

حقيقة الحفل كان رائع تنظيم واعداد وحضور جميل

فكرة الصندوق دي طرحت أكتر من مرة من غير ما يتم تفعيلها

نتمنى المرة دي تحسم تماما .

بدءأ من احصاء البورداب بجده وما حولها مرورا بأصدقاء البورداب

الحاضرين والمشاركين في المناسبات وما زالوا ينتظرون الباسويرد من

الباشمهندس بكري .

وحتى سداد الاشتراك الذي يتم الاتفاق عليه بالكيفيه المعروفة

شكري وتقديري أخي وليد

وحات الله انا دافع وعندي شهود

شايف كمان السماني عمارة دافع مرتين

ما مؤتمر وطني وواصل لكن

ـــــــــــــ

اقتراح جميل ومريح وانا ادعمه

اساسي

Quote: وحات الله انا دافع وعندي شهود شايف كمان السماني عمارة دافع مرتين ما مؤتمر وطني وواصل لكن

ياخي قبل كم يوم واحد بغالطني قال بيعرفك وقال اسمك السماني
يازول دخلت ليك معاهو في غلاط وقلت له السماني واحد وهو السماني عماره
قال لقبة اساسي
قلت : ليهو انا مابعرف السماني بعرف اساسي
اها دي مشكلتك اللقب اصبح مغطي على الاسم
ماتحمل هم ومعليش ياجميل
سؤال : ياخي البدلة والكرفته بتاعت الحفل اشتريتهم من وين

معكم .... واثني

Quote: نتمنى المرة دي تحسم تماما .

جميل اخي البشير دفع الله

تشكر يا وليد على مجهوداتكـ الكبيرة في كل حفل ومحفل ،


إقتراح جميل ونحن جاهزين لأي مساهمة ،


وسنعمل على تفعيل الإقتراح معكـ ومع اللجنة

Quote: تشكر يا وليد على مجهوداتكـ الكبيرة في كل حفل ومحفل ،

ياخي هذا اعتبرة واجبي نحو الجميع بمنطقة بجدة
للانسان في مراحلة تتقلب الايه
بعد ان كان الناس تخدمه وتوفر له كل شيء
لازم يرد هذا الدين الذي كنا نحمله طول حياتنا
وبتواجدكم وتفعالكم للاحداث اي شيء يكون على ما يرام
تشكر اخي ود رحمة على الاطراء

Quote: إقتراح جميل ونحن جاهزين لأي مساهمة ، وسنعمل على تفعيل الإقتراح معكـ ومع اللجنة

وهو كذلك

.
.
عاطف رميتي
تشكر ومعليش لم الاحظ خروجك وقت الحفل مبكر ولم نقم معك بواجب الضيافة ...
الجايات كُتار

الأخ وليد

سلام

أرجو توصيلنا بالأخ فائز ود القاضى

لأمر هام

وشكراً

عاصم فقيري

جوال 0504986935

عصام فقيري ... سلامات
وتشكر على المرور من هنا

Quote: الأخ وليد سلام أرجو توصيلنا بالأخ فائز ود القاضى لأمر هام وشكراً عاصم فقيري جوال 0504986935

رسالتك وصلت الى ود القاضي لكن ماعرفنا رايك في اقتراحنا دا
شكلك زعلان وقالب لينا البرنيطة
المهم تكون بلغت الصحة ...

شكراً يا وليد على الإهتمام

وفعلاً إتصل ود القاضي لكن إتصل من تلفون ثابت وعمل لي مس كول كمان من جواله بس لمن رجعت إتصلت عليهو في الجول لقيت (هذا الرقم لا يمكن الإتصال به الآن)

شفت حركات ود القاضي دي

أما بخصوص رأيي :

يا أخوانا زول يده تتكسر ويدخل عملية جراحية كبيرة ويكون راقد في البيت لشهر ونصف وما زلت أتلقى علاج طبيعي

وإنتوا ولا هنا واحدين تلفون ما إتصلوا بيهو دي إجتماعيات شنو

هي الإجتماعيات دي مش أولى أن تكون في زيارة المرضى قبل الإحفالات الراقصة !!

ولا أنا غلطان؟

لو غلطان قولوا غلطان


مع تحياتي

عاصم فقيري

ود فقيري

Quote: يا أخوانا زول يده تتكسر ويدخل عملية جراحية كبيرة ويكون راقد في البيت لشهر ونصف وما زلت أتلقى علاج طبيعي وإنتوا ولا هنا واحدين تلفون ما إتصلوا بيهو دي إجتماعيات شنو هي الإجتماعيات دي مش أولى أن تكون في زيارة المرضى قبل الإحفالات الراقصة !! ولا أنا غلطان؟ لو غلطان قولوا غلطان

ماغلطان تب وعداك العيب
لكن برضوا نحاول نجد العذر للناس وانت عارف مشاغل البلد دي
شوف انا اقرب زول ليك وما قمت بالواجب كما هو مطلوب
وعارف عتابك للناس من اجل محبتك لهم
ولكن حضورك يوم الحفل كان سوف يبهج الناس وتكون فرصة لهم لكي تبادلهم المحبة والعتاب
اجر وعافية ياطيب
وربنا يحفظك من كل شر

اولاً الف لا بأس عليك اخي عاصم فقير


ثانيا يا ناس اللجنة والمتابعين الهم العام من عضوية البورد في جدة هذه هي المرة الثانية الناس تتلوم دون تقصير في أداء واجب كان يجب أن يعرف الناس على الأقل تتصل وتطمئن على صحة الرجل والله انا قرأت هذا الخبر اليوم ولا علم لي وفي مثل هذه الظروف البوست في المنبر ما كفاية يجب الناس تلاحظ من دخل للبوست ومن علق ويتم الاتصال بمن لم يتواصل والتلفونات اكيد متوفرة مع الكل ..

نعتذر لأخونا عاصم ..


ويا وليد نوافق ونبصم بالعشرة ..

العمده شحوتاي تشكر كتير

Quote: ويا وليد نوافق ونبصم بالعشرة ..

الحبيب / وليد عبد اللطيف
تحايا طيبة
نقدر همتكم العالية وندعو لكم بالتوفيق دائما يا رب
وموافقين على الاقتراح وعلى أي طريقة لتفعيل هذا الاقتراح

للأخ عاصم فقيري العتبى حتى يرضى

لك الشكر والتقدير أخونا العمدة آدم شوحتاي

وما تشوف شر إنشاء الله

مع تقدير وإحترامي

عاصم فقيري

الاخ عاصم فقيري لم نسمع إلا من خلال هذا البوست

لكـ العتبى حتى ترضى ياعاصم وكفارة وحسنة وأجر ...

وأتفق مع حديث العمدة شحوتاي في ضرورة تفعيل الإعلام الإجتماعي

شيخ جعفر محي الدين
حضورك الى مكتبي وتفاعلك مع الحدث هذا يدل حرصك
على جسم بورداب جدة ومشاركاتهم في كل صغيرة وكبيرة

Quote: وموافقين على الاقتراح وعلى أي طريقة لتفعيل هذا الاقتراح

اشكر طريقتك الجميلة التي تعاملت بها معنا حين علمت بخبر برنامج الحفل
تشكر على المرور والتفاعل

نؤيد ياوليد

Quote: الاخ عاصم فقيري لم نسمع إلا من خلال هذا البوست لكـ العتبى حتى ترضى ياعاصم وكفارة وحسنة وأجر ... وأتفق مع حديث العمدة شحوتاي في ضرورة تفعيل الإعلام الإجتماعي

التحية لكم صديق رحمة

وألف شكر


مع تقديري وإحترامي

عاصم فقيري

الاخ الارباب صلاح عثمان

Quote: نؤيد ياوليد

تشكرك على المرور وانت زول واجب دائما
كما نشكر اهتمامك المتواصل والسؤال عن كل مايدور بخصوص برامج بورداب جدة

الأخ عاصم فقيري

سلامات يارجل كفارة وعافية يارب

الإجتماعيات من المفروض تنقل عبر أقرب الأشخاص لك حتي يعلم بها الكل وياما ما في بورداب أصابهم ما أصابهم من فرح وترح ولم نعلم بهم إلا بعد مرور الحادثات بكثير المهم لا بد من تواصل أكثر وترابط إجتماعي أعمق وياحليل الرجل الهميم رجل جده الأول بلا منازع وهو البوردابي العتيق الرفاعي عبدالعاطي حجر هو كان الدينمو المحرك إجتماعي مع من يختلف معهم قبل الأحباب وهاهو يغيب عنا حوالي الست شهور ولا أحد يسأل منه !

،،،،أبوقصي،،،،

الأخ الاستاذ / عاصم فقيرى
تحية وأحترام وتقدير ،،

أولا وقبل أن أسترسل فى سلامى لك العتبى أيها الحبيب الغالى
وألف سلامه لك .. والله وحده يعلم لوكنت أعلم لحضرت اليك حافيا
فمثل هذه الاشياء هى التى تستوجب الحضور ..

مرة أخرى ونيابة عن كل البورداب نقول لك سلامتك إنت ياغالى
سلامتك وألف كفاره .. تحياتى وأحترامى وتقديرى بلاحدود ..

تاج السر

الاخ عاصم فقيري
الف الحمد لله على السلامه
كان من المفترض ان نقوم بزيارتك قبل اسبوعين
معي الاخ وليد لكن هناك بعض الاسباب حالت دون
اتمام الزيارة ولك العتبى اخي حتى ترضى
والدعوة من هنا الى جميع البورداب ان يتم
تحديد يوم لنقوم بزيارة للاخ عاصم
مع تحياتي لك

الاخ عاصم فقيرى
اجر وعافية وما تشوف شر
نتعشم ان تقبل اعتذارنا عن التقصير فى اداء الواجب تجاهكم
نتمنى لك عاجل الشفاء

الاخ وليد
نوافق

Quote: الأخ عاصم فقيري سلامات يارجل كفارة وعافية يارب الإجتماعيات من المفروض تنقل عبر أقرب الأشخاص لك حتي يعلم بها الكل وياما ما في بورداب أصابهم ما أصابهم من فرح وترح ولم نعلم بهم إلا بعد مرور الحادثات بكثير المهم لا بد من تواصل أكثر وترابط إجتماعي أعمق وياحليل الرجل الهميم رجل جده الأول بلا منازع وهو البوردابي العتيق الرفاعي عبدالعاطي حجر هو كان الدينمو المحرك إجتماعي مع من يختلف معهم قبل الأحباب وهاهو يغيب عنا حوالي الست شهور ولا أحد يسأل منه ! ،،،،أبوقصي،،،،

مجدي فضل من كلامك دا ما فهمنا موافق ام غير موافق
حسب فهمي انك غير موافق ممكن تورينا الاسباب امكن نحن نقتنع بيها ونعمل برايك وفكرتك
وكذلك استاذ تاج السر

Quote: الأخ الاستاذ / عاصم فقيرى تحية وأحترام وتقدير ،، أولا وقبل أن أسترسل فى سلامى لك العتبى أيها الحبيب الغالى وألف سلامه لك .. والله وحده يعلم لوكنت أعلم لحضرت اليك حافيا فمثل هذه الاشياء هى التى تستوجب الحضور .. مرة أخرى ونيابة عن كل البورداب نقول لك سلامتك إنت ياغالى سلامتك وألف كفاره .. تحياتى وأحترامى وتقديرى بلاحدود .. تاج السر

او كما يقول اخونا عصام فقيري

Quote: ولا أنا غلطان؟ لو غلطان قولوا غلطان

احمد التجاني ... سلامات

Quote: الاخ وليد نوافق

بالله شفتوها كلمه ساهلة وبسيطة كيف حتى العكس منها ( لم اوافق ) برضو ابسط منها

Quote: مجدي فضل من كلامك دا ما فهمنا موافق ام غير موافق حسب فهمي انك غير موافق ممكن تورينا الاسباب امكن نحن نقتنع بيها ونعمل برايك وفكرتك وكذلك استاذ تاج السر

الأخ وليد

لقد قلت لك هذة الفكرة قديمة جدا وسبق أن طرحناها كثيرا علي البورداب وأولها حصر البورداب المواكبيين لحركة بورداب جده وهناك بورداب نجدهم علي صفحات المشاركات فقط وعمرهم لم يأتوا لتجمع قط لذا لم تكن الفكرة جديدة علينا ونحن هنا نكون مع الغالبية دائما وهي ديمقراطية نرضاها وهي ديدن العمل العام سوي في بورداب جده أو اي تجمع عمل عام ولك أن تجرب يا أخي ونحن مع الغالبية (وأنا طرحت لك الأمر مرارا وياريت يكون الأمر بواسطة اللجنة المكلفة التي لم تجتمع ولا مره منذ التكوين !!) ارجو أن أكون أوصلت لك ما ارمي له،
بالعربي البسيط .

،،،،أبوقصي،،،،

عفواً وليد على التأخر في الرد

الأستاذ تاج السر والأستاذ أبو قصي

لكم الشكر الجزيل على سؤالكم

ونسأل الله أن يجمعنا في لحظات خير ويجمع قلوبنا عليه

مع تقديري وإحترامي للجميع

عاصم فقيري

حبيبي يا مجدي فضل

Quote: بالعربي البسيط .

كلامنا لفظُُ مفيد كقم واستقم
.
.
برضو بالعربي البسيط مافهمت كلامك
لان كلامك الذي تقوله لي شيء والذي تكتبه هنا شيء اخر
لم اعرف للان من هم اللجنة القديمة والجديدة
لانه كل اجتماعاتنا عبارة عن ونسة ولم نحسم الامور كما يجب ان تحسم
واي شيء يفترض يكون كتابياً
ويكون هنالك تسليم وتسلم وهذه ابسط الاشياء في العمل العام
حتى اللجنة تستطيع ان تجتمع وتحدد المسئوليات
طيب واحد اتصل علي زعلان من الاعضاء
وقال تاني ياوليد ماتجمع لينا قروش وماتعمل لينا حاجة باسمنا
قلت له : بصفتك
قال : انا اقدم منك ... ( عجييييييييييييييييييييب )
شفت كيف يامجدي اي شيء لما يكون عبارة عن ونسه بيعرض الناس لمثل هذه الاشياء
ياريت الناس تكون جادة شوية ...

Quote: كلامنا لفظُُ مفيد كقم واستقم

دي أنا المافهمتها أرجو الشرح ؟؟

من الذي قال لجنة قديمة وجديدة هذة في مخيلتك راجع كلامي أعلاه

كلامي مفهوم لو فيهو اي شي غير مفهوم فاليقوموني احبتنا

وعني شخصيا لم أقم بشئ يخص البورداب من اليوم فصاعدا

واسبابي احتفظ بها لشخصي البسيط جدا مع قامات كبيرة بيننا

والديمقراطية تمشي علي وعلي الجميع واما عن اللجنة الجديدة

هي لجنة أفطار رمضان الماضي وفي تأبيين عماد كونت لجنة تجمع

بين لجنة الأفطار وتلك اللجنة،

وبعدين تسليم وتسلم شنو يا صحبي أنت قايل البورداب ديل لهم

دار وميزانية وحساب جاري يا زول الناس ديل تكونوا ببساطة لا تتخيلها مطلقا

وبالنفس البساطة دي خلي اللجنة تكون لجنة شرعية بعد الأحصاء وتكون جمعية عمومية

ومن ثم لجنة تنفيذية وتتقلد العمل الذي هو تكليف ولا تشريف .

،،،،أبوقصي،،،،

Quote: كلامنا لفظُُُ مفيد كقم وإستقم

دي من شرح الفية بن مالك لقواعد اللغة العربية وبداتها شرح الكلام
طبعا انت حاولت تشرح لي بالعربي البسيط تخيل مافهمت كلامك

Quote: وعني شخصيا لم أقم بشئ يخص البورداب من اليوم فصاعدا واسبابي احتفظ بها لشخصي البسيط جدا مع قامات كبيرة بيننا

طبعا هذه اشياء تخصك وراجعه ليك حسب وجهة نظرك في الناس التي تتعامل معهم
من حقك تتوقف ومن حق تمتنع عن توضيح اسبابك ...

Quote: والديمقراطية تمشي علي وعلي الجميع واما عن اللجنة الجديدة هي لجنة أفطار رمضان الماضي وفي تأبيين عماد كونت لجنة تجمع بين لجنة الأفطار وتلك اللجنة،

السودانيين بطبعهم ديمقراطيين ومسامحين جدا
ونمارسة في الاحياء قبل المؤسسات في الجمعيات التعاونية
وممكن الواحد يتلاعب بحقوق الناس وبعدين نقول عفى الله عن ما سلف
وهذه من ضمن الاشياء التي تعمل على تأخير الكثير من الاعمال وعلى تأخير البلد
نحن عايزين تمشي علينا النظام واللوائح التي تحكم مثل هذه الاعمال

Quote: وبعدين تسليم وتسلم شنو يا صحبي أنت قايل البورداب ديل لهم دار وميزانية وحساب جاري يا زول الناس ديل تكونوا ببساطة لا تتخيلها مطلقا وبالنفس البساطة دي خلي اللجنة تكون لجنة شرعية بعد الأحصاء وتكون جمعية عمومية

معقول يامجدي إلا يكون هنالك دار وميزانية حتى يكون هنالك تسليم وتسلم
تعرف البساطة دي عن شخصي بشوفها تفتقر للتنظيم
لانها احيانا تضعف العمل الجماعي وممكن اي انسان يتدخل في عمل اللجنه
ياحبيبي اذا كان هنالك نظام لدفع رسوم الاشتراكات
ووضع لوائح تحكم المجموعة وتحكم اللجنه التي تسير العمل اكيد ليس يكون هنالك خروقات وهدم العمل الجماعي
حسب المفاهيم الفردية التي تقول انا مابحب فلان وفلان لم يجاملني لم اجامله
وان اقترحت عمل والناس لم تتفاعل معه ولم تساهم معي
شفت كيف يامجدي لذلك لابد من النظام والتنظيم
ومن حق الاعضاء النقد للجنه التي تشرف على سير العمل وتقدم اقتراحاتها في جمعية عمومية
ولكن ما من حق اي شخص يرفع تلفون ويتحدث او يوجه نقدة الى احد اعضاء اللجنه بحجة الاقدمية له
كما حدث معي وبدون ذكر الاسماء حتى اذا كان اخي او صديقي
هنا تحكمنا اللوائح والنظم وليس الديمقراطية حبيبي مجدي فضل
وهذا انا ارمي به لعدم فهم العمل الجماعي
.
.

Quote: ومن ثم لجنة تنفيذية وتتقلد العمل الذي هو تكليف ولا تشريف

اخي مجدي تعرف مثل هذا الكلام تخيل ممكن طول عمرك اذا دخلت اي تجمعات او مؤسسات يقابلك
ياخي دا طلع حنك عاضي وبيش وكلام نظري
لابد من التنظيم حتى يرتفع العمل الى مستوى الجودة
.
.
عن نفسي يامجدي فضل اتشرف اذا سنحت لي الفرصة ان اقدم كل مابوسعي في سبيل خدمة المجموعة والمجتمع
.
.

تحياتي ياصديقي شفت كيف الشفافية لو لا نقدي لك
كنت لم تقول سوف تتوقف عن العمل الذي يخص بورداب جدة الذي انا اعرفة ولم يعرفة الغير ...
يعني لما اي واحد يحمل مثل ما تحمله انت في قلبك ولم تبوح به سوف يموت العمل الجماعي وينفض الحفل
وممكن امثالك كثر ..

كان ممكن ارفع السماعة ونتناقش في هذا الموضوع والبينا عامرة كما تعلم يا صديقي وود حلتنا ونديها كمان شوية رطانه
ولكن ماذا نستفيد نحن كمجموعة ...

أخي عاصم فقيري

تحية وتقدير

حمدا على سلامتك مجددا

وأعتذر عن تقصيرنا في معاودة زيارتك , ما هي الا المشاغل وجري الدنيا الما بكمل

ياخ أكتشفت انو اليوم في جده بقى قصير , ولا ما عارف يمكن الأربع وعشرين ساعه

بقت ما كافية لانجاز كل مهام اليوم الواحد .

وما في النفوس الا الخير

وبركة الشفناك طيب

أخي البشير

شكراً لكم

يا أخي إنت بالذات ما قصرت هو إنت ود/ بشرى الفاضل وعصام دهب من بورداب جدة الوحيدين اللي سجلتم زيارة خاصة لي


إنشاء ما نجيكم في شينة زي ما بيقولوا أهلنا نردها ليكم في زيارة فرح إنشاء الله

ولكم مني وافر التقدير والإحترام

عاصم فقيري

أخى وليد ( صاحب المواهب المدفونه ) تحياتى وتقديرى .. وعذرا
لأن حكاية أخونا عاصم أنستنى بأن أدلو بموافقتى على الطرح
الذى جاء من قبلكم .. يا أخى ( نبصم بالعشرة ) .. مع التحية
والتقدير ..

تاج السر

الاستاذ تاج السر ... سلامات

Quote: أخى وليد ( صاحب المواهب المدفونه ) تحياتى وتقديرى .. وعذرا لأن حكاية أخونا عاصم أنستنى بأن أدلو بموافقتى على الطرح الذى جاء من قبلكم .. يا أخى ( نبصم بالعشرة ) .. مع التحية والتقدير ..

تشكر اولا تشكر على موافقتنا الراي
ولكن قصة المواهب
امي الله يديها العافية من زمان تقول لي انت عندك زار
وانا ارشح ان يكون عندي اللوليه وليس الخواجة
هه هه هه
.
.
الفنانه ( منى بحري ) حدثتها بكلامك الطيب عنها وانبسطت جدا
وقالت مستعدة لناس جده في كل مناسباتهم ...

الاخ العزيز وليد عبد اللطيف

نوافق تماما ما بالعشرة بالتلتمية

تطلع كم ؟؟؟؟؟؟؟؟؟؟؟؟؟؟؟؟

الأستاذ صلاح عثمان والأستاذ أحمد التيجاني

لكم الشكر الجزيل على سؤالكم

ونسأل الله أن يجمعنا في لحظات خير ويجمع قلوبنا عليه

مع تقديري وإحترامي للجميع

عاصم فقيري

الاخ عاصم فقيرى اجر وعافية انشاء اللة
وتقبل اعتذارنا حقيقة لم اسمع بخبر مرضك
الا فى هذا البوست فياخى بعد الشر عليك.
هنالك بوست قديم بأسم ( ركن بورداب جدة )
وضع خصيصا للتواصل ومعرفة اخبار المجموعة
نتمنى عودتة ليواصل ما انقطع هنا من اخبار
همتك يامجدى لعودة الركن وطلة الاحباب...


الاخ وليد تحياتى وتقديرى لجهدك الوافر من اجل المجموعة
تمت الكثير من الفعاليات لبورداب جدة من دون انظمة ودساتير
من الممكن طبعا تقريب وجهات النظر والدعوة الى جلسة عامرة
يتفق عليها فى اواخر الاسبوع نقترح لها ساحة المطار القديم
وتكون بعد نهاية اختبارات المدارس والتى ستبدأ الاسبوع القادم
وتستمر لمدة اسبوعين ( نوافق على المقترح مبدئيا الى حين الاجتماع )
سوف اقوم بمهاتفتك للمزيد من التشاور فى صبيحة الغدان شاء اللة.

Quote: الاخ عاصم فقيرى اجر وعافية انشاء اللة وتقبل اعتذارنا حقيقة لم اسمع بخبر مرضك الا فى هذا البوست فياخى بعد الشر عليك. هنالك بوست قديم بأسم ( ركن بورداب جدة ) وضع خصيصا للتواصل ومعرفة اخبار المجموعة نتمنى عودتة ليواصل ما انقطع هنا من اخبار همتك يامجدى لعودة الركن وطلة الاحباب...

الأخ نور الدين الفحل

الشكر الجزيل لكم

وإنشاء الله ما تشوف شر

وربنا يجمعنا في لحظات خير دائماً

مع تقديري وإحترامي

عاصم فقيري

الريس السماني عمارة

Quote: الاخ العزيز وليد عبد اللطيف نوافق تماما ما بالعشرة بالتلتمية تطلع كم ؟؟؟؟؟؟؟؟؟؟؟؟؟؟؟؟

تطلع 3000
نشكر مرورك المُشرف وافتقدناك حقيقة مع الجمع الكريم
كان مفروض اتصل على الاخ كمال و عليك لكي نشوف اخبارك بعد ان انتهت مكالمتي مع الريس يوسف محمد يوسف والدكتور عارف
لكي نطمئن عليهم بسبب عدم حضورهم رغم تأكيدهم بداعي الامطار صراحة انشغلت
وطلعت من المكتب مباشرة
نطلب السماح ياقريبي

الاخ نور الدين الفحل

Quote: من الممكن طبعا تقريب وجهات النظر والدعوة الى جلسة عامرة يتفق عليها فى اواخر الاسبوع نقترح لها ساحة المطار القديم

المطار القديم غير مريح للاجتماعات سوف تكون هنالك حركة وضجيج الجوالات
والونسات الجانبية افضل قصر الخليج والمساهمه 50 ريال مع وجبة عشاء وممكن الحديث يكون بمكبر صوت
او حديقة مقفوله مثل حديقة الشرفية ونؤجر لها كراسي وترابيز ...

Quote: تمت الكثير من الفعاليات لبورداب جدة من دون انظمة ودساتير

ممكن كل يوم نعمل فعالية ونلم الناس وتنجح ولكن لانجني ثمار لمتنا كما نحب
وهذه من ضمن الاشاء التي تركت اخي وصديقي مجدي فضل يمتنع عن العمل
نحب الاستمرارية ونخطط لطريق مبني على التنظيم وممهد للاجييال القادمة وهذه سنة الحياة

Quote: سوف اقوم بمهاتفتك للمزيد من التشاور فى صبيحة الغدان شاء اللة.

مرحب بيك اخي نور الدين
وهذا تلفوني 0557456728

.

أها بقينا على شنو ؟

.

سلام ..

Quote: المطار القديم غير مريح للاجتماعات سوف تكون هنالك حركة وضجيج الجوالات والونسات الجانبية افضل قصر الخليج والمساهمه 50 ريال مع وجبة عشاء وممكن الحديث يكون بمكبر صوت او حديقة مقفوله مثل حديقة الشرفية ونؤجر لها كراسي وترابيز ...

فندق قصر الخليج .. وعشاء .. ومنصرفات .. معقولة عشان اساهم بــ25 في الشهر اجي اعمل لقاء لذلك بتمن اشتراك شهرين؟

Quote: فندق قصر الخليج .. وعشاء .. ومنصرفات .. معقولة عشان اساهم بــ25 في الشهر اجي اعمل لقاء لذلك بتمن اشتراك شهرين؟

ياحبيب ممكن تاخد بالاقتراح التاني

Quote: او حديقة مقفوله مثل حديقة الشرفية ونؤجر لها كراسي وترابيز ...

وعلى قول السعوديين تجيب لينا معاك تلاجة شاي او قهوه شرقية وصينية كنافة
واي واحد يضع فرشة خلف السيارة والناس تجلس عليها ونكون وفرنا حق العشاء وايجار الكراسي والترابيز
ونوفرها لاشياء اخرى زات ضرورة
.
.
شفت كيف ياود القاضي لو عايز توفر بتوفر