إبتداءا من 15 يناير حانكتشف الشرفاء من الأمنجية من بورداب الخرطوم!!

Post: #1
Title: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 04:44 AM

حسب الطريقة الباريسية..

Post: #2
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 04:52 AM
Parent: #1

بعد اطناشر ساعة وربع من الآن..

Post: #3
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: الشفيع وراق عبد الرحمن
Date: 01-15-2011, 06:26 AM
Parent: #2

Quote: حسب الطريقة الباريسية.

دي ما فهمناها يا بله

Post: #4
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 06:29 AM
Parent: #3

Quote: دي ما فهمناها يا بله

الشفيع

ياخى الحكاية دى واضحة والله الختمى يفهما!

Post: #5
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: علاء الدين يوسف علي محمد
Date: 01-15-2011, 06:31 AM
Parent: #4

15 ولاّ 16 يا دكتور

Post: #6
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 06:34 AM
Parent: #5

ياعلاء

15 بتوقيت باريس

ماتبارو بوستاتنا دى تجيبو لينا شبهة هههه

Post: #8
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: HAIDER ALZAIN
Date: 01-15-2011, 06:57 AM
Parent: #6

اعتقد انهم انكشفو من بداية يناير 2005م
انت جيت متأخر

اما عمنا وهبة فقد كشف نفسه منذ اغسطس 2008م
ومن والاهو كابوالسيد المسلمي وود لرششيد ومن لف لفهم فهم غويصيين وغارقين في الشغلة حتي النخاع

ــــــــــ
معاً من اجل خرطوم خالية من الامنجية ومن لف لفهم

Post: #7
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: عاطف مكاوى
Date: 01-15-2011, 06:45 AM
Parent: #3

Quote:

حسب الطريقة الباريسية

العزيز د. بلة
تحية طيبة

أعتقد أن الأستاذ سالم أحمد سالم قد اجتهد ... وأسوأ الفروض سيكون له أجرها ان لم تأتي فكرته (الباريسية) أُكلها...

*أذكر أننا قد قرأنا للشهيد عبدالخالق محجوب قولا للطلاب الذين كانوا يدرسون بالخارج :
(عودوا الينا بأرفع الشهادات العلمية ... وأغني التجارب الثورية).

وهاهو أستاذ سالم يستفيد من تواجده بالخارج ويأتي لنا بفكرة .... قابلة للاحتمالين .... (النجاح وعدمه)

* كما أن بورداب الخرطوم ليس عليهم بالضرورة أن يوافقوا علي كل طرح أو فكرة ... ولكن علي غير الأمنجية والأذناب
دور يجب أن يقومون به تجاه شعبهم .....
أما كيف؟
فمن كل حسب رؤيته ومقدراته........

وللأستاذ سالم نقول :
شكرا ....لكونك فكرت في شكل من أشكال المقاومة...... والتي التف حولها الكثيرون..... وهذا أضعف المردود.

Post: #9
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: ريهان الريح الشاذلي
Date: 01-15-2011, 07:00 AM
Parent: #7

Quote: وللأستاذ سالم نقول :
شكرا ....لكونك فكرت في شكل من أشكال المقاومة...... والتي التف حولها الكثيرون..... وهذا أضعف المردود.

وشكرا لك عاطف ...

Post: #10
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 07:19 AM
Parent: #9

Quote: اما عمنا وهبة فقد كشف نفسه منذ اغسطس 2008م
ومن والاهو كابوالسيد المسلمي وود لرششيد ومن لف لفهم فهم غويصيين وغارقين في الشغلة حتي النخاع

حيدر الزين

من ذكرتهم مناضلين اندركفر ( يعنى غواصات معارضة)

Post: #11
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 07:22 AM
Parent: #10

Quote: وهاهو أستاذ سالم يستفيد من تواجده بالخارج ويأتي لنا بفكرة .... قابلة للاحتمالين .... (النجاح وعدمه)

نتمنى النجاح ياعاطف

وما أسهل النضال فى خشم الباب

واصلنا شعب يحب ضل العصر.

Post: #12
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Abdelmuhsin Said
Date: 01-15-2011, 07:44 AM
Parent: #11

يا اخواننا .. نكلمكم النصيحة

سالم احمد سالم ده رجل جاوز السبعين. سنة 1970 كان رئيس قسم بجريدة الايام المايوية واستمر حتى سقطت مايو يسبح مع بقية المسبحين فى الصحافة المايوية بذكر الرئيس القائد الذى بعثت به الاقدار للسودان .. ما تصدقوا الدجل والبطولات الوهمية البكتبتها عن نفسه ..

سالم ده رفيق (الدكتور) مصطفى محمود الذى تعلم الردح الوطنى وبدأ مسيرته النضالية الكيبوردية بعد ما بلغ الثامنة والستين من عمره (قبل ده ما كان معروف بعمل فى شنو) ..

نوع سالم ومصطفى محمود ديل بلغوا ارذل العمر. عايشين على الولفير والاعانات الاجتماعية الاوربية، وما عندهم شغلة يشتغلوها ولا حاجة يعملوها فقرروا يتحولوا لمناضلين ..

قلت لى يا بلة شيخ سالم الباريسى قال الناس يطلعوا يقيفو فى الضللة قدام خشم الباب لحد ما نظام الانقاذ يسقط؟ الظاهر شيخنا سالم
ضربو الزهايمر ونسى ان الكمبيوترات البنناضل منها دى ما عندها ابواب عشان نطلع نقيف برة الكمبيوتر يوم خمسطاشر المذكور ..

Post: #13
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 08:20 AM
Parent: #12

Quote: قلت لى يا بلة شيخ سالم الباريسى قال الناس يطلعوا يقيفو فى الضللة قدام خشم الباب لحد ما نظام الانقاذ يسقط؟

عبد المحسن ياغواصة

دى أفكار مستوردة ماتستهين بيها

Post: #14
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: محمد حيدر المشرف
Date: 01-15-2011, 08:22 AM
Parent: #12

Quote: وللأستاذ سالم نقول :
شكرا ....لكونك فكرت في شكل من أشكال المقاومة...... والتي التف حولها الكثيرون..... وهذا أضعف المردود

شكرا يا عاطف ..

Post: #15
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: د.نجاة محمود
Date: 01-15-2011, 08:44 AM
Parent: #14

لووووووووووووووول
الزول داطاع من السودان قبل المترين الزيادة ولا كيف!!!
قوليه السودانين عن بكرة ابيهم من العصر الضيق بمرقوا في الشارع

اولاد في اللستك يتحدثون عن الكرة وبنات الحلة الجنبهم

والرجال والنسوان الكبار قاعدين في الشارع يشربوا في القهوة
ويتكلمو عن زمن جوز الجمام فيه تلاتة والف الطوب فيه الفين

ومتوسطو العمر من الرجال مغتربين ولا قادين السلك بلجوء سياسي في بلد ما
والنساء قاعدات في المترين المقتطعة من الشارع وعاملين فيها راكوبة راقية بالحصير
يتكلموا عن توب فلانة وبت فلانة عرسوها سدو مالها 100 مليون..
بت ناس علانة خطيبها خلاها.

الزول يمرق من زمن اسكت السودان متحجر ومتجمد في مخيلته

العايز يغير النظام يجي السودان ينظم الشعب الفضل المكون من شباب اللستك وعجائز النوستالجيا ونسوان برندة الشارع ديل..

Post: #16
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Mohamed Yassin Khalifa
Date: 01-15-2011, 09:19 AM
Parent: #15

Quote: ياخى الحكاية دى واضحة والله الختمى يفهما!

دي نكتة يا دكتور بلة... موش كده؟

Post: #17
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: ناذر محمد الخليفة
Date: 01-15-2011, 12:52 PM
Parent: #16

!!!!

Quote: حسب الطريقة الباريسية..

أوع دي تكون طريقة الطشت !!!!

Post: #18
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: عبدالله احيمر
Date: 01-15-2011, 03:49 PM
Parent: #17

Quote: فمن كل حسب رؤيته ومقدراته........

ألأخ بله
السـلام عليكم

* لكم في غاندي أو جيفارا تجربتان نقيضتان وكل حسـب قناعته و الظرف المحيط
* لا تبخسـوا الناس اشــياءهم ,
* المقترح يســير في نفس خـط التراكم التعبوي , وهـو لييس دعـوة للثورة
* هـل سـاند ( سـالم ) مايو أكتر من الترابي ( معارض اليوم ) , وهل كونه كان
صحفي في مايـو يســقط حقـه في إبداء الرأي و معارضة النظام
الله يهدينا و يهديكم و يهدي من جاء بحكاية مشـاركته في مايو

Post: #19
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: الطاهر ساتي
Date: 01-15-2011, 06:12 PM
Parent: #18

Quote: ياخى الحكاية دى واضحة والله الختمى يفهما!

حد يصحي ياسر طيفور والشايقي ورغيم

...........
لحسن الحظ الحدث بيصادف ورديتي
يعنى اصلا ح اكون في الشارع ههههه

Post: #20
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: الطيب رحمه قريمان
Date: 01-15-2011, 06:56 PM
Parent: #19

الاخ بلة

لك التحية الطيبة و التقدير

هناك امنجية و حرامية فى نفس الوقت "ود اسحق"

و هناك امنجية امنجية بالجد " عمر اللاصديق"

Post: #21
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: محمد ميرغني عبد الحميد
Date: 01-15-2011, 09:57 PM
Parent: #20

احم

Post: #22
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Abdelmuhsin Said
Date: 01-15-2011, 10:24 PM
Parent: #21

* هـل سـاند ( سـالم ) مايو أكتر من الترابي ( معارض اليوم ) , وهل كونه كان صحفي في مايـو يســقط حقـه في إبداء الرأي و معارضة النظام

سؤال وجيه. الاجابة ب (لا). لا يسقط حقه ابدا ...

بس شيخنا سالم ده بتاع مصالح ذاتية وبطولات وهمية وما عنده موقف ولا حاجة. لما بعض الصحفيين قبلوا الحوار مع الانقاذ وشاركوا فى مؤتمر الاعلاميين هو اول واحد ركن عربيته جوة السفارة السودانية فى باريس وهرول الى الخرطوم.. قال عايز يحاور ومؤمن بالحوار مع الانقاذ .. وبعد داك رجع لقى الناس مطالبة بالثورة على الانقاذ ورافضة الحوار. قال ما فى عوجة وطوالى هوب تلّب ركب معاهم وبقى ينظر ليهم ويرشدهم الى طريق الثورة ..

يعنى لما ينادوه ناس الانقاذ جرى على طول بدون تعطيل.. ولما ينادوه المناضلين جاهز تحت الطلب ..

والله تبارو نوع سالم ده يوديكم التوج ..

مخيرين ..

Post: #23
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 10:42 PM
Parent: #22

دكتورة نجاة الأمنجية

بتضحكى مالك؟

Post: #24
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 10:43 PM
Parent: #23

Quote: دي نكتة يا دكتور بلة... موش كده؟

نعم نكتة يامحمد

Post: #30
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 11:06 PM
Parent: #22

Quote: والله تبارو نوع سالم ده يوديكم التوج ..

عبد المحسن

عايز تقول يعنى موقفم لمبة؟

Post: #29
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 11:03 PM
Parent: #21

محمد ميرغنى

دستور يا اولاد ماما فرنسا!

Post: #28
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 11:02 PM
Parent: #20

Quote: هناك امنجية و حرامية فى نفس الوقت "ود اسحق"

و هناك امنجية امنجية بالجد " عمر اللاصديق"

الطيب ياقريمان

الحمد لله ربنا أدانا طريقة علمية لكشف الأمنجية..

تعرف يا الطيب بعد أن نعريهم فى هذا الظرف صنما صنما حا أكتب فيهم قصيدة هجائية معارضة لمعلقة عنترة بن شداد..

هل غادر الكيزان من متقرضم***أم هل عرفت الأمن بعد تورم

Post: #27
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 10:58 PM
Parent: #19

Quote: حد يصحي ياسر طيفور والشايقي ورغيم

الطاهر ساتى

ياخى ماسمعت بنكتة مابدرى ياخليفة؟

وهذه النكتة (مابدرى ياخليفة) لو صادفت ختمى مغرض حايعتبر العتود فى كسلا يساوى الشيوعى فى بيت المال.

Post: #26
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 10:54 PM
Parent: #18

Quote: * لكم في غاندي أو جيفارا تجربتان نقيضتان وكل حسـب قناعته و الظرف المحيط
* لا تبخسـوا الناس اشــياءهم ,

عبد الله الإحيمر

تحياتى

ياخى نحنا ناس عواجيز من زمن عزالدين بيرسم الأزهرى غنماية بنظارات..

الحكاية ما تبخيس ولكنه نقد ساخر ( وحق النقد مكفول)

والناس ممكن تفهموا فى إطار النقد وفى نفس الوقت نضحك والزعل مرفوع..

أنا يا عبدالله بفتكر الديمقراطية وسبل النضال لازم تنمو من جذورها, فكثير من الأزهار التى تينع فى مكان ليس بالضرورة أن تنمو فى مكان آخر, وإذا قطفتها لتنقلها لمكان آخر ستذبل, لذلك عليك أن تبحث بدل الياسمين عن البرم إن كان ممكنا ويفى بالغرض وتحاول تطويره ليعطيك منظرا ورائحة أفضل.

Post: #25
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 10:45 PM
Parent: #17

Quote: أوع دي تكون طريقة الطشت !!!!

ياناذر

دى معناها النضال الفرنساوى (بس خفت من التأويل)

Post: #31
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: الطاهر ساتي
Date: 01-15-2011, 11:07 PM
Parent: #25

بلة ماتكسر المجاديف ياخ

..............
يومك ده لو صادف الجمعة بيكون معاك باسطة
برنامج قهوة اسبوعي في دربزين خالي قدام بيتو( مترين نجاة)
بنصلي المغرب وبندخل، لكن تقديرا للنداء ده ممكن نجرو للعشاء

Post: #32
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Abdelmuhsin Said
Date: 01-15-2011, 11:28 PM
Parent: #31

أنا يا عبدالله بفتكر الديمقراطية وسبل النضال لازم تنمو من جذورها, فكثير من الأزهار التى تينع فى مكان ليس بالضرورة أن تنمو فى مكان آخر, وإذا قطفتها لتنقلها لمكان آخر ستذبل, لذلك عليك أن تبحث بدل الياسمين عن البرم إن كان ممكنا ويفى بالغرض وتحاول تطويره ليعطيك منظرا ورائحة أفضل.

ما شاء الله .. تبارك الله...

انت يا بلة آخر الزمن عايز تبقى "حكيم" ولا شنو؟

خليت شنو لى فولتير وجان جاك روسو؟

Post: #33
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 11:49 PM
Parent: #32

Quote: يومك ده لو صادف الجمعة بيكون معاك باسطة
برنامج قهوة اسبوعي في دربزين خالي قدام بيتو( مترين نجاة)
بنصلي المغرب وبندخل، لكن تقديرا للنداء ده ممكن نجرو للعشاء

الطاهر ساتى

ياخ المفروض تكون واقف وطافى لمباتك كلها وشايل شمعة..

** تابع لى الفكرة دى لو نجحت خلينا نشتغل تجارة شمع والربح بالنص.

Post: #34
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-15-2011, 11:53 PM
Parent: #32

عبد المحسن

شايف واحدة مناضلة بتقول ليك ود ملاح مفتكراها شتيمة هههههه

لكن انا عرفت ليك مخها مشى وين (تعال لى بالمسنجر بكلمك)

عليك الله يا ود ملاح شفت التعبير دا سمح كيف؟

تصدق عجبنى لحدى مافكرت افتح بيه بوست جديد.

Post: #35
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: الطاهر ساتي
Date: 01-16-2011, 00:19 AM
Parent: #34

Quote: ياخ المفروض تكون واقف وطافى لمباتك كلها وشايل شمعة

شمعة ما بتنفع مع رياح أمشير البتطير الملابس من حبل الغسيل
غيرو أدوات النضال لي فانوس أو رتينة

...............
رسل كونتينر شمعة لملاسي خليهو ينتهز المناخ ده
هو اصلا متهم بالإنتهازية

Post: #36
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: الطاهر ساتي
Date: 01-16-2011, 00:46 AM
Parent: #35

شوف النضال ده كيف :-
قام شخص مجهول الهوية تسلق حاجز شرفة يرتدي قميصا مكتوب عليه(أنت قتلت مستقبلنا) بالسقوط على أعضاء البرلمان الروماني، وصرخ قبل أن يقفز وقال لرئيس الوزراء “بوك ..أنت سرقت حقوق أطفالنا”،أصيب الرجل ببعض الجروح جراء السقوط ونقل على وجه السرعة إلى المستشفى، وأعلن لاحقاأنه على قيد الحياة ويعاني فقط من اصابات طفيفة.

.............
اقنع خضر حسين يطبق التجربة الرومانية دي على منصة أحمد ابراهيم الطاهر
وبورداب الخرطوم متبرعين بتكاليف العناية المكثفة

Post: #37
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: سيف النصر محي الدين محمد أحمد
Date: 01-16-2011, 01:01 AM
Parent: #36

النصيحة يا جماعة حقو الناس تبطل حكاية فلان عمره مية سنة و فرتكان
عمره مية و عشرين سنة دي لأنو ما عندها اي معنى و لا الكبر حاجة بعايروا
بيها زول، بل بالعكس ارتبطت الحكمة دوما بكبار السن.

Post: #38
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: د.نجاة محمود
Date: 01-16-2011, 01:48 AM
Parent: #37

مرة سمعت ما قادرة احدد من وين( مافي زول يسالني من المصدر بالله)
انه الهنود قاوموا بالتبرز في الميادين العامة كجزء من المقاومة الو . طنية
ولذلك افتكر التجربة الهندية مجزية جدا

منها الناس تعلن احتجاجها ومنها الميادين تسمد وتزرع نجيلة..

وللك اعتقد نصوت لتجربة الهندية

يا الطاهر التجربة الرومانية دي حارة شوية ومتعبة وممكن تجيب ليها موتة
يا من الوقعة يا من ناس الامن

مناضلينا ديل بتاعين ضل بارد ياخي..

Post: #40
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Frankly
Date: 01-16-2011, 02:14 AM
Parent: #38

غايتو فكرة حلوة لزول عنده شمع عايز يبيعه

سمعتو بنكتة إذا اسمكتم فابلحوا؟

Post: #45
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 02:25 AM
Parent: #40

فرانكلى

توكيل الشمع خلاس حجزناه

المهم الفكرة تنجح وتستهلك شمع كتير.

Post: #44
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 02:24 AM
Parent: #38

دكتورة نجاة

أولا الموضوع هرار مابراز

والعملوه البنقالة

والقصة تنسب لمعاذ حسن عضو البورد.

Post: #39
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: علي جلاس
Date: 01-16-2011, 02:06 AM
Parent: #37

Quote: وهذه النكتة (مابدرى ياخليفة) لو صادفت ختمى مغرض حايعتبر العتود فى كسلا يساوى الشيوعى فى بيت المال.

د بله / سلام

معاي هسه ختمي ليبرال بيقوليك "" حرم عتود ست مريم = قطيع الشمال كله ""

أهه شن قولك أنت

Post: #41
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Abdelmuhsin Said
Date: 01-16-2011, 02:15 AM
Parent: #39

النصيحة يا جماعة حقو الناس تبطل حكاية فلان عمره مية سنة و فرتكان عمره مية و عشرين سنة دي لأنو ما عندها اي معنى و لا الكبر حاجة بعايروا بيها زول، بل بالعكس ارتبطت الحكمة دوما بكبار السن.
-----------------------

ما قلت الا الحق. كلامك مظبوط يا سيف النصر. المشكلة فى الناس البلغوا من العمر عتيا ومع ذلك الحكمة البتتكلم عنها دى ماظهرت عليهم. بل بالعكس ما شفنا منهم الا الانتهازية والتصنع والافتعال وادعاء الوطنية وحب الزعامة والبطولات الوهمية. يعنى واحد الانقاذ تناديهو يقوم يجرى الخرطوم ويقول الحوار الحوار الحوار. يجى بى جاى يلقى ناس الاسافير بكوركوا لا للحوار وقالبين الدنيا عليهو يقوم يركب الموجة وينادى بالثورة وعدم الحوار ويشتم الانقاذ والحوار معها وهو يادوب نازل من طيارتها.

انا والله مرات بتركبنى خوفة. بقول حسا دى كان الانتفاضة اتحققت فى السودان والانقاذ سقطت. يا ربى السلطة الجديدة حيكون فيها نوع سالم الدجال ده. ونوع (دكتور) مصطفى محمود وشوقى بدرى؟؟ والله دى عوجة كبيرة خلاص.. كان الله فى العون

Post: #47
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: علي جلاس
Date: 01-16-2011, 02:29 AM
Parent: #41

Quote: كان الانتفاضة اتحققت فى السودان والانقاذ سقطت. يا ربى السلطة الجديدة حيكون فيها نوع سالم الدجال ده. ونوع (دكتور) مصطفى محمود وشوقى بدرى؟؟

عبد المحسن ياخوي

هي السلطة الجديدة دي Southern Sudanese Online . Com

والسودان ده ال Inter net ولا الشغلة شنوا ياناس !!!

Post: #48
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 02:31 AM
Parent: #41

ود ملاح

أنا مع ابوالسيوف
وبضيف برضو ممنوع ذكر العربات البتتقرش فى السفارة..

هنا
Quote: نوع سالم الدجال ده. ونوع (دكتور) مصطفى محمود وشوقى بدرى؟؟

مانسيت أى شخصية أخرى؟

Post: #46
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 02:27 AM
Parent: #39

على جلاس

بطل زمزغة

قطاع الشمال انت قايلو ببيعوه فى الفراشات؟

Post: #43
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 02:22 AM
Parent: #37

أبو السيوف

احتجاجك محول لود ملاح
أنا ودكتورة نجاة زاتنا لحقنا راس السوط.

Post: #42
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 02:19 AM
Parent: #36

الطاهر ساتى

أولا نضال زى نضال زولك دا أو بوعزيزى ماعايزنوا ..
نحنا عايزين نضال فيهو لمسات رقيقة ( يعنى حدنا الرقيص بتاع ناس جنوب أفريقيا ضد الأبارتيد)
وبرضو دا بجيب لينا قعاد القفة أم و ا ط ة!

أما هذه:
Quote: شمعة ما بتنفع مع رياح أمشير البتطير الملابس من حبل الغسيل

بتزيد استهلاك الشمع وبالتالى الربح بيزيد..

ملاسى مابنفع بياكل حقى, وانا خايف يشوف الفكرة بدر الدين اسحق يقوم يسرقا أصلو قالوا يدو خفيفة.

Post: #49
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: علي جلاس
Date: 01-16-2011, 03:01 AM
Parent: #42

Quote: على جلاس

بطل زمزغة

قطاع الشمال انت قايلو ببيعوه فى الفراشات؟

بله موسي الزمزقة تفوتك وين انت .
أنا بقول قطيع الشمال وأنت تقول قطاع الشمال !

Post: #50
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Abdelmuhsin Said
Date: 01-16-2011, 03:08 AM
Parent: #42

عبد المحسن ياخوي - هي السلطة الجديدة دي Southern Sudanese Online . Com والسودان ده ال Inter net

يا على جلاس - انت نايم على اضانك ولا شنو؟ مش الحكومة شكلوها فى سودانيزاونلاين برئاسة واحد اسمو ابوبكر سيداحمد؟ الترشيحات لحكومة الانتفاضة كانت شغالة على قدم وساق ليها اكتر من اسبوعين ... عليكم الله واحد ود حلال يفتش لى اخونا على جلاس ده الرابط بتاع الحكومة الجديدة ..

الناس داخل السودان جارين ورا المعايش وما فاضين لى انتفاضة وكلام فارغ. ولكن الحمد لله ربنا سخرنا نحن ناس الانترنت للتحضير للانتفاضة نيابة عن ناس المعايش ديل .. عشان كده السلطة الجديدة حتتشكل من الانترنت والجبهة العريضة ..

يا دكتور بلة .. يوم خمسطاشر جانا وانا حاولت القى باب الكمبيوتر عشان افتحو اطلع منو واقيف قدام الباب وفى يدى الشمعة، حسب وصية شيخنا سالم سوسلوف الثورة، لكن قدر ما فتشت ما لقيت باب.. الظاهر كمبيوترى دى الخواجات صنعوه من غير باب ..

Post: #51
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: osman righeem
Date: 01-16-2011, 03:34 AM
Parent: #16

Quote: دي نكتة يا دكتور بلة... موش كده؟

محمد ياسين سلام

لا مش نكته العبيط ده بفتكر

انه كده بيكون شخص مش متخلف

وانه بكون كبير لو شتم الكبار

من باب البغله المتابعة الخيل

Post: #52
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 04:18 AM
Parent: #51

Quote: لا مش نكته العبيط ده بفتكر

انه كده بيكون شخص مش متخلف

وانه بكون كبير لو شتم الكبار

من باب البغله المتابعة الخيل

عثمان رغيم
أنا مرآتك عشان كدا شايفنى عبيط وانت ماشايف نفسك عبيط بإيمانك أن الميرغنى كسياسى كبير على النقد..

فياخى إنت لو ماشايف ال######ة فى دماغك دى شوفا بى أنا بس ماتقش المراية قش ال######ة الفى الأصل.

عاين
ط ظ فيك وفى الميرغنى سيدك.

Post: #53
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: osman righeem
Date: 01-16-2011, 04:50 AM
Parent: #52

Quote: ط ظ فيك وفى الميرغنى سيدك.

عشان تاني تقول لي مافي ابداع

اها طلعت ام فكو ساكت بدرجة نحرير

Post: #54
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 04:54 AM
Parent: #53

Quote: عشان تاني تقول لي مافي ابداع

اها طلعت ام فكو ساكت بدرجة نحرير

شفت ليك عبيط مبدع؟

عاين
البقول عبيط ياخد جايزتو ومايحتج

وط ظ مانبز
أسأل الميرغنى لو بتقدر.

Post: #55
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 05:05 AM
Parent: #54

Quote: لكن قدر ما فتشت ما لقيت باب.. الظاهر كمبيوترى دى الخواجات صنعوه من غير باب ..

عبد المحسن
خلى سالم يديك خارطة الطريق الى الباب!

Post: #56
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: osman righeem
Date: 01-16-2011, 05:17 AM
Parent: #54

Quote: وط ظ مانبز

عارف و متأكد انه طـظ ما نبذ

زي غبيط وقنيط و عوير و دلاهة

وبرنويا وفاكيها في نفسه وديك وتور

والي اخر المنظومةالخاصة بالامفكوهات

Post: #57
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 05:23 AM
Parent: #56

Quote: عارف و متأكد انه طـظ ما نبذ

زي غبيط وقنيط و عوير و دلاهة

وبرنويا وفاكيها في نفسه وديك وتور

والي اخر المنظومةالخاصة بالامفكوهات

حلاااااااااااتو ياناس انت حافظ كل همزة لمزة؟

عاين
السبكة ماجيدة
أستعين بصديق.

رحم الله أحمد السيد حمد كان يقوم باللقاء الصحفى كلو وهناى يبحلق فى عيونو زيك كدا (أسأل هناية الصحفية)!

Post: #58
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: osman righeem
Date: 01-16-2011, 05:27 AM
Parent: #57

نافع وين ؟؟؟

Post: #59
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 05:34 AM
Parent: #58

Quote: نافع وين ؟؟؟

دا سؤال تسألو؟

انت وانا عارفين ..

عاين
بالجد لو ماعارف نافع عندو فليتة ومشى للميرغنى يعمل ليهو مساج أصلو قالو مافى ألين من يدو!

Post: #60
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 05:39 AM
Parent: #59

Quote: ال######ة

عاين
عشان مخك مايمشى بعيد الداهية المشختة دى ال و س خ ة.

Post: #61
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: osman righeem
Date: 01-16-2011, 05:39 AM
Parent: #59

Quote: بالجد لو ماعارف نافع عندو فليتة ومشى للميرغنى يعمل ليهو مساج أصلو قالو مافى ألين من يدو!

ماشي كويس جدا

Post: #62
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 05:45 AM
Parent: #61

Quote: ماشي كويس جدا

كمان بتعرف تصحح؟

عاين
أنا بس جبت شوية زبالة من البرميل نسوى شنو عاد لو السكر ما اصطاد الذباب!

Post: #63
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: محمد أبوالعزائم أبوالريش
Date: 01-16-2011, 06:06 AM
Parent: #62

عثمان رغيم ...

أعرض عن هذا .. فقدرك أكبر

Post: #64
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 06:09 AM
Parent: #63

Quote: عثمان رغيم ...

أعرض عن هذا .. فقدرك أكبر

فى حاجة إسمها المسنجر

المسنجر بغطى على عدم الأمانة!

Post: #65
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Mohamed Yassin Khalifa
Date: 01-16-2011, 09:10 AM
Parent: #64

بلة سلامات مرة تانية...

تعرف أنا لما شفتك شغال للختمية إعتبرت إنك بتنكت عن الختمية وذيهم ذي الجعلية ولا الهدندوة
ولمن سألتك (لكي يطمئن قلبي) إجابتك كانت "نعم" يعني مجرد نكتة وعادي.. وبنية طيبة

أها لمن شفتا كلامك كان حاد مع أستاذنا رغيم ماعارف ليه حسيت إنو في حاجة؟!
ورجعتا لردك ليا ولقيتك تقريباً إختصرتني في برد سريع ومبهم.. يمكن أنا في الاول أختّك بتهظر.
وياريت الموضوع يكون لغاية حسع مجرد هظار في الزمن الصعب العلينا ده وما يكون غير كده...

وطبعاً أكيد حا أعتبر أنو الختمية عندهم عندك تقدير وإحترام حتى لو مختلف معاهم في الشئ البعتقدو فيهو.
وكلنا ممكن نخترف فكرياً أو عقائدياً ... بس بيبقى بيناتنا الأحترام وحسن النية

يا سيدي الميرغني رئيس الحزب الأتحادي بيفرق عن الميرغني زعيم الختمية
والمهدي رئيس حزب الأمة بيفرق عن المهدي زعيم الانصار
والفرق موش في الشخصية... الفرق في الشئ الروحاني البيربطهم مع أهل طرقهم
وده شئ ما بيعرفو زول ماهو أنصاري ولا ختمي.. وما عندو علاقة بالسياسة ونقدهم سياسياً
لأنو الحزب أمة ممكن يمشي ويجي.. بس الأنصاري باقي طول عمره أنصاري
كيف؟ دي تعرفها فقط لمن تكون ختمي ولا أنصاري.. ودي الشعرة البطلب منك ما تقطعا

وشكــرا،،،

Post: #66
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: يحي ابن عوف
Date: 01-16-2011, 10:12 AM
Parent: #65

up

Post: #67
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 03:06 PM
Parent: #66

Quote: أها لمن شفتا كلامك كان حاد مع أستاذنا رغيم ماعارف ليه حسيت إنو في حاجة؟!

يامحمد يس
تحياتى

فعلا الموضوع ما أكتر من نكتة وعلى ناس أصدقاء وبقروا البنكتبو وبنتقابل فى التلفونات وبكل الوسائل المتاحة وبكون عندهم رأى وعندنا راى..
أما حكاية إساءة الختمية ماواردة والكلام دا عارفا أمى العمرها شارف على التمانين ولما نتكلم فى أسيادا بتشيل مفراكتا عادى وبنديها الحق دا, لكن زى عثمان رغيم مابنديه هذا الحق عشان يجيك فى أول مداخلة فى بوست عن الميرغنى يقول ليك ديك وأول مداخلة هنا عن الختمية يقول ليك عبيط وبغل..
فزى عثمان رغيم إذا كان بشتمك فى انتقاد شخصية عامة طيب لو انتقدتو هو زاتو حايعمل شنو؟

أما إنت زاتك يامحمد قلت حدتى مع رغيم وتعاميت عمدا كما فعل أبو العزايم الأداهو إسم تفضيل عن محتوى أول مداخلة له هنا..
دا يكون سببو شنو؟
طريقتكم دى إذا عندكم انتو بسيطة أنا شايف أنها من أسباب تخلف السودان؟
كيف؟
بنفس الطريقة دى الصحفى عشان المختلس صاحبو ماحايكتب عنو, والقاضى لما يجى صديقو خصم فى مشكلة بخليهو ينتظر فى مكتبو ولما يكون فى الجلسة بخاطبو بيا أستاذ واحتمال يسمح ليهو بالجلوس والطرف الآخر احتمال يكون مظلوم يتعامل (كمواطن عادى), والدكتور عشان الزمالة يكتم الشهادة وهو عارف أن الدكتور زميلو تسبب فى موت المريض وقس على ذلك لحدى ماتصل زعيم الحزب المعارض يتراخى مع زعيم الحزب الحاكم عشان بيناتم نسب وهكذا تبدأ الحكاية وتكبر..

يامحمد
عشان تعرف البداية كانت وين ومنو البدا بالشتيمة أمشى راجع بوست حقى بعنوان: السيد محمد عثمان الميرغنى هذا الأسبوع...
والكلام دا لمحمود أبوالريش أيضا..

أنتو هسع بينكم وبين الختمية والإتحاديين فى الستينات قرابة الخمسين سنة لكن رد فعلكم زى رد فعل أى مزارع فى قرية من قرى الشمالية عندما يرى عزالدين يرسم الأزهرى فى شكل غنماية ويكتب العرجا لمراحا..

وين التطور؟

Post: #68
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: عبدالعزيز حسين عبدالرحيم
Date: 01-16-2011, 07:31 PM
Parent: #67

بلة يا أخوي

كدي اخوك الصغير بقول كلام أسمعو عليك الله

شفت مما وعيت لايوم شفت ابوي الله يرحمه ناقر امي ولا ناقرته ولا سمعتها يوم نادته بي أسمه

ولا شفته يوم مجد ليه سيد ، سيده الطفل الصغير البتعلم المشي يادوب لو جاهو يبرك ليه في الواطه يدمع يطايبة يحضنة يونسه مات ما في يده قرش علمناه انو سيدنا رب العالمين وعرفنا برانا أنو البحترمنا وبوقرنا ياهو سيدنا وكبيرنا ماشفناه في نوبة ولا بياكل فته

سمعت بالمراغنة والله يا بله ما سالني حليفة محمد الحسن محمد عثمان الميرغني زاملته كزميل دراسة وزميل كنبة والله شفت في الادب والاحترام وتقدير البشر شيئ غير زي اولاد الملايكة عرفت الناس ديل سادة بي شنو بي اخلاقهم وبي طباعهم وبي أدبهم بس ساي الدنيا دي رمتهم في ###### السياسة وعفنها وكل ما اشوف زول ينتقدهم اتذكر محمد الحسن صاحبي واتمغص ولمن تجي منك انت حاره عليك الله اقيف شوية
ود كرفس دا خليه بي جاهه زي جاهك انت لمن يهبشوا ليك عزيز وقدر الظرف والظروف والبهبش القلوب وما يحزنها

دا كلام خوك ومافرض كان سمعته سمعته كان ما وقع ليك بي عديلك ماني زعلان منك انت عزيز علي

Post: #69
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: عمر صديق
Date: 01-16-2011, 08:55 PM
Parent: #68

دكتور بلة

تحياتي

ممكن تاخروا التاريخ شوية بعد موجة البرد دي ماتعدي

عشان مايتلخبت علينا الاختساس

Post: #70
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: عبد الحميد حسين
Date: 01-16-2011, 08:58 PM
Parent: #68

Quote: الدرس الثاني : ليست بالنخب وحدها تتحرر الشعوب من قيودها وطغاتها ، ولا بالأحزاب والجماعات التي تدعي الزعامة تتحرك نحو غاياتها السامية
، بل بألام وأحزان فرد في المجتمع أيضا..وما أعظم الشعب الذي تحركه آلامه نحو آماله، بعيدا عن النخب الكسولة ولصوص السلطة والثروة..
وخير للشعوب بألا تكون أمالها وغاياتها تحت وصاية النخب

الطاهر ساتي...

Quote: يومك ده لو صادف الجمعة بيكون معاك باسطة
برنامج قهوة اسبوعي في دربزين خالي قدام بيتو( مترين نجاة)
بنصلي المغرب وبندخل، لكن تقديرا للنداء ده ممكن نجرو للعشاء

الطاهر ساتي ....

Post: #71
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-16-2011, 09:09 PM
Parent: #68

Quote: بس ساي الدنيا دي رمتهم في ###### السياسة وعفنها

عبد العزيز
تحياتى
الموضوع لو قريتو عن الميرغنى شبهته بإمام اليمن..
وإمام اليمن ماكان زول ساى..
كان يحكم شعب ولولا اجتمع عليه عبد الناصر والقوميون العرب ماكان قدروا عليهو..

لكن كإمام كان به ثغرات جعلت أحد الصحفيين يكتب فيه ما نقلته فى ذاك البوست..

يعنى الميرغى فى شخصه لم نمسه, بل عندى بوست فى الإرشيف بعنوان (المراغنة عفيفى اليد واللسان)..

أما قولك المقتبس أعلاه هو نفس كلام الحادبين على مصلحة الطريقة الختمية عندما رشح السيد أحمد لرئاسة مجلس رأس الدولة( كانوا معارضين)..

أما البجى يدافع عن الميرغنى المفروض يدافع بأدب يعنى مايجى يكيل ليك كوم من الشتايم ويعمل فيها ضحية بعد ماترد عليهو..

فالميرغنى لو رافض الإنتقاد اليجلس فى سجادته كشيخ طريقة, فالإنتقاد يمكن يتخذ أساليب ساخرة دون إساءة, بل ممكن يتعرض للإساءة كما يحدث للبشير ونافع وغيره الآن.

ياعبد العزيز
الناس دى العاملين معارضة يوميا بشتموا فى نافع على نافع شفتنى يوم سألت حتى من يشتم, والله لم أكتب حتى عن نافع إلا فى مرة واحدة ذكر ودالعمدة أنه أصيب بسكتة دماغية وشمت فيه..
فنافع كدكتاتور باختياره يتحمل مسئولية مافعل وعلى المتضررين منه أن يفعلوا به مايشاءون وكل حسب الضرر الذى لحقه منه, ولكنه كشخص يظل عندى به صلة رحم قوية جدا( وهذا الكلام ربما لأول مرة أذكره فى هذا المنبر وأنا عضو منذ 2004)..

فمن هو عثمان رغيم بالنسبة للميرغنى ليشتم الناس نيابة عنه.

Post: #72
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: عبدالعزيز حسين عبدالرحيم
Date: 01-16-2011, 10:22 PM
Parent: #71

Post: #73
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Mohamed Yassin Khalifa
Date: 01-16-2011, 10:32 PM
Parent: #71

أخي بلة تحياتي الخالصة...

وشكراً على ردك.. وأتمنى إنك تكون فهمت إنو أنا إتربيت في بيت الديموقراطية فيهو أساس بنائه
ورغم الأتحادية الغالبة والختمية السايدة فيهو حا تلقى الأنصاري والشيوعي وحزب الأمة والقومي السوداني
العربي أو الأفريقي التوجه.. يعني حا تلقى كل ألوان الطيف السياسي والعقائدي فيهو.

الشئ السائد والجمعنا كلنا هو إحترام مطلق لخيار الآخر... وحوارنا المتواصل كان يحتد وتحده روح صافية بناءة

نقد العمل السياسي من أهم أولويات الممارسة... والتنكيت والكركتيرات هي نوع هام من النقد الصارخ والصريح
وهي أيضاً سلاح مصرح إستعماله في المعارك والجدل والحوار السياسي... وأجملها وألطفها البتكون ضد القادة

والميرغني قائد سياسي يحتاج لأن ننكت فيهو.. ولو أخطأ نديهو في راسو ونحنا ملتزمين بادب النقد
" فلو أخطأ عمر قومناهو " ودي مقولة خالدة... جاءت نتيجة لشئ معروف عن سيدنا عمر نفسه وهو رفض الخطأ
وأنا والله لا إعتراض لديّ... وأعتقد أنه لا إعتراض عند أي إتحادي ديموقراطي إنو يسمع نقد لسياسة قادته

الشئ العاوز تأكيد هنا إننا ممكن نفرز بين الميرغني السياسي والميرغني الختمي.. ذي ما بنفرز بين الصادق زعيم الأنصار
والصادق السياسي... وبنضحك لما تنكت عنهما أو نشوف كركاتيرات تنتقد تعاملهم السياسي.
ياخي لو شايف مشينا على درب الازهري عشان قديم غلط... بالله عليك ورينا الصاح وين؟ في الإنقاذ مثلاً؟
والله لا أنا لا رغيم زعلانين من كلامك في الإتحاديين بتاعين الليلة ولا بتاعين أمبارح

بس...

أكيد بنغضب لما نشوف لينا زول بيهظر بالمعتقدات أيا كانت.. وكدي إتخيل زول بيسخر من الخليفة يوسف ود بدر!
ولا جايب ليهو كركاتير بيسخر من طائفة دينية ولا عقائدية لغرض غير إنه عاوز ينتزع مننا بسمة ولا ضحكة.

نعم لحرية التعبير... ونعم لحق النقد
ولا لبث السموم ونشر الخزعبلات الممكن مردودها يكون ما كويس!

عموماً ده راي.. وأكيد رايك في العين والراس...

Post: #74
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-17-2011, 03:57 AM
Parent: #73

الأخ محمد يس
تحياتى
(1)

قلت:

Quote: ياخي لو شايف مشينا على درب الازهري عشان قديم غلط... بالله عليك ورينا الصاح وين؟ في الإنقاذ مثلاً؟

ردا على كلامى:

Quote: أنتو هسع بينكم وبين الختمية والإتحاديين فى الستينات قرابة الخمسين سنة لكن رد فعلكم زى رد فعل أى مزارع فى قرية من قرى الشمالية عندما يرى عزالدين يرسم الأزهرى فى شكل غنماية ويكتب العرجا لمراحا..

ياخى شوف التشبيه فى مشيكم على طريق الأزهرى أم على ردة فعلكم زى الناس الذين لم ينالوا تعليم مثل تعليمكم قبل 50 سنة!!

(2)

قلت يامحمد:
Quote: أكيد بنغضب لما نشوف لينا زول بيهظر بالمعتقدات أيا كانت

هل ختمى تعنى الطريقة الختمية أم تعنى الشخص المتبع الطريقة؟
يعنى هل انتقاد المسلمين يعنى انتقاد الإسلام؟

(3)

وقلت يامحمد:

Quote: والميرغني قائد سياسي يحتاج لأن ننكت فيهو.. ولو أخطأ نديهو في راسو

ثم أضفت:
Quote: الشئ العاوز تأكيد هنا إننا ممكن نفرز بين الميرغني السياسي والميرغني الختمي

يامحمد
أنا أصلا مالى ومال الميرغنى كشيخ طريقة جالس على سجادته, أنا أتحدث عن الختمى والأنصارى عندما يدخل معترك السياسة.
فهو لايخلع ختميته وانصاريته عندما يدخل مجال السياسة وأنا لايهمنى طريقته الدينية وفى نفس الوقت لايحق لى أن أخلعها عنه.
وكل الذى يعرضه لانتقادى وانتقاد غيرى هو وجوده فى ساحة العمل السياسى كزعيم لا كفرد من القاعدة, فهو بهذه الصفة أعطانى الحق أن أنتقد أدق تفاصيله لأنه لو حكمنى فى يوم من الأيام كسودانى لازم أكون متأكد أنه سيكون الخيار الأفضل. وإن لم يكن فعلى كشف ما أعرفه عنه باذلا كل جهدى ألا يصل للموقع الذى يتحكم فيه فى أمر معاشى اليومى.

(4)

قلت يامحمد:

Quote: والله لا أنا لا رغيم زعلانين من كلامك في الإتحاديين بتاعين الليلة ولا بتاعين أمبارح

أولا كيف تحلف على شخص آخر كعثمان رغيم؟
ثانيا أنا لم أر أنك زعلان عشان تحلف بس أنا قلت ليك إتفاقك سياسيا مع عثمان رغيم يجب ألا يجعلك تحيد عن الحق. وإذا حدت عنه فلا تنتقد التدهور الحاصل فى السودان لأنى أوضحت لك أن جزء مهم من أسبابه هو الحيف بسبب الصداقة, الزمالة,الحزب, الطبقة الإجتماعية, صلة القرابة...الخ.
ثالثا قد جلبت لك الرابط وبه بداية الخلاف مع عثمان رغيم وحتى الآن لم تحكم بمن هو البادئ بالإساءة, مما يعطينى الحق أن أقول لو وجدتنى أنا البادئ لما توانيت فى إدانتى, بدليل أنك بتحلف بالله نيابة عن عثمان رغيم. فإن كان عثمان رغيم بيصف المخالف له بهذه الأوصاف وهو مازعلان فلو كان زعلان حايعمل شنو؟

(5)

وقلت يامحمد:

Quote: ولا لبث السموم ونشر الخزعبلات الممكن مردودها يكون ما كويس!

أتمنى أن تأتينى بسموم وخزعبلات فى هذا البوست أو البوست المرفق, وتفندها واحدة واحدة وانا مستعد أثبت ليك ماقلته فى الميرغنى ومالم أقله بعد.
ياخى خليك منى أنا إنت فى الجبهة الوطنية العريضة أسأل على محمود عن الميرغنى!!

Post: #75
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-17-2011, 04:03 AM
Parent: #74

Quote: ودرغيم ضفر في لحمنا وإن سدر في عوج ولا عديل بي البريحه وخليه مرتاح لا بغلط ولا بزعلنا وحقنا وواجبنا عليه مجابرته لو بالسكات

عبد العزيز

قدر لرجلك قبل الخطو موقعها!!

ياخوى أنا فى ردى ليك فوق قلت ليك زول لحمى ودمى ماقاعد أماليه تقول لى عثمان رغيم معرفة المنبر البجى يشتمنى عشان الميرغنى؟

عبد العويز
كلامك دا ماعجبنى!

Post: #76
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: عبدالعزيز حسين عبدالرحيم
Date: 01-17-2011, 04:21 AM
Parent: #75

معليش يابله

سوي الدايره وماك غلطان وما زعلان بالجد لاني يمكن اكون الغلطان وسامحنا

Post: #77
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-17-2011, 04:21 AM
Parent: #75

Quote: ممكن تاخروا التاريخ شوية بعد موجة البرد دي ماتعدي

عمر صديق

النضال دا على درجة حرارة باريس!

Post: #78
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-17-2011, 04:24 AM
Parent: #77

Quote: عبد العويز

ياعبد العزيز

المقتبس دا خطأ مطبعى الواو والزاى جمب بعض.

Post: #79
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Mohamed Yassin Khalifa
Date: 01-17-2011, 04:45 AM
Parent: #74

Quote: أنا أصلا مالى ومال الميرغنى كشيخ طريقة جالس على سجادته, أنا أتحدث عن الختمى والأنصارى عندما يدخل معترك السياسة.
فهو لايخلع ختميته وانصاريته عندما يدخل مجال السياسة وأنا لايهمنى طريقته الدينية وفى نفس الوقت لايحق لى أن أخلعها عنه.
وكل الذى يعرضه لانتقادى وانتقاد غيرى هو وجوده فى ساحة العمل السياسى كزعيم لا كفرد من القاعدة, فهو بهذه الصفة أعطانى الحق أن أنتقد أدق تفاصيله لأنه لو حكمنى فى يوم من الأيام كسودانى لازم أكون متأكد أنه سيكون الخيار الأفضل. وإن لم يكن فعلى كشف ما أعرفه عنه باذلا كل جهدى ألا يصل للموقع الذى يتحكم فيه فى أمر معاشى اليومى.

الأنصاري ولا الختمي لمن يدخل السياسة يا بلة يتحمل مسؤلية روحو... وأكيد ما هو ما مجبور يملِص معتنقاته العقائدية!
وأنا يا سيدي كلمتك وقلتا ليك في السياسة كل زول ياكل نارو.. كان مهدي كان ميرغني، وحتى محمد يسين خليفة.
المهم إننا نناقش الأفكار وننتقد الأفعال المضرة بشوية نقد بناء وموش بحرح أجسادهم أو تكسير عظامهم لمجرد قناعتهم
بفكر يخالف أفكارنا. أما أفعالهم، فلو في زول إتضرر وجب عليه المطالبة بحقه من أيا كان.

مرة تانية (وأظنها التالتة) يا بلة مافي زول إتضرر من الختمية ولا الانصار... يمكن في ناس تضرروا من أفعال ناس حزب
الأمة ومن الأتحادية.. وديل عليهم المطالبة العلنية لمحاسبة من تسبب في ضررهم. وهناك من رأى أفعال توجب النقد، وده
عليهو ينتقد كما شاء وطالما هناك مساحة ديموقراطية فصوته سيصبح صوتين والصوتين ممكن يصبحو مية، والمية ممكن تقلب بلد.

أنا معاك في حتة واحدة، إنو ياريت يكون في أنصاري إتحادي ولا يكون في واحد حزب أمة ختمي.. قول يا رب!

وصدقني أنا ما محتاج إني أسأل أستاذ علي محمود حسنين عن عن السيد الميرغني... يا أخي أنا من جوة البيت وبقول ليك
حباب نقدك وتنكيتك في الميرغني (السياسي) وكل الحزب الاتحادي لأنو دي أفكار ودي أيدلوجيات إنسانية... أما الختمية دي عقيدة
جرب إنك تقرب ليها أكتر وأعرفها كويس وبعدين تعال ناقشها.. لأني شايفك بتخلط بين الختمي والإتحادي!

تعرف أجمل حاجة عند الختمي إنه متصالح مع روحو... وطالب من ربو إنو يجعله قريب منه!
وأجمل ما في الإتحادية هي الوسطية.. فالإتحادي كان ما كان في الوسط، تلقاهو قاعد متحكر في شمال الوسط

وتســلم...

Post: #80
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Balla Musa
Date: 01-17-2011, 05:07 AM
Parent: #79

Quote: أما الختمية دي عقيدة جرب إنك تقرب ليها أكتر وأعرفها كويس وبعدين تعال ناقشها

يامحمديس خليفة
ياخى الختمية دى طريقة صوفيةوانا لو قريت كلامى فوق من رضعو من ثدى ختمى.

إنتقاد اتباع طريقة بسبب انتمائهم السياسى لايعنى انتقاد الطريقة نفسها..
وحتى انتقاد أتباع ديانة لخلل فى تطبيقهم لاتعنى انتقاد الديانة نفسها..

بس ما قلت رايك فى زول يدافع عن زعيمه بالمبادرة بالشتم ثم يطالب بسحب البوست حتى سحبه؟

Post: #81
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Mohamed Yassin Khalifa
Date: 01-17-2011, 05:33 AM
Parent: #80

Quote: بس ما قلت رايك فى زول يدافع عن زعيمه بالمبادرة بالشتم ثم يطالب بسحب البوست حتى سحبه؟

والله يا دكتور أفتيت من قال لا أعلم! أنا ما عندي فكرة عن هذا الموضوع... أعذرني

Post: #82
Title: Re: إبتداءا من 15 يناير حانكتشف الشرفاء من الأمنجية من بورداب الخرطوم!!
Author: Frankly
Date: 01-17-2011, 05:54 AM
Parent: #81