و الله عيب ، بل شينه فى حقكم يا اخوان ، ما ذنب هذه القبائل ؟

Quote: البطاحيين في ارض البطانة ... خايبيين والا باطليين ما لاققين البيغطو قدحهم لا مزيد بسألكم يا ب ناس البطانة بناتكم بارن لمن كوستو تغطو قُداحتكم من برة والا الرجال عدمو من ديرتكم ؟؟؟ الله يخيب ود ابوكم لو كنتو بتفتشو للسترة لي البيزلكم بيها ده كلام حيدر الزين الفوق ده ، فى اشارة الى انساب عزام و التحت ده كلام عزام حسن فرح فى بوست علشان نكسب زمن.. ما أكتر.. نطالب بِـ"غرب سودانيز أونلايِن" وده برضو فى اشارة الى قبيلة حيدر الزين .

Quote: كَونك إنت ما بتِْعْتمِدو ما بجرح في سندي.. تاريخ مكتوب ويُدرس ومُعْتمد مِن مكي شبيكة ويوسف فضل والإتنين ديل جعلِيين وإسْتشهد بيهو منصور خالد وهو برضو جعلي.. ولسه بكتِب كُل العِندي.. إن شاءالله تنفقِع.. وهاك العناوين دي لغاية ما أفوق: - المك نمر أكل إهانة ود الباشا زي الترتيب. - المك نِمر، ما قِدر يواجهة ود الباشا عِلا سكرو. - المك نِمِر بعد ما سكر ود الباشا، برضو ما قِدر يِواجهو، حاوطو بزريبة قش ولع فوقا نار. - المك نمر لامِن سمع بالحملة الإنتقامية، شرد بأهلو جهة الحبشة. - المك نِمِر في طريقو لجبال الحبشة الموية نقصت، قام قتلت أهلو الكُبار. - المك نِمِر بقى في جبال الحبشية يقطع طريق الحجيج. - المك نِمِر الإنكِليز عفو عنو، رجع، غنو ليهو "نمرًا مو نِمِر شِدَر".

شوفو انتو الاتنين وقت الكلام دى صاح مالكم داسنو كل هذا الوقت ، ليه ما قلتوه من زمان، عشان انتصار للذات و يلا شنو ؟، تعرفوا مرات كده فى ناس طرش مرات كتيرة بكتبو كلام فيه اساءة لبعض القبائل بدون ما يكون عندهم خلاف شخصى مع زول ، الان انا بحترمهم اكثر ، لان الدافع لم يكن شخصى ، وانتصار لموقف .

الزول الما بتحمل و صدرو ما هو واسع ما يجيب للناس مشاكل نحن فى غنى عنها. الزول العاقل بقدر وقع الكلمة لان الكلمة تبقى ما بقى الدهر ، خليتو الواحد يمرق من طورو .

شوفى كلامكم شين و قبيح ، وحقو الزول قبل ما يكتب كلمة يراعى مليون حاجة ، الزول المندفع عمروما ياتى بخير ، اسف على الكلام ده بس انتو السبب .

عمرى ما قاعد اخوض فى الخلافات الشخصية ، بس انتو مسختوها ، ..............

عليك الله يا بكرى اكنس هذا العفن ، ارجو ان ما يجى واحد ناطى يقول الكلام عشان وصل لناس معيين تداخلت ، و الله مررت على البوسات ال 2 مساء هذا اليوم وارفضهم جملة و تفصيلا بل ارفض اى اساءة وجهت لاى جهة .

لو ان الامر بسيط الواحد كان استخدم التلفون فى تقريب وجهات النظر ، ولان الاساءة كانت كبيره لاناس لاذنب لهم سوى خلافاتكم الشخصية ، و سعيكم للانتصار للنفس كان لابد من فتح هذا الخيط ، عسى لعل بكرى يشوف الحاصل ، ويعمل اللازم .

Quote: ارجو ان ما يجى واحد ناطى يقول الكلام عشان وصل لناس معيين تداخلت

قطفت الكلام من خشمي يا شيخ العرب هجو الاقرع .

تحياتي

سلام اخ هجو

كلامك صح و كله من عزام
بس من الاول لامن اساء للغرابه خباركم ما قلتوا بغم
مش بقولوا المبادىء لا تتجزاء
المهم الكلام لامن هبش ناس تانيين بقى عيب
الحمدلله دلوقت كل البوستات اتحذفت

تحياتى

شكرا احبتى الكرام ، الصادق ومحمد زكريا تعرف شهد الله انا اتطلعت على البوستات هذا المساء ، وعارف كلام ذى ده متوقع عشان كده قلت ارفض الكلام جملة و تفصيلا ، و الله يا اخى محمد زكريا وانت تعرف مدى احترامى لشخصكم ، فى بوستات كده من عنوانها ما قاعد اخشها . بس بوست حيدر الزين هو الذى قادنى للموضوع ، و يا سيدى شهد الله اهلى وابنا عموتى متزوجين من اهلنا فى الغرب ، ونفخر بهذا النسب ، بل ان ابناء عمموتنا من اهلنا فى الغرب هم الان سند لكثير من اهلهم .

شوف اديك من الاخر لى ثلاث بنات اذا جاءنى رجل ارضى خلقة و دينه سوف ازوجه تانى يوم مهما كان جنسه او لونه .

Quote: شكرا احبتى الكرام ، الصادق ومحمد زكريا تعرف شهد الله انا اتطلعت على البوستات هذا المساء ، وعارف كلام ذى ده متوقع عشان كده قلت ارفض الكلام جملة و تفصيلا ، و الله يا اخى محمد زكريا وانت تعرف مدى احترامى لشخصكم ، فى بوستات كده من عنوانها ما قاعد اخشها . بس بوست حيدر الزين هو الذى قادنى للموضوع ، و يا سيدى شهد الله اهلى وابنا عموتى متزوجين من اهلنا فى الغرب ، ونفخر بهذا النسب ، بل ان ابناء عمموتنا من اهلنا فى الغرب هم الان سند لكثير من اهلهم . شوف اديك من الاخر لى ثلاث بنات اذا جاءنى رجل ارضى خلقة و دينه سوف ازوجه تانى يوم مهما كان جنسه او لونه .

والله اخ هجو انه لشرف عظيم لى ان اناسب امثالك ذوى معدن الرجاله والعظه والكرم الواضح فانا لا زلت اذكرعندما اتصلت على فى يوم فقدنا لسمندلاوى
انه موقف من يعرفون الاصول
كنت اتمنى تكون شفت مداخلاتى وردودى فى ذلك البوست
لاننى حاولت ان اجنب كل الاطراف الاساءه لبعضها البعض
ووالله لو لم اكن متزوجاً ومناسباً لناسبتك اليوم قبل باكر....لمقوله اهلنا القالوا الراجل ما بتزوج لاكن بناسب الرجال

تحياتى يا من احببته فى الله

Quote: ووالله لو لم اكن متزوجاً ومناسباً لناسبتك اليوم قبل باكر....لمقوله اهلنا القالوا الراجل ما بتزوج لاكن بناسب الرجال تحياتى يا من احببته فى الله

يا محمد يا خوى انت شخصيا ما بنزوجك تعرف ليه لاننا لا نرضى ان ان تتزوج فوق بنت عمنا المعاك ، يااخى شهد الله انى احبك فى الله .

على فكرة ربما تعرف الناشط الدارفورى محمد ود الشايب هو قريبى من ناحية الاب و قريبكم من ناحية الام ، عليك الله شيفو ما هو راجل ضوء .

هجو
كيف حالك؟ علك طَيِب

قول معليش يا زول.. بس أنا بديت في أغسطس 2008م في إنزال التاريخ السوداني مِن واقِع مراجِع مُعْتمدة.. بديتو في عمود إسمو "الحقيقة والمُصالحة.. النُسخة السودانِية" وجيت واصلتو هِنا:
كشف الغِطاء عن الهَوِية السودانِية

أنا قاصِد التاريخ الما قروهو لينا في المدارِس.. الدسوهو مِن المناهِج.. حَيدر الزين والله ماني عارفو سببو معاي شنو بِالضبط، بس البتْجيني حرم ما بزِح مِنها تاااب.. وفي آخر مُداخلة ليهو قال لي ما معناهو: [إنت مالك يا عزام ما عرست من بنات أهلك ومشيت عرست مِن العرب] بِالله شوف المِحن دي، ما علينا.. أقولك يا حَيدر الزين أنا عندي بِت عمي وعِندي حتو بِت العرب.. والإتْنين والِد منهِن أحمدالله

على كُلٍ.. دايِر يا شيخ العرب أجْبُر بِخاطر.. علشان كِده أمسحا في وشي أنا ده وقول معليش

إحْتِراماتي ،،،

يا عزام يا خوى معزتى التى تعرفها ، صدقنى يا عزام كلامكم ال2 لو جاء فى بوست فى وقت ما فيهو خصومة ومناقرة ، ممكن الزول يبلعو بس برضو بكون مرفوض .

يا عزام يا خوى يسلم ووجهك ، و الله يا عزام لو كنت مكانك فى زول قال لى ما لك ما تزوجت من اهلك ، كنت قلت ليهو يا اخى القسمة و النصيب و مشيت الموضوع .


يا عزام يا خوى انت راجل شيخ عرب و التعامل بى رد الفعل ما بشبهك .

شوف يا هجو الأقرع (بالمناسبة ازيك طوّلنا ما اتداخلنا ولامؤاخذة) ... المك نمر دا كان قائد ... وقام بى مكيدة بمقدراتو الذاتية ... لاكين بعد داك التاريخ أثبت انو كان ما عندو شجاعة للمواجهة ولا عندو بعد نظر لى نتايج تصرفاتو ... والمسألة دى راجعة لى سوء تقديراتو للموقف ... ما حسبا صاح ... ما أول قائد ولا آخر قائد ما يحسبا صاح ...

الزول ما بيحكم على الجعليين كلهم بى سوء تقديرات وعدم شجاعة جعلى واحد ... مشكلة الجعليين انو المك نمر بقى ليهم عقدة ... ياخى لو كان رسّل الجعليين ديل زاتم يدعموا الشوايقة لمن استنجدوا بيهو ... كان حسمنا مسألة الأتراك دى بى بساطة ... لاكين نحن الزمن داك عندنا تجار رقيق شغالين لى صالح الدولة العثمانية قبل ما السودان يكون تحت سيادتا زاتو ... وغالباً قاعدين يكونوا جعليين ... المك نمر كان قايل اسماعيل باشا بعد ما يهرس الشوايقة حا يجى يسلم عليهو بالأحضان ... سبب التسكير وعرض عورات الولايا والكرم الجعلى والإستغفال عشان يجيب قشة كبريتة يبارز بيها انو اتفاجأ بالكدوس بدل الأحضان ... الجعليين المعاصرين دايرين يقنعونا انو الحركة دى ما جبـانة ... طيب أهلك سببت ليهم حملة تأديبية ومذابح بى سبب تصرفك الجاهل؛ تخلّيهم وتجرى حدّك الحبشة؟ والجرى دا حق منو طيب؟ المرا قالت "الصبيان الجروا ... سابوا عروضم همّلوا ... انا الضرب بتحمّلوا" ... المرا ... تتحمّل الضرب؟ ليه؟ عدم رجال؟ والله حليلم اخوان البنات ... و[نصيبة] البجرى ...

هسى فى جعلى ود قبايل نصيييح كدا ... بيتصرّف جنس التصرفات دى؟

بعدين النسألك:

السالّى لسانو فى البطاحين والجعليين بى سبب وبلا سبب منو؟

يعنى انت ناقل المادة دى من وين؟ لأنو السياقات مهمة ... انا ما عارف حكاية البطاحين دى شنو ... وبفتكر انو تصرفات المك نمر جبـانة ... وإنها لا تؤخذ ضد الجعليين ... لاكين المهم بالنسبة لى انو انت جايب الموضوع من وين؟

القصة جاطت والواحد بقى ما متابع ..





.. المهم ...

Quote: بعدين النسألك: السالّى لسانو فى البطاحين والجعليين بى سبب وبلا سبب منو؟ يعنى انت ناقل المادة دى من وين؟ لأنو السياقات مهمة ... انا ما عارف حكاية البطاحين دى شنو ... وبفتكر انو تصرفات المك نمر جبـانة ... وإنها لا تؤخذ ضد الجعليين ... لاكين المهم بالنسبة لى انو انت جايب الموضوع من وين؟

تبارك اخى الكريم كيفك و الاسرة ، يا حبيب كان فى خلاف بين عزام و حيدر الزين وقد اوردت اسماء البوستات فى صدر الموضوع ، و الحمد الله حذفت فى اثناء انزال هذا البوست يعنى كانت موجوده ساعة الانزال لهذا البوست ، وحاول كل منهم الاساءة للاخر ، معليش يا خوى راجع الموضوع تانى بتلقى التفاصيل .

الاخ هجو الحاصل شنو انا مانى فاهم حاجه اتصلت قبل قليل بحيدر الزين عشان افهم منو الحاصل
ما رد على

كيفك ياهجو

فى رأيى تطالب بحذف البوست دا زاتو عشان ما يعرف الماعرف.

والراى رايك.

شكرا د. بلة تم الاتصال بالاخ بكرى ، وتلفونه على المسجل وتم ابلاغ الرسالة .