حـكـايـتـي مـع الـشـايـقـي فـي الـقـطـر ...

إعـادة نـشـر...
مـحـاولـة لـتـفـجـيـر بـسـمـة في جـوف الـحـزن...

توطئة...

كان رجل لطيف وظريف جداً. صورة طبق الأصل لشخصية بت ميدوب في رواية
المرحوم الطيّب صالح (موسم الهجرة إلى الشمال). عليه، الرجاء عدم المؤاخذة في
إيراد العبارات التى جرت على لِسانه مع بعض التحفظ...

بداية شتاء العام 1984 ، رصيف محطة اتبرا يعج بالمسافرين والمودعين، وبابور
قطر كريمة يستعد للتوجه للخرتوم. بوفية المحطة مزدحم بالمسافرين، عشان الباسطة
طبعاً بالسمنة وكده في بوفية محطة عطبرة. في هذه الأثناء، كنا أنا وصديقي نجوب
الرصيف جيئةً وذهاباً في محاولة لتحديد مكان في إحدى عربات القطر نتسلل إليهِ
عند ساعة الصفر.
كنا كِلآنا يفضل السفر على (السطح)، نحب التسطيح لأنه مُريح ومجان، يعنى لاغلبة
مسافرين، لا غلبة كماسرة، لاغلبة عساكر، لكنه في ظروف الشتاء صعب جداً نسبة
لأنّ سقط صحراء العتمور ولفح زمهريره لايُحتمل.

اتبرا جميلة، وحلوة، وناسها طيبين...
ونحن نتسكع فوق الرصيف أذكر الكثير من ناس اتبرا يعرفوننا ونعرفهم، الواحد فينا
زي السيّد علي الناس تنادى فينا يمين وشمال، ونحن مستمتعين بالونسة معهم وكذلك كنا
نستمتع بمغازلة الحسناوات المطلات من خلال نوافذ القطر.
حددنا عربية ونمرنا عليها مظبوط جداً. خالية من الإضاءة كحال جميع عربات القطر
الأُخرى وسطح يعنى ما فيها كنب ولا كراسي. بمجرد إطلاق الصافرة وتحرك القطر
قفزنا إلى داخل العربة التى كانت مليئة بالركاب.

تحرك القطر. الناس في العربة فى حالة صمت والظلام يتسكع في فضاءها إلا من بعض
بصيص الضوء يأتي وميضاً من خلال نوافذ العربة عندما يمر القطر بالقرب من عِمدان الكهرباء
في المحطات. هذا البصيص لايعطيك فرصة كافية لِتميّز ملامح الركاب داخل العربة.

حِليل القطر...
القطر جميل وبيفتح مجال للتعارف والتآلف والونسة، السبب الذى يجعل الرحلة نوع من
المتعة رغم مشقة السفر في ذلك الزمان.
المُهم، عمنا الشايقي ده هو البدا الونسة وكمان إستلمها يا قول أهلنا. شايقى ذو نسب في
الشايقية عميق وغريق، يعنى شايقى صِرف. لكنة شايقية عميقة وإنبهال فى الونسة لأبعد
حد ومفردات، جعلتنى والله العظيم أكون فى قمة المتعةالسبب الخلانى أشاركو الونسة لى
شقاوتى.

أها، عمنا دا بداء يتكلم عن العِرِس فى زمنو وما يصحبه من
إستعدادات، وتحضيرات، وهوايل.
قال مبتداءً حديثه بقسم غليظ لِيثبت أنّ كلامه حقائق: وحات سيدي، العرس فى الزمن
العلينا دا لغاويس ساكت. عِلِى زمنا أكان زمن زين، الزِرِيعىِ دى يقعدِن الحريم يسوّن
فيها قبل شهر.
وأحد سالوا: يا حاج الزريعة بتسوبيها شنو؟
ردَّ عليهو:هى عان نفر ده كمان، ضيفان الرماد بتدور تخلى خشُمُن ناشف. مِيا بيدوروا
يشربو. وواصل، ودق الرِيحِى دا كمان نضمو برا! بيجيبو الضفرة، وبِت السودان، وبِت
القِسيس ويلُخُو الدِلكِى والخُمرة. وحات سيدى، يومو اليجيبوها ليك، يجيبوها تريانىِ تنقط
من الدِهِن والكركار والرِيحِىِ، وبتدور لك عنقريب نصيح وكرابو شديد ويفُرشولك فوقو
العتنيبىِ الملونىِ وتقول كدى........
أنا على شقاوتي قلت ليهو: يا حاج عليك الله هسع ده كلام ده؟. ده عذاب. يا عمنا هسع
الريحة بقت بخاخ( عمنا طبعاً راخى أضانو وبيسمع والواطه ضلام)، عندك توليت، ومرايات،
وتجيك لابسة فستان النوم، والسرير دبُل نضيف ومفروش مليان مخدات والمرتبة إسفنج
( عمنا راخى أضانو ويصنّت) على اليمين يا عمنا المرتبة شِدة ما ليّنة تغتس فيها إنت
والمراة التقلعكن ما تتعرف. طوالى فى الحتة دى عمنا قاطعنى بصوت عالٍ شقَّ الضلام:
نان شِن الفايدىِ ما ودَر صُلُبا. إنفجرت الضحكات فى الضلام من من جميع أنحاء العربة.
وأنا سكتَ ساااااكت، وتانى أصلى ما فتحتَ خشمى معاهو، رغم إنه واصل ونستو، وكان
كل مرّة فى أثناء كلامو بيتعرض لى وهو ما قادر يشوفنى في الضلام: قُتَ لِى كيفِن المرتبة
يا المطموس، شغلتكُن دىِ شغلة طرطشِىِ ساكت. ويواصل: أها عارفين، تروح السوق،
تجيبلها توبين بنقالي، وتجيبلك كمان طِرقِىِ اللت زراق لى أُمها، النسابىِ كمان ليها مكانىِ،
المِطيميس قالىِ العنقريب كيفنو؟ والله حِكايِ! وِلادة الزمن ده اصليِ وِلادِيِ مبشتنىِ ساكت.
أنا ماسك خشمي على، وصاحبي الضحك كاتلو عدييييل كده. قلت له هامساً: أسمع يا فردة،
أنا الواطة قبل تفتح حا أزوغ بالرااااحة للسطح، إن شاء الله البرد يكتُلنى، بس عمك الشايقي
ده أصلو ما بخليهو الصباح يشوفنى.

قبل الشمس ماتشرق إتسللتَ بالرااااحة، وكان الناس في حالة هجعة في تلك اللحظات، وعمنا
أتاريهو صااااحى وشاعر بحركتى اوّل ما مشيت على باب العربة طوالى قال لي: بتدور
تِنسرِق منى يا الأغلـ..... أمانِىِ ماك ممسوخ، قُتلِىِ المرتبة كيفنها؟ عِرِفتنىِ بدور ازُرك
وِكتين الواطة تصبح، مُو كدى؟.
الناس في العربية إنبهلوا بالضحك، وأنا بسرعة إتخارجتَ للسطح، وإضطريت أقطع
المسافة المتبقية للخرتوم في برد لا يعلمه إلا الله...

ـــــــــــــــ
ـــــــــــ
ـــــــ
ــــ
ــ
ـ
.

جنا المدير المطموس؛
أيي؛ أنجر وسوُّو فوق عمك الشايقي!!

وقت كمان ساولك [ ساتر] بي الطيب صالح وبت مجدوب؟


_
والله يا معاويه متل حديث عمك دا؛ من طرف الدولاب!

Quote: مـحـاولـة لـتـفـجـيـر بـسـمـة في جـوف الـحـزن...

ود المدير سلامات


نحتاجها هذه الابتسامة

يُحــــــــــــول..
وما به من مٌرفقات..إلي عناية
المسنوح ود جبريل
حتي تتم الناقصة.....!




_
يعلم الله
مرقتَّ مني ضحكة....لي زمن ما ضحكتّ زيها.

تسلم يا الحبيب
تسلم ياخ.

ود المدير سلام

إنت من الزمن داااااااااااااااااااااااااكـ مباري رمي الكلام و الزوغان ..؟؟؟؟؟؟؟


تحياتي

Quote: والله يا معاويه متل حديث عمك دا؛ من طرف الدولاب!

هات العندك، خلي الطرطشة الملازمآك دي...

Quote: هات العندك، خلي الطرطشة الملازمآك دي...

آزول اِت بي صحك؟
والله بكري يرفعلي [أحمر] كرت عندو!!!

_
قال هات العندك!


[المطرطش]

Quote: ود المدير سلامات نحتاجها هذه الابتسامة

ما احوجنا لها يا تيسير، وسحائب الحزن قد حجبت سماء الوطن،
وما زال البعض يظن انها عآرض ممطرنا...

شكراً علي المرور يا تيسير...

Quote: يُحــــــــــــول.. وما به من مٌرفقات..إلي عناية المسنوح ود جبريل حتي تتم الناقصة.....![/QUOTE ـــــــــــــــــــــــــ الأخ الحبيب، هوآري. أن شاء الله دِيّمة مبسوط وضاحك. صاحبك الأيام ديل غازين لهو خابور، خليهو يفيق براهو بيجي...