الــقُــفّــة ...

القُفّة، موضوع لمن لا موضوع له.
زمان حبوباتنا كانن بقعدن يضفرن السعف، ويتونسن.

>
دحين دي ونسة ضفيرة سااااكت...

القفة هي ماعون لحمل الأغراض مصنوع من السعف. تنتمي القفة لفصيلة السعفيآت،
وهي في الأساس من قبيلة السعفاب التي ينتمي إليها كلاً من البرش، التقروقة، المُعلآق،
الكبديق، الطبق، النطع، حبال العناقريب، وهلمّ جرا...

هناك انواع عديدة من القُفف.
منها علي سبيل المثال لا الحصر:
قفة المُلآح، وتسمى ايضاً قفة الخدار.
قفة الدقيق.
قفة السمك، وهذه عادةً تكون مغلفة بخيشة (لزوم طرطيبة للسمك وكده)
قفة المنقة، ودي بتكون فوقها كاويقة في الغالب الأعم.
قفة الطاحونة، ويسمونها ايضاً قفة الدقيق.
قفة الرماد. وهي نوعان:
1- قفة الرماد في حالة الموت، وهذه يُخم فيها الرماد لزوم الردحي، والكِتيح في بيوت البكا.
2- قفة الرماد في حالة الجلد علي المذهب المالكي.
قفة الرماد، الأصل فيها وجود الرماد، وفي حالة عدمه الرملة تجزي...

عندما كنا نسافر بالقطر في الماضي بين اتبرا والخرتوم، محطتي المحميّة وحوش بانقا كانتا
مشهورتان بالصناعات السعفيّة. يعني من المحطتين ديل ممكن تشتري مُصلآية، حنقوق، هبابة،
طبق، كبديق، والنسوان ممكن يشترن نطُع. تلقى المرا مارقة لنصها من شباك القطر، والحاجة
من تحت مناولآها النطُع، وفي هذه الحالة تكون المحطة لحدها إتفرّجت. النطُع في ثقافة العرب
يُفرش لضرب الرقاب، وفي ثقافة السودانيين يُفرش لزوم الساونا وكده.
حوش بانقا إستطاعت ان تنتج اكبر قُفّة في تاريخ القُفف، والمحمية دوماً تذكرني بقصة الخطآف
وابو تاج. الغريب في القصة دي إنو الكاتب قال وقعت أحداثها في قرية من قرى المحميّة!!!
تقول المحميّة دي لآس فيقآس...

السودانيين الواحد لمان يدور يتثاقل عليك، تقول ليهو إنتظرني دقيقة. يقول ليك دقيقا والآ قفتا؟
مما يثبت إنه هنالك قُفّة خاصة بالدقيق، ومرتبطة به إرتباط طاحوني بحت.
في المثل يُقال: الزول دا لآ قُفّة لآ أضان قُفّة. يعني ما بتقدر تشيلوا شيّلة، وكان شلت لك شيّلة
ما بيقدر يشيل معآك. يعني لآ يعتمد عليه بتاتاً. خير مثال لهذا الضرب من الأزوال عبد الرحمن
الخضر وآلي الخرتوم. برضو من الأقوال المأثورة: فلآن شيلوهو القُفّة. يعني دقسوهو، بمعنى
تحدثوا حديث، وخلوهو مسطّح. التسطيح ده ما عارفو تسطيح راس القطر واللآ تسطيح آخر؟؟؟

من انواع القُفآف المشهورة، قُفّة الحلبيّة، والتي تحمل في باطنها اشياء كثيرة ومتناقضة. مثلاً،
كمشة، مقشاشة، دلآقين، علبة طحنية فاضية، كيزان، جبنة، محلبية، سرتية، بت القسيس، بت
السودان، غوايش فالصو...وهلمّ جرا... خير مثال لها الخرتوم...
قُفّة جلد النسوان، الأصل فيها ان تكون مقشوطة رماد، وفي حالة عدم الرماد أجاز علماءنا
الرملة. علي ان يُصب ماء علي الرماد او الرملة لإخفاء الأثر الذي ربما يترتب علي العقوبة،
وهي اللبعي. واللبعي الذي يؤدي إلي هذه الفعلة البايخة غالباً ما يكون لبع جد.

القُفّة عندها عروتين، وكلمة عروة عربية فصيحة مستعملة في عاميتنا السودانية مع إحتفاظنا
بمفردتنا العاميّة التي تقابلها وهي كلمة اضآن. يعني القُفّة عندها إضنين زيّ، زيّك. العرب يسمون
عروة، ومن الذين اشتُهِروا بهذا الإسم، عروة بن الورد، وعروة بن الزبير. ايضاً عندنا في
السودان بعض الناس إسمهم عروة، أشهرهم الفاتح عروة، وعروة الطيّب، زمان كان بيلعب في
الهلآل ومتخصص في كمال عبد الوهاب. يبدو لي انّ العرب إشتقوا الإسم من العروة الوثقى، بينما
نحن إشتققناه من اضان القّفّة. والله اعلم...


ده رحل.
ايّ زول عندو حاجة داير يختها في القفة
يتفضل.

ود المدير...

Quote: قبيلة السعفاب التي ينتمي إليها كلاً من البرش، التقروقة، المُعلآق، الكبديق، الطبق، النطع، حبال العناقريب، وهلمّ جرا...

أيواااا...

شئ فرزته وشئ لآ يا معاوية...

مع إني نشأت في مدينة الدامر...

أشهر المدن (ولا قرية ياربي) بصناعة السعفيات...

طيب لما يقول ليك الول دا شيّلك القفة مقصود بيها شنو

والله يا ود البشري..وماك طالبني حليفة من قبيل الجملة دي ترازي لي وداير أقولا لكن غلبني تب.......شيلوهو القفة دي عندها قصة في محطة الترماي بين أثنين من الشعراء وقطعوا فيها قصيدة كاملة.

ادينا القصة يا ابوبكر
ود المدير قال البوست قفة
مارقو للونسة

كون شبر: الكون شبر قفة يستعملها القرآع
لسد اللبقة وكتين تكسر.
الكلمة مستعملة في الشمالية، وإعتقد إنها
نوبيّة.
في غنى مصطفى سيد احمد الله يرحمو:
كون شبر طورِيِ منجل...

شكرا يا ود المدير ..بوست غير او كما يقول اهلنا السعاودة ...متابعين

Quote: أيواااا... شئ فرزته وشئ لآ يا معاوية... مع إني نشأت في مدينة الدامر... أشهر المدن (ولا قرية ياربي) بصناعة السعفيات...

يهوووووووون الله يا قول حبوبتي.
الما فرزتيهو شنو يا بت عبد العال؟
ورينا اكان نوقعوا ليك.
إنت من دآمر المجذوب، واللآ
من دآمر تكساس؟؟؟

بالنسبة للدآمر، غايتو شيخنا توفيق صالح جبريل
عليه رحمة الله قال:


أيا دامـــــر المجــــذوب ما أنت قـرية
بداوتها تبــــدو ولا انت بنـــدر ...

الحُق هنا سيّد الموقف، وهو ينتمي إلي فصيلة الخشباب.
اشهر قبائلها بني خشب، ومنهم المفراكة، عود الطورية،
السِيبا، البديقة، الوآسوق، العُكآز، الدفارة، الخُلآل. وهي
قبيلة كبيرة متعددة الأفخاذ...

ود المدير

ليك وحشة شديدة

بالجد بوست مفيد

هكذا انت دوما تغطس لتخرج لنا بالدرر

في وقت نقرب نموت فيه من الدبرسة

في وقت رويحات كل السودانيين مشلهتة ومتوترة بالحيل

في وقت بينه وبين السنة الجديدة جدعة حجر والانفصال اقرب من حبل الوريد

بوستاتك بتديني اليقين باني سوداني حتي النخاع

بتطمني وترجعني لذاتي القريبة

عاش السودان

وعشت يا مدير

لك كل الود

سيف

الله يصلح الحال لكي تمتلأ القفاف عامة

قولوا امين

Quote: ادينا القصة يا ابوبكر ود المدير قال البوست قفة مارقو للونسة

محمد البشرى، سلآم.
في انتظار اخونا ابو بكر.
طبعاً يا ود البشرى النطُع ده زي ما عارف للدُخان.
وللماعارفين، فهو شبيه بالتقروقة الدائرية، والفرق
بينو وبينها التقروقة مصمّتة بينما النطع له فتحة
دائرية في النص توضع حول حلقة المدخنة التي
غلباً ما تكون رقبة زير او قّلّة.

رحم الله شاعرنا محمد المهدي المجذوب،
فقد ابدع حينما نظم:

وحفرة بدخان الطلح فاغمة تندي الروادف تلويناً وتعطيرا

لمحت فيه وما أمعنت عارية تخفي وتظهر مثل النجم مذعورا

مدت بناناً له الحناء يانعة ترد ثوباً الى النهدين محسورا

قد لفها العطر لف الغيم منتشراً بدر الدجى وروى من نورها نورا

يزيد صفرتها لمعاً، وجدتها صقلاً، وناهدها المشدود تدويرا...

ههههههههههههه

Quote: طبعاً يا ود البشرى النطُع ده زي ما عارف للدُخان.

يا معلّم العرّفني شنو؟
ما تجيب لينا الكلام ساي الله يرضى عليك

Quote: والله يا ود البشري..وماك طالبني حليفة من قبيل الجملة دي ترازي لي وداير أقولا لكن غلبني تب.......شيلوهو القفة دي عندها قصة في محطة الترماي بين أثنين من الشعراء وقطعوا فيها قصيدة كاملة.

ابو بكر قسومة،
يا اخي والله شوقتنا،
خاسةً للقصيدة.
علي العموم نحن في إنتظارك...



قمّة الروعة في الثراث، والفلكلور.
برش معلّق في معلآق، او مشلعيب كما يسميه
البعض. المُعلآق هو بمثابة الحفاظة اليوم، فهو
يحفظ بُخسة الروب، او اللحيمات من الكدسة،
وهوام الأرض...

Quote: يا معلّم العرّفني شنو؟ ما تجيب لينا الكلام ساي الله يرضى عليك

غايتو نفر مسكنتاً عليك يا ود الخضر! يعميني.
خيبتَ ظني فيك. وحات جدي عبد المعروف
ما كنت قايلك زول الله لي هِن قدُر!!!

القرقريبة من فصيلة السعفاب ايضاً،
وتستعمل في العوآسة.





منتهى البراءة

Quote: كون شبر: الكون شبر قفة يستعملها القرآع لسد اللبقة وكتين تكسر.

معاوية ياودالمدير غايتو عليك جنس محن
كيف أحوالك والشوق مطر

Quote: شكرا يا ود المدير ..بوست غير او كما يقول اهلنا السعاودة ...متابعين

البدري،
شكراً لمرورك الذي عطّر البوست برائحة السعف،
ولوّن الأمكنة بماء التِبآب.
ينتمي إلي قبيلة الخشباب بني عُكاز، وهم أهل صلآح وتقوى. حيث ينتسبون
إلي جدهم المجاهد عصاة سيدنا موسى التي قهرت عدو الله فرعون.
انجب عُكاز العديد من البنات والبنين، علي سبيل المثال لا الحصر: القناية،
والقرجة، الحدآثة، الدفارة، الباسطونة، الكريز، الفلقة، السلميّة...إلخ

Quote: القفة هي ماعون لحمل الأغراض مصنوع من السعف. تنتمي القفة لفصيلة السعفيآت، وهي في الأساس من قبيلة السعفاب التي ينتمي إليها كلاً من البرش، التقروقة، المُعلآق، الكبديق، الطبق، النطع، حبال العناقريب، وهلمّ جرا

وعندنا قفة كبيرة رقاصة تنتمى للظلاميين.....


العزيز ود المدير


سلام

ما زلنا ننتظرك في البوست داك...
يعني تجي بالقفة فوق رسينا!!

صدّق .. القفة صارت رمزية أكثر من وجودها بين ايدينا..
فمهما شرحت في المعاني.. ستظل صورتها الرمزية هي الأقوى

تحياتي

سيادة المدير جنب قفتنا دي
احسن تشيل قفتك و تتخارج
تحياتي

Quote: الله يصلح الحال لكي تمتلأ القفاف عامة قولوا امين

ود البرعي، يا اخي قفة مليانة أشواق لشخصك.
قبل حكومة النميري الناس كانوا بيشيلوا القفة، ويمشو السوق
يملوها ما لذَّ وطآب. بعد حكومة النميري بقو يشيلوا القروش
بالقفة، ويرجعو بتفاتيف في قعرا. في عهد الإنخاس يا كافي
البلآ بقت لآ في قُفّة، لآ قريشات.

أشجار الدوم هي المصدر الأساسي لصناعة السعفيات.
تشتهر منطقة نهر اتبرا بأشجار الدوم، وتسمى اتبرا
ام دوم، وتعتبر الممول الرئيسي لسوق السعف في
الدآمر بالسعف...

العزيز/ فيسل



مبالغة لكن..........

قفة جوج وماجوج!!

الزول يرقد في ضلها مطمئن ومافي زول بيشلك ليها...

Quote: سيادة المدير جنب قفتنا دي احسن تشيل قفتك و تتخارج تحياتي

فيصل خليل،
مشكور علي الطلة الجميلة، والله
جد شرفتنا.
تصدق يا فيصل الجنب القفة ديل ولآد اهلي
من الباوقة المهددة زيكم بالسدود والغراق.
يا زول والله قفتكم دي ما تسوى ايّ حاجة
مع قفة حوش بانقا. حوش بانقا دي المصنع
الأساسي للقفاف، وإستطاعت ان تنتج
اكبر قفة في العالم...

Quote: القرقريبة من فصيلة السعفاب ايضاً، وتستعمل في العوآسة.

ههههههههههههههه
يعني يا ود المدر من الدخان للعواسة , أصلو ما في نشاط رجالي تسألني منه
كدي عيب لي برش الصلاة

سلام يا ودعمي

اها دحين ما نسيت القفيفات السغار البسونهن الحبوبات للشفع
يلقطوبن تمر الهبوب






خالص الود

Quote: سلام يا ودعمي اها دحين ما نسيت القفيفات السغار البسونهن الحبوبات للشفع يلقطوبن تمر الهبوب

حباب ود عمي بيناوي،
عآد كيفن بنساهن؟
اسمن الرمايات يا ود بيناوي. الواحدة رماية.
كنا نمشي لحبوبتنا رقية تضفرن لينا للتمر.
الواحد فينا تلقاهو ماسك في صنصور النخلة،
ويلقط في امات راس والعجوة. وحاتك يا ياسر
الدباس كان ياكل معانا، وكمان الزرازير.
بتتذكر قُرآم الطير؟
حليل الزمن الجميل...

Quote: معاوية ياودالمدير غايتو عليك جنس محن كيف أحوالك والشوق مطر

يحي ابنعوف يا صاحب.
اريت حالك زين؟
ومن انواع القفف ايضاً الطرود، طرد المنقة،
طرد البرتكان، طرد التمر. بعد يعبوا القفة بالفاكهة
بيزموها، ويخيتوها بسعف النخل، واللآ شنو
كلآمي ليك؟.

اشواقنا يا يحي، وتوقعني
في زيارة ليكم قريب إن شاء الله...

Quote: ما زلنا ننتظرك في البوست داك... يعني تجي بالقفة فوق رسينا!!

عبد العزيز يا عزيز،
ضل النيمة تب ما فايتنو.
ينتمي إلي قبيلة بني خشبة الطرور، وهم أسواء فخذ
في القبيلة. ما فيهم فايدة تب. هشين، سرعي الكسر
والتِفِتت، إذا وضعتهم في الموية يشفطوها شفط الجن
لمان يبقوا أكان هبشتهم بإيدك يتفتتوا.
أهلنا لمان تشرب موية كتيرة يقولولك: لا تشرب كتير
بتطورر، ويغلبك تاكل.
خير مثال لهذا النوع من بني خشبة، المتعافي. بالمناسبة
الزول ده غاتس وين؟ بصرآحة الطرورة ده احسن يكون
ظاهر، غتستو دي تخوّف...

Quote: ههههههههههههههه يعني يا ود المدر من الدخان للعواسة , أصلو ما في نشاط رجالي تسألني منه كدي عيب لي برش الصلاة

يا ود الخضر، برش الصلآة عدآهو العيب.
وكمان طريتني برش رمضان، وكواري الليمون
والحلومر المرسوم فوقن الهلآل، ومكتوب فوقن
رمضان كريم. آآآه يا زمن. ارحم شوية.


يا اخوي شايفك العكاكيز، والبساطين المتكلآت في البوست
فوتهن خوووو، ومشيت علي القرقريبة والنطُع البيفرشوهو
زمان لطهارة المشارط. مانى داير اجيب سيرة البيعكل في
السماء عشان ما تتهمني.
بالله زمان اجي دآخل حلتنا بي في الليل، اعاين في السماء
اقول يا جماعة الحِلّة دي حرقت واللآ شنو؟. فجأة إتذكر
اقول واللآ، آآآآآآآآآ هو مياهو الليلة الخميس...

موضوع يستحق ان يبقي عاليا

البشر في الأسامي ينسبون كثيراً إلي بني خشبة،
فتجد مثلاً اسامي مثل: ابقناية، الجار عودو، ابقرجة،
وكمان لمان يدوروا يوصفوا، يقول ليك: يا زول
والله فلآنة ضعييييفة زي الباسطونة، وكرعينها
زي المساويك، والمساويك هم شُفّع بني عُكاز.
كمان برضو تجد من يقول لك: يا زول علي
اليمين فلآن محني زي عُكاز السلم، أو وآحد
يقول ليك فلآن وآقف خشبة، وفي القرآن كأنهم
خُشُبٌ مُسنّدة.

من بني خشبة السلوكة، أو السلوقة. يا حليلها
علي اليمين تقول كانت بتطعن في الجروف
وتمرق منها البركة، الليلة المكن البيخدم في
الزرآعة ده كلو ما قاضي غرد!!!