ياريس انت اما كضاب أو مغشوش

أمس وفى التلفزيون ورقدة ماقبل النوم رمانى الرموت فى زيارة السيد الرئيس لديارنا بالجزيرة وخلق تقيلة جدا وناس راكبة جمال جابوها من وين ماعارف والرئيس يدغدغ فى الناس بالاسلام والمطامير و وزير الدفاع يتثاءب أثناء خطبة الرئيس وبتاع الكاميرا ذى القاصدها .
أكثر ما أكد لى انو ريسنا بعرض خارج الحلقة تماما هو تصريحة بانة قريبا سوف يعود للجزيرة مجدها والناس سوف يصيروا اغنياء بعدما يزعوا القطن مرة اخرى بانتاجية 20 قنطار للفدان اكرر عشرين قنطار للفدان ( يعنى حواشتنا ) تنتج 200 قنطار قطن ( ولو دا تم سوف امتطى صهوة الكورولا التى عجزت انا اقتنيها بالسودان من اغترابى ) . ياريس القطن الكتير دا انقلوة بى شنو المتعافى ماباع السكة حديدبتاعت الجزيرة واتعملت سيخ . النقل ما مشكلة اللوارى موجودة ولكين اتحلج وين المحالج شلعوها وباعوها ناس المتعافى زمان . تانى حاجة ياريس ماتضحك على اهلنا عندنا قروش مستحقة بتاعت ايجار ارض المشروع.ما جبت ليها خبر
اغرب مافى الخطاب هو حس الناس على دفع الزكاة من وين ياريس .
الخطاب طويل وعجيب ولكن ريسنا دا ام كضاب او فى ناس غاشنو وبيقدمو ليهو تقارير كاذبة أو بيضحك على اهلنا بالجزيرة .قال خزائن قال

انه النفاق وتغبيش الوعي
انه المشروع الحضاري
انه مشروع اعادة صياغة الانسان السوداني
الجزيرة اصبحت نسيا منسيا في عهد الانقاذ
وحين الزنقة
يعودون لها ولاهلها الطيبين
اللهم احفظنا بحفظك من الكيزان ومن لف لفهم
اللهم وبحق اهل الجزيرة المساكين عجل برحيل الكيزان
اللهم احفظ ماتبقي لنا من كيد الكيزان ومن لف لفهم
ـــــــــــــــــــــــــــــــــــــــــــــــــــــ
والسلام لكل اهل الجزيرة