الريح قلب

الريح قلب والموج فات الدير
والقريه ميلت وانقطعو العياير
مبارك ود بسطاوي وسط الفوارس امير
كنت بدور اشوفك لكن حكمو المغادير
وعرفت منك البجيبو الله خير في خير
والعمر عاريه ومابربطوه بي سير
واللدر العشاري يوما بياكلو الصير
ماطمعتا يوم في حاجه ومادرت حق الغير
مابتشكي ابدا انت والقليل تشوفو كتير
يالعواي والسماك المابداخلو هجير
يانسمه فجر وفي الفارغه ماك وكير
ساهل حلو وكريم صبرك يغلب العير
حليل سرتقنا داك والطوف وهيط وكبير
وبالنا دايما رايق برمهات والا امشير
ثابت زي ام كبك والحال بدورلو نفير
نوم يافحل شبهك مابشتلوه كتير

الدير : هو حافة المركب
القريه: الصاري باللهجه السودانيه
العياير: جمع عيار وهو الحبل الذي يشد القريه
اللدر: التمساح
العشاري :مايبلغ طوله عشر ازرع
العواي والسماك: اثنان من منازل المطر
برمهات: شهر الربيع والريح الطيب في السودان
أمشير: شهر البرد ورياح ام نو
ام كبك: شبكه تثبت بصخور ضخمه في القاع

مبارك بسطاوي كان من اهالي توتي حلوا بسيطا هادئا وهو اكبر مدرس في حياتي لازمته لسنتين ونصف لم يعكر صفوها اي شئ. كان يزرع الجزيرة الهلاليه بين الموردة وجزيرة توتي الكبيره تقابلنا وانا في السابعه عشر من عمري وعمره ضعف ذلك وقتها كان له خمسه من الاطفال اثنين من البنات وثلاثه من الاولاد مرغني وعمر وصلاح. كان يزرع في الراس الطيني في في شمال الجزيره التي عرفت بالساره وام كيعان وهي اسماء بعض السواقي القديمه في توتي كنا نزرع البازنجان والباميه والسلج والطماطم دخن الجزائر الذي هو عشب لعرش البيوت وفي الطرح او المنطقه الرمليه كانت لنا مقا شرقيه وغربيه نزرع فيهم البطيخ والعجور والكورجيجه(بتعطيش الجيم) وتعرف للعامه بقرع كوسه ولان والده كان صاحب عطاء تشغيل معدية توتي ومعديتين صغيرتين بين توتي وبحري فلقد تعلمت علي يد الريس مرغني الذي يحمل شلوخ الشايقيه وهو من ودراوه تشغيل المعديه وعندما صرت في الثامنه عشر كنت ادير المعديه لوحدي في بعض الاحيان عندما يكون الريس مرتاحا في القيلوله او كنت اساعد الريس عندما يبلط الريح لجر المركب محملا بالدواب والبشر الي بورابوالبتول منطقه البرلمان السوداني الان ثم التجديف بقوة الي المشرع .
وهياني هذا للاختلاط بالحواته والنواته وصرت وكاني احدهم .
اتصور مبارك وهو مكبا علي عمله بجد ماسكا المسحه وهي طوريه عريضه لحفر كونيه في الرمل وهي حفره تملاء بالماروق وهي المخلفات البشريه التي نجمعها من المراحيض من المنازل ونبزر فيها البزور .

مبارك بسطاوي, الحاج, شرف حريقه, خوجلي رجلان وابودبوره والحواته العم الغول , قرض وحجير هم البسطاء الذين صنعوا ويصنعون الوطن بدون جعجعه. كرماء احرار كالسمك في النهر او الطير في السماء رزقهم في رحم الغيب الا انهم شجعان لايساومون صادقون مع نفسهم ومع الاخرين لا يسالون كثير
مبارك بسطاوي تقبلني بدون ان يسالني من انا ومن اين اتيت ولماذا اتواجد معه وتقبلني الاخرون وصار لنا سرتق اومركب حراز صغير بقماش ابيض نظيف وقبلها كان لنا طوف كبير من الطرور نستعمله في رمي الصريمه وهي مئات السنارات مربوطه في خيط قوي.
المني ان اسمع خبر موت مبارك بسطاوي قبل ايام فعندما حضر الهادي من كوبنهاجن لقضاء نهايه الاسبوع وفي محطة القطار قابل الاخ اوبي وهو من توتي ويحضر الان في جامعه غوتنبوري وطلب منه ان يبلغني ان مبارك قد غادرنا انا لم اقابل اوبي ولكن كنت قد افردت فصلا في كتاب حكاوي ام درمان لمبارك بسطاوي واهل توتي

رحم الله مبارك

شوقي بدري

الاستاذ شوقى

رحم الله العم مبارك.....يطول عمرك
امل منك ان تكتب بوست عن الفنان مصطفى عثمان بشير ابن الحلفايا لانه جدير ان يتعرف عليه اهل البورد
رحمه الله بقدر ما ابدع

العم مبارك بسطاوى اعتقد انه احد اولئك الذين عناهم الاخ شوقى بدرى فى كتابه( حكاوى امدرمانيه )عندما دعى جماعة من الحواته ونوتية معدية( امدرمان - توتى) الى وجبة غداء فى منزله يوم جمعة , فبالغت والدة شوقى فى التحضيرات لتلك العزومه , فأخرجت (الشوك والسكاكين والاوانى الفضية) التى كان والده عمنا ابراهيم بدرى عليه الرحمة يستعملها حين دعوة الحاكم العام وكبار الضيوف أمثال الشاعر توفيق صالح جبريل, ولخدمة الضيوف لبس سفرجى الاسرة (موسى كودى) الزى الرسمى للقيام بها ! , فى البداية لم يعلق احدهم باى شئ من غرابة ما يرون يجرى امامهم .. ولكن اكثرهم ظرفا الفت الى شوقى قائلا :- انت يا زول أكان كل يوم عندك زى السفره دى , الجابرك شنو على الشقاوه معانا ؟! .. وتانى أكان عزمتنا حديدكم ده ماتجيبوا .. بشغلنا ساكت

------------

سؤال لشوقى :- ورد فى حديثك اشارة الى ضريح بر أبو البتول .. وسؤالى هو هل بالفعل ان هذا الضريح الشهير كان فى مكان الجمعيه التأسيسيه حاليا , ام فى المكان الذى عليه قصر الشباب والاطفال الآن ؟! , فحسب ما اذكر ان مكان الجمعيه التأسيسه بأمدرمان كان يقوم السجن الحربى , والله اعلم
والرحمه للعم بسطاوى

الاخ دورنقاس.. لقد سبق وان كتبت موضوعا كاملا بالصور عن الفنان مصطفي بشير طيب الله ثراه وسوف اعيد هذا الموضوع انشاء الله


عزيزي ابو علي .. بور ابو البتول كان بيان بتاع فكي جنب بيوتكم زمان علي اللبخ مباشرة علي
الشاطئ في منطقه مجلس الشعب الان والناس كانت بتقيل وبتعمل قهوه ونذور ..والخ . في غنيه قديمه بغنيها ابوداوود في القعدات للشاعرة والفنانه الام درمانيه فاطمه خميس وهي من اجمل المناحات لوالدها خميس وبتقول

يادمعي اللتشتت وغلب اللقاط
ياسيدي وسيد ريدي اشكي ليك انا بجروحي


وتستدرك قائله:ـ

بس اقول يا بور يابو بتول ياجليس يالساكن الصور

هذه الاغنيه اعاد تسجيلها بتوزيع رائع واداء مدهش الفنان مصطفي السني المقيم في لندن الا انه اخطاء كالكثيرين ويقول ياجليس يالساكن السوق وترجمها الي الانجليزي
my companion who is living in the Bazar
وجليس فكي اخر له بيان ضخم غرب مدرسة الصناعه في بيت المال حي الملازمين

وشكرا يابوعلي

شوقي بدري