بين ريره والصفيه

بين ريره والصفيه

لي ود اخوي الهكرنجي ولي اهل البورد .
في التركيه صار ود ابسن مديراً علي الخرطوم فقصده احد اهلنا من بسطاء البطانه شاكياً . الاان ابسن لم يجد له حقاً فيما طلب . فانصرف الشكري صامتاً عابساً فناداه ابوسن وطيب خاطره وقضي امره ثم سأله انت يا شقي الحال كنت بتدور تمشي تسوي شنو .؟ وبعد الحاح علي الشكري . بس كنت بدور امشي أولع كدوسي بين ريره والصفيه .
ابو سن حس بأن الشكري عند انصرافه كان ينوي شراً واشعال نار في البطانه كان يسبب خراباً للزرع والضرع والحياه البريه .
والآن عندما تشتعل النيران في كلفورنيا بطريقه تكاد تكون سنويه السبب في اغلب الاوقات هو الحقد الاجتماعي فالمهاجرين من لاتين امريكا وفقراء امريكا يحسون بأنهم خارج المنظومه ويبدو ان ود اخوي الهكرنجي انو خارج المنظومه فلندخله معنا وهذه دعوه له اذا وافق الاخرون . واهلنا قالوا الليك ليك وكان بقه لين العشر سوي فوق عينيك . ولا داعي لتوجيه الشتائم والنعوت والصفات .
عمنا العمده بشير مصطفي عمده كساب وشقيق الناظر بكر في النيل الازرق كان يقضي اموره بالحكمه فعندما لم يجد الاحترام من مساعد الحكيم ارسل له هديه في الصباح وعندما حضر المفتش في الظهر كانت الشفخانه مقفوله ومساعد الحكيم سكران . وعندما اختلف مع المأمور المصري المتقطرس قال للمدير البريطاني عندما سأله عن المأمور فقال زول ود ناس وعالم عرفنا بعظمه مصر والزعيم سعد زعلول ومصطفي كامل . فنقل المأمور . وعندما سؤل عن المفتش البريطاني الجديد وبقيه المفتشين قال للمدير كلهم كويسين بس الا الجنا ده طول فنقل المفتش .
فلا داعي للشتائم الكيشوتيات . فالنعمان عندما لم يستطع جنده ورعاته ان يمسكوا بالمعيدي الذي كان ينهب ابله ويقتل جنوده امنه علي نفسه وانعم عليه . الا ان المعيدي لم يكن الفارس الضخم القوي الذي كان يتخيله فلقد كان فصيراً نحيلآ ولذا قال النعمان ما صار مثلا . تسمع بالمعيدي خير من تراه .
يا ود اخوي الهكرنجي يعني من كل بوردات الدنيا دي ما لقيت غير حق اهلك ده؟ ياخي ما تشوف ناس السي أي ايه او الامن السوداني العندو كمبيوتر مسجلين فيهو كل معارض و شريف سوط ليهم كمبيوتراتهم . ولا بس فلاحتي في ود مرتي؟ .
بعض اخوانا الاجانب من اليوغسلاف والالبان يتعبوا ويشقوا بعد سنين من الحرمان يعملوا ليهم قهوه او ملهي يجو اولاد اهلهم يتفرعنوا ويكسروها . اذكر صديقي ميلان يقول لاهله الصرب ليه ما بتمشوا للسويديين ولا عشان عندهم حراس في الباب الواحد وزنوا 120 كيلو عضلات وفقرتوا بس تسد الباب ولا عشان عارفين انا ما ممكن اجيب ليكم البوليس .
ارجو ان يتوقف الامر هنا وليس هنالك داعي للتصعيد . محلج كان تفشجي طيله عمره في الجيش يعني بصلح السلاح وفي اخر ايامه في الخدمه كان مريضا في المستشفي فاكتشف الطبيب في السلاح الطبي شلالي ان محلج يحضر العرقي في تيرمس الشاي فأصر علي طرده وعقابه فقال له محلج ( ياخي دي عيونك ولا عيون اختك ) فثار شلالي وأصر علي طرده من الخدمه فقال له حمد النيل ضيف الله قائد الجيش السوداني كلام ذي ده مع العساكر مفروض تتظاهر بانك ما سمعتوا عشان ما يحصل مواجهه حتي اذا كسبتها حتكون خسران وبعدين محلج ده شغال في الجيش ده من ما كان ولد صغير نص تعيين . انت بتعرف تصلح سلاح ؟ .

البورد ده بقه لامي الناس وباقي التايه والشايه والشونقاقه . ولا انت عايز( سراره اللعوت البتلاقوا في الحرق والموت) .
ومش حنواصل . شوقي...

الأخ شوقى

يسرنى ان التقى احرفك الجميلة لاول مرة ومن سوء حظى اننى لم اقرأ لك بوستا من قبل بينما لو اننى اعرفك هكذا لتعقبت كل ما تكتبه من خواطر او بوستات ..
حقيقة كلامك اخى جميل جدا وهو نوع نفتقده فانت بصراحة شكل ثانى كما يقولون ولونيتك هذه جديدة تماما على الاقل على شخصى الضعيف الما قراى ولكنها تعجبنى واضم صوتى لصوتك واقول لاخونا المذكور ياخوى شوف ناس الجبهة ديل والله عندهم مواقع بالكوم خربها وجوطها واكان خربت مواقع الحكومة تكون عملت حاجة واوصيك بمواقع الضرائب اولا ولكن نحن هنا غلابه فلا تحرمنا روعة اللقاءات مع امثال شوقى وبقية الحلوين هنا..

لك تحياتى اخى شوقى وزدنا ارجوك من روائعك هذه ..

أستاذنا شوقي بدري
كالعاده موسوعي وشيق في سردك ، لكن يا أستاذي الفاضل هكر الجن ده لو بيستمتع بي زي كلامك الجميل ده ما كان إشطت في عداوته، وأستغرب لشخص يكون بهذه السطحية أن يري في الهدم لذة ، خاصة ولو كان المهدوم داره التي يقطنها وغيره وأذكر هنا قول الحبوبات لما يشوفوا الشين من الفعل أو العمل..: يا ولدي كدي أرقد علي قفاك وأبصق شوف البصقة بتقع وين ...وزولنا ده ما قصر تب في الأزية الله يكون في عونه .
لك التحايا الطيبات
وكل عام وانت والأسرة الكريمة بخير

up

شكرا لك يا استاذ شوقى بدر ولك حبى و تقديرى