للمتزوجات فقط ...كيف اقضى ليلتى الاولى...؟؟!!

كدى براحة الشغلانة ما زى فى الليلة ديك ..الشغلانة دى جادة وبتخص الرجال كاملين الدين وبقو فى النسوان زاهدين...مدخل اول
طبعا اخوكم/ ن العبد لله اذا اعتبرتونى اخوكم من زمان مطبق فى خريطة شق الديار علم لحدما زمنى كلو عديتو لاف بره لامن تروسى فوتت..قراية بره شغل بره وكلو بره بره ...اهه فى الاخر قلت اجرب الشغل الجو جوه علشان اكتسب خبره وارجع اطش تانى ..وحصل... رجعت السودان بعد طول غياب بحثا عن اكتساب الخبره وفعلا حصل ... اهه قمت لاقيتا ليكم وحصلت الكهرباء من اول تماس لحدما بقيت تورش وما بولع اكان ما شفتها ومليت بطارياتى منها ..وبعد برهه " حلوة برهه دى " رجعت حليمة لعادتها القديمة وتانى قمت جارى بره ومرت سنوات والبطارية كملت ولما اسال منها يقولو لى انتهت من جامعة وبدت فى واحدة تانى .... عينى باردة ما لاقيت لى زولة بتقرا فى قران كريم ومحاسبة وقانون فى وكت واحد .. و الرابعة انا ماعارفه شنو؟ ... اهه قلت احسن اسرق لى اسبوعبن تلاتة من الغربة و امشى اشوف الحاصل شنو .؟ .انتهى المدخل التانى
تعرفو يوم انا جالس وخالط لى خلطة شغل مع حاجة كدى يكفى انها مخرجة رائعة وعاملين سوا شغل حلو وتمام التمام ... يقوم الموبايل يرن ويزن وكانت رنة طويلة وحزينة..
انا :الو
هو: الو معاى الاستاز "....."
انا : ايوه معك انت منو؟
هو: انا فلان ماعرفتنى شغال مع اخوك الكبير ..
انا : اهلا معليش الزمن طال كيفك وكيف اخوى وناس المكتب؟
هو: كويسين.. اخوك بيقول ليك ابوك مات قبل شوية واسع بيعملو فى اجراءات شهادة الوفاة وبيدفنو الساعة ... فى حمد النيل
انا :......................
هو: طااااااخخخخخخخخ السماعة
هى :خير ايش فى ؟
انا :لا مافى شى بس ابو مات قبل ساعات !!
هى :................
انا: .................. يلا نكمل الصفحات دى..

المهم حصل لى انقطاع فى الارسال لفترة من الزمن ثم اصبح الارسال مشوش مره اشوف ابوى ومره اسمع رنات تلفونات ومره اشوفا ليكم .. تقولى يخص عليك ابوك مات وانت لسع مزازى بالبلدان ؟
وقررت الرجوع للبلد بعد السنين المرة يادوب...............
كانت الاجازة تلاتة اسابيع ..الاول فى العزاء والتانى بين الضرائب والخدمة الالزامية والتالت انا عريس"بدون دخله اكيد " طبعا ما حاتصدقو حتى ولو غنت ليكم احلام لا تصدقونه ...طبعا انا من زمان بتاع نظريات وبكره الحزن وبدى الدنيا دى بالجزمة الجديدة ودايسه للاخر.. اسبوعى كان تمام ... التلاتاء اقنعت ناس البيت انو الحى ابقى من الميت وداير امى تشوف جناى وعشاى و.اقتنعو بس مين بيقنع الجيران ؟ ..الاربعاء الجيران اقتنعوا ..الخميس الرجال والنسوان مشو اتقدمو وفتحو خشومن ... الجمعة كان العقد ...الاحد انا احلق على ارتفاع الاف قدم فوق البحر طاش مرة تانية... وبعد فترة هى زاته جاتنى طايرة واصبحنا فى الهوا سوا.. احلى حاجة فى العقد كلو ما اشوف لي راجل قيمة كده "زى ما بقول سمير غانم" اقول دى زولى ده ابو القدح اقصد ابو النسب يطلع ده واحد تانى والغريبة هو زاتو كان بفتش لى بس بى حرفنة طبعا ما حلوة يسال عن راجل بنتو ؟ والالز اكتشفنا انا هو كنا قاعدين فى كرسيين متجاورين فى صيوان العقد ..
دى قصتى باختصار شديد...!!
الحمد لله الان انتجنا الاء امورة تفتح النفس على الدنيا وهى على مشارف النصف الثانى من عامها الاول ..ولكن المشكلة فى الاتى :
لا انا ولا الاء ولا ام الاء بنعرف بيتنا ولا بيتهم لان كلا الاسرتين رحلتا فى منزل جديدة فى احياء اخرى ودى حلها بسيط ...
لكن اساس رفع هذا البوست هو التنازع بين الاهل ... اهل الزوجة التى ترغب امها فى النزول معها لقضاء كامل الاجازة وما بعدها وام البطل الزوج التى ترغب فى ضم زوجة ولدها فى حضنها وتحت جناحها يعنى الولد مفروض ينزل فى بيت ابوه.. البيت الكبير .. وهى مشكلة رغم بساطتها الا ان احتمال والدتها لمشاكل اخرى وارد... وفى حالتى هذه وانا انوى قضاء اجازة هادئة بين الاهل ماذا افعل خاصة وانا بيتى لم يكتمل بعد..يعنىباختصار من المطار الى اين اتجه اولا واين اقضى ليلتى الاولى وكيف اقضيها من حيث الاسلوب والتعامل مع النسيب والنسيبة و.....و,,,,,, خاصة وانا طريفى زول نصيحة وما بعرف اسكت على شيى ما عاجبنى والا وضع انا شايفو ماياهو...نسمع من الخبراء/ ت من باب انها مشكلة عامة...

اول شي وتووشك كده ممكن أقول ليك ياخ إنت زول راقي ...
السهل الممتنع روعة في السرد تنقل ما بين الحزين والسعيد ما بين المبكي والمضحك وما بين المؤلم والممتع ..

معليش للتخريمة وماني متزوج بس كلامك سمح بالحيل ..
غايتو بقول ليك السودان بقت فيهو الشقق المفروشة والمجهزة مخصوووووص للمغتربين الزي حالتك دي لكن كم وكم أتمني أن تقضي إجازتك كللللللللللللها بين الأهل فقط الأهل ولا شئ غير الأهل ...

دي يحلها دكتور عادل سجيمان

اول دخول دايما مميز والاول مابتحول تسلم ياراقى يازوق..

تعرف ياسيف ناس البورد لو ما ادونى فتوى واضحة للشغلانة دى يانى الكابى الزوقة ودافر تانى لى قدام ومايمسكنى الا المحيط المتجمد الفلانى... مدد ياسجيمان وبقية الاخصائيين..
شكرا على المرور سيف

سلام عزابي برضو...
والله انا شايفكم يالمعرسين انكم مترفين خالص خالص.. مشاكلكم ذاته كده مشاكل بالرجاله كده..
بعد الواحد لقي بت الحلال، وبعدين اهلوا اقتنعوا بيها، وبعدين عمل حاجاتوا كلها الكلام الكتير بتاع فتح خشم وقفل خشم وشيله وحفله وووو،،،، تاني انا ماشيف اي مشكله ممكن تكون اكبر من كده،،،
عيشوا حياتكم واستمتعوا بيها كان هنا، كان هناك.. والله يفك حيرتنا!!

الحل بسيط جدا
و للمعلويه هو الحل الوحيد للمشكله دى . يعنى اى حل اخر غير قابل للتفيذ
كل واحد فيكم يمشى بيت اهلوا
هى تمشى (مع بنتها) لبيت اهلها و انت تمشى لبيت اهلك
لكن لازم (اقول لازم ) اثناء ايام الزياره للسودان تشيل ليك غيارين تلاته و تمشى تقعد معاهم فى بيت اهلها , و هى برضوا لازم تيجب شويه غيرات لبنتها و تجى تقعد مع اهلك عشان والدتك تشوف حفيدتها و بنتها الجديده ( زوجتك )
صدقنى ده هو الحل المثالى

الحل تنزل اولا في البيت الاقرب للمطار فاذا كان بيت النسابة تنزل الزوجة وحقائبها وتنزل للسلام وتفقد الاحوال ثم تتحركوا الى منزلكم للسلام ايضا بعد وجبه او اثنين تقوم بارجاع الزوجة وبنتها الى اهلها وتعود تبيت مع الوالدة ضروري جدا جدا جدا اول يوم بالذات مهما حصل بعد اليوم الاول تتجول انت بين هذا وذاك على ان تكون منزلتك مع والدتك ولابأس ان تترك بعض الملابس وفرش الاسنان مع الزوجة واكيد حتقلي مبلغ مع الزوجة لزوم الفنجرة

انا ما متزوجة (احمد الله) لكن الشي البحصل معانا لما نرجع السودان اجازة.. ونمشي رفاعه حيث اهل والدتي واهل والدي، بنمشي بيت جدي والد والدي في البداية.. نبيت فيه.. رغم انه منزل جدي والد والدتي اقرب من البنطون... وبعداك والدتي بتمشي بيت اهلها.. احنا احرار، ممكن نبيت عند ديل او ديل او عند واحد من اخوالي او خالاتي.. لكن العبره انه بنهاية الاجازة نكون رضينا ع الكل..

رأيي.. تمشي بيت اهلك طويل...


بنت الحسين

اخوى احمد بابكر
والله كلامك حلو بس فى حالتى دى وهى حالة متقدمة جدا كلامك دى صعب تطبيقو .... لامن الحرمة تبدا ترمى ليك فى كليمات لذيذات على وزن والله ياابو فلانة الليلة حلمت بى ناس بيتنا .... بيشربو فى شاى المغرب ...وامبارح جاتنى اختى الصغيرة فى المنام وقات لى سلام ومشتاقين و....و,,,,, وربنا يفك الحيرة ومليون سلام ودعوة بالدخول الى قفص الزوجة واكان داير خطتى فى الشغلانة دى " يعنى كلو فى يوم واحد "انا ما عندى مانع بس حقوق الطبع محفوظة

__________________
smart_ana2001

انت يا سمارت يا انيق
تعرف لو نفذنا كلامك ده بكره الحى كلو يقعد ينسج فى الخيال كلمات..... هى ما شوفتو بت ناس فلانة ما..وما... التانية ترد ليها ...والتالته تديها رمية كده ياخيتى كان كلامى ده ما صاح براك شوفيهم مما جوا من السفر هى فى بيتم وراجلا فى بيت ناس امو ...... والشغلانة تبقى مطارحة اخبارية ..بصراحة يااسمارات حلك ده بيعميها اااااااااديل كده... ويااااااااااخ شوف لى واحد غيرو والله يعينك...
لك الود والاحترام

__________________

بدرالدين....ياسمح يازين
والله انت اجمل زول يعنى انا طاير عمرى كلو من بلد لى بلد لحدما قربت افتح لى طيران دولى تانى اجى اسوى لى طيران داخلى..... تعرف يابدر انا نفسى استوعب قصة التعامل مع النسيب والنسيبة ؟..اهه فرش الاسنان فضلة خيرك ودى محلولة لكن قصة المصاريف دى الصورة فيها مقلوبة لان المصاريف والمظاريف صارت بيد المراة وغايتو ربك يحلها ونصيحتك قيد النظر والافادة... مودتى

_______________

اختنا بت الحسين..
قبل التحية دعوة صادقة ....يجيك ود الحلال واهلنا بيقولو شنو " الصفاح الما...... الملاح الكلمة المفطوطة دى طارت منى " وما تقعى فى حيرتى دى...انتو محظوظين لسع بيت الجدود موجودة طبعا انت عارف سكن المدن والعواصم ..ركزى مع فى قضيتى عشان راسك مايضرب مستقبلا وانا طرحت الموضوع وخلعت عليه الثوب العام لانو موضوع مستمر ومتواصل وباب الاجتهاد فيهو مفتوح ...... وربنا يقدرنا نرضى الكل بس خايف انفذ كلامك وامشى بيتنا دغرى تانى اقعد اغنى ظلمونى ...ظلمونى... ... وهى ترد لى لو مشتاق حقيقة ما بت .......... احترامى سلامى ومودتى

مكرر

WadAker
دبايوا
صدقنى فى ورطة انت بس اقولك قول انزل فى ارض محايدة وقول ليهم انتو
تعالوا والا اتفقوا فى قسيم الايام..

اشرح لي سواق التاكسي
صدقني حيتصرف

سلام اخى الكريم
اولا البركه فيكم فى فقد الوالد ..
له الرحمه والمغفره ولكم الصبر الجميل .
ثانيا الف مبروك لم الشمل والاستقرار وقدوم الاموره آلاء
جعلها الله نبتة صالحه ورزقكم بالذريه الصالحه
سؤالى لك اخى الكريم
اين يوجد مقر عائلتك .. واين مقر عائلة زوجتك ؟ تحديدا فى العاصمه مثلا ؟
ولو كانت الاجابه بلا ..ارجو التوضيح ولك الشكر
بعد الاجابه على هذا السؤال سوف ادلى برأى حسب تجربتى الشخصيه
واتمنى ان يكون رأيا يرضى الطرفين
اتمنى لك واسرتك الصغيره حياة زوجيه هانئه

انت مش طول عمرك لما تجي راجع من بره بتنزل عند امك؟ يعني بيت ابوك الله
يرحمه...طيب المره دي تقوم تنزل عند نسابتك...طوالي لو كانو في الخرطوم
وساكنين العزوزاب وبيتكم جنب المطار ما تغشاه...تمشي يا مان تنزل شنطتك
وبتلقاهم ضايرو ليك اوضه براااااااها كده...تسلم عليهم وتدخل ليك في جلابية
وسفنجة وتحوم معاهم في الحوش وكان في حمام تمشي تديه عيش...وكان سيد اللبن
دق الباب تمشي المطبخ تشيل كورية اللبن...وبعد الفطور باكر تمشي تسلم علي
امك...وبتلقي البيت بقي ما بيتكم...وتتونس معاهم لا الليل وتجي راجع...براك
تالت يوم المغربية تستحم وتتريح وتسوق آلاء وام آلاء وتمشي تتعشي مع ناس امك
بعد ما تغشي ليك محل عشاء تملأ اكياسك عشاء وبشرط تكلمهم ما يعملو عشاء..وتشيل
اكياس هداياك لكل زول بشرط برضو تكون قيمه عشان ما يقولو والله من عرس ما ضقنا
طعمو والله المره واهل المره ماكلنو....وتبيت مع اهلك بي بتك...والعصير تاني يوم
تشتت ولايف قوز اون.

WadAker

أحييك أولا على جراءتك وعلى أسلوبك الظريف الممزوج بالحزن والألم والفرح رغم العنوان المخيف فقد كنت أحسب أنك تتحدث عن ليلتك الزوجية الأولى التى تحدث فيها كثير من الأدباء والفنانين والنفسيين ومخرجى السينما ، واليك الحل:

أول حاجة (خليك راجل) ومن المطار على بيت (أبوك) عدل ، حتى لو استقبلك (ابوالقدح شخصيا)

هناك تنزلوا شنطكم وتسلموا على اهل بيتكم ، وبعدين انت وحظك يعنى لو وصلت الصباح فى الحالة دى تقعد (تقيل) (من المقيل) مع اهلك وفى المساء تمشى على بيت (نسابتك) ، ولكن المشكلة لو وصلت المساء ، فى الحالة دى (اجبارى) تقضى ليلتك الأولى فى بيت ابوك ، ومن الصباح تقوموا تتراوحوا على بيت (نسابتك)

وبعداك على كيفك مرة هنا ومرات هناك

لكن طبعا (الحل المثالى) هو ان تنكرب ياخوى وتعمل بيتك براك درءا للفتن

وفى كل الأحوال ما عنك مشكلة ، (بيت ابوالقدح) ما ياهو بقى بيتك ونحن سودانيين ياخى يعنى ممكن كمان تنزل عندنا فى البيت ونشيلك فى الراس والعين انت وآلاء وامها

تحياتي..


اخي انا مع يازول يازول..رغم اني ككل إمراة بارتاح جدا مع ناس امي ..بس اكرم ليك بيت اهلك اولا وزيارات يومين تلاته مع النسابة..

يا هشام بلاي ما تضلل الزول...يمشي بيت اهلو كيف؟ وين اكرام الزوجة...
عل ّ يكون انتو ناس ام درمان ديل ضد حقوق المرأة؟ الواجب ينزل مع نسابتو
اولا...ليقطع شك تبعية زوجته له...وهؤلاء عندنا بنسميهم جماعة ود زايد
والآخرين غير المطيعين اسمهم جماعة الدبوس...وهم فريقين رأيتهم رأي العين
وعندهم مقالب وطرف كثيره...

يا نزار يعنى طلعتنى من ناس الدبوس

ياخ ربنا قال (الرجال قوامون على النساء) وما دام(القوامة) عندالرجل فهو (مخير) ينزلها هنا ولا هناك ، وبعدين ياخ بيت اهلو ما ياهو بيت اهلها ، ولا شنو؟؟؟؟

يا نزار ، اهم حاجة (الواحد يظفر بى ذات الدين) مش (ذات الحسب والنسب) وطبعا ذات الحسب طوالى حا يلاقوها اهلها فى المطار وتلقى الراجل جارى بى وراها زى الأهبل وعدل على بيت ابوها

ياخ ده اسمو كلام بالله؟؟؟؟

بعدين بصراحة كده يا نزار (المرة السودانية بالذات) لو اديتها فرصة حا تطلع ليك فى راسك ، ديل عايزين (عصر) من أول يوم ، وعليك (بالعين الحمراء) أولا ، بعدين (الحنان) بجى فى النهاية

طبعا النسوان راح يزعلوا منى زعل شديد ، بس اتذكروا (القوامة) واتذكروا (القيامة) قبل قيامتنا تقوم

المحترم ودعكر...أولاً أسمح لي أحيي فيك الديموقراطية..و الرجالة..
كيف..
انت لو ما ديموقراطي .. ولا كان شاورت روحك مرتين.. طوالي كنت حتأخذ مرتك لبيت أهلك وتختها أمام الأمر الواقع..!! ولو ما كنت راجل بالجد وملو هدومك زي ما بقولو كنت ما حتشتغل برضا أهلك وكنت رضيت مرتك ..وخلاس...عشان كده بأحييك على حيرتك اللي نتجت من الحالتين أعلاه..
نجي للإجازة..غايتو أنا بأقترح عليك تنزلوا في أقرب بيت تسلموا و تأكلوا وجبة...حتى لو الدنيا ليل..و تمشوا تبيتو في البيت التاني..وبعد كده تقسموا الأجازة نصها مع أهلك و نصها مع أهل زوجتك...لكن أصلكم ما تتفرقوا إلا اضطرارياً مرة مرة..عشان زي ما قلت لسان الناس.. وعشان انتو بقيتو وحدة واحدة..والبلزمك بلزمها..والعكس صحيح..
غايتو قبل الرجوع من الأجازة..كل زول فيكم اللي يبيت مع أمه عشان يشمها وتشمو..سمممح قبال الوداع..

أها أنا أديتك حل..لكن دايراك تحل لي مشكلتي الشايلة همها بالزمن...حتى مع اني ما مسافرة هسع..
البكيات...و الفواتح..نحن أهلنا و الحمدلله ان شاء الله ربنا يغزرهم ويكثرهم منتشرين على مدينتين وكم حلة كده.. (أهل زوجي و أهلي .. ) و بنسافر كل كم سنة..اجازة 3 أسابيع بس!!..نلقى الأهل محضرين لينا لستة بكيات..ناس بنعرفهم وناس ما بنعرفهم..لكن كلهم بكونوا بكوا وسكتوا..المهم..لحدي ما نرجع ما بنكون كملنا اللستة.. وأهلنا بزعلوا عشان هم القاعدين في البلد و بيشيلوا وش القباحة مع الناس..و كمان عشان ونسة معاهم ما بنكون اتونسنا مع الجري ..غايتو أخيراً قررنا اننا نتمرد على التقاليد البالية و انو لو ربنا هون لينا سفر تاني..ما بنعزي الا في بكاء حصل قريب لجيتنا..أها الكلام ده من هسع زعل مننا الأهل ...نعمل شنوووو؟؟؟!!!

اول حاجة احيك للسرد باسلوب جميل وراقي

فاما عن المشكلة هذه والله حلها بسيط جداًُ لاني لي تجربة لنفس الموقف ده اول حاجة حدد انت جائب معاك شنط وهدايا وحاجات كده فاذااكان ذلك المشكلة تبقى صعبة شوية لازم تفتح الشنط دي قدام الجمهور حتى يقتنعوا لانك على تواجة جابت لي اختها ونحن ماجابت لينا ولدنا ممشياه المرة ووووووو حاجات كتيرة تسمعها،،،،

لكن اكان ما جبت شنط معاك محل ما تنزل بتكون مرتاح اكان مع امك او مع نسيبتك وانا بنصحك الا غيارك والمرة مشيها بكلمتين حلوين كده ومعاه شوية من الحكمة البتقول نعطيهم قروش احسن وهن محتاجين للقروش وكلام زي ده يعني،،،،، وهذه تجربتى انا

اتمنى لك اجازة سعيده ،،،،،،

Quote: يا نزار يعنى طلعتنى من ناس الدبوس ياخ ربنا قال (الرجال قوامون على النساء) وما دام(القوامة) عندالرجل فهو (مخير) ينزلها هنا ولا هناك ، وبعدين ياخ بيت اهلو ما ياهو بيت اهلها ، ولا شنو؟؟؟؟ يا نزار ، اهم حاجة (الواحد يظفر بى ذات الدين) مش (ذات الحسب والنسب) وطبعا ذات الحسب طوالى حا يلاقوها اهلها فى المطار وتلقى الراجل جارى بى وراها زى الأهبل وعدل على بيت ابوها ياخ ده اسمو كلام بالله؟؟؟؟ بعدين بصراحة كده يا نزار (المرة السودانية بالذات) لو اديتها فرصة حا تطلع ليك فى راسك ، ديل عايزين (عصر) من أول يوم ، وعليك (بالعين الحمراء) أولا ، بعدين (الحنان) بجى فى النهاية طبعا النسوان راح يزعلوا منى زعل شديد ، بس اتذكروا (القوامة) واتذكروا (القيامة) قبل قيامتنا تقوم -------------------------------------------------------------------------------- هشام شيخ الدين

يا هشام والله لي زمن ما ضحكت قدر دا....وشغلك دا ببقيك عمدة جماعة الدبوس
وبالمناسبة هو عمي لزم...والجماعتين ديل معروفين علي نطاق واسع جدا في
مناطقنا ديك....سألنا الدبوس ...كيف بيعرف جماعتو دون ما يسألهم...قال واضحين

بتلقاه حاقب عصاتو ماشي قدام المرأه بي بعيد...وكان شايلة وقايدة ما بساعده
والخدار واللحم بمدهن بي الحيطه وهو راكب فوق حمارو...ونضمو موكتير...وقاسم
حوشو بي حيطه...والبجي من اولاده معدي عليه في نصو البي هناك...بيكرب كراعو
عشان يعدي سريع...وما بنوم عند نسابتو تب كان بيت في الخلا....بعدين ىكان برضو
بحكي لينا عن رجل صعب جدا في التعامل وهو ما كان متأكد من تصنيفو معاه والله
مع ود زايد...فقال ركب حماري ومشيتلو الدغش ...لقيتو سادر متدلي...قتلو أأأ عمي
احمد بدور اسعلك سعال...دحين كان في ركبتك دي مرتك ناغمتك بترجع....قالو لا حرّم
من ركبتي دي علا يناديني ملك الموت....اها وكان ضرب كوراك من بيتك دا وولعت
فيه حريقة ما بتصد علي قفاك....قالو لا حرم علا من جملة الطفّايين....دحين انت
يا ود شيخ الدين بقيت ادبس من الدبوس....مع العلم انو مصنفني برضو من جماعتو
ما قالها لي مباشرة لكن وصلتني...وهذا الرجل لا زال حي وشديد ونصيح الله يديه
طول العافيه...له مقدره علي السرد والحكي كجبراييل قارسيا ماركيز ...دائما
ما يبدأ قصصه وحكيه من نقطة هامشية....مثلا دحين شفت النخلة الطويلة العند
مستشفي الخرطوم....وينتهي سرده بعلاقة وثيقة بين النخلة والقصة...وانا علي
وعد مع نفسي ان اكتب عن هذا الدبوس ان شاء الله

الأخ ود عكر
أول هام: يقولون فاقد الشئ لا يعطيه. يعني بالواضح كدا ما تسمع الما متزوجين والآنسات والعانسات في الموضوع دا.
ثاني هام: مثل البقارة بقول: ثلاثة ما فيهم خير: ورد البحر وجاء بجنابتا... وعرّس جاور نسابتا وقام حتّ صلبه في سجالتا. (سجالتا أي زملاؤه وأصحابه الذين يجلسون تحت عمود النور زي ما بعملوا أولاد ود نوباوي يا هشام)

وبما أن المثل هو خلاصة تجربة ثرة وحكم بعد تمحيص فعليه نزولك في بيت والدك فرض عين اللهم إلا إذا كان نسيبك يسكن الخرتوم وأهلك ساكنين في أم طرقن عراض زي حالتي كدا فلما أجي الخرتوم بنزل معاهم وبنقعد 3 أيام الضيفة – عشان نحن أنصار- وبعدها بنسافر مع عيالي وأمهم لأم طرقن عراض.

العوج رأي والعديل رأي

اذا كان من اول يوم ضبحته الكديسة
ما كا دخلته و دخّلنتا معاك فى المعمعه دى

قضيتك حلها سهل بس اسال الجماعه عن الازم منو

يا ود عكر
يا زول وقفت قلبنا انا قلت الزول عاوز يعك لكن ربك لطف وطلعت حريف وخطرى .. اسمع اقضى ليلتك الاولى زى ما قضيت ليلتك الاخيرة قبل ما تمشى وتغادر ... ظروف وتعدى

دبايو
اتنينا..... كيفك ياراجل جميل كلامك بس الخوف انو الارض المحايدة تطلع بيت ناس ....البتقرب ليها فى جدها رقم..... تعرف فكرة بس ...... جميل تستاهل التفكير ..
احترامى
____---------


نور يانور.....

جعل الله افكارك انوارا يحتذى بها ...تعرف/ى يانور يقوم بتاع التكسى يطلع قريبه ويوصل الشمار للجماعة ده لوما مقلبنى ولقيت نفسى فى احضان ابو النسب .. يانور اخوك حافظ اسماء اهلها كلهم لكن لو وقفوا قدامى " يعنى طابور شخصية" لو بقيت كلب بوليس ما افرز خالها من عمها....ودى وتقديرى على المرور


_______________

سوما....
سلمت وسلم احساسك النبيل ولك منى ارق الدعوات ...
نحن بالضبط فى امدرمان /الفتيحاب بس وين ماعارف لانو الجماعة من الطرفين رحلو فى بيوت جديدة؟ ويبدو لى مابيعيدة كتير من بعض حسب الخيال من الوصف ....
كلى شوق لتفاصيل تجربتك ...سلمتى

________________________
نزار حسين
...تسلم عليهم وتدخل ليك في جلابية وسفنجة وتحوم معاهم في الحوش وكان في حمام تمشي تديه عيش...

انت يازوق تعرف كلامك الحكيتو دى نفسى فيهو لامن مامصدق انو يحصل... طبعا عارف الغربة واللبس الرسمى والربيط لزوم البرستيج .. نفسى اشتت كده واكون خالى مسوؤلية وارتباط ورباط .... وليك على انفذ وصفتك واختو ليك قرض مع ابو النسب لحدى ما اقنعو ليك بانو الاناقة فى البساطة...
بالنسبة للعضة انا نفسى فى كوارع وفول وطعمية وكسرة ولايوق وكان مشيت لميت ليهم الحاجات دى خايف يدقو جرس بس اخوك مفتح وبتصرف صاح..
ما اطول عليك عمك زعيم جماعة الدبوس ما بيدينى كورس مكثف ... تحياتى لك وله وربنا يطول فى عمرو وسلام يارايع
________________

يازول .....يا واضح

والله كلامك الناس البيعملوه بيهو اتخيل لى انقرضو.... بس من محاسن الغربة بتعلمك الرجالة والمواقف الواضحة ...تعرف رغم انو السياسة ماخده حيز كبير فى المنبر وهم كبير فى الوجدان لكن الظفر بى ناس رايعيين شى جميل ومؤثر ...عشان كدى حاولت ان اكتب ما احس به بصدق وهى حيثيات اختمرت فى الزاكرة لتخرج نقية طاهرة دون ابهار او مبالغة ... وانا اراجع "وهذه طبيعتى"ما كتبته كنت ثم الردود ابتسم لانى شعرت ان مااريده قد وصل بل واصبح عاما وسابقه يستفيد منها من يقراها دون ان ينظر لمن كتبها بصفة الخصوصية...
مقترحاتك على العين وزى ما قلت الواحد حايزيد فى ربط الحزام لامن يستقل بنفسو وزى ماقلت......وفى كل الأحوال ما عندك مشكلة ، (بيت ابوالقدح) ما ياهو بقى بيتك ونحن سودانيين ياخى يعنى ممكن كمان تنزل عندنا فى البيت ونشيلك فى الراس والعين انت وآلاء وامها ....وفى دى لك عميق محبتى على اما ان نلتقى....
__________________________

يا بنت النيل ...النيل ده جميل يا جميل
تحياتي..
انتى ما خايفة كلام هاشم دى بعدين يصبح دليل ضدك عموما انا يهمنى راى الاخوات لانه يعكس ما يدور فى خلد الطرف التانى بحيادية تامة.... تعرفى يابنت النيل المعقد الشغلانة انو ام الاء هى البنت الكبيرة عند اهلها واول زواج فى اسرتها ولها اخت واحدة اصغر منها اهه حا تغييرى رايك والا ثابتة على الاول ..تحية برائحة جروف النيل

_________________
سنا خالد
المحترم ودعكر...أولاً أسمح لي أحيي فيك الديموقراطية..و الرجالة..
وانا احيى فيك روحك السمحة ووضوحك التام ... تعرفى الخلانى ديقراطى هى ديمقراطية ام الاء لها جملة واحدة وثابتة مع شوية بهارات ,نحنا معاك محل ما تنزل بس.... انت عارف دى اول مره اغيب فيها سنوات من اهلى و.... كلام حنين رغم قساوة الغربة عشان كدة قلت اوسع المشورة وابقى ديقراطى حتى فيما يعتبره البعض خاصا واسمع اطراف محايده ومجربة
اما مشكلتك دى .. دى عويصة تعرف انا حذفتها من ترتيب الافكار حتى لا ازحم البوست واشغل بيها الناس لكن اخوك من زمان شغال بالاقربون اولى بالسفر والعزاء ولا عزاء للسيدات... بعدين تانى هام بعمل بطريقة انتهاز المناسبات سالبة او موجبة يعنى ممكن ارفع ليك الفاتحة والفنان طالع صولة لعلعة واخر انكشاح طبعا ده اذا لميت فى زولى صدفة.... وتالت هام بكوس كبير العزاء وبشبك الباقين اعتذارات لزوم ضيق الاجازة وكترة الاجراءات فى السودان ....اهه اى وصفة فى الروشتة دى تنفع معاك هى لك مجانا ...تسلمى وجعل الله ايامك افراحا ....

____________________

حاسم حاسم ياكانتون _1
شغلك قطع ناشف بالجد وكلام سمح زى كلام اهلنا البقارة تب مابيقع واضة ....
ورايك عديل تب ما اعوج واذا ما اخر العلاج الكى مراويدك حمر..
تحياتى
_______________

الفولانى والله نفسى من زمان ادخل او تدخل معاى فى بوست عشان اسعلك جدى ده ما كفاو نقيز ياخى قلبو انقطع.....
تعرف فى الوقت داك ما حسبتها صاح بس اسمع قبل ما اغادر ممكن اضبح لى واحده بس الكلام ده بينى بينك اكان الناس المتلقين حجج ديل البسمو نفسهم اصدقاء الحيوان حا يشتكونا فى الامم المتحدة وتانى ابو القدح ما يخارجنا...يا اخوى فكر معاى اقوم بعدين افكر معاك والا اقول ليك ارح نفكر سوا ياجميل ....مودتى
___________
عثمان فضل الله ...كيفك
قلت لى ساهله طيب انا جاى وحا الاقيك ونشوف الموضوع ساهل كيفن كيف...تحية لجميع الاخوان والزملاء
___________________
ودجمعة
والله شرفتنا ياكمدان مرحب بيك ما داير ابالغ لو قلت ليك عنوان هذا البوست من وحى بوستك ايها ال.... مودتى تعرف ليلتلى الاول قضيته وين...... والا اقول ليك انا جاى البلد وبعرف وين الاقيك واقول ليك ..بس ما حا اوريك متين وبالبر والا بالبحر والا بالجو ط دى من ياتو جلالة يامظلى " لان الجماعة قالو ود جمعة ده الله اعلم اكان فريق اكان مشير لاكن ماهو وكيل عريف ... تعرف ياود جمعة نفسى اسمع جلالة بنية ...... احترمى سعادتك

ود عكر
انت جاااااااااااااى والا بتهظر ان كنت جااااا ى حضر خدودك الما اسيليه ومحل ما بتقضى ليلتك الاولى جاهز عندى كان فلته من الازم منو

شنو ياعثمان والله هرشتنى الحاصل فى البلد شنو ؟ يبدو ان الاستقبال بقى حار ومابندار .. بس اخوك حريف وحافظ الشغلانة كويس وكمان جيتى دى حتكون مامونة ان شاءالله وسنلتقى معك ومع الاحباب الزمان ...

أخوى الحبيب نزار:

Quote: بتلقاه حاقب عصاتو ماشي قدام المرأه بي بعيد...وكان شايلة وقايدة ما بساعده والخدار واللحم بمدهن بي الحيطه وهو راكب فوق حمارو...ونضمو موكتير...وقاسم حوشو بي حيطه...والبجي من اولاده معدي عليه في نصو البي هناك...بيكرب كراعو عشان يعدي سريع...وما بنوم عند نسابتو تب كان بيت في الخلا....

والله يا نزار عمك الدبوس عجبنى عجب شديد خلاص ، عليك الله يا نزار تخصص بوست مخصوص وتسميه (الدبوس) وصدقنى حايكون بوست الموسم

ناس الدبوس ديل يا نزار خلى بالك زى ناس (الحركةالشعبية) آخر حاجة بفكروا فيها (النسوان) مش زى ناس (قريعتى راحت) البقوا يعرسوا اتنين اتنين

ليك عليّ يا هشام ان شاء الله سوف اكتب عنه قريبا....وهو من الشخصيات
النادره في هذا الزمان.....وبعدين طريقة سرده للحكي مختلفة جدا


قتلك زمنا مو الزمن دا سيد العجلة ما بزحّلو من الدرب...يضرب فيني
ويقع هو...وانا ماشي في مشيي.....ومن هنا تبدأ القصة

يا الله ...

شوقتنا يانزار

اخوى نزار.. اثنى طلب الاخ هشام شيخ الدين وازيد عليه انزال صورة لعمك اطال الله عمرو اذا ما عندو راى وطبعا بطريقتو دى... فاصل الحوش وعامل فاصل مدارى و وقاطع النفس وكركبة الكرعين وكش البراطيش ورعد وبرق ومواقف متصلبة ومافى شفع يجو طايرين... حالتك حاتكون صعبة واخذ الصورة ذاتو بيكون موضوع بوست بعنوان عريض ..نزار يصور الدبوس فى لحظة تجلى ..بس اول حاجة حاول ابعد العكاز والمركوب والابريق وبقية الاسلحة بتكون خفيفة ...اهه اوع تنسى سكين الضراع وكورية اللبن ولباب الحمار برضو ...وناطرين...

كانت احلى ايام مع اطعم ناس بس كيف .... دى دايره ليها جرة نفس وراحة من السهر والسفر؟..... راجعين ...وللجميع سلام ومشتاقين واحترام...

اولا حمد لله على السلامة ...
وانشاء الله الاجازة كانت موفقة
انا غايتو قريت البوست اليوم ...
وكنت بحلف ليك الحليفه الما خمج لا تنزل عند اهلك ولا اهله ..

ما لو ما تنزل في بيتي ...وبعدين انطلق ...

الاخ عكرابى

تحياتى

اسلوبك شدَّنى حتى قد قميصى من قُبل
نتمنى لك اجازة سعيدة
ونتوقع معالجتها بوستياً
على هذا النمط

الاخوة لؤى
جعفر ...
ولكل من مر بعين بصيرة وقلب مفتوح
تحية اخوية تعبر عن صدق النوايا والرجالة والاصالة ...
الفكرة بسيطة فى احرفها عميقة الدلالة والمعنى , نحن شعب نحترم النسب لدرجة القدسية والمهابة , واجزم اننا فى الموقف الصاح والصحيح ... فقط نحتاج لمفاتيح تضيئ لنا كجيل يتوسط ساحة الحاضر ويخطط لبناء المستقبل , مفاتيح تدخلنا الى عقول وقلوب المتمسكين ببعض الاعراف والتقاليد التى تحتاج لصيانة تجعلها تساير وتقنع اجيال الحاضر والمستقبل بقبولها والاقتناع بها ثم نحتاج لعملية نظافة تغسل عنا وهم الخطوط الفاصلة بين ام الزوجة وابو القدح والدخول بالرجل ال... والخروج بالاخرى ...وهم يجعل النسيبة لاتاكل فى صحن واحد مع زوج ابنتها... وهم يجعل زيارة ام الزوج مثل زيارة الحاكم العام تبحث عن السلبيات وتغمض عينها عن الايجابيات ثم ترفع تقريرها "بان ابنى وقع فى ناس عملو ليهو ....", صدقونى هذا البوست وماصاحبة من ردود ونصائح كان هو المفتاح والنبراس الذى اضاء طريقى وفتح لى قلوب الجميع وحضن الجميع وضمنى لاسرة سودانية بسيطة كاى اسرة سودانية تبحث عن الستر دون ان تفقد احترامها لنفسها ولغيرها ...هدفى مع حبى لكم وبكم هو هدم لبنة فى احد عاداتنا الضارة وغير المواكبة دون ان نسيان وضع اخرى نافعة ...دمتم