Post: #1
Title: الساعة جابها لي خطيب اختي
Author: khaleel
Date: 03-20-2007, 05:41 PM
Parent: #0
تذكرت اليوم ايام الثانوي العالي وعرس طوالي وفيها تذكرت صديقي كنيش وهو الان اخصائي
كبير كان الرجل حلو المعشر انيقا جميلا بريئا.
بعد الاجازة حضر كنيش للمدرسة بساعة ( رادو ) خطيرة سالناه من اين لك بهذه الساعة
اجاب ببراة شديدة ( جابها لي خطيب اختي)
صار كنيش حديث المدرسة ومثار تندرها .
فتحت هذه الحادثة بعد حين اسئلة كتيرة عن علاقتنا بخطيب الاخت واليكم الاسئلة.
هل تحضر حفل زواج شقيقتك
هل تودعها وهي ذاهبة لشهر العسل
هل تشعر بالعقدة عندما تراها حاملا
هل تسمح لخطيبها بالونسة معها
هل تسمح لخيبطها ان ينفرد بها كانفراد كلتشي بنادر السيد
هل تشعر بالضيق من والدتك وهي تعد الطعام ( المقمر والمحمر) لزوج ابنتها وتاكل
انت كسرة بي ملاح ام رقيقة والسكة ضيقة
هل علاقتك طبيعية بخطيب او زوج اختك
|
Post: #2
Title: Re: الساعة جابها لي خطيب اختي
Author: ناذر محمد الخليفة
Date: 03-20-2007, 06:09 PM
Parent: #1
سلامات يا خليل ..
| Quote: هل تحضر حفل زواج شقيقتك |
إحتمال ..
| Quote: هل تودعها وهي ذاهبة لشهر العسل |
حسب بعد مسافة الحتة الماشا ليها ..
| Quote: هل تشعر بالعقدة عندما تراها حاملا |
لييه ؟!! هي حاملة شنو أصلو ؟!
| Quote: هل تسمح لخطيبها بالونسة معها |
بس ما يتكلمو في مواضيع عاطقية ..
| Quote: هل تسمح لخيبطها ان ينفرد بها كانفراد كلتشي بنادر السيد |
ممكن .. بس فترة أجيب ليهو موية وأجي .!!
Quote: هل تشعر بالضيق من والدتك وهي تعد الطعام ( المقمر والمحمر) لزوج ابنتها وتاكل
انت كسرة بي ملاح ام رقيقة والسكة ضيقة
|
مرات مرات بيكون في ضيق ..
| Quote: هل علاقتك طبيعية بخطيب او زوج اختك |
ما طبيعية شديييد !!
شنكل :
الإجابات دي ردود أخو خطيبني بعد ما سألتو أنا !!
|
Post: #3
Title: Re: الساعة جابها لي خطيب اختي
Author: khaleel
Date: 03-20-2007, 06:16 PM
Parent: #2
| Quote: الإجابات دي ردود أخو خطيبني بعد ما سألتو أنا !! |
هلا ناذر
اخو خطيبتك مفتح الظاهر عليهو
وبحب العب باتنين ارتكاز ويعتمد علي الهجمات المرتدة
|
Post: #4
Title: Re: الساعة جابها لي خطيب اختي
Author: عبدالكريم الامين احمد
Date: 03-20-2007, 06:31 PM
Parent: #3
سلام ياخلي 500
حاذق ولذيذ ياخلي شكلو بوستيك ده
ومعاي الان احد الاخوة المشاهدين وقال عاوز يشارك
قال ليك ياخلي كل اما اشو خطيب اختي خاشي البيت جسمي بكش وقلبي بضرب (بب بب)
والعهدة علي الاخ المشاهد
|
Post: #5
Title: Re: الساعة جابها لي خطيب اختي
Author: khaleel
Date: 03-20-2007, 06:35 PM
Parent: #4
Quote: قال ليك ياخلي كل اما اشو خطيب اختي خاشي البيت جسمي بكش وقلبي بضرب (بب بب)
والعهدة علي الاخ المشاهد |
هلا كريم العائد جد الركابية
المشاهد شوية مرن
لكن جماعة اصحابي من حلة ام كوراك قالو يوم عرس اختهم بمشو الحلة الجنبهم
|
Post: #6
Title: Re: الساعة جابها لي خطيب اختي
Author: Salah Waspa
Date: 03-21-2007, 07:49 AM
Parent: #1
Quote:
هل تشعر بالضيق من والدتك وهي تعد الطعام ( المقمر والمحمر) لزوج ابنتها وتاكل
انت كسرة بي ملاح ام رقيقة والسكة ضيقة
=============
والله يا خليــل الحتـة الفوق دي ضربت بيها وتــر حســاس وقد يعيشه معظم الأخوان
أنا يـا خليل أخ واحد لي سبعة بنيات نسايبي السبعة فيهم واحد قبل ما يبقى
نسيبي كان صــديقي الفــردة (ومازال طبعا) (لزوم كسير التلج ) (مانسيب عاد) تعرف ده
والله العظيم أنا مرات من الغــيرة ومن البتسويهو ليهو الحجة بقـرب أدقـه عـديل
وهـو كمــان طبـعا داك يا الترقــيد الماخمج ( ما حماته)
المهــم والله في النهاية يا خليل الأحترام بكون الفيصل في المسائل دي .
تحيــاتي
صــلاح واســبه
|
Post: #7
Title: Re: الساعة جابها لي خطيب اختي
Author: ضحيه ابراهيم
Date: 03-21-2007, 09:14 AM
Parent: #6
خلى يا فاكهة المنبر يا ثنائى كيكى الخطير..
موضوعك حلو وحقيقة انا من الذين تاثرو بسد مروى اووب سورى اقصد بموضوعك حديث الساعه ..انا لما مشيت اخطب زوجتى الحالية وجدت لديها خمسة اخوان اضغرهم ينفع يكون مصارع وياتى بميدالية ذهبيه كمان والله العظيم كل ما اعرف فيهم واحد بردد فى دواخلى وبقول الله يستر وفجأه ظهر اوسطهم واسمة فيصل وعرفت ان هذا الفيصل قبل كده فى واحد من شباب الحلة جاى يخطب اخته هذه(زوجتى الحالية) وكان هذا الشاب هادىء جدا وفجاه هاج هذا الفيصل وضربة بآلة جيتار فى راسة وبدون سبب .. كنا جالسين انا ووالدى واعمماى واخوانى فدخل فيصل وبعد اخذ ورد فى الموضوع قال نحن موافقين بس حكاية خطوبة وحدائق وفسح وكلام زى ده ماعندنا يعنى لو شفتو بره البيت دة مع اختى دى والله ياهو يا انا.. المهم الموضوع تم على خير وبعد فتره ليست بالقصيره جئتهم ذات مساء فطلبت منى خطيبتى ان اذهب معها الى الصيدليه لشراء دواء لوالدها فقلت لها هوووووووووووووى هسى يلاقينى فيصل والقيامة تقوم ...فقالت لا فيصل شغال بيجى متاخر والمشوار كله خمسة دقايق نتاول الدواء ونرجع المهم ذهبنا انا وهى واختها للصيدليه وعند الرجعه كنا نتونس ونقطع فى فيصل نفسة وفجأه الا اشوف ليك عجلة وقفت فى نصنا وقال لى اسمع نحنا مش قلنا مافى فسح وحدايق وكلام زى ده؟؟؟؟؟؟ واخوك طبع بقيت اقطع واعرق واتكبب .. قال لى اوكى ارح تعال البيت نحنا فى الشارع؟؟؟؟؟؟؟ اتمها ولا كده كفاية؟
|
Post: #8
Title: Re: الساعة جابها لي خطيب اختي
Author: حيدر حسن ميرغني
Date: 03-21-2007, 09:52 AM
Parent: #7
ياخلي
طيب اخواتنا يفرحن لينا في زواجنا برضو وكلو زي بعضو
انت خليك من الاخوان ... تعال شوف الاباء (ابان شنيبات) كانو بقولو شنو في البنت زمان
«وقال الاول»
ولم ار نعمة شملت كريما
كنعمة عورة سترت بقبر
«وقال الثاني»
تهوى حياتي واهوى موتها شفقا
والموت اكرم نزال على الحرم
«وقال الثالث»
وددت بنيتي ووددت اني
وضعت بنيتي في لحد قبر
«وقال الرابع»
ومن غاية المجد والمكرمات
بقاء البنين وموت البنات
«وقال الخامس»
سميتها اذ ولدت تموت
والقبر صهر ضامن وبيت
|
Post: #11
Title: Re: الساعة جابها لي خطيب اختي
Author: khaleel
Date: 03-23-2007, 05:07 PM
Parent: #8
حيدر ميرغني
تلك ايام الجاهلية والموودة سئلت باي ذنب قتلت
|
Post: #10
Title: Re: الساعة جابها لي خطيب اختي
Author: khaleel
Date: 03-23-2007, 05:01 PM
Parent: #7
ضحية
بالله واصل ماذا فعل بك ابو النسب
|
Post: #9
Title: Re: الساعة جابها لي خطيب اختي
Author: khaleel
Date: 03-23-2007, 04:56 PM
Parent: #6
هلا ابو صلاح
نعم الاحترام سيد الاعمال ووالدتك الفاضلة تعمل بالحكمة السودانية
ادوهن وساعدوا عليهن
|
Post: #12
Title: Re: الساعة جابها لي خطيب اختي
Author: عبدالكريم الامين احمد
Date: 03-23-2007, 05:14 PM
Parent: #9
هلا خلي
ووين الساعات دي
انت من زمن الساعات الزمن ده الخطيب بقي يرسل رصيد
وتسمع الام بتقول لبتها اضربي يا بت للولد ده يرسل ليك رصيد
|
Post: #13
Title: Re: الساعة جابها لي خطيب اختي
Author: Ahmed Abdallah
Date: 03-23-2007, 05:25 PM
Parent: #12
خلي
انت ما سمعت بالجماعة في القعدة الـ ابو يدوا راجل اختهم كاس
و كل مرة يفطوهو ولمن الراجل زهج منهم قال ليهم شنوا .. ?
يا كيكـي فوقكـ النبي احكيها ...
|
Post: #14
Title: Re: الساعة جابها لي خطيب اختي
Author: عبدالكريم الامين احمد
Date: 03-23-2007, 05:41 PM
Parent: #13
| Quote: يا كيكـي فوقكـ النبي احكيها ... |
سلام يا صاحب ابو 2
ياكيكي احكي قلت لي عاوز توديني (الجكو ولا شنو)..
عموما الجماعة كانو في اغلب الاحوال كانوا بيقولو لنسيبهم يازول خلاص تعال (شيل الكاس ده)
وكانو حريصين الا يذهب لحملة ابو النسب الانتقامية (الخمر مقابل عدم الاحم احم)
|
Post: #15
Title: Re: الساعة جابها لي خطيب اختي
Author: عامر تيتاوى
Date: 03-23-2007, 06:09 PM
Parent: #14
ياخلى
شباب الزمن حنية بقوا يودوها الكوفير ولوزة الحميراء
عديل كده ..
|
|