اليوم الحار ومابنداريوم الهندسة والمعمار

نواصل ماانقطع ونكتب عن اليوم عن الجانب الاخر من الجامعة حيث الدكاترة ولادةالهناء ومباراة مع هندسة التعادل يذهب البطولة للطب ولابديل للهندسة سوي الفوز فريق الطب به حارس الجامعة الاول ودفاع صلب وفي الوسط صديقي دكتور محمد ادم غانم والرائع مصطفي سنادة والفنان معتز وفريق الاحلام بقيادة عتوقة وطلال حامد وبهاء الدين وهشام ووليد اللتل ومحمد متوكل ونادر يماني وبقية العقد الفريد المدرجات تغلي مشجعو هندسة يهتفون الدايات الدايات ويرد الدكاترة نحن فوق طبنا بلاعة ما بتهزنا.
تقدمت الهندسة بهدفين لواحد حتي اخر خمسة دقائق واستعد الجمهور للاحتفال ولكن الحكم احتسب ضربة جزاء ظالمة للطب احتج لاعبو الهندسة واقتحم جمهورهم الملعب وهم يهتفون حاندقك يا حانسوي شغب وفي الجانب الاخر هتف مشجعو الطب بكينا بكينا المهم هدات النفوس واستونفت المباراة وفي اخر دقيقة ومن ضربة ركنية لهندسة لعبت الكرة وحاول محمد متوكل لعبها باكورد وفشل وبنفس الحركة وباكورد رائع من نادر يماني اسكن الكرة فسيح شباكها وهنا هتف المهندس صديقي ظافر عبده الله في عشرون عاما مضت ما زال صدي هذه العبارة في اذني احتفلنا كما لم نحتفل من قبل ورقصنا وهتفنا ضد كل الجامعة رماد كانون ولا القانون كوم تراب ولا الاداب اولاد بنات سكرتيرات ويا مزارع لهبك طوريتك وفي الختام الجامعة هندسة او لا جامعة ونواصل

up

اهو ده يا خليل بوست الهندسة والمعمار

رفعتو ليك

اليوم الحار وما بندار يوم الهندسة والمعمار

وده بوستك من الارشيف

.........

شكرا تماضر لانك اعتبرتي للذرة وزنا

مع دخولنا الجامعة كان دورة اتحاد الانتفاضة قد انتهت وكان يقود الاتحاد المبدع مهندس عمر الدقير وبقية الكتيبة ولكن بعد ذلك فاز اتحاد الكيزان بقيادة دكتور زيدان عبده زيدان ان لم تخن الذاكرة كانت الجامعة في تلك الجامعة القا واندياحا وبالمناسبة تم قبولي بمصاريف قدرها خمسة وسبعون جنيه وكبيت الجرسة وجبت مليون شهادة ان اخنواني تلاميذ ووالدي استاذ حرام ان ادفع مصاريف فتم اعفائي .
اما عن العلاقات العاطفية بالجامعة تسع وتسعون منها انتهت لرحلة عدم وهذا موضوع يستحق الدراسة واتذكر ان دكتور حسبو عمل ندوة بالجامعة في ذلك الوقت عن العلاقات بين الجنسين وذكر انه اي شخص درس بالجامعة ولم يحب عليه ان يحضر لعيادته النفسية للتشخيص وقال لم تهمتو بالكاشوش فان للقلب اربع غرف فاذا رفضت من قبل حسناء حاول مع اخري وخلال طوال فترة دراستي استطاع ان يتزوج من المكيسين من الجامعة عدد قليل جدا.
اجمل الحفلات اتذكرها جيدا كانت في قاعة بغدادي بالطب وكانت باستاذ العاشقين الطيب عبدالله وكان يغني السنين وكان مقطع موسيقي يقول (ترن ترن) وكانت القاعة كلها تردد (سقط سقط) شماتتة بدكتور الترابي لسقوطه بدائرة الصحافة امام المحامي شبوفي انتخابات ستة وتمانين.
سارت الامور علي ما يرام في سنة علوم وفي قاعة (olt)كان هناك ذكريات جميلة اربعة شهور نحن ما عارفين الاستاذة بقولو في شنو ما عدا الرياضيات لكن الكيمياء كانت عجيبة انجليزي جد واولاد شهادة لندن يسخرون من التسطيحة بتاعتنا في الانجليزي . في موقف طريف صديقي ساكوبة كان يجلس بجوار حنكوشة ناصعة البياض وساكوبة لونو نص نص فصاح احمد التجاني (الضبانة الفي اللبن دي ما تشيلوها) ونواصل

يا ابو خليل والله بوست رفعتو ليك الفنانة الوطن

تماضر شيخ الدين ده باذن الله سيكون بوست ال2006

لانو تماضر دي زولة فنانة ماحصلت

فشكرا لها نيابة عن كل هذا الجيل لدورها في الاسهام الثقافي في بلادي

والله يخليك يا بت شيخ الدين

ويلا يا خليل ورينا اخبار الهندسة وعليك الله احكي عن القطيط وعن المين رود وجولاتك الشهيرة هناك

والله يا عبد الكريم لوحكيت عن المين رود حااجيب اسماء البنات وممكن تجيب لينا الهبايب لكن مافي مشكلة ابدا بقريتنا بسنة اولي اتفق معي ابن خالتي طارق بان اخلط قريبتي داخل القاعة ويخلطا هو خارج القاعة ولكنها طلعت متفحة و كانت طموحة ولم تقم معنا علاقات دبلوماسية كاملة واكتفت بقائم بالاعمال وصاحبت ناس جلال الحلبي والطيب النصري اولادالرياض وعندما زهجت منها قلت ليها (قشة ما تعر ليك).

وقد ابدلناالله خيرا منهابالجامعةمنار ولن تنهار نعم قصة التعارف لذيذة جدا حيث نزلت الدكتورة من سيارة والدتها ببوابة الميدان الشرقي وكان مصطفي سنادة وطارق قانصين ليها بمجرد نزولها وهنا صاح سنادة منار منار اوقفوها وقال لها سلمي علي طارق فسلمت عليه وعرفها طارق بسنادة اقتحام جد وبينماانا جالس في المين الرود اشوف ليك طارق وسنادة ومعهم الجميلة لم اصدق عيني منار بالقرب مني تم التعارف بيننا والله يا كريم اليوم خففت دمي جنس خفة ابدعت وتجليت لو شفتني تقول ده عادل امام ما خليل وفي نفس اللحظة ذهبت الحكنوشة وضربت بوش في السوق الشعبي بتاع هندسة .
طبعا كان عندي قميض طويل جدا وجميل جدا عجب الدكتورة واصرت ان تلبسه ذهبت للغسال البركس وقام بغسله وكبيت فيه ريحة الدنيا كلها واحضرته لها نعم الدكتورة لبست قميص خليل ولعلك تذكر جيدا ان احتفظت بهذا القميص سبعة سنوات.
ولكن الدكتورة طبعا حبت الحنكوش طلال الاحمر ومازلت بعد عشرون عاما ازورها وهي الان رئيسة مستشفي شهير بالسودان نواصل

واصـل ذكـرياتك فهي جميـلة..

كـل سـنة وانت طـيب..

مـني عـوض خـوجـلي

------------------------------------------------------------

استاذة مني

لك التجلة ويبدو كلنا اسير الذكريات لان في الزمن العين تلاشي الصدق .

واقول
الذكريات بلابل في خاطري الذكريات وانا الوتر

الذكريات قلبي لوعة فعلام تضحك في سمائك يا قمر

وسوالي ايهم اجمل ذكريات الشفيع ام عثمان مصطفي

والي لقاء

khaleel
____________________________________________________________


كـلاهمـا خـلدا ذكـرياتهمـا في وجـداننـا..فمـا ماأجمـلهمـا!

تحبـاتي ..

مـني عـوض خـوجـلي
____________________________________________________________

معليش ستي مني القصيدة كتبتها غلط

الذكريات بلابل في خاطري الذكريات قصائد وانا الوتر

الذكريات تزيد قلبي لوعة فعلام تضحك فعلام تضحك في سمائك يا قمر.

نعم اجمل ذكرياتنا وحياتنا بالجامعة ومنذ التخرج صارت الحياة اكثر قسوة ومسئولية وعن الذكريات سئل مرة اشتاذنا هلاوي ماذا عن ذكرياتك في كسلا فقال بها طفولتي وصباي وحبيبتي التي رحلت مع اخر. واظنهم كثيرون

khaleel
________________________________________________________________

يا سلام يا ابوخليل انت طلعت من وين الليلة هندسة كدة مرة واحدة

وداخلية فلسطين ...وجنجا..دانييال احسن زول بلعب كورة في العالم

ومعاوية السمين ..وبتاع الاقتصاد طارق القصير

وجاء عمر اومو

واذكر اولا د مدني الحلويين الذين علموني الوست..واظنك لاتنسي صديقنا عمر فلاشا رحمه

الله..ودرة اولاد الابيض صديقي الجميل وليد زكريا.الصادق فيصل ..ميرغني الرايق..وعباس

شبشة..ومعاوية ديفيد.وقروووود......وطه النور...انت عارف يبدو ان الجلاب غلط في العنوان لانو
المقصود كان صديق اخر تعرفه انت جيدا

عبدالكريم الامين احمد

_____________________________________________________________

نعم كريمو اجمل ايامنا كانت هناك ولكنك ذكرت ابناء الولايات ونسيت اهم ناس الحناكييش والحنكوشات اولاد لندن وبنات لندن واولاد امدرمان وبححري ناس محمد شلوت والحسين وهشام نجم الدين واحمد عبد العظيم والاصم وابو اللقس وساكوبه والمشاغب ابو سمرة وحسن محمود وطلال الاحمر واهم زول طه العب تري هل يعود ذلك الزمان

khaleel
__________________________________________________________________

معقول يا ابوخليل ..محمد الحسين احسن زول مركز في العالم .تسالوا عن الساعة في اي

زمان يديك الزمن دون ان يكون معاهو ساعة..احمد عبدالعظيم ..يحي حمدين..حاتم الجد.

جلال.نادر هداية الله.خالد الحاج..اريج ..وبكنام سعيد..

و فوق عشان هندسة فوق

عبدالكريم الامين احمد
_____________________________________________________________________

اتذكر اول انتخابات اتحاد وانا ما صوت فقابلتني الاخت هويدا شبو وكانت من الكيزان وطلبت مني التصويت فقلت لها انا ما عندي بطاقة فقالت لي بضمنك انا فذهبت معها للقاعة التصويت وهناك وجدت وليد زكريا وكان من مراقبي الانتخابات يمثل التجمع فاشار لي بعلامة النصر وهنا شعرت بوخذ الضمير الكوزة ضامنني وناس التجمع اصحابي فتوكلت علي الحي الذي لا يموت واديت كل زول شعرين صوت وضاع صوتي هناك مش قلت ليكم كنت برلوم بري

khaleel
__________________________________________________________________

الله يا خليل

رجعتنا لذكريات تلك الأيام الزاهيات في عمرنا .في زماننا و أظنه سابق قليلاً لزمنكم كانت المنافسة الكروية بين الهندسة والآداب ، وبين الهندسة ومجمع شمبات ( زراعة وبيطرة )

فكانت هتافاتنا الأثيرة في لقاءات هندسة / آداب

ثلاثة لكاشر في الإسبوع دخلوا الجامعة بدون مجموع
بعد ما شاب جابوا الآداب
( نظراً لكبر سن طلاب الآداب في تلك الفترة حيث كان يوجد منهم عدد كبير من الأساتذة المفرغين من وزارة التربية )
وكانو يردون علينا
الفرع القام دابا جنبنا شقاوة العزابا الجنبنا
( نظراً لقلة عدد الطالبات في ذلك الوقت بالهندسة )

وفي لقاءات هندسة / شمبات وعندما يصاب أخد لاعبي شمبات ويقع أرضاً

عاوز عمرة جيبوا الورشة

معك نواصل

عاطف عمر
__________________________________________________________________


الله يجازيكم، رجعتونا عشرين سنة! هل هكذا كبرنا؟
ليتنى أذكرك خليل. نحن من بعدكم بعام.
بعض الأسماء هنا معنا فى شيكاغو أو مناطق أخرى من أمريكا، وساكوبا فى كندا.
كانت لنا أيام!
لو كان فى السودان مبدعون او مستثمرون يجيدون الاستثمار لاستحقت هذه الذكريات افلاما خاصة وانتاجا سينمائيا، وخصوصا لحظات التنافس الرياضى او حتى السياسى.
ربما تكون أياما عادية ولايهتم بها احد غير أصحابها، لكنها حبيبة لنفس الكثيرين مهما تباينت الأجيال

mohammed elsaim

______________________________________________________________________

اهلا يا ود الصايم ..اجل كيكي فلسطين 14..وكردفان 39 وعطبرة ب ,تهراقا ام الداخليات

تلك اروع الايام..هندسة اقتصاد كورة بطعم لذيذ. انور ام دوم ومحمد متوكل العب زولين

في العالم هذه قناعتي حتي الان ولاتهتز ابدا ...لاادري من اين ابدا

يا ربي من البركس ..الصفرة المين ولا الحرس فيصل ويحي السمين ولا عوض ولا عمك امين

ام من كافتيريا اقتصاد ابراهيم باخت و اسامة جعفر وفرح بلة.ايهاب ومبارك ولا احمد

شندي (اخر تسطيح)

ام ابد بالنشاط امين السيد وصلاح العاقب..نزار وعبداللطيف واحمد عثمان ولاصلاح بتاع

انصار السنةمحمد طه محمد احمد..علي عبد الفتاح حاج ماجد ,ابوضفيرة الرقم 13



وفوق عشان هندسة دي عزيزة علي ايييي كدة لعبتها....

ويا حليلك يا عمر الحبر

عبدالكريم الامين احمد
_________________________________________________________________

يا سلام علي سنة اولي جامعة ويا سلام ونحن ضيوف علي ناس العلوم قبل ان نقطع الميدانالغربي ونحن في قاعة (olt) والحلويين في (glt) يا سلام علي دكتور ودالمكي وحسين ايوب واسامةعثمان وعبدالجليل وكل استاذة علوم ومرة ود المكي بدرس وكان الباب الخلفي مفتوحا فدخل زميلنا نادر كوبر فصاح ناظ م يا دكتور كوبر جاء وبعد شوية ساكوبة جاء وبعهد طه العب ابوسمرة جاء وهنا صاح دكتور ودالمكي ايه الاسماء الغريبة دي كوبر ساكوبة نحن في تكساس وضجت القاعة بالضحك.
اذكر بنات الطب وهن يتكلمن شرحتو التوت والتلابية والككروش اي الضفدع والسمكة والصرصور منتهي الغنج والدلال واذا سناير العلوم وهم يبرلمونا واحد ابيضاني اسمو رافت وكان واحدة من حسان العلوم تقول ليه حرام عليك يا رافت ديل برالمة مساكين واذكر سناير الهندسة الحلويين ناس ظافر عبده وهشام سفل وخالد الشهير وعبدالله الروسي ومحمد عبدالجليل وملهم والتيمان ويس الميكانيكي ويحي وبنات كتار في هندسة رغم انف ناس اقتصاد كانو ينعتونا بالعذابة وفي الكورة يقولو بنات واولاد بلاعات ونحن نرد تلاتة لكاشر في الاسبوع دخلو الحامعة بدون مجموع واتذكر حفلة وردي في دار الاستاذة وهو يقول فدي لك العمر ونحن نرد فلانة لك العمر وابناء دفعتي يفرفون فلانة ولابد ان اتذكر خلفاالله الحرس وهو يدعي انه يعرف انجليزي ونحن في طابور الصفرة ينصحنا الا نكثر في اخذ الخبز ويقول يا برالمة اي واحد ياخد عيشة واحدة (at least) وقد عكس المعني تماما

khaleel
________________________________________________________________


ونحن رغم سمستر صلاة النبي فوقوالجكس فينا مكسر

الاخ خليل الرجاء الكتابة عن مولفي اغاني دوري الكليات في الهندسة

وانت كنت اولهم

عبدالكريم الامين احمد
____________________________________________________________________

نعم كريمو انت الوحيد انصفت اديبا من مولفاتي كانت اليل يا ليل يا حلاة الهندسة بالليل وحتي عيلوم والجاز وصل ام هندسة دي فكانت من اولاد جامعة الجزيرة واخبرني بها الثيردباك طلال حامد وقمت بترويجها ومن المولفين ابوسمرة ومنقوشي استورد عبارة حندقك يا حكم من مصر وكان ايضا من المولفين الخير ومباراة الجامعة الاهلية مع الخرطوم استقبلت في المين رود ناس الاهلية برائعة محمد ميرغني حبابن جن وكنا نشغالهم يا بابا عايزين جامعة وهم يقولون سبعة جات يا جداد ومازلت اذكر محمد الحسن وصديق العربي ماذا فعلو بالمدرجات

khaleel
______________________________________________________________________

فوق ..عشان دريسة..وصلاح العاقب ..وايمن وكوكة..يحي .ظافر.والشهير وهشام سفل

وعشان محمد متوكل ووليد اللتر .وهشام ابوشيبة..بهاء الدين.والصادق تنقا

ومحمد اريه.ونادر والله عشان حاتم معني

عبدالكريم الامين احمد
_______________________________________________________________________

لعلك تذكر جيدا كريمو مباراة اقتصاد حيث قمت انا بجمع(sharing) من ناس الكلية لشراء طبول من سوق امدرمان وذهب طه العب لمنطقة العشش لتربيط الكورة عند احد الاناطين ولكن تلقينا هزيمة ساحقة من اقتصاد بلغت تلاتة اهداف وعملو لينا سيرة وين وين تلقو زي ده عروسنا الشينة مهندسة وكان يقود التشجيع عبدالله جنجا وحاولودخول الهندسة فتصدي لهم الحرس الجمهوري تحت قيادة عوض سعيد والعملاق حسن محمود

khaleel

___________________________________________________________________________

اذكر في هذه الكورة كانت هناك لستة للتكديك

1- انور ام دوم

2-حاتم معني

3-محمد سيد( ولد كوستي اللعاب داك)

واكد طه العب كلو تمام التمام ..ورغم هذا هزمنا 5 مقابل 1

واذكر ان اصدقائك الحناكيش كانوا سخيين جدا في الشيريين

عبدالكريم الامين احمد________________________________________________________________________

وأذكر ياكريمو دورى الجامعات وكان مسك الختام مع الفرع وتلاعب بهم أنور امدوم ومحمد السيد يمنة ويسارا. أنور رفع الكرة فى لمحة بصر من الأرض الى رقبته ثم نظر للمدافع فى عينيه ومشى وجرى وربما طار بينما المدافع مازال محتارا أين ذهبت الكرة. كان مع الفراعة جعفر عبد الرازق وقد فعل الأفاعيل وأحرز هدفهم الوحيد بعد البينالتى؟ لكنا هزمناهم شر هزيمة فى استاد الخرطوم وانطلقت المظاهرات من المقرن حتى الجامعة - بلادتو بلادة وجابو حمادة، ثلاثين فى المية جابو الختمية، وكان ذلك أوان كشوفات قبول ذاع ذكرها. وفى المدرجات كانت فرقة الجو الرطب ترطب الهزيمة بالسخرية من الداخليات - فول وعدس، وتانى عدس او ماشابه.

mohammed elsaim
________________________________________________________________________________

وماننسي اولاد داخلية النشر ناس حكيم وود الاسد وناظم وساكوبة كان غرفتهم تسمي وكر وما تنسي انت لمن خفت من صلاح العاقب يوم لعب معنا الوست وانت قلت الرجل الكبير البجيبو لينا شنو وما ننسي جمال الطباخ والغسال الذيذ وعباس ومزمل وناجي وحسن حسين انتخبو كيكي وناس سيد الرايحة واحمد التجاني وسيد الرايحة وسيف تنقا ومحمد بدوي الدجال ومصطفي ميرغني وحفالات دار الاتحاد واستقبال الطلبة الجدداظن سمعنا معظم عمالقة الطرب وما تنسي اول مرة نشوف حوض السباحة وكافتريا اقتصاد والمين رود الكان كاسر فيني ضلعة لانو كان فيه ما لذ وطاب وماننسي الزميلات في سنة اولي مي صفوت وغادة كدودة وزلفي الاسد ومي عزالدين وبنات الشهادة العربية ناس اهلية وسامية واهم زول خالد شيخة وكبر وكل الخناشير

khaleel
__________________________________________________________________________

يا خليل يا زكريات....

اذكر اول مرة نشاهد حوض سباحة كان حوض البركس.ورايت واحد عوام شديد كدة زي السمكة

فعرفت لاحقا انه ود دفعتنا عوض سعيد احد ابطال السودان في الكاراتيه

وكان رياضي من النوع الاول وعرفت انه الا ن بكندا...ام الرياضي الفريد فكان محمد متوكل

معبود جماهير الهندسة.فود المتوكل كورة واخلاق وقيافةوعلم..وكمان مشي مع اجمل بنات

الجامعةوالجامعات المجاورةوكان ماركة مميزة في كل ماتشات الكلية وبعبع مخيف لكل

الكليات..واوكد مرة اخري ان ود المتوكل العب سوداني مافي شك في هذا.وكان لود

المتوكل عادة غريبة انه دائما يبدا الماتش متاخر واذكر ان هناك احد الطلاب المشاهير

في الكلية يقوم بالتسخين مع ود المتوكل علي اللاين.

اما عن كورة هندسة واقتصاد فكان هذا ديربي كبير لا يقل عن هلال مريخ

وياتي الناس من خارج الجامعةوهم يعرفون اسماء كل اللاعبين.وكانت كل الكليات تقف ضد

الهندسةالتي يحتل طلابها مدرج ضخم ..ويهتفون ضد الجميع

الجامعة هندسة اولا جامعة


وسنواصل

عبدالكريم الامين احمد
___________________________________________________________________________

ابراهيم احمد ابو سمرة صديق بطعم الابداع كان من كبار مشجعي الكلية واكثرهم جراة

وشهرته فاقت الحدود حتي قيل ان حسناوات الاهلية الواحدة تقول اموت عشان اشوف ابو
سمرة
رغم انني كنت من المكذبيين لهذه الاشاعة...كان ابو سمرة شاعرا مجيدا ,وكان احد ابطال

الكلية في فريق السلة وكنا نقول( شيلو الكاس وادونا حمادة)..وابوسمرةكان من كبار

رواد المين رود وكان يجيد فن الخلط واظنه كان في عهدا ما مشتسار لاخونا خليل اثنا

حبة الشهير في ردهات الاداب الذي جعل خليل يقول

لاحباك قطيط لالقيت النقر يا ابو خليل خلاص ارجع لامدقر

عبدالكريم الامين احمد
_______________________________________________________________________

وكان هناك ياخليل طه النور اسحاق طه العب ..شطارة وصياعة..شعر وهندسة

وكان اخو اخوان ومن المشجعين الذين يجيدون ضرب الدرم.انتخب سكرتير اجتماعي

للجمعية الهندسية وذهب لرحلة مصر الشهيرة وعاد بونسة جميلة عن عزيكة وكلوب

اشهر تيمان في الهندسة حينها.وكان مشجعا جسورا يخافه السكرتيرات كثيرا..ولكنه

ارتبط اسمه بحادث التكديك الشهيرة واصبح يشجع من اعلي المدرج

عبدالكريم الامين احمد
______________________________________________________________________

..
.
يا خلي ..

انت خليل زاتك ..
بتاع سودانت وشلة المراة النخلة ..

ام تشابه على الخلان..

تحياتى؛؛

تشابه عليكم الخلان وفي كل خير يا تبلدينا وفي انتظار انت تكتب عن ذكرياتك

وفي منتصف سنة اولي جامعة كون اخونا خالد شيخة لجنة اسماها لجنة بحث عدالة الفرص الجامعية وكانت معنية بمحاربة شهادة لندن وكان معهم مجموعة من بقية الكليات ناس احمد شندي ومن هندسة كانت زميلتنا رباح الصادق المهدي نشطة جدا كانت مظاهرات واعتصمات من اجل عدم قبول ابناء شهادة لندن بجامعة الخرطوم بحجة ان امتحاناتهم ساهلة والمنافسة غير عادلة مع الشهادة السودانية.
اما انا فقلبي مع معاوية وسيفي مع علي مع الحناكيش بشوف ناس طلال الاحمر واحمد عبدالعظيم وناس منار بشري وايمان كليفورنيا ومها ذكريا وغادة كدودة ومي صفوت مايسة عزالدين وحنان الجعلي وخالد بشد حناكيش حلويين وبجاي تلقي ناس كبر وكيكي وطه العب وساكوبة كوم شنة فقلت حرام ان نفقد هولاء الحناكيش وخليهم الجامعة تحدد بالامتحانات والحشاش يملي شبكتو وقد اظهر ابناء شهادة لندن تفوقا في مقبل الايام ونواصل

ابو خليل


ياملك السهل الممتنع

حكاياتك شيقة ولطييييييييييييييييييييفة وذكرياتك حميمة

واصل ونحنا متابعييييييييين للطيش يازول انت بس قول ..

ابو خليل ملك ملوك الظرافة واحسن زول بحكي عن اجمل الايام ..وابوخليل ده

ياجماعة عاش الف عام... فتي نحيل.. اقتحم الجامعة قادما من قلب الريف ...واصبح

خليل اكبر زول اجتماعي في سماء الجامعة وخلط احلي البنات وكان احد ملوك

شارع المين رود الشهير..مع ابن خالته الوسيم طارق وايضا كان عاشقا كبيرا

واحسن زول بسمع وبتكلم في الغناء والهلال

ويلا يا سهل يا ممتتع متع الجماهير (وكع يا خلي)

طبعا يا كريم الجامعة كان فيها اقطاع وطبقات الحناكيش كانو بحبو في المين الرود وبفطرو شاندوشات وناس جداد الخلا كان بحبو في ظهر التور وبعض الطبقات الوسطي بحب في كافتريا اقتصاد وكافتريا علوم لكن كعظم الناس يتوجهون للفطور في الصفرة كان الاكل ما بطال ولابد ان احيي الطباخيين والفراشيين والحرش ناس عبد الحفيظ ويحي وعوض وعمو زحو من جنبو فقد سهر الجميع علي راحتنا وقد حسدنا ناس الانقاذ وكسرو الداخليات والجامعة واظن ان البركس اصبح داخلية بنات انشاء ما انفعن.
طبعا حكاية الطبقات ظاهرة حتي في الشيوعيين لما ناس محمد اسماعيل والشوية اكون عندهم عرس في الرياض ما بعزمهم شيوعيي الولايات.
وطبعا يوم الخميس اولاد الولايات بمشو اتسولو الحفلات في الاندية ولعلك الحفلة الكانت في نادي الضباط ومشينا مضهبين و والعرس كان بتاع دكتورة مها الحضري وشفها جمال احمد النور فهربنا من الحفلة بعد صاح جمال ديك مها ديك مها ونواصل

الاخ خليل

السلام عليكم ورحمة الله تعالى وبركاته

سردك جميل جدا للذكريات ومشوق رجعتنا لايام الدراسة الحلوة بما انى مازلت

طالبة (عجوزة) الا ان ذكريات الصبا وايام الجامعة ايام لا يمكن ان تعوض

واصل نحن فى الانتظار


انتصار

شكرا انتصار ما اظن في اجمل من ايام الجامعة لانها هذه هي الحياة بدون مسئولية ماكل شارب خالط بس لون الدنيا اصبح غير كما يقول نبيل شغال بعد التخرج الحياة اصبحت اكثر قتامة وقسوة والله ياذي الاذانا

ابو الخل

والله اعدتنا للايام الجميلة وفعلا الله ياذي الاذانا ويا حليل زمن البركس وجلابيه البركس والردا

بتاع كيكي الشهير...وكافتيريا الاقتصاد ..ويا حليل شيلة ال T ..ودورين 2 والبورد وكافتيريا

هندسة التي كانت احلي الاماكن ونتوقع يا ابو خليل ان نقرا عن صداقاتك لاولاد ام درمان وخاصة

اولاد زهير

ويلا عشان ذات الخطوات الموزونة

من الذكريات التي لا ينساها طلاب الهندسة المدنية الكورس التدريبي لمادة علم المساحة الذي كان يعقد في منطقة جبل أولياء سنوياَ في الإجازة الصيفية للسنة ثالثة هندسة .
في ذلك العام ذهبنا. كانت دفعتنا تضم ثلاثة طالبات أحداهن الأخت العزيزة ( ---- ) التي كانت تمتاز مع روحها المرحة بجسم ممتلئ يجعل حركتها بطيئة . إتفقنا ونحن نقوم بالأعمال المساحية في شوارع الحلة أن تكون مهمة زميلتنا هي تسجيل القراءات التي نلتقطها حيث كان ( الثوب السوداني ) الذي ترتديه مقيداً لحركتها . كان منظر هذه الزميلة وسطنا مثيراً للشفقة ، مما دعا إحدى سيدات ذلك الشارع أن تخرج من بيتها ( بنبر ) وتعطيه للزميلة ( ---- ) قائلة لها ( اقعدي واكتبي بي راحتك يا بتي ) . راقت الفكرة للزميلة وأخذت معها ذلك ( البنبر ) طيلة ذلك اليوم . رأت مجموعة من الستات المارات قربنا الزميلة وهي تحمل ( بنبرها ) ، فالتفتت لمن معها تلفت نظرهن لذلك قائلة :-

( يا بنات أمي ناس الهندسة السنة دي جابوا معاهم دلالية )

فشبك إسم ( الدلالية ) بهذه الزميلة حتى ما بعد التخرج .

بعد التخرج بحوالي خمس سنوات رجعت للسودان لإتمام زواجي وطفت على الزملاء والزميلات بالوزارات أدعوهم . ذهبت لوزارة الأشغال وسألت من صادفتني عن مكتب المهندسة (------ ) بإسمها الثلاثي ، أجابتني أنه لا توجد مهندسة بهذا الإسم ، فلما رأت إصراري استدركت

( آههههههه إنت قصدك الباشمهندسة دلالية ؟؟؟ )

لك الشكر عاطف عمر نعم برضو ذهبنا للجبل اولياء وكان معنا اولاد مساحة وكان هذا مع امتحانات الملاحق وكانت بتجي اخبار النتيجة وانا ذهبت للجامعة وسمعت في اتنين ربتو وسمعت دكتور محجوب يقول بان زملينا حسين عندو مشكلة في اعمال السنة فخمنت ان من المربتين حسين لان معظم ناس الملاحق ربتو قبل وما عايزين اعيدو التجربة .
وبعد ان ينام الناس كان ياتيني عارف ويصحيني من النوم خليل خليل عليك المربتين كم فاقول له يا عارف اظنهم اتنين امش نوم.
انا اطلقت اشاعة بان حسين علي ربت وكان اصحاب الملاحق يرددون خش يا حسين املا الخانة يا حسين نحن ما بنقدر نربت تاني.
المهم ربت محمد الحسين وكمال ابراهيم ونجح البقية.
كان معانا واحد من ناس مساحة وكان من النفترض ان يعمل الكورس قبل عام ولكن لم يتمكن وعمله معنا وكان اسمه غير موجود بالكشف وكان دكتور عكود يقرا الكشف ولم يذكر اسم زميلنا غازي محمداحمد وهنا صاح غازي دكتور انا متخلف فضج الجميع بالضحك واطلقنا عليه بعد ذلك غازي المتخلف
واكر كان معانا الزملية العزيزة زينب محمد سليمان متعها الله بالصحة والعافية وقد اوكلنا لها مهمة الرسم فعسكت اتجاه الشمال فصار جنوبا وذهبنا بالخرطة للدكتور فقال يااخوانا دة يوم القيامة عديل الشمال جنوب والجنوب شمال ونواصل

كورس المساحة بتاع جبل اولياء يا ابوخليل من اجمل اللحظات ومعسكر تتعلم فيه فنيات مساحه

تظل معاك طيلة عمرك ..وبه جانب اجتماعي يقرب الناس من بعض واذكر ان اهل جبل اولياء كانو كرماء

جدا وينتظرن ناس 3 مساحة و4 سفل بفارق الصبر

واذكر اننا كنا قبل النوم كان محمد area بحكي لينا النكات العجيبة ديك وكان معانا واحد

زميلنا انصار سنة عامل فيها نائم ولكن اكتشفنا انه بضحك علي نكات

areaتحت البطانية

يسلام علي محمد الطيب سليم عندما كنا برالمة كان لا يعرف هندسة مساحة بالانجليزي فترجمهاحرفيا انه هو طالب في(faculty of arae) بدلا عن(surveying) وهناك ايضا هاشم كان لا يعرف كلمة (consider) وينطقها كونسايدر والاتنين ما زال يعرفون بهذا الاسم لكن نحن عشان بارينا اولاد وبنات لندن انجليزي بتاعنا زي الرصاص

طلاب الجامعة في تلك الفترة العلاقات ممتدة عبر الكليات وكانت الشلل ليس من الهندسة فقط

بل تمدد الشلة لكليات الدايات وشمبات واصدقائنا ناس القمائر وكانت شلةخليل تعج بالناس

الحلويين الذين نطرب عندما نراهم بصحبة ابوالخل

طارق الوجيه وسنادة وجلال احمد النورواحمد الحنين ديل ناس الطب ...وده كلو كوم والموسيقار

الاصم كوم تاني


وشنو يا خليل كابي الذوقة من موضوع القط

معليش مواضيع قصص الحب فاشلة كانت في سنة خامسة ونحن لسع برالمة خلينا نمش بالتسلسل

انا لومنك يا خليل ولا بتخرج ولا حاجة

لكن الظاهر زنقة امتحان واحد تقول ان شاء الله اتخرج واتخارج من الامتحانات دي .

لكن لقيت الدنيا برة كعبةةةةةةةةةةة وشينةةةةةةةةةةةة وما بتستاهل يتخرجوا ليها


اتمقلبت والله

براي اتمقلبت كل الناس اتمقلبو هربو للندن وامريكا وباعو البتزا واشتغلو بتاعين تاكسي فمنهم من قضي نحبه ومنهم من ينتظر ولا عزاء للسيدات

تسلم يابوخليل

اذكر عندما اتينا الي سنه اولي تم توزعينا بداخلية فسلطين الطابق الثاني غرفه 14

وعندما ذهبت للغرفة وجدت ساكن فيها الشهير عمر اومو وكنت في اول ايام مفتكرو مساعد تدريس

في الجامعة وكنت معاهو اخر احترام وكان معه اخوه التاني كان اومو عرفني بيهو باعتباره العميد

فلان...فكان عندي جلابية اشتريتها جديدة لنج وبعد يومين جيت من الجامعة لقيت ليك اخو اومو ده

لابس جلابيتي فقلت ليهو يازول دي جلابيتي تخيل قال لي ياولد امشي نوم انا العميد فلان الفلاني

واصدرت تعليمات انو الجلابية دي يوم انا ويوم دكتورعمر وانت لو عاجبك نديك تلبسها يوم الجمعة

بس

يسلام يا كريمو علي مجانين الجامعة اومو وعثمان وميرغني العامل فيها دكتور طبعا ان عثمان جنني من اول يوم فهربت وسكنت غرفة 42 مع اولاد مدني حمد حماد اسامة احمد عبدالله احمد التجاني بكري عبدالقادر مصطفي ميرغني سيف عمران طبعا انا واسامة واحمد صاحبن بنات البص ناس مي واماني ومها وكان بجي بكري ياخوانا ما تعرفونا وسامة احمر ليهو ويقول الجكس نحن لمينا فيهو بالساهل امشي اجتهد.
بعدين اول سقوط لينا كان في امتحان الانجليزي بعد اسبوعين من الجامعة وتذكر دكتورة نجاد لما طلعت النتيجة قال نحجي (with B) لما قالت كدة قلت دي صوفيا لورين.
ولعلك تذكر بحر بتاع مدرسة العلوم كنا ننسج له قصص من الخيال ونقول امبارح شايفنك مع سحر بتاعة اداب فيرد بكل ثقة ما عندنا معاهو حاجة بس بنشرح ليهو انجليزي يا بحر شايفنك مع سلمي بت اقتصاد فيقول ما عندنا معاهو حاجة بس بنشرحو ليهو ماسماستك مع لا في سحر ولا سلمي
ذات نقول ليهو ما نعرس فادية الحنكوشة قال ما عندو مشكلة بس ضيوفو كتار ونواصل

خليل يا خليلوالله انت مسخوط ..ياخي بكري ده ما كان تدوه معاكم حاجة

الجامعة غير الطلاب الحلويين كان هناك الحرس والسفرجية والكبابست الظراف

وطبعا الواحد منهم لمن عمرو يكون 18 بحولوه من داخلية البنات الي البركس

واما عمر امو ده فكان زول لطيف جدا وعنده اركان نقاش يتتكلم كلام الطير في الباقير

ويبدا بالحديث عن الترابي ثم يعرج عن كوبا وقبل ماينتهي يكون اتكلم عن الهلال وكان جنو

وجن البنات ولمن يشوف الواحدة وقفت في الاركان بتاعتو يبدا في كلام كعب شديد

من نكات عمر مرة قال يا اخوانا اي زول ادفع ريال ريال لان عندكم اختكم فاجاها المخاض في الصفرة ياخي كان جنو كلكي

قبضتك يا قرقر. ومن زمن اسال في نفسي خليل ده منو?

لسة انت في سنة اولى ياخخخخخخ؟؟؟

ايوة اجمل سنة في الجامعة بعد كدة دقونا دق العيش

يا محمد وين ناس دفعة ستة وتمانين الذاذ ديلك

والله يا ابو خليل بوستك لامي الفراش..(انت مشيت لقوبي ولا شنو)

واذكر ان ابو خليل حكي لي انه عقب تخرجه زار الجامعة

فصادف ان هناك كورة للهندسة في الميدان الغربي فترك المشجعين تشجيع الكورة واصبحوا

يرددون حليل زمن ناس ابو خليل فعندها انهمرت الدموع علي خدود ابوخليل فلم يستطيع البقاء في

الجامعة فخرج ...فعلا حليل زمانك يا ابو الخل

up

كل سنة وانتو طيبن وربنا يحقق الاماني ويجيب ناس اماني والله ما عايز اخلي سنة اولي علوم وامشي سنة تانية لان ناس هندسة ما احترمونا اكاديميا ربتونا ورفدونا وفي الاخر نحجونا كل ما اتذكر سنة تانية جامعة احس بالمرارة تلات سنين وانا في سنةتانية كل الجكس العملتو وربيته وانا برلوم انفضي مني وتركت المينالرود بقيت امشي بشارع النيل لكن مابراي معاي اخوي الكاشف ناس كيكي واريج وخالد شيخة واسامة سيد الرايحة والهادي الاصم واريج جعفر ومصطفي بوب وكمال الشيخ ومرتضي وعبدالله اسحق وطارق عكيورة هسع ديل برة عاملين مهندسين كبار لكنهم ربتو ربيت لكن ادروب ما بليد ادروب ولوف

ياخليل شنو الفضائح دي ماالربيت بتاع الرجال

وبعدين ماتنسي كبر وسيف اسكلاتشي وبعدين ضروري نعرف

اخبار الربيت والشلة بتاعتكم الكنتوا تواسو بعض وعاملين

قروب فارز عيشتو براهو بذاكر وبقوم وبقعد مع بعض وضروري بالله ابراهيم جرايد

وهشام توفيق لانو ديل كانو كيزان لذاذ مثل زي الكيزان الحسي ديل..............والاصم

بعد ما ربتنا في السنة تانية الاولي وجينا تانية التانية كان في ناس عندهم ملاحق اذكر صديقنا ايزاك من جنوب السودان نحج في الملاحق فقال عبارته الشهيرة بانجليزي جوبا(iwill nver fail again) وبرضو طارق ود العيكورة وهي من قري الجزيرة وكل طموح ناس الجزيرة ان يلتحقو بالري فقال بعد ان نحج في الملاحق والله تاني ما يلمو فيتي الا في الري ولكن تم اصطياده تاني في سنة تالتة ولحقناهو زي ناس كتار فاتونا في سنة تانية ولحقناهم في لان زي ما عارفين الربيت بضعف المناعة

انا طبعاً دايرة سنين الربيت ديل يعدن, ونصل سنين أخرى.....

ونشوف القصة بعد داك بقت كيف .....

لا مين رود ولا سوق شعبي

طبعا في سنة اولي غشونا ماقرينا ونجحنا جينا الهندسة بعد تلاتة شهور قالو امتحانات اخدونا علي حين غرة في ناس كانو يخلطو معانا ويلعبو معانا كتشينة ويمشو البيت اقرو ونحن الدراويش صدقناهم لحدي ما جاء السمستر
ولوكان عميدنا اباح واعلن سمستره صاح انا كنت ليهو قريت
وسالوني عن صبي انكرت ما قريت شوفوهو متخبي في البورد اقول ربيت

خليل ثانية هندسة طبعا تمثل نقلة عجيبة جدا لانو اولي ممكن تباصي بالمخزن الاستراتيجي

بتاع العالي لانو كل القصة ماس بس بالانجليزي

اما تانية دي امرها عجيب لانو قبل ما تاخذ نفسك يقولو في حاجة اسمها سمستر

وبعدين درونغ وماس كلو بتا وسيتا وكلام الطير في الباقير المهم الله يجازى الكانو السبب

يتشرشحو معاك وبعدين يمشو يذاكروا بالدس (ابراهيم ابوسمرة نموذجا)

خليل
واحدة من العجائب سمعتها منك وحصلت والأخرى من صديق آخر وحصلت بالنص.
الاولى انت ذكرت ان الويغا قالت لك لن تنجح دروينع 1 ولكنك ستصبح مهندسا! وقد حصل ذلك. مرة أخرى كما ذكر ذلك الصديق فى عام 88 او بداية 89 قالت الويغا ان الترابى سيحكم السودان عشر سنوات. شككت ان الأمن يسرب تنبوءات كتلك.
هل لك ان تفصل قصة الويغا؟ لابأس عليك ان نسيت!

دفعة 86 تفرقت أيدى سبأ. الظريف كمال ابوبكر يمكنه ان يساهم بالمزيد من الذكريات العذبة.

بالمناسبة ذكر عبدالكريم ان هناك من مشاهير الجامعة من كان يشارك محمد المتوكل فى التسخين قبل نزوله الملعب. اظنه يقصد يحى قاسم ضرار الذى كان يصر على الجرى مع ودالمتوكل حتى منتصف الملعب فى انتظار اشارة الحكم للدخول. مع العلم ان يحيى لم يكن رياضيا ولاحاجة!

شكرا ود الصائم وخلي ناس امريكا اساهمو معانا في شريط الذكريات لسع عندنا الكثير المثير الخطر عندنا المعارك السياسية وجلدة الكيزانووحبسهم في مسجد الجامعة وعندنا الغاء السكن والاعاشة وعندنا السيول والامطار سنة تمانية وتمانين ومقاطعة الامتحانات كله ياتي تباعا وكل سنة والجميع بخير

الصائم لك التحايا والود وفعلا الان تذكرت يحي

اما بالنسبة لاخونا خليل والويغا الحاصل ان بعد التخرج انشطرت الويغا الي اثنين

الالوسي وقسطنطين

الالوسي للحاجات الكويسة والتاني للاشياء الكعبة...

وتخيل الزول ده التكون معاهو جن كلو تنباتو في محلها

كور الهلال

كور برشلونة وريال مدريد احداث العراق ده كلو يديك خبرو قبل كم شهر من الحادث

الأخ خليل متعك الله بالصحة والعافية وسرد أجمل الذكريات

إنت يا زول نسيت حاجة مهمة جداً في الديوان غرب الميدان الغربي

يوم الكروة كانت مولعة جداً بين الإقتصاد والهندسة والجماعة واقعين

ليك أولاد وبنات سكرتيرات . وبغادي لن ترتاح يا مساح

وقوم يا أنور جيت الهدف ولحقوا أحمد السيد واحد وغلبوا الهندسة

وقومن يا بنات الإقتصاد بي مسيرة هادرة لي كليات الهندسة البعيدة ديك

ودخلت علي الكافتيريا وجنس هتاف ما هتاف نصاح

وفجأة أولاد الهندسة ما هندسة قاموا فصلوا الكهرباء وتعال شوف جنس جوطة

علي اليمين بعد داك جينا لقينا ليك جنس شنط وطرح وشباشب ما تديك الدرب

وقول يا مسهمل . بس ما تنسي المرة الجاية تدخل بي التي سكوير

بحيراوي

هندسة عجيبة بطلابها اللذاذ وكان الذ واحد صاحبنا كده كان انصار سنة لحدي ثالثة وبعد

داك مشينا الاجازة وجينا لقينا ليك صاحبنا فتح اخر T SHIRTS

والسيجارة قصبة والشي التاني وانت ماشي معاهو ويشوف ليهو بت حلوه

يقوم بدقك في كتفك وبقول بالله انا كنت عميان من ده كلو

خليل
يا ملك القماري
لعلك تذكر صديقنا اللذيذ الاخر الذي بجي من بري في انصاص الليالي واقف لمبة

وكان احرف زول في الوست علي مستوي العالم وكان شاطر جدا في الماس

طبعا ركس ده لقاني يوم كده بوزع بيان سياسي بين الاوض في الليل فقال لي تعال هنا يازول

بتعمل شنو قلت ليهو قاعد اوزع بيان فقام خطف الورق مني وبقي يخش اي اوضة ويصحي الزول

ويقول ليه انعل(.....) امسك البيان ده كيكي نازل انتخابات

مع العلم انه لم تكن هناك انتخابات ولاحاجة المهم بعد تلتلة قدرت اشيل منه الورق بتاعي

طبعا لازم احكي نضالي السياسي اول مظاهرة شاركت فيها كانت بتاعة ضربة ليبا ومشينا السفارة الامريكية وكان يقود المظاهرة واحد ليبي ويهتف ريغان يا راعي البقر الشعب العربي كله حر لكن الاحتياطي ضربنا بمبان ابو طيرة وتفرقنا شذر مذر وبرضو طلعنا مظاهرة لما الصادق المهدي زاد السكر طلعنا الكيزان المهم مظاهرة والسلام ونحن برالمة بعدين جات امتحانات البرلم والله دكتور ود المكي عمل امتحان تفاضل عجيب كان معانا واحدة مصري لف جامعات كتيرة فبعد الامتحان جا قال والله شفت التفاضل الجزائري والمصري لكن زي السوداني ما لقاني

up for the beautiful people

Muna Khugali

يا ابو خل سلامات

الكلام الان دخل الحوش وشايفك ثانية دي زي عاوز تكلفتها سريع

لكن و ين انا معاك مان تومان

وبالله مرحلها لينا تانية 1(دي زي انانيا 1)

ثانية 2

ثانية 3

ويلا ارح

ما قايلاك بتاع بطولات كمان مع اللبيين يا إر

young radical

تحياتي القلب النابض
طبعا نحن جينا برالمة مافاهمين حاجة ما زي الناس المن العالي ودوهم شروني

شكرا بحيراوي شكرا كريم وابيت راجع تاني سنة اولي عشان نسيت الانتخابات بتاعة الدمقراطية الكانت كلها اضرابات مافي زول ما اضرب حتي ستات الشاي لحدي ماجو الكيزان وعملو الحكاية نحن في داخليات فلسطين كنا تابعين لدائرة الخرطوم وكان فيها الفاتح عابدون وعزالدين علي عامر ويوهانس وناس البركس كنو تابعين لدائرة بري وكان فيها فاطمة احمد ابراهيم وعثمان خالد مضوي نحن فاز عندنا عزالدين علي عامر وهناك فاز عثمان خالد هلال مريخ وبمناسبة المريخ في نفس العام فاز المريخ بكاس سيكافا ومشينا المطار وغنينا صعب يا بريمة جبت الدهب يا بريمة.
بعدين جات امتحانات سنة وقد فقدنا بعض الزملاء بعامل التربيت ونحج البقية وجات الاجازة وودعنا الجكس الحلو داك وكنا بقول يا دار ريا ما كان الفراق بالخاطر الحناكيش قضو الاجازة بلندن واولاد الخرطوم مع زويهم واولاد الولايات الاقل والاكثر نموا اصطفو في طابور طويل لصرف بدل الترحيل وكان هناك ناس مستكحين واحد اكون من رفاعة اجيب شهادة سكن من القضارف عشان اقبض بدل ترحيل كتير وامشي القرية اعمل الود مقددها

ايوه كنا في دائرة عزالدين علي عامر واذكر ان الكيزان كانوا

منزلين الفاتح عابدون وبعدين اذكر ان الشيوعين كانوا عندهم

غنا سمح شديد

سدنة ديل ماتصوتو ليهم سدنة ديل

في الفساد مافيش مثيلهم

واذكر اول مرةا اشوف فاطمة احمد ابراهيم

في ميدان الاداب يا زول كلام في الملان وثقة ومنضمة بادب

وكان واقف جبني واحد ايضا برلوم

فقال لي والله الزولة دي كلامها تمام والله انا لو ماخائف

من فكي فلان كنت بقيت معاهم شيوعي (فكي فلان ده كان عرفت لاحق انه الشيخ بتاع الحلة بتاعتهم)

لاحقا بعد سنين تحرر ذالك الرجل وتخيل بقي شيوعي كبير

ايوة الكيزان كان بقول شريعة ضروري يا كروري ولا ميشيل ولا لينين الخريجين اقامو الدين يا شيوعي يا جبان الاخوان في الميدان وناس حزب الامة الله اكبر ولله الحمد لكن ناس سيدي الميرغني انا بحبهم لكن ما كانو ظاهرين في الجامعة وبعدين في شكلة ظريفة خلاص بين البعثين والشيوعين كل زول بدعي احقيته لاقامة معرض في ميدان قانون وكان البعثين شوية وكان منهم واحد بس حارس المعرض اسمه امين وهجم عليه الشيوعين فخلع سيخة الصيوان وقال ليهم امشو يا حناكيش الرياض

خـليـل وعبـد الكـريـم..

أوعـكـم تتـخـلوا ولا تتـأخـروا علي البوسـت ده..نحـن في الإنتظـار..

مـني

تسلمي يا مني ولك الشكر والتقدير للمتابعة وانشاء الله مواصلين

عشان هندسة وعشان الجامعة التي منحتنا ذاد معرفي واصدقاء نفخر بهم وعلمتنا التواضع

وحب الجمال

ظهرت نتائج العام وكنا من الناجحين وفارقنا سنة علوم وجينا الهندسة (موسكو) كما اسماها الكيزان لعم حصولهم علي اصوات كافيةبالانتخابات واحيي اصحابنا الكيزان ناس هشام توفيق وهويا شبو والبقية.
طبعا ابتدات مرحلة فك التسجيلات ويقينا سناير ولابد من فك بنات دفعتنا وتسجيل البرلومات الجدد وقدد سجلت عدد كبير من الجكس للعب في تيم خليل واحتفظت بعلاقات وطيدة مع نجوم العام السابق من حسنوات طب واداب وعلوم واقتصادوكذلك اصدقاء في الطب ناس نادر واشرف وياسر ابراهيم ومحمد مرضي وسنادة ومحمد ادم غانم وناس هناية وهناية.
صرفونا لينا عدة الرسم الهندسة وكنا ناخد المسطرة معانا المين الرود عشان نقشر بيها مع البرلومات اللاولاد مهندسين يعني.
طبعا نظام السمستر صعب جدا مافي تسيب ولازم تحضر المحاضرات عشان نسبة الحضور وبعدين ما تشوفو الفلهمة بتاعة المهندسين لما ادونا(home work) البشتغلوهو تلاتة اواربعة شطار ويقوم البقية بنقله وجمعه مما يعرف بمصطلح الترس .
سريع جدا فاجاتنا الامتحانات بعد ثلات اشهر فقط امشي صور الكراسات وتبدا الكبكبة وانت كانت انتي مشكلة اساسبة لا اعرف مادة الرسم الهندسي وكنت احصل علي صفر طوال اعمال السنة ومرات اخد الورقة ويرسموها لي في الداخلية واقوم بجمعها وقد عقدني من الرسم صديقي مهندس طارق بخيت حيث سالته من صديقنا بابكر نورالدين فقال كويس لكن عندي ملحقين رسم هندسي وقال عادة الناس ما بتنحج فيهم رسب هذه العقدة داخلي وانا برلوم ولما مشيت سنة تانية مشيت وانا مقعد من المادة قبل ما اشوفها وقد اضاعت هذه العقدة تلات سنين عمري الذي ضاع في سنة تانية فقط ولكن معاي ناس كتار( الماحي افندي في الرسم).
امتحنا ستة مواد الفترة الاولي وظهرت النيجة فخفت ان اشوفها فكلفت جمال احمد النور ليشفوها لي فقال خليل معليش عندك تلاتة مواد اما اخوي عبد الكريم الهسع بتفاصح في البورد دة وهو الان مهندس في قطر للبترول سقط في الستة مواد وكان طيش الدفعة.
اما انا فايقنت انا لحظة الفراق قد حانت لنفارق اولاد دفعتنا لان التربيت يحسب من خمسة مواد وانا السمستر الاول عندي تلات والسمستر التاني حا اسقط في الرسم الهندسي التاني بقو اربعة والله استر.
السمستر التاني عملتي حسابي شديد حضور منضبط للمحاضرات ودفاتر وبرضو مرت الايام مسرعة وجات الامتحانات وسقطت في الرسم الهندسي التاني وجاء دكتور مدحت خمس لي الدفاع فطلعت ربيت من الاول مع مجموعة طيبة.
وقد حدثت قصة ظريفة صديقي اسامة احمد عبدالله ضمد جراحي واداني الدفاتر بتاعتو عشان السنة الجاية ما اكتب وكان عندو ملاحق ولكن سقط في الملاحق وربت معانا وجاني قال لي خليل لوسمحت رجع لي دفاتري ونواصل

خليل يا ملك التربيت شايفك خاشي لفت في سنة العكلتة دي

فانا يا خليل اخدوني في تانية دي علي غرة

واذكر ان الدروينغ ده كان شي صعب شديد خلاص رغم محاولات صديقي طه النور المستمية

الا ان اخوك الكاشف القصة ما وقعت ليهو والمهم عدت سنين 3 ولكن تعلمنا معني ان

تكافح وترفض الفشل وتصر علي النجاح

وبمناسبة الترس يقال ان هناك مسالة كانت اجابتها سغمة (وسغمة هذه رمز بتاع رياضيات بشبه السته)

ولمن الترس وصل لاخر زول كانت الاجابة 5.99

وبعدين يا خليل بلاش تزوير للتاريخ

اقوم حسي اكلم ليك ( قوبي) يجيب خبرك

خليل عقدتني من مادة الرسم الهندسي مع انو انا ما بدرس هندسة

ياخ ما تعقد البرالمة الجدد

ياخي نظام التدريس عقيم جدا ايه يعني ترسم عامود طوالي بتاع عربية ولا ترسم منجلة والله كرهنا العيشة مفروض اي ناس قسم ياخدو الرسم الهندسي الذي يناسب تخصصهم لكن برضو دكتور ياسين كان زول لذيذ سنة تانية التالتة نحجني بعد وسط له ابنه عباس ياسين لكن دكتور التاج رفدني من الجامعة بعد سقطت في المحلق في مجزرة رهيبة ساحكيها في حينها واشكر القلب النابض

والله أيام ياخليل!!! أيام الدروينع المضت ياحليلها! وفى الاستوديوهات حلو مجلسنا! دكتور التاج درسنا... والأسمبلى والسيكشننع تبكى تبكى كل الشافها!

طبعا دكتور التاج كان عائدا من أمريكا بدكتوراة جديدة لنج.. لكنه كان يذكرنى بقصة رافاييل فنان عصر النهضة الايطالى. قيل انه اجتاز امتحان اكاديمية الفنون - ان صحت الرواية ووجدت فى زمانه - برسم دائرة كاملة فشلت كل محاولات العصور الوسطى فى اثبات عدم دائريتها. دكتور التاج بدأ حياته الفنية معنا برسم دائرة كاملة الاستدارة بدون برجل وكرر ذلك فى المحاضرة التالية بل وقد سمعت انه كررها فى السنة اللاحقة أيضا... كانت فقط عشان نيامن وقد آمنا!

امتحان السمستر الأول للدروينع كان أشبه بالقصة القصيرة. طوال السمستر وفى السنين الماضية كان امتحان الرسم من سطر او سطرين. فى بداية د. التاج جاء السؤال فى صفحة ونصف مع رسم توضيحى صغير. الظريف كمال أبوبكر خرج منتشيا بأنه قام بتكبير ذلك الرسم التوضيحى فى واحد من الأبعاد الثلاثة.. ولما علم بفساد طريقته صرح بأن بلان فيو مضمون خير من سكشن مجهجه.. غير المهندسين يمتنعون عن الفهم!

بمناسبة الظريف المهندس كمال أبوبكر، كان حفيظا مثل دكتور طبيب ضل طريقه الى الهندسة. مادة الميتاليرجى او علم المعادن كانت مليئة باصطلاحات محيرة مثل اللدانةelasticity والصلابة hardness والصلادة والقساوة hardenability وخواص اللمعان وقابلية السحب والطرق والتشكيل.. كل هذه الكلمات على خفتها بالعربية كانت من الدراب الانجليزى السميك مثل malleability والتى تعنى قابلية التشكيل ان لم تخنى ذاكرتى. ولن أنسى المعالجات الحرارية للحديد الصلب واخفها الكوينشنغ أو التبريد بصورة مختلفة من الكولينع، وكان هناك سؤال عن الكولانت.. ثم البورنغ والكورنغ... بعض المصطلحات لم نجد تعريفاتها حتى فى الموسوعات المتخصصة والقواميس وقد استوى فيها الذين يعلمون والذين لايعلمون. كان يدرس المادة الدكتورمهندس لواء عبدالرحيم سعد عمر.. وكان يكتفى بايراد المصطلح ويطلب الينا ان نبحث تعريفاته.. وأنزلنا الحديد فيه بأس شديد!

كمال ابوبكر كان يحفظ الكراس من الجلدة للجلدة ولكنه لايفهم ولا كلمة. قبل الامتحان طلب مننا ان نحاول تنبيهه الى موضع بداية الاجابةفى صفحات الكراس ونهايتها وبعد ذلك هو كفيل باحراز الدرجة الكاملة.

الاخ خليل

الاخوة الكرام

متابعة معكم بحق هى تجربة غنية لها الاثر الكبير فى

تشكيل وتكوين الشخصية.

فى الانتظار

انتصار

الاخ الصائم تحياتي وعبرك للاخ كمال ذلك الزول الجميل

وشايف ابوخليل خاشي لفت في سنة تانية ولكن قبل الاندياح في هذه المرحلة لازم نلخص

للسنة الاولي السلبيات والايجابيات عشان ابوخليل ما يخمنا ساكت

طبعا اول السلبيات هو الحتة بتاعةالتربيت دي لانو بيني وبينك حارة خاصة لناس كانو ماشين

زي الصاروخ وكانوا نجوم في مدارسهم الثانويةوالمتوسطة والابيدائية وممكن في الروضة

وكانوا فاكينها في روحهم وعاملين فيها بتاعين ماس..ناسين بان لكل فرعون موسي

ناسين ان هناك حاجة اسمها دروينغ 1و2 وكهرباء عجيبة كدة فيها دلتا واستار الما استار

اكاديمي..والمهم الجاتك من البورد سامحتك

طبعا عندي صديقي من اولاد كسلا وكان من المخضرمين كل ما يجي جنب البورد

كان بقول اخ تف

عموما هذا اكبر الجوانب السلبية

اما الحتة الايجابية فكانت كثيرة اهمها التثقيف الثقافي والسياسي والجرعة

الكبيرة التي اخدناها في اولي حيث ان دخولنا كان طوالي بعد الانتفاضة

والبلد فيها نقة سياسةكثيرة فحضرنا ندوات لكل قادة العمل السياسي

الترابي وضحكته العجيبة ديك(طبعا احسن زول بحاكي الترابي في العالم هو ابو الخل..تموت من

الضحك) والصادق المهدي والتنظير و السندكالية وهلمجرا وايضا الحبر وفاطمة محمد ابراهيم

واركان النقاش بتاعة نزار وشفنا حسين خوجلي عامل ركن وكان لابس بنطلون تخيل

اما الجانب الثقافي فالجرعة بتاعة اول سنة كان كفاية عشان تطلعنا مثقفاتية كبار

شفنا حضرنا علي المك وويقراء شعر وحضرنا محمد عبد الحي وعبدالله الطيب وعبدالله علي

ابراهيم

وحضرنا صلاح الزين وهو بيتكلم عن االبنيويةوحضرنا مسرح الرجل الواحد عند صوصل والجو الرطب بتاع

الفرع

وحضرنا كل حفلات مصطفي ووردي وكابلي وشرحبيل وعقد الجلاد والسمندل

ياخ البلد كان حلو شديد والله زمان

ويلا ارح

طبعا ربتنا معاي كمية من المناضلين بلغو ما يقارب الاربعين شخص اههمم كمال الشيخ والهادي الاصم واسامة سيد الرايحة وخالدشيخة واريج جعفر ودي كانت اي امتحان رسم هندسي بجيها (استفراغ) وكريمو و والتحق بنا الناس الربتو في سنة اولي ناس الحسين وامل الفاضل وياسر عبد المجيد.
انا ماكان عندي مشكلة في الانسجام مع ناس الدفعة الجديدة بعرف نصفهم من التشجيع في الكورة والداخلية ناس الصائم وعاطف جلال وامجد زهير وعبيد عبدالرحمن وهشام جادالله والبنات ناس اجغان زكريا وسلافة وروز وساميةجواري لهم التحية والتجلة.
خلينا المين الرود والخلط لانو الواحد عينو مكسورة وخاشي في (خوجلاب) وناس دفعتك القديمة ينظرو ليك بنظرة عطف وناس اسرتك منتظرين متين تخرج ( وتبقي مستشار وتترقي زي كمال زي ما بقولو في غناء البنات).
اجتهدنا اخر اجتهاد ومادة الرسم جابو ليه دكتور لنج اسمه التاج ملفهم فلهمة وكالعادة انا والشباب ما انفكت عقدتنا مع المادة وكانت عندنا عبارة لذيذة لما تجي تنقل من زول بعرف ارسم تقول ليهو خش في(line).
اكتملت استعدادتنا لامتحان السمستر ولكن في كوز اسمه حاج ماجد ما عارفه هسع شعبي ولا وطني تم فصله لمدة سنتين من الجامعة فاحتل الكيزان الجامعة وقام دكتور يوسف فضل المدير بعقد اجتماع مع مجلس الاستاذة وقررو فقل الجامعة حقنا للدماء.
تحياتي انتصار محمدبشير تحياتي الصائم ونواصل

خليل يا ملك التطريب والزمن الفلاني

انت عارف من اشهر الذين كانوا يجيدون فن الترس في الدروينغ اخونا كده الله يطراهو بالخير

طبعا عشان تنقل المقاسات تحتاج الي برجل واخونا ده كان ما عندو زمن لحتة البرجل دي

وكان بستعمل اصابعه وبشيل المقاسات من اشطر زول في القاعة وبكون جاري كده زي عشرة متر

لحدي ما يحصل البورد بتاعو وينزل المقاس وكان حريف جدا في الحتة وانا شوفتو عملها

زي كم مرة كدة وبكافة عالية وفعلا الحاجة ام الاقتراع

وبالله هو التاج ده جانا في ياتو تانية

دكتور التاج من اولاد الثورة وكان مكسر في النقر بنتاع الهندسة عرفتو ولا اقولو ليك والله قربت اقول ليها امشي اتوسطي لينا عند المكسر فيك دة طبعا دكتور التاج عندو معايير مزدوجة زي امريكا في ناس جمعو الورقة فاضية ونجحو

up

يا خبر ابيض يا خليل كيف ما شفتا البوست ده زكرياتك اجمل زكريات
مكتوبة اطلع عليها من مده بعيده ورايح اسجل اول مداخله لى بخصوص اليوم
الحار الما بندار يوم الهندسة والمعمار...انا بطبيعة حالى ما بحب الكورة عاوز
تكرهنى روحى قول لى يلا نحضر تلك المبارة... اجبرنى صديقى الهندسى لحضور مبارة فى الميدان الشرقى مشيت وبقيت متابع الجمهور اكثر من لعيبة الكوره وكان
التشجيع...هندسة رط رط هندسة رط رط.....ورط رط ده التصفيق وكان الجمهور يتمايل معها راقصا وطبعا الجمهور مختلط بنات اولاد مما جعلنى اوظب على
الحضور لمتابعة جماهير المباريات وليس المباريات......تابع بثك اخى خليل حتى اتابع الحضور.......خوالص مودتى

خليل وكريمو
بمناسبة السلبيات والايجابيات التى ذكرها كريمو، فى رأسى فكرة مشعشعة من زمن.. ماذا لو قامت الجمعية الهندسية بتجميع كل الأسئلة من الامتحانات السابقةوالتيوتوريالات ويتم حلها بواسطة العباقرة أمثال حمد حماد وأشرف عبدالحافظ ومن أتى بعدهم مثل جيل مواهب الأولى ومازالت حواء ولادة... وتطبع المسائل والحلول النموذجية وتباع للطلاب بأبخس الأسعار. مؤكد اننا سنضرب عصفورين بحجر.. اولا لن تسقط تلك النسبة المهولة من الطلاب والذين كانوا يوما ما ألمعيين ونجوما فى حلالهم وفرقانهم ولن يدسمس مهندس بعد اليوم الا من أبى. وثانية، يرتاح الدكاترة العباقرة من تفهيم الطلاب والذين يبدون كمالوكانوا لا يفهمون.. إما المشكلة فى الاستاذ او فى الطالب او فى الاثنين معا! رأيى انها الأخيرة.. ولقد سقطت مادتين فى حياتى الأكاديمية واحدة كانت اهمالا منى صراحا والأخرى كنت أذكر كل الكراس من الجلدة للجلدة ولم ينفعنى ذلك لأننى تغيبت عند حل مسألة فرمالة نجح بها من نجح ولاتنفع كل كراسات الدنيا لحلها!
لكن الشهادة لله، الدروينغ ده ماعارف نعمل لناسه شنو! يمكن ينصلح الحال لو وضع له مرجع شامل ممتلئ أمثلة! وياحبذا لو صيغ على شاكلة Drawing for dummies

من يوصل الفكرة للطلاب الآن ومن يتحمس لجمع تبرعات تكفى نفقات التنفيذ؟ بمزيد من النقاش تختمر الفكرة وتنضج..

وفى رأسى فكرة أكبر.. الليلة ليلة الأفكار... لن تقوم لنا فنون ناجحة الا اذا انضم للاستثمار فى الفن المهندسون. الفكرة محولة للفنانة تماضر... يتداعى الف واحد او مائة واحد ويدفعون مائة دولار او الف دولار!!! تقوم الشركة باخراج فلم فلمين تضمن لهما كل مقومات النجاح الجماهيرى بدون اى تنظير او ادعاء رسالة سياسية مثل اسقاط الحكومات وماشابه!! هناك مثل يقول الفاشلون يبحثون عن أعذار والناجحون يبحثون عن وسائل! مناسبة هذه الفكرة والتى هى خارج النص المتسلسل لذكريات ابوخليل هو الاستفادة من كمية الدراما هذه فى عمل فنى.. نفس الكلام ينطبق على ذكريات العزيزة منى خوجلى وهى تراجيديا انسانية قبل ان تكون سياسية.. على الأقل حتى لايقال بأن الشركة الجديدة انصرافية فقط!

رب مبلغ (بالفتح اسم مفعول) أوعى من سامع!!!

بدون تنظير، قليلا من الذكريات..

صديقنا مبارك.... من الفاشر. بدأ الجامعة كوزا.. تعود اخوانه ايقاظه للفجر.. فى ليلة ما ساهر كثيرا مع الوست والكونكان حتى الثانية صباحا.. فى الرابعة جاءه جعفر.... لايقاظه كالعادة.. تناوم وقال بأنه سيلحق بالجماعة.. لف جعفر وجاءه مرة ثانية.. تناوم... فى الثالثة قال مبارك بلهجة الغرابة المحببة: هممم، شويعى.. بقيت شويعى من الليلة دى! ماتجينى تانى... وبالطبع لم يصبح شيوعيا لكنه بقى اسلاميا نص نص!

ْxxxx قالوا رئيسا.. صلاة النبى فوقو... عضت أضانى كديسة... صلاة النبى فوقو!

سمعنا بشكلة حامية الوطيس فى مدرسة العلوم الرياضية والتى كان عميدها ألذ دكتور ماث ود المكى. تصدر الشكلة دكتور آخر جاء حديثا من أمريكا. وسمعنا أن الشكلة انتهت بعضة فى الأضان...

قبل أن نتأكد من الإشاعة جاء الدكتور العاض ليحاضرنا وبدأ بشتيمة بالعربى ثم فتح بانجليزية شوارعية أكثرها أدبا الفائية الرباعية... ولم نفهم من المقصود نحن ام دكتور الشكلة ثم لم نفهم لغة امرئ القيس الانجليزية تلك... بعد قليل بنات لندن بدأن فى البكاء والخروج واحدة اثر أخرى، الدكتور قال من أراد الخروج فليخرج، فتبعهم حناكيش لندن بدون بكاءْْ. ظننا انهم ذهبوا لمواساة بناتهم.. بعد قليل لحق بهم بعض التفاتيح من الخناشير وأيضا ظننا فى الأمر مجاملة... وبقينا البقية الباقية حتى عدت المحاضرة بسلام.. عند الخروج تصدى لنا من انسحبوا كيف نرضى لأنفسنا بعد كل ذلك الشتم والردحى... اللذيذ الحضرى من مدنى بعد أن استوعب الأمر قال بأن أدبه الشديد لايساعده على فهم هكذا شتائم ولو كانت باللغة العربية دعك ان تكون بالانجليزية.. وهو لايفهم فى لغة الشوارع العربية ناهيك عن الانجليزية.. بل أبدى غضبه من أصحابه حناكيش لندن لأنهم يعرفون تلك اللغة ولا يدرى كيف يمكن ان يدخلهم بيته.

شكرا (waleed500) شكرا الصائم علي اندياح الذكريات المحببة للنفس حلوها ومرها طبعا جات الامتحانات بسرعة شديدة سقطت انا في مادة واحدة الرسم الهندسي كالعادة والسمستر التاني رسم هندسي ومادة وجات الملاحق المجزرة كانت كالفلوجة اتخيلو في كل القاعة ما تلقي زول تنقل منو ولا خط واحد والمملحقين كلهم في الرسم ميح كمال الشيخ اريج خالد شيخة جلي هل تصدقو كل من في القاعة سقط وربت او فصل .
الامتحان كان عن تجميع عامود الطوالي وكان عبارة عن قطع مبعثرة المهم انا ركبت العامود بالقلبة وكان باقي من زمن الامتحان خمسة دقائق واشرت لدكتور الطريفي بالحضور وقلت ليه يا دكتور الشغل ده صاح ولا غلط فقام قال لوكنت عاينت للعربيتك الصباح من تحت كان اشتغلت صاح قلت يا دكتور انا مربت هل معناها اترفدت قال لي طبعا .
اخذت اوراقي وانا خارج من القاعة نادني خالد شيخة وقال لي يا خليل شغلو كويس بنحج مش قلت ليه ايوة وطبعا كان شغال غلط وورقتي وسخانة وعرقان فيهاولسان حالي يقول لخالد شيخة سجم امك.
تم فصلنا ودسمستنا مع مجموعة طيبةكمال مرتضي خالد شيخة تم تربيت مصطفي بوب وهو الان دكتور في امريكا بمادة واحدة فقط وعليه اعادة السنة بكل المواد وعاطف جلي وزينب محمدسليمان وعبدالله اسحق مجزرة تماما.
غضبت زينب محمد سليمان وحاولت حرق سيارة دكتور التاج بل حملت له السكين المهم تم تهديتها وقالت لي دكتور التاج انا خليتك لكن ناس خليل حالفيين عليك

الاخوان سلام
والله زمان وزمان

والذكريات تتداعي زي المطر من خليل والصائم ..الواحد بقيف وبحي كل ذلك الجيل اللذيذ

وكل واحد منهم كان قصة يجب ان تروي

واذكر بعد مجزرة الدروينغ الشهيرة بتاعة التاج تشكلت في الكلية شلة ضخمة من المربتين

والدسمس وكان يطلق عليهم المخضرمين وكانوا عارفين اي حاجة في الجامعة الا الدروينغ كان عامل

ليهم عقدة وكانت هذه الشلة مرجع لاشياء كثيرة .البت السمحة ولو في سقط لقط بدوك خبرها

دخلت من ياتو مدرسة ومجكسة منو(خليل نموذجا) ..محللين كبار للانتخابات ومراجع في الاسئلة التي يتوقع ان

تجي السنة دي .وكانوا بعضهم يخلط بسهولة وماهر جدا في اصياد البرلومات

واخريين تشوفه قاشر كده تقول ده بتاع فيرست

ووطبعا تختلف الاسباب ولكن المصير واحد

واذكر في تانية التانيةكنا مساهرين مع طه النور بشرح لينا ماس وبعد داك نمنا ..وفي انصاص

الليالي صحينا ولقينا احد المخضرمين الذين كانو معنا في الشرح قاعد في وسط الاوضة

وقال ياجماعة انا ما قادر انوم لانو الماس ده جايط لي في راسي مرة يربط ومرة يفك....



ومواصلين حتي سنين انتفاضتي وشعار الكافات الثلاثة

كان نظام الدراسة بكلية الهندسة في فترة دراستنا ( نهاية السبعينات وبداية الثمانينات ) أن يقضي الطالب سنته الأولى الإعدادية بكلية العلوم ( Preliminary Year ) بعد النجاج فيها ينقل للسنة ( أولى هندسة ) حيث يدرس الطلاب هندسة ( General ) ليتم توزيعهم بنهاية هذه السنة للتخصصات المختلفة مدنية ، كهربائية ، ميكانيكية ، ----- الخ
ظهرت نتيجة إمتحان السنة الأولى هندسة وكان نتيجة زميلنا ( ------- ) الذي كان معروفاًبـــ ( الركلسة ) ومتابعة الحفلات أينما وجدت ، ملحق في مادة الهندسة الكهربائية ، وقبل أن يجلس لإمتحان الملحق ظهرت نتيجة توزيع الطلاب للتخصصات المختلفة . فتم توزيعه في قسم الهندسة المدنية شريطة إجتيازه لإمتحان ملحق الكهرباء .
جلس صاحبنا لملحق الكهرباء وكانت أسئلة الملحق شديدة الصعوبة ولم يستطع الإجابة ولا على سؤال واحد . نادى صاحبنا الأستاذ المراقب وكان أستاذ المادة نفسه . ودار بينهما الحوار كما يلي : -

الزميل : يا دكتور أنا وزعوني هندسة مدنية ، يعني تاني ما حا ألاقي الكهرباء دي كلو كلو وامتحان الملحق دا أصعب من الإمتحان الأنا سقطت فيهو ، فرجاء أشرح لى سؤال واحد أقدر ( أباسي ) بيهو .
الدكتور : آسف يا ابني ركز على الأسئلة وأنت تستطيع أن تجاوب بدون مساعدة .

مرت نصف ساعة وزميلنا لم يستطع أن يعرف أى إجابة لأى سؤال فنادى على الدكتور مرة أخرى ، ورأى في هذه المرة أن يستخدم لغة مختلفة .

الزميل : يا دكتور امتحانك دا is not fair
الدكتور : Look Mr ----- This is the exam paper in front of you , answer the questions or go to DEAN of the faculty
ظن زميلنا أن كلمة ( Dean ) التي وردت في إجابة الدكتور هي ( سب للدين ) فبادره
الزميل : يا دكتور امتحانك دا طاير في السما بس أوعك تسب لى الدين .

وترك الورقة في القاعة وخرج من الإمتحان وكانت النتيجة أن رسب في إمتحان الملحق وأعاد السنة مرة أخرى

الاعزاء

يبدو انني اليوم محتل البوست واليوم خميس ولاادري اين طفش ابو الخل

ولا اريد ان اقفز فوق الاحداث دون اشارة من ابوخليل عشان ما اكون خاشي في االلاين غلط( واصلي

عندي عقدة تاريخية مع صديقي اللاين)

وتعج الذاكرة بسيرة المخضرمين والناس ديل كانو درجات مخضرم 5 سنة وممكن تلقي الواحد8 سنوات

اشهرهم بالاطلاق اخونا جرائدالذي قيل انه دفعة العميد وتلقي ناس دفعة التيوترات وممكن تلقاهم

بخمسسوا سيجارة مع بعض

اما صديقنا خليل فكان يستقبل كل دفعة جديدة بالزهور والورد وتلقاهو اخر خلط مع الناس الجداد

وكان بذاكر معاهم وانا ما عارف هوبشرح ليهم ولا هم بشرحوا ليهو ..المهم تلقاهو اخر اندياح

وكان السوال (اسمع يا هنايا ما شفت لي خليل) انا ما عارف الناس دي عايزة شنو من الزول ده

ولنا عودة واظهر يا جاسوس

ياالله من الموقف يوم عصيب ذهبت للبيت حزينا مكتئبا فبادرني والدي رحمه الله وكان راجل حلو فقال لي هل تم فصلك فاجبت نعم فقال ولا يهمك انت طول عمرك الاول اذا اردت ان تواصل خارج السودان انا حاضر ما عايز تدرس علي كيفك نحن محتاجين ورغم عبارات التقوية النفسية فقد اظهر حزنا لانه كان يرتنم باغنية عود لينا يا ليل الفرح.
المهم الفصل فرصة طيبة لانك ممكن تنحج في عشرة مواد وتسقط مادتين وقعت معاي في جرح قلت يا ود يا خلي اسقط في مادتي الرسم الهندسي وانجح في الباقي .
كونا مجموعة عرفت بمجموعة ممبسا شطارة جد لان التكرار يعلم الشطار كل العشرة مواد حفظناها والله ما بنذاكر اي مسالة بنديك الاجابة مادة المساحة اتنين وسبعون صفحة حافظها حتي اليوم الكهرباء الماس علم المعادن اي حاجة في سنة تانية هندسة خليل كمال مرتصي عبدالله اسحق يفتوك.
طبعا ليس علينا حضور المحاضرات وتفرغنا للعب الكتشينة وكنا ندخل حتي مباريات الدرجة التانية جلاس العلمين ديم سلمان الصحافة.
وانا مفصول كنت عضو في كورال هنسة وكان في نشيد الجامعة في اسبوع المهندس وكنت في مقطع بقول امنا من حنانك اتروينا وكنت اردده وانا مفصول وكان يقود الكورال صديقي المايسترو الهادي الاصمز
برضو ما كان عندي مشكلة في الانسجام مع دفعة سبعة وتمانين كلهم اصحابي اصلو خليل زي شعب كل حكومة وكان معاهم حنكوشة شرط فقلت انا مربت معاكم ومفروض اجي القاعة للماضرات وبعد اسوع قابلتني في الكافتريا وقالت لي ليه ما جيت بجيم مش معطشة بجيم ما شربت موية قبل كدة فقلت بجي بجي بنفس الجيم المعطشة.
ولاول مرة نحج خليل في مادة الرسم الهندسي وكل مواد السمستر الاول وقد ابلغني الصديق عباي ياسين باني نجحت في الرسم بعد شاف النتيجة عند والده قبل ان تظهر فذهبت البركس وانا اغني وهزمنا الليل وهزمنا الليل
ونحجت السمستر التاني وذهبت للسنة تالتة ونحج كل المخضرمين ومن ديك وعيك شكرا عاطف ونواصل

يا خليل مبروك وانت تهزم الليل ليل الدروينغ الطول 3 سنين يا خ ده ليل الاسكيمو ما زيو

واما اخوك طبعا بعد ما القصة جرت كده والسنين راحت واه حسرتي

قلت ياولدهوي الحق روحك الموضوع ده جاري وممكن يوديك التوج وتبقي مخضرم رهيب

ففي ذات ليل وانا بصحبة اصدقائي القدامي(وليد فوكس..معاوية داود .وليد زكريا واخريين)

عملت موتمر صحفي واعلنت شعار المرحلة القادمة وهوشعار الكافات الثلاثة الشهير واذكر ان ذلك كان

بداية سمستر واذكر اني قدمت امامهم نقدي ذاتي لروحي(علي قولة اخواننا الشيوعيين)

ومارست جلد الذات وساهم معي الاصدقاء النقاش وابدا الملاحظات وفي نهاية الجلسة كشفت

الغطاء عن شعار المرحلة

وكان ( كفاية........كسر....كيس)

وشرحت مداخل المرحلة بانو كفاية تعني خلاص لحدي هنا مفروض اوقف المهزلة دي وانو والله

ده حرام عديل كده لزول اهلو راجينو يطلع مهندس ويجي هنا يتشرشح وفي النهاية يصبح مخضرم وفصيح

كمان

وانو الحل في الكسر وتجضيم المواد جضم جد بما فيهم حبيبنا الدروينغ العامل لينا فيها

اردب سمسم ده

اما الكاف الثالث فكان كافا اختياري هو ان اكيس لي واحدة عشان اروق المنقة شوية والقي

زولة تديني دفعة عاطفية تساهم في حل المعضلة دي(واذكر ان صديقي فوكس بعد داك كلو ما يلاقاني

ماشي مع واحدة فكان بقول لي كاف؟ فكنت بقول ليهو لا لا.وتقوم البت تقول لي كاف يعني شنو بقول

ليها لا الزول ده بهظر ساي)

بدا السمستر وكنا اخر نشاط وحماس واصرار حضور مميز كراسات منظمة .يا زول اخر خبرة في

حل المسائل اما الدروينغ (ود الكلب يا الدروينغ) فاكتشفت اخيرا بعض اسراره وقدرت اتعامل

مع الاسمبلي والفيوهات والمهم حسيت ان الشي ده ممكن يتباصر

وكانت هذه الروح تدب في الجميع ورايت ابو خليل بعد سنين طويلة في لكاشر الصباح

وراج سوقه واصبح احسن شريح في ال extension

وجاء الامتحان وعاد اليناالقنا القديم ودبت فينا ثقة عالية وجضمنا الامتحانات بكافة وخبرة

كبيرة
وعقدت موتمر قبل النتيجة واعلنت ان صحيح ان الموضوع انتهي وخلاص نو مور ربيت الا ان المعركة

لم تنهي بعد لانو الكلية دي ما فيها ضمان وقلت ان النصر الكبير يوم ان تتخرج وبفرست كمان

ولكن الحمد الله اتخارجنا وبسكند ابر

ولسع معاكم عشان اليوم الحار

ان شاء الله يابسام تتحق الأحلام... تظهر نتائج العام... وتكون من الناجحين...

هناك قصة ذاع صيتها... واحد نص نص تغالط مع ابو خليل فى مسألة فى السنة الثالثة او الرابعة هندسة مدنية... طبعا أبو خليل ماعدا الدروينغ راجل تفتيحة وذو أساس فى الماس لاتلين له قناة.. بعد مماحكات ومغالطات طلع أبو خليل على صواب والبرلوم الذى ظن نفسه أذكى لأنه لم يربت لم يصدق... أبو خليل ذكره بأن يرعى بقيده... وقال له انا ماربت لأنى بليدياطقطوق!

فعلا يا الصائم ابوخليل من الامخاخ الما حصلت وعبقرينو كمان

لولا حبيبه (الدروينغ) ماعندو اي عوجة

صـباح الخـير علي الجمال أينمـا كـنتم و'كـان'

لـو قلت ليكـم إنـه الوقت البقضـيه في قـراية ذكـرياتكم الشقية دي هـو مـن أصـدق وامتـع أوقـات يومي بتصـدقـوني?

والله جـد!

مـني

شكرا العزيزة مني ولك السلام وين ما انتى قاعدة

ونحن نجتر تلك الذكريات هنا نحس باننا ننحاز لزمن الصدق والقيم السمحة

واتمني ان يجد الاخريين مابينها ما يفيد علي تخطي المصاعب والتحليق الي واقع افضل

مافي زول في المنبر قال مبروك النجحتو ومشيتو تالتة ماهو كان لازم ننحج لانو نحن كنا شطار شطارة لمن انصقو منها زمان في الابتدائي استاذ عبد المجيد كان بقول خليل دة ذكائه سيقلته اجي احقروا بينا ناس زعيط ومعيط زي ما قال كمال شداد.
مجموعة ممبسا لذيذة كمال الشيخ عبقري زمانه كان محتاج شوية حظ مرتضي الطاهر انشغل مع الكيزان لكن عاد لرشده حجازي كان بعثي كبير وفصل وذهب العراق وجاء امتحن ونحج وكذلك الاصم وسيد الرايحة لكن في ناس الدخلت فيهم ما مرقت ربتو في تانية وفي تالته وفي رابعة واحيي ياسر ابصلعة وعاطف جلي وياسر شندي وعزالدين محمد وملك الملاحق هشام سفل وعكزيكة وكلوب ونادر وكل المناضلين الشرفاء في سجن كلية الهندسة.
الود مسكين اسمو عبدالله انشتاين شاطر لدرجة قف تامل اصغر مننا بسنتين ما لقي سكن جابو الغرفة سكن معانا قلت ليهو يا برلوم ما تسكن معانا هناالاوضة فيها مجال مغناطيسي بتاع تربيت فيه مثلث الموت خليل اسامة مجدزهير وفعلا الود بي شطارتو ربتو حاج الباقر بي مادة المساحة وكنت كل ما الاقيهو اغني ليهو نصحوك ابيت تسمع كلام وهدوك ابيت ما تنهدي.

الاخ خليل

ونحن في نشوة الانتصار بالنجاح لابد تخليد اولئك الجمع من المخضرمين الذين كانوا

شطار وماعندهم عوجة بس الاهمال وعدم الجدية في تناول الامر الاكاديمي و الانغماس وراء

مغريات الجامعة الكثيرة ..سياسة وعالم انت سيده ليس هناك رقيب

وايضا هناك من بارى الجكس طالع مع فلانة ونازل مع علانة ..واعرف ان بعضنا

كان international بمعني ان الناس في المحاضرات وتلقاهو خالط في الفرع او الاهلية

او حتي الاحفاد واذكر ان في ناس متتخصصين في بنات الاسلامية وعندهم كافتيريا

معينة بمشوا هناك للاندياح

اتتذكر اننا تناقشنا يوما في انو كل الناس المخضرمين ديل حصل ليهو ثقب نفسي نتيجة للحصل

ده اتفق معك لحدي ما ولكن تاكد ان النجاحات يمكن ان تذوب الفشل وتمحنك فرح حقيقي..

فالتحية لهولا الشباب اين ما كانو واني كلي ثقة بانهم ناجحين الان ومهندسين بارعين

واولهم انت ياخليل

طبعا كريمو كل ناس دفعتنا اتخرجو مافي زول ابي العشاء سبعة سنين تمانية ما فارقة المهم الان هم مهندسين كاملين الدسم

والان بعد ان تحررنا من الجهد الرهيب من سرد فترة السواد دي

الواحد زي عايز (حلوة زي عايز دي) المهم انا عايز ادش في جانب قد يروق لخليل

وهو دقة الكيزان الشهيرة وكردنتهم في مسجد الجامعة في الصباح...

ولكن قبل ما اواصل في انتظار

المايسترو خليل وقد يكون عنده راي ثاني


او احتمال يكون اتوالي وانا ما عندي خبر

سنواصل

يا كريم خلينا ماشين بالتسلسل اول مسرحية سقوط الباستيل تاني اعتصام ناس خالد شيخة تاني سونامي وفيضانات 88وتاني استشهاد بشير والتاية وتاني دقة الكيزان وتاني مقاطعة الامتحانات وتاني قصص الحب

هندسة دي عزيزة علي اي دة لعبتها

منو القال ليك تسيب الجية اي كدة لعبتها

يلا يا ابو خليل اوع تسيب الجية

يلا يا الصائم بلاش تسيب الجية

ومعاكم سنواصل

كما قال استاذنا ياسر عرمان بعد موت دكتور قرنق حتما ان لموت دكتور جون ما يليهي فحتما التربيت له ما يليه فناس دفعتنا مشوا سنة خامسة والسنة حايقبضو الماهية ونحن مازلنا تحت الوصاية الاسرية تمشي تاحد مصروفك زي شفع الروضة لكن الوجع كان انو صاحباتنا اتخرجو من علوم واداب وقانون واقتصاد وكل الكليات ذات الربع سنوات.
فقد بعض اصدقائي وجدانهم حيث تخرجت حبيباتهم وانفض سامر العلاقات العاطفية بينهم لان الجكس ما بقدرانتظر زول اربت سنتين وقالوا خلونا اصحاب وكنتو نعم الاخوان ومضي كل الي غايته.
طبعا الربيت ماكان في تانية بس برضو في ضرب قدام حيث انضم لينا في سنة تالتة بهاء الدين بخيت وعارف علي صالح وفاطمة النور والمخضرم عبد الرحمن خالد .
المهم اولاد دفعة سبعة وتمانين كراعن خضراء علينا معهم ضقنا طعم النجاح فلابد ان احيي احمد شبو والتجاني عبد القادر ومبارك واحمد محي الدين وكل الاحبة.
من الاحداث الجسام كان هجوم الكيزان علي نادي الاستاذة حيث كانت تعرض مسرحية سسقوط الباستيل في حضور السفير الفرنسي وقد احدث هذا ردود افعال عنيفة واخرجت السفارة الفرنسية بيان في ذلك الوقت.
وايضا اذكر اعتصام لجنة عدالة الفرص الجامية وهي ضد شهادة لندن وقد سرب لهم بعض الشباب بعض الاوراق من مكتب القبول بعض المستندات عن هذه الشهادة وكان هتافهم مميز(no london no paris u of k for sudanese) اعتصم هولاء في مكتب مدير الجامعة بروفسير تنقاري واضربوا عن الطعام ولكن الجوع كافر حيث كان بعض المتصمين يزوغ الصفرة ويمشي ياكل بالجاسوسية. وعندما كشف امرهم اتفق ان ينحصر ان ينحصر الاضراب عن الطعام لاعضاء اللجنة التنفذية فقط.
عدنا لاهلينا يوم الخميس الشهير في خريف تمانية وتمانين وبدات السماء تتمطر وتتمطر ستة ساعات متواصلة غرقت الخرطوم تماما بسونامي وكان ميكائيل يكيل بالكيل التقيل عدنا البركس يوم السبت هل تصدقو ان الناس كانو يتحركون بالمراكب داخل البركس كهرباء مقطوعة اكل مافي وجاء عبدالله محمد احمد وزير كل الحكومات وكان وزير كهرباء في حكومة الصادق لحل مشكلة انقطاع التيار بالجامعة ولكن خوفا من تفشي الامراض والملاريات قررت ادارة الجامعة اغلاقها لاجل غير مسمي

مادار في الباستيل كان تعبير حقيقي لموقف الكيزان وعداهم التاريخي للفن والابداع

وتضخم هذا الموقف واصبح موقف الدولة في زمن الانقاذ

انو ياخي الناس ديل فكوا ملتوف في اثناء العرض بتاع المسرحية

وده كان امتداد لحادث العجكو (الغريبة علمت لاحقا ان عبد الباسط سبدرات من الناس الكان

يرقصوا في العجكو دي)

ياخ انا كنت أظن سقوط الباستيل تعنى به احتلال مكتب مدير الجامعة بعد واحد من الاعتصامات، والتى تعددت..
إما فى حادثة حاج ماجد القانون واما فى حادثة لجنة بحث عدالة توزيع، خد نفس، الفرص الجامعية. وبالمناسبة هذا هو الاسم القانونى ياابو خليل ماتلخبط!.. المهم فى واحدة من هذه الاعتصامات دخلنا مكتب المدير.. اذكر كان نجم الدين أشتات يورد قصة اعتصام قديم تم فيه تعيين عبدالحليم الترابى مديرا وكوز آخر عميدا للطلاب... وماشابه.. المهم انا كنت أطالب بتعيينى مدير مكتب المدير ومتنازل عن منصب المدير للمتنافسين الكثر... صاحبنا حاتم محمدالمهدى الله يطراه بالخير من طب الأسنان ورئيس اتحاد المحايدين فيما بعد، وهو راجل دفعة من الابتدائى يعنى ماتقولو بنرمى الأسماء ساكت، حاتم ذكرنى بمسرحية المرحوم طيب الذكر الفاضل سعيد... كان حلم حاتم ان يرقص فى مكتب المدير... لا أذكر ماذا فعل حاتم لكن أظننى رقصت التويست فى مكاتب الادارة وأنا أهتف سونا حبيبتى سونا!!! كان ذلك فى 87... وهكذا سقط الباستيل!
فى نفس العام وربما نفس الاعتصام، كان البرالمة قد قضوا شهرا واحدا فقط وتم اغلاق الجامعة، كالعادة، لأجل غير مسمى.. سارت المظاهرات هادرة داخل البركس: ياالبرلوم كراعك شوم... اللذيذة قابلت الأخ حسام فى داخلية كردفان، وهو خريج حنتوب مثلك ياأبوخليل ويدرس فى الآداب.. كان متأثرا جدا برجوعه لأهله بعد شهر واحد وكان مقتنعا فعلا بأن كراعهم شوم.. سألنى هل هذه هى المرة الأولى التى تغلق فيها الجامعة لأجل غير مسمى منذ السبعينات.. طيبت بخاطره بأن ذلك يتكرر كل عام. الاستثناء الوحيد كان فى 86 والذى كان غريبا وتأدب فيه الكيزان جدا رغما عن تجميد عام دراسى للزراعة وفصل لجنة رابطتهاوكثير من الأحداث المستفزة بواسطة حكومة الصادق والتى - ربما - كانت ترغب فى اغلاق الجامعة لترتاح فى صخبهم.. الكيزان كانوا من جانبهم يرغبون فى الحفاظ على الجامعة مفتوحة للضعط على الحكومة وربما اسقاطها... 86 أظنها كانت سنة التعديلات الدستورية والتى كانت نيتها التضييق على الجبهة وفى الآخر مررت بعد تخفيفها...

الجامعة في تلك الايام كانت تعج بالنشاطات المختلفة ندوة سياسية

مناظرة..قراءت شعرية جلسات استماع لمصطفي سيد احمد

حفل بالجابري..سيد خليفة وفنان كده جانا من الكاريبي

وعمل جلسة في قاعات الاقتصاد

وكان بغني لبوب مارلي..واندهش عندما وجد معظم

الحضور حافظين اغاني بوب مارلي اكثر منه

وايضا امال النور.والجو الرطب .وشعر ودبادي

وحميد والخال شرحبيل احمد

ولي قصة مع مصطفي سيد احمد

اذكر ان زميلنا الرائع مصطفي ميرغني من اولاد

حنتبوب كان يبدو انه مكتشف مصطفي سيد احمد قبل زمن بعيد

وكان كل ليل بشغل مصطفي سيد احمد قبل النوم

وانا كنت يقول ليه ياخ ايه ياخي الزول القادينا

بيهو ده وكان بقول لي انت زول ماعند حس فني

حبة حبة بقينا نسمع مع مصطفي ميرغني حتي ادمنا

الاستماع اليه والفضل يرجع لودميرغني

اما علاقتي مع السياسة فاذكر انه جرت محاولات

لكوزنتي من احد اقربائي الذين كانوا فاينل وكوز ليه ضل

وقلت ليهو يا زول ارحم حالك انا جني وجن الترابي

بتاعكم ده

اما عن لجنة بحث عدالة توزيع الفرص الجامعية

تكونت عبر اجتهادات المخضرم انذاك خالد شيخة

واستطاع ان يحشد لها مجموعة كبيرة من الطلاب

والطالبات من مختلف الكليات(والمدير كان يوسف فضل ..يا خليل ما التنقاري)

وقاموا باعتصام شهير شهد تسريب للسندوشات الي

قاعة المعتصمين

وكان همها هو نصرة الشهادة السودانية..مقابل شهادة

لندن والشهادة العربية

واذكر ان التنظيمات السياسية حاولت

اختراق الناس ديل الا انهم فشلوا

لحظيا ولكن نجح الكيزان علي

المدي البعيد وجندوا موسس تلك

اللجنة خالد شيخة واصدر بيان عنوانه

(لو رايتم ما رايت) كان هذا عندما اراد التحول الي الكيزان

فكان السوال ماذا رايت يا ودشيخة؟

واخيرا اصبح امير للمجاهدين

ويقال انه ذهب الي الجنوب لكن

كب الزوقة من كوستي

وكمان مواصلين

هـنـدسـتو 'الخـروف الـضـحيـة' ولا لسـة?

مـني

ياهندسة

يااجدع فرقة

سلام

وكل سنة وانتو بالف خير

وعيدكم سعيد

رسلناه هناك للناس الطيبين العمات الخالات والجيران

عشان هنا ما عندو طعم ولو عملت ام مرارة ممكن يجيبوك في الجزيرة

ويبشعوا بيك

وانت طيبة يا نادية وكل الناس الطيبين

واولهم خالتي المصورة معاكي دي

شكرا مني ونادية وانتو الفيهم ربنا احقق اماني الجميع وينعاد عليكم بالرفاء والبنين.
ياسلام علي اسبوع المهندس بالكلية كان اقوي من معرض الخرطوم الدولي ويا سلام علي كورال الهندسة والانشطة الثقافية المصاحبة والمسرح بتاع ناس الود المبدع خليفتي الخير ادم وهو الان خلي الهندسة وبقي فنان كبير بقعد الجلاد ولابد انا احيي شعراء الكلية المهندس امين كان عندو قصيدة لسع بعد عشرين انا ما فهمتها بقول انا البوح والجرح والمهرجان وانتي اللغة والفاهم حاجة اتصل بعبد الكريم والشاعر المهندس الرقيق طارق حاج التوم ود بحري عندو قصيدة بقول.
ولانني وقفت بين بين بكيت مرتين
ولاني سكت حينما كان واجب الكلام لازما
رجعت نادما لا انتصرت لا انهزمت رجعت نادما
بالله شوف الشطارة دي لحدي هسع انا حافظ قصائدهم رغم ان راسي دقت عليه مليون طبلة.
كان ختام الاسبوع بالراحل المقيم مصطفي سيدا غني كما لم يغن من قبل.
وفي الاسبوع التاني كان الختام بالاستاذ محمد الامين وكانت الانقاذ في الوقت داك مولعة نار بيوت اشباح وامن جد فطالبناه ان يغني لاكتوبر فقام قال لينا اكتوبر ايه نحن في يناير ومن خاف سلم

الفردة ابو خليل

اولا عليك الله خش في البوست بتاع في عينيك دنيا غريبة

شوف عركي ده بسوي شنو

ابو خليل يا ملك الباصات الطويلة استلمت الباص علي

طريقة سانتو بتاع المريخ داك

والان نخش في الموضوع

اسبوع المهندس والله زمان طبعا كان مدهشا وحاجة عجبية

بالنسبة لينا

وادتنا صورة عن الحاجات المتوقع

تلاقينا قدام وشفنا ابداعات السناير

والناس القربو يبقو مهندسين

بس فضل ليهم خريف واحد

وكانوا ناقشين نقش شديد

وبشرحوا بثقة واقتدار

وكان الواحد بقول لروحه متين نبقي

زي الشفوت ديل

اما نحن المساحين فكانت فرصة لنا عشان

نكون فرصة عن المساحة

علي الاقل تقدر تقشر بيها شوية

يا زول جنس مصائب

حركة المد والجزر

وقياسات النجوم

والتصوير الجوي

وكلام عجيب وعرفنا حينها ان الغريق قدام

وكان الاسبوع مزار لكل طلاب الجامعة

وتهتم به الجمعية الهندسية

اهنمام بنوع خاص وتكون هناك حالة طواري في كل

الكلية

الدكاترة..العاملين

ناس اللابات

وايضا يزور الاسبوع طلاب وطالبات الجامعات

الاخري

والله ما وراك يوم يجونا ناس

الاحفاد طبعا كل واحد بحاول

يطلع من علبو واخر تالق

اما الجانب الثقافي فكان الموضوع

رائع جدا او كما قال ابو خليل

وفعلا القصيدة بتاعة امين دي

عاوزة كتلوج مع القصيدة

وايضا والحديث عن الشعراء

بالله ماتنسي ابوسمرة

وطه النور رغم انو شعرو ابو ضلفتين

غايتو جنس حسادة عليكم اسة ناس شهادة لندن ديل مالكم عليهم

والله انا عندي راي بس خائف اقولوا وبعدين ابو خليل

يزعل اصلو صاحبهم شديد وما بحمل فيهم (يا قلب)

شباب هندسه الحلوين سلامات
شكلكم كده انتو الناس اللى قالوا :
نحنا الكبار قاعدين كنب ..........اى امتحان بنقول صعب
ما فى امتحان ما شلنا صب .........و مشينا تالته بعد تعب

وانتو برضوا اللى قالوا ليكم زمااان:
يا مباصى فى البرليم ما تقول شميت النسيم ....بتقطع الغربى وهناك بتاكل نيم
شكرا على البوست اللذيذ

الاخوان
خليل واولاد هندسة
استمعت ببوستكم كتيرا واعرف الكثيرين ومنهم صديقي الوغد اللزيز

Quote: يسلام علي محمد الطيب سليم عندما كنا برالمة كان لا يعرف هندسة مساحة بالانجليزي فترجمهاحرفيا انه هو طالب في(faculty of arae) بدلا عن(surveying)

وهو زميل دراسة وصديق الي الان وما زال كما هو نكات وضحك وعندما اضيق اتصل به واضحك ملء شدقي له التحية
كزلك
طه النور(وهو دفعة اخي الاصغر)!
الرائع محمد متوكل
لكم التحية
احمد القاسم

شكرا احمد القاسم وكل سنة وانت بخير فاتني ان احيي فريق كرة السلة بالهندسة ناس بيض لكن لاعبين لعب ناس روبرت صخر واكرم دلالة وعباس ياسين ومعاهم ابوسمرة عشان اكف العين وكان ما اخاف من الكضب هشام المجمر جاء مرة لعب مع المنتخب لان الخريج ممكن العب سنتين

ألأخ خليل تحياتي

أكتب لي علي هذا العنوان

[email protected]

الاستاذ خليل

لم يبق شئ سوا الذاكرة

للذاكرة ظل حالة لا ظل الا ظلها

تشكل منا
ويسقط فينا

ظل منا والينا


حقا من اجمل الاشياء هي تلك الذاكرة المليئة بشئ من الحنين والشجن ,جميل ان نمارس النزيف فهو طهارة لجسد الذاكرة .


خليل انك تمارس عملية الاستفزاز .اجدني الان استضيف كم هائل من الخلان الذين حظينا بمعشرهم الجميل وحضورهم السمح .



إنهم يقراونك جيدا ولكنهم يستضيفون ليلاهم وانت الذي حرقت البخور واستحضرت الارواح .انت السبب يا خليل .

لك الشكر العظيم


وهيجتني الذكري

مجدي شبندر

يا اللللله ... جامعة الخرطوم ...
بصراحة انا اتكسرت في اتنين من الهندسة... الاول ما اشتغل بي الشغلة
والتاني شوكشني بعد 3 ايام من التعارف... من يوم داك تبت من اولاد الهندسة
(انشاء الله ابو الوليدات مايقرا البوست ده... واللا حايكون السبب بوست عن الهندسة برضو)

يا سلام اهم حاجة في السودان في ذلك الوقت هلال سبعة وتمانين وكونا رابطة مشجعي الهلال برئاسة المهندسة الانيقة بت الصحافة تماضر ونذهب للمعسكر الهلال في الفندق الكبير محملين بالفواكه ونلقي جمال الثعلب وتنقا ومنقا افكو الزنقة وحمد دفع الله والديبة حاجة عجيبة وجلاك كادوقلي واسامة وكندورة سيد الشورة وجمال كدوس والرائع يور والمدفعجي صبحي عبد المعز جبارة واهدافه في ليفنتس النجيجري وعلي الحسن مالك وهو يقول فلتخرجو في بورتسودان فلتجرجو في بورسودان انتصر هلال السودان ويور صدي ضربتين جزاء من كانون ياوندي وذهبنا المطار وحواء الطقطاقة تغني اليلله يا منقستووانت سيد الديسكو والكاميرون دستو ونواصل

يا سلام علي هلال 87 ده كان حاجة تاني

وده ياهو الهلال البعرفوا انا

ولعلك نسيت وليد طاشين الود الرهيف ا لحريف

هد زي السم ...واذكر الفاينل بتاع لاراش

ومنقة الذي اطرب الجميع وقدم محاضرة في

فنون ومهام لاعب الوسط ...ويا سلام علي

عمك علي حسن مالك وصف جد...

وهذه الفترة تعرفنا علي اصدقاء

من الجيل الجديد في حب الهلال والوطن والانسانية

شكرا يا(اسمارت انا2001)

ايوه الكلام ده كلو في محلو والله ما وداك غرب الميدان الغربي ده

من اجمل الهلالاب بالهندسة الود الشقي عمر حسين ومن اجمل المريخاب عبدالناصر وكنا نقيم اركان نقاش ومناكفات في الكلية والمريخ بقولو الهلال عدو الكووس فريق محلي بس يتاسد علي ناس التحرير وشمبات.
ونحن بنقول كاسات المجاعات دي كاسات واظنك كريم تذكر يوم الاربعاء ما كنا بنخش المحاضرات لانها بتاعة رياضيات وكنا بنعمل حاجة اسمها الاربعاء سهرة نغني في الكافتريا حتي مواعيد الغداء ما بنخلي فنان حتي اغاني البنات يا سلام ياخي ما ترجعونا تاني

اه من عمر حسين اللذيذ وكان من اولاد الصحافة

وكان مكنيكي ومتخصص في مداعبة اولاد مساحة

وطبعا المساحة دي حكايتها حكاية

لانو كان ممنوع قبول الطالبات فيها

وهناك نكتة بتقول حتي اولاد الخرطوم ممنوع

ولكن كان لنا اصدقاء ودفعة من اولاد الخرطوم

والحق يقال انهم اظهروا قابلية عالية

عشان يكونوا مساحين صحراوين

ساكوبة.عوض سعيد ..ووليد

ومحمد المتوكل ...عمر الصادق ,طارق عمر خالد..سيف اسكلايشي..اسامة قاسم

وطارق

طبعا دي يا ابوخليل خلطة بتاعة كم دفعة كده مع بعض

في ليل حالك اسود اسود وندوة هناك في النادي الجغرافي تربص الكوز القاتل فيصل حسن عمر بالشهيد الانيق بشير ود الغرب البسر القلب بين اقتصاد والاداب وفي ظلام دامس سدد له طعنة قاتلة واختفي مع ناس الانقاذ.
الجامعة صباح اليوم التالي غلت كالمرجل جزن كثيف طغي الجامعة زملائه وزميلاته يبكون كل الجامعة تبكي ولكن البكاء لا يفيد لابد من المواجهة لا بد من يعرفاالنظام اننا لسنا كقوم فرعون نسبح بحمده.
خرجت الجامعة عن بكرة ابيها وهي تهتف البشير بالبشير الجامعة تدين تجار الدين هتافات ومظاهرات بلغت السماء .
امر الترابي اجهزة الامن بالتدخل والاحتياطي المركزي كان مسالما والله حضرت ناس اشكالها غريبة ويلبسون زي الكيزان القمي اتفه بدلة سفاري واطلقو الرصاص عشوائيا قتلو التاية وسليم وابوبكر وعدد كبير من الجرحي اسف عبد الكريم هذه ذكريات مولمة استميحك عذرا ان تواصل

الله.......
مهما هم تأخروا فإنهم يأتون
من باب رام الله أو من جبل الزيتون
وغنى مصطفى سيداحمد كما لم يغن أحد!!

وبكيت مع طارق حاج التوم مرتين ووقفت بين بين... ورجعت القهقرى لأيام نديات مع رابطة بحري والكورسات الصيفية فى مدارس بحري.. وكورال المدرسة الصيفية يترنم نحن فى السودان نهوى اوطانا.. ويرتفع الصوت عند ديوم بحرى! طارق حاج التوم هذا لديه عم دكتور فى كلية التربية يدرس الرياضيات كتب قصيدة فى مؤتمر علمى عندما عاتبه أحد المشاركين على تربيع واحد من الثوابت (ثابت لاغرانج)، فاعتذر: ماكان للاغرانج أن يتربعا..ووو....وكنت أنت الأروعا

وكان هناك الصادق الرضى وكان شتلا ذا تسعة عشر ربيعا فتيا حييا.. يدندن بغناء العزلة ضد العزلة وكن أبيض.. كن أسود.. لا بل كن نفسك... يناجى دخان سجارة وأشياء أخرى..

العزيزالمهندس عبادة معاذ السراج كان مغرما ككل آل السراج بالعربية وكان يتحفنا يوميا لفترة بروائع فاروق جويدة (ام شوشة؟)... لا أعنى أحلى عشرين قصيدة غزل.. وفى نفس تلك الأيام خرج الكابلى بشريطه الرائع موشحا بنالت على يدها مالم تنله يدى.. والصورة بالألوان.. وكان فتحا كابليا!

وشئ من الذاتية... شاركت مع جمعية الثقافة والابداع فى الهندسة بمسابقة القصة القصيرة.. قدمت "مذكرات فتاة جامعية" وتم اختيارها لتفوز بالجائزة الأولى!! أعطتنى اللجنة كتاب "كيف تكتب الفصة القصيرة" وشيئا آخر.. كان ذلك الكتاب مثار تندر الأعزاء أحمد محمد الأمين وأنور محمداحمد الذين زعموا انه تلميح صريح بأن على أن أتعلم كيف تكتب القصة.. كانت قصتى اليتيمة - وهى أول وآخر قصة مكتملة أكتبها - مبنية على منولوج داخلى عن فتاة جامعية تسأل نفسها ان كانت ستتزوج ام تصير من البايركس!!!! أخبرنى من أصدقه ان عددا من الفتيات فى الداخلية تناقشن حولهاوتم تسجيل تساؤل من بعضهن ان كنت قد تلقيت مساعدة من الطابور الخامس حول ذلك البوح الصريح... الصادق!

كريم والصائم واصلو في احداث مقتل بشير وسليم والتاية لا استطيع ان اقود القافلة

الصائم ايها الزول الرائع

معقول غناء العزلة ضد العزلة الصادق الرضي ...ولو كان الامر بيدي لحفظتها لكل التلاميذ

في السودان لانو ده شعر مافي

زيو اثنين....

وياسلام علي اولاد بحري

.......................

بشير الطيب زول جميل وهو ود دفعتنا الاولي

يعني خشينا الجامعة معا

واذكر انهم كانوا ثلاثة

لايفترقون

العبيد من القانون

عثمان من هندسة كيمائية

وبشير الطيب اداب

جاءوا سويا الي الجامعة من

قلب كردفان

جاءوا وهم منحازين تماما لاهلهم ولكل الشعب البسيط

لم ينضم بشير لاي تنظيم الا انه كان يجهر بارائة

امام عتاولة الكيزان وسادة العنف الطلابي

حاج ماجد..وفيصل...وكان بشير صديقا واخا

حميما لتوفيق ..حاتم..غسان جعفر

وهولا كانو جبهة ديقراطية في الاداب

وكانوا ايضا كثيري التحرش بالكيزان

فكان هنالك بشير مدافعا عن اصدقائه

وقد كانوا يعلمون انه ليس جبهة ديقراطية

الا انه صار رمزا لتحالف الطلاب

وتصديهم لصلف

الدقن التحت الكاب

والافك رباط البوت

وقام بشير باعطاء فيصل هذا علقة ساخنة حتي هرب

فتولد تار مابين فيصل وبشير وجولات

من المشاجرات تنتهي دائما بتغلب بشير الطيب

زاده فيها شجاعته المهولة وحرارة قلبه

فقرر كوز الغدر والخيانة قتل بشير

مع سبق الاصرار والترصد

مات صديقي بشيير الطيب

ومات بشير الطيب بخنجر الانقاذ

مات بشير ودمه في رقبة قوي الهوس الديني في كل العالم

ابو خليل اوع تتذاوق جاي جاي

حتكون key person في عينك

انت ما قريت الكلام ده ولاشنو

Quote: ابو خليل ياملك السهل الممتنع حكاياتك شيقة ولطييييييييييييييييييييفة وذكرياتك حميمة واصل ونحنا متابعييييييييين للطيش يازول انت بس قول

ابو خليل تقلب المواجع بالدم بعدما قلبتها بالضحكات...
كان سليم أبوبكر دفعتنا فى بحرى الحكومية وكان رئيسا لجمعية التربية الاسلامية فيها يوما ما.. ثم اغتالته يد آثمة باسم الاسلام وباسم أشياء أخرى... رحمه الله
بدأت الأحداث بمقتل المرحوم بشير الطيب ... توفيق الطيب من أولاد بحري هو الآخر... لم يكن جبهة ديمقراطية فى كل ماأذكر... كان قياديا فى رابطة كلية الآداب.. غسان جعفر ذلك الرائع من مدنى.. بالصدفة سكنا غرفته سابقا فى أولى سنين الجامعة.. كان خطاطا ماهرا وآظنه كان يشارك فى كتابة مساء الخير للجبهة الديمقراطية... على جدران الغرفة التى ورثناها منه كان غسان يشخبط بخط هو آية فى الجمال جملا مثل: نزل المطر وبرد الجو ونط الحمل.. توقيع غسان جعفر... انا ذاهب ....الى الصفرة... توقيع غسان جعفر... اعتاد غسان على زيارتنا والتعرف علينا..

ليس فى هذه الرواية اية محاولة للتوثيق.. فقط على ايراد الجانب الشخصى منها تماما.. وقناعتى الشخصية ان فيصل هو القاتل رغم تبرئة المحكمة له...وليس ثمة مبرر البتة لاغتيال بشير الطيب وفجيعة أهله ووالديه فى التمتع برؤية فلذة كبدهما.. كان بشير فى خامسة آداب.. درجة الشرف التى لاينالها كثيرون... والحادثة خير مثال لغسيل الدماغ وفشل الاتجاهيين كحزب عقائدى متزمت..

فيصل حسن عمر، رحمه الله، من الدامر وثمة من قائل انه أخ لأمين حسن عمر... سكن معنا فى داخلية كردفان قريبا لأبى خليل... فيصل كان يساكن المرحوم مشعل ابراهيم خالد شقيق روحى وبلدياتى من السريحة الجزيرة ودرسنافى السريحة الابتدائية معا واختطف الموت مشعلا قبل التخرج بأيام.. وكان معهم أيضا البدرى عبدالله صاحبنا من بحرى الحكومية وكان مؤتمرجيا حينا من الدهر ويسكن الدروشاب.. فى يوم ما ترشح فيصل لانتخابات الرابطة وصوره الكيزان بالبدلة وكتبوا فى صحيفتهم بالكلية بالبنط العريض فيصل يصرح.. البدرى جاء الغرفة محتجا.. كيف يافيصل لا تصرح لنا نحن زملاءك فى الغرفة.. ثم اذا انت بالأهمية دى، بدل وتصريحات، ليه ما كلمتنا؟؟

أحزننى ان اعرف واحدا عزيزا على من الشهود أقسم على أن فيصل كان معه فى معهد البصريات وقت حدوث الجريمة... الاستاذ المحامى محمود على حسنين قاد فريق الاتهام وذكر ان ذلك الدفع القانونى يسمى فى الفقه الانجليزى "دفاع بومبيى" وهو الاستناد على تواجد المتهم فى مكان آخر.. وهو من أخطر الدفوعات اذا انهار لم يتبق للمتهم حجة.. كثيرا ما طاف ذلك القسم أمام المحكمة بذهنى وأنا أعرف ذلك الشاهد الكوز يبحث عن الشهادة فى الجنوب بحثا مضنيا معذبا... خرج منه باصابة قدم.. المرحوم فيصل استشهد فى الجنوب... غفر الله لبشير وأحسن لشبابه وألهم أهله الصبر وحسن العزاء... نسأل الله الغفران لفيصل فقد أفضى الى ماقدمت يداه.. كانت حادثة بشيرالطيب فى أواخر ديسمبر 89 او أوائل يناير 90.. أذكرها عندما علمت بالنبأ فى ليلة باردة والداخليات خلو من الطلاب الا قليلا.. خلفت وحشة قاسية أذكر طعمها حتى هذه اللحظة..

أما حادثة سليم والتاية فقد حدثت عندما اقتحم الاحتياطى المركزى الجامعة مثل التتار... كانت مواجهة حامية بين الطلاب والتتار... هربت من منطقة النشاط (سابقا غرب كلية الآداب) الى المين رود.. رأيت التتار داخلين.. تقهقرت باتجاه المكتبة.. سمعت صوت شئ يرتطم بالأشجار.. لا عاصم الا الله... بعضهم صرخ انه رصاص مطاطى.. كانت تلك المفردة شائعة من الانتفاضة الفلسطينية.. وتحيرت ما الفرق؟.. هتف آخرون انه فشنك وآخرون انه رصاص حى... كنت أميز الصوت العالى على انه فشنك.. عندما سمعت صوتا مختلفامازال مثل الصفير فى أذنى علمت ان الأمر جد... قررت الجرى الى المكتبة المين.. كان المدخل الرئيسى بعيدا والمنطقة مكشوفة... قررت الدخول من ناحية أمين المكتبة... فى تلك اللحظة رأيت طالبا ينزف فى دمه محمولا بين اليدين والجميع يهتفون انه يموت.. رأيت الدم يطفر من بطنه مثل شئ يغلى واللون أحمر.. حدثتنى نفسى ان أوان الهرب قد ولى.. مددت يدى لأحمل مع الحاملين... والله حتى الآن لا أذكر ماذا حدث... وجدتنى أجرى لمدخل المكتب والمكتبة.. كان هناك من التتار من اتخذ الوضع "راقدا" وسلاحه منتصب على الأرض ناحية المكتبة.. وبعض التتار يهتفون اخرجوهم كلهم والا ضربنا النار... هل حمل التتار الطالب النازف؟ هل أصر الآخرون على الا يسلموه احدا غيرهم؟ هل كانت هناك سيارة أدخلوه فيها؟ هل تكاثرت الأيادى الممدودة؟... دخلت مكتب أمين المكتبة... نظر الينا مايعنى انه يعلم... معى اثنان ثلاثة... أغلقنا الباب وظننا اننا ارتحنا من التتار.. سمعنا طرقا عاليا بالدبشك على باب المكتبة فى الطابق الأرضى والذى كان نادرا ما يفتح.. كانت مكتبة التجانى الماحى ام السودان لا أذكر.. كانت مخصصة للدراسات العليا فيما أظن... خاف أمين المكتبة ان يكسر التتار الباب خرج اليهم.. هذه مكتبة.. صرخوا اخرجوا كل من فيها... فى هذه الاثناء دخل بعض التتار من المدخل الرئيسى فى الطابق الثانى وقد عرفوه بعد مطاردتهم للطلاب اذ المعلوم ان مدخل المكتبة المين من الألغاز التى يحتار فيها البرالمة شهرين بعد دخولهم وقد قيل ان الكثيرين من البرالمة مكثوا ساعات عدة يدورون حول الطابق الأرضى بحثا عن مدخل المكتبة المين.. وبدأ التتار فى اخراج الطلاب والطالبات تحت السلاح.. سمعنا بكاء وصراخا.. جاءت الهمسات.. لقد مات عدد من الطلاب... كم؟ من؟ أين؟.... خرجنا من مكتب أمين المكتبة وبقية الطلاب من المكتبة وأيدينا على رؤوسنا.. حتى نفق شارع الجامعة.. كان التتار يضحكون ويضربون بعض الطلاب بالدبشك...

مرة ثانية هذه الرواية ليست توثيقا لكل الأحداث.. انها منظور شخصى ذاتى فقط وكفى به توثيقا!

ياسلام يا الصائم ياخي.....

I am also waiting to read Khalil's version,

Thanks el Sayim and Kareem

Muna

وصلنا الان سادتي الي مقتل طالب الاداب

صديقنا بشير الطيب وتبعه موت التاية وسليم

واداء ذلك الي تولد الغضب والغبن

في قلوب الطلاب تجاه الكيزان

الذين كانو يعاملون الطلاب بكل

صلف وغرور مسنودين بناس الامن

الذي كانوا في اوج سطوتهم

وطغيانهم ....

ولكن علي من هذا

وكانت السلطة تعي جيدا خطورة

طلاب الخرطوم ودورهم في

محاربة الطواغيت

اكتوبر ..مارس ..ابريل

ونحي هنا المهندس عمر الدقير

الذي كان يصغي اليه حتي الشجر الجامعة لمن

يتكلم..

كما قلنا تولد الغبن لدي الطلاب

وترجمو ذلك في اول انتخابات

بعد داك وسقطوا الكيزان

في ملحمة رائعة سميناها (السيك)

وذلك لهزيمة الكيزان في 13

كلية ..

وايضا وصل الي الجامعة جيل جديد من

البرالمة الذين عذبوا وضاقوا من الناس

ديل في المسعكرات..

وتواترت الاحداث حتي غلط الكيزان

غلطة العمر وقاموا باحتلال مكاتب الاتحاد

عقب حل جمعية القران الكريم

واحتلوا النشاط واعلنوه منطقة عمليات

ممنوع الاقتراب اوالتصوير

وعندها اعلن الجنرال حاتم رئيس الاتحاد

ضرورة تحرير الجامعة

وبعد داك تعا ل شوف الكبع الما كبع

لاول مرة اشوف لي زول ينط 4 متر مرة واحدة

(حاج ماجد ) احد امراء الكيزان الكبار

فقد تسلط عليه بعض البرالمة المدربين

وشارك كل طلاب وطالبات الجامعة

الشرفاء في المعركة

وقاموا بطرد الكيزان علي طريقة كابتن ماجد

وهرب الكيزان تاركين السيخ بتاعهم

اجل هرب اصلب العناصر لاصلب

المواقف


ومواصلين لحدي احداث مسجد البركس

مع الصباح
............................................

وخش يا خليل في اللاين عليك الله

هناك حدث مهم جدا فات علينا كاد ان يحول الجامعة لمجزرة حيث اتهمت جريدة حزب الامة الدباب سابقا ناجي وهو كوز ابولستك بسرقة الزيت وكان هذا هو عنوان المانشيت الرئيس في الجريدة حاول الكيزان تمزيق الجريدة اتي ناس حزب الامة بسيوفهم وكانت معركة كرري ان تطل مرة اخري امام اعيني واتي الشيوعيين مدجيين لحماية جريدتهم واتي الكيزان بالسيخ وحاجات غريبة كدي احتقن الامر تماما وتلبدت الغيوم.
ولكن كانت هناك مبادرة خارطة الطريق وشكلت لجنة من انصار السنة لراب الصدع بين الفرقاء حيث توصلت بان يسحب ناس حزب الامة هذا الخبر من الجريدة في صباح اليوم التالي ومرت بسلام جوار القائم كما يقول الرشيد بدوي عبيد

ناجي ده من اولاد حلة جنب الحاج عبدالله

وحسي تبع الترابي

وممكن فعلا تسميوه دباب سابق

في ام المعارك حصلت حاجات لذيذة الحنكوشة غادة بتتفرج علي الضرب بين الكيزان والشباب وبتتكلم مع الحنكوشة سعاد(realy ya suaad first time in my life isee civil war).
وبعدين الضرب مدور في الميدان الغربي تواجه العملاق هشام توفيق من الكيزان وانا كنت مسمسميهو شوارسكوف بتاع حرب العراق مع هشام جاد الله وهم اصحاب جدا توفيق كانت تاتيه الحجارة من كل جانب وكان ينفضها بيديه فقط وكان جنبو جادالله فالكوز ضرب جادالله بالسخة حتي سقط علي الارض وجادالله علي الارض قام قال لي توفيق والله العظيم تاني ما اخليك تنقل مني

بمناسبة اللعب مان تو مان

مع الكيزان

اذكر ان وليد زكريا

عندو كوز معين كده من سنة ثانية كل

ما وليد يلاقي الزول ده كان وليد

طوالي بفتح في الزول ده دق شديد

حتي ولو بدون سبب بس غبينة ساكت

والكلام ده استمر لحدي ما وليد

اتخرج من الجامعة

واذكر اننا حجزناهم

زي 100 مرة كدة

في ياخي ابوضفيرة كان جنو الرقم تلتاشر يقول ليك السنة فيها كم شهر تقول ليهو اتناشر يقول ليك زائد واحد تلتاشر سبحان الله فمرة كان عامل ركن نقاش وبحكي عن قصة اعتقاله داخل جهاز الامن فقال اعتقلت وحقق مع الضابظ وظل يضرني وانا اقول احد احد ولما اشتد علي الضرب لكمت الضابط حتي قال واي فقلت له لماذا تقول واي وانا اوحد

والله يا ابو خليل العاجنبي فيك

انك بتفتح مدارك الحوار

يا ود انت حسين خوجلي ولا فيصل القاسم
.....................................................

ابو ضفيرة فعلا ظاهرة تستحق

الوقوف عندها ...

طبعا هو زول شاطر جدا

ويقال انه كان في بعثة في فرنسا

وقال انه قطعها عشان يحارب الجمهوريين

ويقال انه له مواقف مع الدالي

وطبعا احنا ما حضرنا الجمهوريين

ديل في الجامعة

وطبعا ابوضفيرة باني الشغل بتاعوا علي الرقم
13
وعندوا حسابات عجيبة المهم بدخل ليك الرقم

13 ده في كمequation ويوريك يوم القيامة متين

ومن نكاته انه قال في احد اركانه

ان القصر الجمهووري 13 حرفا وهو لنا

وكنا بنحضر واحد من اركانه

وقال عدو نفسكم وفعلا عدينا

ووجدنا انفسنا 12

وقال زائد شخصي نكون ثلاث عشر

وكان بعمل ندوات واركان نقاش لذيذة

خلاص

نخش علي الدكتور مامون حميدة وتصفية السكن والاعاشة والاكل البقي بالتذاكر ولا نخليها بعد العيد يا اخوانا

ضروري قبل ما خليل

يجرنا لمضوع مامون حميدة

والاكل البقوا لينا زي ركوب الباصات لمدني

بالتذاكر

اشطب سريع سريع موضوع

احبابي الكيزان عشان الحكي (حلوة الحكي دي)

يكون مع حجل بالرجل
.....................
بعد ان تم طرد الكيزان من الجامعة

تمركزوا في مسجد الجامعة

ويقال انهم تعرضوا لمحاسبة من التنظيم

وفي كيزان كبار كده

جو وقاعدين يبكوا

وكيف الله قدر الطلاب الصعاليك ديل

يدقوا اهل الجنة

المهم تمركز الطلاب في البركس

وكانوا اخر استعداد

شجاعة وملتوف ويقظة

وقبل صلاة الصبح جاء نفر من الكيزان

كتيبة كاملة بدعوي الصلاة في مسجد البركس

وكان الطلاب مراقبنهم قبل دخولهم المسجد

المهم

بعد الصلاة اراد الطلاب الفتك بالكيزان

وكان حتكون مجزرة رهيبة لولا تدخل انصار السنة

كحمائم سلام وتم الاتفاق علي خروج الكيزان

من البركس علي ان يجمع كل كوز السيخة

بتاعتو وقد كان

لهم التحية كل اولئك الشجعان

وين ما هم قاعدين

المهم اخدنا جزء من حقنا(سمبا هارت)

ياخي نسينا اهم زول الدكتور حاتم المهدي رئيس اتحاد مركب ماكينة رئيس جمهورية الود ده قاد اتحاد المحايدين في احلك الظروف بقول كل سنة وانتي طيب.
وبعدين احيي الموتمرجي الكبير ود القرشي والذي قال قولته المشهورة الكيزان ديل بفوقو سوء الظن لانه غسل ملابسه بصابون(fa)

ايضا نحي ود الهندسة في اتحاد المحايدين عبد الفتاح الحبيب

والتحية للاخت بت الكيمائية مني ولود السكول اسامة رامبو

وحيوا معي المبدع ود الهندسة والمساحة الخير

القاعد يمتع الجمهور في عقد الجلاد والهيلا هوبا

كل سنة وانتم طيبين

التهاني لكل الناس

والتهاني بالعيد لكل المهندسين في العالم

والمهندسين في السودان

وخصوصا المهندسين خريجين كلية الهندسة والمعمار

جامعة الخرطوم

معليش عائز اهني اصحابي في الكليات التانية عادل عبدالجليل وعبدالله جنجا وعصام جبرالله وتوفيق الطيب ونادر ابكدوك وطارق الجميعابي ونادر عباس وامجد علي رجب ود عبود وشموس وخالد مناع وياسر ابراهيم واشرف عبد الكرينم ومحمد المرضي وعبد السلام وقدورة واحيي الزميلات ناس ندي وزلفي الاسد وسهام المجمر ومها الحضري واماني حسن ومريم عبد الحميد ومي عبد الرحمن العبيد واميرة عبدالستار واماني جلال ومنار بشري وسارة ولدن ونجاد هلال وهنادي والمهندسة سهاد واجفان زكريا وسلافة وهالة التجاني ومبارك الصائغ وكل المهندسين.
امل ان اصافحهم فردا فردا واقول تري هل يعود ذاك الزمن
وكل سنة وجميع بالف عافية

والله يا ابو الخل اديتنا فرصة

انو الواحد يترس منك ...

وانا ايضا اهني اصدقائي

بالهندسة والكليات الاخري

طه النور... ابوسمرة..الدسوقي

احمد تيجاني..محمد بدوي بانقا

اسامة احمد عبدالله ووليدزكريا وليد فوكس والصادق فيصل

ومعاوية ودكوستي والي روح اصدقائي (عمر فلاشا..عادل عمر..وابراهيم بيتا)


الي جمال احمد النور

واخوه جلال والي عباس شبشة وناجي ومزمل ومحمد حسن ابو الروس وميرغني كجنكي

ومحمد الطيب سليم وهاشم ود سنار وسيف تنقا وصالح العربي

وحنان محمود واريج وسهير وبكنام سعيد

ورباح الصادق المهدي

وكل اولاد المساحة

وفي القانون احي صديقي الجميل عثمان النعيم والعبيد واحمد محمد

الحاج والدكتور احمد عثمان

وفي الاقتصاد احي ابراهيم باخت وفرح بله وجنجا ودانيال والصادق محمد عثمان

وانور امدوم

ومعاوية ابو شنب

وناس الاداب الحلويين

عبدالله مصطفي وذاكر وعبده حسن وتوفيق

وفي الاسكول احي عمار يس وعثمان الطيب الريح اولاد دفعتي في النيل الابيض ومعاهم ابوالطيب

وتحية خاصة لامين سيد مختار واحمد العبيد(اداب) ومعاويةمحي واخوه اسحاق وكل اولاد الدويم

الحلويين....

واحي ناس طب الحلويين واولهم المبدع ابكر ادم اسماعيل


لهم جميعا ولكل ذلك الجيل كل سنة وانتو طييبين

up, again happy Eid

muna

لاد من الاشادة باتحاد المحايدين في تلك الفترة قاعد الجامعة في احلك الظروف كانت الجامعة اشعاع ثقافيا ورياضيا جابه ملفات كبيرة مثل تصفية السكن والاعاشة ومقاطعة الامتحاناتز
نحن في سنة رابعة كان هناك رحلة تدربية لفرنسا وكانت الموارد شحيحة وكان في صندوق اسمه التكافل الاجتماعي ويراسه دكتور ابراهيم عبيدالله اخذت خطاب من الاتحاد والجميعية الهندسية وذهبت اليه اشاد الرجل بالفكرة وخلاص عائز اتبرع كان جنبو واحد كوز قمي همس اليه في اذنه بان الاتحاد الان بالجامعة ليس في قبضة الاتجاه الاسلامي .
فجاة وفي لحظات غير الرجل رايه وقال لي معليش يا ابني القروش العندي عائز ابقي بيها الناس احياء لحدي شهر عشرة.
غضبت غضبا شديدا وقلت ليهو انت قائل روحك ........
ارغد الرجل وازبد وقال امسكو الزنديق ده والله لو ما مرقني كرعي كان الكتلني ما انعرف ونواصل

ياللا مـزيـد مـن التـوثيق..بوسـت عنـد وقـع خـاص..منتظـرين المـزيـد..

مـني

Quote: ارغد الرجل وازبد وقال امسكو الزنديق ده والله لو ما مرقني كرعي كان الكتلني ما انعرف ونواصل

انت يا ابو خليل ذاتك تستاهل البوديك ذاتك لجنس ديل شنو....

...............................................................زز
وبداء الحديث يتسرب تحت تحت كده بانوا الحكومة

حتلغي السكن والاعاشة

عشان هذه موائد خضراء

بها ما لذ وطاب

او كما قال يونس ديك الصباح

في احد خطبه الصباحية

...,بلا ابوخليل السكن والاعاشة والاكل ابو تكيت...

خلينا من الاكل هسع رايك في ندوة الترابي لما قال التحية لاتحادطلاب جامعة الخرطوم اما بعد وبعدعشرون عاما التقي السيدان رجل اتي من غرب السودان ورجل اتي من شرق السودان اراد الهيمنة هاهها واني فرعون حينما تفرعن في مصر وكلام كتير كدي.
وتذكر جوزيف لاقو لما جاء وعمل ندوة وهتف الطلاب له عميل عميل يا لاقو فبكي الرجل وقال انا اميل انا اميل

الندوة يا ابو خليل كانت

في الميدان الشرقي..واظن بخصوص التعديلات الدستورية

وفيها فتح نيران فعلا في السيدين..وبيني وبيك

اتالق وتحدث بطريقته الشهيرة ديك وعمل جنس عمايل

مسكين اهلنا قالوا(ما بموت بريشوا الا جداد الوادي)

حسي ركب التونسية خلاص......

ماشفتي ود الزين الكان وحيد امه ماليلها كان العين
قالولو ناسك وين وريناعشان تسلم
عودو خاتي الشق ما قال وحاتك طق وما وقف بين بين لي موتو اتقدم
والفات وليدو صغير ما مسكو الكراس ماسمعوبتكلم.
نعم كان هناك التمازج الرهيب بين اسر شهداء تمانية وعشرين رمضان وطلاب جامعةالخرطوم راينا نفيسة المليك شامخة كنخيل بلادي راينا الثكالي والارامل صامدين صابرين لان ابناءهم ابطال ملئو السودان عرقا ودما اعدمو بليل واقبرو بالبلدوزر في المرخيات.
هتفنا لكل عصابة مجلس قيادة الثورة الديكوري وهتفنا ضد المجلس الاربعيني الحاكم.
كان ذلك في الذكري السنوية لشهداء رمضان وقد حاصر الامن الجامعة ومنع المظاهرة من الخروج

اجل كنا في ليلة تابيين الشهدا

ال28 الابطال الذين تم اغتيالهم

في شهر رمضان...واذكر

ان طه النور قراء شعر كما لم يقراء

من قبل

وقال....

نحن قبيل شن قلنا

قلنا الطير بياكلنا

طيرنا عساكر

بيض وفقس فوق الدقن الدنسو مكدس

كيف معتوه يحكمنا

كيف مهووس يحكمنا


التحية هنا يا خليل لكل اولئك

الابطال

كل اسرهم اطفالهم

اسرة الشهيد مصطفي خوجلي

الزول القلبو نار

واكرم يوسف وبشير ابوديك

وكل اولئك الابطال

الاخت صباح...

واولا كل سنة وانتي طيبة

ثانيا مرحب بيكي في اليوست

والله ده شرف انك هنا ...

ووانشاء الله البوست يكون عجبك وخليل ده زول لذيذ وكلامو طاعم....

وعليكي الله الله خلينا من الكلام بتاع المشاكل ده..علي الاقل خليك احسن مني انا

.....ويلا عيدي وانت كلك خير وعافية

كريم وصباح لو سمحتو ابعدو من البوست بتاعي والقرف بتاعة السياسة السودانية بلاش تدخليهو البوست بتاعي

بعدين ياكريم مقابضتك البتسويها برة دي ما تعملها في البوست

حاضرين يا ابو خليل انت تامر

خلاص ذاتو بطلنا المقابضة بره بره

تحياتي للأخوين خليل وعبد الكريم
نفحتني أختي لنا بهذا البوست لأفرفش حسب تعبيرها، فقد انقطعت عن عالم المنبر الحر زمانا طال وما عدت حتى أقلب الصفحات.. هذا البوست يحكي بصدق وبمحبة سنين عشناها ربما نسينا بعضها وكان التذكير..
لم أكمل بعد، ويظهر أن هذا البوست قد لا ينتهي حتى مع أوان التخرج.. فشكرا لتلك الأقلام..
أحببت هنا أن أدخل للحديث عن يوم مقتل سليم والتاية، بعد الغدر الآثم ببشير.. أيام الإنقاذ السوداء الكالحة، والرصاص الذي كان يملأ طرقات الجامعة.. والدماء كانت تسيل بين أرجلنا، والحنق بلغ مرجلا لا يوصف.
أسبوع المهندس بعدها كان صادقا تماما، وضعت فيه الحقب التاريخية المتعاقبة للسودان، وآخرها ظلام الإنقاذ وشعار القراصنة، وعلى عينك يا تاجر (الأمن)..
أذكر كان بقربي يوم المجزرة الشهيرة برلوم كان صديق لأخي صدّيق في الثانوي - نزار جعفر عبد الباسط- وكان ذووالقماءة يلاحقوننا في طرقات الجامعة بالرصاص الحي ونرى الدم يسيل باعيننا، كنا في الممر الخلفي بين الاقتصاد والهندسة لو كنت أذكر جيدا- مجموعة ملأها الغبن وفجأة نظر نزار للدم على الأرض- دم بعض زملائناتحت سماء جامعة الخرطوم- وبكى بحرقة تاكلا وجهه على الشجرة ويده على كتفي، لا أنسى تلك اللحظات أبدا.. لا أنسى عجزنا جميعنا عن التعبير بالغل والذل والظلم والدين إزاء الدماء البريئة التي سالت. وقد كانت تلك الحادثة بمثابة نقلة لي مع البرلوم (نزار) فقد واجهت وجهه الادمي الحقيقي بعد مناكفات متبادلة..
والمناكفات راجعة إلى أنه كان في الدفعة بتاعة 86 وكان في مدرسة المؤتمر الثانوية صديقا لأخي صديق، وحينما نجحت في الشهادة الثانوية ودخلت الجامعة طلب مني صديق أن اعطيه كراساتي لصاحبه الذي سيمتحن رياضيات فلقطت كل كراساتي وأعطيتها له.. ثم مرت الأيام ودخلت الجامعة وككثير من البرالمة لم أكن أواظب على حضور المحاضرات، ولما فوجئنا بامتحانات آخر السنة علمنا أن هذا ليس إلا ترجمة للإنجليزية للرياضيات التي درسناها في الثانوي كما تفضل الأخوان، وكان ذلك في سنة 86 وبعد انتهاء امتحانات الشهادة حينما طلبت من صديق أن يرجع لي كراساتي من صديقه فصار يماطل ولم يرجعها أبدا، ثم أنه اجتاز الامتحان ودخل الهندسة ولاقيته مع صديق أخي الذي كان حينها قد دخل كلية العلوم (أحياء) ولومته على عدم إرجاعه لكراساتي وقلت له أنه دخل الجامعة بفضلي وكنا نهذر فقال لي: كراسات بتاعة شنو وانتي دايرة بيها شنو كلها رسم وشعر ما فيها ولا حاجة يقولوا عليها تدخل جامعة ولا تباصي في امتحان، وبعدين أنا لومت البرلوم جدا واعتبرته ناكر جميل وأقرع ونزهي.. وكان هذا كل ما بيننا حتى يوم سليم والتاية..
كان يوما مؤلما بحق..
ولو كان من فضل وحيد لذكريات الأخ خليل التي تفضل بها علينا (وهي مليئة بأفضال كثيرة لا تحصى) فهي انها استرجعت وجه العسكر القاتم ووثقته عبر الزمان، ولو كنا نوثق هكذا في كل حين لدمعاتنا ودمائنا التي انسكبت ولقلوبنا التي دقت بعنف، وللنضالات ولكل القماءات لكنا هزمناهم بالثقافة وبالذاكرة..
إنني أحيي ذاكرتك الصافية يا أخي، وأحيي تلك الأيام..
أحببت فقط أن أداخل - وأنا بعد لم أكمل المشوار..
رباح

عبد الكريم (كيكي) أيها الاخ الرائع

معاك عمار يس النور (مستخدماإشتراك شقيقي ياسر يس ) و ذكريات جامعة الخرطوم و نسيم الدويم و بخت الرضا حيث تزاملنا و كنت أميرنا في ذلك الزمن الجميل ...

انا متابع هذا البوست الجميل و الذي أحفظ ذكرياته جيدا يوم بيوم ،
مداخلتي لكم عن المفارقات في لغة الفرنجة للبرالمة و عاوز أتذكر معاكم حادثتين الاولي للأخ محمد الطيب الملقب بمحمد Mohammed Area و ذلك لانه عرف نفسه في حفلة ما ايام البرلمة بأخوكم محمد الطيب Faculty of Area طبعا هو كان يقصد Faculty of Surveying .
و الحادثة الثانية للأخ العزيز المتواجد الان في ابو ظبي هاشم كونصـايدر بتاع الكهرباء و لو بتتذكروا في الايام الاولى لسنة البرلم جاء الاخ هاشم و هو مسطح في لكشر ما و كاتب ليه لسته كبيره من الكلمات و هو كان مشهور بترجمة اي كلمة حتى كلمة was المهم أخونا هاشم جاء كاتب ليه كمية كبيرة من الكلمات و من بينها كلمة Consider و قال يا جماعة كلمة كونصـايدر دي معناها شنو ! و إلى الآن يلقب بهاشم كونصـايدر

تحياتي للجميع و خاصة للشقيقك بتاع الآداب

عمار يس النور ( عاشق بخت الرضا)
مدرسة العلوم الرياضية - دفعة 1985

يا خليل و كريم والصايم والجميع
كل عام وانتم بخير
لولا تحايا خليل لما تدخلت فى البوست كى لا افسد تداعيه بى شترة هنا و لا هناك باقى اخوكم "مهبوش" شوية

نوع الونسة دى الواحد مفروض يستمع/يقراها ليها بس،
الا شايف الخمسة الشهيرة عفصتوها ساكت يا ناس الهندسة دى "لا بتنسي لا بنمحى" زى ما غنى مصطفى.... و كمان عاوزين تضاربو بعد داك يا بلاعات
الزمن كان عجيب،افتكر انحنا من اكتر الفترات حظ لاننا عشنا زمن كان معقول، او اخر الدفع المنعمة، لما اسمع بمعاناة الجو بعدنا بتشيب الراس

المهم ما اقدكم واصلوا الحكى وانحنا علينا بالاستمتاع، يا خليل كرمة ده لو واصل المقابضة شوتو برة طوالى حيبوظ علينا الونسة، كرمة حدد موقفك: ونسة و لا سياسة
بعد شيل الحال الحصل هنا فى التربيتات و غيرا حمدت الله انو خليل ما عارف التاريخ الاكاديمى بتاعى وغيرو فى الجامعة
فتناكم عافية

عصام جبرالله وينك ياخ حليلك

وحليل اركانك الدكينا ليها ذي كم (لكشر كده)

وحليلكم يا السكرتيرات وحليل غلبكم الكان بسر البال

وياخي مالك محرش خليل ده لانو ده زول لمن يحرشوا يقاتل

وبعدين ياعصام ما تنوم علي العسل لانو عرفت تحت تحت كده

انو خليل حيكتب عن المربتين من الاخوة السكرتيرات

وامسكوا الخشب

وعشانك انت بس ح ابطل المقابضة بره بره


بس نشوفك...هنا

وحتكون ونسة في كافتيريا اقتصاد اللذيذ

ولا اقول ليك اعزمك ليمون في البزينز وح اجيب معي مجتبي محسي ووليد ابوعاقلة وحامد الصاوي


الخمسة بتاعتكم الفرمالة دي بخليها لخليل اصلوا هو سيدالبوست

وانا عندي كرت اصفر يا زول حسي خليل كمان يقول دي سياسة

ودارت دورة الايام ونحن مع الزمن اغراب
شربنا دموعنا ما روينا
حملنا الشوق ملانة غذاب
وقلنا نجرب الصحراء
جنينا تعبنا كلو عذاب
العزيز عصام جبرالله والله من يوم الرحيل لاشوفتك السمحة التقت لا شوقي قال للدمعة لا
افتقدناك كثيرا وافتقدنا كافتريا اقتصاد وذكريات ازمة السجاير في كشك الكافتريا وامسيات كافتريا اقتصاد وعبدالحليم حافظ يغني زي الهوي.
افتقدنا عادل عبدالجليل وكمال الغالي وطارق مصطفي ورحاب عابدون وجمعية اقتصاد والكورال ومعاوية السمين ورقصته الشهيرة في حفلات اقتصاد.
وافقتدنا بناتكم السمحات ديلك ناس مها زكريا ومنار وعفراء وكل حسان اقتصاد. واركان عبداللطيف ومناكفاته مع الكيزان.
اما موضوع الخمسة اهداف والهزيمة الساحقة فقد ذكرته في اول مقال في هذا البوست ونحن زي ما عارف ما بنبصق علي التاريخ.
اخي عصام عش موفور الصحة والعافية مع تحياتي لاسرتك الكريمة

ونواصل اليوم الحار مع ابو خليل

والواحد بعد ده بعمل حسابو وبمشي جنب الحيطة وبلاش سياسة

والحديث الليلة

عندما قرر الكيزان قفل مسجد البركس امام صلاة الجمعة

وقالوا الداير يصلي الجمعة يجي مسجد الجامعة(قم)

عشان يسمع الخطبة الكبري والتحليل بتاع محمد طه الاسبوعي

والما عاجبوا يشوف ليهو جامع في بحري او بري

المهم صلاة جمعة مافي جوه البركس

تصدي لهذا القرار مجموعة من الطلاب

وتصدي ذلك ابوضفيرة بتاع الرقم 13

وقام الكيزان بسجنه وتربيطه داخل المسجد

وهنا ثار الطلاب وماج الجميع وجاء ناس من

الجبهة الديقراطية وقالوا يا زول احنا ذاتنا عاوزين نصلي

في الجامع ده..

المهم تم تحرير المسجد

وطرد اخواننا الطيبين

ولكن بيت الكيزان النية وزي قرروا

ياخدو التار من الشيوعين

وحددو للناس بتاعينهم غرفة معينة وقالوا ليهم امشوا

الاوضة دي اي زول فيها دقو...

ولكن الجماعة دخلوا اوضة بالغلط وكان فيها اخونا وود دفعتنا

معتز نائم وهو زول ماعندو شغلة بالسياسة ولا حاجة

وقاموا دقوا دق شديد وبحقد عالي

لك التحية معتز بكان ما انت قاعد

إزيـكم

مـني

في معارك طلاب الجامعة مع السلطة احتل الامن الجامعة تماما واخلاها من الطلاب وبينماانا متخارج مريت بالمين الرود كان في برالمة عايزين اتخارجو فجاة دخل عبر بوابة المين رود امنجيةعضلات تبش عبارة عن مارينز صاحو فينا افيقوا يا....... بالفاظ نابية ورشاشات قلت اليلة يا ابو الخل امانة ما وقع راجل ليك ستة سنين خدمة في الجامعة ويقبضوك مع البرالمة ديل.
المهم اخرجونا عبر البوابة الخلفية للجامعة عبر المكتبة واجلسونا في شارع النيل كاسري طالبان في انتظار السيارة لتقلنا لمقر جهاز الامن.
كان حارسنا واحد ضابظ كوز لابس سفاري تافهة تفاهة ومن عيونه يتطاير الشرر.
فجاة ظهر صديقي عصام الشوش وكان بعرف الضابط ده لمحني الشوش وغمز لي .
المهم الشوش سلم علي الضابط وكان الضابط ظهره علينا .
انا بحركة طفولية وطبعا شارع كله اشجار حبوت بين الاشجار والعربات وعندما صرت علي بعد عشرة امتار من البرالمة اطلقت ساقي للريح عبر النفق.
ودخلت مسجد الجامعة والكيزان كان بصلو الضهر.
المهم بدون وضوء ونفسي قائم خشيت معاهم في صلاة الضهر
بعد الصلاة في واحد جنبي عرفني هارب من العدالة قال لي ما تسوو المظاهرات وتجو تتدسو هنا.
قلت يا خلي الزول ده بجيب ليك هبايب اتخارجت من مسجد الجامعة ومشيت النفق الثاني ومواصلات بري وناس عمتي امنة وجرية تفوت ولا حد اموت

ذكريات جميلة جدا يا خليل

وسرد ممتع


بالرغم من أنني لم أدرس في السودان

شكرا نهال كرار
ولازم تحكي لينا عن ذكرياتك ومعانتك في الدراسة بالخارج

ححكي ليكم عن ذكريات دراسة أخواتي في السودان

وحكايات هندسة وطب والبرلمة المروا بيها

سأعود

في انتظارك استاذة نهال

Quote: قلت يا خلي الزول ده بجيب ليك هبايب اتخارجت من مسجد الجامعة ومشيت النفق الثاني ومواصلات بري وناس عمتي امنة وجرية تفوت ولا حد اموت

خليل يا حركة فتح ذاتها..قلت لي فتح صاح

.......................................

اذكر لخليل جرية اخري وبكل اسف انا كنت معاهو

اذكر ان هنالك حفلة للجابري في الاداب

وبعد الحفلة قام الكيزان بقبقبة واحد

من العازفين بتاعين الجابري

لانو كان طاشم طشمة شديدة

وقبضه الكيزان وقالوا الزول ده لازم نوديه

القسم

ونحن كنا بالقرب من هذا الموقف

عندها زعلنا زعل شديد

وقام خليل وقال ليهم انت قايلين روحكم (....) بتاع الجامعة

وعندها ظهرت كتيبة من الكيزان وعيونهم حمر وشايليين سيخ كبار خلاص

وهجموا في ناحيتنا ...وما اشوف ليك الا خليل قام فاتح

وانا معاهو جرينا جري شديدلحدي البركس

عمر الحبر حفيد الشيخ الكباشي راجل لذيذ ملك ملوك المربتين كل مشاكلو في سنة رابعة وغناي جدا دائما كان بغني لي اغنية عركي قولها لي الكلمة دي قولها لو نفرح شوية واغنية الامين عبد الغفار شوقنا راح من غير ارادتو.
يوم الجامعة فيها مشاكل جد والامن لافي وهو جالس مع مجموعة بالمغرب امام داخلية تهراقا لقي شباب راكبين في سيارة الامن وهو ما عارفهم افتكر انو القصة فيها برنامج قام قال ليهم شباب علي وين ماشين عرس ولا شنو وركب معاهم.
الراجل لقي روحه داخل جهاز الامن.
الضابط قال ليهو اسمك منو قال ليه عمر الحبر.
طيب يا عمر اقرا لينا سورة الكافرون.
لم يجاوب عمر. الضابط قال ليهو شكلك غتيت حزبك شنو طيب وعمر ساكت .قام الضابط جاب حديد شكلها زي القلم لكنها مشرشره وادخلها وسط شعر عمر وخلع الشعر في منتصف راسه والصباح اطلق صراحه اضطر عمر لحلاقة راسه صلعة.
وصارت نكتة شباب علي وين ما تسوقنا معاكم

بمناسبة عمر الحبر
تحصل على قبول للدراسة بالخارج. رفضت السفارة ان تمنحه الفيزا. صار مولانا وذهب الى العمرة وكان دعاؤه اللهم ان كان في سفري خير فيسره لي وان لم يكن فيه خير فاجعله خيرا ويسره لي.

بمناسبة حادثة عصام الشوش وهو قريبنا باللفة. خالد صبار كان برلوما واعتقل بواسطة الأمن أظنه في نفس الحادثة مع خليل. أمسك بقلبه وبلهجة مصرية في دمه: ألبي ألبي... بتاع الأمن لم يصدق التمثيلية وقال له مش انت برضه بتاع وحدة طلابية أوية? ألبك كان وين لما كنت تهتف?
بعد تلك الحادثة زادت صحبة خالد والشوش وجميع طلاب الشهادات العربية. خالد صبار كان يزورنا في ترهاقا ووعدنا بجردل طحنية من مصنعهم. ثم اكتشفنا انه يسكن الحاج يوسف ولا يملكون أى مصنع..

ياسلام علي عمر الحبر

من اجمل الاصوات التي استمعت اليها في الغناء والمديح

وصوته به تون عالي شديد التوهج

وهو ود صوفية وتقابة وعالي التهذيب

وانا ما عارف يا خليل ليه اولاد الشيوخ دائما غنايين

كده ليه؟

الحبر جده الشيخ الكباشي صاحب القصة الشهيرة حينما زاره شيوخ وقالو الكباشي ما بطلع الزكاة.
الكباشي اكتشفهم بالحاسة السادسة فناداهم شيخ شيخ تعال يا فلان اقرا الفاتحة
اتخيل الشيخ ما قدر.
تعال يا شيخ فلان اقرا الاخلاص وفشل وكذلك التالت والرابع
وكانت المدحة الشهيرة التي يمدحها لنا عمر الحبر
حكاية العلماء العنده نزلو يقطعو قالو مالو ما بزلو
الفصيح منهم نترو وهزرو عدمو السورة من الطريق
جيتا فوق جبلو ها بقيت قبلو
الكباشي القيدو فيي شبلو
عشان كدة عمر الحبر صوتو حلو
وقع ليك ولا اعيدو ليك ونواصل

...

ابو الخل اش لونك

السوال الاول

رتب الاتي اسماهم تصاعديا اوتنازليا علي كيفك

حسب مواهبهم في شي تعرفه انت جيد

وكل واحد عليك الله ادينا بريف عن الستايل بتاعو

الكج,عباس شبشة,كمال الشيخ,ناجي خيرين,خليل

المرحوم عمر فلاشا,كيكي,طه العب,سيف سكلاتشي

وشكرا

ويـن ياشـباب مشـتو?

مـني

والله يا كريم جبت لينا كلام
عبدالماجد الرشيد ( الكج) ولد لذيذ من الثورة دخل الهندسة من خور عمر شاطر جدا لكنه اهمل كثيرا وكان دكتور حاج الباقر بقول ليه يا ولدي ابوك كان راجل (serious) مالك انت طلعت كدة
احسن زول بلعب كتشينة وعندو مقولة مشهورة ان(اس الاتو في الثورة عندهم ما بياكل) مرة عمل شكلة في المواصلات العامة مع راجل كبير فقام قال للراجل يا عمي انا طالب محترم في كلية غردون.
كمال الشيخ يا سلام زميل كفاح اتخرج معاي بعد ادي سنين خدمة الزامية في تانية مرة كنا لاعبين كتشينة فجاء سيف اسكتلاشي لعب زميله وكمال ما عايز يلعب معاهو لان سيف حمام كبير في الوست فقال يا سيف قوم مني بدونا سيك سيف قال ليه لو ادونا سيك تاني ما بلعب كله كله
قام كمال قال ليهو
انشاء الله ادونا سيك.

عباش شبشة جانا من جامعة الجزيرة درس بها تلاتة سنين والتحق بالهندسة عشان كدة جاء مفتح وحريف في الكتشينة واصلو اولاد القري حرفاء لانو هناك ما عندهم شغلة غير الكتشينة والراديو.
ناجي مش بطال لكن شوية ملفهم فانا كنت بقول ليهو والله يا ناجي لو كنت ساكن الرياض كان فتنا ليك الجامعة
طه النور شاطر جدا كان بغشنا العب معانا كتشينة وامشي البيت اقرا عشان كدة قام فكانا في الفرقة له قصه حب فاشلة مع بت شندي ديك

سلام شباب
تبادلت الاتصالات مع حاتم الجد وحمد حماد... وسلامهم لكم خليل وكريم وعبركم للجميع..

مما يحكيه هؤلاء الشباب هو قصص حدثت لكم ياخليل فى سنة البرليم ثم بعدها مع طه وسناء جميل!! ويحيى محمدين...
يحيى زار أهل سناء وهم يبكون على وداع أختها الى السعودية.. أراد أن يجاملهم دمعا بدمع.. تذكر امتحان الطريفى فى الاستركشر الذى جلبطه قبل ساعتين! وهاك يادموع وعبرات ونفنفة.. وكل يبكى على ليلاه...

طه لا يمكن ان أحكى حكاويه الا بايراد المعادلات والرموز الكيميائية.. وكانت فى معمل الكيمياء للبرليم... وكان عليه وسناء استلام العينة من حامض الكبريتيتك.. انتهى به الأمر الى الانفجار ضاحكا واندفق الحامض على الأرض وكادت تحدث كارثة... لقد حذرهم التيوتر ثم حذرته سناء بأن الحامض volatile ويمكنه التسامى للجهاز التنفسى... طه ذهبت به الكلمات الى جهاز آخر... مسكين فقد ربط الكبريتيك بالكبرتوك.. والعهدة على الراوى!

وكانت هناك رحلة مصر التدريبية وكثيرون كانوا يظنونها للترفيه والفسحة ومآرب أخرى.. وآخر الاهتمامات هو التدريب نفسه.. واحد من الظرفاء لم يزر مدنى ولكنه سمع أنها المدينة السودانية الأولى ترفيها... كان يتحسر على المصاريف المطلوبة ويضع خططه وبرامجه لمصر آخر الليل مع مجموعة ممن يشاركونه الاهتمامات فقال لهم: يااخوانا التلتلة شنو؟ مادام مدنى دى مليانة ترفيه، ناس الهندسة ديل مايودونا مدنى وخلاص...

up

اتكلم عن اليلة عن علاقات الحب والغرام مع ان معظم علاقات الحب انتهت ان اصبح الناس خلينا اصحاب احسن

توجدت بعض العلاقات بالزواج فصديقي ابوسمرة اقتحم قلب حسناء القانون وتزوجا زواجا سعيدا ناجحا.
وكذلك الود الانيق معاوية لبيرو فريق القدم تزوجت بقريبته المهندسة فلانة وكنت اشجع معاوية في الكورة واقول ياخي كلامك هادي ولعبك هادي وحبك هادي.

وهناك كان زفاف عاشقين بعد فرقة وكانت دائما تحضرني اغنية رجعنالك عشان ناحت سواقينا وبكت شتلات قحمنا وذلك بزواج صديقي ظافر عبده ومحمد محمود بتاع مدرسة من حبهم السابق
اما الشواكيش فلا تحصي ولا تعد بدا بحيي محمدين وعبادة السراج واحمد محي الدين وطه العب
ومنتصر الشاطر ولوي نمر وعباس الباوقة وعبد الفتاح الحبيب كل هولاء باعهم الهوي ومشو لسكة عدم

غايتوالذكرتهم ديل اصحابي اتمني ما ازعلو فهذه مجرد ذكريات بحلوها ومرها

شكرا الصائم

والتحايا النواضر (التحايا النواضر دي مترسها من واحد لذيذ كده اسمو تروتسكي)

التحايا عبرك للاصدقا ودالجد وحمد حماد

وحليل يحي حمدين وطه النور وتحياتي لسناء

اما حمدحماد(كوسو) فالزول ده من اذكي الناس الذين

لاقيتهم في حياتي وما باقي لي ح الاقي زيو تاني.....

ماس وعلم زي السم ومخ يحير الكمبيوتر ذاتو

واذكر عندما اتينا برالمة عمل الاتحاد حفلة استقبال للطلاب الجدد

وقاموا بتكريم اوائل الشهادة السودانية وكان من الهندسة

حمد وصديق ابو الاكس وعثمان ومعتز

لاحظ ان هذه الدفعة كانت خطيرة كيف

اوائل في دفعة وفصل واحد

واذكر ان في الاحتفال مجلة الجامعة

جابت حمد في الغلاف وهو يستلم جائزته

ومن ديك صار اسمه كوسو( كوسو اختصار لاتحاد طلاب جامعة الخرطوم)

هوي يا جماعة خليل خشة في الموضوع

والفيلم شكلو كده بداء

انا الحب ما بعرف اخبارو لكن الشواكيش عندي فيها اخبار واخبار

واشهر شاكوش ولا زلت احس به رغم انه ادوه لزول تاني

وهوصديقي الفنان طه النور

ومن تداعياته

اذكر اخي الاكبر وكان معنا في الجامعة ايضا وصديق لطه ايضا

اتي الي في الداخلية وهو حزين جدا وقال (انت طه ده المات ليهو منو)

قلت ليه ليي

قال (لقيت الزول ده قاعد في ميدان ابو جنزير وهو يبكي وشكلوا عجيب كده)

فقلت له طه الليلة اتشاكل مع(..........) وخلوا بعض ....


وكانت لطه مقولة شهيرة (هو احنا زاتنا البودينا نريد بنات العرب ديل شنو ذاتو)

نعم اشطر ناس ديل في دفعتنا اول السودان كانت الدكتورة انتصار اتخيل ناس الطب ربتوها سنة ما نحن برانا البلداء وتاني السودان افتكر كان صديقي ابوعبيدة رحمة الله وكان في معمار وبرضو ربتوهو سنة لمقاطعته الامتحانات في الازمة الشهيرة وهو الان مهندس كبير في سلطنة عمان تالت السودانى نسيتو اما الروابع اخطر اتنين واشطر ناس حمد حماد النحيف الرهيف وزنو كان اربعة واربعين كيلو ووزن مخو اربعةواربعين طن اخر عهدي به كان في دبي واخباره مقطوعة عني
اما عثمان يوسف الخطير ترك الهندسة ودرس بكلية العلوم عملا بنصيحة بروفسير عبدالله الطيب الجامعة اداب وعلوم وما سواها حرف ومهن.
طبعا عثمان حير اوربا كلها الطليان والهولندين كان عايزين اعملو ليها تمثال ربنا يحفظه.
كان صديق ابواللقز تامن السودان وهو ادخل مصلح حلويين حاب وكان منتشر بين اوساط الطلاب
درس كهرباء ولكنه كان مشغولا بالبتاع داك
معتز الفحل التاسع شطارة في هدوء ووقار دفعتنا لكن فارقناهو فريق الطريفي لجملو
صديقي خالد البيلي كان العاشر في اقتصاد وجهه طفولي واظنه واصل تفوقه في اقتصاد

صديق ابو اللقز... بالله عليك هذا هو الاسم الصحيح؟ اسمعها أحيانا أبو اللكس، لكن الشهادة لله كنت أظنها وأنطقها أبو النكس فى بادئ الأمر...
قالوا مرة كان هنالك تيك هوم اكزام من عشرة مسائل.. واجتمع الشباب فى غرفة... كلما حمد حماد يحل مسألة، صديق أبو اللكس يقلب الهوبة...

سمعت من هشام نجم الدين، معنا هنا، أن أغرب مصادفة كانت التقاء طه النور وصديق ابو اللكس فى سجن بالسعودية بعد الكشة.. كلاهما كان يحمل تأشيرة عمل كراعى... طه النور كان يحمل جواز سفر تشاديا وتم ترحيله الى تشاد... قابلناه بعد عودته من تشاد وماجاورها... سألناه ان كانت توجد فرصة لمن يريد المغامرة فى تلك النواحى... ذكر انه غرب من تشاد الى كل الدول الأفريقية حتى الكاميرون والخليج الأطلسى.... تخلف مريع ودول خارج التاريخ والحضارة.... نصحنا بألا نحاول الهجرة الا اذا كنا نريد التلتلة لانهم حتى ذلك الوقت لا يوظفون المهندسين...قال ان تشاد كلها كان بها شارع مسفلت واحد من المطار الى القصر الجمهورى... والخبز التورتة فى تشاد يستوردونه من فرنسا...

بالمناسبة حمد حماد الآن فى تورونتو كندا بمنحة دراسية للماجستير والدكتوراة... ياالله... والله فرحت له أكثر من أى شخص آخر... كثيرا ما كنت أتحسر على عبقريته الضائعة.. لكن أن تأتى متأخرا خير من الا تأتى أبدا... أظنه يقرأ هذا الكلام معنا الآن...

صديق كان فردة لأمين بابكر من الوابورات بحري... الله، أمين بابكر رجل نبيل حليم كريم خلوق معتق... تزوج هو وعثمان يوسف شقيقتى المهندس أمير صالح عوض الله صالح فيما سمعت.. وكلهم من بحري الحنينة... وكانت لنا أيام فى قلبى ذكراها... عثمان يوسف كان له أخوان دخلا فى العشرة الأوائل للشهادة السودانية هانى يوسف وهيثم يوسف.. لولا أننى أشك فى فهمى ذلك الحين وحتى الآن، فقد رأيت فى دار عثمان يوسف شهادة من لجنة جائزة نوبل لوالده يوسف عثمان بوصفه عضوا فى واحد من فرق البحث تابع لمنظمة الصحة العالمية أو ماشابهها.. لوكنت صحفيا لحققت فى الأمر.. ياحبذا لو أفادنا عثمان يوسف أو زهير يوسف المعمارى ولد دفعتنا بالمزيد من التفاصيل اذا قرأوا هذا الكلام.. زهير يوسف هو أبلد زول أو ثانى أبلد زول فى الأسرة ودخل المعمار بدون أن يدخل فى العشرة الأوائل...

سلام للجميع وكل سنة وانتو طيبين

يا سلام علي الذكريات الجميلة في الجامعة

بس حبيت أطمنكم انو الرسم الهندسي إتغير أخيراً وشالو حاجات الميكانيكا العجيبة ديك منو
(علي الأقل لي ناس المدنية)

بس ليه ما كتبتو أغاني التشجيع كاملة (قصدي الممكن يتكتب منها طبعاً)

شكرا ابو الخلد
اوعدك بكتابة كل اغنيات التشجيع بعد عرضها علي لجنة المصنفات الادبية
تحياتي الصائم وسلم علي ناس امريكا وقول ليهم راجعين ليكم

طبعا لما جينا كان اغنيات التشجيع كالاتي
اوعك يتلعب بالمهندس وانت لعبو كيف
وكان لعبت بيغلبوك ويبهدلوك ومن الجامعة يدسمسوك

واليوم الحار ما بندار يوم الهندسة والمعار
اووه اووه

دفعتنا شوية بدات تهبط بالتشجيع فكانت

ووب علي انا ووب علي كان ما عرستو المغص علي

لقيتو جنب اللاب وانا ووب علي
سالت منو حباب قالو في الاداب وانا ما دايرها

وتاني
كانت مهندسين لعبو اليلا لا حاشو ما اتغلبو

وواحدة تانية

اقتصاد القاعدة برة قاعدة لي انا للمضرة
يا حمادة اديها جرة
وشيلها من الدوري برة

واسكول ضواحي السنتر
كلية اوضة وعنبر
الدومة قالو رئيسها
عضت اضاني كديسة

وللطب كانت
داية وعاجبني ترن ترن داية وعاجبني
وعندما يمر الجكس اثناء التشجيع
تضج المدرجات
الجاز وصل اوووه الجازوصل
وعندما يضحك الجكس من المشاغلة
ترد المدرجات
الجاز فصل الجاز فصل
ونواصل

ما تنسي يا ابو الخل

هندسة دي صعيبة علي اي كده لعبتها

منو القال ليك تسيب الجية ايي كده لعبتها
.............

وما تنسي
لمن بنات هندسة يجو جنب المدرج بتاع هندسة

الناس كانوا بيقولو الجاز جازنا ونستاهلو ونحن اهلو

up

والله الجامعة كانت فيها بنات حلوات حلاة ووفي واحدة في علوم اسمها سلمي الروسية امها من روسيا حلا وحمار وابوها سوداني
قدر ما حاولت اصاحبها اسلم عليها ما لقيت طريقة
كنت كلما اشوفها اتذكر قصيدة ود المامور
ايه اللمة وادي النيل وواشطنون وشال من طينن التنين
وخلقك انتي ياسوزان

والنيل عند الدلتا لما حب اميل
دي بس سوزان
بس سوزي لما تميل تخلي عقولنا في طيشان
وبرضو لما تجي ماشة في المين الرود
اغني ليها
ليه يا سلمي ياظالمة

بعدين في سالي بتاعة اداب اتزوجت دكتور مشهور في الجامعة بت من بنات هوليود

مرة كان في محاضرة بالعصر في الهندسة وبعدين وصلت باب المين الرود وسالي نزلوها من العربية
وتصادفنا عند البوابة اتخيلو قطعنا كل المين الرود والظريفة دخلت قاعة محاضراتهم وحضرت محاضرة اداب في امانة الله.

اما الحنكوشات ده عالم تاني
دكتور يوسف فضل ابو التاريخ بنتو دكتورة صفاء ما بتعرف عربي كويس تخيلو قرت اول سورة يس ب(yes)

مرة سالوها ساكنة وين يا صفاء فاجبت

(في بري just under the kubri)

وسنة يا انا ونواصل

الاخ خليل

الاخوة المتداخليين

سلامات وكل سنة وانتو طيبين

انا كثيرة المرور على البوست شحيحة المشاركة

بس والحق لله ذكريات جميلة ايام كانت جامعة الخرطوم جميلة

واتمنى ان يستمر هذا البوست وان تكون الهندسة والمعمار مدخل لجميع ذكريات

كل المتداخلين .

بس يا خليل ما كملت لينا قصة الشواكيش شايفة جماعة كدا عاوزيين يهربوا

(عفوا للمزح)


انتصار

عارف ياخليل

انا راجة سنةخامسة

قعدتو تضيعوا في الزمن في الكورة والحاجات التانية

المهم سنة خامسة بسرعة

احكي وقصايد الحلمنتيش الحلوة

حقيقي زكرياتكم حلوة

تسلموا

اخشى عليكم (الهامرز)

إنتـو بتتكـلمـوا عـن شـواكيش الناس..يللا ماتخجـلوا كلمـونـا عـن الشـواكيش الأخـدتـوهـا انتو..
كـعادتي في مكانكـم هـذا... أسـتمتع واضـحك وانـا أقـرأ صـوت سـردكـم..

مـني

منى انت دايرة تورطينا.. مافى خجل.. من أول يوم خليل كتب عن انهيار الجامعة وقد ظنها لن تنهار!
أكيد ما يجمع الشواكيش ان نصف البنات تزوجن والنصف الآخر بايركس.. فى داعى للاحراج؟ وبمناسبة هذه الأنصاص.. صديقنا الصادق، ألذ من مر على الهندسة الكهربائية، ذات مرة غسل ملابسه وقال انه لم يتبق له الا ما يلبسه على جلده.. قال لو جاء الحرامية وسرقوا غسيله فى الداخلية، فستكون نكبته كبيرة جدا لأنهم سيسرقون نصف ملابسه من حبل الغسيل.. النصف الأخر هو ما يلبسه!

أعتذر مقدما ان سببت كلماتى حرجا لأى كان ففيها ناس أعزاء... كان أصدقائى يرشحوننا لبعض فى الجامعة.. فى يوم خطوبتها ولم أعلم، ذهبت لحلتنا السريحة فى الجزيرة... بالليل رأيت مركوبا عند صديقى نادر وأعجبنى، تركت شبطى وأخذت المركوب.. فى الصباح غادرت الحلة واستبدلت المركوب بعد ان اكتشفت ضيقه.. صديقى نادر ذهب لأهلى ليرجع شبطى... رأه صديق ثالث وسأل عن الحاصل فعلم اننى سافرت بمركوب نادر.. بعد ارجاع الشبط اكتشف نادر اننى تركت مركوبه عند أهلى فأخذه ورجع... فى الطريق مر على ذلك الصديق الثالث، وهو ترزى فى الحلة ودفعتنا من الابتدائى.. أطلق صديقناالترزى ضحكة كبيرة وقال مادام محمد سافر بدون شبط وبدون مركوب، فلابد انه خرج من الحلة حافيا بعد ان علم بالخطوبة!!!!

'يـا حـليـلك والفـؤاد ملكوهـو غـيرك'

أيـوة كـده طـلعـوا المسـتخـبي..والناس العرسـوا والآخـريـن ماتذكـروا أسـمـائهم زي مـا إنت قلت وعلامـة (.....) كفايـة..


مـني السـماوية أخت السـمـاوي

ما دام يا ابو خليل القصة جابت ليها

شواكيش وحبكانات فاشلة

انا من الليلة ح اتحول لقاري للبوست

اصلي مطوع وما عندي خبرة في الحاجات الزي دي

كريم سمتو رباح الصادق المهدي كيكي والله شهرة وبختك وطبعا يا كريم سبعة سنين ما شفتك قاعد ليك جنب بت.
ومن الموضوع جاب قصص الحب شايفك هربت لبوست تاني.

رباح الصادق المهدي دفعتنا لزم يوم في اخبار التلفزيون والجامعه شغالة القي ليك رباح في الصين مع ابوها.

قلت لصديقي احمد التجاني شفتها رباح مع السيد الصادق في التلفزيون مشو الصين

احمد التجاني قال لي
انت قايلن زينا زي دي ابوها بسالها يا بت ماشة الصين
قومي البسي

وبالمناسبة المهندسة رباح بت فنانة ورسامة وكانت تقيم معارض بالكلية وفي النهاية بقت كاتبة رهيبة واظنها طلقت هندسة الكهرباء

ما معقوووووووووووووول
إنت كيكي؟

انا من قبيل بحاول أتذكر عبد الكريم دة منو؟

لكن أنا السميتك ولا دي سختتكم إنتو براكم يا برالمة الهندسة؟
هل تذكر ذلك اليوم ونحن نتعارف في السنة الأولى برلم؟
وفي واحد فيكم مسخوط قال كل زول يقول اسمه واسم الدلع بتاعو عشان نكون عارفين..
بعدين محمد الفاتح (شلف) ربنا يطراه بالخير قال بدلعوه باسم توحة، وقمتوا ضحكتوا فيه وعملتوا عمايل، بعد داك كل زول بقى يتردد يقول اسم الدلع، لما جا الدور عليك سكت شوية كدة وسألتك شنو يعني: كيكي؟! لكن لو ما سختة أولاد الهندسة الموضوع دة كان انقبر في مكانه!
حسي لزومه شنو التعريف بأسماء الدلع دة؟
والله تحيات كبار وكتار
بالمناسبة كنت في الشهر الماضي في كندا أوتوا- وهناء منحتني زيارة يوم كامل حيث عدت معي عطلتها الأسبوعية ليوم الأحد.. وأنا راجعة من لندن ركن زمينا عادل الهادئ كما النسيم، أول ما نظرت له تشككت فيه حتى قال لي بعد فترة متسائلا: رباح؟؟
كانت معي الدكتورة آمنة ضرار ذهبنا لحضور منبر هناك، ولاقت هناء وقلت لها بالتأكيد: يبدو أن هذه هي رحلة نكت ذكريات الهندسة القديمة- حقيقة لقد أخبرتني هناء عن هذا البوست ولكن لم أتذكر إلا بعد أن أرسلته لي لنا..
وعلمت أنها قرأت أن زميلنا وصديقنا حمد حماد بكندا وفي أتوا، وقد سألنا عنه ولن بدون جدوى فالذين لايتهم كانوا عموما من قبائل السياسة ومنظمات المجتمع المدني.. حقا حمد حماد كان فذا..
نعم لقد فارقت الهندسة ولكن أسفي ليس كبيرا، قيمة الهندسة كانت في تلك الأيام، ومشواري في العمل كمهندسة والذي استمر لحوالي 4 سنوات تحول إلى دروب أخرى..

والله كانت أيام..
لا زلت أطالع ذكرياتكما الجميلة، والصادقة.

رباح

ما دام يا ابو خليل القصة جابت ليها

شواكيش وحبكانات فاشلة

انا من الليلة ح اتحول لقاري للبوست

اصلي مطوع وما عندي خبرة في الحاجات الزي دي

ابو خليل

كيفنك

لتسمية كيكي هذه قصة شهيرة

وانت بتلعب دي جاية من بت ابوها كان رئيس وزراء منتخب

يعني اسم جاي باغلبية مكيانكية

وكنا نحن برالمة يادوب كده بنعمل جلسات تعارف

وفي جلسة كده قالوا اي واحد يقول اسموا واسم الدلع بتاعوا

عليك الله شوف الناس ديل ا

طبعا اخوك ما عندو في قصة الدلع دي

فقلت ليهم اسمي فلان الفلاني

وما عندي اسم دلع ..

قامت نطت رباح الصادق

وقالت (هئ هئ انا ح اسميك كيكي)

وقبل ما اصل الداخلية لقيت كل الناس بتقول لي كده

لم احاول محاصرة اللقب لانو بيني وبينك كده لذيذ وبعدين

جاي من حفيدة المهدي

خايف اغيروا يقوموا اهلي كمان يعملوا لي مشاكل ساكت

طبعا لدي ابن خالي صغير اسمو عبدالكريم حسي بقولوا ليهو ايضا كيكي

وتخيل معانا واحد خواجي هنا برضو بناديني باللقب ده

ما عارف لقطوا من وين

صديقي علاء الدين يوسف العب زول كان في علوم وكان يلقب بعلاء الدين الحيوان

كان مصاحب الحكنوشة جدا جدا مها زكريا.

مرة مها زكريا سالتو ,

يا علاء انتو ساكنين وين

علاء قال ليها

ساكنين في امبدة وهو فعلا كذلك

قامت مها زكريا قالت ليهو

يا علاء الدين عليك الله ما تهزر

وابو سمرة ايضا كان يقرا لها الشعر

والبت حنكوشة ما جايبة خبر

بعدين صديقي الهادي الاصم

كان بحب بت من بنات الشهادة العربية ما شافت السودان الا في الجامعة وكان يستغل جهلها بالاغاني السودانية

ويقول ليها كلمات الاغاني السودانية وكان يحبها باغاني عثمان حسين والبت مسطحة

فمرة قال ليها

يا (........) متين الازمك في هواك مر الشجن

متين تعود مراكب ريدنا لبر الامان

والبت المطلشة مفتكرة دي كلام الهادي تشيل وتغرود في عيونها

لن ننسى اياما مضت لن ننسى ذكراها...
بصوت المهندس السماني عجبنا دفعة 90... يصحبه بالغناء سامي المغربي وأحمد بركات ويقوم بالعزف الرائع محمد بابكر... في حفل التخرج ببرادلي - بيوريا - الولايات المتحدة أو هندسة سادسة وسابعة!!!!

فوووووق عشان هندسة الصديق اللدوود

صديقي عوض النذير وناس هشام سفل والشهير والرشيد ود ابليس كانو ناس لذيذين وكانو بشغلو البنات الضيوف البجو الكلية من خارج الجامعة.

فمرة عوض النذير قامت خالته بزيارته في الكلية وكان بتونس معاها

الشباب شافو ليك وبدوا اشاغلو يا عوض جبتو وين ده

دها وارد وين

سنة يا ام توب

فصرخ عوض النذير باعلي صوته

والله والله خالتي

فضحتونا

خليل سلام
يا اخوي انت دفعة

Quote: وعبدالله جنجا

اكان كدي انا اتغشيت فيك!!ات ما قدرناتب !!وين جنجا الان؟له التحايا
جنجا عرفته زميلا لاصدقاء في اقتصاد(1983) ناس عصام الطيب حسن (زميل في البورد) التجاني النور علي (بامريكا الان) ووليد محمد عثمان (الامارات الان) ومصطفي النقيب والرجل المهزب محمد هاشم(له تحياتي اينما كان)
تخريمة:
وين طه النور الان؟
لكم التحايا

يا زول نحن دخلنا الجامعة سنة خمسة وتمانين

اجمل الدفعات علي مستوي الجامعة

واجمل البنات

واكلنا وشربنا علي حساب الشعب السوداني

وسكنا في عمارات وسط الخرتوم

المتخرجين ليها شنو

طه العب في خزان مروي

كشوهو من السعودية

ومشينا سنة رابعة بنجاح تام ولا ملحق من اتناشر مادة كل المرتبين السابقين استوعبو الدرس
كمال الشيخ كريم مرتضي حجازي وبقية العقد الفريد.

لكن ناس دفعتنا اتخرجو وافترقنا وبعيننا المني واربعة عشرة عاما لم نلتقي بعدد كبير منهم.

لقينا تلاتة من كبار الكيزان مربتين في رابعة حبيب الله بابكر وسامي وعبد الهادي

حبيب الله اتخرج معانا عبد الهادي مشي الجنوب
اما سامي لغز سمعنا ان الحكومة بعثته لرحلة تجسس في كينيا ولم يكمل حتي السمستر الاول
حبيب الله هسع في السودان عندو اربعتاشر سكرتيرة
عشان تقابل البشير اسهل من ان تقابل حبيب الله.

انقعد في هذه الفترة موتمر التعليم العالي والذي اوصي بتصفية السكن والاعاشة.

بدات الشرارة في كليات الطب وتم نزع بعض الداخليات وبدات الاحتجاجات في الجامعة والاعتقالات ومازلت اذكر دكتورة ريلة عواض وهي من بنات بورتسودان وهتافها الشهير

لا تسويف بالاسكان.
بدات المعركة وقررو التصفية وذهبنا لمكتب مدير الجامعة مامون حميدة وهتفنا ضده

خائن خائن يا مدير ما ليك امان

يا عميل الجبهة الفاشية داير ليك بيت وعربية ونواصل

اسوا قرارات الانقاذ هو تصفية السكن والاعاشة وانشاء الجامعات الجديدة
ياخي ديل ما خلو صالون سمح في قرية والا عملوهو جامعة.

مامون حميدة مهندس تصفية السكن والاعاشة بعد اختلافه مع ابراهيم احمد عمر وطرده من ادارة جامعة الخرطوم قال

ان الجامعات الجديدة تخرج ممرضين والدولة انشات كليات بيطرة باماكن ليس بها ماء

معركة شرسة خضناها مع السلطة في تلك الايام ولكن هزمنا وقبلنا بالواقع .

وصار مستوي الاكل ردي خالص وصرف لاي طالب عدد تلاتين تذكرة علي مدار الشهر للفطور والغداء والعشاء.

تمت خصصة الاكل بالصفرة وتم اسنداهو للمقاولين

وكان صديقي الهادي يقطع التذكرة ويقف امام الصفرجي ويقول له هاك ادينا ( طبيخ حرقان)

الاخ خليل

الاخوة المتداخلين

سلامات ذكرياتكم جميلة واصلوا هذا الابداع الجميل

يا خليل الدكتورة ريلة عواض الطبيبة الجميلة صديقتى هى الان

ببورتسودان عندها مركز طبى معروف

معكم واصلوا

انتصار

شكرا يا انتصار واحيي كل اولاد وبنات بورتسودان حاتم بخيت وحسن صيام وحسام نقدالله وناصر سيد احمد وبت طمبل وبت ابو امنة وهدي وهالة الطاهر الحاج وبقية العقد الفريد.

بدات قرارات تصفية السكن والاعاشة بندوة في قاعة الشارقة بمباركة اتحاد الكيزان برئاسة التجاني المشرف وكان مدير الجامعة بروفسير تنقاري ولابد ان احيي ابنته الرائعة الست وصال.

ساد الجامعة كثيرا من المظاهرات والاحتجاجات وقد بدات اولي الشرارة بمحاولة نزع داخلية كرار.

خرجت المظاهرات من الجامعة حتي بلغت ميدان ابوجنزير .
اقتحم الجامعة واطلق الرصاص فقدنا علي اثره البرلوم الرائع طارق ود كوستي قتلته ايدي الغدر والخيانة بين النشاط والقانون برصاصة اخترقت صهريج الماء الذي كان مختبيا خلفه.

واعتقل كل الذين كانو في بص العزاء المتوجه الي كوستي

كما تم فصل حاتم المهدي رئيس الاتحاد واسامة ادريس وعدد كبير من اعضاء اللجنة التنفيذية للاتحاد

ونواصل

واسامة ادريس
اسامة بتاع اسكول مش كدة؟ اسامة احمد ابن ادريس ؟انسان رائع وكنت اعرفه من المتوسط والثانوي لانه دفعة شقيقي الاصغر وطه النور!والتقيته قبل سنين هنا بالامارات وله التحية اينما كان؟
خليل
واصل ...لك الشكر فهزه فترة (اعمامك نحن)لم نكن بالسودان!!!!!

فوق فوق يا شباب الهندسة

من قلب الأحزان والآهات المتعددة المتجددة، هانحن معكم...
ياخليل نسيت من بورتسودان مامون النعيم (ود المكي؟) من أحرف من لعب للهندسة لكنه مقل... والمهندس الرائع الشفيف الخفيف كنسمة صيف محمد غزالى.. انا وهو دخلنا قاعة الجى ال تى فى غزوة أحيائية... كان هناك بروفيسور فتحي الربعة؟ سأل: من أنتم وماذا تريدون هنا... همهم بعض الأطباء - ديل ما معانا... خبأتنا الدكتورة الجميلة ريلة فيما تيسر من مقاعد جوارها... ديل معانا يادكتور... وحكى لى المهندس ياسر راشد من الدفعة الورانا فى كهرباء عن معركة انتخابية حامية الوطيس كانت الدكتورة ريلة طرفا فيهاومرشحة لمنصب الرئيس.. انتهت، كالعادة، بانتصار هندسي كاسح على أبناء وبنات الطب الكسيح.. كانت المعركة بخصوص رابطة ابناء بورتسودان بجامعة الخرطوم... وفى هذه السانحة نذكر صديقا عزيزا لمحمد غزالى الدكتور مهندس أمير عون الشريف... تعازينا الحارة فى الفقد الكبير...

انسي كيف ود المكي اتلقيته قبل شهر في السودان طبعا يا الصائم انت عارف انو اخوات مامون الاتنين واحدة متزوجها صلاح ادريس والتانية جمال الوالي روساء الهلال والمريخ

واغني ناس في السودان. ونزار بارتيته شغال معاهو مدير في شركاته

والود غزالي لما مشي درس الكورس الصيفي في بورتسودان بنات الثانوي العالي بغنو ليهو من عيونك يا غزالي

وكذلك ايهاب بتاع ميكانيكا وجمال نرنر

طبعا تم ابعاد مدثر التنقاري من منصب مدير الجامعة وتعيين اسوا مدير للجامعة الخرطوم

المدعو مامون حميدة رجل شرير بعد اختلافه مع ابراهيم احمد عمر وزير التعليم العالي انذاك شتم كل قرارات ثورة التعليم العالي

وذكر ان الجامعات الجديدة تخرج ممرضين وليس اطباء.

كان في ذلك الوقت كل اعضاء اتحاد المحايدين مفصولين وقد اصر مامون حميدة علي قيام الامتحانات

واعضاء الاتحاد مفصولين.

وقد اصر الطلاب علي الغاء قرار فصل الطلاب وعودتهم للجامعة او مقاطعة الامتحانات.

لا يفوتني الدور الرائع الذي قام به الراحل بروفسير عون الشريف في عودة الطلاب المفصولين.

تم تشكيل لجنة تسيير للاتحاد برئاسة الدكتور محمد ابراهيم حارس مرمي فريق الطب لقيادة الاتحاد.

وفي مسيرة غاضبة ذهبنا للمكتب مامون حميدة لتسليمه مذكرة

قام بتسليمها محمد ابراهيم.

تخيلو مامون قابله بالاحضان واستلم المذكرة

وتاني يوم اصدر قرار بفصله من الجامعة.

وما زلت اذكر العبارة التي قالها احد اعضاء لجنة التسيير

( قال رسول الله صلي الله عليه وسلم

شر الناس من اتقي الناس شره)

وكذلك هو مامون حميدة الذي يقبل الان الطلاب في جامعته الجديدة بالاف الدولارات


فاصل ونواصل

ابقوا معنا

ياسلام يا ابو خليل يا زكريات

اجل السكن والاعاشة كانت معركة جيلنا

خضناها دفاعا لحقوق الاف الطلاب

الفقراء الذين كانت مجانية التعليم

وامتيازات السكن والاعاشة

هي احد العوامل التي تساعد

كتيرا في تفريغ اجيال من الذين مروا

علي قاعات الجامعة المختلفة

واولهم الكيزان الذين يجعجعون اليوم

لولا مجانية التعليم لما كان

مثل الترابي او مامون حميدة

اوابوعلوة

ولكن دمرت الجامعة

من كيزانها الذين يحملون حقدا

كبير"ا تجاه طلاب هذه الجامعة

ونذكر اننا كما قلت

تم توزيع مايسمي

بالتيكت

وتم فصل الالاف

من الطباخين

والسفرجية والعمال

الذين كانوا جزء اصيلا

من نسيج الجامعة

وياحليلهم وحليل

الاسبيشل بتاع يوم

الاثنين الذي كان مغريا

لدرجة يمكن ان تدك ليهو لكشربحالو

ولعلك تذكر الرمضان بتاع

كورس(1)

في سنة ثانية

والله ياذي الازانا

وتتخيل التكيت بتاعتي كانت بتخلص يوم 15

ولكن حفظ الله اصدقائنا من اولاد الخرطوم

الذين كانوا لا يسكونون في الداخلية

فقد كانوا خير عون لنا في الموضوع

بتاع التكت ده...........

الاخ خليل

والله زمان وزمان

شايفك فاتح بوست بتاع عرس ...

انت يا ابو الشباب الشاكوش بتاع القط ده لسع مدور لحدي حسي ولاشنو؟

.......................................................................

اراك في فترة غيابي تحدثت عن ودالمكي

ذلك الاستاذ

العجيب ماس عجيب واكوشنات غربية مابتعرف الزول ده بجيبها من وين

وبحلها بسهولة وحنكة وده كان دكتور يعني دكتور


وهنا لابد من الوقوف والتحية لكل هولا الدكاترة العظماء في علمهم

وتعاملهم الراقي وتواضعهم الجم

اذكر هنا الدكتور اسامة,

سعد عدنان بتاع البيسك

وفي ثانية

دكتور جوزيف,مدحت,

وشيخ المساحين حاج الباقر احد كبار المساحين علي مستوي العالم

وكان مرجعا كبير في هذا الشان

والدكتور التاج(صاحب ناس ) خليل بتاع الرسم الهندسي

وحسن فاشر والنويري وكمال عبد اللطيف ...وديل يا خليل علماء بتاعين مساحة كبار

وقرني ومحمد عثمان وعكود والصادق شرفي

ولكل التيوترات وصبرهم علي ترسنا وشغب المجانيين منا................

كانت الجامعة تفور وتمور والطلاب اعضاء الاتحاد مفصولين واصر مامون حميدة علي قيام الامتحانات في مواعيدها.

علي ما اذكر كانت اول امتحانات بتاعة ناس اداب ودخل الطلاب قاعة الامتحانات وقامو بتمزيق اوراق الامتحانات وخرجو من القاعات

وهنا قام مامون حميدة بقرار يهودي حيث قرر افراغ الداخليات من الطلاب بواسطة رجال الامن

تم اخذ البرالمة بالقوة الي كلية الشرطة لاداء الامتحانات هناك
بعضهم ذهب بالجلاليب

وبعضهم ببجامات النوم وبعضهم لم يستطع الاجابة علي ورقة الاسئلة

وكان هناك ناس من خارج يمتحنون ويقوم التلفزيون بتصويرهم للراي العام

بان الامتحانات تسير علي ما يرام.

قرار افراغ الداخليات ومناشدة وتهديد مامون حميدة للاسر عبر التلفاز استطاع ان يكسر عزيمة بعض الطلاب مما سبب فشل مقاطعة الامتحانات لاحقا

كما سنروي

الوضع في الهندسة كان زي بقية الجامعة

بعد طرد الطلاب من الداخليات الناس اتجههت نحن مشينا اجتمعنا في جزيرة توتي وقررنا المقاطعة

لكن بالنسبة لينا نحن لو قاطعنا ما عندنا فرصة تربيت لان كل فرصنا كملناها في سنة تانية

ابو الدرداء برضو ماكان عندو فرصة فقال في الاجتماع انا ما حاقدر اقاطع فكان شجاعا

تشاورت مع والدي وذكرت له بان الطلاب حايقاطعو وانا لو قاطعت ما عندي فرصة

فقال لي خليك مع ما يقرر ابناء دفعتك.

المهم بدات الامتحانات في سنة تانية هندسة وقد قاطعها معظم الطلاب وكان امتحان الرسم الهندسي

عملو دكتور التاج الذي رفدنا في سنة تانية وكان زول قلبو مع الطلاب فعمل امتحان صاموتي

اي طالب دخل سقط

وقد فطن الكيزان لغتاتة دكتور التاج وتم فصله من الجامعة مع دكتور عادل خضر وسمير ومعتصم

لانهم تضامنو مع الطلاب ورفضو وضع الامتحانات في هذه الظروف

نواصل

كانت الجامعة عبارة عن ثكنة عسكرية ناس الامن خارج الجامعة يسمح بدخول الطلاب الممتحنين فقط.

الامتحانات بدات بناس سنة تانية هندسةقاطعها معظم الطلاب وبعضهم دخل وامتحن

وفي مجموعة كبيرة من الشرفاء قاطعو وربتو السنة منهم ياسر راشد وصلاح اليون ومعظم ناس خامسة معمار رفضو تسليم مشروع التخرج.

نحن امتحانتا كانت متاخرة شوية بعد انيهار عزيمة الطلاب وكنا مصريين الا ندخل لاننا بنكون خنا الطلاب الذين قاطعو.

الحاجة الانا لسع مزعلاني اني انا تركت اصدقاء الكفاح الذين ربتو وفصلو معاي في سنة تانية.

ومشيت اذاكر مع مجموعة سبعة وتمانين احمد محي الدين شبو تجاني حجازي مبارك عثمان

صديقي كمال الشيخ زعل مني شديدا واعتبرني اني بعته لاني طوال التلات سنوات ونحن بنذاكر مع بعض.

ولكن طبعا نحن مطرودين من الداخلية والوضع استسنائي عشان كدة هربنا لمنزل احمد محي الدين.

كنا ما عارفين نعمل شنو مرة نذاكر ومرة نمشي نجتمع لنقرر المقاطعة جهججه جد.

المهم صديقي الحنكوش هاني فاروق برضو كان ماسك العصاية من النص مرة اذاكر ومرة اقول حاقاطع الامتحانات.

قام مجموعة من الطلاب بزيارته في المنزل ووجدته غارقا في المذاكرة وقامو بسواله

يا هاني ما قلت حاتقاطع بتذاكر مالك فقال لهم

just in case

خليل
دخلت اللحم الحي...
اجتمعنا فى معمل الالكترونيات.. اخذ ورد.. بعض الطلاب كان يصر على اتباع رأي الأغلبية، بعض آخر كان يصر على الإجماع بحيث اذا (تخاذل) واحد يسقط القرار... قلت لهم بصريح العبارة انه لن يكون هناك إجماع حتى لو تعلق الأمر بوجود الله... كان حسم النقاش بالنسبة لي ان يرفع المشاركون فى الامتحانات أيديهم، فهم مستعدون للدخول ولو حيل بينهم وبين الامتحانات بالدبابات وقلت اننا نعلم ان هناك كيزان وهم لن يقفوا مع قرار موجه ضدهم... رفع 4 او 5 طلاب أيديهم.. قلت فليرفع المقاطعون أيديهم اذا كانوا سيقاطعون حتى لو انطبقت السماء على الأرض (بهذا اللفظ تحديدا).. رفعنا أيدينا خمسة أو ستة طلاب وطالبة واحدة... بقي الآخرون بين بين... هنا قلت مرتاحا هذه هى النتيجة النهائية... كنت مخطئا ولا ألوم أحدا... لم تنطبق السماء على الأرض لكني قاطعت حتى آخر نفس.... بقيت وحدي حتى النهاية فى خامسة كهرباء... خطبت فيهم ان الموقف واضح تماما فنحن ندافع عن قضية خاسرة بحسابات الكسب ولكنها رابحة بالانحياز للمبدأ.. لم أتعلم لغة الدبلوماسية عن التوازن الدقيق بين المصالح والمبادئ... بقيت تلك المسألة معلقة فى ذهنى حتى قرأت لكيسنجر يلخص كل السياسة والعلاقات الخارجية فى ذلك الصراع بين المبادئ والمصالح.. عرفت ان لدي تجربة أعتز بها.. قد تكون خاطئة.. لكنه صراع فلسفي لم يحسم ولن يحسم ماعاشت البشرية... كان المبدأ بالنسبة لي التضامن مع اخوة رفعهم الطلاب لقيادتهم ولا يجوز ان نتخلى عنهم، وأن تبقى فى السودانيين فئة ولو قليلة تقول للظالم انها لاتخشى وعيده وبطشه... لو راحت تلك الروح منا لبكيت طويلا عليها أكثر مما كدت ابكي على مستقبلي يكاد يفر من بين يدى د. عبدالرحيم العبيد الكوز المتغطرس، لكن تلك قصة أخرى... كانت وقفتى من أجل حاتم المهدي رئيس الاتحاد وصديقى من سادسة ابتدائي وأول من دخل بيتنا من أصدقاء بحري...

خطأ المحايدين القاتل كان فى الانجرار لمؤامرات الكيزان وفى قصم ظهر الطلاب بقرار كبير حاولوا تحميلهم مسؤوليته باستفتاء هزيل وماكان هناك من داع لامتحان الطلاب بالتضحية والنتيجة معلومة سلفا فلن ترجع المقاطعة طالبا مفصولا وهناك وسائل أجدى لتحريك الرأى العام...

كل ما تحدثني نفسي بأنني ضيعت عاما فى لاشئ أتعزى بمن فقدوا وظائفهم من البروفسرات - أين أنا من د. معتصم محمد عبدالله فى الكهرباء ود. عادل خضر فى المدنية؟ كلاهما من الجمهوريين وكانا من أنقى من مشى على أرض جامعة الخرطوم.. وأين أنا من بروفيسر سمير جرجس ذلك القبطي الذي أحب السودان كما لم يحبه أحد وتجرد فى صوفية نادرة لعلمه وكان يعشق التائية لكثير عزة.. وأين أنا من د. عبدالجليل كرار، الذى طردنى يوما فى البرليم لما ظنه سوء سلوكي ثم أبدى أسفه، رحمه الله رحمة واسعة.. أين أنا من د. التاج، الصديق اللدود لخليل، وهو يخسر وظيفته فى مقتبل حياته المهنية؟ اولئك ابائي فجئنى بمثلهم اذا جمعتنا ياجرير المجامع...

مازلت أسائل نفسي ان كان قراري وحدي صائبا أم خاطئا.. انا موقن منذ أول يوم ان قرار المقاطعة بقيادة المحايدين قرار خاطئ تماما... لكنني لم أندم لحظة على مقاطعتى لكل المواد.. لو تذكر كنا أفرادا يعدون على اليد الواحدة اولئك الذين قاطعوا كل المواد فى السمستر الثاني من طلاب السنة الخامسة.. قاطعت ونادر كوبر وربما أخرون لا أذكرهم..مامون حميدة كان يصرح بأن من أبى الامتحانات فقد أبى الجامعة... طبعا هناك كثرة فى رابعة وماتحتها وهناك كثرة ممن قاطعوا مادة ومادتين.. لكن فى خامسة... خامسة غير.... نجحت كل السمستر الأول بدون ملحق.. وأمامي والتخرج اسبوعان... حقيقة لم أغضب من أحد بسبب المقاطعة وكانت توقعاتي فى محلها تماما وكنت سعيدا بكل من قرر التضحية ولو جزئيا... اصدقائي فى الجبهة الديمقراطية قاطعوا مادة او مادتين، بقيادة الفردة عماد عيدروس. وتفهمت دواعي من لم يقاطع من أصدقائي الكيزان والآخرين... تقديرى الخاص واحترامي لدكتور عاصم صغيرون وهو يحاول معى المستحيل ليقنعني بانقاذ مايمكن انقاذه... وسلامي واحترامي لدكتور الرشيد وهو يقف معي فى وجه الصلف والفرعنة الكيزانية ممثلا بدكتور عبدالرحيم العبيد..

خليل والصايم

والله زمان

المقاطعة كانت من اكبر الاخطاء التي ارتبكها المحاديين

ووضعنا بين مطرقة التضحية وسندان المستقبل

نحن بالمساحة ...

حسمنا الامر بالتصويت...

في اجتماع شهير بمنزل صديقنا (طارق عمر خالد مضوي)...(طارق فصمة)

.......

ولكن كان الامر مربوط بمتابعة نسبة دخول الطلاب

للامتحانات....


اجل لم نقاطع..

ليس لموقف سياسي...

او تمرد علي قرارت الاتحاد

ولكن...تعلمنا منذها ان لا نضع كل البيض في سلة واحدة............

ونحن ما زلنا مترددين نقاطع ولا ندخل الامتحان الشباب كانو بمشو الاجتماع

وانا بذاكر في منزل احمد محي الدين والقلب بين مهابة ورجاء.

الدكتور محي الدين احمد الفكي الراحل المقيم والد صديقي احمد (ابو اليل)

كان ينصحنا ونحن في منزله بان هذه معركة خاسرة ضد سلطة قابضة وقاهرة فيجب علينا ان ندخل الامتحانات لان مقاطعتنا للامتحانات لن تسقط الحكومة.

المهم قررنا ان نمتحن وعمر الحبر عندو مقولة ظريفة حيث قال

( والله دي انفناسة دي)

هناك مجموعة ظلت صامدة حتي اخر لحظة هم هشام جادالله وضاح محمد عبد الحي عبيد عبد الرحمن العبيد ووجدان الخير حمور
وليد كريم الوحيد الذي قاطع وامتحن مادة واحدة وربت.

وضاح قاطع مادة واحدة واحضر شهادة طبية.

هشام وعبيد دخلو القاعة وهم يبكون وشعرو بالهزيمة ولكن شوف عيني ملو كراسين من كراسات الاجابة.

ظلت العلاقات متوترة بيننا وبين هذه المجموعة حتي نهاية فترتنا الدراسية.

وعندما ذهبنا للكورس المساحة في جبل اولياء فرزو عيشتهم وقد اسميتهم الليكود واطلقت اسم
غولدا مايير علي الزميلة وجدان الخير لها تحياتي الحارة.

اول امتحان كان في قاعة الدراسات الاسلامية قرب مسجد الجامعة ونحن ماشين مهزومين علي القاعة.

كانت الكيزان من دفعتنا يخرجون لنا السنتهم وكان صديقي الكوز الكبير ابراهيم جرايد

يشاغلني خليل خليل ما قلت ما حا تمتحن وانا فعلا كنت عامل فيها مانديلا ونواصل

الأخوان عبدالكريم وخليل
لقد قمت بلفت نظر شقيقي حامد الصاوي عضو البورد الكسول لهذا البوست الرائع، ووعد بمساهمة دسمة بعد إصلاح جهازالكمبيوتر الخاص به.
وربما عدت انا ايضا لان هذا البوست بدأ يلمس جوانب تهم كل الجامعة وليس فقط الهندسة والمعمار مثل مجانية التعليم وشهادة لندن والمحايدين. وبالمناسبة المحايدين أول ظهورهم كان عندنا في الإقتصاد عام 86 بقيادة عادل عبدالجليل (جاليلو) ورحاب عبدون وطارق ابوشوك وغيرهم ثم إمتد وجودهم للكليات الأخرى ثم للإتحاد

الصاوي

تحياتي للصاوي

والزميل العزيز حامد الصاوي وكل ناس المورده الحلويين

وسلام خاص لعادل عبدالجليل بامريكا وطارق ابوشوك وكل كافتريا اقتصاد

ودكتور بشير عمر ذاتو

الصاوي اخوان

سلام للجدعان ...ووين حامد ده

انكتوا لينا عليك الله... لانو افادته مطلوبة بحكم انه من كبار الديناصورات في الهندسة.........

وفعلا الامر هنا اصبح يحتاج لافادات كل الناس الذين عاصروا تلك الفترة............

فاتني ان اذكر راجل كوز لكنه كويس جدا والكيزان ليس كلهم اشرار علي سبيل المثال انا بحب مهدي ابراهيم خالص.

زميلنا الشهيد علي عبد الفتاح صاحب عبارة الدبابين واول من اطلق هذا الاسم

لاقناهو في سنة تالتة وكان عندنا امتحان مع دكتور زروق وبعد الانتهاء من الامتحان ونحن راجعين

القي ركن نقاش حار وشخص صوته عالي جدا ويقول تالله وبالله

فوجئت بانه علي عبد الفتاح وسالته يا علوب مالك ما جيت الامتحان

قال لي الامتحان ملحوق .

كلام غريب وانا خفت من قناعات زي دي

الله يرحمه ويرحم ود مدني الرائع ابوعبيدة الخواض وخباب وعمر فلاشا

فوق ...........

عشان ...روح شهداء الحركة الطلابية.......

عشان سليم

بشير...

التاية......طارق

وكل الذين اعتقلوا وعذبوا في بيوت الاشباح...

وخرجوا وهم اكثر تماسكا....وصلابة


عبد الفتاح الحبيب

حاتم الريس

واسامة............وفوق

الاخوة الكرام

السلام عليكم ورحمة الله تعالى وبركاته

ذكريات جميلة وتوثيق لفترة هامة وحرجة من مراحل حياتنا

عاوزة اقول ليكم طبعا فى تلك الفترة ونحن طلبة درسنا خارج السودان

عدنا من الجامعات العراقية بعد تقديم استقالتنا جماعيا لاسباب سياسية

تم استيعابنا بالجامعات الليبية وكنا مترددين للدراسة بليبيا

قابلنا احد الاستاذة بجامعة الخرطوم وهو يكمل اجراءاته للسفر الى ليبيا

ونصحنا بالسفر لان كثير من زملاءه فى طريقهم الى ليبيا وفعلا فى جامعة

واحدة متخصصة التى درست بها وجدت 35 استاذ جامعى اذكر منهم

البروفسور يوسف قرشى وبروفسور ابراهيم سعيد ودكتور محمد خير ودكتور

جادالله الحسن وفعلا استفادت ليبيا منهم وكانوا مصدر فخر لناان نتخرج

ونحن نحمل علم من اهل العلم.بعد ان شردوا من اوطانهم

واصلوا هذه الزكريات


انتصار

الاخت انتصار شكرا علي المداخلة...

وحتما ستداعي الذكريات لتخلد اجمل الزكريات


وعفوا سادتي ...وعكة طارئة المت بسيد الناس وسيد البوست

وانشاء الله يخف ويجيكم ..بذكرياته الرائعة...

خليل..طلب مني ان احي الاخوان


حسن خضر واشرف شمت وعبدالعزيز سيد الناس..........لهم التحية والتجلة وين ما هم قاعدين

نعود لمعهد الدراسات الاسيوية وكانت به قاعات امتحاناتنا والكيزان شمتاتين علي انكسارنا

وناس الامن بره عضلات تبش ورشاشات وبالقرب من باب القاعة الواحد جاتو فكرة اقاطع ولكن الناس جاية كلها مذاكرة وجاهزة للامتحانات

ويبدو ان الذين قاطعو راحو في( طهور بت الكاشف)

ونحن مترددين لسع واحد من بتاع ناس الامن هرشنا ليك

هوي يا صعاليق اما تخشو الامتحان اما تتخارجو من هنا

فشعرنا بالهزيمة ودخلنا قاعة الامتحان ونسينا النضال

اول امتحان كان امتحان طرق وكان بدرس المادة دكتور ابراهيم محمد الطيب وهو محسوب علي الاسلامين

وكان امتحانو ساهل جدا من غير عادته

وعندما خرجنا من قاعة الامتحانات سالنا الزميل مصطفي بوب

كيف كان الامتحان فاجاب

بانه امتحان سياسي ونواصل

مرت امتحانات المقاطعة وبعض الطلاب مات علي دينه وقرر المقاطعة حتي النهاية وربتو

وبعضهم تحايل علي القانون بان احضر شهادة طبية وامتحن ملاحق المهم انتصرت السلطة علي الطلاب في معركة غير متكافئة

اليلة عندي اتنين اخوان اشقاء اصدقاء لدرجة الجنون عظيكا وكلوب من اولاد مدني

كلوب عندو لغة خاصة جدا جابة من وين ما عارف كمصلح انت ثعلب هوائي ويا وز ويا هو

كلوب يدرس بالكهرباء وفي مشروع التخرج بتاع السنة النهائية قام خالد حماد الذي يدرس مدنية بعمل مشروع التخرج لكلوب

وكان ببرنامج كمبيوتر صعب جدا وكلوب مسطح وفي المناقشة ما عرف اجاوب حاجة

دكتور عاصم صغيرون اكتشف الراجل ما اشتغل المشروع وقام بتربيته وهنا حصلت اجمل شكلة بين دكتور عاصم من جهة وكلوب وعظيكا من جهة

امشي يا دكتور يا حكنوش

دكتور عاصم يا اولاد ما تقلو ادبكم انا ود امدرمان انا مولود في ابوروف ونواصل

عدنا والعود احمد بعد الوعكة الصحية

تكلمنا عن كلوب واليوم اتكلم عن شقيقه عظيكا.

ونحن في قاعة الامتحان وفي بداية الامتحان اخرج عظيكا بخرة ووضعها في نصف كراس الاجابة

ولكن دكتور وليم كان مراقبه جيدا وقبضه متلبس واستلم البخرة واستدعي الكنترول هاج عظيكا وماج

وقال لدكتور وليم

بس يا دكتور ثبت لي حقي اني ما استفدت من البخرة

تم فصل عظيكا لمدة عام للغش التجاري وعاد السنة القادمة ونواصل

Hi All
I will be back soon
Hamid

كم سعدت بهذا البوست الرائع
و يا الصاوي مافي داعي للفضايح الكمبيوتر ما فيه مشكله
المشكله الوقت (الوكت) حلوه دي مش كده
الأماني الجميلة لكل المتداخلين و الذين يستمتعون بالمتابعه (و قد كنت
منهم)و بهذه المناسبة في صيف 1998 كنا متلمين في الرياض (السعودية)
أنا و طارق صن(SUN) و غازي و ياسر محمد أحمد (أبو صلعة)
و في الونسه عرفنا ان دكتور التاج في الرياض فقال غازي أحسن ما نتلاقي
تاني لأنو دكتور التاج لو عرف ح يجي يدينا ملحق.
لدكتور التاج كل التحيه أينما كان و لكم الود

مرحبا حامد الصاوي

يا جراب الحاوي

واظنك خير من تحدثنا عن السياسة

في جامعة الخرطوم

زي ما عارف نحن كورة وكوتشينة وجكس بس

انتهت امتحانات المقاطعة وبعدها مشينا جبل اولياء كما ذكرت سابقا لكورس المساحة

وناس مجموعة اليكود فرزو عيشتهم وضاح محمد عبد الحي وعبيد عبد الرحمن العبيد وهشام جادالله ووجدان الخير

ووصفونا بالخونة لدخولنا الامتحانات مع العلم بانهم دخلو ونحجو بدون ملاحق.

في اجازة امتحانات المقاطعة بدات اخطر مرحلة في حياة خليل.

كنت اذهب في الاجازة لصييدلية قريبي وهو دفعتي واتخرج قبالي طبعا

وهناك وجدت معه حسناء ساسميها بعد الان الشول عرفت انها تم فبولها بجامعة الخرطوم بعد درست سنة في الفرع.وكانو برالمة بيطرة في سنة اولي علوم

اتعرفت عليها وهناتها بانضماها لجامعة الخرطوم وذكرت لها لما تفتح الجامعة انا حاقابلها هناك.

بعد تلات اسابيع او شهر فتحت الجامعة واستقبلت البرالمة الجدد وكان من ضمنهم الشول

وانا في كلية الهندسة قابلني الصديق كرار وقال لي يا خليل امشي المين الرود سريع قريبك معاهو برلومتين شرط.

ذهبت للمين رود ووجدت قريبي والشول وبت بلون البنفسج اسميتها بعد ذلك بالقطة

سلمت علي الشول وقريبي وعرفوني بالقطة طوالي قلبي دق

ومشينا شربنا ليمون في بزنس واتونسنا

الشول قالت لي خلاص يا خليل بكرة عازمنك فطور


وابتدا المشوار ونواصل

Quote: و في الونسه عرفنا ان دكتور التاج في الرياض فقال غازي أحسن ما نتلاقي تاني لأنو دكتور التاج لو عرف ح يجي يدينا ملحق

وينك يا الصاوي يالذيذ والحمد الله ما مشيتو لانو انا واخوي الكاشف (خليل)

قاعدين في قطر كان راس السوط وصلنا هنا..ويقوم يعملها ملاحق علي مستوي الخليج....

عموما مرحب بيك وفرحانيين بشوفتك ....

وما تشتغل بكلام السكرتيرات ديل لانو كمبيوترك انا متاكد انو بكون كومبيتر مخضرم....

اخوك كيكي

Quote: وعرفوني بالقطة طوالي قلبي دق

خليل موجوع يا جدعان...والموضوع ح يحلو............اوي

يا اخوانا الزمن ده كلو بنكتب عن المربتين والمملحقين اسمحو لي ان اذكر ليكم الشطار من دفعات تلات وتمانين حتي تمانية وتمانين

ولو نسيت زول شاطر ما ازعل

ايهاب ايوب وخالد حماد مدنية 83

ظافر عبده ونجوي قدح الدم 83ميكانيكا
محمد عبد الجليل 83 كهرباء

نادر حسنين واسعد يحي مدنية 84

حمد حماد والدسوقي واشرف عبد الحافظ وريمون وبول ديل دفعتي مع عثمان يوسف مشي كلية العلوم 85

محمد المنتصر 86

محمد القرني و منتصر محجوب واحمد شبو 87

وائل ووليد ابوبكر عبد الوهاب زياد وسعيد 88 وبالمناسبة ناس 88 ديل شطار كلهم

اسمحو لي برضو المهندسن الذين تزوجو مهندسات

طه وتبارك

معاوية وامنة

موتمن وايمان

الجيلاني ومني

وعايز اسلم علي عمر عائس

ومرتضي حسن وعمار ابوشوك وعلي شرشحة وهشام مجذوب ومحمد الخاتم وايهاب فريد ومحمد كرار وصلاح اليون
وطارق الكوتش ومدثر الرشيد وعثمان صديق وخالد المبروك ومامون جواري ومحمد عجيب وبكري اسماعيل

ورائد عباس وطارق حمادة وحسن صيام وطارق خيري ومحمد بهاء وبشري الفاضل

واصلوا نحن بالانتظار

انتصار

شكرا انتصار

نعود لعزومة الشول والقطة للوجيه خليل وهو الان في سنة خامسة هندسة سابعة جامعة مع برلومتين شرط حلا وحمار

تاخرت في النوم حتي العاشرة صباحا واخدت حمام تاريخي مع عطر باريسيي وقميص اصفراني وبنطلون جنز .

كان من المفترض ان اذهب للفطور الساعة تسعة لكن مشيت الساعة عشرة

وجدت القطة والشول في انتظاري واعتذرت عن التاخير وسالت القطة ماذا لو اتاخرت اكتر من كدة

اجابتني بكل غرور كنا حنمشي ونسيبك والله طوالي كسرني الغرور دها واستدعيت كابلي

مغرور بحبك بقلب مسحور بحبك

تناولنا الساندوتشات والليمون ومشينا المين الرود.

عرفت ان القطة اهلها بسلطنة عمان وهي خلطة عجيبة امها رومانية وشايقية من ناحية ابيها

لونها كلون هيفاء وهبي طويلة ضعيفة عيونها جميلة نظراتها ساحرة

شوية مستبدة.

تونسنا حتي الساعة واحدة ظهرا وعرفت كيف تفكر البرلومة

كنت في المنتصف بين الشول والقطة في ذلك اليوم كهارون الرشيد ونواصل

معليش نبهني المهندس عاطف جلال اني نسيت عدد من المهندسين الذين تزوجو مهندسات

عاطف جلال صفاء الفاضل

محمد عبد الجليل سلمي السعيد

سعيد ووصال

مي ابو العزايم

وليد حسن عمر امل شيخ الدين

وناس كتار

معليش ساعود للموضوع الحب مرة اخري

الشول برلومة مركبة مكمنة سناير بت لذيذة جعفرية افكارها كانت سابقة سنها كانت بتقول لي

عارف يا خليل الجكس دها كلو ممكن اقدم تنازلات بس عايز شريعية .

البت كانت مفتحة وانا كنت بقول ليها والله انتي مرضعك الشيطان.

استمرت الايام جميلة بيني وبين الشول والقطة.

القطة شوية صعبة وكانت بتتعامل معاي بقسوة شديدة جدا لانها جميلة خالص وانا بستحمل كل التهزي والاضطهاد عشان انا وصلت سنة خامسة ولازم اطلع بعروس من الجامعة

وكنت دائما اتذكر قول الفنان ابين في مواقف استبسل وعن رويا الحبيب حالا ابين في مواقف اتوسل

ظلت القطة موضوعي الشاغل كيف استطيع ان ادخل قلبها مرات تصدقو بنقعد مع بعض من الصباح حتي المغرب

نتكلم في اي شي عدا الحب.

مرات احس انو البت جات في القاطر ومرات احس انها بعيدة جدا

صدقو مرة كان معاها من سبعة صباحا حتي سبعة مساء ولما جات ماشة قالت اليلة ما استفدت اي شي


شوفو البرلومة دي بتعمل في خليل ابو سبعة سنين جامعة شنو ونواصل

واصل.......يا ابو الخل...واماني ماوقع راجل

وعافي منك يا القطة..........

Quote: القطة شوية صعبة وكانت بتتعامل معاي بقسوة شديدة جدا لانها جميلة خالص وانا بستحمل كل التهزي والاضطهاد عشان انا وصلت سنة خامسة ولازم اطلع بعروس من الجامعة

يا اخوانا نسيت اكتب عن سنة رابعة

اخطر سنين الهندسة فقد بها الصديق عمر الحبر اربعة سنوات

وجلس بها ياسر شندي وحبيب الله وثلة من الاوليين وقليلا من الاخرين

طبعا كل سنوات هندسة عدد مواد السمسترين اتناشر مادة

صديقي هشام فتح الرحمن اتعود ياخد كل سمستر مادتين ملاحق

ليصير عدد المواد اربعة وهي اقصي عدد من الملاحق بعدها ربيت طوالي

عمل الحركة دي في تانية وتالتة ونجحت

لكن فشلت في رابعة لان عدد المواد اربعتاشر

وتم تربيته

وجاء في القاطر

بعدين في تيمان لم خالد وهشام لم يفترقو

منذ اولي ابتدائي

استطاع دكتورهجو تفريهم بعد ان ربت احد التيمان

وكانت المقولة الشهيرة

انا هجو تاني تجو

يا سلام علي القطة وهي تسجل زيارة لخليل في كلية الهندسة يا سلام علي الطول الاضافي واللون الابيض

والناقة بتاعة بنات الشهادة العربية.

كل كلية الهندسة تفغر فاها من الدهشة حامد اتناي يريل الحارث يتراشق عمر حسين مزهول شبو مندهش

وناس اجو اسلم عليك من غير سبب عشان يحظو بالسلام علي القطة.

نمشي المين الرود وكافتريا اقتصاد وانا متبختر ومستحمي ونضيف صديقاتي القديمات يشعرن بالغيرة

وانا مع البرلومة الحلوة .

يا سلام علي القطة وهي تجيب لي موية بالكوب الذي اسمه المك.

دسيت الكورة من الاصدقاء ما عرفتها باي زول من اصحابي ما عدا الهادي الاصم ومرات مرات احمد محي الدين

لكن البقية يعرفونها بجمالها فقط

ودسيتها من عيون الناس عشان عزول ما اطولو.

الشول صديقة للقطة ولكن عملت عالمها الخاص وبرضو انا بخلطها واديها الفيها النصيب

لكن يبدو برغم انهم اصحاب البينهم ما عامرة تحت تحت كما سيرد لاحقا.

في سنة خامسة في حاجة اسمها مشروع التخرج ولازم اي اتنين مع بعض اعملو مشروع

وكان معاي في المشروع المهندس ابوبكر حجازي وهو تحت عنوان برك معالجة مخلفات المجاري واعادة استعمالها.

والمشروع يقع بالقرب من الحزام الاخضر وقامت اليابان بتنفيذه في السودان

ونحن ندرس مدي فاعلية هذه البرك في معالجة مياه مجاري الخرطوم.

وكان الدكتور المشرف علينا هو بروفسير خدام.

كما استمتعنا ببروفسير دفع الله الترابي العالم العلامة عدو الانجليزي وكان يدرس بالعربي

في مادة التصميم حاجة تسمي اللدونة.

وله عبارات شهيرة حيث كان يقول

نخرج الان من حدة المرونة الي سعة اللدونة

وعبارة اخري

ان هذه العارضة لو تعرضت لوزن كجناح باعوضة لسقطت


نواصل

عاد المهندس حامد عجبان من السودان

بعد ان استمتع بزواج هشام حسن المحايد الكبير

وزواج اسامة سيد الرايحة زميل في الجامعة لمدة سبعة سنين

وقابل محمد الطيب ايريا المربت الكبير

وهو يعمل الان في ابراج السنط

وايريا عمل راوية كبيرة

اسمها مسارات السراب

وقام بطبعها

وعندما حاول توزيعها

القي الوالي المتعافي
الاكشاك بالعاصمة

وايريا قال انو الحكومة قاصداهو

خليل .........

مسارات السراب حتما ستكون راوية رائعة...ومتفرده..ومحمد الطيب سليم زول مرهف

ومساح كبير..وكان لعاب كورة..وعزال في الخلط..ونكتتو جاهزة 24 ساعة

وفعلا الحكومة بتكون قاصداه...من زمن حكايتو مع حاج نور

صديقي دكتور مصطفي سنادة راجل حلو واحرف من لعب الكرة في وسط الملعب وهو اساسي

في منتخب جامعة الخرطوم.

خبراتو في الونسة مع الجكس ضعيفة جدا مرة كان خالط الحلوة ايمان بت علوم وكان مكسر فيها.

فقلت ليهم يا ربي مصطفي دها بونس في البت دي بقول ليها في شنو.

ذهبت خلفهم وكاتلني الفضول.

فسمعت مصطفي بقول ليها صدقي شت كورتين الاتنين دقن في العارضة.


مرة عايز اصارح ايمان بحبه لها فجلس معها في كافتريا علوم وقال ليها

يا ايمان ما لقيت البت البتفش عليها شريكة حياة.

فاجابت ايمان ومن هي سعيدة الحظ دي

فاجابها انتي يا ايمان فاصابها الزهول

ودها اسوا انواع الحب من طرف واحد يولد مقتولا ويموت مقتولا