Post: #103 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-12-2008, 09:41 PM Parent: #78
Quote: عليكم الله ادوني الاذن الحن الكلام ده ووروني دي أشعار منو؟
سلامات عليك ايضا
ياصافى قلبو عسل
سابحين فى بحر الريد
للشاطئ هل سنصل ؟؟
قلبى الهميم رياد
آدم غرامو كسل
__________________
الفنان الجميل طلال حلفا دي اشعار نادية يعني في كل مداخلة بكتب مكتبة نادية عثمان بس البرلمة نسوي ليها شنو ؟؟
مرحبتين حبابك الف بينا ...
والاذن عند صاحبته فقط انا زواقة لهذا الشعر ..
Post: #63 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-08-2008, 10:19 PM Parent: #20
المسلمي ياأبو تسابيح الغالي
بوجود أمثالك في الدنيا يعم الخير وننعم بالطمأنينة وبأن العالم ليس بمنتهى السؤ !!
رجل يحمل قلبك العصفور بين أضلاعه يسعدني ان جمعني به هذا الوطن الافتراضي وامتدت أواصر المعرفة وتعمقت حتى أصبحت مثار فخرنا واعتزازنا فشكرا جميلا لهذا الصرح الشامخ ولقلبك النقي ايها المسلمي الجميل الدواخل جدا ..
Post: #69 Title: Re: الحبيبة نادية عثمان مرحباااااااا بعودتك .. صباح جميل !! Author: العوض المسلمي Date: 10-09-2008, 06:22 AM Parent: #63
الغاليه ناديه
مليون سلام
Quote: رجل يحمل قلبك العصفور بين أضلاعه يسعدني ان جمعني به هذا الوطن الافتراضي وامتدت أواصر المعرفة وتعمقت حتى أصبحت مثار فخرنا واعتزازنا فشكرا جميلا لهذا الصرح الشامخ ولقلبك النقي ايها المسلمي الجميل الدواخل جدا ..
تلفت يمينا ويسارا لاعرف من المقصود بهذا الحديث ؟؟؟
ليتني اكون ربع ما تقولين ,,,
انه فقط احساس الانقياء الفاضلين تجاه من يعرفون ,,,
شكرا بكري لانك جعلتنا نعرف ناديه واخوان واخوات كريمات صاروا جزء اصيلا من اهلنا
نحس بهم ويحسون بما نشعر ,,,
شكرا ايها الزمن الجميل
وشكرا للغاليه جدا والتي هي اختي وبنت امي كمان انعام حيموره ...
ونلتقي علي الخير
Post: #77 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-09-2008, 02:59 PM Parent: #69
المسلمي الغالي
Quote: تلفت يمينا ويسارا لاعرف من المقصود بهذا الحديث ؟؟؟
ليتني اكون ربع ما تقولين ,,,
بل ليت حروفي العاجزة توفيك بعض حقك أيها الرجل النبيل جدا !!
ربنا يديك على قدر نيتك الطيبة ياأبو تسابيح قول آآآآآآآآآآمين ..
Post: #21 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 10:10 AM Parent: #16
Post: #19 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 09:57 AM Parent: #14
Quote: زهرة رائعة من حديقة يانعة ...
آدم هواك مكشوف
ماغطى نورو ستار
ياحبى ريدنا عفيف
زى روعة الازهار مشروح امام الكون
ماقلنا ياستار
ريدنا المقدس جد
فعل القلوب السار
*** *** ***
الفين مراحب بيك
يانغمة ياالحان
آدم نهار الليل
عامر القلب تحنان
يامرهف الاحساس
ياملك ملوك انسان
يازولى من تبيت
ماشفت ملكا خان!!!
*** *** ***
عازف هواك قلبى
قانون يداعب نآى
اوعك تفارقنى
ترسم خطاوى شقاى
انت الفرح يوم فات
وانت الفرح لو جاى !!
عارفة الولف كتّال
آدم غرامو هناى !!!
_______________
عبود : نادبة عثمان القاهرة عشرة يونيو 2005
Post: #58 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-08-2008, 07:26 PM Parent: #14
عبود الخليفة
الصديق الصدوق والشقيق الغالي عبود
تحية تشبه لون قلبك الأبيض زي اللبن الحليب
ايوة انا هنا من جديد تحت الحاح المحبة والود من هؤلاء الكرام جدا .. سمح؟
Post: #22 Title: Re: الحبيبة نادية عثمان مرحباااااااا بعودتك .. صباح جميل !! Author: طارق جبريل Date: 10-08-2008, 10:15 AM Parent: #1
يا بت حيمورة كيفنك
والله افتقدناها هنا
Post: #24 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 10:33 AM Parent: #22
Quote: والله افتقدناها هنا
نشيل انغامنا تحضن نأى
نجر النمّة والدوبيت
نحب الهامنا لما يقول
نرص القافية بيت فوق بيت
حروفنا السامية مابتتعب
ولابترفض تقولها ابيت !!
تعال ياأدم المحبوب
ياما عشانك اتحديت
نسيتنى خلاص نقول يعنى ؟!!
ولا مشيت واتناسيت ؟!!
بحبك ياعشوق جدا
لو حبيتنى لو صديت !!!!
________________
طارق ياحبيبنا .. نادية عثمان تفاحتي يا آدم 2005 من المكتبة
Post: #65 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-09-2008, 02:35 AM Parent: #22
الغالي طارق جبريل
ماتفقد غالي ان شاء الله وتسلم من شرور الدنيا يارب
Post: #25 Title: Re: الحبيبة نادية عثمان مرحباااااااا بعودتك .. صباح جميل !! Author: عبد الدائم سيد أحمد Date: 10-08-2008, 10:43 AM Parent: #1
اهلا" نوارة كابتود
Post: #27 Title: Re: الحبيبة نادية عثمان مرحباااااااا بعودتك .. صباح جميل !! Author: عبدالله وداعه الامين Date: 10-08-2008, 11:05 AM Parent: #25
بت حيمورة وبت عثمان
نسمتان تهبان جهة القلب صدق ومحبة
كل سنة وانتم كما العهد طيب وريحان
ودي ومحبتي
والعود احمد ندوية الف حمدلله على سلامتك
شكرا انعام
Post: #29 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 11:19 AM Parent: #27
القِـصَّـة
****
القِصَّـة
مَا قِصَّةْ جَفَا
القِصَّة
يَا بَحَرَ الصَّفَا
زولْ
وِاخْتَفَى
إمْكِنْ يِكُونْ
مَرْضانْ شديدْ
وِامْكِنْ كَمَانْ
وَقَعْ إتْكَفَا
وِامْكِنْ يِكُونْ
مَشْغُولْ بِجَدْ
أوْ قَلْبُو مَجْرُوحْ
مَا شَفَى !!
_________________ الشاعر الفذ عبد الله وداعة كل سنة وانت طيب
نادية عثمان 2008
Post: #76 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-09-2008, 01:18 PM Parent: #27
الشاعر والمبدع الجميل الحرف والبوح
عبد الله وداعة الأمين
غيابي القسري عن هذا المكان الذي أحببته كان خصما على عافية القافية وميلاد القصائد لدي والتي كانت تتدفق سلسبيلا عندما تحرض نصوصك الشعرية الحانية حنين الهام الشعر لدي فنتبارى ونتحاور ونضحك ونبكي ونتونش شعرا !!
كن بالقرب ياصديقي علّ القافية تتصالح معي بعد طول هجران .. سمح ؟؟!!
Post: #31 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 11:23 AM Parent: #25
Quote: اهلا" نوارة كابتود
آدمْ حَضَارَةْ كوشْ
****
ألفينْ سلامْ آدمْ
فارسْ حضارةْ كوش
صافي الضَّميرْ أبيضْ
طعمَ الفطيرْ مَرْشوشْ
مرشوشْ لَبنْ أبيضْ
مَا فيهو ايِّ رِتُوشْ
يَا غالي يَا حبِّي
حبيتْ حُكمْ قَرقوشْ
أسْجِنِّي في الشِّريانْ
قَلبَكْ وَسيعْ الحوشْ
عاشقاكْ حَرفْ نازِفْ
يِسكِرْ كَحرفَ الدّوشْ
خليني أسْكنْ فيكْ
وَاهْديني تاجْ وُعُرُوشْ !!
_____________
العريس : عبد الدائم ..آدم حضارة كوش نادية عثمان 2008
Post: #66 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-09-2008, 03:26 AM Parent: #25
ود الخال وقريبي الغالي عبد الدائم سيد أحمد
( ود ناوا) أجدع نااااااااااس
Quote: اهلا" نوارة كابتود
إنت ياعبدو ماتوري الناس دي (كابتود) دي بلد ولا عصيدة بالبامية ولا ملاح روب ولا قايل الناس كلها دناقلة زينا ؟؟
Post: #28 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 11:12 AM Parent: #1
Quote: ليس سوى عجز الحروف واللغة يا(حنانة) فسامحيني ..سمح ؟؟
العِيدْ
عِيدْ ؟؟
بَلاكْ يَا غَالي
كيفِنْ بِبْقَى عيدْ ؟
منُو البِيَقْدَرْ يِضُوقْ
الكَعَكَة
مِينْ بِلْبَسْ جَديدْ ؟
مِنُو البِعَرِفْ مَلامِحْ
الضَّحْكَة في اليومَ السَّعيدْ ؟
وُكيفْ بِيِدُقْ قليبْ
وُدَمْ يَجْري
في وَرِيدْ ؟
عِيدْ ؟؟
كيفْ يَا غَالي
دُونَكْ عِيدْ يِكُونْ ؟
بعيدْ إنْتَ في عُلاكْ
ودمعى يسيل هتُونْ إيهْ مَعْنَى الخَبِيزْ
وُمِلايَاتَ الحَريرْ
وُمَفْرَشْ لونْ ولونْ ؟
مَافي هِلالْ بَلاك
تَعَالْ فَرِّحْ عِيُونْ
بيكْ سَعَدَ الصُّغَارْ
غُنَا وُأرْوَعْ فُنُونْ
_______________
ندويتي يا دوووب الليلة العيد !!
نادية عثمان 2008
Post: #30 Title: Re: الحبيبة نادية عثمان مرحباااااااا بعودتك .. صباح جميل !! Author: مدثر محمد ادم Date: 10-08-2008, 11:20 AM Parent: #28
انعام سلامات وعيد سعيد
وندوية شوقا بحر
مدثر تيف تيف
Post: #32 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 11:37 AM Parent: #30
Quote: انعام سلامات وعيد سعيد
وندوية شوقا بحر
طعم العشق نعناع
رايداهو حد الموت
قلبى الولوف طماع
عايزاهو ليا براى
يلهمنى بالابداع
جننى ياآدم
زيد القليب اوجاع
وصلنى حد البوح
نشوة وهوى وامتاع
عذبنى بالهجران
غرقانة كايسة شراع
اسكنى جوة الروح
غيرك حياتى ضياع
شبّعنى ريدة ونم
اطعم قليبى الجاع
لو يوم تفوت أدم
قسما ارد الصاع !!
________________
مدثر تيف تيف كل سنة وانت طيب
القاهرة 8 اكتوبر 2005 مكتبة نادية عثمان
Post: #79 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-09-2008, 04:00 PM Parent: #30
تيف تيف ياصديقي العزيز
ليك وحشة والله وحزنت لما حدث لك عساط طيب وبالف خير يارب
Post: #33 Title: Re: الحبيبة نادية عثمان مرحباااااااا بعودتك .. صباح جميل !! Author: فتحي الصديق Date: 10-08-2008, 11:38 AM Parent: #1
(مرحب بي ربيعنا الليهو زمن جفااااااااااااانا.......
Post: #34 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 12:17 PM Parent: #33
Quote: مرحب بي ربيعنا الليهو زمن جفااااااااااااانا.......
آدم بكون مرات
زولا خصامو عنيد
ساعات بكون طيب
وقلبو الحنين غريد
بشتاق ويموت فى يوم
ومرات قساوتو تزيد
يقعد شهر دون شوف
وانا قلبى نارو تقيد
مرات يكون زى هم
وساعات بشائر العيد !!
_________
فتحي الصديق .. تفاحتي يا آدم 2005 مكتبة نادية عثمان
Post: #35 Title: Re: الحبيبة نادية عثمان مرحباااااااا بعودتك .. صباح جميل !! Author: هاشم أحمد خلف الله Date: 10-08-2008, 12:24 PM Parent: #33
نعومة الحبيبة صاحبة الأخبار السعيدة مرحب بيك وبأختنا نادية عثمان في عالم المحبة والجمال
Post: #37 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 12:47 PM Parent: #35
Quote: مرحب بيك وبأختنا نادية عثمان في عالم المحبة والجمال
مَا تْسَافِرْ
**** مَا تْسَافِرْ
لَوْ بِتْحِبَّنِي
أوْعى تْغَامِرْ!!
مَا تْخَلِّيني أمُوتْ
في بُعْدَكْ
ألْغِي الفكرَة
وُأَوْعَى تْسَافِرْ
أنَا حَبّيتَكْ
إنْتَ الفِكْرَة
غَرَامْ بالجَدْ
مِنْ نوعاً نَادِرْ
مَا تْخَلِّيكْ في غَيَّك سَادِرْ
شِيلْ الحُلْمَ مَعَايْ
يومْ بَاكِرْ
أنا حَذَّرْتَكْ
بِقَعْ الشَّاطِرْ !!
أسْمَعْنِي وُقُولْ
كِلْمَةْ حَاضِرْ
وُمِنْ نَارْ غضبي
أعْمَلْ سَاتِرْ !!
_________
هشومي .. شفت عوالم الجمال دي كيف .. نادية عثمان 2008
بس مع تعديل بسييييط في بعض الكلمات ، مثلا" (لو كنت جد واحشاك) حتبقي (لو كنت جد مشتاق)
عشان نعمم صيغة المخاطبه لتشمل الجنسين ، طبعا" ده بعد ما أسمع رأيكم وموافقتكم..
لكن كده وروني ، الكاتب منو؟ ناديه أم انعام؟
ده حفظا" للحقوق الأدبيه وبعد كده أكيد الماديه
Post: #94 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-12-2008, 06:32 PM Parent: #91
طلال حلفا سلامااااااااااااات
Quote: لكن كده وروني ، الكاتب منو؟ ناديه أم انعام؟
ده حفظا" للحقوق الأدبيه وبعد كده أكيد الماديه
اها طالما الموضوع فيهو حقوق مادية مع الفلس الحاصل ده فمعليش يانعومة صحبتي مابقدر أقول الشعر ده حقك لكن ممكن أكتب ليك شعر غيرو وأديك تتجدعي بيهو ومافي زول حايجي يقول بكتب ليك هاشم صديق ولا السر قدور فما تقلقي
Post: #38 Title: Re: الحبيبة نادية عثمان مرحباااااااا بعودتك .. صباح جميل !! Author: baha eassa Date: 10-08-2008, 12:50 PM Parent: #35
انعام الحبيبة الغالية .. ..
والله انتي عندك قلب يسع البورد حبــا .. ونحن في حاجة شديدة لنوع هذا الحب مع الخريف و الكتاحات الشديدة في المنبر .. .. شكرا لهذا الحب المتدفق عفوا .. ومرحب الف بعودة حمامة المنبر الرائعة .. ..
Post: #39 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-08-2008, 01:18 PM Parent: #38
Quote: والله انتي عندك قلب يسع البورد حبــا .. ونحن في حاجة شديدة لنوع هذا الحب مع الخريف و الكتاحات الشديدة في المنبر .. .. شكرا لهذا الحب المتدفق عفوا .. ومرحب الف بعودة حمامة المنبر الرائعة .. ..
انا قلبي كيف ينساك
وبينا المحبة سنين
ماتقول زمانا كفيل
انا نزفي دمو ثخين
الساقية دارت بي
وزماني اصلو ضنين
مابجود علي في يوم
واتوسد الياسمين
حبيت حباب حبك
ورقيتو بي يسن
فوقك ملائكة حب
تحرس جنا الصالحين
مادايرة غيرك ريد
وتعال نتم الدين
بس زولي بس يارب
ياهو القلب والعين !!
___________
بهاء الباهي .. تسلم يااارب .. نادية عثمان 2008
Post: #86 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-09-2008, 06:22 PM Parent: #38
بهاء ؟؟
هكذا انت رجل بقلب أبببببض كما اللبن الحليب فكن كما أنت دوما سمح؟
Post: #82 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-09-2008, 04:23 PM Parent: #35
المبدع هاشم أحمد خلف الله
تسلم يارب وعقبال عودة كل طيور عوالم الجمال التي هجرت المكان !!
Post: #80 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-09-2008, 04:07 PM Parent: #33
Post: #44 Title: Re: الحبيبة نادية عثمان مرحباااااااا بعودتك .. صباح جميل !! Author: غادة عبدالعزيز خالد Date: 10-08-2008, 01:53 PM Parent: #43
ندوية الحبيبة... كل عام وإنت بألف خير وسعيدة بعودتك بالرغم من أنني لم أكن أعرف أسباب انقطاعك... إنتي زولة طيبة وقلبك أبيض.. وأثق أن الخير فقط الخير هو سيكون رفيقك... نعومة.. كيفك
مع محبتي لكما غادة
Post: #47 Title: Re: الحبيبة نادية عثمان مرحباااااااا بعودتك .. صباح جميل !! Author: rosemen osman Date: 10-08-2008, 02:05 PM Parent: #44
أخيرا الناس الحلوة جات كل سنة وأنت طيبة أنعام وندوية
Post: #97 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-12-2008, 08:08 PM Parent: #47
روزمين ؟؟
Quote: أخيرا الناس الحلوة جات
هو بالله لو نحنا الناس الحلوة سمح انتو تكونوا شنو يعني ؟؟
ياخ انتي الروعة تمشي على قدمين ( تكسري لي لوح تلج اكسر ليك الواح وانتي تستاهلي ياعسل)
Post: #96 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-12-2008, 07:52 PM Parent: #44
الحبيبة الغالية جدا غادة عبد العزيز
تحية محبة لقلبك الأخضر
Quote: إنتي زولة طيبة وقلبك أبيض.. وأثق أن الخير فقط الخير هو سيكون رفيقك...
والله ياحبيبة يقيني ان في داخل كل منا مساحة متمددة وممتدة من الخير ومنطلقي في الحياة هو ان الدنيا كثيرها وقليلها الى زول فلماذا نناصب بعضنا العداء ونجعل الشر ينتصر على مساحة الخير فينا ؟!!
كلامك الطيب أثلج صدري ورجائي ان اكون عند حسن الظن بي دوما .. وتسلمي يادودي العسل
Post: #101 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-12-2008, 09:09 PM Parent: #48
الشقيق العزيز ياسر طيفور
سلامات يازول ياراااااااقي وليك وحشة والله
Quote: welcome back Nadia
تسلم من كل شر يارب
Post: #95 Title: Re: الحبيبة نادية عثمان مرحباااااااا بعودتك .. صباح جميل !! Author: نادية عثمان Date: 10-12-2008, 07:17 PM Parent: #43
الصحافة امبس تلاتين تود
كمبو شديد ياخي
اي دسن مشتاقري والله
Post: #104 Title: Re: الحبيبة نادية عثمان مرحباااااااا بعودتك .. صباح جميل !! Author: انعام حيمورة Date: 10-12-2008, 09:55 PM Parent: #43
Quote: لا حولاااااا !!
ار سي يااااخي ؟
الوطن الحبيب ابدا دوام لامينا
فى الغربة ام شتات الكعبة جدا شينة
لامينا الوداد واصلا قلوبنا حنينة
_______________
حسوم يا دنقل رغم اني مافاهمة اي حاجة لكن اهو من مكتبة نادية عثمان 2005
Post: #49 Title: Re: الحبيبة نادية عثمان مرحباااااااا بعودتك .. صباح جميل !! Author: محمد عبد الماجد الصايم Date: 10-08-2008, 02:29 PM Parent: #1
أصلو ما عافي ليكـ يا نادية بت مختار !!
Post: #50 Title: Re: الحبيبة نادية عثمان مرحباااااااا بعودتك .. صباح جميل !! Author: عبود عبد الرحيم Date: 10-08-2008, 03:18 PM Parent: #49
Quote: أصلو ما عافي ليكـ يا نادية بت مختار !!
ود الصايم ... انت برضو يا عمكـ ؟؟؟
Post: #53 Title: Re: الحبيبة نادية عثمان مرحباااااااا بعودتك .. صباح جميل !! Author: محمد البشرى الخضر Date: 10-08-2008, 04:05 PM Parent: #1
حمدالله على السلامة ندوية و كل عام وانت بخير
مشكورة يا نعوم على البشارة الطيبة
Post: #59 Title: Re: الحبيبة نادية عثمان مرحباااااااا بعودتك .. صباح جميل !! Author: عاطف عمر Date: 10-08-2008, 07:33 PM Parent: #1
نادية النادية والله سلامات حالتي دي أنا فرحان واشترى في البدل الإسموكنق وكل يوم عندنا درس أنا والست ( بعلتنا ) نتدرب فيهو على كلام القرضمة والأهميات الست حرمنا زاااتا ما قصرت تياب وفساتين لها وللأنجال نظام كل سؤال لازم ليهو ( توب ) يمشي معاهو وفي نهاية الإسبوع ديمونستريشن مع الأنجال القعدة تكون كيف والكلام يكون ونقوم نعمل إسبوتنق للأسئلة المتوقعة ودا كلو عشان السهرة الوعدتينا تعمليها معانا تلفزيونياً قلت نادية دي أكيد بتجهز في السيناريو والمصورين والمخرج
وأكيد أكيد دا الخلانا ما نشوفا في البورد
________________
أها تعالي قولي لى نسيت الموضوع دا ولا متين وعدتكم ؟؟
_______________
إنعام
تشكرات وتحيات
Post: #60 Title: Re: الحبيبة نادية عثمان مرحباااااااا بعودتك .. صباح جميل !! Author: Salah Abdulla Date: 10-08-2008, 07:37 PM Parent: #59
و الله دي أحلى عيدية... مرحب بيك بيناتنا يا ندوية ...نزلتي أهلاً و حللتي سهلاً.... خشمك فيهو السكر يا إنعام.. كل سنة و كلنا تامين و سالمين و غانمين بإذن الله.
Post: #67 Title: Re: الحبيبة نادية عثمان مرحباااااااا بعودتك .. صباح جميل !! Author: HAYDER GASIM Date: 10-09-2008, 04:01 AM Parent: #64
Quote: واحشانا كتير ومنورة وفرحانين بي عودتك
وهو كذلك ... شكرا ... إنعام ... الحنونة. ربما يلزمني أن أقبض على طرف جلبابي, خشية خوض عجول فى محيط نادية عثمان, لكوني لا أعرفها شخصيا, لكنها إنسكبت روحا وقلما وإحساسا فى مجرى عام ... وتناولت { كسائر القراء } نصيبي من ثمر تساقطته, وبخة مع مسك تفوحته, وحرفا من نسيج نولته ... فلها التحية ... ومرحى بعودها الحميد ... مع عاطر الود.
Post: #68 Title: Re: الحبيبة نادية عثمان مرحباااااااا بعودتك .. صباح جميل !! Author: هند محمد Date: 10-09-2008, 05:10 AM Parent: #67
عودا حميدا العزيزة نادية ومنورة البورد من تانى عيدك مبارك وكل عام وانتى بألف خير
العزيزة انعام كل عام وانتى بألف خير ومليون تحية للطفك واحساسك
ربنا يحقق الامانى
Post: #71 Title: Re: الحبيبة نادية عثمان مرحباااااااا بعودتك .. صباح جميل !! Author: عمر صديق Date: 10-09-2008, 07:54 AM Parent: #68
الاخت العزيزة والزمبلة نادية
عودا حميد والبورد نور وانزلي في العوازل كي
الاخت العزيزة انعام
ابقي كذلك في عمل الخير وقوله ولكي الف شكر علي هذه البشارة
Post: #72 Title: Re: الحبيبة نادية عثمان مرحباااااااا بعودتك .. صباح جميل !! Author: عبدالله الشقليني Date: 10-09-2008, 08:00 AM Parent: #67
Quote: وهو كذلك ... شكرا ... إنعام ... الحنونة. ربما يلزمني أن أقبض على طرف جلبابي, خشية خوض عجول فى محيط نادية عثمان, لكوني لا أعرفها شخصيا, لكنها إنسكبت روحا وقلما وإحساسا فى مجرى عام ... وتناولت { كسائر القراء } نصيبي من ثمر تساقطته, وبخة مع مسك تفوحته, وحرفا من نسيج نولته ... فلها التحية ... ومرحى بعودها الحميد ... مع عاطر الود.
باهر بنانك الذي يكتُب ففيه عُذوبة منسابة ودفء وظلٌ لطيف . هذا ما عهدنا دوماً من : الأستاذ : حيدر قاسم تحية لك ومثلك نحن عرفنا روحها من بنانها الذي يكتُب . وبمثل تلك الأرواح وغيرها كثيرون من الذين بنينا بستاناً للجلوس في حضرتهم . كتب الراحل جماع الشاعر :
إننا طيفان في حلمٍ سماوي سرينا
وروحك الوثابة هي من التي سرينا برفقتها . تحية لك ولقلمك الذي يأتمر بأمرة الخير
..
Post: #74 Title: Re: الحبيبة نادية عثمان مرحباااااااا بعودتك .. صباح جميل !! Author: ابراهيم برسي Date: 10-09-2008, 11:04 AM Parent: #1
