انا آه اشتقت ليك .. منى خوجلي

Post: #1
Title: انا آه اشتقت ليك .. منى خوجلي
Author: انعام حيمورة
Date: 09-20-2007, 09:23 PM
Parent: #0

شايل الدموع يا حبي لمن أعود وأجي
أنا آه اشتقت ليك

عشت الظروف القاسية ما كان
بإيدي ولا بإديك
أنا آه اشتقت ليك

شايل الدموع يا حبي لمن أعود وأجي
أنا آه اشتقت ليك

عشت الظروف القاسية ما كان
بإيدي ولا بإديك
أنا آه اشتقت ليك

بعدتني عنك غربتي
وخلتني ديما أهادي ليك
أنا آه اشتقت

بعدتني عنك غربتي
وخلتني ديما أهادي ليك
أنا آه اشتقت

إن شاء الله أنت تكون سعيد
وأنا خلي حالي بجي أحكي ليك
أنا آه اشتقت ليك

اشتقت ليك يا نور صباحي ومشتهيك
أنا آه اشتقت ليك

اشتقت ليك يا نور صباحي ومشتهيك
أنا آه اشتقت ليك

واشتقت للبسمة البتفرح كل زول عاجباني فيه
أنا آه اشتقت ليك

واشتقت للبسمة البتفرح كل زول عاجباني فيه
أنا آه اشتقت ليك

Post: #2
Title: Re: انا آه اشتقت ليك .. منى خوجلي
Author: انعام حيمورة
Date: 09-20-2007, 09:29 PM
Parent: #1

هذه الاجازة كان لها طعم خاص ووقع خاص جدا داخل نفسي ..

قبل ان تاتي منى كنا عبر المسنجر ننسق لبعض الاشياء اولها كان (خط الهاتف) وبالفعل جهزت لها خط ومع خدمة لحنا الجديدة اختارت منى هذه الاغنية لتكون رنة للمتصل بها ..

وطوالي انا برضو اخترتها اصلوا المحاكاة بدت من الحذاء البنى والى ان وصلت لهذه الاغنية ..

Post: #21
Title: Re: انا آه اشتقت ليك .. منى خوجلي
Author: Muna Khugali
Date: 09-22-2007, 09:59 AM
Parent: #2

Quote: اشتقت ليك يا نور صباحي ومشتهيك
أنا آه اشتقت ليك

واشتقت للبسمة البتفرح كل زول عاجباني فيه
أنا آه اشتقت ليك

Quote: هذه الاجازة كان لها طعم خاص ووقع خاص جدا داخل نفسي ..

قبل ان تاتي منى كنا عبر المسنجر ننسق لبعض الاشياء اولها كان (خط الهاتف) وبالفعل جهزت لها خط ومع خدمة لحنا الجديدة اختارت منى هذه الاغنية لتكون رنة للمتصل بها ..

وطوالي انا برضو اخترتها اصلوا المحاكاة بدت من الحذاء البنى والى ان وصلت لهذه الاغنية ..

صفوت الجيلي..
وقعت في غرام هذه الأغنيه وسعيت في البحث عنها سعيا شديد..
وفي قندهار وسط اللحمه وخطفها..جه الزول يبيع الشرايط..
وماكنت عارفه منه البيغني أنا اه اشتقت ليك.. لكن ناجي ووديدي دلونا علي اسمه..
الزول قال ماعنده!
المهم اشترتها لي آسيا هديه وفرحت بيها شديد..
في نفس الوقت انعام لقتها ونزلتها في الموبايل وعملتها لي مفاجأه..
لماذا احب هذه الأغنيه؟
أحس بها مختلفه في ألحانها عن الأغاني الروتينيه..وفي نفس الوقت كلماتها حلوه وبسيطه..كلمات
علي البدوي...وحبيتها أكتر لما لقيت الفنان صفوت الجيلي شاب صغير وهو اللحنها!!
عندنا في السودان ناس حلوين بموهبتهم خالص..

طيب أنا حبيت الأغنيه للأسباب دي..الناس البتتصل بي حبتها ليه؟
يتصلوا.. لما أرد يقولوا لي رديتي ليه..
احنا عايزين نسمع الأغنيه!!

Post: #46
Title: Re: انا آه اشتقت ليك .. منى خوجلي
Author: Muna Khugali
Date: 09-25-2007, 07:33 AM
Parent: #21

Quote:
> العزيزة..منى!!ز
> تحياتى انا من المداومين على المرور بسودانىز اون لاين,,,, بس ما قدمت
> للعضويه.. مرات بتكون عندى رغبة شديده فى المشاركة خاصه المواضيع الفنية..
> عايزة احكى ليك حاجه عن الاغنية الرائعه (إشتقت ليك) فى شهر اكتوبر سنة 2000
> قابلت كاتب وملحن الاغنيةفى مناسبه اجتماعية.. وهى حصاد غربة ثلاثة عشر عاما.
> اسمه جلال مسعود من ابنا رفاعه ومن اسره فنية شقيقته الممثله القديره الجميله
> سميره مسعود..
> وكنت احفظها عن ظهر قلب منذ ذاك الوقت وحقيقة اعجبت بادا الشاب صفوت الجيلى
> ولكننى حزنت كثيرا حينها لانه لم يذكر اسم جلال مسعود البته... انقطعت اخبار
> جلال مسعود بفقد عزيز لى واتمنى ان يعرف الجميع حقيقة هذه الرائعة .... أشتقت
> ليك ,,,,, لك الود عزيزتى ولكل اعضا سودانيز اون لاين الجادين والعافين اهدافهم
> ومقتنعين بيها

> وجدان الملك
> مكتب الشئون الانسانية لدى الامم المتحدة
> الخرطوم , السودان

وصلتني هذه الرساله اليوم صباحا علي بريدي الخاص..وبناء علي طلب صاحبتها أنشرها..
سانشر ايضا ردي عليها..

Post: #48
Title: Re: انا آه اشتقت ليك .. منى خوجلي
Author: Muna Khugali
Date: 09-25-2007, 07:43 AM
Parent: #46

Quote:
> العزيزة..منى!!
> تحياتى انا من المداومين على المرور بسودانىز اون لاين,,,, بس ما قدمت
> للعضويه.. مرات بتكون عندى رغبة شديده فى المشاركة خاصه المواضيع الفنية..
> عايزة احكى ليك حاجه عن الاغنية الرائعه (إشتقت ليك) فى شهر اكتوبر سنة 2000
> قابلت كاتب وملحن الاغنيةفى مناسبه اجتماعية.. وهى حصاد غربة ثلاثة عشر عاما.
> اسمه جلال مسعود من ابنا رفاعه ومن اسره فنية شقيقته الممثله القديره الجميله
> سميره مسعود..
> وكنت احفظها عن ظهر قلب منذ ذاك الوقت وحقيقة اعجبت بادا الشاب صفوت الجيلى
> ولكننى حزنت كثيرا حينها لانه لم يذكر اسم جلال مسعود البته... انقطعت اخبار
> جلال مسعود بفقد عزيز لى واتمنى ان يعرف الجميع حقيقة هذه الرائعة .... أشتقت
> ليك ,,,,, لك الود عزيزتى ولكل اعضا سودانيز اون لاين الجادين والعافين اهدافهم
> ومقتنعين بيها

> وجدان الملك
> مكتب الشئون الانسانية لدى الامم المتحدة
> الخرطوم , السودان

ثم كان هذا ردي مع كل التقدير للأخت وجدان..

Quote: الأخت العزيزه وجدان..

تحياتي..

اشكرك كثيرا علي رسالتك اللطيفه..ويسعدني انك قد قرأتي البوست واستمعتي معنا لأشتقت ليك..

قرات باهتمام ذكرك وتأكيدك في رسالتك عن اسم كاتب كلمات أغنيه اشتقت ليك..والذي هو مختلف عن اسم كاتبها كما جاء في التعريف التفصيلي المطبوع و المصاحب لغلاف الشريط الخاص بالفنان صفوت الجيلي..والذي يحمل نفس اسم الأغنيه "اشتقت ليك"..

ليس هناك ذكر علي الاطلاق لاسم الأستاذ جلال مسعود. كما أكدتي انت..فقط مكتوب كلمات عيسي يروي والذي سأعدله الان من 'علي' 'لعيسي'..خطأ مني..ثم الحان صفوت الجيلي..

أرجو ان يكون هناك تصحيحا من من يهمه الأمر للمعلومه التي اتيتي بها انت.. أو جاءت علي ظهر الشريط الكاسيت..

شكرا مره اخري علي رسالتك ..ورمضان كريم

Post: #60
Title: Re: انا آه اشتقت ليك .. منى خوجلي
Author: انعام حيمورة
Date: 09-26-2007, 08:27 PM
Parent: #46

Quote: العزيزة..منى!!
> تحياتى انا من المداومين على المرور بسودانىز اون لاين,,,, بس ما قدمت
> للعضويه.. مرات بتكون عندى رغبة شديده فى المشاركة خاصه المواضيع الفنية..
> عايزة احكى ليك حاجه عن الاغنية الرائعه (إشتقت ليك) فى شهر اكتوبر سنة 2000
> قابلت كاتب وملحن الاغنيةفى مناسبه اجتماعية.. وهى حصاد غربة ثلاثة عشر عاما.
> اسمه جلال مسعود من ابنا رفاعه ومن اسره فنية شقيقته الممثله القديره الجميله
> سميره مسعود..
> وكنت احفظها عن ظهر قلب منذ ذاك الوقت وحقيقة اعجبت بادا الشاب صفوت الجيلى
> ولكننى حزنت كثيرا حينها لانه لم يذكر اسم جلال مسعود البته... انقطعت اخبار
> جلال مسعود بفقد عزيز لى واتمنى ان يعرف الجميع حقيقة هذه الرائعة .... أشتقت
> ليك ,,,,, لك الود عزيزتى ولكل اعضا سودانيز اون لاين الجادين والعافين اهدافهم
> ومقتنعين بيها

> وجدان الملك
> مكتب الشئون الانسانية لدى الامم المتحدة
> الخرطوم , السودان

Quote: وصلتني هذه الرساله اليوم صباحا علي بريدي الخاص..وبناء علي طلب صاحبتها أنشرها..
سانشر ايضا ردي عليها..

تحيات يا وجدان الملك وسلام ..

عارفة كلامك دا لو طلع صح البوست دا بكون كشف عن حقوق ملكية .. واذا كان بالفل جلال مسعود هو صاحب هذه الاغنية ممكن يرفع عليهم دعوة بس انتي اتينا بالخبر اليقين ..

لانو انا في مرة من المرات زول اهداني قصيدة وقال لي كتبتها في الوقت داك انا كانت عندي نزعة تلحين وكدة !! قمت اجتهدت شديد في تلحينها وسط ضحك الهام اختى !! المهم يوم قاعدة في التلفزيون اشوف ليك الهادي الجبل بغني قصيدتي الما تغباني !! بس حفاظا على البيني بين الزول الجاب لي القصيدة ما سكيت الموضوع !!

شفتي !!

هسي انتي سكي الموضوع لو صحيح جلال مسعود هو صاحب القصيدة ببقى ليه حق نطلعوا ليه حتى لو الاغنية عاجبانا .. اهم حاجة كل زول ياخد حقوا .. ما سمعتي بسرقة النصوص وكدة !!

خالص الشوق لك

Post: #72
Title: Re: انا آه اشتقت ليك .. منى خوجلي
Author: Muna Khugali
Date: 10-01-2007, 10:58 PM
Parent: #60

انعام حرام عليكي!

خلصنا من كلام صوتك السمح واسمح من اصوات الفنانين ..فلان وفلان..
بقينا كمان في نزعة التلحين؟

بصراحه..

انتي جريئه خالص

Post: #3
Title: Re: انا آه اشتقت ليك .. منى خوجلي
Author: انعام حيمورة
Date: 09-20-2007, 09:35 PM
Parent: #1

كان شوقا عميقا التقينا به منى خوجلي بعد ان انتهى يوم عملي فقد ذهبنا انا واشراقة لنسلم عليها ..

عارفين عملت شنو ادست وراء الباب وخلعتنا (وهـ) كبيرة وسلام بشوق وحنين ..

Post: #4
Title: Re: انا آه اشتقت ليك .. منى خوجلي
Author: محمد سنى دفع الله
Date: 09-20-2007, 10:21 PM
Parent: #3

شفتيها عملت فينا شنو
لمن جيتو لينا في الشركة
تقول لي نور الهادي جاء لوحده
وانا شلت هم وحنيت عليهو جاي بالمواصلات
والراجل السكري اقوم عليهو ونتلوم معاه
المقالب هي ستها
لكن مشتاقين ليها وليكم
ولي كل الحلوين بورداب الخرتوم
مودتي

Post: #36
Title: Re: انا آه اشتقت ليك .. منى خوجلي
Author: Muna Khugali
Date: 09-24-2007, 08:39 AM
Parent: #4

Quote: شفتيها عملت فينا شنو
لمن جيتو لينا في الشركة
تقول لي نور الهادي جاء لوحده
وانا شلت هم وحنيت عليهو جاي بالمواصلات
والراجل السكري اقوم عليهو ونتلوم معاه
المقالب هي ستها
لكن مشتاقين ليها وليكم
ولي كل الحلوين بورداب الخرتوم
مودتي

هوووووي السني وأنعام..
خلاص يعني انا سار علي اني بتاعة مقالب موش؟
سمح انتظروا لي كلكم

الاختفاء وراء الباب وهجمة الزول الجاي حاجه لذيذه جدا..بس بشرط الزول ما يكون عنده مرض زي
مرض القلب وماشابه..تبقي بعدين حسره احنا ماقدرها!

والغريبه الزول البيتهجم..ممكن تكرر فيه نفس الحركه بأشكال مختلفه..وبرضه يتهجم!!
وهجمة الناس دي حاجه بحبها جدا..اظني بعوض بيها الهجمات العملوها ناس البيت فيني وأنا صغيره..أصلي كنت خوافه جدا.. وباليل مستحيل اتحرك في البيت براي..مع انه كان بيت صغير..
بتذكر مره كنت نايمه في السرير بجانب الشباك..وجات خالتي ومعاها أحد اقربائي وجروني من قدمي..وكان يوم اسود..صريخ لغايه اسه يكون صداه في اذنهم..بس بعد كده هم تابوا لكن أنا
بديت..واسه طوالي بهجم آيه
يا سلام علي شهقة الهجمه وفتيح العيون في خلعه وبعدها تعليق..

ماما حرام عليكي..هجمتيني!

وطيب انا اصلي عايزه أعمل شنو غير أهجمك حبيبتي؟؟

Post: #5
Title: Re: انا آه اشتقت ليك .. منى خوجلي
Author: Alsa7afa_30
Date: 09-20-2007, 10:41 PM
Parent: #1

أنا هسي جيت طيران افتكرتها أغنية بصوت منى خوجلي

رمضان كريـم على الجميع..

Post: #41
Title: Re: انا آه اشتقت ليك .. منى خوجلي
Author: Muna Khugali
Date: 09-24-2007, 04:18 PM
Parent: #5

Quote: أنا هسي جيت طيران افتكرتها أغنية بصوت منى خوجلي

رمضان كريـم على الجميع..

ياسلام عليك ..جبت لينا الاغنيه وأنا من أول ماسمعتها في نفس الأمسيه وانا مبسوطه شديد..
ربنا يخليك..

علي فكره انا زعلانه علشان صوتي ماينفع في الغنا علي الأطلاق..ولو ماكده كنت غنيت ليكم جنس غنا!!

شكرا ليك كتير وكل سنه وانت طيب

Post: #6
Title: Re: انا آه اشتقت ليك .. منى خوجلي
Author: محمد عثمان
Date: 09-20-2007, 11:15 PM
Parent: #1

يااا سلاااااااام
و من منا لا يشتااق ايضا
لحظاات جميلة لا تنسى ابدا
التحية للاخت منى خوجلى...
و شكرا انعاام لهذا البوست الذى فعلا
تستحقه الجميلة منى خوجلى...

Post: #43
Title: Re: انا آه اشتقت ليك .. منى خوجلي
Author: Muna Khugali
Date: 09-24-2007, 08:21 PM
Parent: #6

Quote: يااا سلاااااااام
و من منا لا يشتااق ايضا
لحظاات جميلة لا تنسى ابدا
التحية للاخت منى خوجلى...
و شكرا انعاام لهذا البوست الذى فعلا
تستحقه الجميلة منى خوجلى...

محمد عثمان..
كده نتحرم من وداعك با راجل ياكلك ذوق وتهذيب؟؟
فاتتك حاجات كتيره بس انت كنت مشغول عازرنك ..عارفه اسباب فوق الاراده..
عارف اكتر حاجه في لماتنا عجبني شنو؟
لالالا ما الأكل بس..
لكن احنا كل ما بنتقابل كنا بنعرف بعض أكثر..ونستفيد من الونسه البينا وبنضحك كتير..

ايه رايك في اغنية البوست؟؟

رمضان كريم..

Post: #7
Title: Re: انا آه اشتقت ليك .. منى خوجلي
Author: nourelhadi awad
Date: 09-21-2007, 00:52 AM
Parent: #1

من عندك الشوق ببتدي
ويفقد نهايتو
ويسكن لطافة ضحكتي
ويتفنك

كنا هناك
فعدنا
وياليتنا....

Post: #8
Title: Re: انا آه اشتقت ليك .. منى خوجلي
Author: هاشم أحمد خلف الله
Date: 09-21-2007, 05:15 AM
Parent: #7

وانا كمان يا إنعام إشتقت ليك ولمني خوجلي ولكل البورداب حول العالم .

Post: #70
Title: Re: انا آه اشتقت ليك .. منى خوجلي
Author: Muna Khugali
Date: 10-01-2007, 00:55 AM
Parent: #8

Quote: وانا كمان يا إنعام إشتقت ليك ولمني خوجلي ولكل البورداب حول العالم
.

والله يا هاشم ايام جرت زي الهوا..

وبعدين الناس الفنانه كانت كتير يوم قندهار وغيره..انت وسميه وتماضر ونور والسني..معقوله بس الحلاوه دي كلها؟
اسه انا لو عايزه امشي السودان الا كلكم تكونوا هناك..والا الأجازه بتكون ناقصه شديد..
اليوم داك انت كان عندك مفاجأه وأنا كان عندي مفاجأه..وفي الآخر طلعت مفاجاتنا واحده..تتذكر؟

والله انا مشتاقه ليك ولكل لماتنا الحلوه..
سلم علي هودي..وضروري المره الجايه تكون في...علشان نفرح أكتر..وعلشان انت وهي ماتقاقوا علي بعض!

Post: #67
Title: Re: انا آه اشتقت ليك .. منى خوجلي
Author: Muna Khugali
Date: 09-30-2007, 12:02 PM
Parent: #7

من عندك الشوق ببتدي
ويفقد نهايتو
ويسكن لطافة ضحكتي
ويتفنك

كنا هناك
فعدنا
وياليتنا....

نور..
أظنه والدك ووالدتك قرروا انك تكون نور وهادي علشان كده سموك نور الهادي..موش؟
لكن أظنهم ماعارفين بالجانب التاني المع الهدوء ده..زي السني ..مع انه صاحبك لكن ماعارفك..
انت بالمناسبه يا نور السني ده طيب وبريء بشكل مبالغه فيه.زلدرجة انه انت غشيته..صح؟
قول الحقيقه يانور..انت من الصباح شغال تغش فيه بالتلفون..وأنا اتبعت بس ماطلبته مني!
المقلب كله انت الدبرته ونظمته وقبل كده خططت ليه..تتذكر لما نزلت من العربيه قبلنا ودخلت كأنك جيت براك؟
لكن بيني وبينك السني ذاته بالغ..ياخ انت نزلت قدامه من العربه..وشافك وهو واقف في الباب..
وهو لسه واقف في الباب انعام وأنا نزلنا..كيف يعني ما يربط بينا؟

المهم يا جماعه احنا دخلنا عند السني ومكتبه السمح شديد في امدرمان..
جابو لينا عصير جميل بنشرب فيه..نشوف نور الهادي مشي..افتكرناه مشي يصلي الظهر..بلا جه داخل بسندوتش قدر الليله وبكره..وانتو ناس صايمين ممكن تتخيلوا منظره كيف!
وبجانب احنا ما كنا فاطرين..كان عندنا برضه حمي الفجعه.. حمي عجيبه مسكتني في الخرطوم..
قمت قلت ليه أديني حته!

تصدقوا رفض؟

عديل كده قال لي لأ!

ومش كده بس كنكش في السندوتش بشكل غريب جدا..
وأمام حالة الجوع وقرب بكائنا وجرستنا..طلب لينا السني ساندوتشات!

بس بيني وبينكم..كانت ساندوتشات رهيبه!

اصبر لي يا نور أنا لسه ما اتفشيت

Post: #9
Title: Re: انا آه اشتقت ليك .. منى خوجلي
Author: osman righeem
Date: 09-21-2007, 09:23 AM
Parent: #1

احباب مني خوجلي
احباب الله ادام الله المودة
وجعل كل ايامكم حلوة بالوفاء
والتقدير و المعزة

Post: #71
Title: Re: انا آه اشتقت ليك .. منى خوجلي
Author: Muna Khugali
Date: 10-01-2007, 02:15 AM
Parent: #9

Quote: احباب مني خوجلي
احباب الله ادام الله المودة
وجعل كل ايامكم حلوة بالوفاء
والتقدير و المعزة

عثمان..

انت لازم تكون في السودان لما نمشي المره الجايه..
ده اذا بقي في مره جايه..
الحال يا عثمان رغم كل الهدوء الظاهر مابيتشكر..
البلد كلها هجومات وأسلحه..وناس بتحدر لبعضها..
واي شيء متوقع وفي اي لحظه ممكن يحصل..ربنا يكضب الشينه!
مالنا احنا ومال الهم هنا؟
خلينا في حبنا وضحكنا اسه..وبعدين نشوف البلاوي..
المهم انت ماحكيت لينا عن مصر لسه..
هاتحكي متين؟

Post: #10
Title: Re: انا آه اشتقت ليك .. منى خوجلي
Author: Muna Khugali
Date: 09-21-2007, 09:30 AM
Parent: #1

ومعاهم ورده بيضاء....

Post: #11
Title: Re: انا آه اشتقت ليك .. منى خوجلي
Author: سمية الحسن طلحة
Date: 09-21-2007, 10:32 AM
Parent: #10

وأنا
أصلو أشواقي لابتكل ولا بتمل

Post: #74
Title: Re: انا آه اشتقت ليك .. منى خوجلي
Author: Muna Khugali
Date: 10-01-2007, 11:29 PM
Parent: #11

Quote: شوفتي ياسمسم اللمه حلوه كيف؟
وماها أي لمه!

أنا غايته لما اتذكر ضحكنا الكثير براي اقعد اضحك..مع الشيه والرجال القاعدين في العناقريب والكراسي في قندهار.. والنساء البتعمل الشيه والمشروب الأبيض نسيت اسمه..حاجه جميله جدا يا سمسم فيها حميميه سودانيه عجيبه..ولا دي غربة الستاشر سنه ياربي بتزيد احساسنا بالحميميه والبحث عنها؟؟

أنا غايته بحبك شديد..لكن..
لبان منك ماداااااااايره

Post: #12
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 07:24 AM
Parent: #1

Quote: شفتيها عملت فينا شنو
لمن جيتو لينا في الشركة
تقول لي نور الهادي جاء لوحده
وانا شلت هم وحنيت عليهو جاي بالمواصلات
والراجل السكري اقوم عليهو ونتلوم معاه
المقالب هي ستها
لكن مشتاقين ليها وليكم
ولي كل الحلوين بورداب الخرتوم
مودتي

الممقلب الاول .. السني

عارف اصل الحكاية شنو .. تعال احكيها ليك .. انا من الصباح مشيت سقت منى خوجلي من البيت نزلتها في مشوار .. في الخرطوم .. انا لما خلصت مشاويري قلت ليها اجيك .. قالت لي لا تعالي لي آخر اليوم نمشي للسني .. وانا مع نور الهادي اتقابلنا هسي .. المهم خلصت شغلي ومشيت عليهم .. قالوا لي نحن من الصباح شغالين مقالب في السني .. وبالفعل ضربوا ليك تلفون لما بطني وجعتني من الضحك .. ومشينا ولما وصلنا نور نزل مننا في الباب وعلى بال ما عملت باركن وجينا كان ما كنا مع بعض ..

وعلى الرغم من انو منى بي دا كلو ما بتعرف تمسك نفسها ورمت ليها كم رمية كدة انا ونور الهادي نضحك لكن انت ماكنت جايب خبر .. وسط ضحكنا .. الانت مفتكروا عشان سندوتش الطعمية البخل بيه نور الهادي على منى !!

والله كان يوم في قمة الروعة .. وابت نفسي الا ان افطنك على جزء من المقلب قبل ما نمشي ..والكاميرا الخفية كانت روح اليوم ..

تسلم على ابداعك العجيب

Post: #13
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 07:43 AM
Parent: #1

Quote: أنا هسي جيت طيران افتكرتها أغنية بصوت منى خوجلي

يا حسوم .. تسسلم ياسيدي على الاغنية لاني كنت بحاول انزل فيه اول لكن ما قدرت .. كل سنة وانت طيب ورمضان كريم .. بس ..خليها تشتغل (Auto) عشان الاغنية دي ليها وقع خاص جدا عند منى وبالتالي عندي ولينا معاها ذكريات حلوووووة ..

وذي ما قلت عاملنها في الموبايل نغمة استقبال وارسال والمسجل في الاوضة الحنينة مع رقصات منى المبدعة !!

لك مودة خاااصة جدا

Post: #14
Title: Re: انا آه اشتقت ليك .. منى خوجلي
Author: عاطف عمر
Date: 09-22-2007, 07:43 AM
Parent: #1

يا بختكم يا إنعام
منى خوجلي عوالم من الصدق والمعرفة و الجمال
تمنح حياتنا فرحاً طفولياً ونحن نراها عبر هذه ( الشاشات ) نتكلم معها عبر هذا الكيبورد فكيف يكون حالكم وأنتم تحادثونها وترافقونها .؟
هنيئاً لكم
هنيئاً لكم

Post: #73
Title: Re: انا آه اشتقت ليك .. منى خوجلي
Author: Muna Khugali
Date: 10-01-2007, 11:17 PM
Parent: #14

يا بختكم يا إنعام
Quote: منى خوجلي عوالم من الصدق والمعرفة و الجمال
تمنح حياتنا فرحاً طفولياً ونحن نراها عبر هذه ( الشاشات ) نتكلم معها عبر هذا الكيبورد فكيف يكون حالكم وأنتم تحادثونها وترافقونها .؟
هنيئاً لكم
هنيئاً لكم

ياريت يا عاطف لو كنت معانا في الخرطوم..كنت قابلت معانا شله عجيبه..تلقاها كده في سبق مع اي حاجه!
المره الجايه انتو تجو في نفس مواعيدنا..احنا نفسحكم في الخرطوم وضواحيها..وانتو عدوا بينا بالبنظون لرفاعه..ممكن؟

عارف الخرطوم دي بلد جميله لو عندك برامج مع الاصحاب والاهل فيها...بالذات الأصحاب لأنهم مابيحبوا قعدة البيوت..والأهل جنهم يتكوا فوق السراير وتضطر انت كمان تتكي معاهم!
لكن آخر مره قبل ما اسافر بنات جدي جوني في البيت ومعاهم ولد خالي..قمنا قررنا نعمل حفله بزغاريدها...وقعدنا ناكل ونرقص مع عثمان حسين ووردي!

قلت ليك يا عاطف..عندي قطيعه بسيطه كده..
انعام مره أهلها أدوها أوامر..اسألها الأوامر كانت شنو؟!

Post: #15
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 07:58 AM
Parent: #1

Quote: و من منا لا يشتااق ايضا لحظاات جميلة لا تنسى ابدا

محمد عثمان..

هكذا هي منى تحب ان تجمع الناس على المحبة والصفاء والاخاء والنقاء .. فكنا سعداء بلقاءك في حضرتها ..كل سنة وانت طيب ورمضان كريم ..

البركة فيكم و نتلاقى في ساعة خير يارب..

Post: #16
Title: Re: انا آه اشتقت ليك .. منى خوجلي
Author: نهلة عمر
Date: 09-22-2007, 08:35 AM
Parent: #15

الحبيبة انعام ربنا يديم المحبة و الخوة بيناتكم و يخليكم لى بعض و يرد غربة كل البعيدين يا رب

Post: #75
Title: Re: انا آه اشتقت ليك .. منى خوجلي
Author: Muna Khugali
Date: 10-02-2007, 00:09 AM
Parent: #16

Quote: الحبيبة انعام ربنا يديم المحبة و الخوة بيناتكم و يخليكم لى بعض و يرد غربة كل البعيدين يا رب

أمين..

كان نفسي اشوفك مع المجموعه يا نهله..لكن يبدو ان ظروفك ماسمحت..
المره الجايه بأذن الله..

رمضان كريم..

Post: #98
Title: Re: انا آه اشتقت ليك .. منى خوجلي
Author: Muna Khugali
Date: 10-13-2007, 01:37 PM
Parent: #75

كل عام وانتم بخير..

مع الموده وصادق الحب...

Post: #17
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 08:38 AM
Parent: #1

Quote: من عندك الشوق ببتدي
ويفقد نهايتو
ويسكن لطافة ضحكتي
ويتفنك

كنا هناك
فعدنا
وياليتنا....

نور الهادي .. غايتو كان ما عد بابكر دي كنت قلبت الهوبة في الاجازة دي ..اما الشوق دا فخليه ساي ..

وحقيقة رفقتك حلوة ..مكتب الحاج .. مكتب السني .. قندهار .. لذيذ .. جبل اولياء .. دار العجزة والمسنين ..

وساتي لكل رفقة على حدا .. لك منى تحية عظيمة ايها المبدع ..

Post: #18
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 09:18 AM
Parent: #1

Quote: وانا كمان يا إنعام إشتقت ليك ولمني خوجلي ولكل البورداب حول العالم .

هاشم .. ونحن كمان مشتاقين اكتر ..

واكتر حاجة يا هاشم محيرة كل البورداب الود والشوق البتلاقو بيه خاصة اول مرة ..

سعدنا جدا برفقتك وكتر من الاجازات بس المرة الجاية ام احمد تكون معاك عشان نتفادى الاتصالات والحكاوي اللايف ..

Post: #19
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 09:32 AM
Parent: #1

Quote: احباب مني خوجلي
احباب الله ادام الله المودة
وجعل كل ايامكم حلوة بالوفاء
والتقدير و المعزة

عثمان رغيم وحبابك انت بينناوياريت لو كان حصلت الاجازة دي .. اكيد كنا حا نعمل خماسي وسداسي رائع !!

كل سنة وانت طيب ورمضان ..

Post: #78
Title: Re: انا آه اشتقت ليك .. منى خوجلي
Author: Muna Khugali
Date: 10-02-2007, 11:45 AM
Parent: #19

Quote: عثمان رغيم وحبابك انت بينناوياريت لو كان حصلت الاجازة دي .. اكيد كنا حا نعمل خماسي وسداسي رائع !!

شوفتي يا انعام عثمان رغيم ده احنا نجيبه مخصوص المره الجايه الخرطوم..
نعمل أنا وانت خطه..
نعمل الأتنين واقعات في مشكله في الخرطوم ومافي زول ممكن يحلها الا هو..
انا متأكده بيخلي اي حاجه ويجي طيران..لأنه ماهايقدر يجي جاري طبعا..
وبعديم لما يجي نعمل برنامج كبييييير..
لكن المشكله يا انعام..
اليوم ما بيكفي؟
اليوم فيه 24 ساعه بس..
قولي نمنا منه 4 ساعات..
وقولي مديرط طول باله عليك وخلاكي تشتغاي 4 ساعات..
وقولي عم حسن وحنانه سكتوا علي مسخرتنا 3 ساعات..
وكمان ماتنسي العوارض الحلوه والتانيه الماحلوه..أهه فضل شنو؟
ده غير بلاويني أنا الماكتيره زيك باعتبار أنا جايه اجازه!
بس نوع تسمم وده مابياخد اكتر من يومين بالدربات وحقن الوريد المنومه..يعني غصبا عني..
سمح فضل شنو يا انعام في اليوم وفي الأجازه؟
اقول ليك كلام؟
أحسن نقنع حنانه وعم حسن يجوا في برامجنا..وبكده نكون استفدنا من التلاته ساعات..حريفه موش؟
لمعلوميتك بقي..هي مرقه مره مرتين منهم معانا وبراهم تاني يقولوا مامشيين ..
ومش كده بس..يقولوا لينا كمان امشوا براكم وابتسامه تحنيس ورضا علي وجوههم..طبعا في زول بيقدر يتحمل سبق الحياه ده في الخرطوم؟؟

ده تكتيك حلو لعثمان رغيم ولناس البيت..اتمسكي بيه كويس وماتكلميهم..خصوصا عثمان!

Post: #20
Title: Re: انا آه اشتقت ليك .. منى خوجلي
Author: د.محمد حسن
Date: 09-22-2007, 09:39 AM
Parent: #1

Quote: اشتقت ليك يا نور صباحي ومشتهيك
أنا آه اشتقت ليك

اشتقت ليك يا نور صباحي ومشتهيك
أنا آه اشتقت ليك

واشتقت للبسمة البتفرح كل زول عاجباني فيه
أنا آه اشتقت ليك

واشتقت للبسمة البتفرح كل زول عاجباني فيه
أنا آه اشتقت ليك

وانا كمان

Post: #79
Title: Re: انا آه اشتقت ليك .. منى خوجلي
Author: Muna Khugali
Date: 10-03-2007, 06:13 AM
Parent: #20

Quote: وانا كمان

يا محمد الحسن انعام دي مرات عندها حركات مزعجه جدا..وطبعا أنا برضه عندي بعض الطباع المزعجه!
الموضوع النكلمك بيه..
قسمنا خطة التحضير لزيارة دار الأيتام والمسنين..
نعومي كلفتها بأنها تتصل بناس محدده تدعوهم للزياره..
كانوا افتكر خمسه افراد..
وقلت ليها بتصل بيك اشوفك عملتي شنو..
وطبعا انا يثق فيها شديد لأنها بيعتمد عليها فعلا من ناحية همه ونشاط متحمس..وتاني البساط بينا أحمدي..
المهم أنشغلت أنا بتنظيم الواجب علي..ومن طباعي السيئه اني بحاول دايما أتأكد انه الحاجات ماشيه صح..ودي طبعا حاجه مزعجة للتانيين..

اتصلت بيها وسألتها..
اهه انعام عملتي الأتصالات؟
أيوه..
كلها؟
أيوه كلها!
طيب وريني اتصلتي بمنو؟

عارف قالت شنو..

اتصلت بفلان كلمته..واتصلت بفلانه ومالقيتها..
أهه التانيين حصل معاهم شنو؟
ما أتصلت بيهم!

طبعا أنا اتضايقت جدا وقلت ليها..

طيب اسه انتي مش قولتي اتصلتي بيهم كلهم؟
ليه قلتي كده؟ في فرق بين كلهم وبين اتنين من خمسه!!

عارف بدل ما تعتذر طوالي قالت لي شنو؟؟

ياخي أصلها هي محكمه!
طبعا انا مع حر الخرطوم داك وزنقة الشغل اتغظت منها جدا..وقمت بالواجب!

بس الكويس في الموضوع..انه الناس لما بتعرف طبع بعض ..وعنها ثقه ببعض وبتحرص علي صداقتها لبعض بتتفهم الموضوع في سياقه وبتحرص انه الأشياء ماتمشي في اتجاهات ماياها..

بعد 10 دقايق نعومي اتصلت وأدتني الأخبار الأكيده..مش قلت ليك في الأول همتها عاليه؟
ضحكنا وضحكوا معانا ناس الدار..

أهه..انت جاي الخرطوم متين؟؟

Post: #22
Title: Re: انا آه اشتقت ليك .. منى خوجلي
Author: تماضر الخنساء حمزه
Date: 09-22-2007, 10:01 AM
Parent: #1

Quote: وقعت في غرام هذه الأغنيه

أنا وقعتا في غرامك إنتي والإنعامين ديل..

Post: #82
Title: Re: انا آه اشتقت ليك .. منى خوجلي
Author: Muna Khugali
Date: 10-03-2007, 02:29 PM
Parent: #22

أنا وقعتا في غرامك إنتي والإنعامين ديل..

كيف كانت تكون الخرطوم بدونك؟
ناقصه موش؟

وكنت محظوظه وفرحانه شديد يوم وريتيني انك ماشيه الخرطوم..قلت دي اجازه السما ذاتها
هاتفرح بيها..
اصله الشعراء ديل مجانين وأنا بحب المجانين..لأ لأ ما اي مجانين طبعا!!
المجانين بالحلاوه واللطف وبيغرقوا في حب الجمال..

فقدتك كتير في قندهار..
ده كان يكون يوم أعجب لو كنتي جيتي...
سمسم وهشومي وانتي!
...........

ايه رايك يا تمرا..نشرك الباقيين معانا في تصور يوم جبل أولياء؟
النيل والحجر العجيب اللمانا في صفوف؟
وفي سهرتنا في البيت؟
مع غناء محمد ميرغني وعثمان حسين؟
وفي لمتنا في عرس خالك؟

بقرايتك وشعرك أكتبي لينا عنهم..وعن القريتيهو فيهم..
والمشروع الجاي يا حبيبتي..بيكون كبير شديد..
فيه لمه أكبر وتآلف أكتر وحب أكبر..
فيه لو ربنا ادانا العمر..
جمال اكبر من اي خيال..

Post: #23
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 10:22 AM
Parent: #1

Quote: ومعاهم ورده بيضاء....

وانتي قلبك الابيض العامر بحب الناس وحب الخير ..

خليني احكي ليهم عنك وعن رفقتنا بكل تفاصيلها وعن .. وعن ..

في اول يوم وصلت منى كان بكري ابو بكر عازمنا عشاء في بيتهم قلت لبكري منى خوجلي وصلت الخرطوم وبالفعل شرفت الحفل ووسط دهشة كل الحاضرين بتشريفها وسلام وشوق وياولدي وياناجي ويا وديدي ..ويا .. ويا .. وحتى الساعات الاولى من الصباح ..

وتاني يوم وكان اول مشوار مشيناه مع بعض كان لمقر منظمة سودانا .. حيث حملة وليد دارفور .. وفي ذاك الوقت كنا .. نستعد لجهيز الملابس وفرزها .. قلت ليها تمشي معاي قالت لي طوالي .. مشينا وطوالي تفاعلت مع الموضوع ووقفت على حجم العمل .. ادت رأيها في الحملة وانها عمل ضخم جدا .. وحتى اتصلت بمنال خوجلي واستاذ نبيل عشان يجوا يشوفوا حجم العمل في حملة انقذوا وليد دارفور ..

Post: #24
Title: Re: انا آه اشتقت ليك .. منى خوجلي
Author: Ishraga Haimoura
Date: 09-22-2007, 10:47 AM
Parent: #1

منى من الناس الذين يمنحون كل مكان يحلون عليه، نكهة خاصة ورائعة
حقا سعدنا بإجازتها وسعيها الجميل لجمع الشمل
تحياتي أم آية وسلامي لها

Post: #89
Title: Re: انا آه اشتقت ليك .. منى خوجلي
Author: Muna Khugali
Date: 10-06-2007, 03:49 PM
Parent: #24

Quote: منى من الناس الذين يمنحون كل مكان يحلون عليه، نكهة خاصة ورائعة
حقا سعدنا بإجازتها وسعيها الجميل لجمع الشمل
تحياتي أم آية وسلامي لها

اشراقه تاني بتمرقي مع انعام في الظهر بدون عربيه؟
ولا بتخليها تتفق مع السواق علي أجرته؟

تصدقي انا انعام دي ما بحرم منها..المره القالتها دي ما كانت أول مره..المره الأولي عملت نفس الحركات ودار نفس الحوار..بس حصلت الموضوع قبل ما يبقي شكله!

لكن بيني وبينك منظر السواق لما يلف صينية نمرة اتنين ويرجع يعاين لينا بشماته لما يلقانا
واقفين لسه.زعرقانين وزهجانين واي امجاد يقول لآ ما بمشي.. وبعدين يقوم يسألنا..
أهه مالقيتو زول يوصلكم بقروشكم القولتوهادي؟
وبعدين يقوم يطلع لينا لسانه ويمشي علشان يرجع تاني..كان منظر مضحك جدا
لكن المضحك أكتر نرفزتها هي ونهرتها ليه..
قال شنو..
أمشي من هنا وأوعك تجي تاني!!

طبعا انا فاهمه منطقها هي لأنها قاعده في البلد وعارفه الأسعار..لكن انا برضه بالنسبه لي
انا عندي منطق..
اولا شايفه انه المشوار بعيد علي القروش القالتها هي..امكن يكون تمن السوق..لكن لسه انا
شايفاه شويه..
تاني مافي وقت نضيعه في فرق 5 ألف..
ثالثا..شمس الخرطوم الحاره ديك ..والله يطلب اي قروش نديها ليه..انعام دي ما نصيحة ولا شنو؟
وعلي كل حال ألسواق ذاته مانصيح..اسه دي قروش يطلبها؟
أنا لو منه من البيت ذاته ما أمرق لشغل فيه قروش بسيطه كده

لكن السواق طلع كاواااااااي!!

مشتاقييييين..سلمي عي سلمي وبنات الهام..

Post: #25
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 12:34 PM
Parent: #1

Quote: وأناأصلو أشواقي لابتكل ولا بتمل

سمية .. الفة عجيبة جمعتنا وكأننا اصدقاء الطفولة .. في كل لحظة بتذكر ذلك اليوم الجميل الذي جمعنا معا انا وانتي ومنى !!

ولك شوقا عميقا مني ومن منى !!

Post: #26
Title: Re: انا آه اشتقت ليك .. منى خوجلي
Author: asmhan hashim
Date: 09-22-2007, 12:45 PM
Parent: #25

منـــــي

مشتاااااااااااااااااقين

Post: #27
Title: Re: انا آه اشتقت ليك .. منى خوجلي
Author: عاصم ابوبكر حامد
Date: 09-22-2007, 12:53 PM
Parent: #1

الاخت انعام
لكى كامل تقديرى ...

وعبرك التحية والسلامى
الى الاخت والخالة والحبوبة منى
واتمنى ان تكون بخير اينما تكن ....

تسلموا

Post: #103
Title: Re: انا آه اشتقت ليك .. منى خوجلي
Author: Muna Khugali
Date: 10-24-2007, 02:01 AM
Parent: #27

Quote: الاخت انعام
لكى كامل تقديرى ...

وعبرك التحية والسلامى
الى الاخت والخالة والحبوبة منى
واتمنى ان تكون بخير اينما تكن ....

تسلموا

ازيك يا عاصم..
ليه مالاقيناك المره دي في الخرطوم؟

فاتتك برامج كتيره والله وكلها حلوه..
كل سنه وانت طيب..نتلاقي المره الجايه ان شاء الله..

Post: #28
Title: Re: انا آه اشتقت ليك .. منى خوجلي
Author: انعام حيمورة
Date: 09-22-2007, 01:15 PM
Parent: #1

Quote: منى خوجلي عوالم من الصدق والمعرفة و الجمال

عاطف .. كريم الاخلاق

عارف انا مرات لما تتكلم ولا تكون داخلة في حوار مع زول بكون مستمع جيد بشكل لانها مدرسة ونحن بنتعلم منها ..

مودتي

Post: #29
Title: Re: انا آه اشتقت ليك .. منى خوجلي
Author: أحمد الشايقي
Date: 09-22-2007, 02:00 PM
Parent: #1

شوق مبثوث على الهواء مباشرة

من القلوب إلى القلوب

وشوق عام إنساني اصـيـل

الشخص النبيل (منى) يستحق هذا واكثـر

ببساطة لأنه يحمل هذا وأكثر للإنسانية وللقيم

ولأنه يضع الأنموذج والمثال, ولأننا, ببساطة , نحبه..

أحمـد الشايقي

Post: #30
Title: Re: انا آه اشتقت ليك .. منى خوجلي
Author: انعام حيمورة
Date: 09-23-2007, 07:57 AM
Parent: #1

Quote: الحبيبة انعام ربنا يديم المحبة و الخوة بيناتكم و يخليكم لى بعض و يرد غربة كل البعيدين يا رب

يا سلام يانهلة ياريت لو كنتي لاقيتيها .. لكن الجايات ارحب واسعد ..سعدت بلقاءك بالامس جدا ..تسلمي يارب

Post: #31
Title: Re: انا آه اشتقت ليك .. منى خوجلي
Author: معتصم الطاهر
Date: 09-23-2007, 08:06 AM
Parent: #1

أنا صف الحبايب فيك
وكل العاشقين خلفي ..

Post: #49
Title: Re: انا آه اشتقت ليك .. منى خوجلي
Author: انعام حيمورة
Date: 09-25-2007, 07:58 AM
Parent: #31

Quote: أنا صف الحبايب فيك
وكل العاشقين خلفي ..

معتصم الطاهر ..

كل سنة وانت طيب ورمضان كريم .. وهذا تعبير بليغ اعجبني جدا وحقيقة منى انسانة تتحبها من جوة القلب لانو نيتها بيضاء وقلبها كبير بيسع كل الناس ..

مودتي لك

Post: #87
Title: Re: انا آه اشتقت ليك .. منى خوجلي
Author: Muna Khugali
Date: 10-04-2007, 10:38 PM
Parent: #31

Quote: أنا صف الحبايب فيك
وكل العاشقين خلفي ..

معتصم انا لما اشوفك بشوف أهلي كلهم..
وعليك المحبه البينا لله في لله دي..
المره الجايه تجي الخرطوم..
عندنا برامج كتيره هاتعجبك شديد...
لكن كدي النقول ليك قبل اي حاجه..
علشان ماتقول أنا عامل رجيم..
احنا جننا أكل..موش السودانيين ديل كلهم مستحيل يتلموا بدون اكل ولا شراب؟؟
اهه احنا سودانيتنا اكبر..
يبقي ناكل سمك في المورده..
أو نمشي نصطاده من جبل اولياء..ماتنسي ..جيب معاك سيناره بتغمز
والمشاوير كتيره في الخرطوم يامعتصم..
واحدات تبقيك انسان أكتر..
وتانيات تزيد في ايمانك..
ومنهم البيخلوك تفرح بالدنيا زياده..
وغايته..انت بس تعال..

Post: #32
Title: Re: انا آه اشتقت ليك .. منى خوجلي
Author: انعام حيمورة
Date: 09-23-2007, 08:41 AM
Parent: #1

Quote: وانا كمان

د. محمد حسن أعرف انك من حيران منى الاصليين ولا ما كدة .. حقيقة تمنيت ان نلتقى ونحن في رحاب منى ..

البرامج فاتتك لكن الجايات اكتر ..

كل سنة وانت طيب ورمضان كريم

Post: #33
Title: Re: انا آه اشتقت ليك .. منى خوجلي
Author: osman righeem
Date: 09-23-2007, 09:09 AM
Parent: #1

اخت الخير انعام

عليك الله و بمناسبة الشوق ده كلوا
قولي لي مني تشيل صورة كونداليزا رايس سنة 2040 دي من البروفايل
مهما تكتب حاجة ظريفة معا الصورة دي تتلخبط
و بعدين عيني اتحولت لاني بفرأ بعين و العين التانية علي الصورة
انت ماعارفة انه كوندي بتاعة نظرية الفوضي الخلاقة!
يلا حتي لو تعملي حملت توقيعات

معتمدين عليك في الموضوع ده

Post: #51
Title: Re: انا آه اشتقت ليك .. منى خوجلي
Author: انعام حيمورة
Date: 09-25-2007, 10:29 AM
Parent: #33

Quote: اخت الخير انعام

عليك الله و بمناسبة الشوق ده كلوا
قولي لي مني تشيل صورة كونداليزا رايس سنة 2040 دي من البروفايل
مهما تكتب حاجة ظريفة معا الصورة دي تتلخبط
و بعدين عيني اتحولت لاني بفرأ بعين و العين التانية علي الصورة
انت ماعارفة انه كوندي بتاعة نظرية الفوضي الخلاقة!
يلا حتي لو تعملي حملت توقيعات

معتمدين عليك في الموضوع ده

اخو الخير / عثمان رغيم

كيفك وكل سنة وانت طيب .. وبرضو كمان مشتاقين لشوفتك .. شفت هسي انا قدرت اصل مرحلة انو تجيب ليها قرد اسمح شوية .. والمرحلة الجاية بعمل تغيير جزري ..

ومعًا لاعادة صورة بروفايل منى !!

Post: #34
Title: Re: انا آه اشتقت ليك .. منى خوجلي
Author: انعام حيمورة
Date: 09-23-2007, 10:49 AM
Parent: #1

Quote: أنا وقعتا في غرامك إنتي والإنعامين ديل..

طم طم وكما يحلو لمنى تمرا ..ازيك ومشتاقين ..

حصل قبل كدة قلت طم طم دي ادروب ولوف جدا..

وفي حفل اقامتها منال خوجلي على شرف منى اهة طم طم منى عزمتها مبيت المشكلة انو لما جينا لقينا طم طم ست البيت عديل ومش كدة قاعدة تعزم فينا النبي بيتوا عليكم الله بيتوا !!!

الخنساء الفتك عجيبة واتحدى الما وقع في غرامك !!

تحياتي وشوقي لك

Post: #35
Title: Re: انا آه اشتقت ليك .. منى خوجلي
Author: انعام حيمورة
Date: 09-23-2007, 11:38 AM
Parent: #1

Quote: منى من الناس الذين يمنحون كل مكان يحلون عليه، نكهة خاصة ورائعة
حقا سعدنا بإجازتها وسعيها الجميل لجمع الشمل
تحياتي أم آية وسلامي لها

شقيقة الروح اشراقة ..

عليك الله مش المرة دي كان لنا معها صولات وجولات .. تتذكري !

لما اتوفت ام احمد على القاسم اشراقة ضربت لي مني ومنى ضربت لي وجوني في المكتب وطوالي اتحركنا لما طلعنا الشارع عايزين نركب امجاد لحدي الكلاكلة المهم انا مصرة على انو يكون مبلغ المشوار من 10-12 وبتاعين الامجاد يقولوا من 15-20 .. المهم وقفت كم واحدة كدة .. منى زهجت وقعدت تقول لي ما معقول الشمس وجعت راسنا وخلاص 15 15 حا نعمل شنو يعني في واحد وقفناه ورفضن لف وجاء تاني لقانا لسة واقفين قعد يضحك علينا وجاء راجع انا حلفت ما نركب معاه لانو كريه اتغظت منو لانو ضحك علينا

ومنى وكورت فيني المهم انا زعلت وقلت ليهم الجاية دي لو قال بي عشرين حا نركبها وانا الحا ادفع !! حردان السوق مين برضي !!

ولما المشوار وصل النص كانت الزعلة راحت مشينا ادينا واجب العزاء وجينا اتغدينا مع اشراقة ..

Post: #37
Title: Re: انا آه اشتقت ليك .. منى خوجلي
Author: غادة عبدالعزيز خالد
Date: 09-24-2007, 08:49 AM
Parent: #35

منى وإنعام

حفظكما الله وأسعدكما

حبي

غادة

Post: #38
Title: Re: انا آه اشتقت ليك .. منى خوجلي
Author: ياسر ميرغنى عبدالرحمن
Date: 09-24-2007, 09:12 AM
Parent: #37

انا كمان
ذى ماقال معتصم الطاهر

أنا صف الحبايب فيك
وكل العاشقين خلفي ..

Post: #54
Title: Re: انا آه اشتقت ليك .. منى خوجلي
Author: انعام حيمورة
Date: 09-26-2007, 08:12 AM
Parent: #38

Quote: انا كمان
ذى ماقال معتصم الطاهر

أنا صف الحبايب فيك
وكل العاشقين خلفي ..

ياسر ميرغني .. كل سنة وانت طيب ورمضان كريم .. شفت كيف كلنا واقفين في الصف .. لكن مش منوية دي تستاهل ؟!!

Post: #104
Title: Re: انا آه اشتقت ليك .. منى خوجلي
Author: Muna Khugali
Date: 10-27-2007, 01:37 AM
Parent: #38

Quote: انا كمان
ذى ماقال معتصم الطاهر

أنا صف الحبايب فيك
وكل العاشقين خلفي ..

ازيك يا ياسر وكيف الخرطوم الأيام دي؟
انا طبعا لما وصلت الخرطوم جيت مكتب ابن خالتي في شارعك..
وجيت معاه الأجزخانه عندكم وسبت ليك ورقه فيها تلفوني..بس خساره ماسمعت منك..
ربنا يجمعنا في ساعة خير ولا مظاهرة خير..
اصله الخير في السودان بيجي بعد ضرب وبومبان ومحاكم ولا شنو؟

مشتاقييين...

Post: #52
Title: Re: انا آه اشتقت ليك .. منى خوجلي
Author: انعام حيمورة
Date: 09-25-2007, 11:19 AM
Parent: #37

Quote: منى وإنعام

حفظكما الله وأسعدكما

حبي

غادة

شفتي لو عايزة تجي اجازة لازم تنسقي مع جية منى عشان نكون فريق فريد من نوعه .. اجازتك الفاتت خليناها ليك للعرس لكن المرة الجاية بتكون حقتنا ..

حبي وحب منى

Post: #88
Title: Re: انا آه اشتقت ليك .. منى خوجلي
Author: Muna Khugali
Date: 10-04-2007, 11:31 PM
Parent: #37

Quote: منى وإنعام

حفظكما الله وأسعدكما

حبي

غادة

غاده..

اليوم داك لقيت صوره لسعاد مع ماما جاره وأبله زينب في احدي التجمعات..
وبعدين اتفرجنا علي شريط فيديو وانتي ورشا بتقروا في قصايد عن الشهداء في ذكراهم..

أسه عايزين نتلاقي تاني في الخرطوم..ممكن؟
انتي عندي ياغاده زي رشا وانجي..عزيزه وغاليه وبحبك شديد..

Post: #39
Title: Re: انا آه اشتقت ليك .. منى خوجلي
Author: انعام حيمورة
Date: 09-24-2007, 11:19 AM
Parent: #1

Quote: منـــــي

مشتاااااااااااااااااقين

اسمهان ..

دوما انتي رائعة ..

منى قالت لي المرة دي عايزة نعمل حاجة نستفيد منها .. حا اعمل ليكم ورشة عمل ..

وكانت الفكرة نتلم نحن البنات في بيت منال ونعمل الورشة مع التجهيزات البسيطة من توفير بورد وورق وكدة .. وبالتنسيق مع منى تمت دعوة عدد ما يقارب الـ 13 ..

اسمهان قامت بمجهود عظيم الا وهو توفير القاعة لتكون محل لعمل الورشة ..

حددنا اليوم والزمن وبالفعل بدأت الورشة وكانت حقيقة اضافة لنا لاننا استفدنا منها جدا ..

كان النقاش مثمر جدا ..

ودا جانب من المشاركات في الورشة ..

ودا جانب آخر

وسعدنا كثيرا بتشريف الاخ صلاح شتات للورشة ..

ومن زاوية اخرى

اسمهان بمجهودك كان اليوم ناجح جدا جدا .. الله يخليكي لينا

Post: #55
Title: Re: انا آه اشتقت ليك .. منى خوجلي
Author: asmhan hashim
Date: 09-26-2007, 10:17 AM
Parent: #39

كتر خيرك يا انعام
لكن دائما الفكرة هى البتكون الاصل
يعني انتى ومنى فكرتو واحنا بس ساعدناكم فى التنفيذ

تحياتي..

Post: #40
Title: Re: انا آه اشتقت ليك .. منى خوجلي
Author: انعام حيمورة
Date: 09-24-2007, 11:37 AM
Parent: #1

Quote: الاخت انعام
لكى كامل تقديرى ...

وعبرك التحية والسلامى
الى الاخت والخالة والحبوبة منى
واتمنى ان تكون بخير اينما تكن ....

تسلموا

عاصم تسلم لكن كدي النسألك انت وين طيلة الفترة الفاتت دي سافرت ولا شنو ؟؟ عشان كل البرامج مع خالتو وحبوبة منى فاتتك ..

الجايات ارحب

Post: #42
Title: Re: انا آه اشتقت ليك .. منى خوجلي
Author: علاء الدين حيموره
Date: 09-24-2007, 05:20 PM
Parent: #40

الاستاذة / منى

شوق أنعام ليك خلانا نشتاق ليك .. وشوقتنا اكتر وانا ارى الهام وعوضية ..

يخليكم كلكم يارب ..

أتمنى ان التقيك في البوستات التي تحمل في طياتها الجمال ..

مرة أخرى

معذرة أختي منى ..

شكرا انعام .

Post: #44
Title: Re: انا آه اشتقت ليك .. منى خوجلي
Author: هاشم أحمد خلف الله
Date: 09-24-2007, 08:37 PM
Parent: #42

يـا مـنـي انـتـي الـمـنـي
إنـتـي الـنـضـارة بـأكـمـلـهـا
وبـلـسـم جـراحـنـا الـمـؤلـمـة
صـادقـة فـي حـديـثـك مـؤمـنـة
حـبـك حـقـيـقـي والـلـه يـضـمـنـا
نـهـواك كـتـيـر يـعـلـم ربـنـا
يـا أمـنـا ... يـا أخـتـنـا
مـا انـتـي فـيـنـا ومـنـنا
إنـتـي نـورنـا... إنـتـي ضـلـنا
إنـتـي بـسـمـاحـتـك كـلـنـأ

Post: #45
Title: Re: انا آه اشتقت ليك .. منى خوجلي
Author: سمية الحسن طلحة
Date: 09-24-2007, 10:26 PM
Parent: #44

Quote: .. في كل لحظة بتذكر ذلك اليوم الجميل الذي جمعنا معا انا وانتي ومنى !!

وأنا أصلا مانسيت اليوم داك لحظة عشان أتذكره

Post: #107
Title: Re: انا آه اشتقت ليك .. منى خوجلي
Author: Muna Khugali
Date: 10-30-2007, 08:41 PM
Parent: #44

Quote: يـا مـنـي انـتـي الـمـنـي
إنـتـي الـنـضـارة بـأكـمـلـهـا
وبـلـسـم جـراحـنـا الـمـؤلـمـة
صـادقـة فـي حـديـثـك مـؤمـنـة
حـبـك حـقـيـقـي والـلـه يـضـمـنـا
نـهـواك كـتـيـر يـعـلـم ربـنـا
يـا أمـنـا ... يـا أخـتـنـا
مـا انـتـي فـيـنـا ومـنـنا
إنـتـي نـورنـا... إنـتـي ضـلـنا
إنـتـي بـسـمـاحـتـك كـلـنـأ

هشومي الكلام السمح ده ماعرفت أرد عليه لما قريته!
وربنا يعلم قدر شنو أنا برضه بهواكم
وحتي وأنا ماقادره أعبر..برضه بقولها..انت عندي غالي زي محمد ومصطفي ومعتصم...

وبعدين انت لسه ما وريتني
انت ماشي تحججني ولا توديني العمره؟
اوعك تكون نسيت..انت موش المره الفاتت قلت بتوديني؟
ما انا عاد أختك البتحبك وانت أخوي البيتمني لي الخير..
ان ما وديتني الحج ولا العمره تكون ماداير لي الخير..
ولا اقول ليك..
خلي الحج..بحج بقروشي ان شاء الله..لكن انت وديني العمره..
وتاني ما تمشي الخرطوم الا نتفق علي المواعيد..
ونقوم نكلم سميه طلحه..
ومحمد المرتضي..
ونور الهادي
وأحمد عبدالله..
وخنساء..
ونتفق مع مجدي وعمده وعادل وناس تانيه كتيره.. كلنا نتقابل في الخرطوم في اجازه واحده..
بس كيتن تكوي سموهن شنو ديلك..
وما نخلي مكان في الخرطوم بدون نمشي ليه..
كويس؟
تسلم لي هشومي...

قلت ليك قبال تمشي..

المره الجايه ومع اشعارك جيب الستاذ الملحن ممكن

Post: #56
Title: Re: انا آه اشتقت ليك .. منى خوجلي
Author: انعام حيمورة
Date: 09-26-2007, 12:21 PM
Parent: #42

Quote: الاستاذة / منى
شوق أنعام ليك خلانا نشتاق ليك .. وشوقتنا اكتر وانا ارى الهام وعوضية .. يخليكم كلكم يارب ..

أتمنى ان التقيك في البوستات التي تحمل في طياتها الجمال .. مرة أخرى .. معذرة أختي منى .. شكرا انعام .

شقيقي ..

يا الله يا علاء ياريت لو صادفت منى معنا وخاصة في البيت المرة دي جاتنا كتير تعال احكي ليك ..

المرة الاولى جات لما محمد جابوا ليه (حسن) جات باركت وسلمت على الحاجة بعد رجوعها من القاهرة ..

في المرة التانية الحاجة كانت عيانة وهي يا علاء صاحبة واجب مافي منها اصلا ..

المرة الثالتة انا كنت عيانة جات معتلة بالاكياس وانا ذي الطفلة فرحت جدا وقلت ليها جبتي لي معاك شنو !!

المرة الرابعة دي اسكت خليها ساي ..

كانت معاي في المكتب اليوم كله دا قبل رمضان بيوم واحد .. واتفارقنا آخر اليوم وهي كان اليوم دا شوية كدة شاعرة بي حمى والظاهر اني عاديتها .. المهم نهاية اليوم .. هي ركبت امجاد عشان توديها الرياض وركبت بطريقة خلت عمنا بتاع الامجاد يضحك عليها .. المهم انا برضو مشيت البيت ويادوب ما وصلت لقيتها ليك في وشي .. في شنو ؟؟ الحصل شنو ؟؟ مالك ؟؟ والاسئلة تنهال عليها مني وهي تقول لي قولي بسم الله مافي حاجة !! كيف مافي حاجة .. قالت لي تلفوني فقده !!

يالله ضاع الموبايل .. ضربنا في جرس .. قلت ليها طالما في جرس ما اتسرق .. هي تقول لي النتيجة واحدة عندي هو مفقود !! طبعا اختك دقيقة دقة تحير ذاتو !!

جات هي ومنال وركبنا مشينا رجعنا المكتب وفتشنا مالاقينا .. اهة المسئول من الامن حق الشركة حقتنا (بدرالدين) قال ليها بكون وقع في الامجاد وبتاع الامجاد دا طيب وراجل كبير !! بجيبوا ..

اهة نحن نشيل ونضرب والجرس شغال قصدي الاغنية دي شغالة (انا آه اشتقت ليك ) وبرغم الموقف الا انو الزول يستمتع بالاغنية لحدي النهاية ..

المهم ومحالاوت مستميتة جدا لارجاع الموبايل ومافي فايدة ..

لما مشوا يرجعوني البيت .. قالت لي محمد اخوي والله الليلة كنت عيانة لكن العيا ذاتو طار .. الحمى راحت وين ما بعرف !!

وفجأ اتصل بي مديرنا الاداري بقول لي بدرالدين عايزك .. ضربت لي بدر الدين .. يا انعام الموبايل رد علي وببالفل طلع الراجل بتاع الامجاد !!

وضرب لي منى ومنى ضربت ليه وانا ضربت لي منى والقصة جاطتت جدا ..

عمك بتاع الامجاد طلع ساكن في الحاج يوسف .. منى قالت ليه تعال بديك حق المشوار المهم عمك شاور اولاده وركبوا كلهم وجوا الرياض لبيت ناس منى ..

وماكان الا هذا قدر حتى يرزق الله بتاع الامجاد واولاده وبركة صابح صيام واذا بمنى تضاعف له حق المشوار مع الاعتزار له ..

ورغم التعب الا انه كان يوم ظريف !!

Post: #105
Title: Re: انا آه اشتقت ليك .. منى خوجلي
Author: Muna Khugali
Date: 10-27-2007, 02:04 AM
Parent: #42

Quote: الاستاذة / منى

شوق أنعام ليك خلانا نشتاق ليك .. وشوقتنا اكتر وانا ارى الهام وعوضية ..

يخليكم كلكم يارب ..

أتمنى ان التقيك في البوستات التي تحمل في طياتها الجمال ..

مرة أخرى

معذرة أختي منى ..

شكرا انعام .

ازيك يا علاء..

اجازة الخرطوم المره دي كانت مختلفه..مليانه حياه..
والحمدلله ماكان عندنا بكيات كتيره خالص..
ولا ناس مريضه مرض جديد ياها امراضهم وياهو فقرهم وفلسهم غير كده مافي حاجه!
المهم لما تمشي اجازه في وقت جايين فيه ناس تانيين من بره.زبيكون في برامج كتيره يومك ما
بيكفي تقضيها..كل زول بيكون حريص علي البرامج وحضورها..
ولمة المجموعه حلوه..كاننا بنعرف بعض من ولدونا!
سنلتقي دائما ياعلاء في الأوقات الجميله.. وفي الكلمه الطيبه.. وفي محنة اهلنا ودفء مشاعرهم..
بنتقابل هنا وفي الخرطوم وفي أي محل الله كاتبه..

تسلم أخوي علاء والبينا عامره دايما بأن الله..

Post: #47
Title: Re: انا آه اشتقت ليك .. منى خوجلي
Author: انعام حيمورة
Date: 09-25-2007, 07:41 AM
Parent: #1

Quote: شوق مبثوث على الهواء مباشرة
من القلوب إلى القلوب
وشوق عام إنساني اصـيـل
الشخص النبيل (منى) يستحق هذا واكثـر
ببساطة لأنه يحمل هذا وأكثر للإنسانية وللقيم
ولأنه يضع الأنموذج والمثال, ولأننا, ببساطة , نحبه..
أحمـد الشايقي

احمد الشايقي يا قريبي وينك مختفى ما ظاهر والله مشتاقين وفقدناك الاجازة دي ما جاي على العيد ؟؟ المرة دي كان جيت بمشي معاك الدويم وعد !!

تجي بالسلامة

Post: #50
Title: Re: انا آه اشتقت ليك .. منى خوجلي
Author: رهف
Date: 09-25-2007, 08:00 AM
Parent: #47

الحبيبة انعام حيمورة
البوست لفتة رائعة جدا والعزيزة منى تستحق اكتر فلها التحية
صور الورشة الرائعة بس يا نعومة ياختى صورتنا انا واسمهان وشتات دى مالها شينة كدا ما ظبتى الاضاءة ولا شنو ولا اخترتى الصور الشينة
لك تحياتى وحبى
ورمضان كريم

Post: #53
Title: Re: انا آه اشتقت ليك .. منى خوجلي
Author: osman righeem
Date: 09-26-2007, 07:34 AM
Parent: #1

اخت الخير
انعام
اسعد الله صباحك بكل خير

شفتي الغالية عاملة شنو
كديسة ينقز فوقها فار

غايتو

انا فهمت الرمز تقصد الكديسة النائمة السودان
والفار يا الشعبي يا الوطني

بعدين حنشتغل صيني
سنة القرد
سنة الحمار
سنة الفار
سنة العتود

تحياتي و بروفايل حلو

خليك ماشية في الموضوع

Post: #57
Title: Re: انا آه اشتقت ليك .. منى خوجلي
Author: انعام حيمورة
Date: 09-26-2007, 12:37 PM
Parent: #1

Quote: ياختى صورتنا انا واسمهان وشتات دى مالها شينة كدا

يارهف بس ذكرتيني انا والكاشف اخوي بي كلامك دا

Post: #58
Title: Re: انا آه اشتقت ليك .. منى خوجلي
Author: Tabaldina
Date: 09-26-2007, 02:34 PM
Parent: #1

..
.

Imiss u like crazy
__________________

رمضان كريم لآل حيموره .. وانعام عبدالحفيظ
والملكة .. وافطارا هنيئاً يا ناس الخرطوم ..

Post: #59
Title: Re: انا آه اشتقت ليك .. منى خوجلي
Author: nourelhadi awad
Date: 09-26-2007, 07:19 PM
Parent: #1

تاني برضي إشتقت ليك

Post: #66
Title: Re: انا آه اشتقت ليك .. منى خوجلي
Author: انعام حيمورة
Date: 09-30-2007, 07:13 AM
Parent: #59

Quote: تاني برضي إشتقت ليك

Post: #61
Title: Re: انا آه اشتقت ليك .. منى خوجلي
Author: عاطف عمر
Date: 09-26-2007, 09:39 PM
Parent: #1

Quote: منى كتبت بأحرف من نور إسمها في قلوب كل عشاق الجمال وكل أنصار الكلمة النظيفة وكل أصحاب المبادئ الغير قابلة للمساومة .
إنني أحترم صمتها يا إنعام لكنني أثق أن لديها الكثير لتقوله
- عندما يتكلم الكثيرون عن قضايا المهمشين بمعلومات قصاراهم فيها ما يرد في نشرات الأخبار ... منى خوجلي كانت هناك ، ركلت الغرف المكندشة والأسرة الوثيرة لتكون وسط إخوتها وأخواتها تحس وتطبب وتداوي .
- عندما يتكلم الناس عن معارضة النظام متأبطين ( كيبوردات ) وجمل تنسخ وتلصق ... منى خوجلي كانت من دخل سجون النظام لتقدم المثل الأروع ومنى خوجلي كانت من يتحرك ويكتب وينسق ، شهدتها القاهرة وأسمرا ولندن وعواصم كثيرة مما لا أعرف
- عندما يحتار الناس في إنشقاقات حركة حق التي أصبحت ( حركات ) على رأى الصديق الحبيب أبو ساندرا .... أكيد عند منى الخبر اليقين فهي كانت هناك ضمن أربعة أو خمسة وضعوا اللبنات الأولى لهذا الجسم لكنها لا تتكلم وشكراً مستحق هنا للصديق د. حيدر بدوي أن جعلنا نعرف هذه المعلومة من خلال أحد بوستاته

أذيع لك سراً يا إنعام

كتبت لها يوماً في بريدها الخاص وقلت لها أنك تملكين كل أدوات الكتابة فاكتبي وتملكين المادة الثرية فاكتبي وتملكين القبول والقبول هبة إلهية فاكتبي .

صدقيني يا إنعام يوم ( تتحزم ) منى خوجلي للكتابة سوق يضع كثيرون ( أنا منهم ) أقلامهم ويتفرغون للقراءة والقراءة فقط .
فهل أنت معي في رأيي هذا يا إنعام ؟؟؟

Post: #62
Title: Re: انا آه اشتقت ليك .. منى خوجلي
Author: انعام حيمورة
Date: 09-27-2007, 07:43 AM
Parent: #1

Quote: فهل أنت معي في رأيي هذا يا إنعام ؟؟؟

يا عاطف انا بتفق معاك تماما لانو انا في اي مداخلة تحصل في لحظة من فضلك طوالي بقراها وفي كتير ما الاحيان بكتفى بالقراءة بس وما بقدر اعلق ..
دائما بقول لمنى كدة لكن بتشجعني على اني لازم اكتب ما اكتفى بالقراءة ..

وهسي هاك الصورة دي :
فتوى جديدة للأزهـر تعتبر زواج المسلسلات حقيقـياً !!!!

اما لو جيت قعدت تسمعها وهي بتتكلم فاحسن لك تكون مستمع جيد .. ومستمع جيد جدا!!

Post: #63
Title: Re: انا آه اشتقت ليك .. منى خوجلي
Author: انعام حيمورة
Date: 09-27-2007, 07:57 AM
Parent: #1

Quote: يـا مـنـي انـتـي الـمـنـي
إنـتـي الـنـضـارة بـأكـمـلـهـا
وبـلـسـم جـراحـنـا الـمـؤلـمـة
صـادقـة فـي حـديـثـك مـؤمـنـة
حـبـك حـقـيـقـي والـلـه يـضـمـنـا
نـهـواك كـتـيـر يـعـلـم ربـنـا
يـا أمـنـا ... يـا أخـتـنـا
مـا انـتـي فـيـنـا ومـنـنا
إنـتـي نـورنـا... إنـتـي ضـلـنا
إنـتـي بـسـمـاحـتـك كـلـنـأ

Post: #64
Title: Re: انا آه اشتقت ليك .. منى خوجلي
Author: انعام حيمورة
Date: 09-29-2007, 07:35 AM
Parent: #1

Quote: Imiss u like crazy
__________________

رمضان كريم لآل حيموره .. وانعام عبدالحفيظ
والملكة .. وافطارا هنيئاً يا ناس الخرطوم ..

تبلدينا .. كل سنة وانت طيب .. الله اكرم .. وتصوم وتفطر على خير..

والله فقدانك في الافطار ..

في رحلة جبل اولياء والتي كانت بمبادرة من منى خوجلي وحا اجي لحكاوية في الرحلة دي كتيرة لكن فيما يخص الشاب تبلدينا ..

رجعوا معاه اشراقة حيمورة وملكة سبأ.. وملكة سبأ كانوا رحلوا في بيت جديد في الكلاكلة والمطرة في النواحي ديك عاملة عمايل .. وزايد على كدة اخوانا تبلدينا داخل الايام دي في دور Manager والعربية جديدة لنج ..

ولما كانت جلالة المكلة لا تعلم شعاب هذه النواحي .. راح عليها بيتهم !! وبقوا تبلدينا واشراقة يفتشوا في البيت .. وبعد صعوبة شديدة لقوا البيت !!

Post: #65
Title: Re: انا آه اشتقت ليك .. منى خوجلي
Author: انعام حيمورة
Date: 09-29-2007, 05:15 PM
Parent: #1

بعد الافطار مباشرة .. أنا آه اشتقت ليك

Post: #68
Title: Re: انا آه اشتقت ليك .. منى خوجلي
Author: نهلة عمر
Date: 09-30-2007, 03:29 PM
Parent: #65

نعومى الله يجازيك شبكتينى فى الغنية دى شبكة شديدة و لما اشتاق اسمعا اجى افتح البوست مخصوص -لكن فعلا غنية جميلة بمعنى الكلمة

Post: #69
Title: Re: انا آه اشتقت ليك .. منى خوجلي
Author: انعام حيمورة
Date: 09-30-2007, 07:35 PM
Parent: #1

Quote: قمت قلت ليه أديني حته!

تصدقوا رفض؟

عديل كده قال لي لأ!

وبعد عدل عن قرار( لأ) جاء ماسك السندوتش بين ايدينو ذي طريقة الشفع ديك وخايف منى بعد دا تشيل منه (حتة)!!

كان يوم لن انساه ابدا لانه كان ممتع بالجد

Post: #76
Title: Re: انا آه اشتقت ليك .. منى خوجلي
Author: انعام حيمورة
Date: 10-02-2007, 06:56 AM
Parent: #1

Quote: انعام حرام عليكي!

خلصنا من كلام صوتك السمح واسمح من اصوات الفنانين ..فلان وفلان..

بقينا كمان في نزعة التلحين؟

بصراحه..

انتي جريئه خالص

شفتي كيف يا منى !!!!

في كل مرة بتكتشفي حاجة موش ؟؟!!!

بعدين انا بحاول استفيد من قدراتي وملكاتي الذاتية .. تقولي لي حرام عليكي ؟؟!!

Post: #77
Title: Re: انا آه اشتقت ليك .. منى خوجلي
Author: احمد العربي
Date: 10-02-2007, 09:49 AM
Parent: #76

جمال شديد
محبه كتيره ليكم
مودتي

Post: #80
Title: Re: انا آه اشتقت ليك .. منى خوجلي
Author: osman righeem
Date: 10-03-2007, 07:09 AM
Parent: #1

Quote: شوفتي يا انعام عثمان رغيم ده احنا نجيبه مخصوص المره الجايه الخرطوم..
نعمل أنا وانت خطه..
نعمل الأتنين واقعات في مشكله في الخرطوم ومافي زول ممكن يحلها الا هو..
انا متأكده بيخلي اي حاجه ويجي طيران..لأنه ماهايقدر يجي جاري طبعا..
وبعديم لما يجي نعمل برنامج كبييييير..

الغاليةالاخت مني

هس انا في مشكلة
مشتاق ليكم
حصلوني .

دعوة للعيد في دبي

لكن اكيد سوف احضر عند ضربة البداية
لمؤسسة صندوق الخير
واكيد سوف اكون من المدعوين لاول حفل خيري
يقيمه صندوق الخير
لقيام مستشفي الخير للاطفال

بعدين :- ما تعملوا مشكلة عشان حأزعل منكم و ما اجي
لكن اعملوا حاجة حلوه مفرحه زيكم
تلقوني علي طول عندكم

مني الله يخليك ويمتعك بالصحة والعافية
ويديم عليك نعمة الفرح والدهشة والانفعال مع الجمال و الحق

Post: #81
Title: Re: انا آه اشتقت ليك .. منى خوجلي
Author: انعام حيمورة
Date: 10-03-2007, 07:36 AM
Parent: #1

Quote: قلت ليك يا عاطف..عندي قطيعه بسيطه كده..
انعام مره أهلها أدوها أوامر..اسألها الأوامر كانت شنو؟!

انتي يامنى عليك الله هسي خليتي زول ما كلمتيه .. !!

يعني جات على عاطف .. احكي ليه ..!!

وانا ذاتي قاعدة استمتع بي حكاويك ..

Post: #85
Title: Re: انا آه اشتقت ليك .. منى خوجلي
Author: Muna Khugali
Date: 10-04-2007, 07:31 AM
Parent: #81

Quote: انتي يامنى عليك الله هسي خليتي زول ما كلمتيه .. !!

يعني جات على عاطف .. احكي ليه ..!!

وانا ذاتي قاعدة استمتع بي حكاويك ..

سمح ما تتغاظي نعومتي..
فيها شنو يعني كان كلمت عاطف ولكن قاموا الناس قروا الكلام؟؟
براك ساااااكت معقده من الموضوع

أقول؟؟

Post: #86
Title: Re: انا آه اشتقت ليك .. منى خوجلي
Author: انعام حيمورة
Date: 10-04-2007, 07:46 AM
Parent: #85

Quote: أقول؟؟

قولي !!

اصلي عملت بي نصيحتك وامبارح استقطب ليك ابوي .. وشغال ليك معانا في (كساء العيد) وقاعد ليك في الارض وشغال معانا..

اهة بعد كدة ما فضل ليه الا يبقى بوردابي ..

اما حنانة مقدور عليها

Post: #83
Title: Re: انا آه اشتقت ليك .. منى خوجلي
Author: انعام حيمورة
Date: 10-04-2007, 07:20 AM
Parent: #1

Quote: جمال شديد
محبه كتيره ليكم
مودتي

الاخ احمد العربي ..

ولك منا مودة ومحبة اكتر من حقتك دي

تحياتي

Post: #84
Title: Re: انا آه اشتقت ليك .. منى خوجلي
Author: احمد العربي
Date: 10-04-2007, 07:25 AM
Parent: #83

Quote:
الاخ احمد العربي ..

ولك منا مودة ومحبة اكتر من حقتك دي

تحياتي

ما بتقدرو لانكم من زحل
وجايبين نوركم من هناك

Post: #91
Title: Re: انا آه اشتقت ليك .. منى خوجلي
Author: انعام حيمورة
Date: 10-07-2007, 11:27 AM
Parent: #84

Quote: ما بتقدرو لانكم من زحل
وجايبين نوركم من هناك

احمد العربي

كل سنة وانت طيب ..

انا غايتو صدقت كدي النشوف منى ..

تحياتي

Post: #92
Title: Re: انا آه اشتقت ليك .. منى خوجلي
Author: Muna Khugali
Date: 10-07-2007, 02:23 PM
Parent: #91

Quote: ما بتقدرو لانكم من زحل
وجايبين نوركم من هناك

Quote: احمد العربي

كل سنة وانت طيب ..

انا غايتو صدقت كدي النشوف منى ..

أحمد اعمل حسابك..ماترمي تهم الجمال جزافا..
احنا لسه بنعالج في مشكلة الصوت الذي ينافس أكبر فنان..
طلعت لينا نعومي بملكة بالتلحين..
لسه ما خلصنا من الأتنين..تقوم تجينا انت بالكلام ده؟!
بكره يسألوها انتي من وين؟
تقوم تقول ليهم أنا من زحل!!

عارف يا أحمد كلام انه صوتها أجمل من صوت "..." في الغنا ده حقيقي اعتقاد راسخ في قناعة
انعام..وممكن تغالطك فيه لدهور..
ودار بينا نقاش امام مجموعه من زملاءنا هنا في قناعتها دي..كنت قايلاها بتهذر...لكن كانت
حقيقي مقتنعه!
ومشكلتها انها ما قارنت نفسها بناس صوتها عادي والسلام..لأ..قارنتها بفنان معروف انه صوته ابدا
ما هين في الجمال والقوه..ظالمه والله يا نعومي ومفتريه
قالت الفرق بينها وبينه..انه هو أتدرب كتير!!
والله العظيم الدنيا دي فيها جنس حاجات

ومش كده وبس...قالت هي من شدة ما متأكدهأ من انها فنانه كبيره.. بتغني لأسرهم في المناسبات..
قلت ليها.. من غلبهم وقلة حيلتهم

Post: #95
Title: Re: انا آه اشتقت ليك .. منى خوجلي
Author: انعام حيمورة
Date: 10-08-2007, 07:53 AM
Parent: #92

Quote: انا غايتو صدقت كدي النشوف منى

خلاص معنى كلامك دا انتي ما صدقتي .. غايتو مخيرة انتي عارفاني ما برجع في كلامي

صدقت يعني صدقت !!

من زحل يعني من زحل !!

Post: #90
Title: Re: انا آه اشتقت ليك .. منى خوجلي
Author: الملك
Date: 10-06-2007, 05:00 PM
Parent: #1

"الذ شئ ..فى سودانييز اون لاين

تخش تعمل بحث بى اسمك

تلقاهو ...مختوت فى النص هنا "

...

وجدان الملك.!!
ناجى ووديدى..!!
...

منى وإنعام

إزيكم

Post: #97
Title: Re: انا آه اشتقت ليك .. منى خوجلي
Author: انعام حيمورة
Date: 10-08-2007, 10:20 AM
Parent: #90

Quote: منى وإنعام

إزيكم

ناجي الملك .. ازيك انت .. مشتاقين ياخ .. دا رمضان ولا شنو ؟؟

Post: #106
Title: Re: انا آه اشتقت ليك .. منى خوجلي
Author: Muna Khugali
Date: 10-27-2007, 02:15 AM
Parent: #90

Quote: "الذ شئ ..فى سودانييز اون لاين

تخش تعمل بحث بى اسمك

تلقاهو ...مختوت فى النص هنا "

وجدان الملك.!!
ناجى ووديدى..!!
...

منى وإنعام

ولما تلقاه بتتهجم ولا كيف؟

غايته مني وانعام ديل بيهجموا عديل وأنا لمو منك طوالي أتهجم!
قول لي ظهرك بقي كيف؟

ياجماعه ناجي متهمني باني سحرته علشان قلت عليه القشه أم روح!
شوفتوا الزول ده ظالم كيف؟

سلم علي الخرطوم ودروب الخرطوم كلها بدون فرز..

Post: #93
Title: Re: انا آه اشتقت ليك .. منى خوجلي
Author: عاطف عمر
Date: 10-07-2007, 02:44 PM
Parent: #1

Quote: قلت ليك يا عاطف..عندي قطيعه بسيطه كده..
انعام مره أهلها أدوها أوامر..اسألها الأوامر كانت شنو؟!

Quote: انتي يامنى عليك الله هسي خليتي زول ما كلمتيه .. !!

يعني جات على عاطف .. احكي ليه ..!!

وانا ذاتي قاعدة استمتع بي حكاويك

أهاااااااااا
هدي قعدة
ما ألذ الشمارات
دا كللللللو وأنا وين ؟؟؟

إنعام
الأوامر كانت شنو؟؟؟

منى
نديها كم وكان ما قالت
تقومي تحكيها إنتي ؟؟

Post: #94
Title: Re: انا آه اشتقت ليك .. منى خوجلي
Author: Muna Khugali
Date: 10-07-2007, 05:07 PM
Parent: #93

Quote: أهاااااااااا
هدي قعدة
ما ألذ الشمارات
دا كللللللو وأنا وين ؟؟؟

إنعام
الأوامر كانت شنو؟؟؟

منى
نديها كم وكان ما قالت
تقومي تحكيها إنتي ؟؟

والله يا عاطف فضل ساعه ونص للفطور..
عين في الطعمية في النار وعين في البوستات وكلامك ده..مع مرور علي التلفزيون
جنس شحتفة روح!

بكره آخر مهله ليها..لاقيني هنا الساعه 8 بالمساء معاك سعديه والأولاد وصينية كنافه
معاها قطايف..
لو قالت من نفسها يكون كويس..وكفي الله المؤمنين شر القتال!
ولو ما قالت..مخيره..
بس انا تاني ماااااا بسكت

Post: #96
Title: Re: انا آه اشتقت ليك .. منى خوجلي
Author: انعام حيمورة
Date: 10-08-2007, 09:46 AM
Parent: #1

Quote: نديها كم

ببببس ، كدة تمام ، الدنيا عيد لو ما دفعتوا لي ما بتكلم !!

بقتلك كان جبتي سيرة !!

Post: #99
Title: Re: انا آه اشتقت ليك .. منى خوجلي
Author: Muna Khugali
Date: 10-18-2007, 01:50 PM
Parent: #96

Quote: منـــــي

مشتاااااااااااااااااقين

بالأكتر والله يا اسمهان..
وكان نفسي اقابلك قبل ما اسافر...لكن معليش..

اسمعي...عندكم امكانيه لأستعمال الpower point ولا لأ؟؟

شكرا اسمهان علي كل كرمك معنا في الخرطوم..فما قدمتيه كان حقا شيء عظيم..
والشكر من خلالك "للغير هناك"..

كل سنه وانت طيبه وجميله..

Post: #100
Title: Re: انا آه اشتقت ليك .. منى خوجلي
Author: انعام حيمورة
Date: 10-22-2007, 11:10 AM
Parent: #1

Quote: لكن اكيد سوف احضر عند ضربة البداية
لمؤسسة صندوق الخير
واكيد سوف اكون من المدعوين لاول حفل خيري
يقيمه صندوق الخير لقيام مستشفي الخير للاطفال

اخو الخير

والله يا عثمان فعلا دي احلامي وياريت نحققها كلنا مع بعض

Post: #101
Title: Re: انا آه اشتقت ليك .. منى خوجلي
Author: انعام عبد الحفيظ
Date: 10-22-2007, 11:32 AM
Parent: #100

يااااااااه كل الشوق دا فاتني!!!!!

انا كمان يامنوية آه إشتقت ليك

Post: #102
Title: Re: انا آه اشتقت ليك .. منى خوجلي
Author: انعام حيمورة
Date: 10-22-2007, 01:22 PM
Parent: #1

نعومتي .. حمد لله على السلامة وبالجد فاقداك في البوست دا .. ومشتاقة ليك انا ذاتي ..

اما نعومتنا دي فعندها قصة حلوة جدا ..

توفى والد (سناء جعفر) الله يرحمه .. وقمنا نسقنا مع بعض نمشي نعزيها..

نعومة مرت على اسمهان واشراقة ومن ثم جوني .. وماشين على منى ..

منى كانت في مكتب استاذ نبيل - مشينا ودخلنا في الشارع غلط وانا عارفة وصف المكتب ..

أهة اقول لي انعام لفي يمين ما عايزة تلف .. لفي يمين ما عايزة تلف ..

في النهاية زهجت وقلت ليها ... لو سمحتى لفي يمين !!

انعام وقفت العربية كلو كلو وقعدت تقول لي باستنكار شديد : انا تقول لي لو سمحتى !! كيف يعني تقولي لي لو سمحتى ..

علقت ليك فيها ..

وبقوا اسمهان واشراقة في الاجاويد ..

وفوق دا كلو المطرة صابة بشدة ..

لحدي ما وصلنا الخرطوم (3) .. ولما جينا في شارع كدة الا نزلنا انا واشراقة من العربية حتى قدرت انعام تعدي لانو العربية قالت الروب !!

منى مشتاقة ليك شددددديد
وكذلك سناء جعفر
وانتي برضو يا نعومتي