بعد 12 سنة . السودان لقيتو ما يا هو

بعد 12 سنة . السودان لقيتو ما يا هو


09-10-2009, 04:28 AM


  » http://sudaneseonline.com/cgi-bin/sdb/2bb.cgi?seq=msg&board=312&msg=1255247255&rn=7


Post: #1
Title: بعد 12 سنة . السودان لقيتو ما يا هو
Author: Osman Musa
Date: 09-10-2009, 04:28 AM
Parent: #0

يا.
لقيتو يازول .
كرتب
وتهردم
وتملطش
وتعفرت ونهب .
لقيت .
ناس ماتت
وناس فاتت .
وفى ناس طالت .
والناس الحنان مالت .
عديت 6 شهور نصها بكيات ونصها منتظر البنطون والحمد الله .

Post: #2
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 04:46 AM
Parent: #1

لقيت شارع الظلط وصل بلدنا
الا عدد الناس الماتت فى حوادث الظلط
اكتر من عدد الامريكان الماتو فى حرب فيتنام .
ولسع الظلط شغال .

Post: #3
Title: Re: بعد 12 سنة . السودان لقيتو ما يا هو
Author: فاروق أبوحوه
Date: 09-10-2009, 05:02 AM
Parent: #2

Quote: الا عدد الناس الماتت فى حوادث الظلط
اكتر من عدد الامريكان الماتو فى حرب فيتنام .
ولسع الظلط شغال .

عارف ليه يا عثمان؟

لأنو البلد كلها (زفت )،،
إلا الشوارع ما فيها (زِفِت)


ولسه حصد الأرواح متواصل.


رمضان كريم
بل العيد مبارك عليك مقدماً


كل الود

Post: #8
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 07:26 PM
Parent: #3

العزيز فاروق أبوحوه
سلامات
عارف قصص الشوارع والزفت دى قصة .
وعن الشغل المشغلب دأك يازول .. حكاوى .
عدم الامانة يا فاروق أكعب شىء .
عيد مبارك .
تحياتى

Post: #4
Title: Re: بعد 12 سنة . السودان لقيتو ما يا هو
Author: Muna Khugali
Date: 09-10-2009, 05:06 AM
Parent: #2

إنت ذاتك..لقيت نفسك بقيت كيف بعد الشهور القضيتها هناك؟؟

أغبر..مفلس؟؟
زهجان وقلبك واجعك؟؟
ضعفت من حوامة البكبات ووجعك قلبك من منظر الشحتة علي الأبواب؟؟
يإست ولا لسة بتفكر في بكرة؟؟



......
.......


الاجازة الجاية متين؟؟

Post: #5
Title: Re: بعد 12 سنة . السودان لقيتو ما يا هو
Author: SHIBKA
Date: 09-10-2009, 09:36 AM
Parent: #4

انا بغيب منو ستة ولي سبعة شهور وبمشي بلقاهو ما ياهو
انت تقول 12 سنة !!!!

Post: #6
Title: Re: بعد 12 سنة . السودان لقيتو ما يا هو
Author: عبدالأله زمراوي
Date: 09-10-2009, 09:41 AM
Parent: #5

والأدهي يا صديقي بل والأنكى أنك تبدو كفتيان الرقيم، تدخل
المدينة بعملتك القديمة ولا تجد من يقبلها منك، تجلس تتحدث
بأريحية، فلا تجد من يسمعك، والكل يجري لمستقر له غير معروف
والناس تتحدث وهي مسرعة ولا تعرف ماذا يقولون!

إعتبرتُ نفسي بعد 13 عاما من الغياب وانا داخل للخرطوم عبر
بوابته (المطار) بأنني أحد أصحاب الكهف الذين ناموا سنين
عددا، فعدتُ أدراجي وأنا حزين...

عيد مبارك...

Post: #13
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 09:29 PM
Parent: #6

شاعرنا الجميل زمراوى
سلامات
يا حليك ديك الأريحية الزمان .
زمن الزمن ماهل . والعيش ساهل
وكوم الليمون يكفى العرس . داك الزمن حليلو .
اهو السودان تشلهت وتدردر وتمرمر مسكين . الله فى
الصبر .
وعيد سعيد
تحياتى

Post: #9
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 07:53 PM
Parent: #4

عزيزتنا بنت خوجلى
سلامات
أغبر ؟
أغبر شلولح وقد بانت عظام المنكبين .
لقيت الناس جارين .
وجريت معاهم 6 شهور .
قلت لى عمى : يا عمى أنا بعد جيت السودان لقيت ال ( CHOLESTEROL ) مافى
قام عمى قال لى لو تميت تانى شهرين قلبك زاتو بكسح .
السودان جميل الزول يموت فى السودان ضاحك هههههههههه .
تحياتى
والعيد مبارك .
وأنشاءالله العيد القادم يكون عندك 3 بيوت فى شرق فنشلى .

Post: #10
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 07:54 PM
Parent: #4



SHIBKA
كيف الحال ؟
والاحوال . وأنشاءالله كلو على ما يرام
رمضان كريم
وعيد مبارك .
تحياتى وكتير احترامى











Post: #7
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 06:57 PM
Parent: #2

بعد تضهب
وتوهان
ونجيع
وفليل
وطفشان
وتمحرك
وركض
وجرى
وسفر
وتعب
وحزن
وشوق
على كل حال لقيت نفسى الساعة الخامسة صباح يوم أحد أنا فى تلك العاصمة
التى مات من أجل شمسها أجدادى ... بكيت ساعة الوصول من الشوق ومن الوجع
... وعند خروجى من صالة المطار .
..


صليت . شكرا
وقريت جزاء من سورة الفجر . ودخلت الى البلاد . لايعلم أحد عن وصولى .




Post: #11
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 08:28 PM

بتاع التاكسى قال : من المطار
لاحدد الخرطوم 3
ياود العم .... آخر كلام 35 ألف .
وأنا ماعارف ال 35 دى حوالى كم .
اها يازول بعد لت وعجن نزل لى 25 ألف .
وفى الطريق بصق السايق التمباك . يا الله تمباك من الدقش ؟؟
لكن الرجل طيب وحبوب والزى ده هو البديك الضو ..

Post: #12
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 09:00 PM
Parent: #11

بصق التمباك فى الاماكن العامة مزعج .
والتدخين فى صالة الوصول وفى عيون الاطفال قبيح .
والحمدالله وصلت كنت خايف يكون الخرطوم 3 قد تحول لموقف حافلات كفر الدوار
.. ودفعت للتاكسى ما يعادل مبلغ ال 25 ألف .
10 دولارات .
نفس مشوار التاكسى
فى منهاتن من ال 36 ST الى ال 95 بس بدون حجج .

Post: #14
Title: Re: بعد 12 سنة . السودان لقيتو ما يا هو
Author: عزيز عيسى
Date: 09-10-2009, 09:33 PM
Parent: #12

إن شاء الله يا عثمان ما جاك شوية بصاق تمباك راجع بالشباك على وجهك..
أحمد الله إنه عمك ما تف سفة الصباح ديك الناشفة ذي الحجر وفلقك بيها.
زمان ما نصحناك قلنا ليك غير ولاية نيويورك لي ولاية تانية
وما تمشي السودان.. لكن صهينت وأصريت لازم تمشي السودان
و قفلت أضانك واحدة بطينة والثانية بعجينة.
شايفك غيرت الولاية لي إلينوي وإستقريت في شيكاغو..
غايتو الشافك مشيت السودان تاني ما كضب؟!
يازول حمد الله على سلامة العودة.

Post: #15
Title: Re: بعد 12 سنة . السودان لقيتو ما يا هو
Author: Osman Musa
Date: 09-10-2009, 11:25 PM
Parent: #14

العزيز عزيز عيسى
سلامات يا صديقى
لقيت ليك الحكاية عجيبة .
اها أنت متين ماش ؟
مدينتك ودمدنى تلك المدينة العسل . ترمدت وتبشتنت وتشلعت تشليع السنين .
مدنى حزينة يا عزيز . وعطبرة ديك أسكت ساكت . الحديد والنار راح فشوش .
عطبرة يا عزيز .. دك دك .. كانت هنا عطبرة . كانت هنا مدينة .
حليلك يا عطبرة كانت هنا أنهار الغناء والموسيقى .
مدينة العصيان والتمرد والثورة .. دك دك .. سكات سكات .
..
عيدك مبارك
تحياتى

Post: #16
Title: Re: بعد 12 سنة . السودان لقيتو ما يا هو
Author: Ahmed Abdallah
Date: 09-10-2009, 11:35 PM
Parent: #12

Quote: بصق التمباك فى الاماكن العامة مزعج .


سالت منك في السودان قالوا لي عثمان
ده راقد كراعوا مورمة عفصو حمار في البنطون ..

_________________________
ياخي هو لو وقف علي بصق التمباك نعمة
في حاجات تاني عينك ما تشوف الا النور

Post: #17
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 00:10 AM
Parent: #16

عزيزنا أحمد عبدالله
سلامات يا مك
الكلمك منو ؟
صاح يازول نوع الحمار الداراوى داك .
يازول عفصنى فى نص الشبط .
لو كنت هناك كنت ضربت 911 .
.. عليك امان الله يا أحمد لو ما كان فى حريم فى البنطون .
كانت الكورارك وقفت سلك .
صاحب الحمار قال لى معليش .. حمارى ده تاعبنى هسع أنا دفعت جنيهين
حقى وحق الحمار للبنطون صاحب البنطون طماع يدفعنى أنا وحمارى .
وأنا ما سامع كلامو من الزعل والوجع .
تحياتى .

Post: #18
Title: Re: بعد 12 سنة . السودان لقيتو ما يا هو
Author: الوليد محمد الامين
Date: 09-11-2009, 01:06 AM
Parent: #17

يا عثمان سلامات

وحمدلله علي السلامة


ياخي كويس انك لقيتو ذاتو ..

المرة الجاية يمكن ما تلقاهو هو ذاتو ...

Post: #21
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 01:59 AM
Parent: #18

حباب العزيز الوليد م الامين
سلامات
والعيد مبارك عليك .
يا الوليد هذا الوادى يظل فوق .
وكل ما تضيق .
وكل ما تتشعب البلاوى وتكتر المحن .. يقوم تانى ويفرهد من جديد .
كان الليلة مو ياهو . باكر بكون .
سلام كتير

Post: #19
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 01:17 AM
Parent: #17

كنت مشتاق .
مشتاق للتراب الجد حبيب مافى شك .
السكة حديد عشان أسافر قالوا السكة برجبت عندها البرجب .. توقفت تلك الشرايين
أصيبت بال ( Disease ) وكمان ال ( Stroke ) فكضمت ولم تتحرك .. يعنى لعب عيال
... أها ... وبعدين ؟
موقف بحرى .
ما بطال نمشى موقف بحرى .
فى كلب ضال مطلوق يشمشم فى الشنط .. الله يستر ..
قطعت التكت فى bus ما عارف اسمو شنو كدى . وكنت تعبان تعبان ومحموم وحزين
أمامى زيارة الكثيرين . 12 سنة حدثت فيها كثير من الافراح والاتراح لم
أشارك فيها.
والبص كاسح . الظلط وصل بلدنا يازول ( الوتقيق اليقد عين الشيطان .
لكن أين الشيطان ؟؟؟؟

Post: #20
Title: Re: بعد 12 سنة . السودان لقيتو ما يا هو
Author: معتز مقبول
Date: 09-11-2009, 01:38 AM
Parent: #19


Quote: لكن أين الشيطان ؟؟؟؟


وهو الشيطان فاضي!!!!

الشيطان شغال شغل جد......

الشيطان يعظ.

يا زول بركه الچيت.

Post: #22
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 02:31 AM
Parent: #20

البص دفس جهات الشمال .
الزول فى الكرسى الجمبى
عندو موبايل .
أى زول عندو موبايل .
والماعندو موبايل برضو بتكلم براو براو .
الزول الفى الكرسى جارى شغال فى الموبايل شغل عجيب .
وهو فى البص باع بقرة فى بربر بالتلفون .
البقرة وقفت فى 900 ألف وهو قال لا عايز مليون . مليون تنقرنق .
.. جارى ضحك بعد أمام البيعة وقال لى معليش دوشتك بالحديث . بعت البقرة
البقرة ما بتحلب وكمان نطحت الوليد .
عشان كدى قلت أحسن أنتف البقرة .. وأنا عارف المليون كف بطير
قروش الزمن ده قروش سجم .. حليل الجنيه البكيل العين .
البص وصل قهوة فى الطريق .
يازول .. كباب وعدس وحتى البسكويت ( وجع )

Post: #23
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 02:49 AM
Parent: #20

العزيز معتز مقبول
سلامات
وعيدك مبارك
وكل عام وانت بألف عافية
تحياتى .

Post: #25
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 03:31 AM
Parent: #23

30 دقيقة فى القهوة .
ثم تحرك البص .
جارى فى البص قال لى السواق ده مستعجل كدى مالو ؟
كلفت لى صلاتى .
وضحك ثم قال أظنك ماك قاعد فى بلدنا دى . شكلك ضارب بلاد الخارج .
كنت وين ؟
قلتلو كنت فى أمريكا .
أمريكا ؟
يازول دى بلد بعيدة تب .
الموديك لاعن هناك شنو ؟
هنا الكهرباء دخلت .
الظلط دخل .
حبوب الملاريا .
تانى الناقص شنو ؟
أمريكا؟
يازول أهبط .
مافى زول كتلو الجوع . هسع عاين البص ده سمح كيفن .

Post: #24
Title: Re: بعد 12 سنة . السودان لقيتو ما يا هو
Author: حسن حماد محمد
Date: 09-11-2009, 03:23 AM
Parent: #1

الحبيب عثمان

عند زيارتى الأخيره كنت أحمل شوق لا يضاهى للأصدقاء القدامى

ولكن لوجعى من كان موجود منهم شقلتهم الحياة والبرود أصاب العلاقات مما أصابنى بكثير من الاحباط

نعم شارع الزلط وصل الحلة وهذه نعمة والحمدلله ولكن سيول وأمطار 2007 أظهرت الكثير من العيوب مما أدى لهدم ما يقارب ثلث بيوت الحلة

ولكن رقم كل شئ ما زال البعض يحمل الكثير من الطيبة والمحنة وذلك هو الخيط الرفيع الذى أرجو الا ينقطع

Post: #26
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 04:22 AM
Parent: #24

الزول الفى الكرسى الجمبى
ضربتو الكندشة ونام .
وأنا سرحت فى هادى البلد .
أفكر .
لاحظت وجود بعض الاجانب .
ولكن أجانب من دول وجع رأس .
أجانب الدول الشبعانة العندهم التكنلوجيا لالالا مافى لسع .
ديل يجو لما الصبر ينوم جار الدجاج .







Post: #27
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 05:54 PM
Parent: #24

عزيزنا حسن حماد
سلامات
قالوا ده اسمو شارع التحدى
.. تحدى عديل .
لكن من أول سيل ( الظلط ) كسح مع السيول .
فرق كبير بين الظلط والزلط .
شغل هبر وكبر . منو وليسلو .
تحياتى عزيزى حسن

Post: #28
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 06:44 PM
Parent: #27

المسافة الخرطوم عطبرة
نفس المسافة بين نيويورك وبالتيمور .
الا الفرق .. من الخرطوم لاحدد عطبرة يوجد
جسر وأحد على النيل و3 قهاوى ..
والسكة حديد أصبحت كدرب الاربعين .
جسر وأحد و3 قهاوى ؟

Post: #29
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 09:35 PM
Parent: #28

سامع وأحد فى الجنب التاهى للبص
بقول للجنبو .
: شايف يازول الوادى البور ده كلو مبيوع .
مبيوع كيف ؟؟
مبيوع شان شنو ؟
: من الكدرو ولاعن شندى مبيوع للهولنديين .
: ومن شندى ولاعن المحمية ترك ترك ساكت أتراك .
: ومن المحمية ولاعن عطبرة الاردنيين
يازول البلد كلو مبيوع ونحنا قاعدين ميطى .
باكر يجى مصرى يشيل حمارك من قدام بيتك .
يازول حديثك ده شن نفرو ؟؟

Post: #30
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 10:00 PM
Parent: #29

يا الله .
الكلام تحول من بيع بقرة .
لبيع بلد .
بلد ساكت ؟
دى قلب أفريقيا .
يا أفريقيا أنتى رحتى فى 60 قلبك أتباع .
أها و ال ( KIDNEYS )
والبص كاشح . وأنا خايف .. والدنيا مواسم بيع .

Post: #31
Title: Re: بعد 12 سنة . السودان لقيتو ما يا هو
Author: Osman Musa
Date: 09-11-2009, 10:23 PM
Parent: #30

أفريقيا تانى تعيش بدون قلب ؟
حليلو .
بعدين البيع بيتم كيف ؟
الشعب المسكين دا مابعرف ؟
يعرف شنو ؟
دى أسرار دولة ؟؟
وأسرار بابكر كانت تغنى دور بينا البلد دأك . وحتى الغناء لقيتو مهضلم
غناء بدون فرح وماعندو شنة .

Post: #32
Title: Re: بعد 12 سنة . السودان لقيتو ما يا هو
Author: عبدالحافظ عثمان
Date: 09-11-2009, 11:40 PM
Parent: #31

وبعد 11 سنة عدت ومعى ابنائى 6 و 4 اعوام
كل شى تغير وكنت احن الى كل شى جميل فى هذه الارض
زرت سنار المدينه التى درست فيها كل المراحل الدراسيه حتى الثانوى
كنت امنى نفسى بان اقابل الرفاق ونرى ماذا فعلوا فى الدنيا وماذا فعلت الدنيا فيهم
ولكن هيهات لم اقابل غير واحد من الاصدقاء.

ذهبت الى النادى الرياضى الذى قضينا فيه اجمل ايام العمر...
لم اجد شخص واحد اعرفه.
ذادت من الم موت الذكريات االجميله.
ذرت الاهل والاصدقاء بالخرطوم لقاء واحد وعد بلقاء ثانى قد لا يتكرر ابدا..
الكل مشغول فى بلد الغول..

كان همى الاكبر بان يعود ابنائى الى المهجر وهم قد تشبعوا بمعرفه الخال والخاله والجد والجده والاهل.
وبانهم نخله لها جزور هناوفروع فى المملكه المتحده
تلك هى ارضهم وفيها حضاره ومجد.
حاولت ان اريهم اى صوره جميله فى هذا البلد.
حرصت ان يزرواالمتاحف الموجوده.. مدن الالعاب حديقه الحيوان. المطاعم الراقيه. الاسواق الشعبيه. خزان سنار .مدنى .سنجه. رفاعه
واى مكان فيه اهل لنا...
عسى ان ينمو حب هذه الارض فيهم وتكون لهم ذكريات تربطهم بها..
ومهما طالت الغربه لاتكون عندهم غربه النفس ..
واتمنى ان اكون قد نجحت فى تلك المهمه الصعبه جدا جدا...

Post: #33
Title: Re: بعد 12 سنة . السودان لقيتو ما يا هو
Author: Osman Musa
Date: 09-12-2009, 01:13 AM
Parent: #32

بيع .
بيع تقيل .
والكل مهدد بالبيع .
وفى كلام تحت تحت عن نهر
عطبرة يتباع ويصير نهر المسيسيبى .
أصلو مشروع الجزيرة داك دفع للصين الشقيقة .
الصين شقيقة ؟
بيع .
والكلام المقابر . يعنى ممكن الوأحد يتحول قبر جدو لرمسيس .

Post: #34
Title: Re: بعد 12 سنة . السودان لقيتو ما يا هو
Author: Osman Musa
Date: 09-12-2009, 01:56 AM
Parent: #32

عزيزنا عبدالحافظ
سلامات
حرام عليك
تشيلهم من كاردف ولى سنار طوالى .
معليش أسبوع كدى فى الخرطوم العمارات . الطايف . الصحافة .
الا من هناك ولى سنار .
ديل تانى يوم بعد العودة حيشتكوك فى جريدة النيوزويك .
..
والله يا حافظ عملت أجمل شىء .
السودان بعد الحاصل ده كلو جميل .
ويوم الطيارة تقوم الواحد يدمع .
تحياتى لكم جميعا ولكاردف الجميلة

Post: #35
Title: Re: بعد 12 سنة . السودان لقيتو ما يا هو
Author: Osman Musa
Date: 09-12-2009, 02:31 AM
Parent: #34

وصلنا بلدنا .
3 ساعات ونصف .
فى الزمانات الزمان كنا نصل فى 10 ساعات .
الظلطاط سريعة .
نزلنا .. المسافة من الزلط للبنطون حوالى 5 كيلو .
فى بكاسى .
فى كارو وبتاع الكارو كمان عندو موبايل خط .
فى فرق بين الموبايل الخط .
والموبايل الكيرى ساكت .
أنا أشتريت موبايل طلع كيرى .. عرب بروكلن وكدى .
يا سلام .
نفس البنطون ونفس الضحكات الصافيات .

Post: #36
Title: Re: بعد 12 سنة . السودان لقيتو ما يا هو
Author: Osman Musa
Date: 09-12-2009, 03:58 AM
Parent: #35

بكاسى .
لوارى
حافلات
بقر
حمير
حريم
رجال
طوب
جريد
حديد
كلو فى البنطون .
وكلو صابر وكلو ينتظر الفرج ... الحال ما ياهو .

Post: #37
Title: Re: بعد 12 سنة . السودان لقيتو ما يا هو
Author: Osman Musa
Date: 09-12-2009, 06:42 PM
Parent: #36

مساكين .
الناس مساكين .
الناس رجعت كتير للخلف .
تهردمت مبانى المدارس وتراجعت المعارف وشح العلاج .
السكة حديد كانت تعمل عمل 5 شوارع .
وكانت أسعار السلع لا تتبدل . بين بورتسودان والجنينة .
مساكين .

Post: #38
Title: Re: بعد 12 سنة . السودان لقيتو ما يا هو
Author: عبدالحافظ عثمان
Date: 09-13-2009, 01:57 AM
Parent: #37

العزيز عثمان
اخذت الابناء الى ام درمان الى منزل الوالده والوالد وبسبب الامطار لم نسطيع الوصول الى الدار..
ولم يكن فى الحسبان ان نحضر معنا مركب او بنطون للامطار. التى جاءت كعادتها وفاجاءت الوالى وبلديته
ولم يكن قد حسب لها اى حساب.

اخذت الاولاد الى اصدقاء فى الطائف فوجدتها صارت( الطافى) فى المياه لان حفارة المجارى قد كسرت انبوب المياه الريئسى وذادت الطين بله..

فلم يكن امامى الا ان اخذهم حيث الدفء الى سنار...
ورجعت وانا بردان .
لك كل الود