Post: #1
Title: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-23-2010, 07:52 AM
تناقضات..تناقضات..تناقضات
عمران لا تخطئه العين
شوارع جديدة و توسعة و تنسيق القديمة
وفرة في كثير مما كان يتم استيراده في الماضي
و لكن..
|
Post: #2
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: ناذر محمد الخليفة
Date: 12-23-2010, 08:05 AM
Parent: #1
!!!
| Quote: انا الآن في الخرطوم |
بالغت ..!!!
|
Post: #3
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: معتصم محمد صالح
Date: 12-23-2010, 08:10 AM
Parent: #2
معقول لكن ؟
0912209259
|
Post: #4
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-23-2010, 05:19 PM
Parent: #3
معتصم
اتصلت بي ناذر
انت تلفونك مقفووول
|
Post: #5
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: بدر الدين اسحاق احمد
Date: 12-23-2010, 08:21 PM
Parent: #4
زياد ..
بنسلم و نقول حمداً لله على السلامة رجعت ولا لســه ..
|
Post: #6
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-23-2010, 08:53 PM
Parent: #4
ولكن..
واضح ان غالبية ابناء الوطن في معاناة ما بعدها معاناة و حوجة ساهمت بشدة في انخفاض رهيب في معيار الاخلاق لدي الشارع العام..فاصبحت الانانية و الشفقة هي المسيطرة حتى فى سلوك بسيط كقيادة السيارة في الشارع! و هذا موضوع (حركة المرور) محتاج الى بوست منفصل!!
معيار - ترمومتر- الاخلاق يلاحظ انخفاضه في تقبل الناس بشكل غريب لظاهرة الرشاوي و الاعتداء على المال العام!!..مشيت قبل يومين اطلع ورق رسمي من جهة حكومية..أربع ايام انا امشي و أجي عشان بس اسحب اورنيك طلب!!!!...و بعد سحبي للاورنيك لاحظت ان هناك العديد من من له ظهر و سند يخلص اجراآته في سويعات قليلة!!..و بقية خلق الله منتظرين بالأيام...اصريت والله اني امشي بالدرب العديل برغم ان لدي واسطة يمكن ان الجأ اليها...كانت النتيجة اني رأيت ما يمر به المواطن البسيط الذي لا حول له ولا قوة..لا يملك المال و لا يعرف احداً من اهل السلطان!!!...تحدثت عن هذا مع واحد مولانا كدا..يؤمنا في الصلاة فقال لي: لو كنت اديت الجماعة حاجة كدا كا بختوك في اول الصف!!!..قلتا ليهو يا شيخنا انا ما داير اكون في اول الصف...انا داير المعاملة تكون فير بس...صف الناس دي فيهو كلها سواسية انشالله انتظر للسنة الجاية!!!!..طيب الما عندو قروش يرشي..يعمل شنو؟؟
يعني اتخيل..الرجل مولانا اليئمنا في الصلاة دا ما شايف انو هذا المال الذي اشار لي انو امشي بيهو اموري دا رشوة و حرام؟؟.. وقس على ذلك.
|
Post: #7
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: Nasr
Date: 12-23-2010, 09:11 PM
Parent: #6
الديكتاتورية لا تعمي الأبصار
ولكنها تعمي القلوب التي في الصدور
| Quote: يعني اتخيل..الرجل مولانا اليئمنا في الصلاة دا ما شايف انو هذا المال الذي اشار لي انو امشي بيهو اموري دا رشوة و حرام |
|
Post: #9
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-23-2010, 11:29 PM
Parent: #7
والله يا نصار شيء خلاني انا زاتي محتار!!
|
Post: #8
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-23-2010, 11:27 PM
Parent: #6
قااعد يا بدر الدين
موجود و بكثرة
و يادووووب فضيت شوييييييية بس من جري البلد دي واتذكرت سودانيزاونلاين!
البطل النابغة سافر؟
|
Post: #10
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: محمد فرح
Date: 12-24-2010, 00:07 AM
Parent: #8
مرحب بي عودتك
بعض ضعاف النفوس فعلاً قد يؤخرون حوائج الناس
البيروقراطيه كالسرطان يصعب التخلص منهما
عموماً هنالك الكثير من الايجابيات لاتنسى ان تعكس بعضها
واثق ان كفة ميزان الاخلاق في وطني هي الكفة الراجحة
مؤونة عام من الود
|
Post: #11
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-24-2010, 08:12 AM
Parent: #10
محمد فرح
شكراً ليك ياخ..
مع انك مختفي ما شفناك لا في زيارة شيخ عوض المسلمي ولا فر الرحلة!
سامع واحد بشاغل في علاء الدين يوسف بقول ليو محمد فرح دا شخصية وهمية و إلا ليه ما ظهر!
عل العموم كان اديتني تلفونك بنتقابل انشاءالله...للدنيا والزمان نشوف بعض
...
طيب بالنسبة لموضوع البوست
أنا والله يا محمد فرح فير جداً و ما عندي الحمدلله لا اجندة حزبية ولا سياسية...بالعكس كرهت السياسة السودانية والسخف المحيق بها عبر الزمن..ويهمني و اتمنى انو ارى البلد فوق..فوق...واشاور لعلم بلدي و ارفع راسي بيين الامم و اقول دا وطني..ديل اهلي...
لاكين يا محمد فرح كان الايجابيات الطاغية على السلبيات دي ما شفتها!! اكضب وللا أألف؟؟...قلنا: الشوارع افضل بكثير من زمان (مع انو برضو باقي الكثير) والكباري حلت الكثير من مشاكل الحركة بالذات كبري الحلفاية المنفذ بطريقة ممتازة...قلنا حركة عمران و مباني جديدة غير مسبوقة لاكنها لا تنعكس على اوضاع الغالبية العظمى من المواطنين بأي حال..الذين يلهثون خلف ما يسد الرمق و يستر الحال و يكفي شر السؤال
كفة ميزان الاخلاق هي الراجحة دي بي صراحة والله ما شفتها يامحمد!!
ياخ من المطار!! الواصلين من السفر ولا مؤاخذة زي الغنم الكبوا ليها عيش؟؟ صف و نظام لتنظيم ملء استمارة العائدين مافي!!!..من المطار انتا تلاقيك مظاهر الفوضى و غياب اللوائح و النظام!! ضباط و ناس لابسين ملكي جايين يقابلوا معارفم و يفططوهم الاجراءات و الصفوف قدام خلق الله التانين!!!
غياب نظام..فوضى..محسوبية هي ما يلاحظه العائد من خارج السودان
|
Post: #12
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: ناصر احمد الامين
Date: 12-24-2010, 08:57 AM
Parent: #11
حمد الله علي السلامة يا زياد
فعلا ... صحيح هو ما كتبت
الخلل واضح .. الفوضي تعم كل شي
تحياتي
|
Post: #15
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-24-2010, 08:36 PM
Parent: #12
ناصر
الله يسلمك يا حبيب
ما شفناك في البلد..انشالله نتقابل قبل السفر
..فوضى شديدة بس انشالله تنصلح بعد دا
|
Post: #13
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-24-2010, 09:05 AM
Parent: #11
وفرة في كل شيء
السوق مليء بالمنتجات و الاسعار حسب المكان و الجودة و المشتري يعني لو جيتم نضيف و لابس بكون السعر ضعف لو جيت شكلك فقير و مقطع!! أتغشيت في ملابس اشتريتا بضعف السعر و سعر موبايل اشتريته أتغير بين صباح اليوم و مساءه!
لا وجود لأزمة أو ندرة كما كنا نسمع بالخارج!! لاكين الايام دي الاسعار طارت السما بسبب ارتفاع الدولار!! في سلع زي اسعار العربات أغلى من الخارج بكثييييييير!!!! ما تفهم ليه؟!!!
الناس جارية في معايشا و المجاملات اللا نهائية و ما شغالين اطلاقاً لا بأستفتا لا مستقبل السودان ولا هم يحزنون!!
و تشعر انو الناس مبسوطين و متونسين رغم كل العنت..
ماشي مشوار امدرمان..أنشاءالله اواصل بعد صلاة الجمعة..لو لقيت فرصة مع المجاملات
|
Post: #14
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: السيد المسلمي
Date: 12-24-2010, 10:22 AM
Parent: #13
زياد يادفعة ..
إنت لسة في البلد !؟
والله بتبالغ لكن .. تلفون ساهي ماف ؟
نجي للموضوع ..
شايفكـ جيت ماشي في أهم حاجة .. وهي إرتفاع المستوي المعيشي لطبقة ( الموظفين ، المعلمين ، العمال )
وخاصة الخريجين حديثي الوظيفة .. الواحد يوم مايستلم وظيفتو طوالي البنكـ بديهو قرض لعربية وقرض لمنزل ..
وكل دا بضمان مرتبو بس ..
زمان يازياد خريجي التخصصات النادرة ما بلقو وظيفة ، هسي الحمدلله له القاسية تكون عندكـ شهادة بس وأموركـ كلها تمش تمام التمام .
مع إتفاقي معاكـ حول التجاوزات الإنت ذكرتها قبلاً ..
بما في ذلكـ المعيار الأخلاقي .
|
Post: #17
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-24-2010, 09:08 PM
Parent: #14
أبو السيد
أزيك يا حبيب
والله يا السيد الواحد ينسى نفسو زاتو من المشغوليات..وانت سيد العارفين بي جري البلد دي..مع انو الواحد نفسو يقابلكم تاني قبل ما يسافر..إنشالله نتلاقى
...
أممم...طيب يا ابو السيد انا جزئياً ممكن اتفق معاك في الارتفاع النسبي لمستوى المعيشة...شايف الناس يقت تركب عربات بالاقساط و الضنك الشدييييد بتاع التسعينات خف في بعض اوجه المعيشة ..و اقول بعض يا ابو السيد لانك لو جيت ماش بي شارع مستشفى الخرطوم جمب الحوادث و عاينت للناس اللافة هناك بتعرف انا بتكلم عن شنو!! و لو قارنت الحال بما يدفعه القادرون..وهم القلة.. اليوم في مستشفى خاص زي فضيل مثلاً..اليوم بي 700 الف والعناية اليوم بي مليون و نص حتعرف انا بتكلم عن شنو!! و لو عاينت للجيوش الجرارة من الشحاذين الاطفال البكابسوا العربات في الاستوبات - ما نظر شارع افربقبا لفة الجريف - لمن اليوم داك واحد قربت تدهسوا عربية..بتعرف انا بتكلم عن شنو!!
ما ذكرته صحيح يا ابو السيد..لاكين صاحبه تدهور مريع في حاجات تانية كتيرة!
حتة الشهادات و التوظيف دي ما بقدر أناقش فيها بغير علم و أرقام..كل ناس دفعتنا لقيتم اتوظفوا...لاكين دا ما كفاية عشان احكم لانو نحنا دفعتنا صغيرة و تخصصنا نار.
...تخريمة:
راجل كبييييير و بي شيبتك تقول لي دفعة؟؟ قدرك أنا
|
Post: #16
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: ندى صالح الطيب
Date: 12-24-2010, 09:07 PM
Parent: #13
| Quote: الناس جارية في معايشا و المجاملات اللا نهائية و ما شغالين اطلاقاً لا بأستفتا لا مستقبل السودان ولا هم يحزنون |
الاخ زياد لك التحية وحمدلله على السلامة
نفس كلامك ده قالوا زوجى جاء قبل اقل من 3 اسابيع من السودان
بالحرف قال لى انتى وجماعتك فى سودانيز اون لاين الشغالين بالموضوع ده ..
ضحكت كتير طبعا فى كلامه
|
Post: #18
Title: Re: انا الآن في الخرطوم بعد طول غياب..انطباعي باختصار (بحاول صور)!
Author: زياد جعفر عبدالله
Date: 12-24-2010, 09:16 PM
Parent: #16
بالضبط يا ندى..صدق زوجك..
ناس سودانيزاونلاين ديل في وادي و هنا الناس في السودان في وادي آخر...
جري مبالغ فيو..اليوم يمر كلمح البصر بدون ما تشعر مشى في شنو وانتهى في شنو!
|
|