يا راحلين الي جوبا بغيابي ... هيجتموا يوم الرحيل فؤادي .. في وداع أبناء شعبي

(1)


بلد جنحاتها مكسورة
بلد أوراقها في إيدها
بلد قدام
بلد رامي
بلد أحزانها يوماتي


(2)

بلد مفتاحها في ايدها
تفتش في لياليها
تفتش عن كشر ضايع
وتسأل عن ولد صايع
بلد رقراق
بلد طيب
بلد ناساتو موجوعة
بتعرف كيف تسوي الصي
تجيب تارا

(3)

بلدنا الصاح ومو كضاب
يجينا تمام
بلد راكز
بلد سواي
ومو حداث
بلد منتج
بلد بستان
بلد مزدان
بلد واعد
يجينا سيوف
يجينا بخور
مطر من حلفا لي سنكات
عيوش وقموح
صمغ عربي
ونيلنا تمام
يجينا دليب
نواحي أويل
يجينا
بلد موحد زين


(4)

وطن لكنو (مو هيلك)
ولكنك (تغني وطن)


ـــــــــ
تنويه :
ماجاء في الفقرة الرابعة رثاء شاعرنا العزيز حميد لطيب الذكر مصطفي
ضاقت العبارات واستحكمت حلقات الوطن حلقة اثر حلقة أما اليوم فقد شهدت يا أبناء وبنات شعبي
رحيل أسرة عظيمة قدمت لهذا الشعب رجلاً فاضلاً إسمه جوزيف قرنق رجل لم قضي حياته لهثاً في سبيل
إسعاد شعبه لكنها الأوطان ياجوزيف ممكن (تسلط عليك رجلاً بمقومات الراحل نميري) نميري الذي فعل
بك وبرفاقك مالم يفعله نجار بالخشب ـ اليوم أيها الآنسات والسادة كما يقول مذيعوا ومذيعات
الاذاعة السودانية شهدت بعضاً من مراسم وداع أبناء جوزيف قرنق ـ اليوم أيها السودانيون إفتقدنا
ساعداً من سواعد الحلم الفسيح كان كأباه تماماً هادئاً ورصيناً ومهذباً وزول مبالغ فيهو عديل .
أحاول أن أكتب لكن




الله غالب يارفاق الهم

Quote: الاذاعة السودانية شهدت بعضاً من مراسم وداع أبناء جوزيف قرنق ـ اليوم أيها السودانيون إفتقدنا

ابو الزيك يا خضر ............راحل
كابوس تعيس

سلام زكريا

أدي البلد مسرح
شان فيهو نتغني
دقة طبولنا سوا
مسلم علي وثني
طابورنا يمرق صاح
نبني البلد آمال
يمرق نشيدنا سوا
سوداننا الواحد
أكبر من أي كبير
أجمل من الممكن
أحلام تتحقق
نحضن ولاد العم
ترقص سما البيبور
رفضاً لكل حاصل
أحلامنا نحنا سوا
نبنيها زي قمري
عشاً في عش لا فوق
وطناً يلم دافي
حلمناً حلمنا سوا
لابد نجيب آخرو



ـــــــ
أبوالزيك يا معاوية كان نوادعو

خضر يا حنين

Quote: حلمناً حلمنا سوا لابد نجيب آخرو

بلدنا مفتوحة علي جميع الاحتمالات يا خضر
احلاها مُر
قدر ما تحاول, تلقي احتمال تحقيق الحلم متضاءل نحو الصفر
اخشي انو بعد نجيب اخرو نلقاه صفر كبير

دمك فينا ...يا

جوزيف


فينا فينا فينا

ياخضر......... شن الراى ياجوزيف
يا زكريا يااااخ معليش

(17)

يهمني أن تعلم يا أبو الزيك ويا جو ويا أديسون إنني كرجل شارككم الأحلام لم أخنكم ,أي والله يا شباب
واني يا شباب أجد لكم من الأعذار ما لايمكن لعقل بشري تصوره أدري يا زكريا انكم عشتم وترعرعتم علي
حلم ثورة وضيئة الفكرة ثورة (كان جات لكان من شأنها إنتزاع السودانيين من براثن الفقر والجهل والمرض)
يعني بالواضح كدة ثورتنا ديك بتاعت الثورة الوطنية الديمقراطية التي كنا نحلف عليها بطلاق تلاتة تلك الثورة
التي ظنناها أجمل مشروع تم طرحه في كوكب السودان منذ خروج الانقليز لي يوم الليلة .

يا خضر
الله يوجعك ياخ
و التحيات لجوزيف و لنجوم جوزيف الوضاءة في سماء الوطن (الواحد)

شكلك حتودع ناس ود الدومه ودرمه وود باخت قريب يا الخدر فؤادك.
بلد بنت وس خ ه
اخوك الرمه ده مشتاق ليك للدين, الا خايف لمن ياذن سيد الاذن,يمنعوه من الدخول, بحجة انو من دولة السودان الغربى...المعادية.
تتذكر ونسة بيت السجانة?
لو بتتذكر بتجقلب مالك يا حبيب!

أفرحني للغاية عودتك الي هنا يا محيو
يازول مالك مجافي الناس
أتذكر كل ونساتنا يامحيو
كلها من بيت السجانة الي بيت
الثورة ومن الثقافة الأفريقية الي
موسكو متذكر كويس يامحيو وبعد ده
الجقلبة حاصلة
يامحيو اديني اخبارك عندك الهوت
وعندك الماسنجر وعندك التلفون
مشتاق ليك لي دين الدين
تحياتي لسامي وللصديقة العزيزة لبني

Quote: الله غالب يارفاق الهم

يا خضر حسين
دع ( أحزانك صاحية )
لأنها سوف تلهمك الحل الحاسم

كنت مثلك أيكي فراقهم
وضياع الجنوب

ولكن لمن سمعت كلام الثور الهائج في مستودع خزف البلاد
وفي اوصال ومهج العباد
كفكفت دموعي
وفرحت لهم
فهنيئآ لهم الإنعتاق
والعقبى لناس محيو
وينعتق الغرب

ونبدأ في تكوين السودان الجديد
نعم ، يا صديقي
قد لاح لي أمل من كلام الجنرال الجنوبيالذي ختم إحتمالات الحروب
بتكوين حلف سوداني جديد

وجوزيف المسجى في مقابر الحزام
يرمقنا بأمل ويربت على حزننا ويتوعده بالثورة

كذلك
رحل عنك اليوم يا وطني أسرة الراحل المقيم أنتوني
غادر جون أنتوني واسرته الصغيره
ودعناه كأحزن مايكون الوداع
أوصونا علي قبر والده القابع في مقابر الاسكان
وعدناه علي دوام التواصل
ثم مضي جون انتوني



وبقينا نحن في انتظار خروج الروح
ـــــ
يا للبلد العجيبة دي

الجدير بالذكر انو الكلام الفوق ده كلو مراهقة مني ساي أو كما قال عبدالعزيز(عبدو)