اذا استمر ...ساخر سبيل ...

يا الفاتح جبرة ..الحاجات الظريفة دي جيبها لينا بي جاي ...



ساخر سبيل

اذا أستمر

الفاتح جبرا


* إذا إستمر تقليص حجم العيش بهذه المتوالية الهندسية فسوف يأتى يوم لا تستطيع فيه فرز (الرغيفة) من (البنادول) !
* إذا إستمر تحويل الشوارع الرئيسية إلى إتجاه واحد فسوف يصبح بعد الذهاب إلى العمل الرجوع إلى البيت مشكلة !
* إذا أستمر الغناء فى الهبوط بهذه الطريقه فسوف يأتى يوم نتحسر فيه على أيام سيدة الغناء السودانى (عوضية بلاغات)
* إذا إستمرت ظاهرة البناطلين الناصلة التى يرتديها بعض الشباب هذه الأيام فى (النصول) فسوف لا يحتاج (الشباب ديل) مستقبلاً إلى أرتداء شرابات لأنو البنطلون ح يكون بنطلون وشراب فى نفس الوكت !
* إذا إستمرت حكاية صناديق الدعم فى الإزدياد بهذه الصورة سيأتى يوم يكون فيه صندوق لدعم كل صندوق دعم
* إذا إستمرت حكايت ربط فاتورة الكهرباء بفواتير خدمات أخرى فسيأتى يوم لن يستطيع فيه المواطن شراء الكهرباء لأنو ما (مرخص عربيتو)
* إذا إستمر إزدياد أعداد الخريجين دون تعيين فسوف يأتى يوم تجد على بطاقة أحدهم (الوظيفة : سائق ركشة وزميل كلية الجراحين) !
* إذا إستمرت حكاية الإنفصالات دى فسوف يأتى زمن نكون فيه أول شعب يسكن فى (أوضة وبرنده) !
* إذا إستمر تصاعد سعر الدولار فسيأتى يوم يحتاج فيه المواطن (إنو يزيد على الماهية شوية) عشان يشترى ليهو (فرشة أسنان) !
* إذا إستمرت ظاهرة التفكك الأسرى سيأتى يوم يقول فيه والد الفتاة للعريس الذى تقدم لها (يا إبنى نحنا أسرة محافظة البت عندنا ما بتبيت بره البيت أكتر من يومين فى الاسبوع) !
* إذا إستمرت ظاهرة تزايد أعداد من يمنحون الدرجات العلمية العليا بهذا الشكل الغريب فسيأتى يوم نسمع فيه عن (دكتور مصطفى الحلاق) ودكتورة (عوضية الحنانة) !
* إذا إستمر تزايد سعر اللحوم بهذا المنوال سيأتى يوم يكون فيه الدعاء الرسمى للشعب الفضل هو (لحمتك يا رب)
* إذا إستمرت ظاهرة إرتداء الفتيات للملابس الشفافة فسوف تحتاج شرطة النظام العام لإنشاء إدارة بإسم (إدارة التظليل) !
* إذا إستمرت معدلات نهب المال العام فى الإزدياد بهذه الصورة التى نطالعها سنويا عبر تقارير المراجع العام ح يجى يوم ما ح يكون فى مال ولا يحزنون !
* إذا إستمر (قدو قدو) فى ممارسة الجلد بتلك الطريقة التى شاهدناها (يوم بيكتل ليهو زول) !
* إذا إستمر الحال بالمدينة الرياضية بنفس المنوال حتى أصبحت (خرابه) ده يكون (لعب ساااكت) !
* إذا إستمرت زحمة الشوارع دى في الإزدياد (تانى عربات المسئولين تمشى بى وين؟)
* إذا إستمر تزايد أعداد (الكبارى) و(نقصان) أعداد الشوارع من جراء الحفر والمطبات فلن تجد تلك الكبارى (عربات) تمر عبرها !
* إذا إستمر تزايد أعداد عربات (الليموزين) ذات اللوحات (إستثمار) نقترح على المسئولين تغيير اسم الوزارة إلى وزارة (التاكسى والإستثمار) !
* إذا إستمرت إدارات الأندية لدينا فى الإعتماد على (الفقراء) من أجل الفوز بنتائج المباريات بدلاً عن الإعتماد على التدريب واللياقة والمهارات فلا شك أننا سنحرز يوماً كأس العالم .... فى الدجل والشعوذة
* إذا إستمرت حكايت (مفاوضات الدوحة) الما عاوزه تخلص دى بقترح على الحكومة تشترى ليها بيت هناك وبعدين التبيعو لمن تنتهى المفاوضات وتوفر (حق الفنادق) دى !
* إذا إستمرت كليات الطب (الخاصة) فى قبول الطلاب الحاصلين على نسب متدنية فنحن موعودون بأطباء (الدمار الشامل) فى القريب !

كسرة :

إذا إستمرت الملاريا دى معاى ح أضطر أمشى الدكتور واليحصل يحصل

ما وريتنا ...اذا استمر الفساد والمفسدين ..

واذا استمر نهب المال العام ..

واذا واذا ...حاجات كتيييييييرة ...لسع واصل ...

السلام عليكم

الاستاذ ابو ناجي

لو اي زول زعلك وحردت ليه المنبر نحن ذنبنا شنو

نحن ما الحكومه دي طلعت روحنا حردنا ليها السودان؟


فبالله انسى اي سجمان في سودانيزاون لاين دي وعود لينا يا ليل الفرح

يا ابو ناجي ..

زي ما قال ليك ...الحرد ممنوع .. وما تنسى ..

لو استمرت الساقية مدورة ...مياه النيل دة ح تكمل ...

اخي عتيق

واذا استمر التكاثر الاميبي للمطربين بهذه الطريقه سوف لن يكون هنالك مستمعين

واذا استمر المداحون بهذا التوالد فحينئذ سيكون الطار طار

واذا استمر ساخر سبيل في الغياب ..ح نكلم ليهو ناس قدو قدو ديل ..

Quote: فبالله انسى اي سجمان في سودانيزاون لاين دي وعود لينا يا ليل الفرح