Post: #1 Title: كيس جيلاني الصادق ويو .. العجلة كدر Author: ناصر الحاج Date: 12-18-2010, 06:46 PM
مبررات الوالي عن الضجة الاعلامية حول حادثة (جلد الفناة) انها : أ/ لدواعي سياسية ب/ احراج سياسي ح/ ما شفقة علي البت المجلودة د/ لكسب سياسي و قبل عام زورت الانقاذ نتائج الانتخابات : أ/ لكسب سياسي ب/هيمنة سياسية ج/ ما شفقة علي الشعب السوداني
Post: #2 Title: Re: كيس جيلاني الصادق ويو .. العجلة كدر Author: ناصر الحاج Date: 12-18-2010, 06:58 PM Parent: #1
هيئة علماء السودان او رابطة ما بعرفو شنو داك!.. ، بعد الانفصال ح تتحكم في السلطة في شمال السودان و تتحول الي: أ/ هيئة امر بالمعروف و بكل شيء أخر ب/ نهي عن المنكر ج/ نهي عن الاحلام د/ سيطرة علي كل القرار السياسي في باقي السودان و تتحول البلد لـ سعودية او طالبان اخري بأذن الله الواحد الاحد.
Post: #3 Title: Re: كيس جيلاني الصادق ويو .. العجلة كدر Author: ناصر الحاج Date: 12-18-2010, 07:08 PM Parent: #2
كتير من الشماليين فرحانين للجنوبيين انهم خلاص ح يتحرروا (عاوزين ليهم الخير يعني). أ/ هل هذا كل ما نستطيع فعله ؟ ب/ افرحوا لما تحرروا باقي السودان بعداك ما ح تكون في اسباب لوجود بلدين بعلمين مختلفين
Post: #5 Title: Re: كيس جيلاني الصادق ويو .. العجلة كدر Author: ناصر الحاج Date: 12-19-2010, 09:40 PM Parent: #4
Quote: وقال البشير -في خطاب ألقاه بمدينة القضارف شرقي السودان- ""إذا اختار الجنوب الانفصال فسيعدل دستور السودان، وعندها لن يكون هناك مجال للحديث عن تنوع عرقي وثقافي، وسيكون الإسلام الدين الرسمي والشريعة الإسلامية المصدر الرئيسي للتشريع". وأكد أيضا أن "اللغة الرسمية للدولة ستكون اللغة العربية".
عندي صاحبي (اخدر) كده .. الخدرة النآآآآعمة الدايرة كسرة ديك .. و الله ح يتعب تعب في الايام الجاية دي بعد الانفصال! .. الناس ممكن تسمعوا كلام فاضى حتي في المواصلات مثلا: ما قلتو ما دايرين وحدة المقعدكم معانا شنو و مالين لينا البلد لسة!؟ ، حتي لو قال للناس يا اخوانا انا عربي و مسلم و ثقافتي عربية و القرأن و السنة هم نهجي و دليلي. برضو ح يسمعوا كلام فارغ. خالي حامد برضو الله يكون في عونو لانو اخدر و شعرو اجعد
أ/ بداية الفوضى و الصوملة و العنصرية البغيضة . ب/ و مازال هناك مسيحيين ووثنيين و لا دينيين في جبال النوبة او في السودان عامة يا عمر البشير. و ما زال الناس بعد الانفصال فيها الاسود و الابيض و الاحمر و حتي العيونو زرق .. و لحظنا السيئ ما كلنا بلون واحد زي السوريين او اللبنانيين او اليبيين و التوانسة و غيرهم من العرب. ج/ سيظل القتال و الهجوم و الكر و الفر سيظل قادم من الجنوب. بأعتباره ح يكون ملجأ آمن للحركات الثورية. د/ عمر البشير و الكاروري و نافع و علي عثمان و غيرهم .. ما ح يفهموا يعني شنو ( تنوع عرقي و ثقافي) حتي لو ذاكروها عديل كده في كتب. حبابك اخي منتصر
Post: #6 Title: Re: كيس جيلاني الصادق ويو .. العجلة كدر Author: ناصر الحاج Date: 12-23-2010, 05:52 PM Parent: #5
Quote: وسيكون الإسلام الدين الرسمي والشريعة الإسلامية المصدر الرئيسي للتشريع". وأكد أيضا أن "اللغة الرسمية للدولة ستكون اللغة العربية".
البلد بلدك منو البقدر يقول ليك حاجة ! .. صرح و إرتجل و تحامق زي ما عاوز ! . قلعتها بالقوة و بقت بتاعتك زي (المِِلِك الحر)!.. المفروض مافي زول يتكلم تاني زاتو.
يا عمر البشير شن خبرتك بالسياسة! .. طريقة خطابك الانفعالية دي تنفع تحلها بيها مشكلة بين قبيلتين ( دخل بيناتهم الشيطان !) .. او مشاكل المزارعين مثلا. 20 سنة ما قدرت تفهم فيها انو السياسة دي دهاء و مكر و حكمة و إتزان وووو.. 20 سنة ما علمتك إنوالسياسة دي عاوزة ليها زول لعاآآآآب زي (رونالدينو) كده ، زول يمسك المجتمع الدولي و امريكا ديل يختهم في سدرو و ينزلهم براحة كده يضقل بيهم بالرجل اليمين و الشمال و اهم شيء لا تشوتهم ضفاري لا تقلبهم باكورد. و سلفا كير ده ود بلدك المفروض تكون لاعبها معاهو (ون تو) مرة بالكعب مرة بالراس ، ومرة باص طويل .. و هكذا عشان ما يخلي ليك التيم و يمشي زي ما هو حاصل الان اما العرب اللاصق فيهم ديل! .. حقيقي ما منهم اي منفعة ( اصلا هم شايفننا دونهم و بيتعالوا علينا ) .. تقوم تباصيها ليهم مرة و تشتتها منهم مرة . و مرة تقرشها عندهم و مرة تبيضها ليهم عديل كده. كده بتمشي مصلحتك و مصلحة شعبكَََ!
Post: #7 Title: Re: كيس جيلاني الصادق ويو .. العجلة كدر Author: ناصر الحاج Date: 12-25-2010, 11:36 AM Parent: #6
Quote: شارك عشرات السودانيين يتقدمهم أعضاء "الرابطة الشرعية للعلماء والدعاة" في مسيرة جابت عددا من شوارع العاصمة الخرطوم، لرفض استفتاء الجنوب والاعتراض على وجود الحركة الشعبية بالشمال في حال انفصال الجنوب المتوقع.
وهتف المتظاهرون باسم الشريعة الإسلامية، رافضين في الوقت ذاته وجود الحركة الشعبية في شمال البلاد "لما تحمله من أفكار علمانية".
فكاهه: مسيرة زي دي بتجوب شوارع الخرطوم عاآآآدي زي الزبادي!.. سلمية كانت أو عدائية.
- (الرابطة الشرعية للعلماء) بعد العكة ما تحصل في البلد، ح تتحول الى فصائل مقاتلة في شوارع الخرطوم تسمي نفسها(رابطة فتية مجاهدي الانقاذ).. تقاتل ضد الكل .. المواطن + اي حركة تحرير سودان اخري داخل السودان.
نظام حمي و كدا !!! يا حليل الملاريا النهايتها (طراش)
المرض دا نهايتو (انفاصل)
ناصر يا دفعة .... سلامات
Post: #9 Title: Re: كيس جيلاني الصادق ويو .. العجلة كدر Author: ناصر الحاج Date: 12-25-2010, 04:20 PM Parent: #8
Quote: نظام حمي و كدا !!! يا حليل الملاريا النهايتها (طراش)
المرض دا نهايتو (انفاصل)
ناصر يا دفعة .... سلامات
Loooooooooooooool أبو النصر .. نعلك بخير و عافية معليش .. الجاتنا في وطنا سامحتنا!، الحمد آلاف علي النفس النازل و طالع.
تحياتي
Post: #10 Title: Re: كيس جيلاني الصادق ويو .. العجلة كدر Author: ناصر الحاج Date: 12-26-2010, 07:53 PM Parent: #9
حلاة بلدي و حلاة ناسها !
Post: #11 Title: Re: كيس جيلاني الصادق ويو .. العجلة كدر Author: ناصر الحاج Date: 12-26-2010, 08:23 PM Parent: #10
- الاستفتاء - التنوع الثقافي و الديني - خيار الوحدة - السلام - استفتاء حر و نزيه و انتخابات حرة و نزيهة - سيفا كير - الوحدة الجاذبة - الانتباهة - نافع علي نافع - الشريكان - الدولار زاد - تقرير المصير - الشريعة الاسلامية - اللغة العربية - الاعتراف بالآخر - الجلابة
يا ساستنا اتركوا كل هذا و اذهبوا لتزرعوا! .. هذا هو الحل و هذه هي مشكلتها الاولي و هذا هو ما نحتاج! ، خلوا القصر الجمهوري فاضي ما بتجي عوجة و امشوا ازرعوا، و كل الناس تزرع .. من الصباح لغاية الساعة 12 .. تعملوا مقيلة و ترجعو الساعة 3 لغاية الساعة 7 بدون توقف و كل يوم.. كل شهر ، كل عام و هكذا. مشكلتنا ما هي الدين الاسلامي ! .. الجوامع مفتوحة من زماااان و الناس بتصلي.. و كل بيت فيهو باب نسوان و باب رجال برضو من زمااااان. المسيحيين و غيرهم ما عندنا معاهم مشكلة و من زماااان . ما حصل سمعنا بي مشكلة بين افراد او حرب بين قبيلتين بسبب المسيحية و الاسلام.
هيييييه!!!
Post: #12 Title: Re: كيس جيلاني الصادق ويو .. العجلة كدر Author: ناصر الحاج Date: 12-26-2010, 09:46 PM Parent: #11
