الطاهر ساتى ياخى ماتجى تلعب معانا شوية!!

الصحفى الجد جد الطاهر ساتى

أريتك طيب ابوى

ياخى وينك مختفى ونحنا كملنا اللعب كلو؟
يااااه تصدق مشكلة السودان دى حليناها أكتر من مية مرة فى المنبر دا,,
أصلها شنو انت قايلا ما لعبة ضمنا..
كل مايحلها واحد او واحدة مننا الحكومة تقفلا بالغلط..

ياخى نحنا فى المنبر دا اكتشفنا أنو عمرو موسى منتحل شخصية البابا شنودة..
ومولانا محمد المرتضى أكبر صهيونى وقاعد يسلف الباسويرد بتاعو لنتنياهو..
سبحان الله ماعارف الحاجات دى بنعرفا كيف, لكن امشى واجى أقول الإلهام والفراسة..

طبعا زمان كانت دارفور عندنا قطعة بتاعة بلى استيشن..
الموت..
الإغتصاب..
الحريق..
نشيل ونضرب ونقسم ونطرح والشاطر هو اليدو خفيفة فى تحريك الأزرار..

نشبع لعب ياسيد اللمنتى ليك ونمشى نتعشى وننوم ونحلم أحلام سعيدة نشوف فيها حليمة وابكر حايميين ولا ماتوا ولا حاجة منتظرننا نلعب بيهم بكرة بعد الواحد يفطر ويخت سفة كاااربة وكباية الشاى قدامو..

أما الحكومة والطائفية عرفنا لعبتم وكيف نحاربم..
أصلو الود علاء اسم مستعار بكتب بيه على عثمان..
والبشير بكتب تحت اسم بقولوا ليهو وهبة..
ونافع داخل باسم بدر الدين..
أما الطائفية المنقرضة..
فاتضح أن عمر فضل المولى بيدى باسويردو للصادق المهدى..
ومحمد عادل هو مبارك الفاضل..

وابوالحسين الإسم الحركى للميرغنى..

فتعرف الإكتشاف دا ريحنا شديد ولقينا ببساطة ممكن نهشك للبشير ونافع وعلى عثمان ونغليهم ونمشى هانئى البال, كون اننا دفعنا ضريبة الوطن علينا من تالا النضال..
وهكذا مع الطائفية عندما تطلع من الخط..
وشعارنا المابتلحقو شتمو!

أها الأيام دى لعبتنا المفضلة انفصال وحدة..
نتسابق على أخبار الناس الشايلين همهم فوق ضهرم والهم كرابو مقطع..
ونقول كدا نجيه العنوان ومعاه بين قوسين توجد صورة..
ونجرى ونجى نعد فى عدد القراء والمتداخلين..
وألذ حتة فى اللعبة دى التدخلات الخارجية دى بتكيفنا للآخر من ناحية دسامة شمار وحرفنة فى التقعيد!

وألذ منها حكاية ابيى ياخى المسيرية ديل شايفنهم زى قطع الشطرنج نرصهم ونفرتقم,
وبالكتير شايفين دينكا والمسيرية حايلعبو دافورى إذا الأمور ماظبطت, بس همنا نعمل جمعية خيرية ونوفر ليهم الكدارات وهم يرسلوا لينا الأخبار مع سيف مساعد..

سيف مساعد كمان دا حاجة تانية..
ياخى دايما بحس فى حاجة مشتركة بينو والمكاشفى الخضر ( غير الدروشة)..
حاجة تانية كدا, يعنى زى ماتقول المكاشفى شيخو شايلين حالو وهو شايل حال ناس الكورة وبنات الأحفاد..
وسيف مساعد ناسو فى الدوحة وهو قايلم زاحفين على الخرطوم..

ماقلت ليك اللعبة لزيزة؟

المهم حاليا بنشجع فى اللعبة الحلوة بين الحركة والوطنى واحتمال نشتكى للفيفا( حسب ظروف التحكيم وجنسية الحكم)..

والله يا الطاهر فى حاجة واحدة صادقة هنا..
الموت
الموت
الموت
وبنعرفوا يوم المنبر يقلب اسود ويبقى تقيل ومايفتح بسهولة..

الغريبة الموت بقى حريف يعزل أحسن ناس ( الظاهر أنهم مابلعبوا كويس)..

والله لدرجة قربت أقول للؤى الفنان ياخى انت مابتشوف؟
ياخى حاول شخصيتك المنبرية دى شتت عليها حصوة مساخة وقطامة وبرة برة خليك طيب (ككل المسخاء المنبريين)..
الود دا أنا خايف عليهو ربنا يطول فى عمرو..

المهم نسيت عايز أقول ليك شنو

لكن مشتاقين وبس!!


فى اليك:
وياخى انا لايمك..
ليش ماعندك عمود ونسة زى أغلب الصحفيين فى الصحف الطيارة فى السودان؟
أوعى تبقى دمك تقيل زى فتحى الضو!

أخخخخخخخخ نسيت لعبة العنصرية وكيف بقينا فيها حرفا..

المشكلة مافي ليها طريقة عشان كباية الشاى كملت,,

وماأنسانيها إلا القريفة..

ونسيت اننا حولنا الشعب السودانى كلو لعيانين..

ودا كمان تشخيص صحفى..
وزى ما إنت عارف الصحفى لايكذب أهله فى (هكذا) مواضيع!

Quote: والله لدرجة قربت أقول للؤى الفنان ياخى انت مابتشوف؟

أخـي بلّة
نـهارك سعيـد
وجـمعتك مباركة

عُذراً إن لـم استَبِـنْ إن كنت لؤي الـمعنـي
والـمعنـى الـمقصود من الـجُّملة





لك الـتّحيّة والوُدّ
وللأخ الطّاهر

مرحب لؤى

الجملة تقرأ هكذا:

Quote: الغريبة الموت بقى حريف يعزل أحسن ناس ( الظاهر أنهم مابلعبوا كويس).. والله لدرجة قربت أقول للؤى الفنان ياخى انت مابتشوف؟ ياخى حاول شخصيتك المنبرية دى شتت عليها حصوة مساخة وقطامة وبرة برة خليك طيب (ككل المسخاء المنبريين).. الود دا أنا خايف عليهو ربنا يطول فى عمرو..

والمقصود أنت نعم

مع خالص ودى

رجعنا يا الطاهر

ومعى كباية الشاى وأخواتها فهى ترفع المزاج وتنصب الزهج وتجر الويلات أحيانا.

أها ياحبيب- زى مابقولوا مغرضى ماليزيا والخليج والسودان- نحناهنا لاشغل لامشغلة ولابنحتاج ليهم..
يكفى أنك سودانى..
أول من تنزل من الطيارة تلقى مجهزين ليك البيت وشيك مقدم وشيك تمشى بيهو الكرين تختار عربيتك التوماتيكا..
وتجى تفتح بيتك ويجوك الجيران الامريكان حق الله بق الله وحمد الله على السلامة وكلهم فرحون بأنهم يجاورون سودانى..

فتصبح هريرة نؤوم الضحى وزهير نؤوم الضهر..

وبعد قليل سأغدو الى الحانوت يتبعنى شاو مشل شلول شلشل شول

وقبل أن أدخل الحانوت أبرمج العربية على اتجاه البيت عشان توصلنى فالظروف مامعروفة..

هذا حالنا هنا والحمد لله..
فقد سمعت بوش يقول والله ياسودان لو عندى شعب متلكم لقدت كل العالم..

الغريبة هذه العبارة البوشية تطابقت مع نفس العبارة التى حكاها لى شاعر غنائى كبير (رحمه الله)التقيته فى مهرجان عنادل الدامر فى الدامر..
هذا الشاعر حكى ابان فترة عمله بسلطنة عمان كان ومعه أصدقاء سودانيين يتمشون فى الطريق العام وفى يد كل واحد منهم علبة ببسى..
فبعد أن أفرغوا محتوياتها فى جوفهم ظلوا يحملون الفارغ لمسافة حتى وجدوا سلة مهملات فأهملوها فيها..
قال: كانت هناك عربة سوداء تمشى بمحاذاتنا ببطء وما إن رمينا فوارغ البيبسى حتى وقفت العربة وأسدل زجاجها المظلل وشخص عمانى ينادينا..
ذهبنا إليه فتفاجأنا أنه السلطان قابوس..
فقال السلطان كنت مراقبكم وراهنت نفسى أنكم سوف لن ترمون العلب الفارغة فى الشارع وقد صدق حدسى..
ثم أردف: والله ياسودان لو عندى شعب متلكم لحكمت به العالم!!
غايتو بتخيل لى ود شيقوق بكون بلعب كشتينة مع قابوس واسماء الجنيد تكون يوميا بتصبح على السلطانة (إن وجدت)

المهم نرجع لنضالنا بعد أن تسلينا قليلا ببعض توافه الأمور..

فنحن هنا قد تطور خطابنا واديك مثال:

يجيك واحد متداخل هكذا:

الحبيب فلان
ياحبيب انت زول منحط وساقط اخلاقيا وبتاع قوالات وفتن
لاتظنن أننى أشتمك حاشا لله فأنا أوصف حالة..
لك مودتى التى تعلم (انتهى المثال)

ياسيدى أصبح عندنا تلاتة أنواع من المحللين:

1- أطرش يقول ليك سمعت تحت تحت أن الحركة الشعبية بعد أن تحرر الجنوب فى يناير ستتفرغ لدحر الغزاة العرب وإعادة مملكة كوش..
وسوف تطالب بمثول ابن ابى السرح أمام المحكمة فى لاهاى..
وسيكون شعار حربها سنعيدها سيرتها الأولى..
وخلى بالك السر كلو فى كلمة الأولى, وهذه يمكن تأويلها للرجوع بكوش حتى عهد فرعون وموسى!

2- محلل كفيف يقول ليك: إنى أرى شجرا يسير..
فتعرف ديل ناس العدل والمساواة أصبحوا على بعد 200 كيلوجرام من الخرطوم!

3- وآخر أخرص يقول ليك لنكسب الحرب لازم صوتنا يبقى عالى فوق إعلام (العصبة الحاكمة).

كمان فى لعبة هنا اسمها أمريكا قامت دى عبارة عن بالونات كلامية يوسوس بها ناس الحكومة فنشتريها سكند هاند وننفخ فيها لحدى ما تطرشق..

فى السعودية لو سعودى سألك وعايز تقفل الموضوع تنسب الإجابة لابن سعود..
فواحد فلسطينى مرافق لزوجتو معلمة ابتدائى..
سألو سعودى كم يعطوكم يامحمد بدل سكن..
قال ليهو بعطونا 30 ألف فى السنة ( وهو بياخد 7 ألف)..
فقال السعودى: مايدرون أنكم مؤجرين بثلاثمائة ريال فى الشهر؟
قال ليهو يدرون لكن ابن سعود قال لينا اخدو التلاتين الف ريال ولو لقيتو منزل مجان أسكنو فيهو..
فانقطع الكلام المباح!

ياحليلم ناس مؤدبين وبيعرفوا حدودم..
ياخى حتى الملكة مافى زول عارف اسمها فقط يعلمون أن هنالك عمارة الملكة..
وماعارفين نحنا هنا خصوصا المناضلين بنمشى لفاطمة خالد ونقول ليها صلحتا ليكى ونحرشا على وداد بابكر..
والناس الغشما فاكرين دى حاجات فارغة وما فطنوا لبعد نظرنا فى ذلك..
فنحن نسعى لإيجاد حركة متمردة داخل منزل الرئيس وذلك هدف سامى لإسقاط الحكومة من الداخل..

أها الأيام دى بنمارس لعبة الدفاع عن الحريات فى السعودية( خصوصا حرية المواطن السعودى وحقه فى أن يقول لا)!

كباية الشاى كملت بجيك راجع لو لقيت شاى!

الأخ العزيز د. بلة
تحياتي و سلامي
والله من ما جيت راجع داير ألقى لي فرصة أقول ليك حمدا لله على السلامة و أرجو أن تكون و الأسرة بخير لكن ما لقيت أي فرصة. أها دي فرصة قبل ما بوستك دا يزدحم. و معك أحيي الأخ الطاهر ساتي و الأخ لؤي.

الأخ المحترم العوض

العيد مبارك عليك
واعفو مننا وعافين منك لله والرسول

والله يا العوض لك مودة فى قلبى لآأدرى ماسرها
أهم حاجة هنالك أسماء لما تشوفا قلبك ينشرح!

Quote: و معك أحيي الأخ الطاهر ساتي و الأخ لؤي

العوض
مساء الـخيـر

ولك الـتّحيّة وعامر الـمودّة يا عزيزي
ولِبلّة والطّاهر




تـحاياي

Quote: مرحب لؤى الجملة تقرأ هكذا: Quote: الغريبة الموت بقى حريف يعزل أحسن ناس ( الظاهر أنهم مابلعبوا كويس).. والله لدرجة قربت أقول للؤى الفنان ياخى انت مابتشوف؟ ياخى حاول شخصيتك المنبرية دى شتت عليها حصوة مساخة وقطامة وبرة برة خليك طيب (ككل المسخاء المنبريين).. الود دا أنا خايف عليهو ربنا يطول فى عمرو.. والمقصود أنت نعم مع خالص ودى

أخـي أُستاذ بلّة
لك الوُدّ والتّقديـر يا عزيزي

كُلّنا ماشّيـن
كان الليلة وكان باكر
الله يدّينا حسن الـخاتـمة بس
ويسترنا




الله يدّيك طولة العمر

Quote: الله يدّيك طولة العمر

وانت كمان يالؤى

موجوع يا بلة موجوع شكلك شديد
الله في يازول
كان مراك الطاهر ذكره بما قال حميد
الطاهر زول راكز وأصلي
ــــــــــــ

يابا الجوامع هيل منو ؟
هيل الله نوم
حتي المدارس حقتو ؟
لالالا
المدارس حقت الحيكومة نوم
هو الزول يكسر حقو كيف ؟
هو الزول يكسر بلدو كيف ؟

سلاماً يا بلة وكل سنة وهادي البلاد تمام

Quote: الحبيب فلان ياحبيب انت زول منحط وساقط اخلاقيا وبتاع قوالات وفتن لاتظنن أننى أشتمك حاشا لله فأنا أوصف حالة.. لك مودتى التى تعلم (انتهى المثال)

(لله جنود من عسل)
قالها معاوية عندما بلغه مقتل الأشتر النخعي بعد أن دس له السم في العسل ،
فيها شنو يا دكتور ، ما ياهو إنتو بتدّونا المضادات مكبسله ،

الحبيب ، ثم يلي لفظها قصف مدفعي لايبقي ولا يذر ثم الإنسحاب من خلف دخان كثيف
تجتهد في إطلاقه كتيبة متخصصة متخندقة تعتقد ، وفق كفاءتها العقلية ، أن (الضحية)
كفيف يسليه الإستهلال الظريف.
المشكله يا عزيزي ان بعضهم ، وهم أقلية لاتذكر والحمدلله ، يعتقدون أنهم وحدهم من يملك الحقيقة
ويجب على الغير الإنصات و (الإنصياع) لكل ما يأتي من الباب العالي، فما أن تطرح رأيا لايتطابق
مع (مجرى اللورى) الذي خطّته (شاحناتهم) وقع الحافر على الحافر إلا ووجدت نفسك (وحلان) وفتحت
في وجهك نيران بذيئة فإما أن تتجاهل مصادر النيران نسجا على نول أحلام مستغانمي (ثمة دائماً
من يحاول إستدراجك إلى معارك لا نبل فيها و لا شرف لأصحابها، حتى إن أجبتهم خرجت ملطخاً بوحل
مستنقعاتهم) أو تلوث المساحة بمزيد من الإسفاف وهنا تصطف في خط واحد مع أهل الفارغة والفجور
وبئس المصير.
عارف يا عزيز، يحزنك أن ترى تلك القلة وقد فشلت في (بروفة) الديمقراطية والحوار هنا في المنبر
في الوقت الذي تقدم فيه تلك القلة نفسها على أنها البديل القويم الرشيد لجهاز الكآبة القابع في
الخرطوم وبالتالي ، بوعي أو بدونه ، تكون القلة المعنية لخصت لكل من ألقى السمع وهو شهيد حقيقة
رسالتها ومضمون دواخلها ، وهو لعمري لايختلف كثيرا عن السائد الفاجع.

مع تحياتي من السوق الشعبي



_

لؤي العريس سلامات يا عزيز.

حسين بن خضر بن خليل

تحياتى ياصديق

وكفارة شايفك كنت فى العنبر العمومى المنوم فيهو الشعب السودانى المريض..

ان شا الله بلغت العافية ابوى!

أحكي

بله موسى يا حبيب

Quote: ونسيت اننا حولنا الشعب السودانى كلو لعيانين..

يعني مافي فايدة ؟!

الفاتحه

مودتي

بوست ممتاز، أوسكار طوالي يا ود موسى.
ياخي أمتعتني، وعزّيتني في الحال وفي نفسي، وبرضو ضحّكتني، لأنو شر البلية ما يضحك كما قيل.

---
فقط تمنيت لو أنّ لؤي التقط من أوّل وهلة أنّك مدحته كما لم يمتدح أحدٌ في هذا المكان.
إزيك يا لؤي وأريتك طيّب.

مولانا محمد المرتضى

كيفك ياوسيم

ياخى انت عايز تأجر الباسويرد بالربا وانت ماعضو فى الجمعية؟

مالكم كيف توحلون؟

تصدق يامولانا الكوليرا بقت لما ما تلقى زول تعمل ليهو فقدان سوائل بتفقد سوائل هى زاتا..

ياخى بس انت ألعب ان شا الله سيجة!

ونسميك الطيب سيجة كمان!!

راوية

كيفك ياست البنات

تعرفى ناس المهدى جابو واحد شاعر
اسمو الشاعر الصديق على وزن الملك الضليل

دا كمان عندو معارضة عينة..

مشكلتو مع ناس الإنقاذ أنو البشير ونافع كانو مقطعين وبنومو فى عنقريب مقطع..

وعلى عثمان ماعندو تاريخ..

وموش عارف فلان داك من نومو ولقى كومو..

ومسطرتو ومثلثو ومنقلتو آل المهدى..

وبعد دا كلو رافع شعار نصرة المهمشين..

أها دا عندو لعبة حلوة إسمها أنا بجرى وأبو حسين سكنى
ومرات بلعب عسكر وحرامية مع بائعى باسويرداتهم من أعدائه المفترضين..
ولما يزنقوهو يلعب استغماية!!

Quote: --- فقط تمنيت لو أنّ لؤي التقط من أوّل وهلة أنّك مدحته كما لم يمتدح أحدٌ في هذا المكان. إزيك يا لؤي وأريتك طيّب.

عزيزي مـحسن
سلامات وأشواق

بلا شكّ إلتقطت الـمدح الذي أخجل تواضعـي
لكنّـي لـم أشأ أن أجزم بأنّـي كنت "لؤي" الـمعنـي




لك وللـجّميـع هنا الـتّحيّة وعامر الوُدّ

Quote: _ لؤي العريس سلامات يا عزيز.

يا أُستاذ
سلامات

كُلّ عام وأنت بـخيـر




عُذراً أخـي بلّة

Quote: الحبيب فلان ياحبيب انت زول منحط وساقط اخلاقيا وبتاع قوالات وفتن لاتظنن أننى أشتمك حاشا لله فأنا أوصف حالة.. لك مودتى التى تعلم (انتهى المثال)

يا بلة الطاهر ساتي إعتاد أن يذهب ساعة مغربية ما
إلى مكاتب الرأي العام ليشرب كباية شاى بى لبن من
مقبولة ست الشاى ( أحرف من يقنن شاي اللبن) ثم يلتفت إلى
عبد المجيد عبدالرازق بجانبه ليعايره ويسخر من مريخيته
( إتو بتشجعو الفريق المكع كع دا كيف)..
وبعدها يتبادل (الهمسات المشبوهة) مع محمد عبد القادر قبل أن يرتجا
سويا بالضحك ، ثم يتفرغ للتأمل (محتاسا) في ناس مجلس الصحافة و(عمايلم)
والاخيرة هي ما يشغله حاليا فلا أظنه سيعود هنا قريبا اللهم إلا إذا
قرأ كلامي دا وجاء مكابرة منو ..

ياخ والله بوست اكتر من روعة يا بلة
ليك الود

Quote: (لله جنود من عسل) قالها معاوية عندما بلغه مقتل الأشتر النخعي بعد أن دس له السم في العسل ، فيها شنو يا دكتور ، ما ياهو إنتو بتدّونا المضادات مكبسله ، الحبيب ، ثم يلي لفظها قصف مدفعي لايبقي ولا يذر ثم الإنسحاب من خلف دخان كثيف تجتهد في إطلاقه كتيبة متخصصة متخندقة تعتقد ، وفق كفاءتها العقلية ، أن (الضحية) كفيف يسليه الإستهلال الظريف. المشكله يا عزيزي ان بعضهم ، وهم أقلية لاتذكر والحمدلله ، يعتقدون أنهم وحدهم من يملك الحقيقة ويجب على الغير الإنصات و (الإنصياع) لكل ما يأتي من الباب العالي، فما أن تطرح رأيا لايتطابق مع (مجرى اللورى) الذي خطّته (شاحناتهم) وقع الحافر على الحافر إلا ووجدت نفسك (وحلان) وفتحت في وجهك نيران بذيئة فإما أن تتجاهل مصادر النيران نسجا على نول أحلام مستغانمي (ثمة دائماً من يحاول إستدراجك إلى معارك لا نبل فيها و لا شرف لأصحابها، حتى إن أجبتهم خرجت ملطخاً بوحل مستنقعاتهم) أو تلوث المساحة بمزيد من الإسفاف وهنا تصطف في خط واحد مع أهل الفارغة والفجور وبئس المصير. عارف يا عزيز، يحزنك أن ترى تلك القلة وقد فشلت في (بروفة) الديمقراطية والحوار هنا في المنبر في الوقت الذي تقدم فيه تلك القلة نفسها على أنها البديل القويم الرشيد لجهاز الكآبة القابع في الخرطوم وبالتالي ، بوعي أو بدونه ، تكون القلة المعنية لخصت لكل من ألقى السمع وهو شهيد حقيقة رسالتها ومضمون دواخلها ، وهو لعمري لايختلف كثيرا عن السائد الفاجع. مع تحياتي من السوق الشعبي

أروع "توصيف" لحالة اعيت جهابزة هذا المكان في وصفها فإنبرى لها مولانا "موصفا" بعد ان فككها بلة و "شرحها"
يديكم العافية ...
أجمل بوست اطلعت عليه مؤخرا

Quote: ياخى نحنا فى المنبر دا اكتشفنا أنو عمرو موسى منتحل شخصية البابا شنودة.. ومولانا محمد المرتضى أكبر صهيونى وقاعد يسلف الباسويرد بتاعو لنتنياهو.. سبحان الله ماعارف الحاجات دى بنعرفا كيف, لكن امشى واجى أقول الإلهام والفراسة..

إنت بتمشي وتجي وتقول الإلهام والفراسة وأخوك يعاين فيهو ويضحك ويمشي ويجيهو راجع..
.. راجع.
ورحم الله ود الرضي.. بس يا العزيز المسألة في مجملها كوميديا سوداء محض ، إضحاك
غير مريح للنفس كال morbid humor، وفي رواية أخرى تراجيديا مغربلة..

محمد قرشى

السلام يازول جاك

ياخى الصحفى قال الشعب السودانى كلو عيانين ورقدوا مستشفى..

إنت قلت:

Quote: يعني مافي فايدة ؟! الفاتحه

يجى واحد يقول ليك دكتور القرشى يقتل الشعب السودانى

والله تانى مية صاوى مايقدروا يدافعوا عنك خصوصا لو بقيت جبهة عريضة والراقدين شعبى (مؤتمر او ديمقراطى)..
أما لو بقيت وطنى (مؤتمر ضد اتحادى) فى الحالة دى (بلة) مايزيد طينك!

فيازول أحسن تفك القوسين وتجمعن فلو حاصل الجمع طلع جبهة عريضة تكون المسألة اتحلت!!

محسن خالد

سلام

ياخى لاشوفتن تبل الشوق ولاردا يطمن
اريتك تبقى طيب انت!!

والله يامحسن كل ما أهبش التلفون أخاف أكون مزعج..

طبعا مامزعج ليك إنت ذات نفسك..

لالالا... خايف أكون مزعج للتلفون!

سلام يا دكتور
واريتك طيب
وعبرك سلامي للحبيب محسن

من حسن حظي الليلة لقيت منك عدد 2 بوست * بهما كلام عجيب






ـــــــــــــــــ
الاعجب ان [2 بوست] دي زاتها لو عملناها مثنى بتطلع كلام عجيب !!

ياها الرجعة حبيبنا بلة
خبر بوستك ده جاني في كادقلي
عليك أمان الله من الجمعة لى عصريتنا دي
أخوك لافي مابين جبال النوبة ووديان الحوزامة وسهول المسيرية
البلد ديك سمحة ياخ ، لكن أخخخخخخخخ
الله يلعن الحرب



............
نص الليل بجيك بى مهلة
والى ذلك الحين ( كن بالف خير)

الأخ جلال عثمان

لك من المودة كأسا دهاقا

ياخى محمد المرتضى دا كأنه كوكب درى!!

مولانا محمد المرتضى

ياأخا سارة التى فى الأعالى

نحن هنا أصبحنا خبر إن ومبتدأ كان مرفوعين بالنفخة البائنة على جضومنا..

ماعندنا باسويرد نحنن ناخد الباسويرد نجنن وكلنا حسان بن متغير..

وسيد اللايحة يفتش ضنب البقرة..

والبقرة لاشية فيها ولاباربكيو!!

يا احمد يوسف ابوحريرة

العيد مبارك عليك

ياخى بوستين بس عشرة بوسات كمان

يازول انت وعلى ود النعيم أبيتو البطان تب وفتوا خليتونا نطالع فى النجوم الصاعدة والادلت لامن عقدة الليل بالشعاع انحلت..

عربا ليا يازول مابتجيب اخبارن؟

بلة يا رائع

ماكل هذا الجمال؟

بصراحة كنت بفتش ليك أغنية بلة يا بلة وينو بلة عشان أختها ليك لكن ما لقيتها

الطاهر ساتى

التحية لك فى مسراك العظيم

فنحن إن دار محور سؤالك عنا فقد عرجنا بمحاجيننا وجلسنا وسدرة منتهانا ههنا..
فنضرب عليها بالحجر والمحجان ونأتى لقومنا بنبق ثمين يفلق الجالسين..

أما عصانا فنرمى بها فتلقف الجمال الذى ينثره السحرة فى هذه الدار حتى يقولوا آمنا!

عادل عبد الرحمن ابراهيم

مرحب بيك فى حوش بكرى
فمن دخله فهو ضامن (لكن ضامن شنو؟ انت وحظك)..

أما أغنية وينو بلة خسمتك بالنبى ماتجيبا والله أكتر أغنية سودانية مابحبها..
ماعارف ليه مع إنو بلة الغنوها ليهو قالوا لما يسمعا طاقيتو بتنشرط!!

يا جلال،
د. بله فكك المأساة إلى عناصرها الأولية مستصحبا خلفيته العلمية التي تتيح له تحليل الظواهر
على أساس لاتأتيه اللخبتة من بين يديه ولا من شارع الأربعين ، بله يعرف جيدا طبيعة
الجدول الدوري للعناصر ويعلم ما يتواجد في يسار ذلك الجدول وما في يمينه من مواد وخصائصها
عشان كدا بجيك كلامو مسنود حين يشخص الظواهر ، لكنني يا الحبيب فقط أصف الظواهر بسبب جهلي
العلمي والمعرفي بشكل عام، بس عليك الله مش حاجه تسغرب إنك تقول الجيش الأمريكي لم يكن محقا
في غزوه العراق لمخالفة ذلك المادة (5) من ميثاق الأمم المتحدة يقوم يجيك واحد يقول ليك
يا منافق؟ أو مثلا تقول إسرائيل لم تطبق القرارين الدوليين 242 و338 يطلع ليك عالم أو
عالمه يقول ليك الرسول استعاذ من مراهقة العجايز الليها ركايز فاميلي سايز؟ مش مأساة
واحد يقول ليك إنت ما جلال عثماني إنت جلال طالباني ويتعامل معك تفريعا على ذلك ويردف :
إياد علاوي سيدك وسيد سيدك يابتاع قائمة السيَّاب ؟
ولو (صهينت منو) يقول ليك ( في منولوجه المنخولي) يا أب بطنا غريقه وريني الحقيقه ،
أليست تلك دونكشواطيه لم يحلق في أفقها ميغيل سافيدرا زاتو يا جلال أخوي؟ أها يا العزيز
، في مثل هذه الحالات لايكون ثمة تفسير إلا أن الطرف المعني مدفوع ب (شئ) غريب لاتعلمه أنت
ولايهمه سوى الإنتصار لذاته ومن ثم تنسحق الحقيقة تحت سنابك ال Ego الكذوب..
أرقد عافيه


(لقد سكرت من الدنيا ويوقظني
ما كان من عنبٍ فيها ومن بلح
تهرُّ خلفي كلاب الحيّ ناهشة
أطراف ثوبي على عظمٍ من المنح
ضحكت منها ومني فهي يقتلها
سعارها وأنا يغتالني فرحي)

مظفر النواب – إلى دمشق.

مولانا محمد المرتضى

أوركسترا هذا المنبر تضبط كلها على أصوات (الدربكة) العالية!

Quote: أوركسترا هذا المنبر تضبط كلها على أصوات (الدربكة) العالية!

والبوقِ

يامولانا

سنين وسنين متحكر واتاوق عايز افهم البوق دا عايز يضبط الإيقاع كيف مافهمت حاجة.

يا المحبوب أنا جيتك جاري

سمعت بحاجة اسمها بطاح يوسف عبد الفتاح يا بلة ؟
طيب احكى ليك عنو شوية
في بدايات الإنقاذ أطلق تحذيره الشهير : من أراد أن تثكله أمه فليغلق متجره أو يخفي عربته
وطوالي قام جاب بطاحات كدة من وين عارف، عشان يحل بيها مشكلة المواصلات
البطاح كان بيتحرك بينا من الكلاكلة الساعة سبعة صباحا ونصل الخرطوم ما بين تمانية وتسعة
ومن شدة ما البطاح طويل وعريض ومزحوم في ركاب كانو بيزهجو وينزلو فى نص المشوار
قبل الكمساري ما يتحصل منهم تعريفة البطاح

المهم ..( الله يطراك بالخير يا تبارك )
بطاحات يوسف لم تكتف بحل مشكلة المواصلات ، بل كانت عبارة عن منتديات لمناقشة كل مشاكل الدنيا والعالمين والسودان طبعا، بكل أنواع الفهم والمنطق والأساليب ، المشروعة وغير المشروعة
- على الطلاق فلسطين دي حقت اليهود، انت قائل خيبر دي من قرى حلفا ؟ خيبر دي في فلسطين لوماك عارف .!!
- على الحرام أحسن حاجة عملتها الحكومة دي ريحتنا من نقة الصادق المهدي، وخلت ريحة الأحزاب طير طير ..!!
- يازول سكر شنو البتشتريهو من السوق الأسود بجنيه ؟ جيب كيلة بلح وخلاص، وطعم للشفع بالحلاوة وانتهى الموضوع ..!!
- هييع ، عليك الله أمبارح شوفتا الرجالة ديك في ردهم على محاولة إغتيال حسنى مبارك ؟ عجبنى ليك والله ، حلبي ابن ك ل ب ..!!
- انت عارف يا صاحب بلدنا دي محتاجة لى وقفة شوية ومراجعة فكرية شاملة وأنا إفتكر دي المرحلة اللى لازم يلعب فيها النخب والصفوة دورهم الحقيقي وكدة..!!
- والله يا نفيسة ما قدرت إمشي أعزى مع زبيدة امبارح ، احمد ولدى كشتو الإلزامية ونحن طول اليوم بنفتش عليهو، نحمد لله جا كلمنا صديق صحبو بالحصل ليهو فى السوق حتى ارتحنا ، والله متلومين مع زبيدة اصلها مابتقصر معانا ..!!
- ....
- ...
هكذا كانت تدار أركان النقاش في بطاح يوسف يا دكتور بلة ، وتلك الإختزالات دائما تكون بمثابة التوصيات النهائية
كنت باستمتع بالأركان دي ، ولذلك كنت كثير التجوال في أرجاء البطاح لأخرج بأكبر كمية من المعرفة قبل أن يصل بنا البطاح المحطة الوسطى
ولمن أرجع البيت بالليل إن شاء الله بجي بكمل ليك باقي الفيلم ..

وإلى ذلك الحين هاك الصورة الطازجة دي


الصف السادس، بمدرسة سلارا الإبتدائية بنين (تأسست عام 1938م)
محلية الدلنج، جنوب كردفان، منتصف السبت 27 نوفمبر
..

Quote: الصف السادس، بمدرسة سلارا الإبتدائية بنين (تأسست عام 1938م) محلية الدلنج، جنوب كردفان، منتصف السبت 27 نوفمبر

أخي الطاهر،
لم أتوقع أن يكتب عضو في المنبر عن منطقة مربع الدلنج كجوريا سلارا والكاركو على الإطلاق لأنها منطقة ظلت منسية وربما
لايعرفها أحد حتى ممن ينتسبون لما يسمى بالهامش لكن المفاجأة الأعلى أن أكون من المشاركين بشكل راتب
في هذا البوست ومن المهتمين به لأجد صورة لأحد فصول مدرسة (سلارا) الإبتدائية التي زرتها مع والدي في طفولتي
وكان الوالد ، أطال الله عمره ، يعمل بالتربية والتعليم والذي كانت زيارته لتلك المدرسة في شأن يخص تلك
المدرسة وكان الوالد قبلها يعمل ناظرا لمدرسة كجوريا لمدة سنتين وتلك فترة تحتاج الكتابة عنها لبوست منفصل،
عشت والأسرة لعامين هناك كانا من أجمل سنوات العمر ومازلت أذكر تفاصيل كجوريا وسلارا والطبيعة الخلابة
ولا أغالي إن قلت لك أننا ، رغم البعد عن الأهل وأمدرمان ،أحببنا تلك المنطقة التي من الله عليها بخير في كل شئ سوى
الثعابين التي كانت ، رغم الإحتياطات ، تمثل بعضا من الخطر ومن مشاهداتنا اليومية.

تلك مراتع الغزلان و(جداد) الوادي والتي كان البعض يصيدها ليكفل مؤونة أسبوع من الغذاء إذا تأخر (المتعهد)
في الدلنج في تمويننا والمدرسة الداخلية بما نحتاج وكانت مزرعة المدرسة مصدرنا للخضار والفافاي والحمضيات
وكان طير النعام يمر ببينا وكنا - كما في أفلام السفاري- حين نعود لمسقط الرأس أمدرمان نحكي للأهل ورفاق الطفولة
بأن حديقة حيوان الخرطوم لم تعد تدهشنا وربما يصدقونا وربما لايصدقونا ، كنا نشرب من (السرف ) رغم أن المياه
العذبة تأتينا بال (خُرُج) ومياه السرف تأتي من عمق يقل حيانا عن قدم.
وكنا نقضي سحابة اليوم مع التلاميذ الذين كان والدي ووالدتي ( وكانت بدورها معلمةأيضا) يهتمون بكل شؤونهم ويستذكروا
معهم الدروس وكل ما يتعلق بحياتهم وكان برنامج منافسات المصارعة في الجمعة أهم أحداث الأسبوع ، رحم الله شيخ
منطقتهم حسن كنده كربوس فقد كان رجلا خلوقا وغيورا على منطقته.

منذ بضع سنين التقيت في مكتبي بمسقط محاميا من أبناء تلك المنطقة فغمرني إحساس لايوصف ، وبالطبع أول ما سألته عنه كان
مدرستي وبيتنا (كنت في طفولتي أعتقد أن المدرسة مملوكة لأبي freehold property ولم أك أدري أنه مجرد ناظر لها
المهم ( رد الله غربة تبارك) قلت لمحدثي :
طبعا هسه أكيد بقت هناك عدة مدارس غير تلك اليتيمة وثانويات وربما جامعة كجوريا العالمية فقال لي محدثي :
وييييين يا مرتضى ياخ ، مدرسة أبوك ما زادوا عليها وهي زاتا ومعاها بيتكم وبيت المدرسين والداخليه بقت
معسكر للدفاع الشعبي.
تقول لي فصل سادس بابو مشمع ومَتَكَّل بالحطب يا طاهر؟ يا راجل المدرسة الوحيدة في كجوريا أغلقت كلها،

سألتك بالله تنزل لي كل صور سلاّرا (بفتح السين وتشديد اللام) ، وهو الإسم الصحيح ولا يعتقدن القارئ الكريم
أن الإسم الصحيح (سولارا) ولو كمان بقيت زرت كجوريا عاد إلا أجي أتبرك فيك يا طاهر، ولو عملت بوست منفصل
عن رحلتك قول لي عوووك.

ياخ الكون دا منظم بدقة وما فيهو شئ متروك للصدفة.

محبتي


_
بالله يا بله إنت الناس ديل بتجيبم من وين؟

مولانا محمد المرتضى
تحياتى

إنت قايل نحن قلنا للطاهر ساتى تعال ألعب معانا شوية من فراغ؟

ياخى نحن بعد كدا نربع يدينا ونسلمك والطاهر أخوى البوست..

والله يا الطاهر تسلم أبدا ماخذلتنى الله ينصرك ويجرى الحق على يديك دنيا ويجعلك من الناجين من دسم البنادر وغى الدنيا ويكسيك بثوب نعيمه فى الآخرة..

Quote: ياخى نحن بعد كدا نربع يدينا ونسلمك والطاهر أخوى البوست..

ألعب غيرا..

مولانا محمد مرتضى ،التحيات الطيبات تصلك وتجدك مرتاح البال

Quote: سألتك بالله تنزل لي كل صور سلاّرا

لك الود وماتشاء، صورا كانت أوأحرفا تعكس واقع الحال بسلارا وأخواتها
تلك ديار زرتها ذات عام، فأحببتهاوأدمنت طيبة أهلها وسجيتهم السمحاء
ولذلك أهرب إليهم بين الحين والآخر من جحيم زيف البنادر
سلارا، عبق التاريخ ينبع من هناك ، ومنبع العلم كذلك
ومدرستها ذات التاريخ العريق ، يحدثني المك اسماعيل سونا بأن الآب فيلب غبوش والبروف الامين حمودة ورهط النوابغ تخرجوا من هنا، قالها بزهو ثم وضع كباية الشاهي ليشير إلي تلك المدرسة
من هنايامولانا













وماأدراك ما كتلا ، والي ،حي السلطان عجبنا،الفوس،هندية، تترا،النتل، كرمتي، كلارا، سندة،كجورية،كاركو،المندل،المندل عدلان
الصبي،الكدر، الفرشاية،التكنة،كندومايه، كركراية، أوسيبا
مكوك وسلاطين وعمد ونظار أعمام وأخوال ترى فيهم حكمة النبلاء وحسن الإدارة ولكن همشهم القدر بواسطة البؤس المسمى باللجان الشعبية، ولم تجن الديار من تهميشهم غير ( الجوطة والإقتتال )
هنايامولانا




هناك مراتع الغزلان والقيم النبيلة
والرجال الرجال، منهم من قضى نحبه ومنهم من يتدثر بمكارم الأخلاق الموروثة
المك اسماعيل سونا،الناظر كندة كربوس ،المك علي الشيخ دلدوم،السلطان عبد الحميد،المك عبد الحميد أبوزهرة المك التاريخى لمنطقة والي
،المك الحاج نصر ريال مك ، وأبطال الحرب العالمية أمينا دردمة،امينا مامور و ...و... هم كماالنجوم بحيث لاتحصى وماضرهم ذلك ، فالأرض هناك مسمدة بتضحياتهم وكذلك الجبال شامخة بكبرئاهم
هناك، ماضياوحاضرا ومستقبلا

Quote: ولو كمان بقيت زرت كجوريا عاد إلا أجي أتبرك فيك يا طاهر

تلك قصة أخرى وحرف مرتقب
كجورياوالأجنق والمسيريةوالأما
والزرع والضرع وملتقى الأجناس والأعراق والعقائد على حب الأرض وصدق الإنتماء
ترقب كجوريا ياحبيب
وإليك من ترات أهلها
هذا المشهد


استاد طبيعي ومدرجات صنعتها الطبيعة
لمتابعة أبطال السبر ( أشرح ليهم السبر يا مولانا )
والقادم أحلى بإذن الله ، كما الغد في تلك الديار
ولك الود

..
خمنت وصغرت صورتين، رغم انو وضع البوست طبيعى عندى
ان شاء الله كدة تكون ظبطت معاكم ؟

سلام حبيبنا الطاهر

الصور الجميلة دى عايزة ظبطة شوية( أظن بعضها كبير الحجم)

على الطلاق البغيب عن البوست دا ندمان، او من باب معرفة الرجال .... ومجاورة السعيد وما اليها ... حلفنا بالطلاق رغم ان ذلك محظور ولكن لامانع طلما ان الامر لن يخرج من هنا ... وكذلك جربنا الالوان ...
متعة ياخ ولن نغادر... ولكن سنهادن الى ان يتم تعديل الصور

عدلت اذن

Quote: واحد يقول ليك إنت ما جلال عثماني إنت جلال طالباني ويتعامل معك تفريعا على ذلك ويردف : إياد علاوي سيدك وسيد سيدك يابتاع قائمة السيَّاب ؟ ولو (صهينت منو) يقول ليك ( في منولوجه المنخولي) يا أب بطنا غريقه وريني الحقيقه ، أليست تلك دونكشواطيه لم يحلق في أفقها ميغيل سافيدرا زاتو يا جلال أخوي؟ أها يا العزيز ، في مثل هذه الحالات لايكون ثمة تفسير إلا أن الطرف المعني مدفوع ب (شئ) غريب لاتعلمه أنت ولايهمه سوى الإنتصار لذاته ومن ثم تنسحق الحقيقة تحت سنابك ال Ego الكذوب.. أرقد عافيه

على الطلاق تاني ... يامولانا
مش تشيت عين الضلام بالضو حرم قلعتها قلع الشيئ شنو تفاسيرك يامولانا عايزة ليها كباية شاي
كما دكتورنا ولابأس بسفة "ماكنة" لزوم ياك صاحبى المتمم كيفي
اسعد الله ايامكم "كلكم"

Quote: ياخى نحن بعد كدا نربع يدينا ونسلمك والطاهر أخوى البوست..

بصراحة يا د. بله فاجأني الطاهر بمداخلته أعلاه التي وثقها بصور أعادتني إلى
أيام الطفولة ويبدو أنني سأبقي هنا.
والله يا الطاهر شغل لا يعلى عليه،
ربنا يغتيك وأنا جاي.

سلام يالعيبة!!

زمان كانوا بيقولوا (الحساب) ولد،

بس دا انت طلعت ابن (عربي)

د. بله و الضيوف



البوست دا


زي الخياري



او دورديب



__________

استراحة

Quote: بس دا انت طلعت ابن (عربي)

دا (شنودا)؟

يادكتور انت ورطني مع مولاناوإتخارجت ولا شنو؟
لا كدة ما كويس ، خليك معانا مولانا ده طلباتو كتيرة

مرحب أخونا إبراهيم عدلان

أخونا الطاهر ساتى

أنا معاك بس كيف نطلع (السلارا) من خشمك!!

ياخى مولانا دا (سلارتو) قوية!!

Quote: يادكتور انت ورطني مع مولاناوإتخارجت ولا شنو؟ لا كدة ما كويس ، خليك معانا مولانا ده طلباتو كتيرة

عزيزنا الطاهر،
د, بله له (التزامات ) كثيرة في المنبر ربما ينشغل بها عنا وهو مطلوب في مساحات
أخرى وجبهات نيرانا حرّاقه ، كما يعتقد أهلها ، أما أنا ، وكما ترى، لمغرم ومتيم
بموضوع سلارا وكجوريا وأنتظرك أن تتدفق هنا أو في بوست جديد عن المنطقة كلها
وعلى رأسها كجوريا، عايز أقول لأبوي بالله شوف زراعتكم وحقولكم وقد اشتعلت
قمحا ووعدا وتمني ،
عارف يا طاهر ، أول تعليق له - بعد زفرة حرى - حا يقول لي :
كل دور إذا ما تم ينقلب.


سننتظرك ،

مولانا محمد المرتضى
وأخونا الطاهر ساتى

متابعين معاكم بشهيق لايعقبه زفير..

واصلوا الحكى الطاعم دا!!!

متابعه لصيقة ..
حتى يستبين (العربي) الواضح من (عربي) السعودية !!

يا بله أخونا الطاهرر ده (سبّروهو) هناك ،
نحن دا الحصل لينا وصدقني وين ما قبّل تاني بيرجع هناك،

الطاهر ياخ مامكن تحندكني بصورة الإستاد الطبيعي من كجوريا وتعمل غمران،
لاتضطرني لمخاطبة الأنبا (شنودا) في شأنك ،
البرد هلك بعيرنا،

راجينك.

ود القرشى وو د المرتضى يامستلبين

أوع تكونوا كمان معلوفين ببسكويت غزاتنا.. ههههههه( بالمناسبة اللغة دى مابعيدة من غرض البوست)

ياخى قصة ابن العربى وابن عربى ذكرتنى النكتة بتاعة الراجل القرر الدكتور أنو مات والجماعة شايلنو على المقابر صحا, وقعد يكورك ياجماعة انا حى!!
قالوا ليهو يازول موت موتك انت بتعرف أحسن من الوهابية؟!

مولانا سلام

Quote: البرد هلك بعيرنا، راجينك

أمسك حبل الصبر
صور كتيرة وكلام كتير، بس عليك أمان الله بقينا نتمنى اليوم يكون 48 ساعة عشان نقسمها مابين الشغل والراحة والهوايات
والله يدي العافية
كدى شوف كلام الزول الجميل ده
وفي نهاية كلامو بتلقى صورة وسؤال
جاوب لى السؤال على بال ما اجيك بمهلتي أنصاص الليالي وإفسحك في كجوريا
وبالمناسبة جيتك أمبارح للغرض ده لكن لقيت المنبر ثائر وفائر ضد أحد الأعضاء
فقلت للإذاعة : دثريني بالهدوء والراحة .. فدثرتني ولله الحمد
هاك الكلام الجميل :
عفواً عفواً يا أجدادي شعراء الشعب
يا من نظموا عقد الكلمات بشكّة سهم
أنا أعلم أن الشعر يواتيكم عفو الخاطر،
عفو الخاطر،
وسبقتوني في هذا الفن : وداع الأحبابِ
خضتم أنهار الدمع وراء أحبتكم
باركتم بالدعوات مسار أحبتكم
من أسكلةِ الخرطوم إلى الجبلين ، إلى الرجاف
قاسيتم ، وأنا يا أشياخي قاسيت
كل السودان يقاسي يا شعراء الشعب
فدعوني أسمعكم شجوي :
شجوي أدعوه قطار الغرب
اللافتة البيضاء عليها الاسم
باللون الأبيض باللغتين ، عليها الاسم
هذا بلدي والناس لهم ريح طيب
بسماتٌ وتحايا ووداع متلهّب
كل الركاب لهم أحباب
هذي امرأة تبكي
هذا رجل يخفي دمع العينين بأكمام الجلباب :
"سلِّم للأهل ولا تقطع منّا الجواب"
وارتجَّ قطار الغرب ، تمطى في القضبان
ووصايا لاهثة تأتي وإشارات ودخان
وزغاريد فهناك عريس في الركبان
ها نحن تركنا عاصمة الاقليم ، دخلنا وادي الصبر
كل الأشياء هنا لا لمعة تعلوها
كل الأشياء لها ألوان القبر
الصبر ، الصبر ، الصبر
والكوخ المائل لا يهوي
والشجر الذاوي ليس يموت
والناس لهم أعمار الحوت
أحياء لأن أباً ضاجع أماً
أولدها فأساً يشدخ قلب الأرض
يحتاز كنوز الأرض ويبصقها دمّا
لتظل البورصة حاشدةً والسوق يقام
وقطار الغرب يدمدم في إرزام
تتساقط أغشية الصبر المترهل حين يجئ
ألوان الجِدة في وديان الصبر تضئ
والريح الناشط في القيعان يمر
يا ويل الألوية الرخوة
يا ويل الصبر
ساعات الأكل تعارفنا
الصمت الجاثم في الحجرات انزاح
وتبادلنا تسآل فضوليين
تحدثنا في ساس يسوس
وتحذلقنا عن جهد الإنسان الضائع
فغرسنا كل الأنحاء مزارع
جئنا بالجرارات حرثناها
هذي الأرض الممتدة كالتاريخ
حبلى بالشبع وبالخصب المُخْضَلْ
والناس هنا خيرات الأرض تناديهم،
لا آذان تصيخ
دعنا منهم – وتدارسنا تحديد النسل
وتجولنا عبر الدرجات
عربات شائخة تتأرجح بالركاب
ومقاصير للنوم بها أغراب
الأولى خشخش فيها الصمت
والرابعة العجفاء بها إعياء
ضاعت تذكرة المرأة ذات محط
ورجال يكتتبون ورجرجة وضجيج
ومآذن في الأفق المدخون تضيع
كوستي وأناس ينصرفون بلا توديع
وأناس يشتجرون على الكنبات
ها نحن دخلنا ما بين النهرين
الناس هنا جنس آخر
فقراء وثرثارون ولهجتهم في لين القطن
والباعة ملحاحون وحلافون
ولهم آذان تسمع رنة قرش في المريخ
هذا نوع في كل نواحي القطر تراه
جنس رحال منذ بدايات التاريخ
أرض الذهب البيضاء بهم ضاقت
رغم الخزان المارد والذهب المندوف بهم ضاقت
فانبثوا في كل متاهات السودان
الشيء المفرح أن لهم آذان
وعيوناً تعرف لون اللصِّ الرابض للقطعان
وسواعد حين يجد الجد تصيح
هذي ليست إحدى مدن السودان
من أين لها هذي الألوان
من أين لها هذا الطول التيّاه
لا شك قطار الغرب الشائخ تاه
وسألنا قيل لنا الخرطوم
هذي عاصمة القُطر على ضفات النيل تقوم :
عربات
أضواء
وعمارات
وحياة الناس سباق تحت السوط
هذا يبدو كحياة الناس
خير من نوم الأرياف يحاكي الموت
ما أتعسها هذي الأرياف
ما أتعس رأساً لا تعنيه تباريح الأقدام
ونزلنا في الخرطوم بلا استقبال
فتذكرتُ الحشد المتدافع في أحدى السنْدات
برتينتهم وقفوا في وجه الريح
وأطلّ من الشباك فتى القرية
قد عاد أفندياً إبن القرية
وانهالت بالأحضان تهانيهم
وأنا لا حضن سوى الشارع
يتلقفني ، يتلقف أجدادي الشعراء
هم في الطرقات وفي المذياع بكاء
خلف المحبوب من الجبلين إلى الرجاف
ما أحلى أياما لا تحمل إلاّ همّ الحب
ها نحن الآن تشبعنا بهموم الأرض
وتخلخلنا وتعاركنا بقطار الغرب
إني يا أجدادي لست حزينا مهما كان
فلقد أبصرت رؤوس النبت تصارع تحت الترب
حتماً ستطل بنور الخصب ونور الحب
حتماً حتماً يا أجدادي شعراء الشعب
__
محمد المكي إبراهيم - قطار الغرب

:::


أها يامولانا حك ذاكرتك وجاوب على سؤالنا
في زيارتك لمدرسة سلارا مع الوالد الكريم
اللافتة دي كانت موجودة ؟

الطاهر ياخزى

سؤالك دا لو عندو زمن محدد مولانا دا سقط واندفن بالجليد..

لكن فى الشايفو انا السؤال عندو زمن والجرس ضرب والمراقب نايم والطالب (كجوريا) نايم!!

حتى اشعال آخر..

مافى حدى ينزل لينا أغنية بحسبو لعب؟!

عزيزنا د. بله،

شوف لينا صاحبك دا وين،

الواحد يكون قاعد في الموقف في الدلنج راجي اللوري يشيلو (كجوريا) فجأة ، وبدون مقدمات ، يلاقي روحو في (هبيله)،
الطاهر ساتي ، الله يهديك ياخ ، طال انتظاري ليلة السبت والأحد كما قال الفلسطيني الجميل محمد حسيب ، أخشى أن يطول
انتظارنا ، كما هي العادة، وكما هو حالنا الذي لايشبه إلا ما جاء في مسرحية صموئيل بيكيت،
والله نحن (جودو) المابجي زاتو بالنسبه لينا قريب .
بين السماء والأرض..

نزِّلنا ياخ..




-
(وردت الحرف واستنشقت ريح صبابتي حين استهل قصيدتي حرف غريب..
الله يا طوق النجاة وملجأ المعنى المهوم .. والفؤاد التائه الأضلاع
زاوية الوجيب..)


الراحل محمد الفاتح الجزولي

سلام يامولانا

الطاهر كان جاييك فى (كجوريا) لكن اللورى نزلو فى (الكبجاب)..

ياخى مع ناس الإنقاذ ديل خطوط المواصلات اتشربكت..

Quote: ياخى مع ناس الإنقاذ ديل خطوط المواصلات اتشربكت..

هذا إن كانت هنالك خطوط أصلا يا العزيز؟
والله يا بله نقل لي أحدهم تقريرا ممعنا في السوء ورسم لي صورة الزفت بالنسبه ليها حليب،
أنا لاأشك أن الصبح آت ، في كلام بيقولوهو في الحته دي دايمن بالله جيبو لي،
كلام من نوع لولا ظلمة شنو كدا ما عارف ولانافع،
بس ياخ كمان كثير من العاملين معارضه بيخدموا في النظام دا أكتر من خدمة النظام لنفسه،
يعني ناس تحسبم مع غانا يطلعوا مع الخيانه،
زي لامن يكون الإستوبر بتاعك راس حربه للخصم ،
والله صدق المثل ، عدو عاقل خير من أبومقشاشه على الجوع....

غايتو .. الطاهر دا كان راجي الخطوط ما تتشابك يهو الماجاي ..
كلو كلو..



__

أوعا تكون قاصد بالخطوط دي التونسيه يا بله؟

Quote: غايتو .. الطاهر دا كان راجي الخطوط ما تتشابك يهو الماجاي

جاي إن شاء الله
بس خلي بطنا دي تروق شوية من القرف الحاصل ده
والله طامة بشكل ماعادي
لك الود

متابعين يا دكتور
بوست روعة
______________________

الأخ الطاهر ساتي
رسلت ليك إيميل
ليه ما اشتغلت بي ؟
:-(

سلام وتحية ياحبيب

Quote: رسلت ليك إيميل ليه ما اشتغلت بي ؟

متين ياخ ؟؟
ماإستلمت منك أي إيميل
وبمناسبة دي :
في الفترة الاخيرة إكتشفت في رسائل مهمة بتجي خاشة في ( البريد غيرهام)
ههههههه
والله ما إنتبهت ليها إلا قبل شهر وشوية وهسة بقيت أراجع الوارد وغيرهام
واسف جدا والله
البريد والهاتف بيصلك فى الخاص
ولك الود

ماسنجر بكري ده ما شغال ياعزان
[email protected]
أجدع تلفونك مع رسالتك

Quote: متين ياخ ؟؟ ماإستلمت منك أي إيميل وبمناسبة دي : في الفترة الاخيرة إكتشفت في رسائل مهمة بتجي خاشة في ( البريد غيرهام) ههههههه والله ما إنتبهت ليها إلا قبل شهر وشوية وهسة بقيت أراجع الوارد وغيرهام واسف جدا والله البريد والهاتف بيصلك فى الخاص ولك الود

شكرا يا حبيب
الرسالة ارسلتها لنفس الايميل
غالبا بكون عندك high security في ايميلك طفش رسالتي للاسبام
رسلتها تاني معاها التلفون
لو ما لقيتها فتش الاسبام
تخياتي الخالصة

عزان ما أتى للعب

من أتى لإيميل يصيبه أو طاهر يصطاده فمداخلته لما أتى له!

جصط كدنق ياعزان

ولكن لزم التنويه فهذا البوست مثلث برمودا فوق للأنكل وتحت الركبة..
من دخله لازم يعرف أن خطوط الإتصال العالمية بداخله مشربكة..
احتمال تتصل (مرج الزهور) فى لبنان تجيك (شبشة) فى النيل الأبيض.
ففى هذه الحالة تقفل الخط وتتصل تانى بعد إخطار ناس الكبانية!!

بوست زي ده في الصفحة السادسة ؟
والله عيب !