Post: #1 Title: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: Emad Abdulla Date: 11-24-2010, 09:12 PM
مُقبلات : ( أنا ابنُ التي .. لم تنمْ جيدا ، منذ عشرينَ عاما ، ولم ترَ لو حُلماً واحداً ، أو أقلْ .
أنا ابنُ التي .. يبستْ راحتاها ، وجفّتْ مياه مفاصلها ، وهي تبحث عن سببٍ واحدٍ للحياة ، ولما تزلْ .
أنا ابنُ التي .. جوّعتها يداها ، فأطعمتِ الطيرَ لحم أصابعها ، ثم غطتْ لهُ عُريَهُ بالخُصلْ .
أنا ابنُ التي.. لم تعدْ تتذكرُ مما رأتْ غيرَ أن الحياة التي تتمددُ في الموتِ أسهلُ مما نراها عليه .
أنا ابنُ التي انتظرتْ ، وانحنى ظهرها ، سنةً بعد أخرى ، فأسَمّتهُ : قوس الأملْ ) . __________
أنا ابن التي يسندها الغناء . .... كيف الغنا يكون و القمرة قدر ده حسناء شهّاية .. مجعوصة في برش السما ؟ .. سمعت نابك إيه في هواه .. و الدنيا قمرة , و شتا دلوع يادابو بيحبي و يلثغ .. لتلاتة لياليك السحرية بسمع يا خرطوم .. حتى الليلة . إتأكدت تمام من أنو الليلة أمر الله واقع , موت موت حياة حياة . .... أنا ابن التي سمعت صلاح عبدالله ولدها البعيد , و في مساْ شتوي زي ده .. سمعته يغنيها - نابك إيه في هواه .. بالعود - يغنيها في شريط كاسيت يحمل خيرات الدنيا .. يمين بالله لم يكن ذاك غناءا .. كان يمكن نويح أو شيتاً يعرفو براهو صلاح المنعول . فدمعت عيناها و قالت : يا حليلو ولدي . كلفتني تلك الـ " يا حليلو ولدي " تلفون طويل لصلاح , خسرت فيه ما خسرت من الجنيهات السودانيات التي يعزّ جمعها , ففراقها . ثم بقيت باقي الليل مشتاق للولد ذاك , المغني .. أخوي . .... ( أحلّ سفكَ دمي , في الأشهُرِ الحُرُمِ ) . من وين يجيني النوم .. ؟؟ .... مصطفى كامل – الجميل المصري المعلم الموسيقي – يجرف لموكب عثمان حسين الروح . فيسويها و يطرحها .. و يرشها و يقشها . و الروح دقداق و فرناغة و عفار , تركن للموانسة فتطيب من اول هبشات العود النقراشات , تتجهز و تعد العدة . حتى يدخلها موكب مزمار سيدي السلطان عثمان .. إنا لله : - الحنين و النوح زادو بلواااااهو - أيها المجروح أنسى أسلاااااااهو و داك المصري الجميل يزيدو حطب , و النار بقاقة .. و الكنجات يكمجن في الغزل و النساجة .. و العشب يقوم , و تطق ريحة شجر الجنة , و القمرة مرقَت للبدورا .. اللهم طولك يا روح . .... القمرة في الشتا إختراع غير صحي . دي حاجة . الحاجة التانية : عثمان حسين في نابك إيه في هواه : جرعة غير قانونية و زايدة , قد تفرتق حنان طيارة حلتكم . تلاتة : .. أنا ابن التي علمتني السمع و الخشوع و .. الحياة غناءا .
Post: #2 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: دينا خالد Date: 11-24-2010, 09:29 PM Parent: #1
كلوووو كوم والصورة دى كوم تانى !
ياخ دى انا اول مرة اشوفها !!
ــــــــــــــــــ أنا ابنُ التي .. لم تنمْ جيدا ، منذ عشرينَ عاما ، ولم ترَ ولو حُلماً واحداً او اقل ... السقد ابن السقدة ازيك ..
Post: #3 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: عمران حسن صالح Date: 11-24-2010, 09:38 PM Parent: #2
Quote: القمرة في الشتا إختراع غير صحي
هو بالله المنظر ده لسه موجود ؟؟ ياخي نحن ما نسينا الحاجة دي فراعي مشاعرنا الله يرضى عليكـ
البتاعة دي برنجي ؟؟
___________________ حريقة في رقمكـ المقطوع والتاني برضو !!
Post: #5 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: حيدر حسن ميرغني Date: 11-24-2010, 09:42 PM Parent: #3
الله يخليها ليكم ياعماد وتنعموا بحبها وحب من يحبها
Post: #11 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: Emad Abdulla Date: 11-25-2010, 06:09 AM Parent: #5
حيدر يا صاحب .. يسعد صباحاتك دايماً .
دايماً حالك اللطف ياخي .. و شاملنا يا رجل بروحك الحلوة .
تسلم يا حيدر ، و يديك العافية ياخ .
Post: #6 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: خضر حسين خليل Date: 11-24-2010, 09:49 PM Parent: #3
Quote: ثم بقيت باقي الليل مشتاق للولد ذاك , المغني .. أخوي . ....
ثم بقيت باقي الليل وحدي ثم
غناء وعثمان حسين ودندنات قديمات أحاول بها إسعاف ذاكرتي وروحي أحاول بها ياصاحبي نواحي بحري فهم هذا الحاصل الملعون ـ (من كاسات هواك أسقيني إتلزز) هو آخر ما أعجبت به من الأشعار فشكراً لسقياك يازول ياطيب .
Post: #13 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: Emad Abdulla Date: 11-25-2010, 06:37 AM Parent: #6
تصدق و تومن بشنو يا خدروب .. ؟ أخوك قرر ما داير أحزان تاني .. و لا وجع قلب و لا هم .. هذا العمر ماشي حاسي - و الحسيان هو كملان الشيء من بعد تمامه - و تلك مفردة عبقرية من تخريجات أهلي الشايقية . ثم إنه دينا خالد صادقة ياخي : مافيش فايدة ، غطيني يا نفيسه .
و هأنذا أدلل نفسي بالملذات المتاحة - بلا شيوع الثروة و السلطة بلا فقر معاكم - الشيوع هو فيما ملكت يدانا من غناء على كيفنا ، و هبوب الله النسّامة ، و القمرة بت السما نور الغلابى .. و رفاقٍ طيبين و بنين و بنات ، و شوية كتب و قرايات ثم رسم قدر ما الله أداني .. و إلى نحو ذلك مما يعد من آلاء الله الشائعات . و في ذلك فقد قطعت - يا ربي ليك الحمد - شوطاً ما بطال . و ما زلت أربي نفسي البطالة علي القبول بهذا الحد من معالجة الدات .. حتي بعد داك كان في معالجة لحاجات بره دورانيتي دي ، نقوم نقبل عليها .. يا صاحبي ح تكتلنا الدواير بت الكـلـب الشانقانا دي ياخي . من أول دورانية البيت لغاية دورانيات و شيمات القرف السياسي ، لغاية خازوق البلد التي راحت شمار في مرقة .
شفت عثمان حسين يا خدر .. !! مرات مرات بتحسر علي موتو ياخي .. تاني بقول بركة الخلاها و مشى قبل ما يشوف مآلات ما كان يغني له و عليه من وطنٍ و ناسٍ و أحوالٍ لأرواح و قلوب و مشاعر . يا رجل بقينا جلافيط أعزك الله .. و سايقانا تلك الإهتراءات جوانا و بره و كاسحة ، ماشين وين ؟ .. الله أعلم . هذا الصباح سمعت ( قسم بي محيك البدري ) .. سمعتها خاشعاً .. و حمدت الله علي الغُسل و الطهور الذي أبرني به .. و علي أنني و وردي أبناء ذات الجلدة التي انتهت مرقعة .. و قريباً سيؤول حالها إلي فرانكنشتاين . تاني شنو ؟؟ .. ليس إلا السلام عليك يا خدروب . يا واحد من الناس أبان دفو في صقيع هذه الغربة الوطنية الماحقة . هذا ، و الحمد لله رب العالمين .
Post: #7 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: Emad Abdulla Date: 11-24-2010, 09:49 PM Parent: #3
ليها تلاتة ايام يا عمران .. تلاتة ايام و هي معلقة في راس الخلايق و تديهم في حنانهم .. و ليل الخرطوم في القمرة بديع .. و أنا باراي ياخي .. أباريها ليك و هي تكاويني بت السما بت اللزينا .. و اسمع غنا حبيبك .. من أول " عاد الحبيب " .. و إنت طالع .. في غنا بيشبه الليل اب قمرة .. أمسك عندك : - عاد الحبيب - الجرح الابيض - مرحبا يا شوق - كفاية كفاية - لحن الحياة - ضنين الوعد - ذاد الشجون و و و و و .. غنا قمراوي .. لا يجوز سماعه من غير تحصن كامل بآيات الله التامات .. .... تصدق القمرة بقت تكون قاعدة للصباح بع الشمس تطلع .. !! أي و الله . قاعدة و شاحية و بهتانة في غرب السما , بعدما دفقت فضة لونها كلو على الخلايق .. زمان كلام زي ده مافي .. وللا يا ربي كان في ؟؟
تلفوني في المسنجر . و بطل حركات .. متين إنت اتصلت ..؟ أنا البتصل دايما يا قيحة .
Post: #4 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: Emad Abdulla Date: 11-24-2010, 09:39 PM Parent: #2
دندنة .. بللاي مش الخالق الناطق رشاد النميري ؟؟ الشعر ما مشكلة .. نعمل جورسيه أو هناي داك .. بوستيج .. - لغاية الليلة في زولة في حلتنا عندها بوستيج جنباوي ابو مسمار داك .. ما شا الله حلاة الدنيا عليها - ..... شفتي عثمان حسين و القمرة بهدلونا كيف ؟؟ أخوك مبهدل زي الترتيب يا دندنة ياخ .. و حالي حال التابا .. كيف الدبارة يا بت الشيخ فيك يا هذا الليل و القمرة و الغنا و الإجتياح ؟ و يقول ليك : أرجع لدنياكَ من قبل أن تُجتاح .. علينا نحنا الكلام ده ؟؟ و هو قد كتل الجدادة و خمّ بيضا ؟؟!! ..... و بعدين يا دندنة ياخ .. و بعدين ؟؟
Post: #8 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: دينا خالد Date: 11-24-2010, 09:55 PM Parent: #4
Quote: بللاي مش الخالق الناطق رشاد النميري ؟؟
هههههههههههههههه ههههههههههههههههاااااا يا عمدة قوية دى ..
ما تبالغ انت كمان ما للدرجة دى ... لووووب قول المعقول ياخ ..
ـــــــــــــــــــــ من ناحية انك عارض .. فعارض والله لكن رشاد .. دى واسعة شوية .. الشعر هيييييييين الكلام العرضان ..
Post: #9 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: Safa Fagiri Date: 11-24-2010, 10:11 PM Parent: #8
وبعدين معاك يا عماد !
It came with menopause ; and that ) is how we talked about it)
........
Post: #10 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: كمال سالم Date: 11-24-2010, 10:27 PM Parent: #9
والله ياعماد( نميرى) إنت كل يوم بتزيد بلاوينا بكلامك الطاعم ده ! قدر ماتغتس تجى نابل ببلاوى وصد ونوح ! ياود يارشاد براحه علينا .
بناتى الحلوات كويسات وبيسلمن عليك ,, حاولنا نتصل بيك لكن الشبكه خذلتنا ,, تحياتى يازول ياجميل وكل سنه وإنت والأسره بخير ,,
Post: #12 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: محمد عبدالرحمن محمد Date: 11-25-2010, 06:36 AM Parent: #10
شكراً عماد..
دي سودانيز اللنا كستا العضويه فيها!!
الجابك بي جنس دا يجيب الباقين [الفي بالي]*!!
* [دكين]؟ قد يكون..
Post: #14 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: Osman Musa Date: 11-27-2010, 07:46 PM Parent: #1
***
Post: #15 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: الطيب برير يوسف Date: 11-27-2010, 08:42 PM Parent: #14
Quote: حريقة في رقمكـ المقطوع والتاني برضو !!
شرحو
Post: #16 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: محمد حيدر المشرف Date: 11-27-2010, 10:38 PM Parent: #15
Quote: و هأنذا أدلل نفسي بالملذات المتاحة - بلا شيوع الثروة و السلطة بلا فقر معاكم - الشيوع هو فيما ملكت يدانا من غناء على كيفنا ، و هبوب الله النسّامة ، و القمرة بت السما نور الغلابى .. و رفاقٍ طيبين و بنين و بنات ، و شوية كتب و قرايات ثم رسم قدر ما الله أداني .. و إلى نحو ذلك مما يعد من آلاء الله الشائعات .
اهو انت براك قلت ( الشائعات ) فلا تروج لها ..
.. كيفك وكيف كيفك يا عمده .. ما تغيب كده ياخى .. الواحد اصلا معكنن وعاوز يشاكل ضلو !..
Post: #17 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: ود الخليفه Date: 11-28-2010, 08:12 AM Parent: #16
السلام عليكم
علي الرغم من ادماني لعثمان حسين
لكاني بكتاباتك تعيد علي اسماعي هذه الاغنيه من جديد
سجلتها من برنامج عمر الجزلي اسماء في حياتنا مع صلاح احمد محمد صالح صاحب الروائع
لمن كنت بجهز الشريط الفاضي والمسجل لاي سهره متعلقه بابي عفان
من التعليقات العالقه بالذاكره في تلك الحلقه تعليق عمر الجزلي علي اغنيه انا المظلوم ( الاغنيه ديه فيها منحنيات عاطفيه خطيره)
فتبسم صلاح وقال انو دا تعبير جميل ما حصل سمعو قبل كده
فرد الجزلي مزهوا انو سعيد يسمع كلام زي دا من صلاح بعد خبره 35 سنه في الاعلام
( افتكر انو فتامل بتاعه ملاسي هنا مناسبه جدا)
تعارفت مع بعض الاخوه علي مصطلح ( اعاده انتاج) للاغاني القديمه التي قد تكون مسموعه لنا ولكن لم تصل مرحله الاستهلاك
فالغناء الجميل لا تستهلكه الازمان
شكرا كثيرا عماد علي اعاده الانتاج فلم تفارق السماعه اذني بالحنين والنوح
Post: #18 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: ود الخليفه Date: 11-28-2010, 02:40 PM Parent: #17
عرضه بره الداره
Quote: هذا العمر ماشي حاسي - و الحسيان هو كملان الشيء من بعد تمامه - و تلك مفردة عبقرية من تخريجات أهلي الشايقية .
حسا كلمه كانت تسخدمها امي للبن بعد ان يبلغ غليانه ويبدا بالتبخر
او للكفتيره عندما يغلي مائها بدون تلقيم بالشاي
Post: #19 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: Sahar Yousif Date: 11-28-2010, 02:55 PM Parent: #18
أنا ابنُ التي.. لم تعدْ تتذكرُ مما رأتْ غيرَ أن الحياة التي تتمددُ في الموتِ أسهلُ مما نراها عليه
بالغتا با عماد ! دي عملية تعملها ...
Post: #20 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: DKEEN Date: 11-28-2010, 08:03 PM Parent: #19
ابن التي تحبها ومن دون الخلق في مدينة عمرانة..لاقاني وانا سايق- في سرية تامة- التي احبها معاي.. لاقاني عند تخوم محل احمد سمك في مدينة الشيخ خليفة ..في هيئة الشنب وبتلك المشية التي لو دققت فيها لايقنت انو صلاح عبد الله لايسير إلا بايقاع.. اخوك ياعماد بنقز وبمشي على ضهر الوضة.. اضف الى ذلك حظه الوافر في ربوع الدنيا ..فهو الوحيد الذي متع ناظريه ذلك الصباح.. اظنها دعوة امك يامسخوت..
Post: #21 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: محمد أبوالعزائم أبوالريش Date: 11-28-2010, 09:05 PM Parent: #20
Quote: فتبسم صلاح وقال انو دا تعبير جميل ما حصل سمعو قبل كده
طبعا يا ود الخليفة .... زولك ما فهم إنو صلاح ده (زول مأدّب ساكت). _______ عماد ..... دي عملية تعملها فينا نصاصي الليل؟
هسي أنا أعمل شنو؟
Post: #22 Title: Re: صدٌ .. نوحٌ , و زيادة بلوانا ( يا أيتها القمرة الطالعة .. سلام ) Author: بله محمد الفاضل Date: 11-29-2010, 10:34 AM Parent: #21
يا اخي الريدة دي شيء عجيب تكون جنبها وتشتاق ليها تبادلك الحب بالحب وأنت كأنك ليس معها تحس بأن حياتك ينقصها الكثير من هذا الحنان والدفء رغم أنه يغمرك . . . لهذه الأم ولما تمنحه من سعادة تنط تنط حتى تبلغ عنان السماء لها ولك لأنك تضعنا بصنيعك هذا في محرابها المحبات والإعزاز
وأيضاً ولعجزي التام عن القول في هذا المقام أقول براحة شوية علينا ما تفطسنا في غربتنا المعفنة دي ينوبك ثواب
