Post: #1 Title: بوست تحية للمميز أبوعركي البخيت Author: عبد الناصر الخطيب Date: 11-24-2010, 08:47 PM
بقي الواحد كل ما يقعد قدام المنبر ويتصفح ... صدروا ينقبض حزن ... كل حاجاتنا بقت تثقل الخاطر محاولة لاستحضار زمن جميل يطلع من زمن مؤلم _ ولو للحظات _ الواحد حيحاول يكتب عن المميز عركي ...
في النص الاول من التسعينات كان ختام أسبوع الفنون في معهد الكليات التكنلوجية جامعة السودان فيما بعد وكان دائما ختام الأسبوع بكون حفل لابوالعركي البخيت يومه أتمنعت الحفلة في أخر لحظة ... ونقلوها للحديقة الصغيرة بدار الاتحاد ورغم المنع وضيق المكان وكمية الناس الحضرت الحفل اليوم داك فضل حفل ملتصق بالخاطر لفنان مميزحيظل صوتوا فينا بفتح في الخاطر ذكريات زمن جميل ............
جانى هاتف فى المنام قال لى اكتب عن عيونك صحيت لقيت دوايتى فى يدى اليمين و الريشة معطونة فى حبر كلام تمام..تمام..تمام و كتبت فى الورق الكبار طلعت قصيدة بتشبهك الخالق الناطق تمام....
ما عارف شاعره منو بس فيها لمحت الاستاذ /هاشم صديق
Post: #2 Title: Re: بوست تحية للمميز أبوعركي البخيت Author: عبد الناصر الخطيب Date: 11-24-2010, 09:03 PM Parent: #1
اللحن ده خالد في الخواطر (( أضحكي )) سمعتو في (( أنت نيل ))
وفي الخاطر كمية من الناس الروائع وهم بكتبو الورقات البيضاء الصغيرة بطلباتهم وعركي يقراء ويستجيب ليهم مع صوت الزول ده بيجيك زمن من وراء سنين وسنين زمن رائع والوانوا زاهية بقي ذكريات
وأنت نيل
Post: #3 Title: Re: بوست تحية للمميز أبوعركي البخيت Author: عبد الناصر الخطيب Date: 11-24-2010, 09:12 PM Parent: #2
بستنشقك وأكتم هواك جواى.. على مر السنين وتعيشى فينى على الدوام وأبداً..أبداً ما أتنفسك .. تتخللى الروح والمسام وأتخطى بيك سخف الصغائر واللئام.. وأحبك تانى ومن جديد وابداك معاى انا ياسلام وأحدثك عن الزول البرسل فيك الأغنيات ومن الصغر كان بيعشقك تزدهر فينى الفصول ولما انم انا بغناك قامتى بتطول وابقى قادر انى اتمدد على طول الزمن ومن المحن ومن المحن ياعازة يا أم الكرام وحدة نضالنا بتحرسك.. ومن المحن ياعازة يا أم الكرام أنا والمعاى بنحرسك.
مّا لا ترحال يحلك لا البعاد يقدر يحلك لا القرب يقدر يدوم لا البعاد الكلام بصبح مفرّق الدنيا تشبه لون معاد وأبقي أحوج ما أكون أنا لي حضورك بالجد بدورك فجأة يشلع فيني نورك والقاك نبتـّي من تراب السكه سديتي الأُفق اشلخ فروعك صمغ همك ينهمر قدام عيوني لحاك حلمي الملوّن بهمومي لما يومك بلقى يومي وفصل همومك من همومي نضحك من الواقع سوا نحن القدرنا علي التعب حرقتنا ألسنة اللهب ولسه ماسكين الدّرب يا صاحبه في الزمن الصعب
--------------------
Post: #6 Title: Re: بوست تحية للمميز أبوعركي البخيت Author: عبد الناصر الخطيب Date: 11-24-2010, 11:12 PM Parent: #5
مع أنو ياحبيب نورة كان مفروض للدقة والتنسيق أختار ليك من غني الزمن الجميل
سهرنــا الليـل وكملنـاه في ظلال عينيكي النعسانة فرحنا كتير في ساحاته فرحت اعماقنـا الحـزنـانـة
يا نور النوار يا نوره يا فرح الافراح يا بلوره
غنينا جمـالك فــي غنــوه في البيت في الشارع في المسرح و ارواحنا عانقت النشوه طــربــانــه سـعـيــــده وتــمــــــــرح
لي الشرف كنت في معية ابوعركي البخيت فترة من الزمن بمجرد ما اشوفو احس بقوة واصرار هذا الانسان معتق باصالة مبالغ فيها وانساني لابعد الحدو وجادلابعد الحدود
Post: #11 Title: Re: بوست تحية للمميز أبوعركي البخيت Author: عبد الناصر الخطيب Date: 11-25-2010, 04:44 AM Parent: #10
معتصم ود الجمام صباحك زين ,,,
نفس إحساسك ده كان إحساسي قبل كم سنة لما ختيت بوستك المميز الغني فيهوا عركي ( زمني ظالم .. زمني جلاد لا يرحم )
أه لو كنت اعرف من أى الافاق تهب الريح لفردت على جنبات الافق رداي ...
كنت بقعد واخش البوست ده حتى بعداك الواحد يشوف الحاصل شنو في المنبر .... نفس الكلام ده حصل قبلوا في بوست سعد الدين ( لو كنت ناكر للهوي زيك ) وقبلهم البوست (كنت جالس فوق اريكة ودائرة في الغرفة أسطوانه ) وبوست برضوا في الخاطر (التـــــوب )
شفت التوب و ما لاقاني أجمل منو بس التوب وسيد التوب * شوفو التوب و سيد التوب يكون كيفنو ؟ نظره سريعه مرت بيها ما اتمتعت خطوه وحيده بيني وبينا لو أسرعت خلت طيبا مالي الساحة بي إتشبعت زيها مافي لا شاهدت لاني سمعت من جاراتا قادله حلاتا دخلت بيتا سرت حداها داير القاها تب ما لقيتا متكي كتيفا تلت ايدا حتي الحنة ديك ما نسيتا قادت ناري لو تطفيها لي ياريتا إستنيت و قلت أظنو ترجع تاني يمكن أشوفا و أصلو الزول حياتو أماني نظرة بريئة مهما نابني ما هماني لو ألقاها يرتاح بالي و يصبح هاني
عركي ده يامعتصم بلم كمية ما عادية من الناس رابطهم بغناهوا خواطر وذكريات صعب تمحي من خاطرهم
ياخي ياريت تكون بلغته تمام العافية وتقبل تحياتي
--------------------
Post: #12 Title: Re: بوست تحية للمميز أبوعركي البخيت Author: عبد الناصر الخطيب Date: 11-25-2010, 10:08 PM Parent: #11
باسط مكي مساء الورد ,,,
Quote: لي الشرف كنت في معية ابوعركي البخيت فترة من الزمن بمجرد ما اشوفو احس بقوة واصرار هذا الانسان معتق باصالة مبالغ فيها وانساني لابعد الحدو وجادلابعد الحدود
***
عركي من القلة البغنو المعاني البعيشوها ويشعروها وفي نفس الوقت تلقي مواقفوا وسيرة حياتوا متوافقة مع قناعاتو عشان كده إستحق احترم الجميع ومحبتهم
ليك وليهوا التحية والتقدير
وعن حبيبتي بقولكم
عن حبيبتي بقولكم عن حبيبتي أنا حأحكي ليكم ضل ضفايرا ملتقانا شدُّوا أوتار الضلوع أنا بحكي ليكم عن حنانا مرة غنت عن هوانا فرّحت كل الحزاني ومرة لاقت في المدينة الحمامات الحزينة قامت أدّتا من حنانا ولما طارت في الفضاء رددت ألحن رضاء وكانت أول مرة في عُمر المدينة أنو نام مكتوم حزينا تحيا محبوتي الحنينه * ساوّه ليكم..بإيدينا شاي وحالبالكم ضي القمرا مخبّيه في جيوب الليل متى ما تدورو بترويكم وما ممكن تخليكم تجيب النجمه تديكم عشان كان نورا ماكفّي تجيب ضوا يكفّيكم وعن حبيبتي بقول لكم ولسه برضي حاقول لكم يلا صفقوا كلكم
Post: #17 Title: Re: بوست تحية للمميز أبوعركي البخيت Author: عبد الناصر الخطيب Date: 11-26-2010, 09:51 PM Parent: #16
معاوية عبيد الصائم يا صاحب أسعدني مرورك ,,,
Quote: شكرن شكرن رغم موسم الاحزان
التحية ليك يا عركى والصحه و العافيه
مرات الناس في أحزانه للعزاز الغادرو الفانية وفي خوفهم وقلقهم على بلادهم البتمضي لمصير مقلق ومجهول بحاولوا يستحضروا من الذاكرة بلد رغم مراراتو وأحزانوا فيهو حاجات أصيلة وجميلة قاعدة في وجدانهم
من الحاجات دي يامعاوية الزول ده الاسموا أبوعركي البخيت قاعد في تكوينا وكتير من محطات إحساسنا ليهو التحية والإعزاز بلا حدود عاش فينا وخلد نفسوا في وجدنا بكلماتو وأستحق إحترام الناس بصلابتوا ومواقفوا
معاك ليهوا التحية
--------------------------- كنت جالس فئ اريكة دايرة في الغرفة اسطوانة كانت الغنوة بتناضل تفضح الكتب الجبـانة تحكي عن عصر المهازل وعن جروح غرف المنازل وعن هوان حرف الكلام
المرة زائف ومرة خائف ومرةغامض زي رطانة
كانت الغنوة بتناضل تفضح الكتب الجبـانة كانت الغنوة بتناضل تفضح الزيف والخيانة
كانت الغنوة بتسافر جوة عقلي وتغلي في حلمي وتفرقع في الصحاري وكان ضمير الغرفة شاهد وصوت نسيم المروحة كان كلام الغنوة يطعن ويلعن اسياف المظالم ويهدي لي قلب المناجم ويسطع يكشف للمعالم
وفي نهاية الغنوة ضماني السلام وقال جدار الغرفة لي حبة كلام
تسقط الاف القصائد لو نست شرف الكلام تسقط الاف القصائد لو هادنت حرب الظلام كانت الغنوة بتناضل تفضح الكتب الجبـانة كانت الغنوة بتناضل تفضح الزيف والخيانة
نضال الكلمة
Post: #18 Title: Re: بوست تحية للمميز أبوعركي البخيت Author: كمال علي ابراهيم Date: 11-26-2010, 11:04 PM Parent: #17
شكراً يا رائع أبوعركي ده شكل وجدانا وأمتع أسماعنا أرجو أن تواصل هذا البوح الجميل
Post: #19 Title: Re: بوست تحية للمميز أبوعركي البخيت Author: عبد الناصر الخطيب Date: 11-28-2010, 10:35 AM Parent: #18
كمال على تحية وتقدير بيظل أبوعركي من الشكلوا وجدان أجيال كتيرة لقتو بعبر عنهم وبغني دواخلهم ... والبوست في مقام تحية لعركي أكيد بتواصل بحضور الناس البحبو وبقدروا فنو
عبدالناصر الجميل كل سنة وأنت طيب( معذرة للتهنئة المتأخرة، كان عيد بدون زهور!) شكرا وأنت تفتح لنا كوة فرح للإحتفاء بفنان نادر ندرة تحليق الفراش في سموات هذا الزمن!
محبتي المعروفة
Post: #21 Title: Re: بوست تحية للمميز أبوعركي البخيت Author: عبد الناصر الخطيب Date: 11-28-2010, 08:04 PM Parent: #20
أستاذنا الفاتح ميرغني
مساء الورد ,,, أو صباح النور بتكون في اليابان يدابكم صبحتوا
Quote: ل سنة وأنت طيب( معذرة للتهنئة المتأخرة، كان عيد بدون زهور!) شكرا وأنت تفتح لنا كوة فرح للإحتفاء بفنان نادر ندرة تحليق الفراش في سموات هذا الزمن!
كل سنة وانت طيب عركي يستحق الاحتفاء من كل الناس الاستمعوا لى وسكن خواطرهم وارنبط ليهم بذكريات عزيزة , محاولة لتحية طلتوا الاسعدت عشاق فنوا يمكن ركزته في خياراتي على غناهوا البعتبر لكتار من الناس في غيابهم فعلا جديد وما تابعوا زي الغني القديم ....
من غناهو الاترسخ في الخاطر
-----
يا قلب انا كنت قايلك تبت من تعب السفر ومن مخاواة القماري ومن شراب موية المطر تاريك كامن ليا ... بشيتا كتر تاريك لابد ليا ... بشيتا كتر ما زمان انا وانت لفينا المواني بالقطارات والمطارات والسفن ودقينا اجراس الجديد وعدنا ترتيب المعاني الليلة راجع لي تبقبق بتنتل الآهة وترقرق زي تقول يا داب عرفت الاندهاش ***** يا قليب مالك عليا ما انت عارف نقطة الضعف القديمة وزيي ضايق الارتعاش ***** يا قليب ياما سرحنا مرة جينا والف رحنا ومرة شاي عصرية في طرف الغمامة ومرة دوبيت للمحنة ومرة منديل مسقي حنة ومرة حاجاتا اجن وانحناءات للحمامة جاي تسألني الدبارة يا قليب ما فيش دبارة لا المراكب قادرة تكسح في النزيف ولا نحن شايفين الفنارة
Post: #22 Title: Re: بوست تحية للمميز أبوعركي البخيت Author: هاشم محمد الحسن عبدالله Date: 11-29-2010, 07:45 AM Parent: #21
الأخ الحبيب عبدالناصر الخطيب ، تحياتى ، وأشكرك كثيرا على هذه الكمية المهولة من الفرح التى نشرتها عبر هذا البوست المميز، ففيه متنفس للجمال والابداع، فأبوعركى البخيث مبدع وأنسان رائعا لحد الدهشة، صدقنى لم أتمالك نفسى وأنا أتابع سهرته خلال التلفزيون فى العيد وسالت دموعى فرحا وبهجة بطلته التى أسعدتنى كثير ، وردت الروح لذكريات عطرة عابقة فى النفس والوجدان ، ربنا يحفظ عركى ويطيل عمره، عاطر الود ياخطيب .
