مع الكركبة الحاصلة ايهم افضل مطار مروي ام مطار بورتسودان للوصول للخرطوم

الحرب بدأت وشيطان ما بوقفها

وباعتبار ان الكل اجمع على الحرب القادمة (التي قدمت) ستكون مختلفه عن سابقاتها
فاتوقع ان قصفت الخرطوم جوبا ومطارها، ستقصف جوبا الخرطوم ومطارها ايضا

في الحالة دين احنا يا ناس الخرطوم، الواحد لو داير يصل اهله، نحن ملايين المغتربين
وفينا من ترك ابناءه واهله من خلفه، اذا قررنا ان نصل اهلنا، فايهم افضل:

مطار بورتسودان ام مطار مروي، بقية المطارت (خارج مثلث حمدي) لن تكون بمأمن ونتوقع
ان تحجم شركات الطيران الاجنبية عن نقل السودانيين اليها

طريق البحر عن طريق ميناء بورتسودان سيكون مفتوحا ايضا، لكن المشكلة بتبقى انك تصل
من بورتسودان للخرطوم كيفن خاصة اذا اسود الشرق او عصابات الشفتة بدات تقطع في الطريق
لو ما احتلوا بورتسودان ذات نفسها

للاسف، ان الخرطوم كعاصمة بعيدة جدا من اي عاصمة اخرى حولها، يعني صعاليك حماس
يسوى السبعة وزمتها ويركبوا الطيارة الى القاهرة وبعد نص ساعة هم في معبر رفح

لكن اقرب عاصمة لنا (اقول ذلك في حالة لو الطيران الاجنبي رفض دخول المجال الجوي السوداني)
اقرب عاصمة لنا هي اسمرا، تنزل في اسمرا (التي نعاديها الآن) وتركب بص لاقرب
نقطة حدودية بعداك تركب ليك جمل وللا حمار عشان تصل كسلا وتبقى في تحنيس عرب البطانة
يوصولك لشندي ومن هناك تجي مدردق برجلينك للخرطوم

الله لا كسبكم يا كيزان

المصيبة ان طيرانا الوطني (سودانيير) هو زااااتو اجنبي

ومن يأنس في نفسه الكفاءة فليجرب مطار انجمينا ويجي داخل مع خليل
دززززز امدرمان المحطة الاوسطى، واحتمال يوصلكم ملح، بس كترو الموز
السكة طويله

لقد اعذر من انذر... اي زول من هسع يشوف ليه ترتيب يصل بيها لاهله
في السودان لو الامور اتأزمت، وانا ح أعمل كده، ما بوريكم بي ياتو طريق
وبمساعدة منو، لكن الاستعداد لازم

الحدود مع ليبيا مقفولة وعن طريق اثيوبيا صعبة، لانك ستطر وان تمر باراضي
ستكون خاضعة لقوات الحركة الشعبية، لو ما عندك علاقة جيدة مع الحركة وشايل
ليك ورقة توصية من كومندان ياسر عرمان ما بتمر بسلام.

ولو افترضنا ان ميناء بورتسودان ظل مفتوحا، فالخيارات ستكون القاهرة، جدة، عدن
السعودية لن تمنح تأشيرة مرور بسهولة للسودانين، عدن بعيدة وخطيرة الا باعبود
ما يقصر معانا، اما المصريين فمراكبهم اخير منها انجمينا (تغرقوا سااااكت)

هو الوصول في حد زاتو هين، ومليون طريقو طريق ممكن يوصل
السودان كبير وعوير وحدوده مفتوحه

السؤال: لو داير تتخارج من اهوال الحرب وتنفد بجلدك
تهرب بوين؟؟؟

وقطعا الكيزان سيشغلوا كل مقعاد الطائرات المغادرة
الى حيث تقبع اموالهم

الخازوق لو بقى مطار مروي الوحيد الشغال

لو ما هيئة دبلوماسية امكن ما يخلوك تعدي بيهو (خروجا او عودة)

هيئة دبلوماسية (لمن لا يعلمون) تعني: مشلخ شايقي

غايتو انا ما مشلخ، لكن بخت صورة جدي في جيبي يا بلصقها في الجواز عديييل
مشلخ كان ما شاء الله، تلاتة بالعرض قال ليك، يعني غلاط مافي

يا ود ابنعوف
سلام يا رجل
لا تقلوا بايديكم للتهلكه
وصدق من قال (والقعاد علي هذا الكوم اسلم)
والخواف ربي عيالو يا اخوي

فال الله ولا فالك يا ابوحميد
الحرب الجاية ح تكون استعراض قوة و تهديد و تحريك جيوش و بيانات متبادلة اكتر منها حرب حقيقية
حاجة كدا زي شكل المصريين يتنابذوا و ينعلوا خاش بعض راجين اول حجاز يظهر حتى البنية تدور

الاخ محمد المصطفى
تحياتي

Quote: لا تقلوا بايديكم للتهلكه

يا اخوي، التهلكة لا ايدنا لا كراعنا لقينا نفسنا فيها
من بيان رقم واحد وانت جاي

Quote: وصدق من قال (والقعاد علي هذا الكوم اسلم)

دا نظام الجوه جوه والبره بره؟؟، والله راي معقول ومنطقي برضو وفعلا اسلم

Quote: والخواف ربي عيالو يا اخوي

ما دي المصيبة زاتو، يوم لقيت ليك سوداني خواف؟؟

الاخ محمد البشرى
تحياتي

Quote: فال الله ولا فالك يا ابوحميد

تصدقني لو قلت ليك دا ما فالي؟؟
وفي وجهة نظرك كده، المستشارية الرئاسية للامن القومي مسونها في شنو؟؟
ما لي جنس مناقشة بلاوي زي دي
حقيقة ما دخلت البوستات البتتكلم عن هذا الجسم الجديد، لكن الكتاب باين
من عنوانه

Quote: الحرب الجاية ح تكون استعراض قوة و تهديد و تحريك جيوش و بيانات متبادلة اكتر منها حرب حقيقية حاجة كدا زي شكل المصريين يتنابذوا و ينعلوا خاش بعض راجين اول حجاز يظهر حتى البنية تدور

ياريت يا ود البشرى
كان قلنا خير ولعنا شيطان تفكيرنا
لكن دونك في الايام الماضية، هناك اشتباكات عسكرية وبحجم كبير
في دارفور وجنوب دارفور وجنوب كردفان؟؟
من اين لنا ان نطمئن، والمصريين ختوها واضحه
قالوا شكوها ولا للانفصال، شكوها اي يقصدوا عودوا للحرب مرة تانية

وبمناسبة المصريين، ذكرتوني مطار قد يكون افضل الخيارات للسودانيين
المغادرين والعائدين ناس لبسنا الكاكي ديل
مطار الاقصر، فهو مطار دولي وكلها شويتين وبتلقى نفسك في حلفا وبعداك ربنا يهون

فال الله ولا فالك يارجل
تفاالو بالخير تجدوه
وربنا يكضب الشينه

الاخ احمد الزبير
سلام ليك ولكل السودان ان شاء الله

Quote: فال الله ولا فالك يارجل تفاالو بالخير تجدوه وربنا يكضب الشينه

انتو يا اخوانا بجدكم، انتو خليل دا ما عطل مطار الخرطوم بدخلتو ديك تلااااااتة ايام حسوما

وازيدك من الشعربيت، يقال ان مطار الخرطوم تم تأمينه بواسطة قوات مصرية
حملتها ثلاثة طائرات
طيب، وكان طول القعدة، ما كنا حنبقى في جنس دا

والاستغراب لي شنو؟؟!! الا يوجد 4 مليون سوداني بدارفور يبيتون خراج منازلهم لمدة 7 سنوات؟؟
المشكلة شنو لو ناس الخرطوم اتجهجهوا شوية كده؟؟
تحياتي

اي اقتراحات؟؟؟

في زول بعرف عرب البطانة هنا في المنبر، عشان نقوي علاقاتنا معاهم وكده
الظروف ما معروفة