## تأمُلات وغـزل فـى الجـواز الـجـديـد ##

** كل دول العالم التى تحترم شعوبها وكذلك التى لاتحترم شعوبها تصدر لهم وثيقة السفر المسماه جوازاً لمدة:- خمس سنوات أو عشر سنوات..
** جوازنا الجديد رسومو عاليه لانو إسكيلو عالى وتقنيتو عاليه ومن طلب العُلا سهر الليالي!!!!!ودفع الغالى..

** تكلفة أصدار الجواز عاليه ياجماعه عشان نقدر ندفع العمولات للجماعه الساعدونا وجابو لينا الشركه دى وعشان برضو نطلع بحقنا من الفرصه دى , إمكن ماتتكرر قريب..
** وبرضو فى معلومات بتكون خافيه على الشعب الفضل وبنحاول نغطى عليها ,, لكن بتجبرونا أنو نقولا فى عهد وزير سابق للداخليه "إستقال أو أُقيل" وعاد مُترقياً فى منصب أرفع تم الإتفاق مع شركه خليجيه بخصوص موضوع الجواز وبطاقة الهويه والرقم القومى ,, ودفعنا للجماعه المعلوم وكل زول طلع بحقو , بس طلع لافى شركه ولا فى وهم ,, وزى مابقولو ناس السوق جبُر دا فى كِسر دا ,, عشان كده الجواز الجديد غالى ,, وفى المثل بيقولو:- الغالى بغلاتو يضوقك حلاتو , والرخيص برخصتو يضوقك مغصتو ..

** خليكم ناس مفتحين وأدفعوا وبطلوا لولوه ,, وحنعمل ليكم الجواز الجديد مدتو سنه شامله الضريبه والزكاه والعوائد والنفايات ورسوم القنوات الفضائيه ورسوم الوحده الجاذبه والإنفصال القادم والرسوم والمصاريف الاُخرى بالإضافه لرسوم الإصد ار ,, وماتنسوا بالإضافه الى ماذُكر من رسوم ومصاريف هناك رسوم الاورنيك (100 جنيه) بالجديد, ودمغه على الاورنيك لدعم الشرطه بــ (150 جنيه) بالجديد , ودعـم الولايه (50 جنيه) - يعنى شنو لو الجواز كلفك مليون ونصف أو مليونيين!!!!!؟؟؟

** بعدين فى النظام الجديد كلو واحد حنخت ليهو الطيره او الصقر او الخرتيت او الحيوان اللى هو عايزو فى جوازو , وبالنسبه للمغتربين مُمكن يختارو حيوانات من البئه المُقيمين فيها ودى ميزه ماكانت موجوده فى الجوازات القديمه فى العهود البائده ,, والحمد لله قدرنا نوفرا ليكم فى عهد توجهنا الــ ........
** الماطلع جواز بالله يستعجل يجى عشان نحقق الرابط أصلو عندنا عجز فى الميزانيه وعايزين نقفل الحسابات فى ديسمبر البقى يجى بسرعه قبل مانطلع حقنا ونظبط عمولاتنا (آسف حساباتنا)..

(ابو محمد فؤاد ) - الماكيكى

Quote: ** بعدين فى النظام الجديد كلو واحد حنخت ليهو الطيره او الصقر او الخرتيت او الحيوان اللى هو عايزو فى جوازو , وبالنسبه للمغتربين مُمكن يختارو حيوانات من البئه المُقيمين فيها ودى ميزه ماكانت موجوده فى الجوازات القديمه فى العهود البائده ,, والحمد لله قدرنا نوفرا ليكم فى عهد توجهنا الــ ........

** من هسه أنا إخترت :- الــخــرتــيــت..

** ناس الخليج :- يوجد شعار لسمكة الــهــامور..

** الصفحه دى إحتمال ماتتعمل فى الجواز لانو الكلام المكتوب فيها غير مُطبق ,, مافى داعى ليها.