عوض شكسبير..إنت فعلاً فنان كبير.. لا تتأخر بالله

لا تتأخر يا عوض على المواعيد الكبيرة..

يكفيك ما ضاع من الوقت تحت عباءات تجاوزها الزمن..

إن كانوا قد ساعدوك في مرحلة من مراحل رحلتك الجميلة..

فليس من العرفان في شيء أن تظل (تلميذاً) طول عمرك..


عليك المبادرة بالمزيد من الأعمال الشجاعة..

فأنت تملك الكثير من المؤهلات لأن تكون نجماً حقيقياً..

وعليك فقط التوجه بالشكر والتقدير لبعض الأسماء (من الزملاء) مثل

الأستاذ علي مهدي..الأخ طارق الأمين..الأخ عبد السلام جلود.. الأخ محمد صالحين..

وغيرهم .. ولكن صدقني... لقد آن الأوان أن يعلم جميع هؤلاء..

أنك .. تمتلك من المؤهلات العظيمة ما يضعك في القمة ..

اكتسب المزيد من الثقة بحظوظك في "لهط" الساحة..



ملحوظة:
ربما لم يحالفني التوفيق في افتراع هذا الخيط..

ولكن .. توكلت على الله وطوالي على الهواء..

وحيث أنني لا أثق كثيراً في مزيد من التوفيق في هذا البوست..

سوف أكون مقلاً في الرد على أي مخاشنات للعبث بمضمون رسالتي

إلى الفنان المبدع عوض شكسبير (عوض حسن الإمام)...


وسلامتكم..

بالله هو اخو امام حسن الامام عضو المنبر ! اول مرة اعرف المعلومة بت الميداح دي

طيب ممكن تورينا عوض شكسبير قاعد يعمل شنو علي الاقل نكون علي اطلاع وندعم مسيرته الفنية ( الكلام دا ما تريقة انا جادي )

اضاءات علي اعماله لا تضير

طبعاً يا أساسي (ولي أمري)..

ما حا أقدر أعزمك لايف شو لعوض شكسبير وأنا وإنت ملقحين جتتنا هنا في جدة..

وعليه ... أنصحك بمتابعة (النذر اليسير) من مقدرات هذا الفنان الجميل

عبر قناة الشروق..وقناة هارموني..

كمية فن ما معقولة ..

إلى الأمام يا عوض..

المعلومة بت الميداح دي قطعت بيها مصاريني ياخ..

وشايفك زي مطالب بإضاءات على أعماله..

ما كترتها شوية؟؟

إضاءات حتة واحدة؟؟

بالمناسبة أنا كنت شايل هم المخاشنة.. لكن طالما المسألة فيها (ولي أمري أساسي)..

فلا نامت أعين الجبناء والكلام ليك يا ود الصايم..

أحيييييييي يا راجي..

عوض شيخ الزبير التمرجي المدهش
رفيق دربنا واخونا الاكبر
مبدع من طراز انيق

الامام هو اخو عوض يا اساسي ..

الله يديهيو العافية ونشوفوا متالق دائما
عموما عوض شكسبير له مساحات شاسعة عن بعض الذين ذكرتهم محمد

بس بس بس يا حافظ يا حبيب..

Quote: الله يديهيو العافية ونشوفوا متالق دائما عموما عوض شكسبير له مساحات شاسعة عن بعض الذين ذكرتهم

بركة الجات منك.. أنا من قبيل داير لي زول يقولها ويريحني منها ياخ.. واقفة لي هنا دا..

كأني بك تقول: مفروض ما يضيع وقت في الظرافة والنكات ..الزول دا أكبر من كدا بكتير..

موش؟؟

شكراً حافظ كنجال...

يا أساسي.. عوض برضو عضو هنا دا..


إلا بالمناسبة.. هو عوض دا صفوة ولا مالو بوستيهو ماشي بالراحة كدا؟؟

عوض حسن الامام الشهير بشكسبير
ود الثورة الحارة السابعة

زول فنان بمعنى الكلمة، سلك درب الفن منذ نعومة اظافره وترك لاجله الكثر
وقبل ده عوض زول انسان وفرده صاقعة

التحية لعوض وحقيقي ان الاوان لشروق شمسه

أووووووووووووووووووووووهـ

البوست جاب ليهو سيناتورات؟؟

Quote: التحية لعوض وحقيقي ان الاوان لشروق شمسه

وكذلك آن الأوان لهارموني شمسه ونيل أزرق شمسه والتلفزيون القومي شمسه..

ونتمنى أن تمتد تجربة عوض شكسبير حتى خارج مسرح البقعة..



حبابك يا وليد..

عاد بنقدر نلومك في عدم السلام ؟؟

صفوة وسيناتور وفردة عوض شكسبير..

اعتبر المكان مكانك ..

عوض شكسبير
بيمثلنا كل عام في العديد من مهرجانات المسرح التجريبي في أروبا والدول العربية
وبالجد الناس في السودان ما إتعرفو على الوجه الآخر لعوض شكسبير الممثل الجاد
إلا من خلال مهرجانات المسرح زي البقعة وغيرو ودي روادا محدودين وبسيطين جداً
بالمقارنة بي رواد المسرح الكوميدي .
عموماً عوض شكسبير إستحق هذا التنويه ويستحق التوثيق لأعماله الثرية
وتشكرات يا محمد المصطفى على البوست الجميل واللفته الطيبة

jjjjjj سلاااام للجميع


فعلا عوض شكسبير فنان وله مستقبل كبيير


يا سلام علي الحركه في المسرح وسرعة البديهة

تحياتي له ولاخوه امام حسن الامام

الأخ صبري الشريف..

لك التحية..

Quote: فعلا عوض شكسبير فنان وله مستقبل كبيير يا سلام علي الحركه في المسرح وسرعة البديهة

هو كذلك.. وكمان تحياتنا لإمام الفنان المخرج..

إمام زي معتمد على أنه (قيافة) حبة كدا.. على الأقل بالمقارنة مع عوض

ههههههههههه... طبعاً برضو فنان والله..لكن عوض إيييييييييييييك..فنان كلو كلو..

الأخ طارق المكي..

تحياتي..

Quote: عموماً عوض شكسبير إستحق هذا التنويه ويستحق التوثيق لأعماله الثرية

صدقني لو ما استحق ما كنا اتعبنا نفسنا في متابعته..موش بس التنويه..الله ما كتر إلا الريموتات

عوض فنان جداً... وعارفه قاعد يمشي أوروبا وهسي كمان جابت ليها أمريكا.. لكن عايز أقول شنو...

عوض مفروض يطلع في الكفر.. لا تقول لي هناي ولا هناي ولا هناي.. التلفزيون أخطر حاجة

عوض مفروض يمسك ليهو في ناس بتاعين انتاج... ويلا... التلفزيون ثم التلفزيون ثم التلفزيون..

وفي المواسم برضو يحاول تدشين عوض شكسبير الكبير.. ويعمل مجموعته برضو دون (تنميط)..

يعني ما يكرر الفاضل سعيد وجمال حسن سعيد وغيرهم من أصحاب التجارب الواضحة..

لا نعيب عليهم شيئاً.. لكن الفكرة بتاعة إنه زول واحد هو (الأستاذ) والممثلين المعاهو

بتاعين عدادات ساكت..أيوة فنانين وأي حاجة.. لكن الواحد لو قلت ليهو ماشي وين؟؟

طوالي يقول ليك والله شغالين مع الأستاذ...السكة دي قريبة وما غلط..لكن ما جديدة..

وعوض ممكن يعمل أحسن منها كنقلة تاريخية ونوعية في الحركة الدرامية في السودان (القديم)...

خلاص كدا؟؟

شكراً ليك

Quote: عاد بنقدر نلومك في عدم السلام ؟؟

ياخ متاسف !!
امسحها في وشنا

Quote: ياخ متاسف !! امسحها في وشنا

لا يا وليد يا كبير..

ياخي ما للدرجة دي كمان...


ولو جابت ليها مسح ،، حا أمسحها في صلعة عوض دا..


لكن زي ملاحظ إنك ما قاعد تسلم عادي جداً..

عشان كدا...خلينا نكتفي بمجرد الفرح بي جيتك لينا..

أوكي يا حبيب؟؟

السلام عليكم ورحمة الله وبركاته

وبعدين يا بو عويض؟؟

البوست ده نرخيهو ولا كيف؟؟

Quote: فأنت تملك الكثير من المؤهلات لأن تكون نجماً حقيقياً..

بالجد عوض شكسبير فنان
بتمنى يلقى فرص أكتر
سعدت بمشاهدة عرضهم في فرجينيا وهو كان مميز

Quote: بالجد عوض شكسبير فنان بتمنى يلقى فرص أكتر

يلقى فرص أكتر؟؟

هو طبعا من ناحية فرص..فعوض قاعد يلقى فرص..

نحن هنا نحثه على استحداث مزيد من المساحات لخلق التجارب الكبيرة والمختلفة..

مزيدا من التوفيق يا عوض..

الأخ محمود سلامات

عوض شكسبير فوق أنه فنان صاعد ومتميز الأداء ومحبوب لدى الجميع

له شخصية سودانية تحمل كل الطيبة والعفوية والصدق

تعرفت عليه من قرب أثناء زيارة فرقة مسرح البقعة لنيويورك فاصبح فى قاموس الأصدقاء

ود بلد أصيل ومتواضع مع الجميع

ربنا يوفقه ويعلى مراتبو قول آآآآآآآآآآآآآآميييييييييييييييييييييييييييييييين

Quote: عوض شكسبير فوق أنه فنان صاعد ومتميز الأداء ومحبوب لدى الجميع له شخصية سودانية تحمل كل الطيبة والعفوية والصدق تعرفت عليه من قرب أثناء زيارة فرقة مسرح البقعة لنيويورك فاصبح فى قاموس الأصدقاء ود بلد أصيل ومتواضع مع الجميع

صاح والله.. وآآآميييييييييييييييييييييين يا حسن حماد ياخ..


شكراً ليك كتير

انه عوض حسن الامام الفنان ذو الاسم المعروف عوض شكسبير
وعوض شكسبير شخصية مسرحية جديرة بالاحترام
فهو مؤلف
ويكتب الشعر
وله تجارب اخراجية معروفه
عوض اخ صديقي امام وامام اخوة الصغير ذو القلب الكبير

Quote: امام حسن الامام عضو المنبر

يا اساسي الزول ده ماعضو منبر ولا حاجه وماتلخبتتتت

Quote: عوض شكسبير قاعد يعمل شنو علي الاقل نكون علي اطلاع وندعم مسيرته الفنية

ما اعرفه يا اساسي عن تجارب عوض
مؤلف مسرحيه( العقرب)
مهرجان الثقافه الرابع بالخرطوم.
وهو مهرجان معروف شاركت فيه كل ولايات السودان المختلفه وقد فازت المسرحيه وقتها بجائزتي تمثيل نالتها الفنانه امنه امين الطاهر والفنانه سحر ابراهيم.
مؤلف مسرحية (الرجاء اصطحاب الكبار)
ود شاركت بمهرجان البقعه المسرحيه ومهرجان الشباب العربي بالقاهرة

كممثل شارك في مهرجان القاهرة التجريبي 2001 في مسرحية عرس الزين للكاتب الكبير الطيب صالح وتكوين الاستاذ علي مهدي.
شارك بشخصية الزين بطل المسرحيه وقد اجاد في الاداء.
شارك حاليا بمسرحيه سلمان الزغرات بمهرجان لعالم العربي بباريس.
كممثل ايضا شارك في مسرحية(فرجه بين سنار وعيذاب) وهي اعداد من رواية الطيب صالح وتمثلت هذه المسرحيه بنيويورك في مسرح برودواي الشهير.
ساعود

امام حسن الامام
مخرج بقناة هارموني حاليا(برنامج بنات حواء)
عضو فرقة الاصدقاء المسرحيه
شارك بمسرحية المهرج اخراج الاستاذ محمد نعيم سعد
شارك بمهرجان المسرح التجريبي بالقاهرة مسرحية عرس الزين
شارك بمهرجانات خارجية مع فرقة مسرح البقعه

Quote:

البرنامج كان مشاهد في فترة مابعد الافطار في رمضان الفايت وهو من اخراج الفنان امام حسن الامام

عليش يا فنان..

شكراً ليك..

أساسي دا شكلو بيتكلم عن عضوية هارموني..

الصورة دي كدا مقبلة على البورد..استعملتها ليك في بروفايلي بعد التصرف وكدا...







حبابك

ايام الكوميديا

كدي يا أساسي هاك الجدعة دي..

باللاي يجي زول يظبطها لينا ياخ.. طواااااااااالي أنا الحاجات البجيبا من اليوتيوب بتكون مشرتمة كدا


(أها حذفتها يا عليش...جدادة الخلا الطردت بروست البيت)..


يلا .. متابعة طيبة..

عوض شكسبير

فنان رائع بحق وحقيقة

وانا والاسرة نتابعه يوميا عير قناة الشروق العملاقة

السلاعة1.5 صباحا

التحية له ولك وللجميع ........

انت احذف الفوق عشان التكرار

جدادة الخلاء الطردت جدادة البيت هههههه

أها يا عليش...

أنا الفوق حذفتها.. لكن طالما عوض صاحبنا..فله علينا حق النصح وكدا..


الزول المخرج ولا الزول بتاع المونتاج.. مستعجل مالو؟؟؟

يعني في داعي يدقس زي دقسة القميص دي؟؟

ياخي دي أساسي ممكن يمسح بينا البلاط بسببها..

زول مساهر مع صاحبو بقميص...يقوم يرجع البيت بقميص تاني؟؟

المشكلة المشهد مقلوب من ناحية التسلسل المنطقي...

لكن في النهاية لذيذ..

هنا بقى عدم المهنية بتاعة ناسنا قاعدة تعمل الفرق...

يا ربي يكون الكسل؟؟

يا ربي يكون قال ليهم خلاص ما فارقة؟؟

غايتو..

Quote: عوض شكسبير فنان رائع بحق وحقيقة وانا والاسرة نتابعه يوميا عير قناة الشروق العملاقة

ود الباوقة..

حبابك ياخي.. بعدين لو جا دينق هنا وقال ليك إنت قاعد تساهر مع العائلة ولا برة..

أنا غايتو بررررررررررررررررررررة...

البوست دا دمو خفيف.. بالله حاولوا إنكم تتوخوا خفة الدم ما أمكن..


شكراً لمجيئك..والتحية لأسرتك الكريمة..

عوض شكسبير بعد قدموا عرض في برودواي وطبعا برودواي حلم كل مسرحي في العالم قال:
بعد برودواي باقي ينا نمشي الحج والاردن للبروستاتا وننتظر الموت.
هههه

عوض شكسبير فنان مبدع ومتألق

ويقدم فن راقي وجميل ومحبب للنفس

أحرص كثيراً على مشاهدته

عوض شكسبير ( ود خالة العريس) زول فنان للحد البعيد ..
و أعتقد إنو من الممثلين القلائل التلقائيين جداً في أدائهم عكس الغالبية البتخليكـ تحس إنهم بمثلوا .


ياخ الزول ده في ( ود خالة العريس) دي أقنعني إنو فعلاً سكران ؟؟

الأخ: محمود

سلامات

أولا أحيكم و اشكركم على هذا البوست الموفق

الأخ: عوض شكسبير، بالإضافة كونه فنان مبدع، و صاحب إمكانية ضخم

هو في رأى مجدد في المسرح السوداني الحديث، فخلال زيارتي الأخيرة شاهدت له عرض جميل – شكسبير شو – و اعتقد انه نقله و طفرة نوعية للمسرحي السوداني و فكرته جميلة، و أداءه رائع.

و شاءت الأقدار، و تعرفت على الأخ: عوض شكسبير عن قرب خلال زيارة مسرح البقعة لنيويورك، فوجدنها نعم الأخ و الصديق. و قد قامت الرابطة السودانية الأمريكية بنيويورك باستضافتهم مرتين، و قدموا اقوي و أجمل العروض كأول تجربة مسرح سوداني متكامل بمدينة نيويورك.

أخى: عوض كن دائما بخير، مع تمنياتنا لكم بالنجاح و التوفيق.

شوق كميـــــــــــــــــــــــــــات

عبدالرحيم منصور
نيويورك
[email protected]


*
**

*
**

انا طبعا فى هذا الموقف ماعندى كلام غير احبكم جدا جدا .. وتحديدا انت لانك ختيت فى رقبتى مسؤلية كبيرة .. الناس الدخلوا كلهم شكرا وانا اوعدكم انو .... احاول رغم هذا الاحباط القاتل .. شكرا حميما

ما أجمل الفنان السودانى الرائع بقامة عوض شكسبير فهو بالفعل يمتلك مقدرات كبيرة فى الدراما والكوميديا وهو من الممثلين السودانيين القلائل الذين لا يتكلفون ولا يكلفتون العمل الدرامى

تحية لهذا الفنان القادم وهو يمتعنا بكل ما هو جميل رغم إحباطات الوحدة والإنفصال

هشام شيخ الدين

جلود خارج الحدود يشكر كل:

علاقتى بفن المسرح السودانى والدراما السودانيه ..
زى علاقتى بالمريخ و (..)
( يموت الهوى منى اذ لاقيتها ,, و يحيا اذا فارقتها فيعود)

..
عوض فنان كبير ..
يصنع الابتسامه بتلقائيه محببه ..

Quote: بعد برودواي باقي ينا نمشي الحج والاردن للبروستاتا وننتظر الموت

حلوه يا عليش ..
وسلام للجميع وأولهم سيد البوست

أووووووووووووووووووووهـ دكتورنا ود المشرف..

شرفتنا شرف شديد والله..

Quote: علاقتى بفن المسرح السودانى والدراما السودانيه .. زى علاقتى بالمريخ و (..) ( يموت الهوى منى اذ لاقيتها ,, و يحيا اذا فارقتها فيعود) .. عوض فنان كبير .. يصنع الابتسامه بتلقائيه محببه ..

ياخي عوقتنا عدييييييل بالبيت بتاع جميل بن معمر دا..

كدي هاك السياق الواردة فيهو رائعته المشهورة؟

وقد تلتقي الأشتات بعد تفرق * وقد تدرك الحاجات وهي بعيد

إذا جئتها يوما من الدهر زائرا * تعرض منفوض اليدين صدود

يصد ويغضي عن هواي ويجتني * ذنوبا عليها إنه لعنود

فأصرمها خوفا كأني مجانب * ويغفل عنا مرة فعنود

ومن يعط في الدنيا قرينا كمثلها * فذلك في عيش الحياة رشيد

يموت الهوى مني إذا ما لقيتها * ويحيا إذا فارقتها فيعود


حاجة زي العسل والله..

أها نجي لشكسبير المجنون دا..

ياخي الراجل فنان وجميل وأي حاجة..لكن عاين ليهو..من قولة تيت قاعد يفكر في الحج وعمليات (العيون).. وانتظار البترول..



بعدين يا دكتور أتاريك صفوة؟؟

وأنا أقول الوجاهة دي من شنو؟؟

حبابك والله

Quote: انا طبعا فى هذا الموقف ماعندى كلام غير احبكم جدا جدا .. وتحديدا انت لانك ختيت فى رقبتى مسؤلية كبيرة .. الناس الدخلوا كلهم شكرا وانا اوعدكم انو .... احاول رغم هذا الاحباط القاتل .. شكرا حميما

عاين يا عوض..لو ما حب الناس ليك يشكل عامل أساسي في نجاحك أخدها مني الآن طازجة على الهواء وعلى طريقة ربيع طه:

الشطارة براها ما بتصنع نجم ناجح..ونجاح النجم يعني جماهيريته..والجماهيرية يعني حب الناس..

بمعنى آخر: لو ما حب الناس ، أب كباس ما يوديك "برودواي".. ههههههههههههههه


نحن كذلك نحبك جداً جداً..وبطل الحركات بتاعة نحن في بداية طريقنا وشنو وشنو وشنو...

نتحدث هنا عن "المواعيد الكبيرة"...

فإلى الأمام..

اخوي محمود

بالجد انت فنان كبير

كونك تلفت انظار الناس ( الما شافو عوض او ما ركزوا عليهو)

عوض فنان طبيعي 100%

يمثل ويحكي ويتقمص الشخصيات باتقان ونجاح

تابعته في رمضان

في شكسبير شو

وفي مرات قناة الشروق

عوض فنان وحريف


وعدم ظهور عوض بفنه الكبير للناس

سببه ان التمثيل فريق كامل

ولازم يكون في الفريق اكثر من لاعب يجيد اللعب بحرفنة في الخانة البيلعب فيها


وده في الكورة مافي خليهو التمثيل


عوض لم يجد لاعبين مهرة يستطيعون ان ينجحوا كفريق واحد

لذا تجده مع نفسه

او مع واحد (ابجضوم) او اثنين

تلقائية عوض في الفن

هي من بدايات الاصدقاء المسرحية

والتي مازالت تقدم تابلوهات خد وهات في تناغم وهارموني عالي

تحس انك بينهم عندما يمثلون

فرق كبير يا محمود من ان يقوم الفنان بالتمثيل لك او التمثيل عليك

وعوض من الفنانين الذين يمثلون لنا الكثير والكثير


معا من اجل عوض

وعوض من اجل معاً

بالجد الأستاذ عوض شكربير فنان مبدع في مجاله ورجل يدخل الفرحة والبسمة في شفاه الكثيرين منا ونحن ننتظر منه الكثير ،، مع خالص تمنياتي له بالتوفيق ،،،

مع ودي وتقديري لصاحب البوست ،،


ياسر العيلفون