إذا وقع الانفصال فإن الفرصة تكون مواتية لتغيير الاسم القبيح لبلدنا .

دعونا نكتسب فائدة واحدة من الانفصال إذا ووقع فينا ..
وفي هذا اقترح استغلال هذه السانحة التاريخية لازاحة اسم
( السودان )
واستبداله باسم أكثر شمولية للمعاني ودلالة على التفاؤل والنماء ؟

.
.
.
.
من يثني ؟

تحية طيبة ..،،
جمهورية البيضان ... عكس السودان هي الأجمل ...
طالما أن السودان ... أقبح

الحبيب othman mohmmadien

Quote: جمهورية البيضان ... عكس السودان هي الأجمل ... طالما أن السودان ... أقبح

ماقلنا حاجة ياحبيب
الرب عز وجل لمن وصف عباده السعداء
والأشقياء يوم القيامة وصفهم بقوله :
( يوم تبيض وجوه وتسود وجوه)
.
.
.
أها السودانيين في الفانية دي
ما عايزين يتشبهوا بالنور ؟
اللون أسمر
والعلم أسود
والأكل باذنجان

ياخ ما نشوف اسم غير الالوان دي
وكفاية علينا الالوان الفي علم السودان .

الاخ عمر التاج

السلام عليكم
لا أرى أي قبح في إسم السودان, فثمة أسماء لعظمتها تفقد معانيها اللغوية و تكتسب معانيا أخرى
السودان الاسم فقد معناه اللغوي المندرج من اللون الاسود, و اكتسب معاني الاهل و العز و الوطن
صفة سوداني لم تعد تعني أسود اللون, بل تعني كريم و نبيل و امين و اخو اخوات و (ابن بلد اصيل)


تغيير اسم البلد يعني ان تفقد اغنية (أنا سوداني) معانيها
يعني ان لا احس بأي شيء عندما اسمع (السودااااااااان الوطن الواحد ما قد كان و ما سيكون)
يعني ان نصير بدون هوية مثل عملتنا و ساعتنا, يعني ان تكتب جنسيتك ثم تكتب بين قوسين سوداني مثل ان تكتب: 15 الف جنيه (15 مليون), او ان تكتب: نلتقي الساعه 7 (6 بالقديم)

هل يستقيم ان تغيير اسمك الي محمد بدلا عن عمر !, فاسم محمد خيرا من اسم عمر بالتأكيد (خير الاسماء ما حمد و عبد).

عن نفسي, اذا سألني اي شخص في اي مكان او زمان عن جنسيتي, فلن أجد بدا من ان أنفخ شدقي و أقول له بكل فخر

أنا سوداني.


تحياتي.

الاسم جميل وعاجبنا وما حنغيروا
شوف بلد إسمها حلوا أمشي عليها كان ما عاجبك إسمنا دا
وما تستعجلوا الانفصال
خلو لمن نشوفوا في الاول وبعدين المنبر دا قاعد جيبوا إقتراحتكم دي
أو أقول ليك
نحن خلونا في هم معركة البقاء
وإنتوا أتناقشوا أو إتشاكلوا في الاسم

وبعدين النسألك: كان إنتو جدعتوا إسم السودان وقام أتلقفوهو ناس الجنوب
برضو حتزعلوا وتشتكوهم زي في ناس ناويين يعملوا في حكاية إسم كوش؟؟؟؟؟

الألف
اللام
السين
الواو
الدال
الألف
النون
السودااااااااان الوطن الواحد
ما قد كان وما سيكون

هذا البوست مستفز وقبيح جدا

لفظ (السودان) لا أدري من أطلقه علينا
ولكن يقيني أننا كشعب لم نشارك في اختياره
وإلا لكان اسما أكثر تفاؤلاً وأريحية ومحبة
وأكثر عمقاً ودلالة للمعاني العظيمة التي يتسم بها هذا الوطن
لماذا نختصر كل إرثنا وحضارتنا وتاريخنا وشيمنا وقيمنا
في لفظ ضعيف يرمز أول ما ينطق به على لون للحزن والحداد ؟

زى ماقلت ليكم مرة فى ناس هنا بذكرونى بعلماءالاسلام الاوائل

قالو الطاعون يحصد فى الناس بالالاف وهم يتجادلون فى

هل الملائكة ذكور ام اناث؟؟

يازول نحن بنفتش فى الوطن زاتو ما لاقنو

انت مشكلتك اسمه؟؟

قادر الله،،،

الزعيم صديق الموج
سلام جاكم

Quote: زى ماقلت ليكم مرة فى ناس هنا بذكرونى بعلماءالاسلام الاوائل قالو الطاعون يحصد فى الناس بالالاف وهم يتجادلون فى هل الملائكة ذكور ام اناث؟؟ يازول نحن بنفتش فى الوطن زاتو ما لاقنو انت مشكلتك اسمه؟؟ قادر الله،،،

قادر الله يا الموج
نحن بنفتش عن الوطن (الكل) من 89 ما ما لاقينو
ونقابض فيه ستة سنوات سلام ما لمينا فيه
انت يادوب بتفتش في الوطن
وبعد القالو زعيمكم سلفا ده ... لسه بتفتش
قادر الله الخالقة
وحكمة سلفا الفاصلها

يازول فتش فتيشك
ولمن تلقوا الوطن نكون جهزنا ليكم الاسم

السودان .. ارض السود .. أرض الزنوج ..
ارض السمر .. ارض الاحرار ..

انا ضد تغيير الاسم .. ولن تجد من يثني يا أخي ..
وحتى وان انفصل الجنوب .. فسيظل بلدنا يحمل الاسم ..

سوداني وافتخر ..

قد تستطيع أن تغير أسم السودان ولكنك لن تستطيع أن تغير لون جلدك الاسود.

Quote: جمهورية البيضان ... عكس السودان هي الأجمل

يا عثمان عكس السودان "لبنان" فقد سُمى
السودان لسواد بشرتنا فهي سوداء
وسمى لبنان من لون اللبن وهو لون بشرتهم

دينق

Quote: قد تستطيع أن تغير أسم السودان ولكنك لن تستطيع أن تغير لون جلدك الاسود

ولو طلع لون جلدي ما اسود
تسمح تغير لي حتة من اسم السودان ؟
يا أخ مش ممكن يكون لوني أسمر أو أخضر طويل


**
بعدين مش من حقي اطالب بتقرير مصير للاسم
زي ما طالبت انت بتقرير مصير لتلت البلد

الشفيف هشام كمال عبادي

Quote: السودان .. ارض السود .. أرض الزنوج .. ارض السمر .. ارض الاحرار .. انا ضد تغيير الاسم .. ولن تجد من يثني يا أخي .. وحتى وان انفصل الجنوب .. فسيظل بلدنا يحمل الاسم ..

عيب لي اسم الأحرار ده
وشوف جمال الكلمة باللون الاحمر


.
.
.
.
عارف بني شيوع اللون ده بكون وقع ليهم في جرح

الحبيب عمر عبد الله فضل المولى

Quote: هذا البوست مستفز وقبيح جدا

اقرا ما في البوست ولا تقرا ما وراءه
أو كما قال حسين ملاسي

Quote: دعونا نكتسب فائدة واحدة من الانفصال إذا ووقع فينا .. وفي هذا اقترح استغلال هذه السانحة التاريخية لازاحة اسم ( السودان ) واستبداله باسم أكثر شمولية للمعاني ودلالة على التفاؤل والنماء ؟

سئل أحدهم ماذا سميت حصانك؟ ولما لم يكن له إسما تلفت يمنة ويسرة وفقأ عين حصانه وقال أسميته "الأعور"!
يا صديقى الرجل لم يكن هو الأحمق وحده! فها انت تسعد بفصل جزء عزيز من وطنك لتبدل اسمه!
أمارة المقرن الاسلامية
جنى

نعم السواد ليس عيباً
ولم يزد الماس إلا ألقاً وتوهجا
ولكن لماذا نسمي انفسنا بلون معين
وهناك من شعوب العالم من هم أكثر ميلاً للالون
ولم ينعتهم أحد بلون بشرتهم ( سوداء كانت أم بيضاء أم حمراء )
أليس النعت بالألوان نوعاً من العنصرية والتنابذ المنهي عنه ؟

ثم من قال أننا شعب أسود ؟
ومن قال أن اللون الاسود هو لون السواد الاعظم فينا
نعن ، فينا سود البشرة في شمالنا وشرقنا وجنوبنا وغربنا
ولكن حتى في الولايات التي تعتبر تماساً لزنوج أفريقيا
تغلب فيها البشرة السمراء والفاتحة ، ولعل قبائل الزاندي والحمر والرشايدة
كمثال لقبائل التماس أكثر بياضاً في بشرتهم من عرب الجزيرة العربية
ثم أليس اللون الأسمر هو الغالب في وطننا هذا ؟
ألم يتغنى شعراء بلادي على مد تاريخنا بالسمراء والميامين السمر ؟
ألا يوجد ضمن هذا الشعب من هم بلون بشرة غير السوداء ؟
فلماذا – اخوتي - لا نختار اسما لا يشف عن لون .

لا لا لا .. البامية دي مايها !!!

واحد بهناك أسمو وليد شنقراي فتح بوست وراح في حق الله

ودا البوست التاني ..

الحاصل شنو ؟؟

الظاهر أنو في تعليمات من صباح الرحمن ..

..
.
يا عمر ..
والله انحنا اسم السودان دا نسير فيهو جيوش ..
وما حنتنازل عنه ابدا .. ياخى دا اسم نزل فى التأريخ
وفى توثيق الشعوب .. ملاحم وشعارات وعادات وتقاليد
ارتبطت بهذا الاسم المحبب الى انفسنا ..
تقول لى نغيروا ..
بالغت كماان ما قدر دا ..
انحنا كنا منتظرين الحركة تختار اسم .. جمهورية الزنج
عشان نبقى نحنا متفردين ويونيك فى اسم السودان ..
جوا حسى قالو السودان الجديد ..
تقول لى نغيروا ..!!

-------------

ياخى لو غيرناهو لونا الاسود و الاسمر الهجين دا نمسحو ببولش ابيض ولا بوهية برونزية
( دى طبعا حتعجب دينق لاول مره )

Quote: لا لا لا .. البامية دي مايها !!!

عبد الناصر : البامية مكاوقة*
والبامية الكاويق ما بتنفع في الطبيخ
كدي مر على البورد ده من يوم سلفا قال حيصوت للانفصال وشوف كمية الكاويق العايزننا ناكلو


سيد البوست :
هل مثلا لما يقولو ليك يا سوداني بتجيك نفسيات وبتتعقد ولا الحكاية انك عايز اسم (انتيم) لانو اسم السودان ده بلدي خالص ؟

ــــــ
مكاوقة: اسال منها تمبس

Quote: الاسم جميل وعاجبنا وما حنغيروا شوف بلد إسمها حلوا أمشي عليها كان ما عاجبك إسمنا دا وما تستعجلوا الانفصال خلو لمن نشوفوا في الاول وبعدين المنبر دا قاعد جيبوا إقتراحتكم دي أو أقول ليك نحن خلونا في هم معركة البقاء وإنتوا أتناقشوا أو إتشاكلوا في الاسم وبعدين النسألك: كان إنتو جدعتوا إسم السودان وقام أتلقفوهو ناس الجنوب برضو حتزعلوا وتشتكوهم زي في ناس ناويين يعملوا في حكاية إسم كوش؟؟؟؟؟

شكراً لكل المتداخلين ومرحباً بأي رأي مخالف ...
فحتماً ساعود لآرائكم في ثنايا طرحي... أو منفصلين .
قديما جاء في الأثر قل لي ما اسمك أقول لك من أنت ؟
فبما أن الاسم هو عنوان كل شئ
يلخص مكوناته ويمثل أهدافه ويحمل شعاره
فدعونا نحلل كلمة (السودان) ونعيدها
ونبحثها في التاريخ والدين والجغرافيا
عسى أن نغير واقعا أقعد هممنا وقيمنا ردحاً من الزمان .

العزيز : محمد إبراهيم

Quote: كدي مر على البورد ده من يوم سلفا قال حيصوت للانفصال وشوف كمية الكاويق العايزننا ناكلو

يعلم الله كوفرنا عدييييل كدة !!!

ياخي باميتنا كانت رخس ( تسر الناظرين )

الليلة من شدة ما كاوقت قربنا نعمل منها مصنع بلاستيك

نسأل الله السلامة .. دي قصة عجيبة ياخ

أهلنا قالوا الدقيق كان إدفق ما بنخم كلو ..

تحياتي

الصديق جني

Quote: يا صديقى الرجل لم يكن هو الأحمق وحده! فها انت تسعد بفصل جزء عزيز من وطنك لتبدل اسمه!

ياعزيزي انا ما سعدت بالانفصال ولا سعيت ليهو
أنا قلت بعد الانفصال - لا قدر الله - بعد أن قدر سلفا.
فهل تفتكر في قدسية للوطن أكثر من التجزيئة
.
.
.
وبعدين السود(ان) ده (يحوق) في الجنوب ولا الشرق ولا الغرب ولا الشمال
ولا يحوق في ناس المحيط الاطلسي ولا جنوب الصحراء ...
يا أخ من قلة الأسامي .
.
.
.
كدي شوف ناس الويكيبديا
قالوا شنو عن السودان

Quote: سكن الجنس النوبى قديما السودان في العصور الحجرية (8000ق م - 3200 ق م). واتخذ أول خطوانه نحو الحضارة. فقاموا بصناعة الفخار واستعمال المواقد والنار للطبخ. وبلاد السودان منذ سنة 3900ٌ ق.م. كان العرب يطلقونه علي المنطقة الواقعة جنوب الصحراء الكبرى بأفريقيا الممتدة من المحيط الأطلنطي غربـاً إلي البحر الأحمر والمحيط الهندي شرقـاً.

لا أعتقد بان إسم السودان قبيح ولا الإنسان الأسود قبيح ... وواثق من أن صاحب البوست لم يعني الإنسان الأسود

أها لو فى راسك إسم جميل كدهـ غير السودان ودون الإشارة الى قبح الإسم ... نحن حاضرين نسمع منك

سؤال يا صاحب البوست ... إنت مقيم فى الخليج ؟

حتى الآن أحس بالغيظ عندما أتذكر أن سئ الذكر جعفر نميري غيّر إسم جمهورية السودان مضيفاً لها كلمة (الديمقراطية) ..... ففقدت ديمقراطيتها.

_____
شخصياً ..... متصالح مع نفسي تماماً، وعند مناداتي بـ"سوداني" لا أحس إنها إشارة إلى لوني، لكنها فقط تمييز لي عمّن سواي.

أقم دولتك الخاصة يا صديقي، وسمّها ما شئت ....... فقد تفتت الوطن على أي حال.

ياجماعة الخير
يا معشر السودانيين
أنا (يادوب) بتكلم عن تغيير الاسم
ولسه ما تطرقت لي تغيير البيئة والأرض والبشر .
اسع الهجوم الشديد الكاسح ده كلو في شان تغيير الاسم ؟
ياخ في ناس في البلد دي غيرت دينها مبادئها وانتماءتها
والجاي علينا في البلد دي نغير من أخلاقنا ... وده موضوع تاني.
وبعدين انتوا التغيير دا خايفين منو ليه ؟ مش التغيير سنة الحياة
ما كل العالم بتتغير وتتحسن ووتطور وتنداح ووتنامى وتتلون بلون الجديد
اشمعنا بقت على الاسم ..
يااخونا ... خريطة الوطن (قدامكم) زاتها حا تتغير ...
البمنع نغير الاسم شنو .

للذين يتحدثون عن التايخ نقول لهم
من الذي أطلق علينا اسم السودان ؟ ولماذا ؟
ألم يرى فينا -وهو يذبح خروف سمايتنا -غير اللون الأسود

Quote: كان في الماضي يسمي بلاد الحبشة وعند دخول سيدنا عبدالله اب السرح للدعوة في اهل السود انذاك سال ماهذة البلاد؟؟ فاجابو انها بلاد السود جزء من الحبشة وقال قولته المشهورة قولوا ان الاوان لنفتح بلاد السودان وهومن وضع الالف والنون والسودان يعني باللغة اسواحلية وبعض اللهجات الامان

دوس هنا كان داير تزيد


أمان بتاع الساعة كم يا بتاع عربي الساحل ...
مافي زول بتكلم لغة سواحلية في البورض ده يأكد الامان ده ؟

الاخ عمر
سلام
دخلت إلى هنا لأقول مثل قولك
فنحن لم نشارك في اختيار الاسم لهذا البلد
فالعرب هم الذين عندما عبروا البحر إلى هنا ووجدوا ذوي البشرة السوداء أطلقوا على هذه البلاد (بلاد السودان) وهي بلاد ممتدة من البحر الاحمر إلى المحيط الاطلسي
ولسبب أو آخر أصبح هذا الاسم خاصا بهذه الرقعة الجغرافية التي ننتمي إليها (مليون ميل مربع) حتى الآن....

ولكني بعد أن قرأت

Quote: لا أرى أي قبح في إسم السودان, فثمة أسماء لعظمتها تفقد معانيها اللغوية و تكتسب معانيا أخرى السودان الاسم فقد معناه اللغوي المندرج من اللون الاسود, و اكتسب معاني الاهل و العز و الوطن صفة سوداني لم تعد تعني أسود اللون, بل تعني كريم و نبيل و امين و اخو اخوات و (ابن بلد اصيل)

أيقنت أني لا يمكنني أن أكون إلا (سوداني)
وبلدنا هذه لا يناسبها من الأسماء إلا (السودان) حتى بعد أن يتم بتر جزء غالي منه...
لا يمكنني تصور خارطة السودان من دون الجنوب إلا وهي تقطر دما......

أها وبعدما تغير الاسم إن شاء الله حترتاح نفسياً، وتحس انك اصبحت أكثر بياضاً وسعادة؟ وبعدين يا راجل قول بسم الله منو القال ليك إحنا سود؟ ديل ناس حاقدين ساي السمونا السودان، واحنا لا سود ولا حاجة، وزي ما اتفضلتا حضرتك الزاندي والرشايدة أكثر بياضاً من مارلين مونرو زاتا؛ وزي ما قال ليك أخوي دينق اللون الأسود يظل أسود مش كان غيرتا اسمو. قال نحنا ما سـود، مراية ما عندكم في البيت يا كافي البلا؟

في تاريخ الاسلام ورد اسم السودان لمنطقة واسعة من افريقيا
فلماذا احتجزنا الاسم لأنفسنا وتركنا سود أفريقيا ينتقون أطايب الأسماء ؟

Quote: السودان أصله جمع فارسى للفظ سود ( جمع أسود ) مثل الجمع الفارسى البيضان , وكان السودان وأثيوبيا وأريتريا تعرف ببلاد الحبشة قديما وهي مشتقة من حبش يحبُش أي اسودَّ يسْودُّ. • ورد فى كتب العالم الشيخ / حسن وفى أحاديث العالم العلامة البروفيسور المرحوم عبد الله الطيب فى برنامجه التليفزيونى ( سير وأخبار ) ـ ولا أدرى إن كان الأخير وثق آراءه تلك فى كتب أم اكتفى بالبرنامج التليفزيونى ـ ما أوردته بالنقطة السابقة وما يلى من نقاط هامة ومنها أن السيدة رقية رضي الله عنها ابنة رسول الله (ص) هاجرت مع زوجها سيدنا عثمان بن عفان إلى السودان تحديدا وليس إلى الحبشة المعروفة حديثا , بدليل أنها رأت أهل السودان يدفنون موتاهم على نعش وحتى الآن , بينما لا يدفن الأحباش موتاهم على نعش ( عنجريب) , وصدف أن توفيت أم المؤمنين السيدة زينب بنت جحش فى عهد الخليفة الراشد سيدنا عمر بن الخطاب رضي الله عنه, وكانت بدينة إلى حد ما وخافت على جثمانها الطاهر من أن يحمل على الآلة الحدباء كعادة أهل المدينة , فأشارت على سيدنا عمر رضي الله عنه أن تُحمل على نعش كعادة أهل السودان فهو أكثر أمنا على الجنازة . النجاشي كان ملكا على السودان الحالى ولم يكن حبشيا بمعنى أنه من أثيوبيا , وقيل إن رسول الله (ص) صلى عليه صلاة الغائب عند موته وقد كان النجاشي مسلما مؤمنا برسول الله (ص) , وهناك حديث مفاده أن الرسول (ص) سمى السودان بأرض الصدق وقال : منه ثلاثة من أهل الجنة منهم النجاشي وبلال بن رباح وثالث لا يحضرنى اسمه , وبهذه المناسبة فقد أكد العالم المرحوم البروفيسور عبد الله الطيب بأنه حقق كثيرا فى اسم رباح فلم يجده إلا بمنطقة دنقلا فى شمالى السودان مما يؤكد أن بلالا كان سوداني الأصل . ومما يجدر ذكره أن الخيول العربية الأصيلة أصلها من السودان ومن مدينة دنقلا بالذات كما ورد فى موسوعة أمين الريحانى الضخمة وبالتحديد عندما تحدث عن مملكة الأدارسة فى كتابه الشهير ( ملوك العرب ) إذ وصل العارف بالله السيد أحمد بن إدريس دنقلا قادما من فاس وأخذ معه إلى مكة من تلك الخيول حيث أقام بمكة حوالي الثلاثين عاما . • زار سيدنا إبراهيم الخليل عليه السلام السودان واتخذ له مولى من السودانيين صحبه حتى بلاد الشام وأقام معه وكان اسمه دمشق , التى سميت عليه مدينة دمشق الحالية حيث كان يقيم مولى سيدنا إبراهيم . • زار 52 سودانى الرسول (ص) وأعلنوا إسلامهم ونزلت فيهم الآيـة الكريمة رقـم 83 من سـورة المائـدة ( وإذا سمعوا ما أُنزل إلى الرسول ترى أعينهم تفيض من الدمع مما عـرفوا من الحق , يقـولون ربنا آمـنا فاكتبنا مع الشاهدين ) صدق الله العظيم . • يقال إن لقاء العبد الصالح وسيدنا موسى كان بالسودان , وربما والله أعلم يكون مجمع البحرين نقطة التقاء النيل الأزرق بالنيل الأبيض أو ربما نقطة التقاء نهرين جانبيين من أنهر السودان الكثيرة . • تزوج كل من سيدنا سليمان وسيدنا لوط بسودانيتين . • كان السودانيون يجيدون الرماية وفنون الحرب ويقال إن من أصاب سيد الشهداء سيدنا حمزة رضي الله عنه كان سودانيا أجيرا , بينما من أصاب مسيلمة الكذاب أيضا كان سودانيا .

دوس كان داير تشوف

إنت لو قاصد تغيرو لجمهورية السودان العربية قول ساى

..
.

Quote: مراية ما عندكم في البيت يا كافي البلا؟

قرقر قرقر قرقر

---------

ود شاموق والله لونغ تايم
ومس يو شديد .. اووووووى
براحه على عمر تاجو دا ..

بوستات متشابهة...ايها السود(انيين)

من يؤيدني : استعادة البلاد لأسمها القديم ( دولة سنار ) حال الانفصال

الله يرحم خلف الله حمد

نيلنا اسود ونحنه سود وصغيرنا يحتقر الاسود


--------------------------------
وبغض النظر عن التاريخ والدلالة ((( السودان ))) _ رأي شخصي _
أسم محبب للنفس ما شائف فيهوا أى نوع من القبح

ورحم الله إبراهيم الكاشف
أنا أفريقي
أنا سوداني


وده ما بمنع برضوا نشوف أقتراحك للأسم الجديد يا عمر

لك أكيد التقدير

Quote: بوستات متشابهة...ايها السود(انيين) من يؤيدني : استعادة البلاد لأسمها القديم ( دولة سنار ) حال الانفصال

المعني يا زول انت عايز تكون مشاتر ساكت ..
دحين عليك الله ما تجرنا لي مواضيع هامشية ..
خلينا النشوف الانفصال ده حيودينا لي وين وبعدين نشوف الاسم ..

انت عايز تغير الاسم بكرة الناس تقول عايزة تغير العلم ..
يجو الحبش يقول دي كانت ارض الحبشة ادونا بلدنا ..
ويجي زول تاني يقول هل انحنا افارقة ولا عرب افارقة ..

بس روق المنقة ..

هههه .. السودان يعني 'ال(.........)ز' .. يعني الإسم مشابه 'للنيجر' و'نيجيريا' ولكنه بالعربي ..

المنفصمين العايشين في العالم الأبيض لو الواحد قالوا ليهو يا '(.........)' يمشي يفتح بلاغ يقول نبذوني ويطالب بتعويض لأنه تعرَّض لعنصرية وتحقير .. ويجي هنا يقول ليك متصالح مع نفسي والإسم عاجبني !!! ..

مافيها حاجة لو بقي إسمنا السودان - ال(.........)ز - لكين لما الخواجة والهسباني والآسيوي واللبناني يقول ليكم يا '(.........)و' أبقوا أركزوا وابلعوها من سكات ..

أها قلتو شنو يا '(.........)ز' ..

عالم منفصمة ..!! ..

ابو السمك زاتو ..!!

المنبر زاتو قلنا ليهو الإسم بلغة اسياده اعتبرها كلمة نابية .. ههههه

لا يفوت فطنة الشفوت أن الكلمة بين الأقواس هي 'ن يقرز'

الحقيقة أنا افاجأت بكمية الأقواس الظهرت لي في المداخلة !!.. وقلت ياربي أنا نبذت لي زول وماجيب خبر واللاّ شنو؟؟!!

أتاري إسم السودان باللغات العالمية محظور في المنبر ويعتبر نبيذ؟؟ !!!

الارهابي منير
تحياتي

Quote: أتاري إسم السودان باللغات العالمية محظور في المنبر ويعتبر نبيذ؟؟ !!!

ههه
شفت اسمنا بقى ازاي ؟

---
تبلدينا العندينا
تقرقر ساكت
ما جيب خبر

Quote: مراية ما عندكم في البيت يا كافي البلا؟ قرقر قرقر قرقر

المشكلة أنه المرايا العندي بتشوف عكس البشوفو ود شاموق .
عشان كدة قلنا أدو( لونا) معاكم فرصة

في التاريخ الحديث تكرر ذكر أن جزء كبير من أراضي
السودان ومصر كانتا دولة واحدة ، مرة باسم كوش
ومرة باسم مصر الفرعونية ، وتارة باسم السلطنة
الزرقاء أو سنار وتارة أخرى باسم بلاد النوبة ومروي والبجا وغيرها ..

ما الذي جعل الحدود السياسية الحالية تستفرد باسم السودان وتتخلى عن كل تلك الأسماء والمعاني

Quote: كان الهاجس متمثلا لدى حكام مصر آنذاك ولايزال ممثلا في الآتي: * ضمان تدفق مياه النيل . * حماية حدودها الجنوبية من هجمات قطاع الطرق من بدو الصحراء ومملكة البجا * الخشية من لجوء المعارضة السياسية إلى السودان والعمل من هناك لضعضعة أركان النظام الحاكم القائم في مصر أو إزالته .. وقـد كان (على سبيل المثال لا الحصر) لسابقة الملك المصري الأصل (أحمس) الذي لجأ إلى ملوك مملكة نبتة وتزوج منهم ثم أعانوه على طرد الهكسوس من بلاده المثال العملي الصارخ لجدية هذا الهاجس الأمني . ثم لجوء بعض قادة المماليك إلى السودان بعد مذبحة القلعة الشهيرة التي دبرها لهم محمد علي باشا .. وإنتهاء بمحاولة إغتيال الرئيس محمد حسني مبارك بواسطة جماعات مصرية جهادية إسلامية أصولية متطرفة لجأت فترة إلى السودان وتسللت منه إلى أديس ابابا.

أها

الأخ عمر وضيوفه الأفاضل يقع الكثيرون فى فخ الكلمات ذات النطق الواحد فى اللغات المختلفة وهو ما يسمى بال (false friends ) ,وكلمة sud و cud ,كما هو معلوم تشابهان كلمة سود فى اللغة العربية,لفظيا فى النطق فقط,وتختلف فى المعنى.
- كلمة sud. soud. cud من أصل واحد وهو اللاتينى وكلها تعنى الجنوب .
- أطلق اللفظ على المناطق التى تقع جنوب الحزام العمرانى لشمال أفريقيا ومصر . وتمتد المنطقة من شرق القارة لغربها .ومن ضمنها السودان الحالى.
- أطلق الأغريق إسم إثيوبيا على نفس المنطقة ومن ضمنها السودان الحالى.
- نفس المنطقة كانت معروفة للعرب بأسم الحبشه. وعندما غزوا (فتحوا) مصر 641 م.أخذوا عن المصريين الأسم المتداول عن الرومان سود فقاموا بتنيه لفظيا ,دون المعنى الأصلى للكلمة ,وجعلوا المعنى العربى(المنجور) سائدا.
- نفس الشئ حدث مع الأتفاقية الشهيرة,بين عبدالله بن إبى السرح مع النوبة.والتى درسناها فى المدارس باسم إتفاقية (البقط )والصحيح أنها إتفاقية الباكت pact والتى تعنى (حلف ) .(A pact is a formal agreement. In international politics, pacts are usually between two or more sovereign states. In domestic politics, pacts are usually between two or more political parties or other organizations..) - البقط ,كلمة لن تجد لها معنى فى اللغة العربية وجميع المصادر التى اوردتها ترجع فقط لتلك الإتفاقية ,كما أجتهد الإستعلائيون ليكون بقط بمعنى عبيد. - كانت اللغة الرسمية (لغة المكاتبات ) فى الدولة النوبية ,بعد القرن الثانى الميلادى ,هى اليونانية ,لغة الكنيسة والدين.ومن هنا كانت المكاتبات والإتفاقيات تتم بها. لذا جاءت كلمة pact .
- المنطقة المعنية ,كانت معروفة للدول الكبرى آنذاك (اليونان ومن ثم روما ) فهم من سماها الأراضى الجنوبية.
- إن تاريخ المنطقة لم يبدأ بدخول العرب لها ,ولا لغتهم ,التى لم تضف شيئا لها ,بل تم إستغلالها لطمس هوية المنطقة وتراثها اللغوى والثقافى.ومازال أصحاب المشروع الحضارى يفعلون الشئ نفسه.
تحياتى

الاخ هشام كمال عبادى ،،
اولا مرحب بيك كعضو جديد فى المنبر..
لكن فعلا يبدو عليك مستجد... وشكلك شايت ساااى ... هسى مداخلتك كاتبها لى منو ما عارف ؟؟ ... لصاحب البوست المنقول ام لصاحب الكلام الاقتبستو انت ؟ ...والمشاتر منو ما عرفنا؟؟... ياخى جهجة باكاتنا... عليك الله ركز معانا شوية...

Quote: المعني يا زول انت عايز تكون مشاتر ساكت .. دحين عليك الله ما تجرنا لي مواضيع هامشية .. خلينا النشوف الانفصال ده حيودينا لي وين وبعدين نشوف الاسم .. انت عايز تغير الاسم بكرة الناس تقول عايزة تغير العلم .. يجو الحبش يقول دي كانت ارض الحبشة ادونا بلدنا .. ويجي زول تاني يقول هل انحنا افارقة ولا عرب افارقة .. بس روق المنقة ..

وقبل ما ترد كدى اضغط على الرابط المرفق ...وانقل كلامك ده للبوست المعنى ... وتانى مرحب بيك فى المنبر... بس ركز لينا شوية..

وتقبل احترامى ،،،

علي محمد الخير
عساك طيب
مالك حاكيها مع ضيوفنا ياخ
خلي الناس تاخد راحتها
زي ما انت اخدت راحتك
ورميتلك رابط (ساكت) ومشيت
بعدين المشاتر (ساكت) ده ما انت
انت تراكا بتتكلم .. ماساكت

صاحب البوست وصاحب فكرة التغيير ...
تحياتى والله يديك العافية ...

Quote: ورميتلك رابط (ساكت) ومشيت

هسى عليك الله رابطى الانا جبتو ورميتو هنا ده (ساكت كدى ) مش بيدعم فكرتك التغيرية ولا رايك شنو ... فكرتك الانا ذاتى بدعمها بقوة ...وضيوفك على عينا وراسنا ... بس حبينا نستوضح ونوضح ...
ـــــــــــــــــــــــــــــــــــــــــــــــــــــــــــــ
لكن يا التاج يا اخوى اخونا سبيل اقترح اسم (سنار) ... لكن انت ما وريتنا عايز تسمى السودان شنو اذا وافقناك على مبدأ التغيير؟؟

تحياتى واحترامى الشديدين ليك ولى ضيوفك ,,

والله بالاكتر يا صالح، ومشتاقين كميات. أتمناك بخير.

حبيبنا تبلدينا ...
(براحتك) ما بناباها إلا الفيك اتعرفت ..
وزي ما قال تحتمس ضرب الحبيب ولا أكل الزبيب

Quote: والله انحنا اسم السودان دا نسير فيهو جيوش .. وما حنتنازل عنه ابدا .. ياخى دا اسم نزل فى التأريخ وفى توثيق الشعوب .. ملاحم وشعارات وعادات وتقاليد ارتبطت بهذا الاسم المحبب الى انفسنا ..

يا أخي التاريخ ده ما مليان أسماء لامن مدفق
ما يدونا منه غير السود (ان) ؟
ما قدامك المهدية وسنار والفونج ومروي
والبجا والنوبةوالجعليين والشوايقا والدناقلة وكوش وبشاشا
ما كلو تاريخ وملاحم وحضارات محفوظة باسم السودان ده (الوجدنا) عليه آباءنا عاكفون
البمنع شنو نحافظ عليها باسمنا الجديد البنختارو براناوبي رضانا ؟
وبعدين يا حبيب ما تعجبك (مراية) أخونا ود شاموق دي
لأنها بتعكس صورة ما حضارية عن السودانيين في المنبر ده ،
وخايف تكون زي مرايتو دي ، هي الخلت زميلتنا العزيزة دينا خالد – كما نبهني أحدهم –
بأنها تشبهك بنميري مين كدة رشاد سكر ..
في زمتك دي وعليك ديشك (صورة) دينا خالد دي ... أكان ظهرت في مراية شاموق ده بتكون سودانية ؟.

ود شاموق يا جميل يارايق

Quote: أها وبعدما تغير الاسم إن شاء الله حترتاح نفسياً، وتحس انك اصبحت أكثر بياضاً وسعادة؟ وبعدين يا راجل قول بسم الله منو القال ليك إحنا سود

الحمد لله ياود شاموق أنا مرتاح نفسياً قبل تغيير الاسم
وإذا اتغير حايرتاحو كمان الناس التانيين
وزي ما بقول المثل ...
(انت كان معانا .. نحن ما مع التانيين )
.
.

ياراجل أتفاءل شوية ، وبيض مرايتك حبة
كدي خليهم عربان السودان ...
شوف بني ضنقل والكنوز والحلفاويين والمحس والزاندي والنوير والأدروبات
وأجزاء واسعة من الدينكا والشلك والزرقة وغيرهم وغيرهم ...
وريني البشرة الاكتر بتاعة السود والله ( التانيين) ؟

يا اخ السودان دا عديل كدة ما فيهو زول أسود
أمسك الجماعة الانت شايفهم سود وعاين ليهم في التلفزيون القومي
والعجب في (اليوتيوب ) وبدون مكياج ..
والله صورهم ماشاء الله ، كلهم اتلمعوا وفتحت بشرتهم
السودة الشايفة فينا دي يا حبيب مجرد (حبة) غباشة وتزول .
وبعدين ياخ نحن ما أسود ناس في العالم ...
اسود بشرة عندنا بتكون ابيض من أي مواطن في اوغندا أوكينيا وهلم جرا ..
مالهم ديل ما سمو نفسهم السودان ؟
.
.

الرفيق Nasr
مودتي

Quote: وما تستعجلوا الانفصال خلو لمن نشوفوا في الاول

أنت لسع ما شفت الانفصال
وجماعتك ديك (خلو) فيهو حاجة لسه ما انشافت
يا اخ والله (اتشوفت) ليك ، على وزن خجلت ليك.

العزيز Fathi Ali Mohammed
تحايا نضرة

Quote: السلام عليكم لا أرى أي قبح في إسم السودان, فثمة أسماء لعظمتها تفقد معانيها اللغوية و تكتسب معانيا أخرى السودان الاسم فقد معناه اللغوي المندرج من اللون الاسود, و اكتسب معاني الاهل و العز و الوطن صفة سوداني لم تعد تعني أسود اللون, بل تعني كريم و نبيل و امين و اخو اخوات و (ابن بلد اصيل) تغيير اسم البلد يعني ان تفقد اغنية (أنا سوداني) معانيها يعني ان لا احس بأي شيء عندما اسمع (السودااااااااان الوطن الواحد ما قد كان و ما سيكون) يعني ان نصير بدون هوية مثل عملتنا و ساعتنا, يعني ان تكتب جنسيتك ثم تكتب بين قوسين سوداني مثل ان تكتب: 15 الف جنيه (15 مليون), او ان تكتب: نلتقي الساعه 7 (6 بالقديم) هل يستقيم ان تغيير اسمك الي محمد بدلا عن عمر !, فاسم محمد خيرا من اسم عمر بالتأكيد (خير الاسماء ما حمد و عبد). عن نفسي, اذا سألني اي شخص في اي مكان او زمان عن جنسيتي, فلن أجد بدا من ان أنفخ شدقي و أقول له بكل فخر أنا سوداني.

كلامك طيب ومقبول
ولكن احلال الاسم لا يغير شئ
من معاني الأهل والعز والوطن الانت ذكرتها
وبعدين دي معاني بتتشكل في كل بلد ومع كل جيل
يعني مثلا الدولة المهدية الآن غير موجودة كاسم
ولكن قيمها ومجاهداتها موجودة في تاريخنا وقلوبنا
وبعدين كان بقت على أغنية (أنا سودني)
عادي ممكن نجد فنان يغني (أنا فلتكاني)
.... مثلا

بصراحه نحن (المواطنين) زول سألنا من راينا في حاجه في البلد دي مافي من أساسو,
الناس ديل لما قعدو ووقعّوا نيفاشا, ما عملو استطلاع رأي ولا سألونا من راينأ,
ما ياهم المؤتمر الوطني والحركه الشعبيه اللي الاتنين جو للسلطه علي ظهر دبّابه؟
واتفقو ووزعو السلطه والثروه من غير ما يشاورونا؟
وهسي حيفصلو الجنوب بدون ما ياخدوا راينا؟
أكيد حيضبحو ليهو ويسمّوهو بدون ما ياخدو راينا برضو :(


نحن عايزين وطننا زي ماكان قبل 89 المشئومه,
سوداننا الكان عاجبنا رسمو واسمو :(

ماهو الاسم الجميل الذى تقترحه ياعمر التاج؟
واحد قاليك البيضان، شايفك صهينت..
---------------------------------
عموما اخونا الاخصائى بشاشا حيتسلى بيك لو شاف البوست ده...

Quote: إذا وقع الانفصال فإن الفرصة تكون مواتية لتغيير الاسم القبيح لبلدنا .

على قدر أهل العزم تأتي العزائم

احمد امين ،
كيفنك أخوي..

Quote: ماهو الاسم الجميل الذى تقترحه ياعمر التاج؟ واحد قاليك البيضان، شايفك صهينت..

أول بالتبادي كدي أنتفق على فكرة التغيير
بعدين الاسم بجي براهو مع الضباح ...
أما إذا سميناالبيضان والحمران والسمران
فكأننا يأأمين لا غيرنا لا حاااااجة ....

Quote: عموما اخونا الاخصائى بشاشا حيتسلى بيك لو شاف البوست ده...

يا أخ مالك داير تجيب لينا الهوا ، برانا الفينا مكفينا
اسه أكان زولك دا جا... حايقدني يالكاره زاتك ويالمستلب فكريا
الله لا وقع البوست في عينو ... ولا جاب عقابو (هنا).

ناس البامية والمفروكة ديل بنجيهم برواااقة
لانهم لسه ما فكت منهم ريحة الكويقة بتاعة البوست
نخليهم يشمو قدحتها تاني ويضوقوها وبعدين نسمع منهم المفيد...
.
.

نجي لسؤال أخونا محمد إبراهيم علي لأنو سؤال مباااشر وما فيهو (تقية) :

Quote: سيد البوست : هل مثلا لما يقولو ليك يا سوداني بتجيك نفسيات وبتتعقد ولا الحكاية انك عايز اسم (انتيم) لانو اسم السودان ده بلدي خالص ؟

لا والله لما زول يقول لي يا (سوداني) بضحك ساكت
ما بضحك عليهو .. لكين بتذكر نكتة واحد صومال قال لسوداني .
( أنتو هاجة بتاكلو ، بتسموه شرموت ليه ؟ )

أها ... والله عادي ، يقولو سوداني ، يقولو زول ، يقولو عبـد
يقولو زي ما يقولوا ، لكن أنا بختار لي حاجاتي الاسم البعجبني.

---
حالتي دي ما شغال في الخليج

قبيح كيف يعني
انا لله وانا اليه راجعون ..

يااجمااعة استهدوا بالله وطولو باالكم وحقوا نفهم انو من حق الزوول دا يطاالب بتغيير الاسم دا حق دستورى واذا الغالبية وافقت ببقى مافى مشكلة اصلا وبالنسبة لى دينق ياجارنا العزيز دى ترتيبات ما بعد الانفصال( ولكم دينكم ولنا دين) نحن حررين نغيير اسم بلدنا ولا نخليهو ( دا شان داخلى )


ويا جمااعى رووقوا المنقة وما تقهروا الاخرين

Quote: دعونا نكتسب فائدة واحدة من الانفصال إذا ووقع فينا .. وفي هذا اقترح استغلال هذه السانحة التاريخية لازاحة اسم ( السودان )

هل الانفصال أصبح سانحة تاريخية ؟
البلد تفتت وتقطعت أشلاء كمان قبلتوا على اسمها !
حسبنا الله ونعم الوكيل

ما وريتونا ياجماعة رأيكم في جمهورية 'الن قرز' الديمقراطية ..
السودان جمع أسود = 'الن قرز' .. كلمة يعاقب عليها القانون ويشطبها ليك فلتر المنبر العام بإعتبارها نبذ أو خادشة للحياء ..

test:o
حقو الجنوب يسموه السودان والشمال يختار إسم تاني ..

Quote: حقو الجنوب يسموه السودان والشمال يختار إسم تاني ..

لو اتفقنا مستعدين ندفع لكم تعويض...نموت في اسم السودان ...بنحبه!!!.
نحن موش متنكرين للون بتاعنا..نحن سود ...نحن افارقة منذ الازل والي الابد.
اجدادنا هنا منذ ان خلقهم الله في بيئتهم الاصلية.

Quote: لو اتفقنا مستعدين ندفع لكم تعويض...نموت في اسم السودان ...بنحبه!!!. نحن موش متنكرين للون بتاعنا..نحن سود ...نحن افارقة منذ الازل والي الابد. اجدادنا هنا منذ ان خلقهم الله في بيئتهم الاصلية.

كويس إنك نجحت في الtest لإنه جبناه مكشوف .. بس هو ما كان ليك إنت ..

لكن لا بأس ما دام تطوعت بالإجابة.. هل يمكنني أن أسألك إن كنت تقبل أن يقال لك 'ن يقر' أم لا؟؟ ..

لو كنتم تحبون الإسم فلماذا لا تسمونه جنوب السودان؟ لماذا تتسلبطون في إسم لا تمتون له بصلة؟؟ ..

Quote: لو كنتم تحبون الإسم فلماذا لا تسمونه جنوب السودان؟ لماذا تتسلبطون في إسم لا تمتون له بصلة؟؟ ..

سميناه جنوب السودان وجاء النشيد الوطني بهذا الاسم.لن نهرب من هذا الاسم كما يوجد كوريا الشمالية والجنوبية
لازم تكون هنا السودان الشمالي والسودان الجنوبي.
لم نهرب من وحدة السودان بل الذين حولوا كل البلد الي العربي الاسلامي هم الذين زرعوا بذور
الانقسام لان السودان بشكله القديم لن يعود ابدا.

عمر الطاج ياصاحب

نودي وشنا من العالم وين ...دايرم يقولو إتعقدو من لونم ...أفووووو

لوعندك شوية (دمقرط) ...أسحب البوست ...أسمح نصيحة أخوك الصغير

وحقوق الأقليات محفووووظه

سموه
جمهورية الاندلس الاسلامية العربيــــــة

Quote: سئل أحدهم ماذا سميت حصانك؟ ولما لم يكن له إسما تلفت يمنة ويسرة وفقأ عين حصانه وقال أسميته "الأعور"! يا صديقى الرجل لم يكن هو الأحمق وحده! فها انت تسعد بفصل جزء عزيز من وطنك لتبدل اسمه! أمارة المقرن الاسلامية جنى

سميهو الأعور!
جنى

اولا بلاك از بيوتفلblack is beautiful (الا لمن بكري يسود البوست)
والسودان اسم جميل Sudan
اول ما تعمل ترتيب ابجدي يجيك جنب السويد
دا في مرشح امريكي للرئاسة طار من الترشيح لانو لم يستطع ان يفرق بين السودان والسويد
بعدين كلو عند الخواجات صابون
العرب ديل نحن ما شغالين بيهم يفهموا اليفهموا
وزي ما قالوا الجماعة الفوق ديل *** البامية دي ما ياها***

وضح لي
أن الزنوج الشماليين النقرز كما يقول منير معقدين من إسم بلدهم
ولون جلدهم
وشلوخ حبوباتهم
وحاجات كثيرة تشكل في مجملها نوع الهوية المريضة التي تكونت خلل صراعات وحراك ثقافي أستمر من اول غزوة لعبد الله بن أبي السرح لبلاد السودان

جاكم فرج ولو مؤقت
إسم السودان كما اوضح متداخل هنا كانت تعني الجنوب وسموه خواجات عيونهم خدر
أها ترتاحوا شوية من مسألة قبح الاسم اللاما فينا دي؟؟؟؟

نرجع لموضوعنا المهم
بقاء بلدنا السودان أو فناءه
هسع لو أبوكم كان عنده طاحونة أو بقالة وإسمها ما حلو
وقدر ما حاولتم مع أبوكم عشان يسميها ليكم إسم مودرن
زي بقالة نانسي
أو بقالة شاكيرا
والوالد معصلج ومصر علي إسم بقالة ود السريف
أها والأب راقد علي فراش المرض
وملائكة الموت بيتختوا ليه الجوكر فوق عشان يفتح
الاولاد بدلا من الجري للدكاترة والصيدليات يتناقشوا أنهم يغيروا إسم البقالة؟؟؟؟؟
ما في أحترام للجلكين المحدر للموت دا؟؟؟؟

الاسم ما بنغيروا
بس دا ما موضوعنا
ما تشتوا الكورة خدمة للناس الضيعوا البلد وقسموها تقسيم مرارة الضحية
بلدنا ذاتها في مهب الريح
بلدنا ذاتها داير تغيير:
نشيل المشروع الحضاري ونختو في متحف التاريخ
والحرامية السرقوا بإسمه نرسلهم مشروع الجزيرة يزرعوا وينتجوا إنتاج حقيقي
ونجيب نظام ديمقراطي يحترم حرية وحقوق أي إنسان في السودان
ما مهم لونه ولا شلوخ حبوبته ولا دينه ولا شكله
سودان مواطنة لا سودان هوية
وإن شاء الله هويتك تكون قلب الهوبة وأمتطاء الحمار بالقلبة
حر ومخير في نفسك ولونك ودينك وفلسفتك وبتشرب شاي بلبن ولا سادة

الاخ/ عمر و الضيوف
مساء الخير،،،
حضرت لقاء للسيد/ جوزيف لاقو و اظنه كان حكيما جدا حينما طلب من الجنوبيين الاحتفاظ
باسم جنوب السودان حتى اذا غير الشماليون رايهم في اسس المواطنة، رجع السودان
في المستقبل كما كان في الماضي دولة واحدة و بذات الاسم.

أخونا نصر .. عقدة شنو يازول .. والله الحمد لله ما عندنا أيتها عقدة .. بس لفتنا انتباهكم إلي المعني اللاتيني للإسم والذي إذا نادوك به يا نصر في أمريكا تقيم الدنيا ولاتقعدها وتعتبره سب وتحقير لك .. هل تنكر ذلك؟؟ .. هل تعتبر مناداتك ب'الن يقرو' في امريكا جنحة قانونية وعنصرية مرفوضة ؟؟ أم أنها كلمة عادية؟؟ .. أقرأ كلام ويكيبيديا أدناه ..

The word Negro is used in the English-speaking world to refer to a person of black ancestry or appearance, whether of African descent or not, prior to the shift in the lexicon of American and worldwide classification of race and ethnicity in the late 1960s. The word "negro" means "black" in Spanish and Portuguese, from the Latin niger ("black") and Greek Νέγρος Négros ("black").

The usage was accepted as normal, even by people classified as Negroes, until the Civil Rights movement. One well-known example is the identification by Martin Luther King, Jr. of his own race as 'Negro' in his famous speech I Have a Dream.

During the American Civil Rights movement of the 1950s and 1960s, some African American leaders in the United States objected to the word, preferring Black,[1] because they associated the word Negro with the long history of slavery, segregation, and discrimination that treated African Americans as second class citizens, or worse.

The term "Negro" is now widely considered to be obsolete, and it is not commonly used. It is still used in some historical contexts, such as in the name of the United Negro College Fund.[2][3] and the Negro league in sports.

Modern language uses: Black; additionally, Black African for people native to the African continent, and African American for people in U.S.A..

"Negro" superseded "colored" as the most polite terminology, at a time when "black" was more offensive.[4]

The United States Census Bureau announced that Negro would be included on the 2010 United States Census, alongside "Black" and "African-American," because some older Black Americans nevertheless self-identify with the term.[5][6][7]

قال منير

Quote: أخونا نصر .. عقدة شنو يازول .. والله الحمد لله ما عندنا أيتها عقدة

أنا برضو والحمد لله ما معقد
وعادي نلاقي بعض نقول
whats up nig
لكن إذا قال ليك واحد أبيض بقصد الاساءة ما حتخليه
المشكلة في الاساءة مش في الكلمة ذاتها
يعني لو صاحبك قال ليك إنت بليد ما بتزعل
لكن لو ود حلة ثانية قالها ليك دا سبب مشكلة

Quote: أنا برضو والحمد لله ما معقد وعادي نلاقي بعض نقول whats up nig لكن إذا قال ليك واحد أبيض بقصد الاساءة ما حتخليه المشكلة في الاساءة مش في الكلمة ذاتها يعني لو صاحبك قال ليك إنت بليد ما بتزعل لكن لو ود حلة ثانية قالها ليك دا سبب مشكلة

ماياهو ده المجنن الناس !!.. أكيد الحيقول ليك nig ده برضو nig زيك - شايفك ماقادر تتمها ..
لكين طبعاً ٩٩.٩٩٩ % من البشر ما اصحابك ، عندما يقولوا ليك nig أكيد ما بيقصدوا يهظروا معاك .. أها تقعد تقضي يومك خنق؟؟ .. ولو قال ليك أنا هيسباني وما بعرف عربي و'سوداني' بتاعتك دي في لغتنا 'ن يقرو' .. حتعمل شنو؟؟ ..

يازول خلوه علي كده .. سودان سودان بس أركزوا لو نادوكم بلغة أجنبية ..
..

الــــــــــــــــــــــــــــــــــــــــــــــــــــــوحدة ..

يا منير
درج الناس هنا أن الاسود إذا قالها ليك ما مشكلة
لكن مشكلة إذا قالها ليك أبيض
والبيض عادتا ما بدخلوا نفسهم في شبك زي دي
عشان ما يقعد يشرح والله ما قاصد أي حاجة
وإذا قالها ليك بقصد الاستفزاز بتكون واضحة وفي اليد التانية بندقية
وفي الحالة دي إنت بتتخارج

في السودان كلمة عبد مدورة بين الاصحاب زي الما حصل حاجة
لكن كدي قولها بقصد الاساءة والبنية بتدور

ما كنت قايل حاجات زي دي دايره شرح
لكن ما لو نشرح ونشرح في سبيل بقاء الوطن الحبيب

Quote: يا منير درج الناس هنا أن الاسود إذا قالها ليك ما مشكلة لكن مشكلة إذا قالها ليك أبيض والبيض عادتا ما بدخلوا نفسهم في شبك زي دي عشان ما يقعد يشرح والله ما قاصد أي حاجة وإذا قالها ليك بقصد الاستفزاز بتكون واضحة وفي اليد التانية بندقية وفي الحالة دي إنت بتتخارج في السودان كلمة عبد مدورة بين الاصحاب زي الما حصل حاجة لكن كدي قولها بقصد الاساءة والبنية بتدور ما كنت قايل حاجات زي دي دايره شرح لكن ما لو نشرح ونشرح في سبيل بقاء الوطن الحبيب

وليييه بس نقعد نحن في قاصد وما قاصد والحرج المصاحب ؟؟ .. لو كانت مدورة عادي في السودان ما كانت الحروب دي مدورة قدر دا ..
أمَّال العالم ديل مطلعين عيننا بالتهميش والاستعلاء ده من شنو؟ مو ياهو من تأثير الكلمة دي؟؟ الواحد يقول ليك I'm black and proud ، ولمن يقولوا ليهو n-egro يقعد يفنجط ..

طبعاً ياخوي أنا أصلاَ مافارقة معاي يغيروا الإسم أو ما يغيروه .. بس حبيت ألفت الإنتباه للإزدواجية وانفصام الشخصية الحاصل - والفرق الصارخ في مدلول الإسم مابين الأصل والترجمة والذي يؤدي للسجن في امريكا وقد أدي للحروب والانفصال في السودان !!! ..

فكرة ساذجة

Quote: وليييه بس نقعد نحن في قاصد وما قاصد والحرج المصاحب ؟؟ .. لو كانت مدورة عادي في السودان ما كانت الحروب دي مدورة قدر دا .. أمَّال العالم ديل مطلعين عيننا بالتهميش والاستعلاء ده من شنو؟ مو ياهو من تأثير الكلمة دي؟؟ الواحد يقول ليك I'm black and proud ، ولمن يقولوا ليهو n-egro يقعد يفنجط .. طبعاً ياخوي أنا أصلاَ مافارقة معاي يغيروا الإسم أو ما يغيروه .. بس حبيت ألفت الإنتباه للإزدواجية وانفصام الشخصية الحاصل - والفرق الصارخ في مدلول الإسم مابين الأصل والترجمة والذي يؤدي للسجن في امريكا وقد أدي للحروب والانفصال في السودان !!! ..

منير تحياتي

مدلول الكلمة هو المشكلة وليست الكلمة، وأعطيك مثل، هنا في أمريكا ممكن تقول لأي شخص (اسود) Black ودي ما فيها أي شئ، بل حتى في الأوراق الرسمية إنت بتكب (Black) أما مجموعتك الإثنية.

نأتي للخلط الذي أثرته أنت، فالشخص الذي يقول I'm black and i'm proud of it هو غير منفصم وإذا قلت له يا Black فهو ما عندو مشكلة. طيب المشكلة وين؟ المشكلة لمن تقول ِنـقر لأنو الكلمة دي ما مقصود بيها اللون، بل مقصود بيها أنك لست (حر) أنت (عـبد) ولذلك فكلمة نـِقر ليست معناها نفس كلمة Black.

أيضاً ما يقابل كلمة سوداني في اللغات اللاتينية هو Sudanese وبالتالي إذا شخص قال لي يا نـقر فهذا معاناهو أنه يقصد الإساءة لي لأنه نعتني بإسم آخر غير إسمي.

مثلاً أنا هنا في أمريكا عندما ملأت الإستمارة للعمل كتبت أنني Black، وإذا أي شخص أمريكي رأني وأراد أن يصفني فسيقول هوBlack وإذا أراد أن يشتمنى سيقول نـقر، وأنا سأشتمه وأقول (Trash)،

يعنى يا منير إنت بتتكلم عن كلمتين مختلفتين تماماً وليس عندهما نفس المعنى.

الأخ الصادق سلامات ..
إذا قرأت المقتبس الجبته من الويكيبيديا تجد أنه في أمريكا هذه الكلمة تدرجت عبر الحقب حتي وصلت لدرجة colored وذلك بسبب الحساسية .. وطبعاً الناس هناك طول الوكت ما حيقولوا ليك 'ن يقر' مراعاةً لشعورك بالرغم من أنها الترجمة اللغوية المفروض ما يكون فيها حسس .. ده طبعاَ في امريكا ..
أما لوعبرت الحدود ومشيت المكسيك القريبة دي حيث انقليزيتهم زيرو فإنهم سينادونك 'ن يقرو' لأنها الكلمة الموازية ل black بالاسباني ..

Quote: أيضاً ما يقابل كلمة سوداني في اللغات اللاتينية هو Sudanese وبالتالي إذا شخص قال لي يا نـقر فهذا معاناهو أنه يقصد الإساءة لي لأنه نعتني بإسم آخر غير إسمي.

أما كلامك عن أن ما يقابل سوداني باللاتيني هو sudanese فلا أعرف كيف تدعي مثل هذه القول وأنت رجل متعلم؟؟ !! ..

المختصر من كلامي ده هو : أن الإسم 'سوداني' معناه اللغوي في عالم العنصرية 'ن يقرو' شاء من شاء وأبي من أبي .. فطالما الناس فخورة بالإسم 'سوداني' بالعربي مفروض برضو يشعروا بالفخر لو قالوا ليهم 'ن يقروز' باللاوندي.

جبتها من الآخر يا منير

Quote: .. فطالما الناس فخورة بالإسم 'سوداني' بالعربي مفروض برضو يشعروا بالفخر لو قالوا ليهم 'ن يقروز' باللاوندي.

نجيبها ليك من الآخر برضو
نحن فخوريين بإسم سوداني بالعربي
وفخوريين بسودانييز بالإنجليزي
وفخوريين بنقرو بالاسباني
وفخوريين بنقرز
بأي لغة أو لهجة جاءت
شنو ليك ؟؟؟؟؟؟؟؟؟؟؟؟

Quote: وفخوريين بنقرز بأي لغة أو لهجة جاءت شنو ليك ؟؟؟؟؟؟؟؟؟؟؟؟

صدقتك يا زميل
هههه

مخير في تصديقك أو عدمه
بس أقرأ معي كلام الصادق دا مرة تانية وشوف طلعت منه بشنو

Quote: مدلول الكلمة هو المشكلة وليست الكلمة، وأعطيك مثل، هنا في أمريكا ممكن تقول لأي شخص (اسود) Black ودي ما فيها أي شئ، بل حتى في الأوراق الرسمية إنت بتكب (Black) أما مجموعتك الإثنية. نأتي للخلط الذي أثرته أنت، فالشخص الذي يقول I'm black and i'm proud of it هو غير منفصم وإذا قلت له يا Black فهو ما عندو مشكلة. طيب المشكلة وين؟ المشكلة لمن تقول ِنـقر لأنو الكلمة دي ما مقصود بيها اللون، بل مقصود بيها أنك لست (حر) أنت (عـبد) ولذلك فكلمة نـِقر ليست معناها نفس كلمة Black. أيضاً ما يقابل كلمة سوداني في اللغات اللاتينية هو Sudanese وبالتالي إذا شخص قال لي يا نـقر فهذا معاناهو أنه يقصد الإساءة لي لأنه نعتني بإسم آخر غير إسمي.

يا عم عمر

ياخي انتو ليه ما عندكم ثقافة الاستفتاء

ياخي اقترح عمل استفتاء لتغيير الاسـم

وشوف لينا ضمانات كيف يكون (نزيـه) و (شفاف)

ليك تحية يا عظيم


أحمد الشايقي

الأخ منير وضيوفه .
أخص هنا Nasr والصادق
شكرا لاثراء البوست ، وكلامك عن سوء التعبير بالاسم عن المعنى في محلو
ورغم اجتهاد الأخ الصادق اسماعيل في التصدي الهادف للفكرة بقوله ..

Quote: مدلول الكلمة هو المشكلة وليست الكلمة، وأعطيك مثل، هنا في أمريكا ممكن تقول لأي شخص (اسود) Black ودي ما فيها أي شئ، بل حتى في الأوراق الرسمية إنت بتكب (Black) أما مجموعتك الإثنية.

إلا أن لب الخلاف أخ منير أن ما لم ينتبه له اخ الصادق هنا
أن الكلمة المقصودة هي اسم البلد ، هويته ، عنوانه ، شعاره ، كل شئ .
يعني الكلمة هنا ما مجرد ترويسة في ورقة رسمية ولا عنوان فرعي لمجموعة جزئية .
ومدلول كلمة سوداني قد لا تلفت انتباهك ، ولكنها تلفت انتباه غيرك من غير السودانيين
فهي لا تريهم فيك غير لونك ... أو كما قال الأخ منير وفند كلمة نـقرز .
فهل ترضى أن يطلق عليك الآخرون اسم نـقرز أو عبد مثلاً ،
نعود للحقائق ..
السودانيين قد يكونوا سود البشرة ، بيض القلوب
شينين ، حمق ، مكاجرين ، متخلفين عن العالم ..
أها .. رايك شنو يكون أسم البلد
الحمقان ، الشينان ، المكاجراب ، المتخلفون ، الزنوج السود ..
ما كلها كلمات عادية إذا أخذناه بدون ملدول أعطتنا اسم مقبول .
**
مرافعتك الثرة معي أخ منير أرجو مشكوراً أن نقراها مع الإضافة القيمة
للزميل المؤرخ محمد مكى محمد له التحية

Quote: الأخ عمر وضيوفه الأفاضل يقع الكثيرون فى فخ الكلمات ذات النطق الواحد فى اللغات المختلفة وهو ما يسمى بال (false friends ) ,وكلمة sud و cud ,كما هو معلوم تشابهان كلمة سود فى اللغة العربية,لفظيا فى النطق فقط,وتختلف فى المعنى. - كلمة sud. soud. cud من أصل واحد وهو اللاتينى وكلها تعنى الجنوب . - أطلق اللفظ على المناطق التى تقع جنوب الحزام العمرانى لشمال أفريقيا ومصر . وتمتد المنطقة من شرق القارة لغربها .ومن ضمنها السودان الحالى. - أطلق الأغريق إسم إثيوبيا على نفس المنطقة ومن ضمنها السودان الحالى. - نفس المنطقة كانت معروفة للعرب بأسم الحبشه. وعندما غزوا (فتحوا) مصر 641 م.أخذوا عن المصريين الأسم المتداول عن الرومان سود فقاموا بتنيه لفظيا ,دون المعنى الأصلى للكلمة ,وجعلوا المعنى العربى(المنجور) سائدا. - نفس الشئ حدث مع الأتفاقية الشهيرة,بين عبدالله بن إبى السرح مع النوبة.والتى درسناها فى المدارس باسم إتفاقية (البقط )والصحيح أنها إتفاقية الباكت pact والتى تعنى (حلف ) .(A pact is a formal agreement. In international politics, pacts are usually between two or more sovereign states. In domestic politics, pacts are usually between two or more political parties or other organizations..) - البقط ,كلمة لن تجد لها معنى فى اللغة العربية وجميع المصادر التى اوردتها ترجع فقط لتلك الإتفاقية ,كما أجتهد الإستعلائيون ليكون بقط بمعنى عبيد. - كانت اللغة الرسمية (لغة المكاتبات ) فى الدولة النوبية ,بعد القرن الثانى الميلادى ,هى اليونانية ,لغة الكنيسة والدين.ومن هنا كانت المكاتبات والإتفاقيات تتم بها. لذا جاءت كلمة pact . - المنطقة المعنية ,كانت معروفة للدول الكبرى آنذاك (اليونان ومن ثم روما ) فهم من سماها الأراضى الجنوبية. - إن تاريخ المنطقة لم يبدأ بدخول العرب لها ,ولا لغتهم ,التى لم تضف شيئا لها ,بل تم إستغلالها لطمس هوية المنطقة وتراثها اللغوى والثقافى.ومازال أصحاب المشروع الحضارى يفعلون الشئ نفسه.

الأخ عمر التاج .. آسفين يارجل ، جينا داخلين توش واستلمنا البوست ..

الشباب ديل زي ماشايف ، قلنا ليهم ما عندنا مشكلة يسموه سودان بيضان عريان زهجان .. أي حاجة .. لكين الواحد يكون برضو فخور جداُ جداً عندما يقولوا ليهو إزيك يا 'ن يقرو' ..
أها 'سودان هذه'، معناها عند ناس مارادونا 'ن يقرز' .. مافيها أي حاجة .. وبالدارجي كده مدلولها عند معظم شعوب العالم 'عب' ..
أها معناتها الواحد لو قالوا ليهو يا 'عب' ما مفروض يزعل .. ومفروض طوالي يرد : I'am negro and proud of it

لكين الواقع أن مفردة عب دي هي سبب كل حروب السودان ولا مبالغة ..

.
.

بالمناسبة الخلاك تقول علي إرهابي شنو؟؟ أوع أكون مصنف إرهابي في المنبر ده وأنا ماعارف ..

Quote: الأخ عمر التاج .. آسفين يارجل ، جينا داخلين توش واستلمنا البوست ..

آسفين بالأكتر يا حبيب..
الحوش حوشك والبيت بيت بكري أخد راحتك ..

Quote: بالمناسبة الخلاك تقول علي إرهابي شنو؟؟

توارد خواااااطر .... لاغير
وكمان عجبتني نظارة الشمس بتاعتك .

Quote: أوع أكون مصنف إرهابي في المنبر ده وأنا ماعارف

كنت ..
ولكن لله الحمد والمنة
بكري وجماعتو تابوا علي .

+كدى بالمرة شوف لينا معاك كمان = كلمةزول دى =
شايف عندك افكار جريئة.. امكن نتحل من مشكل السودان القديم .. وتشوف لينا حاجة نيو فاشون.

Brother Omer Altaj

Stay black

عمر التاج.

لقد غنى الفنان الكبير الراحل جيمس براون من قبل وقال:

Say it loud: I'm black and I'm proud!
Say it loud: I'm black and I'm proud!
One more time!
Say it loud: I'm black and I'm proud!

Quote: ما وريتونا ياجماعة رأيكم في جمهورية 'الن قرز' الديمقراطية .. السودان جمع أسود = 'الن قرز' .. كلمة يعاقب عليها القانون ويشطبها ليك فلتر المنبر العام بإعتبارها نبذ أو خادشة للحياء ..

منير
الكلام الفوق دا ما عندو أي اساس من الصحة..اسود ما معناتا عبودية..رغم أن اصحاب البشرة السوداء استعبدوا كثيرا بالذات في التاريخ الحديث..
لاكين زمان كان البيض على مر التاريخ-بما فيهم العرب- يستعبد بعدهم البعض أكثر مما فعل بالسود.
الموالي و الجواري بالآلاف المؤلفة في قصور خلفاء العباسيين كان جلهم من اصحاب البشرة البيضاء
كلامك سوداني= ن يقر كلام فااارغ ليس الا

Quote: كلامك سوداني= ن يقر كلام فااارغ ليس الا

غايتو بعد المنطق السكبناهو هنا وتكون لسه ما فهمت حاجة ، أكون أنا غلطان لو حاولت أضيع زمني و أبذل معاك مجهود تاني ..

Quote: لفظ (السودان) لا أدري من أطلقه علينا

اطلقوة السود اصحاب هذا الوطن
لنهم كانوا يدركون ياتون مثل امثالك
علي هذا الوطن العزيز
من يريد تغير الاسم
يذهب في يغير في الجزيرة العربية
هذا ارض السود السودان

دولة سنار

هو اسم السودان دا ذاتو اسم عنصري

يا منير معاك للطيش في الموضوع دا والفورة مليون

Quote: الشباب ديل زي ماشايف ، قلنا ليهم ما عندنا مشكلة يسموه سودان بيضان عريان زهجان .. أي حاجة .. لكين الواحد يكون برضو فخور جداُ جداً عندما يقولوا ليهو إزيك يا 'ن يقرو' .. أها 'سودان هذه'، معناها عند ناس مارادونا 'ن يقرز' .. مافيها أي حاجة .. وبالدارجي كده مدلولها عند معظم شعوب العالم 'عب' .. أها معناتها الواحد لو قالوا ليهو يا 'عب' ما مفروض يزعل .. ومفروض طوالي يرد : I'am negro and proud of it

أولا حاجة المعلومة دي ما صاح وأتمني أنك أوردتها هنا بسبيل الخطأ غير المقصود

أها 'سودان هذه'، معناها عند ناس مارادونا 'ن يقرز'

الاسود عند الاسبان نقرو وليس نقر. تطورت كلمة نقر في أمريكا الشمالية وإستخدمت للاساءة لأهلنا الافارقة السود.
إذا كنت عايز تقنعنا إنو كلمة سودان تتساوي في المدلول مع (.........)ز فقد فشلت في هذا
ورغم ذلك فأنا كزنجي وفخور بما خلقني الله عليه أقبل أي كلمة توصف لوني مهما كانت
وأرفض أي كلمة مقصود بيها الاساءة
يعني لو جاءني من يقول يا عربي بقصد الاساءة فحأرفضها منه
وبالمناسبة حتي الآن فإن كلمة عربي عند ناس الشمالية من دناقلة وشايقية ومحس تعني التقليل من الشأن بل والإساءة أحيانا كثيرة

والجزء دا من كلامك فيه منطق غريب
معناتها الواحد لو قالوا ليهو يا 'عب' ما مفروض يزعل .. ومفروض طوالي يرد

علاقة عبد بأسود ولا سوداني شنو؟ في ناس في العالم دا في فهمهم أي أسود يعني عبد
وتاريخيا الكلام دا ما صاح
فقد أسترق الناس من كل الاجناس وكل الالوان
وباع أرطأة وهو أحد قواد الحجاج بن يوسف القرشيات في أسواق النخاسة في دمشق وبغداد
وإنت ذاتك في نص هذا الكار لانك كما أري أسود مثلي. هل سترضي إذا لاقاك واحد وقال يا عبد
كراعك في رقبتك ترضي بكلمة عبد لمجرد إنك جاي من بلد إسمه السودان؟؟؟
ما هو إنت طول عمرك سوداني، هل رضيت يوما بكلمة يا عبد؟؟؟؟

وهل تعتقد أنك أذا غيرت إسم بلدك لجمهورية الاندلس العربية البيضاء الاخرين حيصدقوا وينسوا حكاية إنك أسود؟
يعني الجاي من شاد ولا مالي ما حيقولوا ليهو يا عبيد لمجرد إنه إسم بلده ما فيه السودان؟؟؟؟

Quote: يا أخي التاريخ ده ما مليان أسماء لامن مدفق ما يدونا منه غير السود (ان) ؟

وبدل عزة فى هواك
نخليها
سوزى فى هواك!
وهكذا دواليك
عزة وخليل ليكم ليكم غناى
يا سودانى يا مولاى
انا لو افوتك وا شقاى
افقد سماحة الدنيا
واضوق قساى!

ماذا ستفعلون بكل هذا الغناء الوطنى الذى يتضمن اسم السودان!
بدل السودان يجب ان يطلق علينا اسم الحمران!
من حمار وليس احمر!
جنى

الاسلامويون مصيبة السودان الكبري
واحدين يقولوا ليك هذه الخرطة ليست مقدسة لدينا
وكأن الوطن بكل هذا الثراء والاتساع والجمال مجرد خرطة
وواحدين يقسموه ويشرذموه ولا يرجف لهم جفن
وواحدين منتظرين متين يتقسم عشان الاسم ذاتو ما عاجبهم
دايرين إسم أحلي

تعرف أول مرة يقع لي كلام عمار آدم أن الوطنية لا مكان لها في فكر الاسلامويين
الاسلامويين هذه تعني بالنسبة كل الحركات الاسلامية التي خرجت من عباءة حركة الاخوان المسلمين المصرية من لدن الاخوان المسلمين السودانيين وحتي المؤتمر الوطني

Quote: ورغم ذلك فأنا كزنجي وفخور بما خلقني الله عليه أقبل أي كلمة توصف لوني مهما كانت وأرفض أي كلمة مقصود بيها الاساءة

يانصر .. ياخي أنا فكرتي بسيطة ما محتاجة ليها فورة زاتو .. وهي أن 'سودان' صفة لقوم سود .. مافيها حاجة .. أوكي .. ؟ طيب نجي نترجمها نلقاها 'ن يقروز' .. وكلمة 'ن يقرو' إشتُقَّت منها 'ن يقرز' .. وارتبطت كلمة 'ن يقرز' بالعبودية وأصبح مدلوها مثل كلمة 'عب' بالدارجية السودانية .. وتم تغييرها في امريكا ل'بلاك' وحتي 'بلاك' زاتها بقوا يشوفوها offensive وبدأوا يستعملوا بدلها colored أو يقولوا ليك people of color .. يعني إرتباطها بالعبودية جعلها كلمة حساسة يتفاداها العالم لأنها تؤدي للمشاجرات والحرب .. برغم أنها في أصلها صفة لون عادي زي أي لون ..
وزي ما قلنا العبرة بالعبارة ومنطوقها وتراجمها .. هسه لو قالوا ليك يا'سوداني' تقول افتخر، يقولوا ليك يا 'أسود' تطنطن وتقول الزول ده يكون قاصد يحقر بي، أما لو قال ليك يا 'ن يقرو' تثور عديل .. بالرغم أن 'أسود' و'ن يقرو' هما نفس كلمة 'سوداني' .. فمفروض رد فعلك في كل الحالات يكون زي بعضه .. وقع ليك الكلام ؟؟ ..

مفارقات اللغة ذكرتني واحد صاحبي أيام الجامعة علَّق علي طالبات الطب وهن طالعات من محاضرة .. قال أسه بنات الطب ديل الواحدة ممكن تديك محاضرة لمدة ساعة عن التكاثر والأعضاء التناسلية ، لكين لو أديتها مليون جنيه وقلت ليها قوليها بالعربي الدارجي ما تقولها ..

أهو ده مثال لإنفصام اللغة البنتكلم عنه ..

كويس يا منير

Quote: هسه لو قالوا ليك يا'سوداني' تقول افتخر، يقولوا ليك يا 'أسود' تطنطن وتقول الزول ده يكون قاصد يحقر بي، أما لو قال ليك يا 'ن يقرو' تثور عديل .. بالرغم أن 'أسود' و'ن يقرو' هما نفس كلمة 'سوداني' .. فمفروض رد فعلك في كل الحالات يكون زي بعضه .. وقع ليك الكلام ؟؟ ..

طيب يا منير
بتقول أن ن يقرز وأسود وسوداني كلو واحد وإنت مستغرب إنه إذا واحد قالك سوداني ما بتزعل لكن كان قال (.........) بتزعل؟
فهمت صاح؟
طيب إنت بذات نفسك هل بتزعل إذا في واحد قال سوداني؟؟؟؟ وأذا زعلت بتزعل ليه وإذا ما زعلت كما ما زعلت ليه؟؟؟؟
أكرر ليك أنا كلمة أسود ما بتزعلني بفتخر بيها كلمة ن يقر أو كلمة عب إذا من صديق بقبلها وإذا قيلت بقصد الإساءة بزعل
عمرنا نفخر بسوداني الجوه وجداني وفجأة تقلبوه شتيمة عديل كدا؟؟؟

الكلام البنقولوه دا الصعب فيه شنو؟؟؟؟؟
وإنت من ناس كانت طارت برضو غنماية
المهم لك ان تفخر بما أنت عليه سوداني وأسود ون يقر ون يقرو. وإذا كان بعض الاعراب الأوغاد قد أستعبدوا بعضا من أجدادنا وحبوباتنا فالمجرمون هم وليس أجدادنا
أجدادنا كانو ضحية ولا يجوز لوم الضحية ولا حتي الخجل من ذلك
وذلك تاريخ إنقضي بخيره وشره
ونحن نريد أن نبني مستقبلنا بإقامة دولة ومجتمع عادلين كل الناس فيه متساويين بما في ذلك أحفاد الترك والذين أذلوا أجدادنا ذلة ما بعدها ذلة
وبرضو الصعب في دا شنو؟؟؟؟؟؟

+






ليس بخفي أن بعض السودانيين يشمئذون من الواقع الذين خرجوا
منه ونتيجة لعدم معرفة أصل وجودهم تناقصت الهمة بدواخلهم حيث أصابهمالخنوع
وصيطرت عليهم الدونية الي أن بات البعض يتطلع للأنتماء خارج اطار
حدود الوجود الطبيعي حسب منطق الأشياء. ولا غرو .... فقد بدأ السودان الحديث
تاريخه بانكار الرعيل الأول للسودان وجنسيته. صاحب البوست لم يأت بجديد؛
فقد سبقه أجداده. معروف وموثق أن في تاريخ الجنسية السودانية هناك من رفض
أن يدعي سوداني وكان يكتب في الجنسية اسم القبيلة بدلا عن سوداني. هولاء
كانوا ومازال البعض منهم يسعي حسيسا لتبرئة نفسه من الأنتماء للسودانيين أي
السود. شاءت الأقدار أن نكون شهود عيان لهؤلاء المرضي الذي وصل بهم المرض
لأخفاء نسبهم ان كان ينتمي لسودانيين أصلاء. يفعلون ذلك وفي عقلهم الباطن
استحقار وكرها لزواتهم.
كل هذا نتيجة للقمع والأضطهاد وعدم معرفة الزات أو للأنقطع الجيني أو الموروث
الثقافي المتسلسل؛ ذاك الفراغ حل محله حبا للزات بمعطيات مشوهة وتاريخ مغلوط.
كل ما نراه أمامنا في واقعا التعيس من دعاوي هؤلاء هو ما يريده المستعمر الغاشم
الذي سلب لبهم ولقنهم ايمانا غير ايمانهم وواقعا غير واقعهم ؛ بل وتاريخا غير تاريخهم.
هنا أصبحنا أمام انسان يفقد الأحساس بزمانه ومكانه’ لذا ليس غريبا أن نري من يسعي
لأنتماء خارج حدود الرقعة الجغرافية التي كانت سببا في التكوين البيولجي والتاريخي.











دنقس.

Quote: Say it loud: I'm black and I'm proud! Say it loud: I'm black and I'm proud! One more time! Say it loud: I'm black and I'm proud

لئن لم يكن لهذا البوست فائدة
غير أن جعل دينق يغني لكفته

+












دنقس.

يا منير.

كعادتك دائما.

تمارس في الاستهبال وتلف وتدور في الفارغة وتتهم الناس بأنهم ما فاهمين حاجة، وأنت اللي فاهم كل حاجة.

+
















دنقس.

Quote: غايتو بعد المنطق السكبناهو هنا وتكون لسه ما فهمت حاجة ، أكون أنا غلطان لو حاولت أضيع زمني و أبذل معاك مجهود تاني ..

منير
ما تضايق ياخ
ياخ إنت من الناس - القلائل - البقرا مداخلاتم في المنبر دا..رغم شتارتك هنا و هناك!
لاكين أقول ليك شنو؟؟ كلامك ويكا ما تلايقو..يعني حسي مستراح..يقال أن اصلها لغوياً المكان الاخضر الجميل..و معروف ماهو معناها لدينا الآن!
تعال سمي لي منطقة مستراح..وللا شارع مستراح و أقعد نظًر للناس و قول ليهم: لغوياً معناتا المكان الأخضر!!
خلاص السودان معروف للقاصي و الداني تعريف بلد..و سوداني لا يعني لأي طفل في أي مدرسة أبتدائية في العالم سوى الاأنتماء لتلك الرقعة الجغرافية من العالم
تجي تقعد تنظر فينا: أصلوشنو و فصلو شنو..و المفروض نتقزز من الاسم دا عشان بعد ما لفيت ليك لفة جبت معناهو العبوديةّ!!!
أها لي حق أقول ليك كلامك فارغ وللا لا؟
مع أحترامي ليك طبعاً

يازياد جعفر .. كيف ما اتضايق ياخ والبحر قايم زي ده .. هههه ..
يا زياد أنا وجهة نظري شرحتها بأسهل أنواع البساطة - وبالإستنتاج الرياضي وبعد شوية بالبوليان الجبرا .. كدي راجع آخر رد لي علي أخونا نصر القال الفورة مليون ده ..
يااخواننا جبنا ليكم المعاني اللغوية وفذلكاتها التاريخية وابعادها السياسية والاجتماعية .. تاني الواحد يتقطَّع ليكم يعني؟؟ يقلب هوبا؟؟..
أها بعد ده كله قلنا ليكم أنا شخصياَ ما عندي مشكلة يقولوا لي سوداني سوادني اسود 'ن يقرو' نقناق .. لأنو العارف عزه مستريح - شايقي اصلي احمدالله - لكين المشكلة في الproud بالعربي ويتعقد باللاوندي ..
.
.

قلت لي شتارتي .. ههههه .. أسمع .. كلما تلقي لي كلام مشاتر حك راسك شوية يمكن فاتت عليك حاجة فيهو.

بعدين إنت إسم زياد ده جبته من وين؟؟ من مضيق جبل طارق والأندلس؟؟
الاسم ده ماحصل لاقاني في السودان .. غايتو لو ما جعفر وعبدالله ده كنا قلنا ما سوداني ..

Quote: يا اخ السودان دا عديل كدة ما فيهو زول أسود أمسك الجماعة الانت شايفهم سود وعاين ليهم في التلفزيون القومي والعجب في (اليوتيوب ) وبدون مكياج .. والله صورهم ماشاء الله ، كلهم اتلمعوا وفتحت بشرتهم السودة الشايفة فينا دي يا حبيب مجرد (حبة) غباشة وتزول . وبعدين ياخ نحن ما أسود ناس في العالم ... اسود بشرة عندنا بتكون ابيض من أي مواطن في اوغندا أوكينيا وهلم جرا .. مالهم ديل ما سمو نفسهم السودان ؟

عذرا ً عمر التاج

و لكنك انسان مسكين و تستحق الشفقة

انصحك بمراجعة معالج نفسي ، ربما يريحك من بعض عقدك


لا حولا و لا قوة إلا بالله

شكراً أخت سلمى
ونصيحتك مقبولة
فقط أرجو مدي باسم أقرب معالج نفسي
قمت بزيارته من وتأكدت من قدرته على حل مثل هذه العقد ..

أخونا في الله ثم السودان دنقس .
السلام عليكم .
وشكرا للفيديوهات خاصة أنها ابيض بأسود

Quote: بدأ السودان الحديث تاريخه بانكار الرعيل الأول للسودان وجنسيته. صاحب البوست لم يأت بجديد؛ فقد سبقه أجداده. معروف وموثق أن في تاريخ الجنسية السودانية هناك من رفض أن يدعي سوداني وكان يكتب في الجنسية اسم القبيلة بدلا عن سوداني.

السودان الحديث ده بدأ عندك متين ؟
وقبل ما يكون حديث أو (سودا ن جديد) كان شنو ؟
وليه الناس الجابت السودان أنكرت الاسماء القديمة ..
(كوش ، مروي ، سنار ، المهدية ، العبدلاب ، الفونج ، الفور، النيل ، دار جعل ... الخ )
وهل انت الاخترت اسم السودان أم في زول قال ليك يا سوداني وانت وافقت ..
وهل - لما وافقت - فكرت ليه قاليك ياسوداني وما قال يا طيباني مثلاً .
وهل لو الزول ده قابل في الوقت داك واحد من عوائل الاقباط أو الرشايدة كان بقت علينا ياسوداني
وهل .. وهل..
أما كلامك التحت ده ففعلا كلام شاهد عيّان .

Quote: شاءت الأقدار أن نكون شهود عيان لهؤلاء المرضي الذي وصل بهم المرض لأخفاء نسبهم ان كان ينتمي لسودانيين أصلاء. يفعلون ذلك وفي عقلهم الباطن استحقار وكرها لزواتهم.

ونهديك الأغنية البيضاء الفوق ديك مع أمنياتنا لك والأخ دينق
بداوام الغناء في هذا البورد بدلاً عن إثارة المشاكل .

Quote: شكراً أخت سلمى ونصيحتك مقبولة فقط أرجو مدي باسم أقرب معالج نفسي قمت بزيارته من وتأكدت من قدرته على حل مثل هذه العقد ..

أولا ً
اتمنى ان لا تناديني ب(أخت) ، أعمل زي ما انا عملت معاك و ناديني بأسمي طوالي ، لأنو انا ما بعرف انافق و بالتالي ما حاقدر اعتبرك اخوي ، لأنو انا اخواني يا عمر ( سودانيين ) بشراتهم مختلفة الالوان و كذلك لهجاتهم و دياناتهم و مجموعاتهم العرقية ، و لكنهم جميعاً سودانيون ، ( وطنيتهم ) يا عمر رفعتهم عن مقارنة انفسهم بالاخرين و الاحساس ب(الدونيّة) لمجرد ان البعض يعتبر ان لون بشرتك يمكن ان يؤثر على احترام الاخرين لك و يحدد قيمتك ويقعد من همتك .

Quote: شكراً لكل المتداخلين ومرحباً بأي رأي مخالف ... فحتماً ساعود لآرائكم في ثنايا طرحي... أو منفصلين . قديما جاء في الأثر قل لي ما اسمك أقول لك من أنت ؟ فبما أن الاسم هو عنوان كل شئ يلخص مكوناته ويمثل أهدافه ويحمل شعاره فدعونا نحلل كلمة (السودان) ونعيدها ونبحثها في التاريخ والدين والجغرافيا عسى أن نغير واقعا أقعد هممنا وقيمنا ردحاً من الزمان .

اخوتي يا عمر يجدون في كلمة ( السودان ) اكثر من مجرد دلالاتها اللونية ، فهم السودانيون اللذين يحملون هذه الكلمة و يعبرون عنها ، بعزتهم و كرامتهم و افتخارهم بانفسم و تصالحهم معها و ترفعهم عن توافه الامور _ لون بشرتك ، مجموعتك العرقية ، ديانتك _ فجعلو بذلك كلمة سودان و سوداني تعنيان كل تلك الامور ، و التي لا ترى منها انت بنفسيتك الدونية غير لون بشرة تسعى جاهداً لنفيه عنك .

Quote: عشان كدة قلنا أدو( لونا) معاكم فرصة

Quote: كدي خليهم عربان السودان ... شوف بني ضنقل والكنوز والحلفاويين والمحس والزاندي والنوير والأدروبات وأجزاء واسعة من الدينكا والشلك والزرقة وغيرهم وغيرهم ... وريني البشرة الاكتر بتاعة السود والله ( التانيين) ؟

إخوتي يا عمر فرضوا على الاخر احترام اسم بلدهم ( السودان ) لأنهم إحترموه و لم يخجلو منه و جعلو منه عنواناً للعزة و الكرامة ، الشئ اللذي لن تستطيع ان تفعله او حتى تتخيله بعقدتك اللونية هذه .

Quote: ومدلول كلمة سوداني قد لا تلفت انتباهك ، ولكنها تلفت انتباه غيرك من غير السودانيين فهي لا تريهم فيك غير لونك ...

غايتو بالجد الله يشفيك

و اتمنى تماما انو تلقى ليك موضوع تاني تناقشو بعقدك دي
لأنو السودان اكبر كتير من كدة

Quote: ها بعد ده كله قلنا ليكم أنا شخصياَ ما عندي مشكلة يقولوا لي سوداني سوادني اسود 'ن يقرو' نقناق .. لأنو العارف عزه مستريح - شايقي اصلي احمدالله - لكين المشكلة في الproud بالعربي ويتعقد باللاوندي ..

تعرف يا منير بالرغم من أنه اصلي القبلي بيت عز و أصل (زي ما بيقولوا) , حتى بمعايير أولاد البحر فيما بينهم - إلا انني كنت أرفض دوماً الفخر بأصلي القبلي أو افخر بأني ود ملوك و عمد و مشايخ زي ما بيقولوا - بل أصر انو الواحد المفروض يقول أنا سوداني و كفى..كفاه فخراً بذلك..و قالها زمان خليل فرح رطَب الله ثراه (ما بدور عصبية القبيلة)..فانظر اليوم الى اي درك انحدرنا!!..

Quote: بعدين إنت إسم زياد ده جبته من وين؟؟ من مضيق جبل طارق والأندلس؟؟ الاسم ده ماحصل لاقاني في السودان .. غايتو لو ما جعفر وعبدالله ده كنا قلنا ما سوداني ..

الحاجة الله يديها الصحة و العافية هي من أختار الاسم...لماذا؟ سوف أسألها من أجلك..(تعرف ما سألت اطلاقا قبل كدا)
و كان جدي لأمي لا يحبه لأنه حسب تعبيره (أسم أموي) وأنه كان المفرض يسموني أسم هاشمي حسب رأيه!
و على جيب السيرة..مٌكلم الجميع اني حاجز اسم طارق لأول إبن لي, لو الله مدَا في أيامنا و أدانا الذرية و قبلها المرا الرضية

الرفيق العزيز .. زياد جعفر
مساء سعيد ..
قلت خلاص السودان معروف للقاصي و الداني تعريف بلد ، وزمان كان تعريف منطقة وسط افريقيا بأكملها ، وما أختاروه لأفريقيا إلا لأنها سوداء ، يعني ما هو الا تعريف عنصري بحت لشعب كان لا يملك قرار اسمه.
كدي أتخيل معاي دولة أوربية كان ممكن تكون اسمها السودان .. اوع تقول السويد .

Quote: لاكين زمان كان البيض على مر التاريخ-بما فيهم العرب- يستعبد بعدهم البعض أكثر مما فعل بالسود.

الرق عند العرب وغير العرب قبل الاسلام كان مظهر اجتماعي يرمز للقوة والثروة ، وجاء الاسلام وأبطله حتى لم يبق منه إلا آثاره القديمة في نفوس ومجتمع المسلمين ، أما العبودية التي انطلقت من أوربا قبل عصر النهضة وحتى تاريخنا الحديث ، فلم تتوجه سهامها إلا للعبيد السود في أفريقيا وأمريكا ، ولم نسمع إطلاقاً بعبد أبيض في تاريخنا الحديث حتى عاصرنا عهد حملات التفرقة العنصرية التي قادها الزنوج في أفريقيا وأمريكا وليس البيض ، مما يدل على معنى مختلف للعبودية زمان والآن .
وبعدين زي ما قال الأخ منير
ما تراكا طلعت أندلسي من عندينا
مالك رافض التغيير نحو الأفضل

Quote: إلا انني كنت أرفض دوماً الفخر بأصلي القبلي أو افخر بأني ود ملوك و عمد و مشايخ زي ما بيقولوا - بل أصر انو الواحد المفروض يقول أنا سوداني و كفى..كفاه فخراً بذلك..و قالها زمان خليل فرح رطَب الله ثراه (ما بدور عصبية القبيلة)..فانظر اليوم الى اي درك انحدرنا!!..

والله يا زياد نحن زاتو قصة الفخر بالأصل والقبائل وما ادراك لم تكن عندنا إلاّ كإحساس شخصي لا يتعدي للآخرين .. نحتفي بأغانينا وطمبورنا داخل بيوتنا - ونطلع الشارع نكون سودانيين بلا فرز ولا استعلاء ولا دونية ... ولكن البركة في ثقافة السودان الجديد التي نبشت القبلية والجهوية والعنصرية وحولت صراع الحياة للألوان والسحنات والقبائل والجهويات .. فأصبح كل زول يتحسس أصله وفصله ويشوف ناسه وحلفاءه وأعداءه .. لأن ناس السودان الجديد لا ينظرون لفكرك وخٌلُقك ، بل لخِلقتك وشكلك وإسمك وجهتك .. والمرجعية الرئيسية عندهم هي المراية .. الجماعة يقولوا ليك عاين لنفسك في المراية عشان هم حيقرروا حالك إن كنت معهم أو عدوهم .. فإذا لقوا شكلك ودعرب فأنت إذن من المغضوب عليهم أهل الحظوة بالميلاد حتي لو كنت بتبيع مساويك - ولو حصلت كعة ولاقوك في الشارع حيقضوا عليك حسب شكلك - أما لو لم تكن تبدو كذلك فأنت إذن مهمش ومظلوم حتي لو كنت ملياردير ..

أهو الواحد في الجو المتخلف ده اضطر يرجع لتصنيف البهيمي بتاع القرون الوسطي بتاع قبيلتي وقبيلتك .. خاصة لمن يجيك واحد زي الموهوم دنقس الذي لا يُعرف له أصل ويقعد يطيح في الناس ويفتي في أصول وهوية الآخرين ..

لله درك يا سلمي
سودانية أصيلة وبت بلد
وإذا كنت أنت أنموذجا للقادم من أجيال السودانيين فلا خوف علي السودان
كان إتفرتق إنتو بتلموا
you made my day
الله يعدلها عليك محل ما تقبلي

يا منير

Quote: أها بعد ده كله قلنا ليكم أنا شخصياَ ما عندي مشكلة يقولوا لي سوداني سوادني اسود 'ن يقرو' نقناق .. لأنو العارف عزه مستريح - شايقي اصلي احمدالله - لكين المشكلة في الproud بالعربي ويتعقد باللاوندي ..

لفيت ودورت ولفيت ودورت وفي الاخر لم تجد ما تفخر به إلا قبيلة ؟؟؟؟
مش كان أحسن تفخر بسوداني الجوا وجداني بريدوا؟؟
بدلا من أن تقبلها علي مضض؟؟
قلت لي شايقي؟؟؟
برضو سوداني وأسود ون يقر وممكن تفخر بكل هؤلاء
وما تبهت ناس السودان الجديد أنهم هم من دفعك للتعالي بقبيلتك
العارفه عنهم أن كل الناس لديهم سواء
أسودهم علي بنيهم علي أخضرهم
وسواء دي بالذات في ناس شوية في السودان ما دايرنها
لانها بتلمهم مع العبيد
وبتكون فهمت ليه في ناس جارين من إسم السودان
وكانو بيختاروا القبيلة بدلا عنه في فورمات شهادة الميلاد

Quote: لفيت ودورت ولفيت ودورت وفي الاخر لم تجد ما تفخر به إلا قبيلة ؟؟؟؟ مش كان أحسن تفخر بسوداني الجوا وجداني بريدوا؟؟ بدلا من أن تقبلها علي مضض؟؟

والله يا ناس السودان الجديد إنتو العقد بتاعتكم عينة !!! .. ياخي أنا وين اتفاخرت بقبيلة؟؟ يعني الواحد لو ذكر قبيلته ساي تعتبره تعالي واستعلاء ؟؟ .شنو يعني لم تجد ما تفاخر به؟؟ . لا حول ولا قوة إلاّ بالله ..

في زول قال إنه ما أسود؟؟ في زول قال إنه أبيض؟؟ في زول قال إنه ما سوداني؟؟ ..
ياخي حيرتونا .. البيتناقش معاكم زي الماشي في حقل ألغام .. أقل كلمة تعمل ليكم حساسية وكاروشة .. ياخي أنا شايقي وعربي وافريقي .. وسوداني 'ن يقرو' .. كل العناصر البتخليني مية المية .. شوفوا إنتوا ناقصاكم من الخلطة دي شنو ومخلياكم تتحسسون من أي شئ ..

أها ياخي أنا 'سوداني' أنا 'ن يقرو' .. إنت قول معاي أنا 'سوداني' أنا 'ن يقرو' .. قول .. قول اتحرر من عقدتك شوية بالتكرار بصوت عالي .. قول ..

Quote: لله درك يا سلمي سودانية أصيلة وبت بلد وإذا كنت أنت أنموذجا للقادم من أجيال السودانيين فلا خوف علي السودان كان إتفرتق إنتو بتلموا you made my day الله يعدلها عليك محل ما تقبلي

عارف يا ناصر يا ( اخوي )
انا بستغرب جداً تتفيه بعض البشر لسودانيتنا و جعلها موضوع لنقاش ما
في حين انو الواحد ما يرضى تناقشو في إنتماءه للقبيلة الفلانية او الجد الفلتكاني
ويتنفخ فيك ويبقى ليك قدر الليلة و بكرة و بعده و الموضوع بالنسبة ليهو بكون غير قابل للنقاش ولا حتى التلميح
و يجي بعد داك بكل بساطة يقول ليك شنو

Quote: دعونا نكتسب فائدة واحدة من الانفصال إذا ووقع فينا .. وفي هذا اقترح استغلال هذه السانحة التاريخية لازاحة اسم ( السودان ) واستبداله باسم أكثر شمولية للمعاني ودلالة على التفاؤل والنماء ؟

عليك الله بس بالله شوف كلمة ( إزاحة ) دي !!!!!!!!!!!!

لله في خلقه شؤون

شكراً لكل المتداخلين
وماشاء الله .. لقيتكم في الوطنية مابتتلحقو ...
و البسمع دفاعاتكم الوطنية عن الاسم يقول السودان في شهر يناير حا يتوحد مع تشاد ويوغندا وكينيا
على كل حال كانت الفكرة لم تنبع من عنصرية فينا ولكنها جاءت متماشية مع التغيير المتوقع
ولب الفكرة هي استدعاء كافة المعاني الحية لاسم يستبدل وصم هذا الشعب واختزاله في مجرد لون واحد .
ومسودة المرافعة كانت كما يلي :
دعونا نكتسب فائدة واحدة من الانفصال إذا ووقع فينا ..
وفي هذا اقترح استغلال هذه السانحة التاريخية لازاحة اسم ( السودان )
واستبداله باسم أكثر شمولية للمعاني ودلالة على التفاؤل والنماء ؟
.
.
.
من يثني ؟
**
لفظ (السودان) لا أدري من أطلقه علينا
ولكن يقيني أننا كشعب لم نشارك في اختياره
وإلا لكان اسما أكثر تفاؤلاً وأريحية ومحبة
وأكثر عمقاً ودلالة للمعاني العظيمة التي يتسم بها هذا الوطن
لماذا نختصر كل إرثنا وحضارتنا وتاريخنا وشيمنا وقيمنا
في لفظ ضعيف يرمز أول ما ينطق به على لون للحزن والحداد ؟

**
نعم السواد ليس عيباً
ولم يزد الماس إلا ألقاً وتوهجا
ولكن لماذا نسمي انفسنا بلون معين
وهناك من شعوب العالم من هم أكثر ميلاً للالون
ولم ينعتهم أحد بلون بشرتهم ( سوداء كانت أم بيضاء أم حمراء )
أليس النعت بالألوان نوعاً من العنصرية والتنابذ المنهي عنه ؟
**
ثم من قال أننا شعب أسود ؟
ومن قال أن اللون الاسود هو لون السواد الاعظم فينا
نعن ، فينا سود البشرة في شمالنا وشرقنا وجنوبنا وغربنا
ولكن حتى في الولايات التي تعتبر تماساً لزنوج أفريقيا
تغلب فيها البشرة السمراء والفاتحة ، ولعل قبائل الزاندي والحمر والرشايدة
كمثال لقبائل التماس أكثر بياضاً في بشرتهم من عرب الجزيرة العربية
ثم أليس اللون الأسمر هو الغالب في وطننا هذا ؟
ألم يتغنى شعراء بلادي على مد تاريخنا بالسمراء والميامين السمر ؟
ألا يوجد ضمن هذا الشعب من هم بلون بشرة غير السوداء ؟
فلماذا – اخوتي - لا نختار اسما لا يشف عن لون .

**
فشكراً لكل من وافق الفكرة أو رفضها
وتحية لمن أبدى برأيه سلباً أو ايجاباً ..
وتحية خاصة لمن فاتنا التعليق على مداخلاته
فقد كانت موقع تقدير وموافقة في محتواها لموقفي
وعذراً لكل من أصابه بعض رشاش الخيط أو ظن بذلك
نقطة .
بوست جديد !

قالت سلمي

Quote: عارف يا ناصر يا ( اخوي )

مع إنه أنا ممكن أكون عمها
لكن يا سلمي إذا جاءت أخوي دي من الكلام القلتيه دا فمقبولة جدا

Quote: اخواني يا عمر ( سودانيين ) بشراتهم مختلفة الالوان و كذلك لهجاتهم و دياناتهم و مجموعاتهم العرقية ، و لكنهم جميعاً سودانيون ، ( وطنيتهم ) يا عمر رفعتهم عن مقارنة انفسهم بالاخرين و الاحساس ب(الدونيّة) لمجرد ان البعض يعتبر ان لون بشرتك يمكن ان يؤثر على احترام الاخرين لك و يحدد قيمتك ويقعد من همتك .

Quote: اخوتي يا عمر يجدون في كلمة ( السودان ) اكثر من مجرد دلالاتها اللونية ، فهم السودانيون اللذين يحملون هذه الكلمة و يعبرون عنها ، بعزتهم و كرامتهم و افتخارهم بانفسم و تصالحهم معها و ترفعهم عن توافه الامور _ لون بشرتك ، مجموعتك العرقية ، ديانتك _ فجعلو بذلك كلمة سودان و سوداني تعنيان كل تلك الامور ، و التي لا ترى منها انت بنفسيتك الدونية غير لون بشرة تسعى جاهداً لنفيه عنك .

Quote: إخوتي يا عمر فرضوا على الاخر احترام اسم بلدهم ( السودان ) لأنهم إحترموه و لم يخجلو منه و جعلو منه عنواناً للعزة و الكرامة ، الشئ اللذي لن تستطيع ان تفعله او حتى تتخيله بعقدتك اللونية هذه .

يا سلمي
بطنا جابتك والله ما بتندم

قال منير

Quote: والله يا ناس السودان الجديد إنتو العقد بتاعتكم عينة !!! .. ياخي أنا وين اتفاخرت بقبيلة؟؟

وتحت هنا تلقي الكوت المعني

Quote: لأنو العارف عزه مستريح - شايقي اصلي احمدالله -

دا إذا ما كان تفاخر فبالله أعذرنا لسؤ الفهم
وجاءت في السياق دا

Quote: أها بعد ده كله قلنا ليكم أنا شخصياَ ما عندي مشكلة يقولوا لي سوداني سوادني اسود 'ن يقرو' نقناق .. لأنو العارف عزه مستريح - شايقي اصلي احمدالله - لكين المشكلة في الproud بالعربي ويتعقد باللاوندي ..

ففهمنا أنك تقبل بسوداني وأسود علي مضض لكن عزك المريحك إنك شايقي اصلي والحمد لله
أهلنا الما متعلمين كانو بخجلوا من الزول البيذكر أسم قبيلته، كمان معاها أصلي والحمد لله.... وبرضو دا تفاخر
يعني التفاخر دا إلا يكون
نحن أولاد بلد نقعد نقوم علي كيفنا؟؟؟؟؟

وبعدين طوالي لصقت فين ليبل ناس السودان الجديد.... يوم متين شفتني قلت أنا من ناسهم؟؟؟
بتفق معاهم في حاجات كثيرة زي دولة المواطنة ومساواة الناس السودانيين غض النظر عن لونهم ولغاتهم ودينهم
وأختلف معاهم في حاجات تانية أهمها وسائل تحقيق دولة المواطنة
كان داير ليك ليبل تختي قدام إسمي : السودان
الوطن الواحد ما قد كان وما سيكون
لا قديم ولا جديد
الوطن الخير الديمقراطي

وقال منير

Quote: ياخي أنا شايقي وعربي وافريقي .. وسوداني 'ن يقرو' .. كل العناصر البتخليني مية المية .. شوفوا إنتوا ناقصاكم من الخلطة دي شنو ومخلياكم تتحسسون من أي شئ ..

من الخلطة دي ناقصاني شايقي وعربي
أها دا سبب يخليني أن أعتبر نفسي أحسن منك؟
طبعا لا فكلنا لآدم وآدم من تراب
وزي ما قال واحد من شعراء الوطنية
شايقي وجعلي ودنقلاوي أيه فايداني غير ولدة خلاف خلت أخوك عاداني

أها يا منير سيد البوست قال داير يقفل البوست
فزي ما قال الهدندوي
كان أقنعناك بالوطنية السودانية في البوست دا في بوست تاني بنحاول

قال عمر التاج

Quote: الرق عند العرب وغير العرب قبل الاسلام كان مظهر اجتماعي يرمز للقوة والثروة ، وجاء الاسلام وأبطله حتى لم يبق منه إلا آثاره القديمة في نفوس ومجتمع المسلمين

هذه معلومة خاطئة.
الاسلام لم يبطل الرق
بل جعل من الوسائل للتقليل منه
وإستمر الإسترقاق سواء غنائم حروب أو غزو لسواحل أفريقيا وأواسط آسيا حتي وقت قريب
كان فيه للسلطان سعيد مركز للاتجار بالزنوج في زنجبار وأنتهت هذه الممارسة بثورة أرسلت تجار الرقيق إلي عمان
وأتحدت زنجبار مع تنجانيقا لتكون تنزانيا الدولة المعروفة اليوم
وفي السودان كان هناك مسلمين يمتلكون رقيق وآخرين يتاجرون به
وأبطل هذه الممارسة الاستعمار الإنجليزي
وقد أحتج قادة الطوائف الاسلامية الكبري والصغري علي ذلك وأرسلوا مذكرة للحاكم العام
وقد نشرت هذه المذكرة في هذا المنبر في مرات كثيرة
فيمكن قوقلتها
وممكن تشوف الماضي فيها منو

والرق أكثر من أنه مظهر أنه جوهر لعملية إنتاجية
بالدارجي كدا
ك زول يجبر ليه زول تاني عشان يشتغل ليه شغله
كان زراعة أو خدمة في المنزل
يعني لو في جلابي هسع قال عندي تركتر ودقاقة
نفس الجلابي دا زمان بيقول عندي عشرة عبيد وفرخة

أما عن الرقيق الابيض فهاك الرابط دا عشان تعرف شوية عن هذا الموضوع
http://www.revisionisthistory.org/forgottenslaves.html

وقال عمر التاج

Quote: وماشاء الله .. لقيتكم في الوطنية مابتتلحقو ... و البسمع دفاعاتكم الوطنية عن الاسم يقول السودان في شهر يناير حا يتوحد مع تشاد ويوغندا وكينيا

طيب وقت لقيت ناس ما بتلحقوا في الوطنية مش مفروض تفرح بدلا من السخرية دي؟
لحدي وقتي ووقتك دا ما وقعت ليك خطورة المسألة
زي تلاقي ليك زول في الشارع وتقول ليه يا أخي إسمك دا قبيح أمشي غيره
وتمشي في مشيك وكأنه ما حصل حاجة

وقال

Quote: وفي هذا اقترح استغلال هذه السانحة التاريخية لازاحة اسم ( السودان ) واستبداله باسم أكثر شمولية للمعاني ودلالة على التفاؤل والنماء ؟

أولا هي ما سانحة هي مصيبة
إلا إذا كنت ما عارف معني سانحة
والاسامي صوت بطلع من بن آدم للدلالة وأفتكر الحكاية دي إتشرحت كثير ما في داعي للتكرار
والمهم ليس الاسم
مع تكررانا إننا لن نغيره
إلا أنه الجوهر هو المهم
كيف نحكم أنفسنا وكيف نعامل بعض وكيف نخطط لمستقبل أولانا وأحفادنا

وقال عمر

Quote: ولكن يقيني أننا كشعب لم نشارك في اختياره

النخبة السودانية في مؤتمر الخريجين شاركت في الاختيار
ولكن ما عندنا مانع أن يعرض الاسم في إستفتاء
ولكن يعرض معها نظام الحكم والدستور وأشياء كثيرة أكثر أهمية لم نستشار فيها
تفتكر عاجبنا يحكمونا العنصريين المتخلفين ديل لاكثر من عشرين عاما ويطمحون في عشرين أخري؟؟؟؟؟

Quote: ثم أليس اللون الأسمر هو الغالب في وطننا هذا ؟

إنت ما عارف إنه أسمر دي درجة من درجات الاسود؟؟؟
للاسود درجات تبدأ من حالك السواد الفي بالك وحتي لون الاعراب في جزيرة العرب

ووقت قلت مع السلامة
قطع شك بنتلاقي في بوست جديد
كان ما في نفس الموضوع في موضوع مشابه

Quote: مفارقات اللغة ذكرتني واحد صاحبي أيام الجامعة علَّق علي طالبات الطب وهن طالعات من محاضرة .. قال أسه بنات الطب ديل الواحدة ممكن تديك محاضرة لمدة ساعة عن التكاثر والأعضاء التناسلية ، لكين لو أديتها مليون جنيه وقلت ليها قوليها بالعربي الدارجي ما تقولها .. أهو ده مثال لإنفصام اللغة البنتكلم عنه ..

منير
سلامات

أولاً أنا عايش في أمريكا وقصة إنو كلمة Black دي حساسة ما سمعت بيها إلا منك إنت، وهسة أنا مليت لي إستمارة وكتبت فيها إني Black، وأعتقد إنك حليت المشكلة بالكلام الفوق الفي الإقتباس. لأنو كلمة مثل الإتصال الجنسي لها المدلول العلمي لكن ما يقابلها في اللغة الدارجة لها مدلول آخر مُحِمّل بدلولات وسياقات أخري (الحياء العيب قلة الأدب إلخ). لذلك قلت لك أنا كلمة سودان لا تُترجم إلا أي لغة غير أنها سودان والشخص هو سوداني، وأنت تحاول أن تقول أن الكلمة لها معنى آخر وأنك يمكن أن تترجمها لنـيقر، هذا الكلام ليس صحيح لا علمياً ولا لغوياً، وما محتاجة لأي شرح، الشخص البيقول كلمة نـيقر أو بيسمعها لا يمكن أن يتبادر إلى ذهنه أنها مرادف لكلمة سودان أو سوداني لأن كلمة سودان أو سوداني المعنى بها هنا هم القوم الذين يعيشون في السودان الدولة وهذا إسم علم، لذك لن تجد أحد في الدنيا يقول لك أن إسمك هو (Lighting) كترجمة لإسمك منير.

وكما قلت لك أن أي كلمة في الدنيا ممكن أن تشحنها بما شئت من المعاني، خذ عندك مثلاً كلمة (بيض) للشخص الثقيل، لا يمكن أن أطلقها على شخص ثقيل وأقول له (Egg) بالاتيني أو اللاوندي ذات نفسو.



إنفصام اللغة

الغة لا إنفصام لها أخ منير، بل لقد إختلطت عليك الأمور، وأنظر معي لهذا الحديث من الرسول (ص)

جاء الأسلمي إلى رسول الله صلى الله عليه وآله وسلم فشهد على نفسه أربع مرات بالزنا يقول أتيت امرأة حراما كل ذلك يعرض عنه رسول الله صلى الله عليه وسلم فأقبل في الخامسة فقال له : أنـكتها ؟ قال : نعم ، قال فهل تدري ما الزنا ؟ قال : نعم ، أتيت منها حراما مثل ما يأتي الرجل من أهله حلالا قال . فما تريد بهذا القول قال . أريد أن تطهرني فأمر به رسول الله صلى الله عليه وسلم أن يرجم
الراوي: أبو هريرة
خلاصة الدرجة: صحيح
المحدث: ابن حزم
المصدر: المحلى
الصفحة أو الرقم: 11/179


طيب الرسول (ص) إستعمل الكلمة (ن)، وهو ما يقابل الكلمة (F) في اللغة اللاتينية، الآن إذا أنا أوردت خبر أن شخص إغتصب إمرأة بالقوة، وأستعملت الكلمة (ن) بدلاً عن ذلك وقلت أنه(نـ......خا بالقوة) لهاجت علىّ الدنيا هنا وقامت، مع العلم أن (المعنى الذهني) للكلمتين واحد، ولذلك لن تقول طالبات الطب أو طلاب الطب غير كلمة (العضو التناسلي للمرأة أو للرجل)، ولكن عون الشريف قاسم يكتبها في قاموسه بأسمائها الدراجية لأن السياق العلمي يقتضي ذلك.

الخلط الذي وقعت فيه أخ منير ولن أمل من تكراره هو أن كلمة سوداني لا تترجم إلى كلمة نـيقر، وكلمة نـيقر تحمل الكثير من المعاني وتقتضي السياق الذي قيلت فيه، ونحن في السودان يمكن أن نفتخر بكلمة (أنا عربي حُر)، وبعض الناس يمكن أن تشتمك ب( إنت زول عربي مغفل).

هنا في أمريكا عندي صديقين أحدهما (أبيض والآخر أسود) وهما أصدقاء والأبيض عادي جدا بيقول للأسود (Wats up my nigga)، وهو نفس المقام الذي قال فيه الرسول (ص) الكلمة التى نتعفف أن نقولها في (المجتمعات كما يقولون).


فهنا لا أرى أي إنفصام للغة بل هو إستعمال للغة مع الوضع في الإعتبار المحمول الدلالي للغة والسياق، أما إذا كنت من الذين لا يؤمنون بالدلالات اللغوية والسياق، فيمكنك ساعتئذ أن تقول أن سوداني يمكن ترجمتها بكل أريحية لكلمة نيـقر.


خلاصة

عندما أقول أنا سوداني وأفتخر هذه الجملة لا تعني عندما أقول أنا نـيقر وأفتخر،

ولهذا السبب عندما يشرح أستاذ العلوم أجزاء جسم الإنسان ويقول هذا إسمه العضو التناسلي للرجل، المعنى يختلف عندما يقول هذا إسمه (ال..) ويستعمل الكلمة الدارجية. لأن الذي سيحدث أن المستمع سيستغرب لماذا قال هذه الكلمة والسياق لا يحتمل ما قاله، والعكس صحيح، فإذا أنا أحكى نكت لأصدقائ وتتضمن في نصها نفس الكلمة الدارجية واستعملت الكلمة العلمية (العضو التناسلي) أيضاً سيتغرب المستمعين لأن سياق النكتة هو اللغة الدارجة وانت مع اصدقائك.


صاحب البوست إقترح تغيير الإسم (القبيح)، وخلافي هنا أن إسم السودان ليس قبيح أو جميل، لأنه إسم علم وتحميل الإسم بدلالة معينة هو ما يجعل هذا الإسم قبيح أو جميل.