Post: #1
Title: Communication Skills
Author: ندى صالح الطيب
Date: 10-31-2010, 01:37 PM
مهارات الاتصال او التواصل اصبحت مهارات اساسية لكى تصبح انسان ناجح فى دراستك عملك او حتى على الصعيد الاجتماعى
وهى مادة تدرس فى كثير من الكليات الآن,اكتب ذلك ويستحضرنى الحديث عن (العواسة) لوزير المالية و (الحقنةالممنوعة)
لوزير الاعلام .
هل نحن السودانيون ينقصنا كثير من هذه المهارات ؟ وهل نحتاج ان تكون هذه المهارات منهج فى حياتنا وتلقينها لابنائنا
منذ الصغر فى ابسط صورها ؟
احسب الكثير منكم سيتفقون معى فى هذا الحديث ..
تخيل ان وزير المالية تكلم عن شح الموارد وقلة الدخل بعد الاستفتاء بطريقة اخرى و يصل معلومة اننا سنمر بايام صعبة
دون اللجوء الى ادخال (العواسة) فى حديثه.
تخيل معى ان يتكلم وزير الاعلام عن (الحقنةالممنوعة) ويصل فكرته بصورة اخرى دون إثارة الرأى العام كما حدث فى الاسابيع الفائتة .
تخيل انك تذهب الى دواوين الحكومة ويقوم الموظف المسئول بكل ذوق وادب انه لا يستطيع خدمتك الان ويطلب منك الحضور غدا او بعد
غد مع شرح مغتضب للسبب دون تكشيرة او استفزاز يصل فى احيان الى الشجار .
تخيل معى انك تذهب الى الطبيب وبعد انتهاء الكشف والفحوصات يجلس معك دقائق قليلة يشرح لك فيها مرضك والاحتمالات بما فيها عدم التمكن من الوصول
الى التشخيص او عدم احتمال الشفاء و قليل من الطمأنة ويغنيك عن التنقل من عيادة الى أخرى و احيانا السفر .
كيف كان سيكون شكل حياتنا ؟؟
لا اتكلم عن حياة مثالية ولكن هناك الكثيرين فى هذا العالم هذا نهجهم ..!
قد لا يتفق البعض معى ايضا و يصفها بالنفاق هل نحن فعلا نحتاج الى جرعات من النفاق حتى تعيننا فى الايام القادمات ؟
|
Post: #2
Title: Re: Communication Skills
Author: محمد عبدالرحمن محمد
Date: 10-31-2010, 02:00 PM
Parent: #1
الأخت ندى،
Quote: لا اتكلم عن حياة مثالية ولكن هناك الكثيرين فى هذا العالم هذا نهجهم..!
|
ما أسهله من نهج..
وما [ألطف] نتائجه!!
أتمنى أن تكونى قد أسمعت حيّا..
|
Post: #11
Title: Re: Communication Skills
Author: ندى صالح الطيب
Date: 10-31-2010, 08:24 PM
Parent: #2
Quote: لا اتكلم عن حياة مثالية ولكن هناك الكثيرين فى هذا العالم هذا نهجهم..!
ما أسهله من نهج..
وما [ألطف] نتائجه!!
أتمنى أن تكونى قد أسمعت حيّا..
شكرا الاخ محمد على المداخلة
|
Post: #3
Title: Re: Communication Skills
Author: ندى صالح الطيب
Date: 10-31-2010, 02:14 PM
Parent: #1
امثلة سوء تواصلنا مع الاخرين على مستوى من يؤثرون فى الرأى العام كثيرة
هناك وزير فى حكومات سابقة تحدث فى البرلمان وقال ( البلد بلدنا ونحن اسيادا )واثارت الكثير من الضجة والسخط ايضا فى ذلك الوقت و احسبها ذلة لسان من الوزير و القيادى البارز
وهناك الكثير من الاقوال لنافع علها تملأ مجلدات ,احمد الله انى لا اذكر منها شئ لكثرتها
هذه نماذج لسوء تواصلنا مع الاخرين والقائمة تطول
|
Post: #4
Title: Re: Communication Skills
Author: jini
Date: 10-31-2010, 02:26 PM
Parent: #3
: والله كان شافو زول غير نافع بكون احسن
لان نافع دايما بتكلم من غير سسته وبرمى الكلام
زى الزول البنزل ليه فى حطب من لورى
ما بعاين العود بقع وين فى النهايه عود محل
ما يقع يقع
خالد المحرب
/QUOTE]
اها يا ندى تحمدى ربك الما متذكراها
جنى
|
Post: #5
Title: Re: Communication Skills
Author: عوض الصديق
Date: 10-31-2010, 02:36 PM
Parent: #3
ندى تحياتى
من قال ان استخدام لفظ العواسة
ليس من مهارات الاتصال ؟
فى كثير من الاحيان يستخدم
السياسيون وقادة المجتمع
الفاظا دارجية بمهارة عالية
وتاتى بنتيجة افضل
وتخلق زيوعا للتصريحات
اذكر ان الصادق المهدى
استخدم مرة مثلا دارجا
ليعبر عن تنديده باعتقال الحكومة لحسنين
فقال
الفشا غبينتو خرب مدينتو
واذكر ان مجموعة من الصحف
ابرزت التصريح بخطوط كبيرة
ايضا اشتهر نافع على نافع
باستخدام هذا الاسلوب
واعتقد ان استخدامه لهذا الاسلوب
هو الذى ادى الى اشتهاره اكثر م كونه
مديرا لجهاز الامن
فقد قال مرة
ان المعارضة مافيها راجل بكيل العين
|
Post: #6
Title: Re: Communication Skills
Author: النذير حجازي
Date: 10-31-2010, 05:34 PM
Parent: #5
الأستاذ ندي، تحية لك ولقلمك السلس الرصين
بوست متعة والله، وأرشحه لأجمل بوست لهذا العام
ونحن منكم نستفيد.
طبعاً يا ندى الأمريكان مشهورين بدماثة الخلق
ومهاراتهم فائقة في التواصل، فقد تعلمنا منهم
الكثير، وأحكي ليك الطرفة دي حصلت لي بعد
طول غياب عن السودان قضيتها في بلاد العم سام
المهم دخلت كافتيريا في الخرطوم، واشتريت
فطوري (سندوتشات) وقبل أن أقعد على الطاولة
استأذنت بكل أدب من الذي أود أن أشاركه الطاولة
وقلت ليهو: لو سمحت ممكن أقعد هنا؟! مشيراً للمكان
الذي أود أن أجلس عليه (كما يفعل الأمريكان)
تعرفي اللي حصل شنو؟! الزول أنفجر ضاحكاً
لهذا الأسلوب، وبعدما فرغ من ضحكته ومسح دموع
الضحك من عينيه، قال لي: يازول موش تعقد هنا
ياخي والله تقعد في رأسي زاتو، وتاني ضحك.
برضو الشيء الذي نفقده في السودان ثقافة الشكر
فهي تكاد تكون معدومة، فعند الخواجات أكثر
الكلمات تردداً على الإطلاق هي كلمات الشكر
تحياتي
|
Post: #7
Title: Re: Communication Skills
Author: jini
Date: 10-31-2010, 06:24 PM
Parent: #6
Quote: ايضا اشتهر نافع على نافع
باستخدام هذا الاسلوب
واعتقد ان استخدامه لهذا الاسلوب
هو الذى ادى الى اشتهاره اكثر م كونه
مديرا لجهاز الامن
فقد قال مرة
ان المعارضة مافيها راجل بكيل العين |
وهذا تصريح لا يصدر من رجل يحترم نفسه ناهيك من يحترم الرجال او زعاماتهم
رجل يحمل الدكتوراة واستاذ جامعى يعمل مديرا لجهاز الامن ويقوم بضرب اساتذته لا يمكن ان ينتمى الى عالم البشر!
جنى
|
Post: #8
Title: Re: Communication Skills
Author: jini
Date: 10-31-2010, 06:31 PM
Parent: #7
Quote: اذكر ان الصادق المهدى
استخدم مرة مثلا دارجا
ليعبر عن تنديده باعتقال الحكومة لحسنين
فقال
الفشا غبينتو خرب مدينتو
واذكر ان مجموعة من الصحف
ابرزت التصريح بخطوط كبيرة
ايضا اشتهر نافع على نافع
باستخدام هذا الاسلوب
واعتقد ان استخدامه لهذا الاسلوب
هو الذى ادى الى اشتهاره اكثر م كونه
مديرا لجهاز الامن
فقد قال مرة
ان المعارضة مافيها راجل بكيل العين
|
انظر الى تصريح الرجلين وستعرف من منهما الذى يكيل العين!
لو استعمل الصادق عزوته لما استطاع امثال النافع السير فى الطرقات!
الصادق اميز من يستعمل اللغة العامية فى خطابه
"مشطوها بى قملها" وهو يعنى نيفاشا وكل يوم يمر يثبت صدف حديثه!
"المابعرف ما يدوهو يغرف بيكسر الكاس ويعطش الناس" لعله يعنى النافع وامثاله!
جنى
|
Post: #9
Title: Re: Communication Skills
Author: عزان سعيد
Date: 10-31-2010, 07:36 PM
Parent: #8
حكي لي صديقي أنه ركب حافلة ذات مرة في الخرطوم ، فقام شاب وبكل تهذيب قال لصاحب الحافلة : (لو سمحت ممكن أنزل هنا؟)
فما كان إلا من عمك صاحب الحافلة الزهجان إلا أن قال :( "لوسمحت " دي قلة أدب جديدة ولا شنو؟)
|
Post: #10
Title: Re: Communication Skills
Author: Elawad Eltayeb
Date: 10-31-2010, 08:17 PM
Parent: #8
شكراً ليك على هذا البوست الجميل
لكن أرجو أنك ما تحملي (رجال) الإنقاذ أكثر مما يحملون ويحتملون
فنحن سقف توقعاتنا لا يحتمل منهم أي (سواء) خليك من (الإبداع)
ففاقد الشيء لا يعطيه
فمهارات الإتصال في (الأساس) عايزة (رسالة) عشان توصل.. ودي ما بتلقيها عندهم.
يعني الفكرة (عندهم) منهارة من (قاعدتها) التي (لا تحتمل الآخر) ولا تعترف به أو (بوجوده) دعك من (التواصل) معه بذكاء مفقود منذ الخطوة الأولى وهي (الإنقلاب) على فكرة (الحكم الرشيد) ومؤسسة التواصل والاتصال.
|
Post: #12
Title: Re: Communication Skills
Author: ALZOLZATOO
Date: 10-31-2010, 08:42 PM
Parent: #10
| Quote: :( "لوسمحت " دي قلة أدب جديدة ولا شنو؟) . |
هاهاهاها والله ياعزان يوم ميد ماي داي
لكن انت كمان بتبالغ عايز communication في ال transportation
ياخي بتاعين الحافلات ديل من صباح الرحمان بيصبحوا بي مخالفة تقول لي لو سمحت
اختنا العزيزة
يالها من مهارات غير مكلفة فتبسمك في وجه اخيك صدقة نحن نفسنا حار شوية بس
تحياتي
زاتوووو
|
Post: #13
Title: Re: Communication Skills
Author: محمود الدقم
Date: 10-31-2010, 08:51 PM
Parent: #10
شكرا ندي على الموضوع الممتاز: مهارات الاتصال عندنا بشكل عام شبة معطلة من اصغر صغير الى اكبر وزير/ الاسباب جمة اكثر من تحصي او ان تعد اولها التربية.. نحن تربيتنا جيل عن جيل قائمة على (الابوية) والطاعة العمياء والتنفيذ.
قائمة على سياسة القطيع/ ليبيا فتحت خير مثال في السبعينات من القرن الفائت كل من يملك زاد الطريق سافر طرابلس اوالخليج او لبنان/ خاصية التفكير والتحليل واستخلاص النتائج معدومة بشكل عجيب عند اتخاذ القرار الفردي للشخص صعب جدا/ لا بد من ان يشرك الشاب او الشابة كل القبيلة حتي يخرج بقراره هو وغالبا ما تكون النتيجة مهببة/ اسلوب التعامل والتعاطي مع الاخر جلف/ اذكر مرة كنا في مركز تجاري ضخم جدا باوروبا مع صديق راح بصق سفة الصعوط في المموازيك الكبير في الردهة العريضة on the city centre الحمدلله ناس الامن كانوا غير موجودين في تلك اللحظة وعندما استنكرت عليه ذلك قال لي وببرود (بلدن ما بلدك امشي فيها عريان).
نحتاج الى اطباء نفسانيين/ نحتاج الى بحاثة في علم الاجتماع/ ونحتاج الى اعادة بوهيا وسنكرة من جديد حتي ندخل ثقافة العولمة regard.
|
Post: #14
Title: Re: Communication Skills
Author: ندى صالح الطيب
Date: 10-31-2010, 08:52 PM
Parent: #5
من قال ان استخدام لفظ العواسة
ليس من مهارات الاتصال ؟
فى كثير من الاحيان يستخدم
السياسيون وقادة المجتمع
الفاظا دارجية بمهارة عالية
وتاتى بنتيجة افضل
وتخلق زيوعا للتصريحات
شكرا الاخ عوض صديق
لكن ما هو مردود تصريحات وزير المالية ؟ هلع وسط الناس من سوء الاحوال السيئة اصلا وليس شهرة على حساب اشياء لا تحتمل مثل معايش الناس
وما هو مردود تصريح صاحب الحقنة؟ مذيد من توتر الاجواء فى البلاد التى هى ملغومة ..
وزير المالية اضطر لعقد مؤتمر صحفى كبير لكى يخفف وقع تصريحه الذى ادرك نتائجه متاخرا !
تصريح وزير الاعلام فرض على الرئيس بنفسه طمأنة الاخوه الجنوبيين فى الخرطوم فى اقل من 48 ساعة
لو ادركوا هولاء سوء تواصلهم لما حدث ذلك .
اما نافع لو كان هناك محاسبة لما اطلق كلامه, ولو كان فى بلد اخر لافلس من دفع الغرامات
( التعديل كلمة الاعلام وليس المالية فى السطر 12)
|
Post: #15
Title: Re: Communication Skills
Author: ندى صالح الطيب
Date: 10-31-2010, 08:57 PM
Parent: #14
شكرا الاخوة جنى
عزان سعيد
عوض الطيب
الزول ذاتو
محمود الدقم
على المرور والمداخلة
|
Post: #16
Title: Re: Communication Skills
Author: ندى صالح الطيب
Date: 10-31-2010, 09:01 PM
Parent: #14
شكرا الاخوة جنى
عزان سعيد
عوض الطيب
الزول ذاتو
محمود الدقم
على المرور والمداخلة
|
Post: #17
Title: Re: Communication Skills
Author: ندى صالح الطيب
Date: 10-31-2010, 09:12 PM
Parent: #16
شكرا الاخ الحجازى والاخ عزان المداخلة والطرفة
|
Post: #18
Title: Re: Communication Skills
Author: عرفة محمد سعيد
Date: 11-01-2010, 04:12 AM
Parent: #17
سلام للجميع
القومة ليك يا ندي
على مواضيعك الجميلة
Quote: طبعاً يا ندى الأمريكان مشهورين بدماثة الخلق
ومهاراتهم فائقة في التواصل، فقد تعلمنا منهم
الكثير، |
على ذكر الامريكان ومهارتهم في التعامل
عاد اخي للسودان اجازة بعد حوالي سبع سنوات قضاها باميركا عاد حاملاً معه سلوكيات امثال شكرا ولو سمحت وآسف وابتسامات هنا وهناك والتحايا حتى للطفل النايم
مشى تاني يوم بنك الخرطوم المزحوم جدا ولما وصل الباب كان الشخص امامه مباشرة داخل عبر الباب وبتلقائيتنا او عشوائيتنا رزع الباب وراهو والله ستر على انف اخي من الكسر لأنه كان خلفه مباشرة..
استهجن ذلك السلوك وظل ماسك الباب لكل عابر للداخل اوللخارج استمر واقف ربع ساعة عسى ولعل واحد ذوق يقول له شكرا او يمسك الباب منه ولا حياة لمن تنادي!!!
عارفين يا خوانا
لو علمنا اطفالنا معنى وعمق
The three magic words
Please ..sorry ..thank you
اكيد ح يتقنو ال
Communication skill
وح يبقو اسياد الفهم والذوق
|
Post: #19
Title: Re: Communication Skills
Author: ندى صالح الطيب
Date: 11-01-2010, 04:43 AM
Parent: #18
شكرا الاخت عرفة على طلتك الانيقة
|
Post: #20
Title: Re: Communication Skills
Author: عمر سعد
Date: 11-01-2010, 05:20 AM
Parent: #19
الاخت ندى
موضوع فى السلك ...وطبعا اول ما شفت العنوان اتخلعته
لانى كنت بقدم فى محاضره عن ذت العنوان لزملاء لى
لمحاضره اصلا كنت قدمتها فى مؤتمر خليجى واعدت صياغتها المهم مشت الامور
تعرفى من ما افدم المحاضره بكون اسبوع شغال بيها
اول ما ينتهى الاسبوع اقوم اعوس عواسه السودانييين
لكن اكتسبنا فى الاغتراب ثقافه الشكر والاعتذار
وحاجات لو استعملتها فى السودان تسمع ما لا يرضيك
وزى ما يقول الكباشى العوج راى والعديل راى
هاههههههههاهااهاهاه
تخريمه :-
لمن تحبى تنزلى كلام زول اول حاجه تعملى ليهو كوبى
بعدين تمشى للخيارات فوق صفحه الكتابه تختارى اقتباس
تنزلى الماده العملتى ليها كوبى ببيست وتعملى اوكى
بتظهر الماده شكلها مختلف
حتى لا تختلط كتابتك بى كتابات الناس
ولك الشكر
|
Post: #21
Title: Re: Communication Skills
Author: ندى صالح الطيب
Date: 11-01-2010, 11:48 AM
Parent: #20
Quote: لمن تحبى تنزلى كلام زول اول حاجه تعملى ليهو كوبى
بعدين تمشى للخيارات فوق صفحه الكتابه تختارى اقتباس
تنزلى الماده العملتى ليها كوبى ببيست وتعملى اوكى
بتظهر الماده شكلها مختلف
حتى لا تختلط كتابتك بى كتابات الناس
|
شكرا الاخ عمر سعد
ال communication skills اصبحت اساسية فى امتحانات الزمالات الطبية فى بريطانيا يعكس مدى احترامهم للانسان
( كان عندى مشكلة فى الماوس على ما يبدو و غيرته اليوم فقط ).
|
Post: #22
Title: Re: Communication Skills
Author: حفصه خالد المحرب
Date: 11-01-2010, 12:14 PM
Parent: #21
التعامل في السودان يتقلب مابين جيد وسيئ واسواء
احنا ما حننفي انو السودان خلا من التعامل الحلو والفهم
لكن بقى قليــــــــــــــــل بشكل ملحوظ ...
ولمن حد يتعامل معاك او يكون اسلوبه حلو لمن احيانا بتستغربي ...
طبعا كان في رمضان الفات في السودان العيد قرب وكان نقصانا حاجات شويه
فقلنا نمشي السوق ((بحري))
وطبعا كنت فرحانه لأنه لأول مره كنت حأشوف سوق السودان
عموما ماشين وزحمـــــه وناس كتير والارض مليانه شئ اكياس وشئ كراتين
المهم ماما اتعترت ومسكت في خشبه كان الراجل معلق فيها جزم للعرض
فمسك الراجل وهبا في ماما ..مالك ما بتشوفي كنت راميه لي حاجاتي ..عميتي ....الخ
فـ : ماما بكــل احراج واستغراب قالت ليه في مره كانت حتقع وانت همك في بضاعتك
قـــال ليها وانا مالي ومالك اسي لو وقعه البيرفعهم لي منو ....
طبعا كنت قمة الاستغراب من الموقف ده
وبعد ما مشينا شويه ماما قعدت تضحك وقالت لي ..
شفتي يا حفصه اللي حصل ده حاجه اكتر من عاديه في السودان
ــــــــــــــــــــــــــــــــــــــــــــــــــــــ
بجد موضوع حساس ... ولازم يتناقش فيه
|
Post: #27
Title: Re: Communication Skills
Author: ندى صالح الطيب
Date: 11-01-2010, 08:15 PM
Parent: #22
Quote: احنا ما حننفي انو السودان خلا من التعامل الحلو والفهم
لكن بقى قليــــــــــــــــل بشكل ملحوظ ...
|
شكرا الاخت حفصة
فعلا اصبح قليل
|
Post: #23
Title: Re: Communication Skills
Author: Abdelrahim Elamin
Date: 11-01-2010, 12:23 PM
Parent: #20
مهارات الإتصال والتواصل هي إنعكاس لتحضر الامم والشعوب..
وهي تقوم أساساً علي صفة الإحترام و القناعة والاقتناع بين طرفين (Satisfactions)
وهنالك الكثير من الأسس والقوانين المنظمة لها في بعض الدول
وهي تختصر الزمن في أشياء كثيرة .
علي سبيل المثال وليس الحصر...
المريض من حقه أن يعي حقيقة المرض ومآلاته من الطبيب
طالب الخدمة بأجر أو بدونه من حقه أن يحصل علي المعلومات المقنعة له من المرجع المعني
أساليب التربية تعتمد علي مهارات الاتصال والتواصل داخل المنزل وفي المنشأة التعليمية
باختصار هي الكلمة الطيبة والصدق والاقتناع بين طرفين .
ما أحوجنا لها !
ــــــ
تحياتي
|
Post: #24
Title: Re: Communication Skills
Author: النذير حجازي
Date: 11-01-2010, 01:44 PM
Parent: #23
سلام يا ندى وضيوفها الكرام
هذا الموضوع أيضاً يقودنا لإنعدام الـ Customer Service
في السودان والبلدان العربية بما فيها دول الشام وإن
كانوا أقل فظاظة من دول الخليج والسودان. فعلى ما أذكر
بعد هجرتي الطويلة لبلاد العم سام عدت إلى دول الخليج
وكنت أتضايق جداً من خدمات العملاء فيها، وكنت لا أشتري
شيئاً (بالسوداني كدا كنت بحرد)، فصراحة العرب يحتاجون
لعملية صقل لتعاملاتهم.
وبرضو هذا الموضوع يقودنا إلى غياب ثقافة البغشيش (Tips)
في البلدان العربية، وليت الناس تنتبه لهذه الأشياء البسيطة
التى تسعد الآخرين.
وبمناسبة البغشيش، حكى ليس صديقي بأنه قد تشاجر مع موزع
البيتزا في أمريكا، وكان موزع البيتزا سوداني وصديقي
طالب البيتزا سوداني أيضاً، فقام صديقي بإعطاء موزع
البيتزا بغشيش، فما كان من موزع البيتزا إلا الصراخ
في وجه صديقي قائلاً:" إنت قايلني شحاد للأ شنو؟!" لوول
فموزع البتيزا يأخذ البغشيش من الأجانب ويستحي أن
يأخذها من السودانيين.. عجبي، فقد حمل الموضوع مالا يحتمل
تحياتي
|
Post: #25
Title: Re: Communication Skills
Author: عمر سعد
Date: 11-01-2010, 03:47 PM
Parent: #24
سلام
شايف مركزين على المهارات فى التعامل
برضو ما تنسو مهاره الاتصال فى الكتابه
كيف تجعل الكتابه جاذبه ومهذبه ولا فته للاخرين وتحترم قيها الاخرين
وما احوجنا لها فى المنير
اقتراح انشاء مجموعه تمارس مهارات الاتصال فى الكتابه حتى ولو عدد 8 اشخاص يمكنها ان تتطور
وتصبج شامله بقعل التاثير وتاثر
رايكم شنو
|
Post: #26
Title: Re: Communication Skills
Author: الفاتح عبد الله طه
Date: 11-01-2010, 07:31 PM
Parent: #25
في رأيي الشعوب التي تنعدم عندها ثقافة ( الشكر ) تتحارب !... وتزداد عندها درجة ( العدوانية) ..في التعامل ...فالننظر حولنا ..ونتلمس مدى صحة ذلك ...!!
كثير منّا ..تنعدم من قاموس كلماته اليومية شكرا ..لو سمحت ،عفوا ...ربما يرجع ذلك لاسلوب التربية الذي اعتمد على ( خشونة ) التعامل ...
التحية لكاتبة ( البوست) ..ولكل الحاضرين
|
Post: #30
Title: Re: Communication Skills
Author: ندى صالح الطيب
Date: 11-01-2010, 08:35 PM
Parent: #26
Quote:
في رأيي الشعوب التي تنعدم عندها ثقافة ( الشكر ) تتحارب !... وتزداد عندها درجة ( العدوانية) ..في التعامل ...فالننظر حولنا ..ونتلمس مدى صحة ذلك ...!!
كثير منّا ..تنعدم من قاموس كلماته اليومية شكرا ..لو سمحت ،عفوا ...ربما يرجع ذلك لاسلوب التربية الذي اعتمد على ( خشونة ) التعامل ...
|
اتفق معك فى ذلك الاخ الفاتح .
|
Post: #29
Title: Re: Communication Skills
Author: ندى صالح الطيب
Date: 11-01-2010, 08:31 PM
Parent: #25
Quote:
برضو ما تنسو مهاره الاتصال فى الكتابه |
الاخ عمر
لو كنا شعب يجيد التواصل لكان هناك الكثير من البوستات فى هذا المنبر لم تفتح..!
|
Post: #28
Title: Re: Communication Skills
Author: ندى صالح الطيب
Date: 11-01-2010, 08:24 PM
Parent: #23
Quote: مهارات الإتصال والتواصل هي إنعكاس لتحضر الامم والشعوب..
وهي تقوم أساساً علي صفة الإحترام و القناعة والاقتناع بين طرفين (Satisfactions)
وهنالك الكثير من الأسس والقوانين المنظمة لها في بعض الدول
وهي تختصر الزمن في أشياء كثيرة .
|
شكرا الاخ عبد الرحيم على المداخلة
اصبحت علم يدرس ادخل قوقل او اليو تيوب لتجد الكثير
لكن محاولتى القاء الضوء على هذا المفتاح السحرى الجديد للتعامل مع الاخر ...
|
Post: #31
Title: Re: Communication Skills
Author: مدثر محمد عمر
Date: 11-02-2010, 09:28 PM
Parent: #1
سلام..
أنا قدمت أكتر من 200 برنامج تدريبي لجهات مختلفه وجنسيات مختلفه في الخليج عن التواصل وبقدم إستشارات في حاجات عندها علاقه وثيقه بالموضوع ده
أظن في بوستك في خلط بسيط منك ومن تقريباً كل المتداخلين بين مهارات التواصل وخدمة العملاء والأدب !!
أنا بعتقد إنو مقدرتنا العامة على التواصل عاليه جدا بل أعلى من معظم الشعوب الشفتها ولغتنا الدارجه بمعظم لهجاتها غنيه باللون والطعم والرائحه مما يدل على ثراء المتكلم بها اللغوي ومقدرته العالية على التواصل..
تعرفي بي ببساطه نحن لغتنا مسرحيه ، وبقصد بي مسرحيه دي إنها بتعتمد علي المشاهد يعني لو في زول داير يقول ليك انو في زول شليق جا داخل بعبر ليك بي جسدو وبي صوتو عن المشهد ده ببساطه فمثلا ممكن يقول ليك :
أها تنقش تنقش جا داخل !!
شفتي الصوت الفي كلمة "تنقش " ده والحركه البي اليد أو الراس المتوافقه معاه دي درجه راقيه جدا من التواصل
بعدين أنا طبعا بحكم عملي براقب مرات حاجات كتيره زي ما الزول بتاع الورنيش بعاين اول شي لي جزمتك والمكنيكي بعاين لي عربيتك فملاحظتي بصوره عامه أنو الشعوب الفيها تنوع أثني وعرقي مقدرتها على التواصل أعلى من الشعوب الاقل تنوعاً وبرضوالشعوب البيئتها غنيه باللون والرقص بوصفو تعبير جسدي مقدرتها على التواصل أعلى بكثير جدا من الشعوب ذات البيئه الأقل غنى .
ضربتي أمثله بي ناس لم يتادبوا لأوطانهم ولا أهلهم وإن كان معظمهم سيئي التواصل الا أننا شعب عموما نتواصل بصوره جيده ويمكنك ان تلاحظي مقدرة السودانيين على ان يكونوا صداقات ويكونوا محبوبين في أماكن إقامتهم حتى وإن كانوا سيئين فإن أعوزتهم تلك المهارة فكيف يتسنى لهم ذلك؟؟!!
مر على السودان أمثال الشريف حسين والمحجوب وما زلت كل فترة قصيرة استمع للشريف وهو يتحدث وكأنه يقرأ من كتاب الفه قبل سنوات ونقح أفكاره ثم عرضه على الناس ، ما ميز هؤلاء على أولئك ليس المقدرة على التواصل فقط وإنما التأدب للناس والقيم والأخلاق الشيء الذي افتقده تقريبا من دللت بهم على أننا نملك مقدرة ضعيفة على التواصل.
لك الشكر الجزيل
|
Post: #32
Title: Re: Communication Skills
Author: خالد المحرب
Date: 11-02-2010, 09:38 PM
Parent: #31
Quote: مهارات الاتصال او التواصل اصبحت مهارات اساسية لكى تصبح انسان ناجح فى دراستك عملك او حتى على الصعيد الاجتماعى
وهى مادة تدرس فى كثير من الكليات الآن,اكتب ذلك ويستحضرنى الحديث عن (العواسة) لوزير المالية و (الحقنةالممنوعة) |
ياسلام يا استاذه نعم نحن نملك العلم منذ القدم ولكن طقت علينا خلفية التربيه مهما وصلنا من درجات علميه
نحن ناس ننطوى على افكارنا ولكن كان ينقصنا ان نطرح انفسنا على الاخر عندما تتاح لنا الفرص
السودانى خليهو خلف الموسسه يدير المال ودا زمان فهو امين ولكن ما ممكن ينجح فى التسويق مثلا
المهم فكرة البوست رايعه
|
Post: #35
Title: Re: Communication Skills
Author: ندى صالح الطيب
Date: 11-03-2010, 06:35 AM
Parent: #32
| Quote: ولكن ما ممكن ينجح فى التسويق |
شكرا الاخ خالد المحرب
هذا جزء من ما أعنى .
|
Post: #33
Title: Re: Communication Skills
Author: ندى صالح الطيب
Date: 11-03-2010, 06:28 AM
Parent: #31
شكرا الاخ مدثر عمر
| Quote: أظن في بوستك في خلط بسيط منك ومن تقريباً كل المتداخلين بين مهارات التواصل وخدمة العملاء والأدب !! |
Quote:
(فهمت ما تعنى انا لا اقصد سهولة او بساطة تعاملهم مع الآخر ولكن اختيار هذه الكلمات . لاجعل كلامى اكثر وضوحا هل تتفق معى اذا ذكرت لك
أن فلان قبيح تختلف عن ان اقول ليس جميل والمعنى واحد . او ان اقول فلانه ملابسها خليعة بدلا عن غير لائقة كلهما واحد لكن فى الطريقتين وقع مختلف
ارجو ان اكون وفقت ..) ندى
الا أننا شعب عموما نتواصل بصوره جيده ويمكنك ان تلاحظي مقدرة السودانيين على ان يكونوا صداقات ويكونوا محبوبين في أماكن إقامتهم حتى وإن كانوا سيئين فإن أعوزتهم تلك المهارة فكيف يتسنى لهم ذلك؟؟!
|
نعم نحن محبوبين ونمتاز بصداقات مميزة كما يصفنا الاخرون لكن احيانا لا نعرف كيف نتواصل بمعنى البوست..
|
Post: #34
Title: Re: Communication Skills
Author: ندى صالح الطيب
Date: 11-03-2010, 06:31 AM
Parent: #31
ألغى للتكرار
|
Post: #36
Title: Re: Communication Skills
Author: Fathi Ali Mohammed
Date: 11-03-2010, 07:37 AM
Parent: #34
مهارات الاتصال
شكرا الاخت ندى
بوست جدير بالمتابعة
الرابط اعلاه لورقة جيده عن موضوع الاتصال أعدها د. سامي عبد العزيز من مصر.
|
|