Post: #1
Title: يجب استفتاء الشعب كله في حال طلب الجنوبيون الوحدة بعد الانفصال
Author: محمد عبدالقادر سبيل
Date: 10-31-2010, 12:43 PM
الشماليون لا يستفتيهم احد
ولا حتى بخصوص الاستقلال من الحكم الثنائي عام 1955م
والآن ينشطر الوطن بارادة الجنوبيين وحدهم ولا احد يسألهم عن رأيهم مرة ثانية
حسنا
أليس من حقهم ان يقولوا رأيهم بعد الانفصال اذا حدث حول رغبتهم في انضمام الجنوب مجددا ام لا؟
هل يبقى مصير البلاد والعباد بيد الساسة فقط
هل يجوز هذا؟ وهل هو ممارسة ديمقراطية
الآن هنالك واهمون يظنون ان الوحدة ممكنة ( بشروط السودان الجديد ) ولكن بعد تحقق الانفصال وخلال الستة اشهر الانتقالية!
وهمون كبار
ان من ذاق حلاوة الاستقلال وسلطة وامتيازات الدولة المستقلة ومكانتها بين الدول هل تراه يعود للخضوع لمركز يعلم ان له شروطه وقوته وهيمنته ايضا؟
ماذا اذا استقرت الأمور واحس الشمال بفضل الانفصال ونما اقتصاده وتدفق بتروله وانتهت مشكلة دارفور
هل ترى ستبقى جدوى من المطالبة بالوحدة مع شق يطالب بلا نهاية ويشترط فرض نموذج هوية السودان الجديد؟
هذه احلام بعض احزاب الشمال التي قلت حيلتها وباتت تعيش على هذه الاحتمالات وترجو ان تسوء الاحوال!!
هؤلاء لا يسألون انفسهم عن المسوغ القانوني للتراجع عن وضع جاء بسلطة الشعب الدستورية( قرار الاستفتاء )، فمن يملك حق ابطال قرار الشعب المباشر وبشهادة الدنيا والعالمين ؟
ومن قال ان القوميين الجنوبيين سيقفون مكتوفي الايدي حتى ينهار ما بنوه بدمائهم طيلة عقود؟
ومن قال ان المؤتمر الوطني سوف يقبل من الشروط الجذرية ما لم يقبله الآن ؟
هذه احلام رومانسية فقط
ينبغي ان نكون مع الوحدة دون شروط تعجيزية ودون فرض صيغة قهرية على احد
نكون مع احترام هوية الشمال في الشمال والجنوب في الجنوب دون تفرقة هذا هو العدل والمنطق
سواء كان ذلك الآن او بعد الانفصال
والاهم من هذا كله
ان شعب الشمال ينبغي ان يكون طرفا اصيلا في هذا القرار حين يصبح استحقاقا
فهل يريد الشماليون الوحدة مجددا وبشروطهم ..ام لا يريدونها طالما ان الانفصال افضل لهم
يجب احترام هذا الشعب عبر استفتاء مصير جديد يجري في الشمال والجنوب معا. ليكون قانونيا والا فقد الشرعية وتسبب في حروب مستقبلا على هذا الاساس.
هذا كله في حال طالب القادة الجنوبيون بالوحدة مجددا خلال الستة اشهر التالية لقرار الانفصال ان وقع.
فقرار القادة وحدهم لن يعد قانونيا لأن فتوى الشعب تعتبر اعلى منه دستوريا.
______________
رب اشرح لي صدري
|
Post: #2
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: jini
Date: 10-31-2010, 12:54 PM
Parent: #1
| Quote: يجب استفتاء الشعب كله في حال طلب الجنوبيون الوحدة بعد الانفصال |
أكثر ما يميز اهل الجنوب الكرامة وعزة النفس!
لن يسمحوا لكمال عبيد ومن مثله ليشمتوا فيهم!
انت حوش النيل وجنوب كردفان ودارفور من الانفصال وربما الشرق لاحقا!
جنى
|
Post: #3
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: Deng
Date: 10-31-2010, 01:09 PM
Parent: #2
| Quote: ان من ذاق حلاوة الاستقلال وسلطة وامتيازات الدولة المستقلة ومكانتها بين الدول هل تراه يعود للخضوع لمركز يعلم ان له شروطه وقوته وهيمنته ايضا؟ |
أنت بتسأل السؤال وبتجاوبو بنفسك؟
|
Post: #4
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: jini
Date: 10-31-2010, 01:14 PM
Parent: #3
| Quote: أنت بتسأل السؤال وبتجاوبو بنفسك؟ |
سبيل اخونا
سؤاله جواب وجوابه سؤال!
مشى حالك يا دينق
جنى
|
Post: #5
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: محمد عبدالقادر سبيل
Date: 11-01-2010, 08:55 AM
Parent: #4
دينق
جني
السلام على من اتبع الهدى
ان ما اشكل عليكم جلاؤه كالآتي :
اكتشاف الاخوة في الجنوب ان مزايا الاستقلال يطمسها الواقع الصلب المرير
هذا الواقع المتمثل في صعوبة الاستقلال على المستوى العملي وذلفك بسبب :
* مصب النفط شمالا ( وبالتالي التحكم فيه على مدى عدة سنوات ) وفي وسائل نقله ومعالجته وادارة عملياته
* خلو البلاد من الميناء وكذلك خلو يوغندا المتحفزة للالتهام
* عدم وجود موارد عامة اخرى غير النفط المعرض للنضوب ولانخفاض الاسعار بشكل كبير ( بالمناسبة وزير الية حكومة الجنوب امس بالتحديد صرخ عاليا وقال للاعلام انا خايف مافيش موارد وطنية وزمام البترول بيد الشماليين !!)
*احتمالات الحرب القبلية الداخلية
* تدخل الدول المجاورة مثل يوغندا وكينيا بما قد يدخل الجنوب في حرب ضد الاطماع
* احتمال تزويد الشمال لبعض المتمردين الجنوبيين بالسلاح مقابل دعم الحركة الشعبية لقوات متمردي دارفور ( مناوي وعبد الواحد وربما خليل ايضا
وهكذا
يصبح القوميون الجنوبيون الذين سيذوقون حلاوة الاستقلال ومزاياه امام مرارة الواقع ومجرياته مما سيفرز حالة من عدم القدرة على السيطرة وادارة الدولة وهذا بدوره سوف يخلق تناقضات قاتلة داخل الدولة الوليدة
وهكذا سينتج تياران :
- تيار وحدوي يطالب بالعودة الى الوطن الأم مجددا ولكن بشروط يائسة !!
- وتيار يصر على المزايا ومواصلة التمسك بانجاز الحلم التاريخي مهما كلف الأمر
حيال هذه الصورة نتقدم مبكرا ههنا بمقترح الرجوع الى الشعب كله ليفتي
هل يريد وحدة الوطن ام لا ؟وباية شروط ؟
وضح ؟
_______________
رب اشرح لي صدري
|
Post: #6
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: حامد بدوي بشير
Date: 11-01-2010, 09:18 AM
Parent: #5
Quote: هذا كله في حال طالب القادة الجنوبيون بالوحدة مجددا خلال الستة اشهر التالية لقرار الانفصال ان وقع.
فقرار القادة وحدهم لن يعد قانونيا لأن فتوى الشعب تعتبر اعلى منه دستوريا.
|
تأملوا هذا هذا النفاق. بعد أن طمنوا نتيجة عملهم الذي عملوا من أجله وحققوا انفصال الجنوب، بدأ خوفهم من أن يعود الجنوب للوحدة مع الشمال. هذا هو هاجس المؤتمر الوطني الآن. ولا ضمان ضد هذا الهاجس إلا بإشعال حرب ضروس بين الشمال والجنوب لزيادة الويلات والأحقاد حتى لا تبقى فرصة لعودة الوحدة.
نحن مع وحدة السودان ...... ولا نريدكم فانفصلوا!!
|
Post: #7
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: أحمد الشايقي
Date: 11-01-2010, 09:26 AM
Parent: #6
Quote:
الشماليون لا يستفتيهم احد
ولا حتى بخصوص الاستقلال من الحكم الثنائي عام 1955م
والآن ينشطر الوطن بارادة الجنوبيين وحدهم ولا احد يسألهم عن رأيهم مرة ثانية
حسنا
أليس من حقهم ان يقولوا رأيهم بعد الانفصال اذا حدث حول رغبتهم في انضمام الجنوب مجددا ام لا؟
هل يبقى مصير البلاد والعباد بيد الساسة فقط
هل يجوز هذا؟ وهل هو ممارسة ديمقراطية
|
المؤتمر الوطني استفتى السودانيين لأول مرة في تاريخـه في انتخابات العام 2010 وقام..... بتزويرها بامتياز ....
الجنوبيون لن يطلبوا الوحدة مع الشمال مرة أخرى مهما حدث لهـم ومشاكل بترولهـم هم الأقدر على حلهـا ......
العالم الغربي يساند الجنوب استراتيجياً وبالتأكيد سيساعده على تطوير صناعة النفـط ....
حتى ... الصـيـن ... عرضت على الجنوبيين بناء خط أنابيب كـ ... عربون ... صـداقـة ...
المؤتمر الوطني فاشـل بامتياز و الفشــل .... فكري ....
أحمد الشايقي
|
Post: #8
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: عزاز شامي
Date: 11-01-2010, 09:42 AM
Parent: #1
| Quote: يجب استفتاء الشعب كله في حال طلب الجنوبيون الوحدة بعد الانفصال |
مجرب المجرب ندمان ...
| Quote: فهل يريد الشماليون الوحدة مجددا وبشروطهم ..ام لا يريدونها طالما ان الانفصال افضل لهم |
أولا الانفصال بشروطهم، ولو في وحدة برضو بشروطهم؟ ون مان شو؟
_______
على الرغم من كل شيء،
لا أخفي اعجابي المفرط بالمونولوج الداير هنا و النظرة المستقبلية
والظرفية المبنية على ظرفية .. وأخص بالاعجاب مفردة "حسناً" وما تنطوي
عليه من تظلم في هذا المقام كادت - لولا لطف من الله - ان تنطلي علي ...
|
Post: #9
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: محمد عبدالقادر سبيل
Date: 11-01-2010, 10:02 AM
Parent: #8
Quote:
____________________
على الرغم من كل شيء،
لا أخفي اعجابي المفرط بالمونولوج الداير هنا و النظرة المستقبلية
والظرفية المبنية على ظرفية .. وأخص بالاعجاب مفردة "حسناً" وما تنطوي
عليه من تظلم في هذا المقام كادت - لولا لطف من الله - ان تنطلي علي ... |
دي ( رب اشرح لي صدري) بتاعتك يا عزاز؟!
وبعدين
حسنا
انت بتنتبهي لحاجات الزول زاتو ما منتبه ليها
ياخ بطلي الشطارة الشديدة دي عليك الله
نحن ناس بسطاء وعلى نياتنا والفي قلبنا في خشومنا
وهسع دحين دايرين استفتاء حول رتق الشق المنشطر حتما عشان نكون مارسنا حقنا زينا زي الجنوبيين
فيها حاجة دي ؟
ما تقولي لي مشورة شعبية وحاجات زي دي
استفتاء تقرير مصير عديييل self determination
ليه ناس يقولوا منافقين وناس يقولوا مش عارف ايه
عزاز
رايك شنو في الاحزاب النتعول على استخدام وحدة السودان ككرت ضغط من اجل تغيير النظام برمته
هل يراهنون على امل حقيقي او عشم في ان يصاب المؤتمر الوطني بالحرج الوطني او يحن قلبه شوية.. ام هي اوهام سرابية وحيلة مضطرين؟
وهل صحيح ان هؤلاء يشجعون الجنوبيين على خطوة الانفصال الآن كوسيلة نضال بائسة ؟
لك احترامي كالمعتاد
_____________
رب اشرح لي صدري
|
Post: #10
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: عزاز شامي
Date: 11-01-2010, 10:42 AM
Parent: #1
| Quote: دي ( رب اشرح لي صدري) بتاعتك يا عزاز؟! |
مالها؟ ما مواكبة؟
هو اجباري اكتب دعا؟ افتكرت كتابتك بتسقطوا عن الباقين
يا اخوي انا بدعي في السر ولو البين قوسين ده أُستجيب ما كنا بنتحاجج حسي
Quote: وهسع دحين دايرين استفتاء حول رتق الشق المنشطر حتما عشان نكون مارسنا حقنا زينا زي الجنوبيين
فيها حاجة دي ؟ |
كدي خلى الاستفتاء الوشيك يتم، وان شاء الله "يصير خير" يا قولة الكفيل...
بعدين شنو المزاحمة و الـelbowing ده و شغل الحاكو حاكو ؟ يا سبيل
انت حاير بيك الدليل ولا شنو يا اخوي؟ ناخد الأمور تاتا تاتا، خطوة خطو،
كان في اتفاقية مشاكوس وبعدين اتفاقية نيفاشا و بعد فترة انتقالية
و بعدين تقرير مصير، بعد تتم كل مرحلة نمشي البعدها. الوحدة مرة
أخرى في حال الانفصال لم تطرح كخيار من الاساس ولا انت ولا أنا في موقع
يخولنا انو نطرح سيناروهات بلا جنحان و نفنها في فضاء التأملات،
كل مما يليك و عاين في ورقتك حسي والترويسة "استفتاء قد ينتج عنه انفصال" ...
| Quote: استفتاء تقرير مصير عديييل self determination |
والله فعلا احنا محتاجين لتقرر المصير في الشمال،
ولو تم اعتقد المؤتمر الوطني حيحكم ارخبيل ولايات شاقيها أرض دول تانية...
Quote: رايك شنو في الاحزاب النتعول على استخدام وحدة السودان ككرت ضغط من اجل تغيير النظام برمته
هل يراهنون على امل حقيقي او عشم في ان يصاب المؤتمر الوطني بالحرج الوطني او يحن قلبه شوية.. ام هي اوهام سرابية وحيلة مضطرين؟
وهل صحيح ان هؤلاء يشجعون الجنوبيين على خطوة الانفصال الآن كوسيلة نضال بائسة ؟ |
والله شكرا وألف شكر انك تظن انو شخصي الضعيف يملك اجابات للاسئلة بعاليه،
اعفي لي لا املك اجابة لكل ما تقدم ...
انا حسي مركزة في الاستفاء و ما ينتج عنه لاني "براغمتيك"
وما بتعامل مع أي أمر في معزل من الظروف context
حسي في ميل نحو الانفصال من طرف الجنوبين وهو مسبب،
وسعى له المؤتمر الوطني وحسبه صيدا فكان قيدا...
ما تفترضه هنا–- أو تروج له أيهما أقرب لحسن ظني فيك --
بأن الجنوب سيعود لطلب الوحدة و انو الشمال "حيقعد يتشرط"
انا باعتبروا ضرب من ضروب "أحلام اليقظة" و "بكرة يجي الخريف و اللواري بتقيف"
ومعاها حركة اليد "طيييييب .. والله نوريكم" ...
ياخوي طلب تقرير المصير ده ما كان "حردي" ولا تعزز،
كان مسبب و اسبابه لدى الطرفين قائمة (للشمال حكم اسلامي– للجنوب حكم علماني)
و جري طيران ما بتلموا، لو، ولو دي انا مستبعداها جدا، في المستقبل الجنوبين
قرروا واخد بال حضرتك - هم الحيقرروا - يرجعوا في وحدة مع السودان
حتكون الوحدة بشروطهم ما بشروط الشمال، و ما حيكون في زمن المؤتمر الوطني هو الحاكم،
أو على الأقل باستراتيجياته المعروفة الآن ...
| Quote: لك احترامي كالمعتاد |
كتر ألف خيرك ولك مثله ...
|
Post: #11
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: الصادق صديق سلمان
Date: 11-01-2010, 11:03 AM
Parent: #10
الأخت عزاز شامي
Quote: كدي خلى الاستفتاء الوشيك يتم، وان شاء الله "يصير خير" يا قولة الكفيل...
بعدين شنو المزاحمة و الـelbowing ده و شغل الحاكو حاكو ؟ يا سبيل
انت حاير بيك الدليل ولا شنو يا اخوي؟ ناخد الأمور تاتا تاتا، خطوة خطو،
كان في اتفاقية مشاكوس وبعدين اتفاقية نيفاشا و بعد فترة انتقالية
و بعدين تقرير مصير، بعد تتم كل مرحلة نمشي البعدها. الوحدة مرة
أخرى في حال الانفصال لم تطرح كخيار من الاساس ولا انت ولا أنا في موقع
يخولنا انو نطرح سيناروهات بلا جنحان و نفنها في فضاء التأملات،
كل مما يليك و عاين في ورقتك حسي والترويسة "استفتاء قد ينتج عنه انفصال" ...
|
كلامك باسطة بس والله
أخي سبيل
ياخي الحكاية زي ماقالت عزاز لسه بدري عليها
انت وانا ونحن المقلقنا شنو عشان نفكر في وحدة بعد انفصال
مافي وحدة تاني حسب
بعد انفصال الجنوب هناك انفصالات وبس تاني وحدات مافي حتى الأردنية مافي
دارفور موضوعها منتهي من زمان
الصادق
|
Post: #12
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: محمد عبدالقادر سبيل
Date: 11-01-2010, 11:47 AM
Parent: #10
Quote: ولو دي انا مستبعداها جدا، في المستقبل الجنوبين
قرروا واخد بال حضرتك - هم الحيقرروا - يرجعوا في وحدة مع السودان
حتكون الوحدة بشروطهم ما بشروط الشمال، و ما حيكون في زمن المؤتمر الوطني هو الحاكم،
أو على الأقل باستراتيجياته المعروفة الآن ... |
حايرجعوا مضطرين صدقيني يا عزاز
وانتي في وانا في
بالمناسبة الجنوبيين ديل بحبونا وما بقدروا على فراقنا
ما تشوفي الحركات دي ساكت
والله يفطسوا من الشوق والوحشة
مشكلتهم اننا عاملين زي جناك لمن يكون قليل ادب وعاق
ممكن تصل بيك الأمور حد طرده من البيت والتبري منه ( غور انت لا ولدي ولا بعرفك )
وجواك لوعة
نحن تربيتنا الوطنية بطالة
والدينكا زاتم ما هينين بالمناسبة
شايفين رقبتم احسن من اي زول تاني وايشمعنى ما يحكموا الشماليين الحقارين ديل ( ما كفاية يحكموا الجنوب )
دي المشكلة
يعني حكاية الدين دي ما قضية كبيرة كدي عند كثير من السودانيين المسلمين ( زي حضرة جناب سعادتك يا بافندم)
امكن النفط زاد الجفاء بلة !!!
لكن المشكلات الاقتصادية واطماع الدول الاجنبية والمشاكل البيناتم حا تخليهم يسشتغفروا ويرجعوا تاني
للاستجارة بالرمضاء من النار ( على فكرة البراغماتية ليست بعيدة شديد عن غريزة البقاء )!!!
اما انهم يعودوا بشروطهم هم ف( دي احلام يقظة ) أو احلام بعض العلمانيين الشماليين والتي امتدت لعشرين سنة خلت( على عثمان اضاف ليها امبارح بس عشرين تانية قال على الأقل ) واخد بال خضرتك من على الأقل دي ؟
يا ستي البيرجع بعد حردة لازم يكون خجلان من نفسه منكسر الخاطر مهما راضوه ورفعوا معنوياتو فهو كان مستعد اصلا للقبول .. البسموه مشرف .
حباب اهلنا الجنوبيين والله
ما دايرنهم back home عشان نستخدمهم، بانتهازية ، كورقة ضغط من اجل تحقيق احلام سياسية يائسة وانما عشان هم دمنا ولحمنا الله يعلم
( بس لو وافقو على مبدأ لكم دينكم ولي دين بدون فرض دين العلمانية على المسلمين .. يا سلااام ياخ ) كان هسع ريحونا زاتو من ضرورة اجراء استفتاء تاني في الشمال حول امكانية عودتهم ( الطوعية ) من تاني الى حضن وطنهم الأول.
وغالبا الناس حا تقول نعم ولكن بشروط ( لكم دينكم ولي دين ) ولا لديانة العلمانية وكهنتها ( زي ناس كدا)
صدقيني بعزك يا عزاز وبحترمك ، لماحة وكتابة ، الله يديني بت زيك كدي، بشرط لمان اقول ليها اتحجبي تتحجب
ولمان اقول ليها لازم نعمل استفتاء للشماليين حول عودة الجنوبيين المنفصلين تقول لي ومالو .
_________________
رب اشرح لي صدري ويسر لي امري واحلل عقدة من لساني يفقهوا قولي
|
Post: #13
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: عزاز شامي
Date: 11-01-2010, 01:32 PM
Parent: #1
| Quote: صدقيني بعزك يا عزاز وبحترمك ، لماحة وكتابة ، الله يديني بت زيك كدي، بشرط لمان اقول ليها اتحجبي تتحجب ولمان اقول ليها لازم نعمل استفتاء للشماليين حول عودة الجنوبيين المنفصلين تقول لي ومالو . |
عاد يا سبيل لو كنتا انت ابوي ما كنت انا عزاز القدامك دي وعاجباك .. ربك رب لطف خلي بالك
شوف يا استاذ سبيل، من الآخر كده و بعيد عن السياسة،
محاولاتك لترهيبي ما حتنجح وما عارفة انت حتنتبه للنقطة دي متين؟
مرة تلميح و مرة تصريح ومرة تمرقني من الدين مرة تبقيني عفريت،
مخيّر، تراك تاعب روحك على الفاضي ...
_______
نرجع لجوهر البوست-فرفرة المذبوح ...
نظرتك للمواطن الجنوبي بحاجة لتصحيح، زيك زي مليون شمالي
سارقاهو سكينة استعلاء غير مبرر ...
انت والمؤتمر الوطني و باقي المتباكين على الانفصال
وفي قرراة انفسكم تبكون على "النفط المسكوب"
كل يوم تثيبتون أن للجنوبين ألف سبب و سبب للانفصال
عن شمال عنجهي يرى الجنوبين مجرد "جناك قليل الأدب و عاق"
وطبعا التشبيه ده برغم محاولاتك ان تسبغ عليه عطف الأبوة
إلا انه أظهر نظرتط الدونية للجنوب كأبن – اي subordinate
و كمان عاق يعني انت متفضل عليهو وهو غير ممتن -
وكمان قليل أدب (عاجبني أدبكم) – وفوق ده كلو عودتهم حتكون (اضطرارية)
يعني ولا على كيفكم!؟
كدي يا سبيل في بني آدم عاقل كامل الأهلية يرجع لمكان يًنظر إليه بالنظرة
اعلاه من عدم أهليه و عقوق و قلة أدب؟ انت من صحك؟ خليني انا،
انت جادي مع رويحتك؟ أمرق النصيحة ما تموت بيها تقـلقـلـك في تربتك ....
علي عثمان قال قاعدين عشرين سنة؟
وعزاز بتقول الحدّاث ما سوّاي ...
|
Post: #14
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: أحمد الشايقي
Date: 11-01-2010, 02:00 PM
Parent: #13
Quote:
عاد يا سبيل لو كنتا انت ابوي ما كنت انا عزاز القدامك دي وعاجباك .. ربك رب لطف خلي بالك
شوف يا استاذ سبيل، من الآخر كده و بعيد عن السياسة،
محاولاتك لترهيبي ما حتنجح وما عارفة انت حتنتبه للنقطة دي متين؟
مرة تلميح و مرة تصريح ومرة تمرقني من الدين مرة تبقيني عفريت،
مخيّر، تراك تاعب روحك على الفاضي ...
|
= 100%
|
Post: #15
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: محمد عبدالقادر سبيل
Date: 11-02-2010, 12:37 PM
Parent: #14
Quote: كل يوم تثيبتون أن للجنوبين ألف سبب و سبب للانفصال
عن شمال عنجهي يرى الجنوبين مجرد "جناك قليل الأدب و عاق"
وطبعا التشبيه ده برغم محاولاتك ان تسبغ عليه عطف الأبوة
إلا انه أظهر نظرتط الدونية للجنوب كأبن – اي subordinate
و كمان عاق يعني انت متفضل عليهو وهو غير ممتن -
وكمان قليل أدب (عاجبني أدبكم) – وفوق ده كلو عودتهم حتكون (اضطرارية)
يعني ولا على كيفكم!؟ |
ست عزاز
السلام عليكم ورحمة الله وبركاته
معليش المرة دي انت جلا !
لأن المثل كان بيعني ان الجنوبيين هم الذين في مقام الوالد ونحن ( قليلين الادب الوطني ) في مقام الأبن العاق الذي مهما رفضه ( الجنوبي في الاستفتاء) الا ان اصرة الدم والرحم ستغلب عليه لاحقا ذات حنين
والدليل على ما اقول هو ان الجنوبيين هم الذين قرروا القطيعة وهم الذين طردونا من البيت الواحد وبنوا السور الفاصل 56 ، بعد ان آذيناهم حتى كرهوا العيشة المشتركة ، وهم وحدهم الذين سيسمحون بان تعود الاسرة الى سابق اجتماعها رغم مشاكل افرادها تماما كحال الوالد وبيته.
مالك شطارتك مشت وين ؟
_______________
رب اشرح لي صدري ويسر لي امري واحلل عقدة من لساني يفقهوا قولي
|
Post: #16
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: عزاز شامي
Date: 11-02-2010, 12:48 PM
Parent: #1
| Quote: مالك شطارتك مشت وين ؟ |
كلو من النجيهة
|
Post: #17
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: Mohamad Shamseldin
Date: 11-02-2010, 12:55 PM
Parent: #16
الأخ سبيل
مافي جنوب حا يجي راجع إذا إنفصل.. فما تضيع وقت في الموضوع.
.....
لآن موضوع الوحده و الانفصال قد يطال أقاليم أخري غير الجنوب
أعتقد أنه يجب أن يعمل إستفتاء في العام 2011 لكل أقليم في السودان علي حده
هل تريد الوحده أم الانفصال ؟
و إذا قرر الاقليم المعني الانفصال يحترم رأي مواطنيه ...
و إذا قرر الاقليم المعني الوحده... يتم قفل باب الانفصال للأبد .
|
Post: #18
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: adam alamar
Date: 11-02-2010, 01:10 PM
Parent: #17
الاخ سبيل
السلام عليك
شوف كلام محمد شمس الدين التحت ده ..... مش كلام عقل
Quote: أعتقد أنه يجب أن يعمل إستفتاء في العام 2011 لكل أقليم في السودان علي حده
هل تريد الوحده أم الانفصال ؟
و إذا قرر الاقليم المعني الانفصال يحترم رأي مواطنيه ...
و إذا قرر الاقليم المعني الوحده... يتم قفل باب الانفصال للأبد . |
بـس
خليهم يبدو بالجنوب يعني يستفتوا كل ولاية على حدة
و كل ولاية يصوت مواطنيها للوحدة تبقي ضمن السودان الموحد
و البصوت للانفصال ... تكون مع الولايات الجنوبيه الاخري
الدولة الاخري ....
يعني تحسب نتيجة الاستفتاء كل ولاية على حدة
|
Post: #19
Title: Re: يجب استفتاء الشعب كله في حال طلب الجنوبيون الوحدة بعد الانفصال
Author: محمد عبدالقادر سبيل
Date: 11-02-2010, 02:52 PM
Parent: #16
والله فعلا فكرة مهمة
يا خوانا علاقة المديح والنسيب بالنجيهة والعين شنو؟
السحارين ديل مهمشين ومعرضين للتمييز وسوء الفهم بالمناسبة
ناس يصفقوا ليهم وناس يقصوهم مع انو الفعل واحد : النجيهة!
ليه بس
ليه بس
طيب الفرق بين تقرير المصير والاقصاء السياسي الاجتماعي شنو؟
الاعتراف الرسمي المنظم؟
طيب هكذا يصبح القانون متهما للمرة الأولى !!
فكرة حلوة بجد
______________
رب اعزني بمن تشاء وترضى
|
|