حـكـايـة ود الـكـرآر ... بـيـن الـعـادات والـتـقـالـيـد ...

منتصف النهار...
البلد في حالة غيبوبة من السخانة، والصمت مخيّم علي المكان. حيضان البرسيم تزفر بُخار
من مسامها كما الساونا. الكرار ود حِتيل يتقطر عرق وهو يقرع الموية مع أخيه الخزين.
الكرار ود حِتيل إشتُهِر في القرية بالحمق، والزهج، وعدم الصبر، والمشاكل.
الكرار للخزين: يا زول ما تعصِر إيّدك دي تخلينا نتفكّه من الحِرّة دي.
الخزين: ما تراني قاعد اخدِم. اكتر من كدي ابقى مكنة!؟
الكرار: المكنة التتكسّر لك فوق رويسك دا طوبة، طوبة. انا قُتلك ابقى مكنة؟!
الخزين: غايتو بس، اخير الزول يسكُت.
ما كان من الكرار بعد هذه الكلمة إلآ ان رشع الخزين بالطين، وفي لحظة كان الخزين واقع
في حوض الطين والكرار من فوقه، ودارت معركة حآمية بين الأخوين...

حاج الزين (ينادي): يا حاج العوض... حاج العوض...
حاج العوض: مرحب حبابك، حباب حاج الزين... ابقى لآ داخل ...
حاج الزين: لا، لا... ابقى مارق إنت. وِلآد حِتيل ديل مِتلآقطين. أمرُق بِسرآعك النغشي
حاج العبيد، ونمشي نتفِقُن.
حاج العوض: أُه... فترنا نِحن من الكرار ومِحنو...
يتجهو نحو بيت حاج العبيد.
حاج الزين: يا حاج العبيد... حاج العبيد... وِلآد الكرار ديل مِتكاتلين أمرُق النمشي عليهُن.
حاج العبيد: تااااني!!! والله فترنا ضُمّة.. اها امشاكُن فِسراع، فشآن انا بدور إجي إندلى علي
الفريق التِحتاني...
يخرج ثلآثتهم، ومعهم الخزين متجهين نحو بيت الكرار...

طق...طق...طق...
الكرار: مِنو في الباب؟... افتح يا ولد... الحاج، يا ولد ما تفتح الباب... يا ولد يفتح راسك،
افتح الباب...
الكرار ينبح، والحاج فتح الباب من اوّل نهرة، والجماعة كانوا جُوّا البيت...
: الســـلآم عليكم يا الكرار...
الكرار: مرحب حبابكم.. في شنو، اها... مالكم؟...
حاج العبيد: الخزين اخوك ده، جبناهو وجيناك، بيدور يقع لك فوق راسك.
الكرار: الزول ده الخِدمة كُللللها تاكِلآ علي أكتافي ديل... يضرب كتفيه بشدّة...
حاج الزين: يا الكرار اخوي إنت طوّل بآلك، واصبر. إيآك الكبير.
الكرار: الكبير ده عاد يسوّهو لعبة؟!!! انا يقول لي مكنة!!!...
حاج العوض يهمس للخزين: عليك الله امش علي اخوك ده اقعلوا فوق راسو. والله نحن ما فاضيين
للنبيح البينبح فيهو ده... امش عليهو حِلنا...
الخزين يتقدم نحو الكرار ويسلّم علي راسه.
الكرار: تاني العادة دي لا تعود لك... فاهم...
حاج العبيد: اها، عاد نحن النمشي... عشان انا بدور إندلى علي التِحتانية..
الكرار: علي بالطلآق ما تمرقوا بلآ عشا... يا ولد اقِفل الباب.
الحاج بسرعة شديدة قفل الباب.
الكرار: الرضيّة، يا مرا... العشا... العشا جيبوهو قوآم... يا مرا ما تتحركي... يا بنوّت...
البنتاوي اليشقكن.. جيبن العشا ده بِسرآع...الخ...

دكان حاج الصديق هو مُلتقى الجماعة يومياً بعد صلآة العِشا...
حاج الصديق: اها، الجماعة البارح تفقتُوّهُن؟
حاج العبيد: ايييي، وعليك امان الله، الكرار، اكان ما إتعشينا، اكان كُلنا لحقنا الأستبالية.
حاج الصِديّق (ضاحكاً): اخيرلكم تتعشوا فطير بي لبن، مالآ تتبتنوا.
احد صِبيان الفريق حضر للدُكان لبعض الأغراد. بايعه حاج الصديق، ورجع للونسة.
حاج الزين: دحين ده ما ود بلّة الولدوهو زمن البحر جاب السمك العميان؟؟
حاج العوض: لا،لا...دآك اخوهو. ده انا بالحيل بتظكروا. ده ولدوهو في السنة العضى فيها
الكرار حمارتو في اضانا يوما الحرنت، وابت تنط الجدول.
حاج العبيد: الكرار!!! الكرار، بعد سُوآتو السواها لينا في الحج. انا عاد تاني ماني حالف
ما اباريهو تب.
حاج الصديق: مالوا؟...سوّا شنو في الحج كمان؟؟؟
حاج العبيد: ها زول اسكُت سآكت... عليك امان الله، مشينا نشرب لنا شاهي عِن وآحد يماني
مسويلوا كفتيرة اللت شاهي. إنت يالكرار وهو لآبس إحراموا، ضاق الشاهي، وقال لليماني:
شاهيك ده بارد. اليماني قالوا: يا زول البراد فوق الجمر. كيف تقول بارد؟. الكرار قالوا:
يا زول قُت لك بآرد. اليماني قالوا: يا زول هذا الشاي اكثر من هذا يصير نار!!!. عليك امان
الله، الكرار مسك الكُباية، وقال لليماني: اها...اها...اها... وغسّل وشيهو بالشاي.
حاج الصديق كاد يطير من العنقريب من شِدّة الضحك...

منزل الكرار في حالة عدم وجوده، يكون هادئ. حاجة الرضيّة، وبناتها الثلآثة، والخير الإبن
الصغير للكرار عايشين في امان الله ما يتوتروا ويتعكر صفاهم إلا عندما يكون الكرار موجود
في البيت. الحاج الإبن الكبير للكرار دائماً يكون مع والده في الحواشة. يتوجه إليها بعد ساعات
المدرسة التي رفض الكرار التحاقه بها رغم شطارته، لولا تدخل عمّه الشاذلي المحامي في
الخرتوم. الحاج إشتهر في الفريق بأنه سريع جداً في تقفيل القريق، نسبةً لانّ الكرار يدفعه دفعاً
عندما تِنفتح قريقة في الحيضان ساعة السقي. تسمع الكرار: يا ولد اجِر... ما تتحرك يا خملة...
إنت من يوم ما مشيت المدرسة، انا عِرِفتك ما بتقضالك غرد... اسرع يا بجم، الموية دي كلها
رآحت، تروح روحك... والحاج شغال زي المكنة، وبسرعة الصاروخ حتي اصبح القريقة البيسدوها
اربعة رجال في ساعة، هو يسدها براهو في اقلّ من ساعة.
في حالة وجود الكرار بالمنزل، دايماً تكون الكهربا ضاربة. وعادي ممكن تلقى حلة المُلآح
مفننة في وسط الحوش، نسبةً لانّ المُلآح مِلحه ناقص او زايد زيادة بسيطة، ويا ويل حاجة الرضية
وبناتها لو سُكّر الشاي كان ناقص. حاجة الرضية بنت عم الكرار، تزوجها علي مبدأ غطي قدحك.
صامته لا تتحدث كثيراً، صابرة علي الكرار وعمايله. لسان حالها يقول: يا ريت لو قدحا دآك
اليوم خلوهو كاشف، بدل كشف الحال الباقي عليها. الحاج ود الكرار بعد نجح للجامعة عمّه
الشاذلي ارسله للدراسة في مصر، وفي الإجازات من البنطون للحواشة علي طوّل، والكرار في
كل صغيرة وكبيرة يعيره بالقرآية... إنت اصلك مِمآ مشيت للقرآية في مصر بقيت خايب،
وخِدمتك بقت ماياها...

قضى الحاج سنين الدراسة وتخرّج ثمّ رجع للبلد.
الصباح... حاجة الرضية تقلي في البُن، وعِدة الجبنة جنبها. الكرار جالس فوق العنقريب صامت
ووجهه مُكفهِر بلا سبب. جو البيت مكهرب في وجوده كالعادة. الحاج حضر ليشرب شاي الصباح
مع الوالد والوالدة.
الحاج (مُصبحاً): صباح الخير...
الكرار (مستغرب): صباح الخير!!! كمان دي خياسة جديده دي!!!؟؟؟ ده إياهو العلموك ليهو في
قشر المشيت إتقشرته فيها دي!!! والله قال صباح الخير، قال!!! كدي تاني اللسمعك تقول كدي.
جلس الحاج ويبدو انه يريد مصارحة والده في امرٍ ما، لكنه ملآوذ ومتوتر لدرجة. قال محدثاً
نفسه: الموت حق والحياة باطلة. الزول دا انا إتوكل واكلموا، زي ما تجي، تجي...

الحاج: يا ابوي انا...
الكرار: اها مالك بعد صباح الخير الجبتها دي. والله قال صباح الخير، قال!!! الله يخربك يا الخايب.
حاجة الرضية، المرا الهدية، صامتة تسمع في الكلآم وتقلي في البُن، حيث لايحق لها التدخُل بأعوج
او عديل.
الحاج: يا ابوي انا داير...
الكرار: داير شنو؟ ما تقول.
الحاج: يا ابوي داير اعرّس.
الكرار: كلآم زين. صافية بِت أعمّك الخزين دي راجياك.
الحاج: يا ابوي لكن...
الكرار: لكن شنو؟ بِت اعمّك، وإنت اولى بيها.
الحاج: يا ابوي لكن... لكن... انا ما بحبها.
الكرار، مستعدلاً في جلسته كأنما لدغته ضئيلة من الرقش في انيابها السُمُّ ناقع: قلت شنو؟ دي الخيابة
العلموك ياها في قشِر...!!!
الحاج: يا ابوي...
الكرار: البو... الخيابة البتقول فيها دي، الدخلآ شنو في العرس كمان؟؟؟!!!
حاجة الرضية قاعدة وصامته كانّ الكلآم لا يعنيها...
الحاج: يا ابوي كيف إتزوج وآحدة ما بحبها؟؟؟...
الكرار: يا ولد حبآك دقر... قافزاً من العنقريب، ومشيراً بأُصبعيه في وجه حاجة الرضية بالقرب
من عينيها حتي كاد يفقعهما... اوّل أُمّك المِتل العقرب دي، انا وكت عرستها كنت بحبها؟؟؟!!!...

Quote: الخزين واقع في حوض الطين والكرار من فوقه، ودارت معركة حآمية بين الأخوين

ههههههه والله يا ود المدير ذكرتني ود خالتن لي حد متلاتخ مع ود الحسين لحدي ما عرس بتن ليهم اها بعد داك قلتلو دحن ياود الخالة تاني بتكاتل نسيبك كيفن قال لي ان بقى عاوز التحتانية دي لاحدها الياخدا هههه

كدي نضمك دا انقلو لمنتديات الباوقة بهناك

الدقر لمن لا يعرفه: هو الدابي، او الدبيب.
يعني بألأفرنجي كدي، الثعبان...

قريقة: جمعها قريق. حفرة تظهر فجاءة
في اثناء سقي الخدار، وتقوم بشفط
الموية بطريقة سريعة سرعة مذهلة.
في ديار الشايقية تثسمى الكركي،
واظنها نوبية. الغناي قال:
عذابي معآك إني غمامة وإنت كركي ما محدود...

ود المدير ... غايتو سرد مباااالغه ..

والرضية الهاديه ورضية تدخل الجنة توووووووووش ههههههههههه ....




واصل عليك الله ما تقطع ..

Quote: اوّل أُمّك المِتل العقرب دي، انا وكت عرستها كنت بحبها؟؟؟!!!...

هههههههههههه
مبالغة يا ود المدير الرضية دي

يا سلام عليك ياخ
متابعين

Quote: ههههههه والله يا ود المدير ذكرتني ود خالتن لي حد متلاتخ مع ود الحسين لحدي ما عرس بتن ليهم اها بعد داك قلتلو دحن ياود الخالة تاني بتكاتل نسيبك كيفن قال لي ان بقى عاوز التحتانية دي لاحدها الياخدا هههه

هههههههه، يا عمدة،
زولك كتللولو قلبو خلوهو طبق
الوَردة وفكا التحتانية...

مِتلآقطين: مِتكاتلين.

اقعلوا فوق راسو: صالحوا.

Quote: والرضية الهاديه ورضية تدخل الجنة توووووووووش ههههههههههه ....

أُختنا عفاف، سلآم.
غايتو في الرضية صدقت تب،
لكن الكرار ود حِتيل ده يودوهو
وين بعدين؟

Quote: هههههههههههه مبالغة يا ود المدير الرضية دي يا سلام عليك ياخ متابعين

تسلم يا محمد البشرى الخضر،
بالله عمّك الكرار المرا المسكينة دي،
خفس عليها لآ إيدا لآ كراعا...

تشكر يا معاوية على واحة الفرح وسط الأحزان.

البو: الزول ده بو، يعني فارغ، والبو اصلاً ولد الناقة او جلد
الحوار يحشى تبن او غيره ويقرب من الناقة فتخدع، فتدر.
ويسمى ايضاً العبوب...

Quote: تشكر يا معاوية على واحة الفرح وسط الأحزان.

يا العوض اخوي، ساعة، فساعة،
وربنا يسوي الفيها الخير...

...

Quote: الحاج (مُصبحاً): صباح الخير... الكرار (مستغرب): صباح الخير!!! كمان دي خياسة جديده دي!!!؟؟؟ ده إياهو العلموك ليهو في قشر المشيت إتقشرته فيها دي!!! والله قال صباح الخير، قال!!! كدي تاني اللسمعك تقول كدي.

ود المدير
بالله الحكايه تمشي تقصها علي جعفر كرم الله
ولكم جميعا التحية

Quote: ود المدير بالله الحكايه تمشي تقصها علي جعفر كرم الله ولكم جميعا التحية

التحية لك أُستاذنا علي الكرار،
بس ما تقول لي جعفر باقية عليو
نفر الحكاية دي...

Quote: كدي نضمك دا انقلو لمنتديات الباوقة بهناك

نقلناهو يا عمدة...

Quote: غايتو الشافنى محزمة وملزمة مع الرضية فى الذراعة ما كذب .

غايتو يا عفاف، شوفتك للكرار
اجدعي الطورية وإتخارجي...

يا ود المَدَير،
ياخي قدر ما قتّ أعزلي جزئيه من نضميك السمِحْ دا غلبني!
انت آخينا راسك دا مقدود؟
طلبتك بالذي انشاكَ لا تحرمنا من جِنِس دا..
كتّر خيرك كتير..

أخوك،
[المطرطش]

Quote: يا ود المَدَير، ياخي قدر ما قتّ أعزلي جزئيه من نضميك السمِحْ دا غلبني! انت آخينا راسك دا مقدود؟ طلبتك بالذي انشاكَ لا تحرمنا من جِنِس دا.. كتّر خيرك كتير.. أخوك، [المطرطش]

محمد عبد الرحمن يا مطرطش،
اقعد عآفية معانا في حوش بكري
ده، وما بنقصر معاك تب.
حبابك عشرة، وكتّر خيرك كتير
علي المرور...

```

~

Quote: ~

يعني دار تثبت إنك حنداك؟
خلاس ياخينا..
[أكبر حنداكي البورد]..
ارتحت؟

Quote: يعني دار تثبت إنك حنداك؟ خلاس ياخينا.. [أكبر حنداكي البورد].. ارتحت؟

السجمان، العيد يتبارك عليك...

Quote: السجمان، العيد يتبارك عليك...

علينا وعليك يتبارك!


___
يلا..
لا تكتِّر الحجِّي

ود المدير كل عام والولاد بخير

امنيات صادقة بواقع ارحم يا صاحب
اريتك طيب


مودتى والاسرة وعمك عبيد متابع ما تكتب


بسلم عليك

Quote: ود المدير كل عام والولاد بخير امنيات صادقة بواقع ارحم يا صاحب اريتك طيب مودتى والاسرة وعمك عبيد متابع ما تكتب بسلم عليك

ابو النسب، كل عام وانت والأسرة بخير، والعيد
يتبارك عليكم.
عليك الله سلآم خاص للعم عبيد، وقول ليهو
إن شاء الله نتلآقى إنت طيّب ونحن طيبين
يابركة العيد السعيد...